حصل خير
10-13-2012 01:20 PM

حصل خير

الفاتح جبرا
[email protected]


(الرسالة أدناه وصلتني عبر الإيميل)

الأستاذ الفاتح جبرا
سلامي وأحترامي
على الرغم من أعجابي ببعض ما تكتب لكن مقالك الاخير بعنوان (مش كدا وبس) دا دقست فيه اولا محاولتك الاخيرة بالظهور بمظهر رجل الشارع العادي المكافح،، دي فشلت فيها مش كدا وبس، بل ظاهر للعيان ان تحليلاتك كلها مبنيه على السماع من الناس الحولينك الكادحين ..البيركبوا الحافلات وبيمشوا المستشفيات العامة . لانه يظهر من صورتك الروقه والنعمه ومش كدا وبس بل يظهر انك ولفترة طويلة كنت تعيش في بلاد تنوم وتصحى على (مخدات الطرب).. و رجعت قريب لوطن يموت كل يوم من الفقر والضنك.. مش كدا وبس .. كمان يظهر أنك رجعت وبديت تبني في الضل وبقيت في التشطيبات الأخيرة.. مرحلة ادخال الكهرباء ..وناس الكهرباء دفعوك تمن عمود الكهرباء !!
يا حليلك وماعارف غيرك ما قادر يدفع حق عمود الملاح لمريضه الفي المستشفى .. مش كدا وبس .. بل ما بيقدر يشتري كهرباء ب10 جنيه في الشهر عشان اولاد يقدروا يذاكروا ،، دا لو اصلا قدر يوديهم المدارس .. هسع أنت بتدفع للكهرباء كم في الاسبوع؟ 50 ج ؟؟ طبعا من قرائن الاحوال يستشف من كلامك عن جارك العنده صينية دجاج بايته في التلاجه . انك ساكن في (حي راقي) وبالتالي بتصرف كهرباء تقيلة على المكيفات .لانه البيوت في الاحياء الكادحة تلاجاتهم ما بتبيت فيها صينية دجاج.. دا لو وجدت التلاجه من اصلها . مش كدا وبس .. أحيانا لمن يكتر عليهم الفقر، الجوع، الذل المر الطالع من جوف الاملاق .. يضطروا يدفنوا رؤسهم في الرمال . ويذبحوا كبريائهم .. وينتظروا بناتهم لساعة متأخرة من الليل عشمانين في كيس فيه شوية سندوتشات فول وطعمية ولا بيرقر حتى للأطفال الناموا من الجوع ويمكن لفطور بكره كمان في الحالة دي قانون الظبط والربط بتاعك ما بيشتغل هنا !!
نصيحتي ليك ما دام جئت البلد وقدمت أستقالتك من عضوية (أبطال الكي بورد) الفي الخارج خلي مسالب السلوك عند رجل الشارع العادي وكرس وقتك لمحاسبة الحراميه الفوق وأبتدئ بجارك وأسأله لماذا لم ينفق فضل زاده ( صينية الدجاج ) !!

اختك إلهام
عضوة قديمة في نادي المرارة المفقوعة

الرد :

الأخت العزيزة إلهام
التحايا والود وأرجو أن تكوني في أحسن حال

لم أضحك مؤخراً في حياتي كما ضحكت وأنا أقرأ في رسالتك التي ما أن أنتهيت من قراءتها حتى تنهدت في داخلي قائلاً (الما عارف يقول عدس) .. بداية العبد لله يعيش في بلاد تنوم وتصحى على مخدات (الكُرَّب) لم يخرج منها خلال ربع قرن من الزمان إلا لاسابيع قلائل ليس (للسياحة) بل (للسباكة) ولفتح شرايين قلبه المعطوب وفي مصر (القريبة دي) يعني ما (ألمانيا).. يعني يا ستي لا من (أبطال الكيبورد) الفي الخارج ولا من أبطال (النينجا) .. وعشان أختصر ليكي موضوع (صورتك المقلوبة الخاتاها لينا دي) وأجيكي من الآخر أقول ليكي (وما طالباني حليفة) والله ووالله ووالله وأقسم بالله الواحد الذي لا إله غيره أنا بكتب ليكي هسه في الرد ده والبيت مافيهو تعريفة ... ما عندي ولا جنيه وااااحد أو ما يعادله بأي من أنواع العملات الحرة التي تسرق من منازل المسئولين .. لا في (دولاب) ولا في (بنك) لا عند (زول) ... يعني (على الحديدة) والمشكلة ذااتو إنو الزول ما عندو حاجه يبيعها عشان يطلع من حالة الفلس المزمن دي لا (قطعة واطة) ولا (بيت) بى إسمو ولا (مزرعة) ولا متر واحد في أى حته (في العالم) حتى العربية الراكبنها دي شايلنها من البنك بالٌاقساط ومتعثر في دفع كم قسط وإحتمال كبير نرجعا ليهم ونخلص (ونركب الحافلات القلتيها دي) عشان القسط كبير وباقي الماهية بينتهي من يوم عشرة في الشهر، ده غير الجرورة المتراكمة (الطيب) سيد البقالة ...(محمد) بتاع اللبن ...(الهادي) سيد كشك الجرائد ...(عثمان) بتاع المغلق ومدارس الأولاد عاوزين قسطين ليهم شهور .. وحتى المطابع عاوزة مننا قروش عشان قاعدين نطبع الكتب ونوزعها هدية للقراء والمعارف والأصدقاء والباقي ما بيكفي قيمة الطباعة .. !
ما عارفك جبتي حكاية الروقة والترطيب دي من وين؟ أقول ليكي حاجة ؟ مرات حبوب الضغط والسكري والقلب بتخلص بالأسابيع عشان ما قادر أشتريها .. (شفتي النعمة دى) .. واهو ماشين بي نظرية (الحاوى) وحامدين شاكرين وحتى أقرب الأصدقاء ما بعرفوا الحكاية دي !
طبعا إحتمال كبير ماتصدقي الكلام ده لكن دي الحقيقة (والله على ما أقول شهيد) وممكن تسجلي لينا زيارة حيث نسكن في حينا الشعبي (بيت المال) يعني ما في (المنشية) أو (كافوري) عشان تعرفينا عن قرب وتصححي الصورة المقلوبة بتاعتك عننا .

نحنا يا بتنا بنفتخر إنو من عامة الناس وإنو نشأنا في أسر فقيرة (لكنها عرفت تربينا) على القيم النبيلة والأخلاق الفاضلة والتي سوف نظل عليها حتى نلقى الله والحمدلله لم نكن يوماً نتطلع لمنصب أوجاه أو مال (ما لدنيا قد عملنا وكده) مع إنو كل النوافذ مشرعة لنا .. بل تكفينا (السترة) !
عشان العزومة ما تكون عزومة مراكبية ده التلفون .. أهااا بي قصة التلفون دي (أزيدك من الشعر بيت) العبدلله شريحتو الأساسية خط سوداني 0123650065 لكنو مقطوع فاتورة ليهو شهرين تلاته (بالله إتأكدي منو) وهسه بستخدم شريحة ساكت اللى هي بالرقم (...........) !! مرات نشحنها بي خمسة ... مرات بى جنيهين (حسب التساهيل) ..... هسه يا بتنا في داعي لكشف الحال ده؟ عموماً أنا سعيد برسالتك دي عشان يعرف القراء إنو (الفاتح جبرا) ده زول (كحيان) ساكت ولو خاتين ليهو صورة غير كده أحسن يغيروها ، يلا في إنتظار مهاتفة ثم زيارة... وأكررأسعادتي برسالتك ودمتى في حفظ الله .. وعموما حصل خير!!

كسرة :
يقول المسيح عليه السلام (ماذا يكسب الإنسان إذا ربح العالم وخسر نفسه) .. الفلس ده أحسن لينا يا بتنا لأنو هذه الحياة أتفه من أن يخسر الإنسان فيها نفسه وبكرة القريبة دي ممكن تفتحي الجريدة تلاقي خبر يقول ليكي (وفاة الكاتب الساخر الفاتح جبرا إثر نوبة قلبية) !!

كسرة تانية :
المشفقون يمتنعون !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟




تعليقات 54 | إهداء 0 | زيارات 7289

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#507822 [احمد عبدالله]
0.00/5 (0 صوت)

11-10-2012 12:43 PM
الله علي التواضؤ دا الكويس انو وجدت رقمك اخيرا زي ما قال منوفلي قبضتك قبضتك يا جبرا


#489540 [mak]
0.00/5 (0 صوت)

10-15-2012 04:01 PM
الظاهر اخ الفاتح جبرة انت ناوى على هبره وده تمهيد وتغطه.والمابتحقلو
قول ليهو ليك يوم يابعشوم
وفى ناس عايشه فى مجرات اخرى برضو


#489302 [خليفه]
0.00/5 (0 صوت)

10-15-2012 10:43 AM
الوضع الطبيعى تحس مشاكل الناس بغض النظر عن وضعك المادى
يعنى ياجبره لو بكـره اصبحت غنى بتترك الكتابه عن الغلابه
وأنت بتشرح فى حالك يعنى انت فقير ياراااااااجل فى عالم تحت تحت تحت خالص
الرساله لاتستحق كل هذا الاهتمام الا اذا000000000000
اكتب كما عهدناكـ ...ولكـ كـل الود,,,,,,,,


#489206 [ابراهيم الحسين]
0.00/5 (0 صوت)

10-15-2012 08:50 AM
م بسم الله الرحمن الرحي

زان ال... بينادو بزواج القاصرات السلام عليكم جبرا الله يطول عمرك ويقصر عمر حكامنا

الحقيقة تألمت جدا من الهام ال ,,,,خلت بنات جنسهاتحت التراب وانا حاسى بالحكاية دى من

زمان الله يكون فى عون بناتنا فى عهد الكيزان ال.... بينادوا بزواج الاطفال القاصراتوالمنقول تحت السطر ده ::::::: يعطيك الله الصحة يل ابو ناجى

ويظهر عليكى يا الهام من المجموعة المذكورة فى كلامك

يضطروا يدفنوا رؤسهم في الرمال . ويذبحوا كبريائهم .. وينتظروا بناتهم لساعة متأخرة من الليل عشمانين في كيس فيه شوية سندوتشات فول وطعمية ولا بيرقر حتى للأطفال الناموا من الجوع ويمكن لفطور بكره كمان في الحالة دي قانون الظبط والربط بتاعك ما بيشتغل هنا !!


#488974 [حقيقي]
0.00/5 (0 صوت)

10-14-2012 06:04 PM
اغلب مقالاتك جميلة وتمس المواطنين ... واغلبنا من الكادحين ... ولكن المقال غير احترافي


#488930 [ود الخضر]
0.00/5 (0 صوت)

10-14-2012 04:38 PM
اولا الغني ما عيب العيب عدم الشكر لله للنعمة هنا بيت القصيد ماذا نعنى بشكر النعمة
1- احساسك بما حولك من جيرانك واهلك الذين فى امس الحوجة
2- الانفاق فى عمل الخير
3- ان لا تهدر مالك في فساد (يعنى تقوم تدعم ناس هلال ومريخ بمليارات لشراء لاعب فى حين المستشفيات لايوجد بها قطن
وعمل الخير ابوابه كثيرة
وأنا بقول للأخت بان سيدنا عثمان ابن عفان كان من اغنى اغنياء اهل مكة واعزها ولكن كان كريما رحيما بالمؤمنين
يابنت لازم الزول يكون فقير عشان يحس بالناس
ما كان يا استاذ جبره كل التبريرات عشان الاخت تفهم


ردود على ود الخضر
United States [حقيقي] 10-14-2012 06:51 PM
احسنت


#488858 [احمد]
0.00/5 (0 صوت)

10-14-2012 02:28 PM
استاذ شيل الصورة دي من الجريدة وختليك صورة تعبانه حتي تصدق الناس انك تعبان مثلهم
الله يديك طولة العمر نحن نسعد بقراتك ونفش غبنا بكتاباتك الجميلة


#488677 [منير محمد نور]
5.00/5 (1 صوت)

10-14-2012 10:22 AM
كم انت كبير ياجبرا برغم قساوة المحن
كسرة : اخبار خط جبرة السوداني المقطوع شنو ؟


#488675 [abdelhamid]
0.00/5 (0 صوت)

10-14-2012 10:19 AM
اقول ليك حاجة يا جبرة .... شيل ورقك وفك البيرك... والله مع الإنقاذ دي يبيوعك هدومك ويجروك عريان ... الجماعة ديل ماشغالين بي البيحصل للناس من جوع وفقر مع انو ثرائهم فاحش وفقرتهم بقت سمينة


#488635 [ود الجد]
4.00/5 (1 صوت)

10-14-2012 09:21 AM
فليحيا الفاتح جبرة ولا نامت اعين الجبناء والمأجورين


#488578 [ودالنيل]
5.00/5 (1 صوت)

10-14-2012 04:52 AM
والله اغرورقت عيناي بالدمع مماقراته وكدت افجر بالبكاء ليس لحال جبرة وحده لكن انفجر بالبكاء لعامة الشعب السوداني الصابر المكلوم ٌفكلنا (جبرات )قرات كل التعليقات ولم الوم احدا علي ما كتب والله ينتقم من الظالمين في الدنيا قبل الاخرة
الكل اعلن تضامنه والجميع موجوعين وصابرين حتي الهام صاحبة الرسالة وجدت لها العذر فيما كتبت
فهي تظن ان الفاتح جبرة مثله كباقي الصحفيين المطبلاتية الذين اشترتهم السلطة وفتحت لهم خزائن الشعب ينهبون منها كيفا يشاءون!!!!؟؟؟؟
وهي محقة فيما قالت فهنالك كثير من الصحفيين يرافقون المسوؤلين في كل رحلاتهم الخارجية والداخلية ويكتبون ويمجدون ويطبلون ويهللون ويكبرون ويكتبون ويسممون ويخدرون ويقتلون روح الشعب بعد بس سممومهم بكتاباتهم وتهليلهم لهذا وذاك وتطبيلهم لمسوؤلي الداخلية والخارجية
هؤلاء يملكون عمائر في كافوري والطائف والرياض؟ فهي كانت تحسبك كذلك وانت بردك هذا اوصلت فهمك للجميـــــع ياابو ناجي نسأل الله ان ينجيك من كربات يوم عظيم.


ردود على ودالنيل
United States [فرقتنا] 10-15-2012 05:51 AM
لانشفق عليك فهو فهو خيارك التمسك بالقيم والمبادئ ولكن اشفقنا علي حالنا واهلنا فانت بردك هذا لقد


#488549 [khalid m ali]
0.00/5 (0 صوت)

10-14-2012 01:04 AM
اين موظفى الخدمه المدنيه والافندي بتوع سنه 1960 الى 1975 ليحكوا لنا كيف كان حالهم وهم الطبقه الوسطى فى المجتمع قبل الاستحكامات العسكريه البغيضه التى دفعتها لنا الاعيب اولاد الطوائف ومكايداتهم الطفوليه التى نهت البلد .


ردود على khalid m ali
United States [عبد الواحد المستغرب أيما إستغراب!!] 10-14-2012 01:06 PM
أنا أتشرف بأنى كنت واحدا منهم يا إبنى وكنا معينين تحت حاجه كده إبتدعها الراحل العظيم حسين الهندى عندما كان وزيرا للماليه ودى ليها قصه تانيه وكان مرتبى (11)جنيه سودانى بعد خصم الجمع والعطلات الرسميه وكنت أقبض خمسه جنيه ونصف كل خمسة عشره يوما والخمسه جنيه ونص دى حتى لا يختلط على أجيالنا الذين لم يحظوا بذلك الجميل كانت تساوى (خمسمائة قرش) مضروب فى عشره لمزيد من التوضيح كانت تساوى خمسه الف مليم!!وعليك ان تتخيل كم كان يساوى المليم فقد كان له حضور على أيامنا ؟!!وزمان كان يقال للشخص الذى لا ترجى منه فائده (إنت ما بتساوى مليم احمر ) وبعدها إختفى المليم ولم يعد مبرئا للذمه مع ملاحظة ان المليم إختفى عقب نيل السودان لا ستقلاله واصبح لدينا حكم وطنى !! وحل محل المليم (التعريفه) وهى كانت تساوى (نصف قرش) كأقل قيمه نقديه.. بعد إندثار المليم وإختفت هى الاخرى، إنتقل تهكم الناس من قول (الزول ده ما بساوى مليم احمر!!) لتحل محله (الزول ده ما بساوى تعريفه!!) وأصبح القرش هى العمله الاخيره المبرىء للذمه وكان ذلك حتى نهاية الستينات ولما كان القرش يشترى به كوم بصل ترك الناس حكاية (الزول ده مابساوى مليم ثم تعريفه فصارة البصله هى مقياس المعايرة إن كان شخصا غير مفيد او سوى فيقال (الزول ده ما بيساوى بصله) ويبدو أن الناس تركوا هذه المعايره وإنتقلوا الى أشياء هى أقل قيمه من البصل !! وأنا إقترح عليكم أن تقولوا للشخص الغير مفيد والغير سوى (إنك لا تصلح أن تكون رئيسا لجمهوريتنا وهذا فى ظنى هو أبلغ وصف لشخص غير مفيد وغير سوى وفاشل!!)والشىء المدهش أن لانجد من يتحدث ليكشف لنا الاسباب التى تؤدى الى تدهور عملتنا كلما تغير نظام مع ملاحظة أن تدنى الوصف وصل العظام !!.


#488519 [عبد الواحد المستغرب أيما إستغراب!!]
5.00/5 (1 صوت)

10-13-2012 11:49 PM
طيب ياجبرا طالما الفلس ده نعمه ليه عاملين ليكم قومه وقعده مع جماعة الانقاذ المصرين على كنز الذهب والفضه الحتكوى جباههم يوم القيامه بعون الله !! وأنا سعيد بأن هناك حامدين شاكرين نعمة الفلس لكن فلس يكون معقول مش الواحد يكون على الحديده لدرجة إذا داهم المرض واحد من الابناء لاقدر الله يذهب بيه لاقرب مركز صحى ويطلبوا منو الشىء والشويات وعلى بال ما يمشى ويجى حامل الشىء والشويات يلقى ولدو جدعوه بره المركز بعد أن تحول من إنسان كان ينبض بالحياة الى جثه هامده ويبقى الهم همين لانه لا بد من ستر الجسمان والجسمان يحتاج لكفن وبقية متطلبات ايام العزاء الذى لايمكن تجاهله تحاشيا لشيل الحال إذا ما أغفل ويبقى الواحد وفلسه لبانه فى خشم نسوان الحله الماعارفات البير وغطاه!!.


#488499 [حسن]
0.00/5 (0 صوت)

10-13-2012 10:20 PM
مافى زول بيصدق زول

الناس قالو انت كتبت الرساله

ورديت على نفسك

دايما نظرية المؤامره

الناس بقت مفتحه لدرجه مخيفه ادت نتائج عكسيه

ايييييه نظرية المؤامره ارجوك اكتب عنها

يا جبرا هل انت جزء من نظرية المؤامره العاملنها الكيزان للشعب السودانى ؟؟

اخوى لقى طعم المويه متغير فقال ديل الكيزان عايزين يسممو الشعب السودانى

انا قلت ليهو لو كتلونا ما راح يلقو عبيد يشتغلو ليهم عشان هم يلمو القرش

فى الحسابت البنكيه خارج البلد ويبنو العمارات وينكحو النساء

لكن برضو ممكن يكونو عايزين يبدلونا بعبيد تانين من الحبشه مثلا


ردود على حسن
United States [ود موقة] 10-14-2012 08:47 AM
الاخ حسن:
أصبت الاستحسان في ردك الحسن

الاستاذ جبرة:
أمش ساي يا جمل الشيل .. الهيوهيو ما بعتر مسيرك .. متعك الله بالصحة


#488492 [ابوحامد]
0.00/5 (0 صوت)

10-13-2012 10:03 PM
حقو يا اخوانا نعمل تحويل رصيد لعمنا الفاتح كل حسب استطاعنه جنيه اثنين ثلاثه لغاية ما يشغل شريحتهبداية 3 جنيه


#488489 [khalid m ali]
0.00/5 (0 صوت)

10-13-2012 09:46 PM
اخذ احد رجال الاعمال يشرح فى احد الاذاعات عن انطباعه عند زيارته للهند قال عند وصوله للهوتيل شاف صف من الناس خلف الفندق لا نهاية له فسأل سائقه عن ذلك الصف فعرف ان فقراء ينتظرون دورهم لاخذ بعض الطعم من زبالة الهوتيل , عندها تبرع بكتير من المال لمعظم الصف , رد عليه احد الحكماء بانه لم يشعر بحالتهم او شفقته لم تكن كافيه الا فى حاله جرب ان يقف بنفسه فى الصف وياكل من نفس طعام فقراء الصف < يعنى اليده فى النار ما ذى اليده فى المويه>


#488484 [ابن الشمال]
0.00/5 (0 صوت)

10-13-2012 09:38 PM
الكلام القالتو الاخت / الهام كلو عادي ومقبول و مبلوع الا السطر الرابع قبل الاخير (يضطروا يدفنوا رؤسهم في الرمال و يذبحوا كبريائهم وينتظروا بناتهم لساعة متاخرة من الليل عشمانيين في كيس فيه شوي سندوتشات --- )الي اخر الكلام البيفقع المرارة-- بصراحةشديدة انا لي عشرة سنة ما جيت السودان -( جزء من العيال معاي و الجزء الاخر في الجامعات في السودان و خارج السودان و بنبني في بيت يلمنا في اخر يامنا ) لو حال السودان بقي كدة - فعلا الانقاذ يقت كارثة و خطر حقيقي علي السودان والسودانيين .


#488479 [deing]
0.00/5 (0 صوت)

10-13-2012 09:24 PM
اتخيل تكون شافت جلابيتك البيضة المكوية الخاتيها في غلاف احدى كتبك ...!! يكون يا ربي ؟؟؟


#488465 [سوداني ضائع في بلاد الله]
0.00/5 (0 صوت)

10-13-2012 08:44 PM
جبرا ردك على هذه الأخت خطأ فظيع من زووووول عاقل زيك كده - جبرا البيوت أسرار - وإستعينوا بقضاء حوائجكم بالكتمان - والشكية لغير الله مذله - والرسول (ص) أعظم البشر كان فقير ويسكن في بيت من الطين ويرعى الغنم وعلّم أمته الصبر والإستعانه بالله ورغم ماذكرت حالك مستور واحمد الله عليه - وهٌناك أٌناس يفترشون الصحراء لا ماء ولا حمام وأنت احمد الله بتستحمى وتلبس عمتك أبو عشرة امتار دي - وراكب عربية بالتقسيط وبتأكل وتشرب - هٌناك الكثير من الشعب السودان وخاصة المغتربييين تركوا البلد وعايشين في ضنك ومصير مجهول لا بيت وانت تسكن في بيتك ولا تعليم لأبنائهم وانت اولادك في المدارس - يا اخى أنظر لما هو دونك ترى العجائب امشى على دارفور وقرى الجزيره وحتى ضواحى الخرطوم الناس يجلبون الماء لبيوتهم بالحمير وانت يصلك الماء لداخل بيتك - يا جبرا انت كبير وكبير عند قراءك ومعجبيك يجب ان تكون مرفوع الراس للغلابة والمعدمين الذين يرون في ما تكتب متنفساً لهم وهٌم صابرون على حالهم .

كسره : الله ينتقم من حكومة الإنقاذ والوزراء اللي فيها التي تركت الشعب السوداني بهذه الطريقة وامثال جبرا يكشفون حالهم للناس - كما هي كشفت حالنا في بلاد الغربة . نسأل الله العافية ليك يا جبرا والعافية للشعب السوداني ومعهم المغتربيين في الخارج .


ردود على سوداني ضائع في بلاد الله
United States [واحد تانى] 10-14-2012 02:54 AM
كلامك صح .


#488458 [طاهر محمد]
0.00/5 (0 صوت)

10-13-2012 08:30 PM
هكذا هم من تربوا على المثل والقيم ودمت بعافية وصحةيا استاذ الفاتح


#488456 [ابو البنات - الكاملين]
5.00/5 (1 صوت)

10-13-2012 08:25 PM
انا كنت بحترمك شديد . بس بعد مقالك ده احترمتك اكثر .


#488444 [احمد]
0.00/5 (0 صوت)

10-13-2012 08:06 PM
كواحد من اولاد حى بيت المال وابوروف (وهم بالمناسبة تيمان لمن لا يعرفون) اشهد بصحة ما أورده جبرا اعلاه . لكن ياجبرا بينى وبينك فتيتو شديد وكشف الحال ما لى قدر ده ؟؟!! بعدين (ماذا يكسب الإنسان إذا ربح العالم وخسر نفسه) دى قطع شك أدتك ليها المدام ولا انا غلطان. لكن ياود جبرا نمرة موبايلك دى زى ما قال واحد من الاخوان بتجيب شبهة الترطيبة خاصة وانها عاملة تمانية .. يعنى الا نسافر كوستى عشان نمر بالطويلة ولا شنو؟؟؟ الله يديك العافية ياحبيب


ردود على احمد
United States [معرّج] 10-14-2012 11:49 AM
المشكلة تمشي لي كوستي عشان الطويلة، يفاجأك واحد بي جوكرين !!


#488432 [حسن]
0.00/5 (0 صوت)

10-13-2012 07:40 PM
الاستاذ جبرا

انا امتنعت .... لاني اشفقت عليك


#488431 [mohy]
0.00/5 (0 صوت)

10-13-2012 07:34 PM
يا مسطحين المفال كلو كاتبو جبرا أرجعوا بس شوفوا الأسلوب


#488428 [كباريت]
5.00/5 (1 صوت)

10-13-2012 07:19 PM
قسم بالله لو منك كنت أديتها على رأسها وكسرت دماغها بالحيط!! وردك نفسه رد عاجز، بمعني هل لابد أن أكون فقيراً حتى أكتب عن الفقراء؟ هل لابد أن أكون من الطبقة العاملة الكادحة حتى أحس بألم الفقراء؟ ليس هناك من هو أكثر لؤماً من فقير طويل اللسان وقليل الإحسان. ياخي الفقير كفارته صيام شهر والمستطيع كفارته إطعام مسكين؟؟ دهــ حكم ربنا اللي خلقنا مش حكم بشر؟؟ لقدعمت (العفونة) والسرقات والرشى والمحسوبيه والعصبية القبلية والولاء كل أنحاء السودان حتى أصبح الاتهام يطول كل إنسان وكل شريف. يا اختنا يا إلهام ليس معك حقك في مهاجمة الفاتح جبرا هكذا.... هذا إن لم يكن الفاتح جبرا اخترع هذا الخطاب ورد عليه؟؟؟ ثم أقول لك حاجة الغني خير من الفقير رضينا أم أبينا؟؟؟؟؟ وليس كل غني بسارق؟؟؟؟ كما ليس كل فقير بشريف؟؟؟ ثم من أين أتيت يا إلهام بحكاية انتظار الأسر لبناتهم حتى آخر الليل لكي يعدن بشوية طعمية وفول؟؟؟!!! هذا تعميم مخل وفيه إفتئات على كرامة الأسر الفقيرة وتنقيص من كبريائهم؟؟؟ يا إلهام يا أيها الرجل المختفي خلف الكي بورد اتق الله ولا تظلم الناس هكذا؟


#488421 [Brighton]
0.00/5 (0 صوت)

10-13-2012 07:08 PM
الذين يكتبون على غير هدى وبصيرة , ربما من اجل الظهور. يبدو ان هناك ازمة ثقة فى المعلومة نفسها تواجه هؤلاء.


#488400 [ود الشريف]
5.00/5 (1 صوت)

10-13-2012 06:33 PM
ألمعيا إلهام أن الفاتح أحببناه من خلال أبداعهولم نتشرف بلقاءه حتى الآن فهو يسكن دواخل المساكين والمظلومين والغبونين والمهمشين فكيف بكون سطر باسان حالهم إبداعا ونقدا ساخرا وفاقد الشئ لايعطيه بس أظن أن الحكم على الأشخاص مما يبدو من مظهرهم وأوعي تقبلي بزوج إذا لم تكوني متزوجة بهذا الفهم المظهري وأكثري من قراءة كتب التاريخ وعلم النفس فإنها علوم تقربك من الحكم على الأشياء بواقعية وعقل


#488386 [زيزو]
0.00/5 (0 صوت)

10-13-2012 05:57 PM
متعك الله بالصحة والعافية ..

وربنا يطول في عمرك.. وعمرنا على طاعته..

ونشوف بلدنا العزيز في أحسن حال..

لا فقر.. ولا جوع.. ولا حروب.. ولا ظلم..

وما تشوف شر إن شاء الله...


#488385 [أنا أمدرمان]
5.00/5 (1 صوت)

10-13-2012 05:53 PM
بسم الله الرحمن الرحيم والحمدلله رب العالمين والصلاة والسلام علي أشرف المرسلين سيدنامحمد وعلي آله وصحبه أجمعين,ولاعدوان إلاّ علي الظالمين,
أمابعد
لك التحية والتقدير وأنت تعاني ما يعانيه غالبية أهلنا الطيبين في شتي أنحاء البلاد وهم صابرين ومصابرين علي جمرة -الإنقاذ- التي تحرق الأخضر واليابس في البلاد صباحاً ومساءاً,فنسأل الله لك ولأهلنا جميعا حسن العاقبة وتفريجاً عاجلاً للكرب.
أما الظالمين الذين يكذبون علي الله مدّعين تحكيم شرعه نقول لهم إن دولة الظلم تدوم ساعة ودولة الحق تدوم إلي قيام الساعة,وأن الحق سبحانه يقول {قُلْ مَن كَانَ فِي الضَّلالَةِ فَلْيَمْدُدْ لَهُ الرَّحْمَنُ مَدًّا حَتَّى إِذَا رَأَوْا مَا يُوعَدُونَ إِمَّا الْعَذَابَ وَإِمَّا السَّاعَةَ فَسَيَعْلَمُونَ مَنْ هُوَ شَرٌّ مَّكَانًا وَأَضْعَفُ جُندًا {75} وَيَزِيدُ اللَّهُ الَّذِينَ اهْتَدَوْا هُدًى وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ مَّرَدًّا} سورة مريم.

بخصوص الكسرة الثابته أقترح عند وصول عدد "الواوات" الي ١٢ أن يتم تغيير حرف"الباء" الي"ميم" في الكلمة رقم ٦ مع خالص إحترامنا للشرفاء من القانونيين في السودان "الفضل".

إنها لاتعمي الأبصار ولكن تعمي القلوب التي في الصدور...
والحجيج يلهجون بالتلبيه ممنين أنفسهم بالوقوف علي صعيد عرفات الطاهر في هذه الأيام المباركه نسأل الله السلامة والعافيه واللطف والفرج ونعوذ بالله من قلبٍ لايخشع وعين ٍ لا تدمع ودعاءٍ لا يُسمع ...اللّهم إنّا نبرأ إليك من نفاق وظلم وجور وفسوق أهل الإنقاذ...اللّهم خذهم أخذ عزيزٍ مقتدروأجعل كيدهم في نحرهم وإرنا فيهم عجائب قدرتك فإنهم لايعجزونك..
وسيعلم الذين ظلموا أي منقلب ينقلبون...
تعس عبد الدينار...تعس عبد الدينار... تعس عبد الدينار...


ردود على أنا أمدرمان
United States [mustafa] 10-14-2012 11:18 PM
اقترح تحويل النون الى خاء في نفس الكلمة لان نوم الظالم عبادة كما يقولون


#488379 [ساميه]
2.00/5 (1 صوت)

10-13-2012 05:37 PM
سلام ياناس .. يعنى يالهام ياختى هسع مالك ومالنا مقطعه مصارينا الاصلها ما فضل فيها شىء من كثرة الالم ومرارتتنا الانفقعت من المغائص ... يعنى الله من جودوا وكرموا كان خلقك بخلقه جميله خلقوا ما تريحك .. يعنى استاذ جبرا القيافه دا كان فى داعى اوسبب يخليكى تاليمهوا وتالمينا معاهو بجنس كلامك البايخ دا .. وبعدين تعالى ياختى هو منوا البقى مرطب فى الزمن دا .. المرطبيين معروفيين ياختى .. لكن يالفاتح اخوى كان قالوا ليك ياسمين قول اميين .. ونحن قراءك ديل مقتنعيين بيك على اى حال .. ومعروف جدا بانه لايعرف الالم الا من عايشه .. ونحن عارفيين معاناتك .. عموما لك الله واتمنى لك موفور الصحه والعافيه .. ويالهام يا اختى اديكى مثال علشان تانى ماتحكمى غلط .. يعنى مثلا مثلا اذا كانت الوجاهه مقاس للترطيبه ماياهو دا عندك عوض الجاز وشوا زى الكبك لكين مرططططططططططططططططططططب ..


#488361 [عبد القادر]
0.00/5 (0 صوت)

10-13-2012 05:13 PM
اعتقد انه ليس من اللائق ذكر ما ذكرت
اذا كلو ايميل اجيك تنشرو و ترد عليه كدة ابقى دا انصراف
اعتقد انو النزيه و احسبك كذلك لا يحتاج الى مثل ما نشرت و رددت
يديك الصحة و العافية
اعتقد انك اكبر من ان تدور بسهولة كدة
كسرة:
العارف عزو مستريح


#488360 [عمر شكلة]
5.00/5 (1 صوت)

10-13-2012 05:10 PM
معليش يا جبرا دى يمكن اولا مرة تقرأ ليك ويمكن لسع ما عرفتك كويس لانها جديدة فى القراءة وفى صحف السودان وفى الشبكة العنكبوتية


#488359 [حبيبو]
5.00/5 (1 صوت)

10-13-2012 05:04 PM
بكرة يكبرو العيال ويزيلو الغبار ولا تيأس اسثماراتك هى الأولاد وتعليمهم وحالك هذا مؤقت انشاءالله طالما الأبناء اولاد حلال ذيك ياحبيبو


#488356 [صابر البرارى]
0.00/5 (0 صوت)

10-13-2012 04:55 PM
متعك الله بالصحة والعافية يا ابو ناجى . معليش يا ابو ناجى انت شايف انو بت زى دى بردو عليها ؟؟؟؟؟؟؟؟؟؟


#488322 [ابو احمد]
5.00/5 (1 صوت)

10-13-2012 04:02 PM
بعد عمر طويل يا ابو يوسف


#488316 [ابو على]
0.00/5 (0 صوت)

10-13-2012 03:46 PM
رجعت مرة اخرى لاضيف الاتى يا الهام الفاتح مؤهلاته الاتى(محاضر (نظم معلومات) وتحديداً (تحليل وتصميم نظم المعلومات) يعنى systems analysis and design بعدد من الجامعات السودانية )


#488312 [ابو على]
0.00/5 (0 صوت)

10-13-2012 03:43 PM
يا السمك الهام وانا اشك ان هذا الاسم صحيح دا واحد حاقد من نجاحات الفاتح وحسب علمى انه دكتور فى احدى برامج الكمبيوتر وكان شغال فى السعودية يعنى كان ممكن يكون فى بحبوبة من العيش ولكن رجع لينفع البلد وانتى الحارق رزك شنو نحن متابعين يوميا لكتاباته ومبسوطين وانشاء ربنا يديه طول العمر وربنا يديه قروش عشان انا متاكد سوف ينفقها فى سبيل الله لانه يعرف معنى الحوجة
الله لا يبارك فيك يا الهام وانت كنتى صحى بت رجال اكتبى رقم تلفونك كما كتبه الاستاذ عشان تشوفى التلفونات التخليك تكرى اليوم الذى كتبى فيه مثل هذا الكلام
ربنا يمتعك بالصحة والعافية


ردود على ابو على
United States [القرم تفاحة ابل] 10-13-2012 04:23 PM
لو كان ما كتبتا كلامك الشين دا كا ن احسن ليك واحسن لينا كيف يعني الله لايبارك في الاخت الهام انت ما استفدتا شي من رد جبرة واسلوبو المهذب في الرد ياخي قل خيرا او اصمت هدانا الله واياك


#488306 [فارس عبدالرحمن]
5.00/5 (1 صوت)

10-13-2012 03:40 PM
لله درك ابا ناجى نسأل الله لك الصحة والعافية وطول العمر


#488305 [وحيد]
5.00/5 (2 صوت)

10-13-2012 03:40 PM
تموت الاسد في الغابات جوعا و لحم الضان تاكله الكلاب... و الله زمن .. الكلوب بقت مسعولة!


#488298 [خناق للكيزان]
5.00/5 (1 صوت)

10-13-2012 03:31 PM
ربنا يديك الصحة و العافية ي جبرا عاد ي هيام مابالغتي جبرا لو مرطب كان بقا مستشار شؤون التنفيس!


#488291 [هجم النمر]
5.00/5 (1 صوت)

10-13-2012 03:24 PM
أقول للست إلهام .. الأستاذ جبرا متعة الله بالصحة والعافية لو باع قلمه في مقالة واحدة لأصبح من أصحاب الفلل والعمارات والأرصده لكن يكفيه رصيده في قلوب الشعب السوداني من حب وإحترام ... لله درك يا أستاذ يا شامخ


#488290 [حسكنيت]
5.00/5 (4 صوت)

10-13-2012 03:22 PM
يا جبرا ياخى مالك علينا
كان ترد عليها فى الإيميل وتجنبنا الألم
لا أعتقد أنى سأقرأ مقالاتك القادمة كسخر سبيل يزيل عنا الكثير من كآبة هذا الزمن الردئ ، , وإنما سسيصبغها هذا المقال بطعم واحد مرير يحكى حال الإنسان الشامخ ومعاناته فى بلدى
دمت لنا مرفوع الرأس


#488269 [حاتم أب تفة]
0.00/5 (0 صوت)

10-13-2012 02:48 PM
ولا يهمك يا جبرة..
أغلبية الشعب بقت عايشة في غيبوبة وما عارفة مين "عدوها من صليحا"..
يديك ألف عافية ياخ..!


#488266 [magzoub]
0.00/5 (0 صوت)

10-13-2012 02:43 PM
تهى تهى تهى تهى تهى انا ما شفق ولا حاجه لكن بكيتنى ....بعدين البنيه دى دورتك انا ما كنت قايل مكنتك خفيف للدرجه دى ..طيب وين التقله ...طول بالك يا هندسه ربنا بفرجا علينا كلنا كمان ..تهى تهى تهى افففىىىىى وتهى تهى تهى


#488259 [طشاش]
0.00/5 (0 صوت)

10-13-2012 02:37 PM
عمنا
جبـــــــــــــــــــــــــــــــــــــــرة

ذكرت اقساط العربية ومدارس الاولاد والتلفون مش كدة وبس وكمان قروش حبوب الضغط

والسكري ...

لكن في حاجة مهمة بيشتروها بالقروش ما ذكرتها ناسي ولا قاصد ؟

قلنا نذكرك وكدة الحاجة هي(....) اخ صدق نسيتا


نسأل الله لك دوام الصحة والعافية آميييييييييييييييييييييييييييين


#488256 [Kunta Kinte]
5.00/5 (2 صوت)

10-13-2012 02:33 PM
والله كلام يا إلهام ...!!

انتى قايله التلاجة دى روقة وترطيبة ، آهه نحن عندنا تلاجة من زمن الوالد كان شغال فى القوات المسلحة إشتراها بالاقساط يعنى قبل زى 12 سنة كدة ، لزوم التلج فى رمضان وعشان العدس والفول يقعد كم يوم فى التلاجة للاقتصاد يعنى ، وهسع الحمدلله على كل حال انا اتخرجت ومغترب واخوانى الاصغر 3 شغالين والوالد عندو معاش شهرى والحمدلله بس البيت ملك فى حى شعبى لكن رغم البرسلو شهريا والشباب الشغالين ومعاش الوالد ، برضو الحال واقف ومن نص الشهر تبدأ التلفونات والشكوى من الاسعار ، عشان كدة هسع فى بداية التلاتين وما قادر اتزوج ولا قادر اكفى ناس البيت ومحتار والله ..!!

يا أختنا التلاجة والتلفزيون والرسيفر والحاجات دى بقت ما عندها علاقة بالاوضاع ، لانو غالبها رخيص والناس جابتا بالاقساط او هدايا مغتربين او قبل الامور تحصل مرحلة الانهيار دى ، بعدين تمن موبايل ممكن يجيب تلاجة

النقطة الاهمإإنو بقى مكان السكن ما بالضرورة بيدل على الرفاهية خاصة فى الاحياء الكانت زمان معروفة بانها احياء مرطبين زى العمارات وكدة (احياء الكيزان ومجمعاتم الجديدة ما مشمولة) لأنو فى ناس كانوا ميسورى الحال جداً لكن بعد الكيزان جو وصلوا الحضيض


#488255 [الفايق]
1.00/5 (1 صوت)

10-13-2012 02:33 PM
مش كده وبس
الغريبة انو في بعض الناس يصدقون

خد لك حبة بندول اكسترا.....
والا بلاش اسبيرين احسن


ردود على الفايق
United States [الضكر] 10-13-2012 06:01 PM
الفابق بهمز أمو .. وكمان يغمز ويلمز !!!


#488252 [seraj]
0.00/5 (0 صوت)

10-13-2012 02:21 PM
ياالفاتح جبرا ما تقول رقمك مميز الظاهر ناس سوداني ادوك ليهو عشان تسكت منهم ومن تعريفة الأتصال الفي السماء زي كل حاجة في السودان في السماء الا الناس في الواطة ،،، الله يجعلك من المستورين ويديم عليك الصحة والعافية والكسرة الاولي تدل على معدنك واصالة تربيتك القائمة على عزة النفس التي ما نفكت ترزخ تحت عبء الضنك


#488249 [Machutمشوت]
0.00/5 (0 صوت)

10-13-2012 02:18 PM
حفظك اللة استاذنا ..... بسببك ما زال الكثير مننايبتسمون فى زمن اجبرت الابتسامة على الاختفاء


#488246 [زهجان من الغربه.. ما تمشوا خلونا نرجع]
0.00/5 (0 صوت)

10-13-2012 02:16 PM
الله يعينك.. ويعين الشعب السوداني على هم الانقاذ الكشفت حال الجميع.. الله في يا استاذ


#488239 [اسير الشوق]
0.00/5 (0 صوت)

10-13-2012 02:06 PM
الاخ الفاتج جبرا تحيه وتقدير واحترام لا املك لا انا اقول لك لله درك دايما ما تعطينا الدروس ربنا احفظك ياخي واسترك واجعلك من المرضيين يو م لا ينفع مال ولا بنون الا من اتي الله بقلب سليم


ردود على اسير الشوق
United States [القرفان] 10-13-2012 03:27 PM
هو لكن قلبو مريض
بقول ليك عملو ليهو قسطرة في مصر


#488233 [الغضنفر]
0.00/5 (0 صوت)

10-13-2012 02:02 PM
يا أستاذة هيام و الله أنا لما قريت كلامك اتوقعت أنو في واحد من جيران جبرا قال ليكي حاجة عنو. يا أخي ما ممكن واحد مرطب يكتب بالوجع دا كلو و يصوّب قلمو الساخر الأنيق تجاه الفساد بالطريقة دي.

كتابتك جميلة على نهج جبرا ( على وزن نهج البردة ) - و اعتقدت إنّك بتهظري معاهو ... لكن من ردو عرفت إنو أخد الموضوع جد و دا ظاهر من الأيمان المغلظة عشان يبرئ نفسو من الترطيبة.


#488230 [FoFo]
0.00/5 (0 صوت)

10-13-2012 02:01 PM
ربنا يشفيك و يطول عمرك يا استاذنا. الله لا يحرمنا منك ومن قلمك الجميل


#488224 [الزوُل الكَان سَمِحْ]
5.00/5 (2 صوت)

10-13-2012 01:50 PM
نسأل الله أن يمد فى أيامك ويمتعك بالصحة والعافية..كما نسأله أن يكشف عننا هذه الغمة..ونساله أيضاً ألا يعجل بعمرك حتى يستقيم الوضع وتنتصر إردة الشعب الفضل ونستمتع بكتاباتك.الجديدة ونستجر ماخطه فكرك الملهم فى عهد الظلم والإستبداد..


ردود على الزوُل الكَان سَمِحْ
United States [abuawaab] 10-15-2012 12:39 PM
الكبير كبير ولو كان فقير يا استاذ جبرا وانت انسان لك مبادي جميله وكثيره اذكر منها دفاع عن المظلوم بكتاباتك لو كان غني والغني ما عيب لان اليد العليا خير من السفلي ولان الفقر اذا كان رجلا لكان عمر بن الخطاب قتله (طالما وسيله الكسب مشروعه فان الغني افضل من الفقر)وعند ما عرفتك يا استاذي بمبادك وليس بفقرك اوبغناك


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة