المقالات
السياسة
ارشيف مقالات سياسية

10-15-2012 01:12 PM


الفضاء ولا الرفيق الفسِل

سيد محمود الحاج
sayed_alhaj@yahoo.com

قريبي النمساوي( فِلِكْس بومغارتنر) عرفته من قبل.. قبل صعوده يوم أمس إلى حدود الفضاء الخارجي فهنالك صلة قرابة تجمعنا و وشائجها تلك الحروف المشتركة فيما بيننا فلو حذفنا مثلاً حرف (الكاف) من بين حروف إسمه تتجلّى هذه العلاقة بوضوح بإنبراء كلمة (فلس) ولو أننا كذلك حذفنا حرف(اللام) لحصلنا على كلمة(فكس) وهو إسم قديم أطلقه على شخصي الضعيف رفاق الأمس سخرية و تهكماً فجيبي كان ومازال كصحراء الربع الخالي..لاشيء فيه يوحي بالحياة فالفَكَس هذا كان احد رجال المال والأعمال الذي ذاع صيته في سبعينات القرن الماضي .
ومنذ ان ألممت بنية قريبي فلكس في الصعود إلى إرتفاع يبلغ مائة وعشرين ألف قدم سعيت بكل الطرق للوصول إليه إلى ان تمكنت بعد جهد بالغ من الحصول على رقم هاتفه النقال.. أوضحت له صلة القرابة التي تربطنا معاً وبطريقة ما ( طلعت خاله في الحساب) فتفهم هذه العلاقة وتقبلها بسرور بالغ وقال لي بالحرف الواحد أنه يتشرف بذلك مما حدا بي ان أتوجه بطلبي مباشرة ودون تردد طالباً منه أن يسمح لي بمرافقته في رحلته المقررة .. ضحك قليلاً قبل ان يقول لي وفي أدب جم :" يا خال إنت قائل الحكاية دي ساهلة..دي حاجة صعبة شديد..انا ذاتي ما متأكد هل ح أقدر أجي راجع او لا..بعدين انا ماشي في كبسولة.. يعني مساحة محدودة " وقبل أن يكمل حديثه قلت مقاطعاً :" يازول هو منو القال ليك انا داير أرجع..وحاتك خروج نهائي بس..الراجع ليها شنو..انا قاعد في الواطة دي من الله خلقني لا هي فاتتني لا أنا فتها.. بعدين الكبسولة ما أضيق من الركشة ولا من أمجاد..ونحن الركشة بنشيلها تلاتة والا أربعة والأمجاد سبعة وتمانية..كدي قول خير وربنا بسهلها "!!.. حاول أن يقنعني بشتّى الطرق ولكن دون جدوى.." يا فلكس يا ود أختي إنت قائل العلينا ساهل والاّ هين !!.. المثل بقول مابجبرك على المُر إلا ّ الأمرّ منو!!..نحن بلدنا كانت مليون ميل وبرغم كدا بقت أضيق من كبسولتك البتقول عليها دي..نحن كان فطرنا ما بنتغدا وكان إتغدّينا ما بنتعشّى.. ولو مرضنا بنرجى الله فوق عنقريبنا يا قمنا يا شتّتنا...الشُفّع يصنقروا اليوم كلو في المدرسة علي لحم بطونهم..البلد أصلها عملوها في ( كرتلة) وكسبوها آل كوباني وقالوا العاوز يقعد
تحت النيم وياكل نيم يقعد والما عاجبو يشوف غيرها!!... العيد باقي عليه أيام معدودة والله لا ورّاك دمعات الشُفّع والحال يعلم بيه ربّك ...دحين الْفى خالك وشوف ليْ مكان إنشاءالله تحت المقعد"!!
أها يا جماعة ودعناكم الله وأعفوا مننا...أمس مالقيت وكت أودّعكم !! .

(مرسلة مع فلكس)






تعليقات 0 | إهداء 0 | زيارات 782

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




سيد محمود الحاج
مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة