بنك الخروف
10-20-2012 10:56 AM

بنك الخروف

الفاتح جبرا
[email protected]

لأن إقتصاد البلد يسير نحو الخلف بخطى متسارعة (ما عارفين وادانا وين؟) كان لابد أن تصبح مسألة شراء المواطن لخروف الأضحية مشكلة تستفحل عاماً بعد عام حيث أصبح (البيان) الذي تصدره (هيئة علماء السودان) عند إقتراب العيد والذي هو من قبيل رفع الحرج والإحراج عن ما آل إليه حال البلاد والعباد (في ظل المشروع الحضاري) والذي تشرح فيه للمواطنين جواز (الإستدانة) و(الأقساط) والما عارف أيه .. أصبح هذا البيان شيئاً مملاً ومكرراً يحفظه حتى الأطفال .
علماؤنا الأماجد يفتتحون (بيانهم السنوي هذا) بجواز الإستدانة ويختتمونه بأن الأضحية لا تجب على من لا يستطيع شراءها وكان الأجدر ان تكون الآية معكوسة بحيث يستفتحون البيان بعدم الوجوب ويختتمونه بجواز الإستدانة علماً بان من يستدين هو الفقير الذي لا يستطيع شراءها ولكن يبدو أنه فقه (المخارجة) و (المداهنة) !
طالما إنو مسألة عدم المقدرة على شراء الخروف دي بتتكرر كل عام بالنسبة لكل (أهلنا الغبش) فالعبدلله عندو فكرة جهنمية تريح العلماء من (الفتاوى) السنوية (المدغمسة) كما تريح المواطنين كم هذا العبء الثقيل والفكرة نهديها إلى (حكومتنا الرشيدة) وهي إنشاء (بنك الخروف) .. حيث يقوم المواطن بالتسجيل والإشتراك في هذا البنك مع إعطاء رقم موبايله الذي سوف يحول منه الرصيد (واحد جنيه يومياً) لأرقام البنك التى يعلن عنها ، يقوم البنك بتشغيل ما يتلقاه من أموال المشتركين خلال العام ثم عندما تقترب (الأضحية) يتم توزيع الأرباح إضافة إلى مبلغ الـ 360 جنيه (تقريباً) الذي قام المواطن بدفعه وبذلك يستطيع المواطن أن (يضحي) !! وأن ترتاح هيئة علماء السودان من إصدار تلك الفتوى السنوية (البائسة) .
من مميزات هذه الفكرة إنو مبلغ جنيه يومياً ممكن (مجازفتو) بسهولة وممكن كمان لو وقعت في أيدك عشرة عشرين جنيه ما محتاج ليهم ترسلهم (للبنك) وترتاح ليك كم يوم كده .. وكمان ميزة تانية هي إنو القائمين على أمر (بنك الخروف) سوف يقومون بالشراء بالجملة وأكيد الأسعار ح تكون أقل ، وميزة تالتة هي إنو ممكن الأرباح (لو القروش إشتغلت كويس) تكون أكبر من تمن الخروف وعلى كده تضمن تطلع حق الزيت والفحم والبهارات والرغيف والضباح ذاااتو.
على ذات نهج (بنك الخروف) يمكن إنشاء (بنك التعليم) للإيفاء بأقساط المدارس والجامعات وبنك (إيجار البيت) عشان ما يجدعوا ليك عفشك في الشارع وبنك (الدواء) عشان تشتري كوتة الأدوية المزمنة سنويا خاصة والأدوية بقت كل يوم أسعارا بتزيد وبنك (الخريف) لعمل الترميمات قبل الخريف وبرضو ممكن (بنك الزواج) على الأقل تقدر تطلع حق (تصوير الفيديو) وبنك (النفاس) عشان تقدر تدفع (حق الدايات) وكده وبنك (الطهور) عشان تقدر تطهر الأولاد .. بس المشكلة إنو لو المواطن إشترك في البنوك الفوق دي كوووولها عاوز ليهو يومياً خمسين جنيه تحويل رصيد !! عشان كده خلونا هسه في (بنك الخروف) ده !
ولو الفكرة عجبت (أمنا الحكومة) حقو تبدأ في تنفيذها بعد العيد طوالي وتقوم بتسجيل البنك وتعيين أعضاء مجلس الإدارة والمدير العام ونواب المدير العام ومدراء الأقسام ثم تبدأ في تأجير الموقع وشراء العربات والمكاتب والستائر والموكيت والأثاثات والكوندشنات... وكان السنة الجاية (ضحيتو) دي دقني .. !!

كسرة :
نحنا عاوزين لينا بنك (للصبر) !!

كسرة ثابتة :
أخبار ملف خط هيثرو العند النائب العام شنو(ووو وووو ووو)؟




تعليقات 30 | إهداء 0 | زيارات 5471

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#494139 [طارق]
0.00/5 (0 صوت)

10-23-2012 04:12 PM
بارك الله فيك استاذنا الفاتح جبره ولكن صدقا لي كلامك عندنا بنك اسمه بنك الطعام انا بقترح كل انسان في منزله لمن يجي يتغداء او يتعشي او يفطر الثلاثة الوجبات طبعا الفطور حيكون سمك والغداء حيكون دجاج والعشاء حيكون خفيف يا شعيرية او فول بقترح لو كل زول مثلا قبل ما ينجض السمك يطلع سمكة واحدة بس وكذالك الغداء يطلع ورك دجاجة وكذلك العشاء يملاءالفول في حجم علبة الصلصة واضربوهم في عدد سكان الشعب السوداني تاني بفضل زول ما لاقي ياكل اها دي فكرة ثانية رايك شنوا يا الفاتح جبرا


#493611 [شهاب ثاقب]
0.00/5 (0 صوت)

10-22-2012 07:45 PM
الأخ الفاتح جبرا: لك كل الود والأحترام :ياأختي بدل بنك الخروف إليك هذه الأسئلة :
قال نافع كيف تم تمويل حملة الرئيس : أجاب ضاحكا : ثلة من أثرياء المؤتمر الوطني مولوا الحملة
أهدى رئيس جمهورية السودان ( أغنى رئيس في دول العالم الثالث)5000 بقرة إلى الشعب المصري
أهدى الرئيس الميمون كل لاعب مصري فاز وشارك منتخب مصر فاز ببطولة كأس أمم أفريقيا عربة جديدة جياد
إلى هؤلاء الأثرياء السودانيون السياسيون ألا يتبرعون لشعب السودان الفقير الماقادرةعلى شراء أضحية
إلى هيئةعلماء حلمنتيش : أخبار زواج القاصرات شنو ؟
إلى المجلس الوطني الموقر : أحبار الواقي الذكري شنو ؟
عندي شعور أن ما يحدث في السودان يذكرك بما كان يحدث قبيل سقوط القسطنطية ؟


#493140 [ود الجد]
0.00/5 (0 صوت)

10-22-2012 10:08 AM
الفكرة رائعة بس بشرط تكون انت مدير البنك بتاع الخروف وترد علي الكسرات البجيك


#492700 [أبو الغيث]
0.00/5 (0 صوت)

10-21-2012 01:06 PM
ما أعجبك الفاتح جبرا وما أحلاك طعمك سودانى ورائحتك سودانية .....اقترح بنك نعمل ليك جريدة وأنا جاد والله لانه الواحد يقرا ليك يتمني المقال ما ينتهي شكرا جبرا انت كاتب غير عادي

كسرة اخبار القناة التلفزيونية شنو فهمونا!!!!!!!!!!!!!!!!!!!!!!!!


#492645 [خالد فارس]
0.00/5 (0 صوت)

10-21-2012 12:02 PM
والله ياجبرا ما الحكومة دي بكرة تخلي ليك الخروف سعرو اغلي من الاندكروزر يعني الجنية البندفع ده مايسوي اي حاجة لانهم يريدو ان يتخلصو من هذه الطبقة نهائياً التي مثل الباعوضة في الاذن (الاضان) لانهم اصبحو مثل السيارات القديمة ضارين بالاقتصاد السوداني عشان كده دائماً يصعبو عليهم الحياة.ويريدون انيخلصو منهم بس انتو روحكم روح كلب كرهتوهم


#492444 [واحد مفصول]
0.00/5 (0 صوت)

10-21-2012 01:18 AM
الاستاذ الاكرم جبره والله العظيم فكره عمليه يمكن استخدامها في مجالات كثيره غير خروف العيد ده وسوف تنجح بس في بلد غير السودان الحاكماه الانقاذ..


#492423 [صاحب خيال]
0.00/5 (0 صوت)

10-21-2012 12:14 AM
بس المشكله يا جبره يجي واحد لافيها بي سته كروت نهايه المرابحه يقول داير اربعه خرفان ...لسبب بسيط انو متفائل الخروف بتاعو ما خروف نعجه والنعجه بتلدي في السنه مرتين وهي كباشيه ابا عن جد يعني بتجيب اتنين اتنين ....والكلام ده بعد يعفي ليكم اللبن واللبا (للبعرفو اللبا) .


#492371 [awad]
5.00/5 (2 صوت)

10-20-2012 09:53 PM
حلوه ياود جبره بنك الخروف أبوقرنين ده وأمكن بدون قرون وبدون فروة لكن أنت دايما بتديهم أفكار وناس أمنا الحكومة دى ما عندهم لعب طالما مشروع زى ده بكبر كوم لهطهم وأكيد بعيونوا مجلس أدارة ليه وعلى رأسه واحد من الخبراء أياهم وهاك خصم حق تحويل وضريبة أيه ماعارف ورسوم أيه ماعارف وتطلعوا فى النهاية مطالبين ومافى عفا الله ماسلف لو تبيع هدومك تسدد ليهم وأهو فكرتك بكرة بقصموا بيها ظهر الفقرانين وأصلوا ظهرهم مقصوم.


#492366 [ود عويضة]
5.00/5 (2 صوت)

10-20-2012 09:45 PM
انا اقترح ان يكون اسم البنك ( بنك الفقراء ) عشان يقدم كل الخدمات التي ذكرتها - ويكون تمويله من ديوان الزكاة - وممكن يجيبو خراف استرالية او عجول (كرور من الحبشة ) لان الخرفان الحمرية محجوزة سلفا لناس المؤتمر الوطني - لكن المشكلة انو ناس الزكاة (حاميها حراميها) ولايوجد من يحاسبهم - ولا يوجد لديهم اقرار ذمة - والديوان موظف بالكامل لمصارف جديدة لم ينزل الله بها من سلطان - ولهذا نحب ان نحيل الامر لاخوانا انصار السنة في توضيح موقفهم من التلاعب في الركن الثالث من اركان الاسلام
كسرة
احي متين اشوف الحرطوم قالو لي فيها(مطابع للدولار) مختوم


#492357 [عبد الواحد المستغرب أيما إستغراب!!]
4.25/5 (4 صوت)

10-20-2012 09:09 PM
يا جبرا سلامتك !! الحكايه شنو؟ زهايمر ويزول بإذن الله !! وين بنك (الكفن) وبنك البوكس بعد أن ارتفعة أسعار نقل الموتى بواسطة عربات الاسعاف (الخيريه) وكأنها ستنقل المرحوم او المراحيم الى الجنه مباشرة يعنى (بدون فواصل وكده!!) وبصراحه نحن تجاوزنا حكاية الخروف والخرفان من زماااان وزمرناها لله منذ دخل علماء السودان بوزهم فى أخص شئوننا الداخليه والخارجيه وبقينا نفكر فى (ستره)تبيض وجوهنا أمام الاهل والجيران وبنفكر فى إنشاء جمعية بإسم (تيسير إجراءات نقل ودفن الموتى الجماعى) بدلا عن جمعيات الزواج الجماعى التى إستنفدة أغراطها ولحقت بشعار (هى لله..هى لله )وكده وحياتك بعد ما تطيب وتستعيد زاكرتك التى توقفت عند هم الخرفان أملا فورم الجمعيه لتلتحق بها وسوف نعينك ناطقا رسميا بإسمها ورجاء لا تدع الفرصه تفوتك وسوف تحظى بتخيضات هائله بعد عمر طويل بإذن الله !!.


#492323 [اب سكاليب]
5.00/5 (1 صوت)

10-20-2012 07:07 PM
لا تملك الا ان تضحك مع جبرة هاهاهاههاهاهاهاه شكرا يا جنى المصيبة انك بتلسع الحكومة لسعات مرة اكجمهم كجمة تحرقهم فى قلبهم اولاد العذبة


#492295 [جحا]
5.00/5 (1 صوت)

10-20-2012 05:55 PM
ايوة , عشان موظفى بنك الخروف يطاولوا فى البنيان؟؟


#492273 [عبدالماجد قنديل]
5.00/5 (3 صوت)

10-20-2012 05:13 PM
ياجبرا ( الشبه والشلاقــة ليك شنو) قريشات الغلابة ديل تقوم تروح مخصصات مدير ونائب ومستشار ومساعد وهلم جرا ,,, وتقوم تحتاج ليك لكسرة ثابته تانية ( اخبار قروش الغلابا اللي عند بنك الخروف شنوووووووووووووووووووووووووووو؟؟؟؟؟؟؟؟؟؟؟؟؟؟؟


#492267 [القرم تفاحة ابل]
5.00/5 (2 صوت)

10-20-2012 05:10 PM
انا خائف عليك من الكسرة الثابتة لثانية وهي اخبار ملف بنك الخروف شنوووووووو


#492268 [عطبراوي آخر]
5.00/5 (2 صوت)

10-20-2012 05:10 PM
يا جبرا الله يهديك ، دا فرصة جديدة ( عشان يلبعوا ) حق المساكين المساهمين في البنك وبعدين يقوموا يلبعوها ويقولوا دي مخصصات المدير والنائب والمساعد والمستشار وهلم جرا وبقى في كسرة ثابتة ثانية \
( أخبار قروش بنك الخروف الدفعوها الغلابا شنووووووووووو؟


#492229 [abuawaab]
5.00/5 (1 صوت)

10-20-2012 03:56 PM
والله يا استاذ جبره فكره حلوه وخاصه بنك النفاس لاني عندي سمايه بعد اسبوع والان ولا تكتح ما عندي في جيبي فعليه ان اطلب من حكومتنا الرشيده والرشيقه السنه دى يجيبوا لي الخروف اولا حسن نيه وكدا يعني والسنه الجاي انشاء الله انا اول واحد ارسل لبنك النفاس يعني اول زبون والضامن الله


#492226 [أبوأسامة المهاجر]
5.00/5 (2 صوت)

10-20-2012 03:49 PM
يا جماعة الخير أستاذ جبرا ده بقى طابور خامس وقد تم تجنيده من قبل أحد مستشارئ البشير المقالين عشان يدقسكم بفكرة البنك دي وينم تعيين ذات المستشار بمنصب رئيس مجلس الإدارة ولو العيد الجاي حصلتوا ليكم ضلف بديكم رقبتي مش دقني.

بنك الخروف بتاعك دا حايلحق ديوان الزكاة وبعد مايطلع حق العاملين عليها حيكون المساهمين في السجون.


#492225 [ده الكلام]
5.00/5 (1 صوت)

10-20-2012 03:41 PM
واذا اتلحست كلها تبكي بس؟؟؟!!!!


#492202 [سوداني وبس]
5.00/5 (3 صوت)

10-20-2012 02:56 PM
بنك الخروف البلدي تحت شعار خروف اصغر لحم اكتر
بنك الخروف الحمري تحت شعار نحو صادر جيد
بنك الخروف الكباشي تحت شعار انت واقف وسعر الخروف ماشي
بنك الخروف القرج تحت شعار تاكلو من غير حرج
بنك الخرفان الوطني تحت شعار سيد حملان المصارف
بنك الخرفان المركزي لاننا طلعنا اكير خرفان
الاضحية ما مشكلة بعد ما ضحينا بكل شي


#492179 [صديق الشيخ]
5.00/5 (1 صوت)

10-20-2012 02:09 PM
فكرة ممتازه جداًوباب جديد يجيب الريح للمواطن من تالا المؤتمر القشرى


#492171 [سوداني وبس]
5.00/5 (2 صوت)

10-20-2012 02:03 PM
البنك ما مشكلة والخروف ما مشكلة المشكلة المدير ونائبه كم مرتباتم وكم مخصصاتم وبدل سفرهم وعرياتم والحاجات التانية ديك . والله انا خيايف بعد الميزانية السنوية ما نطلع بي كبير اخوانه


ردود على سوداني وبس
United States [abubakr] 10-20-2012 03:58 PM
والله ياسوداني بس كبيرأخوانه دي فقعت مصاريني من الضحك. على فكرة أنا ما جزار لكن كبير أخوانو دي مش جزء من المصران الغليظ داك؟ برضو بينفع في الكمونية لأخينا المشتهي الكمونية. هو بالمناسبة مختفي وين اليومين دول. لعل المانع خير.


#492167 [حسين حمزة]
5.00/5 (1 صوت)

10-20-2012 01:54 PM
حكومتنا الرشيدة أرشدها الله يا أستاذ جبرة ما ناقصها أفكار وأزمة البلد كلها ليست أزمة أفكار ولكن أفكارك مبتكرة وحلوة ولكن ما حددت القائمين على أمر بنك الخروف وعشان نضمن عدم اللهف واللغف ما رأيك أن توكل المهمة للجماعة أصحاب الفتوى لأنك في البداية والنهاية انت قاصدهم وإذا نجحوا تكون أنت صاحب براءة الاختراع وتأخذ الجائزة وهي عبارة عن قرش من كل جنيه تحويل رصيد وإذا فشلوا تكون شماتتك في محلها وبعد تحويل القرش حتكون انت من الجماعة وتاني ما حتكتب لينا أي موضوع وبالتالي حنكون نحنا الخسرانين


#492166 [اسير الشوق]
5.00/5 (2 صوت)

10-20-2012 01:54 PM
الاخ جبره مافي بنك للمخارجه ياخي نحن خلاص روحنا طلعت وانا بضمن ليك لو في بنك زي ده الشعب السوداني كلو بدفع ومقدما احلنا الله


#492140 [تاج]
5.00/5 (2 صوت)

10-20-2012 01:09 PM
المشكلة الضحية الجاية لاتلم فى الخروف ولا تلم فى القروش ويقولو ليك قروشك لحقت الانتونوف (اقصد امات طه).


#492128 [ابو عرب]
5.00/5 (1 صوت)

10-20-2012 12:43 PM
فكرة


#492089 [حسين حمزة]
5.00/5 (1 صوت)

10-20-2012 11:47 AM
حكومتنا الرشيدة أرشدها الله يا أستاذ جبرة ما ناقصها أفكار وأزمة البلد كلها ليست أزمة أفكار ولكن أفكارك جهمنية وحلوة ولكن ما حددت القائمين على أمر بنك الخروف وعشان المسألة نضمن عدم لهفها ما رأيك أن توكل المهمة للجماعة أصحاب الفتوى لأنك في البداية والنهاية انت قاصدهم وإذا نجحوا تكون أنت صاحب براءة الاختراع وتأخذ الجائرة وهي عبارة عن قرش من كل جنيه تحويل رصيد وإذا فشلوا تكون شماتتك في محلها وبعد تحويل القرش حتكون من الجماعة وتاني ما حتكتب لينا أي موضوع وبالتالي حنكون نحنا الخسرانين


#492066 [وحيد]
5.00/5 (3 صوت)

10-20-2012 11:20 AM
و الله الفكرة كويسة و اعتقد ان الدكتور عبد المنتقم ممكن يزيد عليها و يطورها و اهي فرصة لخلق وظائف ذات عائد عالي لجماعة المؤتمر الوطني الفاتهم قطار الوزارات و الوظائف الكبيرة او الجماعة هواة الجمع بين (وظيفتين و اربعة زوجات)


#492065 [سند]
5.00/5 (1 صوت)

10-20-2012 11:20 AM
جميل انت والله يا جبره .


#492052 [الزوُل الكَان سَمِحْ]
5.00/5 (1 صوت)

10-20-2012 11:09 AM
يا أستاذ جبرا

فكرة بنك الخروف دى مابطالة..لكن..لو قاموا عينوا واحد من الجماعة مدير للبنك دا ولبعوا!!

الحل يكون شنو؟؟

أنا شايف إنو ناس حظيرة الدندر ممكن يساهمو فى رفع المعاناة عن شريحة كبيرة من الشعب الفضل بطرح كمية (مُقدرة) من الغزلان للأضحية وهو بالمرة تدخل وزارة السياحة مجال الإستثمار


#492046 [Anti Koaz]
5.00/5 (3 صوت)

10-20-2012 11:06 AM
يا استاذ مالك علينا الناس ديل ناقصين افكار شيطانيه اه بكره دا تلقاهم عملو ليك دمغة خروف عشان ينشأو بيها البنك دا يعني ممكن تجيك مع فاتورة المويه ولا الكهرباء ولا النفايات ولا مع رسوم التاشيره غايتو لو عملوها انا بدفعك ليها انت دا يا استاذ وخليك عارف من هسه جنيهي عليك ....


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة