مهندس نفط وإيسكريم
10-22-2012 10:52 AM

مهندس نفط وإيسكريم

الفاتح جبرا
[email protected]


السلام عليكم يا أستاذنا ..أنا شاب سوداني من أسرة بسيطة تسكن مدينة بحرى قريت فى مدرسة بحرى النموذجية و منها دخلت كلية (هندسة و تكنلوجيا النفط) وهسي مهندس نفط ليا أكتر من سنة ... لما دخلتا الجامعة كنتا متخيل إنى حاشبع رغبتى و إهتماتى بالكيمياء و المعادن والنفط والحاجات دي بس إنصدمتا بى واقع إنو الجامعة بتدرسنا مقررات من زمن ( حفروا البحر) الشئ الخلاني أقرأ براي عشان أواكب وأسد النقص الأكاديمي خاصة وإني طالب نشيط فى مجالات دراستى وما شغال ليك بالسياسة شغلة يعني ما كان عندى أى إنتماء سياسي كنتا بعمل معارض فى مجال النفط وبأقوم بتنظيم ورش و محاضرات من مهندسين كبار عشان نغطى الفجوة بين المادة العلمية الضارباها الانيميا و الحياة العملية فى الحقل
خلال سنوات الدراسة في الجامعة و تحديداً في عام م٢٠١٠ تم ترشيحي لأمثل السودان فى مؤتمر عالمي للبترول خارج السودان بى مشروع فى (الصناعة النفطية) فقدمتا للمؤتمر المقترح بتاع المشروع و وافقو بيهووإتكفلوا بى أى حاجة من تذاكر لى فندق لى فيزا.. لى شلاقتى قمتا إخترتا مشروع مهمل فى مجال البترول اللى هو(إنعدام المسؤلية الإجتماعية فى مجال الصناعة النفطية السوداينة) اللى هيا أهم صناعة .. و الله يا استاذ زول فهم العنوان مافي! .. الا راسلتا الشركات البره و أدتنى أنظمة من أنغولا و الإكوادور و الأمارات و الكويت حتين قدرتا أتم المشروع بتاعى و الحمد لله و سافرتا عرضتو بره و جيت و زول ركز معاى مافي .
فى السنة الاخيرة عملتا مشروع تخرج أكتر من ممتاز فى ٤ أبار مع شركة فرنسية بس للأسف لجنة مناقشة المشاريع المكونة من دكاترة الجامعة ما إتناقشو معاى فى المشاكل الأنا ناقشتها فى المشروع و الحلول الطرحتا بل ناقشونى فى (العنوان الجانبى دا خطو كم؟) و(الصفحة دي ليه ما عامل ليها جستفاى) و (العنوان الجانبي ده ليه ما تحتو خط ؟)
الحمد لله يا أستاذ إتخرجنا و دخلنا حياة العطالة و دخلنا فى دوامة التقديمات و الوظايف و نفتش مكان نقضى فيهو الخدمة الوطنية ! اها هسى بعد سنة من التخريج الوضع كالاتى:
- الزول العندو واسطة نزل الخدمة فى وزارة وللا شركة من الشركات .
- الزول الما عندو واسطة زينا كدا يا مباري الضلله يا ببيع فى بقالة وللا إشتغل بتاع هدف او خش السوق يبيع مسامير!!
- الزول الكان فى الجامعة تبع الاتحاد وقاعد يسك الناس بى (السيخ و الملتوف)هسى إتوظف فى أحسن شركة بترول سودانية!!
- الزول الكان مبارى (الكيزان) و مربت ٥ سنين هسى إتوظف بى أحسن راتب!!
أما أنا يا أستاذ فأنسانى .. فتشتا على أى شغل و فى أى مكان لما الاسبوع الفات دخلتا معاينة فى شركة بعيدة كل البعد عن مجالى وبعد ما خلصتا المعاينة قام ممثل( الموادر البشرية) قال لى بالنص: (بالنيابة عن اى زول ما مقدر مؤهلاتك وخلاك تصل لى مرحلة إنك تقدم لى شركتنا دى نحنا مقدرينك وبنشكرك على الاجتهادات بتاعك) !
ملحوظة : انا هسى ببيع ايسكريم فى مطعم و اى زول بحكى ليهو حكايتي ما بصدق!
(إبنك حسين)


كسرة :
يا ناس (وزارة النفط) ما عندكم تلاجة إيسكريم تشغلوا لينا فيها ولدنا ده ؟ إن شاء الله مهندس نفط وإيسكريم !!


كسرة ثابتة :
أخبار ملف هيثرو العند النائب العام شنو(ووو وووو ووو)؟




تعليقات 30 | إهداء 0 | زيارات 7137

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#494069 [جهجه]
4.00/5 (3 صوت)

10-23-2012 02:15 PM
ياهندسه دى حاجات بسيطه ماتشكى منها وطوووووووول بالك اخوك كهربا السودان8 سنوات بائع تمباك العمارى الجيد 220فولت


#494007 [3Atel]
5.00/5 (3 صوت)

10-23-2012 01:05 PM
الغرة بعملوها بى نواية بلح .. تحكها شديد فى البلاط لمن تسخن وبعد داك تختها فى جبهتك وتتحمل الألم لانو الشغلة حتأمن ليك وظيفة محترمة ... وبعدين فى المعاينات ما تنسى تقوليهم أنك جاهدت فى الميل 40 وكمان فى الجبهة الشرقية همشكوريب .. أصلو ابان دقنة ديل بريدو يسمعو من الكلام دة كتير,,, وبرضو كسير التلج و الألقاب مهمة يا شيخ فلان ويا شيخ علان ... ولازم تكون حافظ تاريخ الحركة الاسلامية فى السودان من طأطأ للسلام عليكم بى شخصياتا كلهم الترابى و منو ومنو ومنو ...... وأعمل حسابك ههههههههههه الجماعة قالو دايرين 500 مجاهد من كل محلية .


#493932 [هجايم]
5.00/5 (1 صوت)

10-23-2012 11:32 AM
امرق من البلد دى ...ود نصيحة بره حتلقى وضع جيد جداً ... وخلى العيش اقصد الايسكريم لخبازو .. البلد دى لا ترعى شهادات ولا مؤهلات اكاديمية .. وزى ما قالوا ليك الامجادات والرقشات بل بعض بائعات الشاى يحملون شهادات جامعية .


#493827 [كباريت]
5.00/5 (2 صوت)

10-23-2012 08:50 AM
حدوته قديمة؟؟؟ معظم سائق أمجاد من حملة الشهادات العليا. ومعظم سائقي الركشات من خريجي الجامعات؟؟ أقول ليك مبالغة أخرى__ خلال إجازتي السابقة وبالضبط في شهر يوليو الماضي ذهبت للمقرن وجلست أحتسى الشاي في (حضرة) (ست) شاي اتخذت لمبيعاتها أفضل المواقع تحت ظلال الأشجار الوارفة. ناداها مُضيفي بالقول: يا باشمهندسة معانا ضيف جاي من برة ويحب القهوة التركي والسبريسو عليك الله أعملي ليهو جبنة سودانية مدنكلة، فردت عليه: حاضر ياولدنا!! اعتقدت أن لقب لأول وهلة أن لقب باشمهندسة هو لقب لمجرد الدعابة مثل قولهم: (يافردة)، ولكنني اكتشفت أثناء الجلسة أن ست الشاي تلك خريجة جامعة الخرطوم كلية الهندسة، وعملت بالقطاع الخاص لفترة بسيطة ثم تركته واختارت مجال (هندسة القهوشية) أي هندسة الشاي والقهوة. ناقشتها في مجال الهندسة المدنية وصب الأعمدة والخرسانة والميدة والسقوف المستعارة فوجدتها عال العال يعني ممكن تطلق عليها لقب (سنير انجنير). ولا أزال أذكر صديقنا الذي تخرج في معهد علمي بمصر تخصص (لحام تحت الماء)، كان عاطلاً عن العمل، يجلس من ضل لي ضل. فقال ساخر الحي لأحد القادمين من الخارج: بالله يا عم عبد الله الشاب ده بلحم تحت الموية شوفوا ليهو شغل معاكم في الخليج....... رغماانتشار التعليم حفظ السودان من الدخول في متاهات فوضى الربيع العربي..... حتى الإضرابات أصبحت تقام بوعي وتنتهي بوعي......... العلم يعني السلم والسلام..... رغم ذلك لم يستطع انتشار التعليم والوعي المحافظة على السودان ككيان واحد..... وهذه قصة أخرى نتركها للمتخصصين. لا تحزن يا ابني فهذه ضريبة الوطن أو كمال قال: (نحنا مهمتنا نقريك ولسنا مسئولين غن شغلك).


ردود على كباريت
[أي كلام] 10-23-2012 12:50 PM
(لم يستطع التعليم والوعي المحافظة علي السودان ككيان واحد)


الدول التي خلقت لتكون كيان واحد سوف تستمر ككيان واحد الى ما شاء الله، أما السودان فلا يملك مؤهلات الاستمرار ككيان واحد، بل العكس. واذا أردت مثالا فدونك حركات التحرير والتغيير، فهي تنقسم وتتوحد بصورة أميبية لدرجة لا يستطيع أحد أن يحصى عددها، يعنى دخلت في علم الغيب ؟؟؟؟؟!!!!


#493635 [ساميه]
4.50/5 (4 صوت)

10-22-2012 08:26 PM
اها ياجماعه النحكى ليكم قصتى ... قبل ايام ساقتنى الظروف لبنك الخرطوم فرع المورده علشان اقيف فى الشباك واعمل لى توريد مبلغ مالى .. و الله ياجماعه انا واقفه وفى شخص قبلى عايز يصرف ليه مبلغ مائتى جنيه سودانى يعتى اربع ورقات من ابو خمسين .. هل بتصدقوا انه موظف البنك شال اربع ورقات وادخلها لماكيتة عد النقود .. حقيقية انا احترت من هذا التصرف البليد جدا من ذالك الموظف الغير واثق من نفسه .. اها باقى ليكم دا قرا ولا شاف قرايه .. وايضا كل مايستلم معامله من شخص تلقاه قاعد يبحلق فى فيها كانه داير يحفظ احدى المعلقات السبع .. والناس زهجت منه وقعدت تحتج.. وانا اتكرمت وقلت للمحتجين ما حقوا تحتجوا لانه دا شخص بليد ولانه الانقاذ طردت كل النوابغ واتكلت على هئولاء البلدا .. وياهوا ده السودان


ردود على ساميه
United States [Kudu] 10-24-2012 10:09 AM
أرجو ألا تتسرعي فآلة عد النقود تستخدم أيضا للتحقق من ان النقود غير مزورة..


#493618 [شهاب ثاقب]
5.00/5 (1 صوت)

10-22-2012 07:57 PM
كسرة ثالثة ياأخ الفاتح : زوجة الرئيس الثانية حلفت وأقسمت أن الناس بتتكلم ساكت بدون دليل على غنى الرئيس وأهله وزوجاته أقسمت أن بيت كافوري لهسع ماتم تشطيبه الحمد لله أنها ماقالت مسجد أبوه ذاتو ماكمل
كسرة رابعة : الشعب السوداني الفضل أحمدوا ربكم زوجته الثالثة لسع مانضمت


#493615 [شهاب ثاقب]
5.00/5 (1 صوت)

10-22-2012 07:51 PM
الناس في الخليج عندها بترول أما نحن في السودان عندنا بترول وعندنا ........ أبو الجاز


#493515 [احمد المصطفي]
0.00/5 (0 صوت)

10-22-2012 05:14 PM
الاغتراب هو الحل حتي ولو لم تعمل بشهاداتك المهم الريالات واترك السودان للذين لا يقيمون بين مهندس واستاذ


#493461 [ubedalla]
5.00/5 (1 صوت)

10-22-2012 04:17 PM
معليش ي حسن قربت تفرج خلاص مازعل نفسك؟


#493444 [MOHAMED HASSEN]
5.00/5 (2 صوت)

10-22-2012 03:54 PM
يا زول الجِرَس شنو وانت شوفت حاجة لسا اخوك دا متخرج 92 وقعدت في السودان لم عفنت وحتي البنقو شربتو من الدبرسة والفراغ واتغربت وهسا شغال جرسون برضو ما ضروري الواحد يشتغل في مجالو ودي مٌشكلتنا في السودان و في بلاد كثيرة بتلقي واحد معاهو حتي ماجستير لكن بيشتغل اي شئ متوفر وانصحك بالدعاء ليل نهار بزوال هذه الطغمة دا لو ماقدرت تطلع وتطالب بحقك منتظر شنو


ردود على MOHAMED HASSEN
Saudi Arabia [المغترب القديم] 10-23-2012 01:34 PM
جرسون في فرنسا أحسن من شيف في برج القذافي أو الفنق الكبير وبكرة ترجع شيف في الهليتون


#493428 [ابو عبد الله]
4.75/5 (3 صوت)

10-22-2012 03:38 PM
البلد فيها مليون تلاجة ايسكريم قاعدين فيها شباب مميزين ذي أخونا حسين
ياخ ديل المميزين في وظائفهم شالوهم الصالح العام عشان هم ما معاهم في القضائية والخارجية وكل الخدمة المدنية .. يجو يوظفوك انت يا حسين؟ ديل ناس همهم التمكين ما البلد واسواء شخص يشغل احسن وظيفة شان البلد تزيد دمار
بس أوع تحبط ياحسين لانو بجي اليوم البتلقي فيه حظك في الدنيا غصباً عنهم
وانشالله بالتوفيق


#493407 [huwidah]
5.00/5 (4 صوت)

10-22-2012 03:00 PM
يا باشمهندس اول شي ركب دقن.....
تاني شي في دكتور في الحارة 117 الثورة اسمو الجبلة وهو متخصص في عمل الغرة..
يعل ليك في خمسة دقايق اسود غرة في جبهتك.مجانا لوجه الله وما لدنيا قد عملنا نحن للدين فداء..
هذه كل المؤهلات المطلوبة ومزق شهاداتك علي طول.. اشوفك بكرة او بعد بكرة بالكثير وزير دولة للنفط او الايس كريم ما كلو عند العرب كسبرة..


#493394 [مفجوع]
5.00/5 (2 صوت)

10-22-2012 02:43 PM
الإبن حسين
حاول تجميع العدة وهي :-
لحية وغرة صلاة وبعض الكلمات من شاكلة جزيت خيراً وربنا يجعلها في ميزان حسناتك ..
الغرة ساهلة يمكن تحضير مواد دق الشفاة من الخبيرات بالحلة أو الضرب بآلة خشنة في الجبهة ..
وعليك بتصنع المسكنة والزهد في الدنيا ..
الخطوة الثانية شوفليك حد يزكيك عند ود الجاز أو قوم بزيارته في شارع عبيد ختم عند مسجد ...( سنهوري أظن ) وإتلحو شديد ...


ردود على مفجوع
Saudi Arabia [حسين] 10-22-2012 05:40 PM
و أحســـــــــــــــب أنك صابر .


#493380 [جحا]
0.00/5 (0 صوت)

10-22-2012 02:24 PM
احسن ليك تشتغل سمسار اراضى وما تشتغل بشهادتك دى خالص .. والله تاكل ملبن


#493374 [alsudani]
4.00/5 (3 صوت)

10-22-2012 02:21 PM
يا أبنى لو كنته مفتكر الكيزان بس الشغالين بالواسطه تكون غلطان وهناك فرق كبير بين الدخول والتخرج
يا ابنى جامعة الخرطوم تكون بليد فيها أو شاطر مش مهم بس تكون من العوائل أو تكون من المتسيسين .. يعنى لو كنته مفكر يجى الصادق ولا الميرغنى يحل المشكله دى تكون غلطان
أما دكاترة جامعة الخرطوم وغيرها الجامعات فى السودان ما لم يعرف الطالب 70% من نتائجه فى المادة كعمل خلال الكورس قبل الإمتحان فلا مجال للنزاهة فى الدراسة الجامعية
فى الجامعات فى كل العالم يقيم الطلبة الأستاذ وكذلك الأستاذ وكم من عدد كبير من الأساتذة لم يستطيعوا العمل لأسباب تتعلق بتقيمهم
الجامعات والكليات العسكرية تحتاج لمراجعة شاملة وكاملة
و اعرف أن التغير فى السودان ما لم يبدأ بالتعليم وإنهاء الواسطة والتقيم فقط بالكفائة لا ينفع


#493367 [أبو الغيث]
5.00/5 (1 صوت)

10-22-2012 02:13 PM
والله حزنت لأمر السودان والدول يبنيها المبدعون وليس المتسلقون وفاقدي القدرات وقريبا انشاء الله ابننا حسين يا عظيم ستكون انت وزير النفط بالسودان وفاقدي القدرات الا من دقينة وسيخة يبيعوا آيسكريم بس بالتكاتف عشان كل واحد يلقي حقو في البلد البقت ضيعة للجهلة والأرزقية والمنتفعين الوسخين الل...........ة!!!!!!!!!!


#493338 [سعد]
5.00/5 (1 صوت)

10-22-2012 01:22 PM
المفروض الكسره تكون الحكومه تقدمت بالاستقاله ومشت محل الايسكريم عشان كل واحد ياخذ لحسه حسبى لله ونعم الوكيل مهندس ببيع اسكريم طيب خريج الاساس ببيع شنو ؟ اكيد ببيع نييييييم


ردود على سعد
United States [سمبلة] 10-23-2012 06:19 PM
خريج الاساس بقدرة قادر يتكتب اسمه وقبله حرف د. ويشتغل وزير ولا معتمد
ولا اضعف الايمان مستشار ، ويركب برادو ويعاين ليك من فوق لتحت ويمشي ,

[شهاب ثاقب] 10-22-2012 07:54 PM
طبعا يركب كارو


#493334 [ثائر ضد الفساد]
0.00/5 (0 صوت)

10-22-2012 01:19 PM
ولدك ده لو يشتغل في جمهورية شلعوها الكيزان دي طالما انه ما حمل سيخ لصالح المشروع الحضاري بتاع بني لفخان .
انصحه بالصلاة قرب شيخنا بتاع الكرامات في مسجد الشهيد
فاتح انا عارفك انتهازي اوع تأخد الفكرة وتعملها انت


#493308 [وحيد]
5.00/5 (1 صوت)

10-22-2012 12:53 PM
.... كمان قال نفط ... ياخي النفط دا ناس الحركة الشعبية بعد اتفاقية السلام ما خلوهم يقربوا منو....
الله يسهل امورك بعد ينصلح الحال و ترجع تماسيح البلد دي البقى يقدل فيها الورل


#493307 [وحيد]
5.00/5 (1 صوت)

10-22-2012 12:52 PM
يعني كنت متوقع يشغلوك؟ يا اخي دي جمهورية الكيزان المتحدة حيث يتوظف فيها الكيزان و يغتني الكيزان و يقدل فيها الكيزان.... اي مواطن غير كوز يفرض عليه ممارسة المهن الدنيا مهما كان نوع مؤهلاته ليخدم السادة الكيزان يقدم لهم الايسكريم و ينظف قصورهم ثم يدفع لهم الضرائب من القليل الذي يتحصله من المهن الهامشية....
انتو قايلين البلد دي بلدكم؟


#493288 [MAHMOUDJADEED]
0.00/5 (0 صوت)

10-22-2012 12:33 PM
تَغَرَّبْ عَنِ الأَوْطَانِ فِيْ طَلَبِ العُلَى =وسافِرْ ففي الأَسْفَارِ خَمْسُ فَوَائِـدِ

تَفَرُّجُ هَـمٍّ، واكتِسَـابُ مَعِيْشَـةٍ =وَعِلْمٌ ، وآدابٌ، وصُحْبَـةُ مَاجِـدِ

فإن قيلَ في الأَسفـارِ ذُلٌّ ومِحْنَـةٌ =وَقَطْعُ الفيافي وارتكـاب الشَّدائِـدِ

فَمَوْتُ الفتـى خيْـرٌ له مِنْ قِيامِـهِ =بِدَارِ هَـوَانٍ بيـن واشٍ وَحَاسِـدِ


#493287 [صاحي الصاحي]
4.50/5 (5 صوت)

10-22-2012 12:32 PM
يعني بالعربي الفصيح الزول ده لو اتمرد وشال سلاح مافي واحد بيلومو


#493283 [أبوأسامة المهاجر]
4.95/5 (9 صوت)

10-22-2012 12:31 PM
عندنا وظيفة مهندس بترول وآيس كريم وبروستد وعلى المتقدمين إبراز الشهادات الآتية:

1. شهادة جنسية تثبت أن المتقدم شايقي بالميلاد.
2. تزكية من مسئول كبير بشرط أن يعرض خدمة لمسئول التعيين مقابل توظيف قريبه.
3. إقرار من المتقدم بعدم الخوض في قضايا الفساد وعدم كشف اسرار العزبة.
4. أن يقبل الرشاوي والهدايا فهي حلالاً بلالاً وليس فيها ضرر.
5. ألا يكون المتقدم ممن أدينوا بالشرف والأمانة والنزاهة.


#493276 [أبو ناهد]
5.00/5 (3 صوت)

10-22-2012 12:24 PM
أنضم إلى ثوار بلدك الأحرار حتى تخلصوا البلد من قبضة هذه العصابة الفاسقة وحتى يقتسم الشعب فرص الخدمة المدنية، كل حسب مؤهلاته وحظوظة وحتى ننأ بالخدمة المدنية عن معايير التمكين وأتباع الأنظمة الشمولية الفاسدة.


#493266 [خالد فارس]
5.00/5 (1 صوت)

10-22-2012 12:09 PM
الزول الكان مبارى (الكيزان) و مربت ٥ سنين هسى إتوظف بى أحسن راتب (ابننا حسين نقول ليك لم تعرف من اين تؤكل الكتف لو تابعت الشايلين السيخ كان الان بنيت ليك عمارةمن السيخ حقهم هذا بس اقول ليك انت ولد صالح ووالدينك راضيين عنك لانهم ربوك بالحلال ودع عنك ناس السيخ والملتوف)


#493261 [حسن العمدة]
5.00/5 (1 صوت)

10-22-2012 12:05 PM
يااخي انا خريج نفس الكلية ومن خمسة اعوام وواجهت نفس الواجهتو انت وامكن اصعب
لاني كنت عندي ارائي السياسية الواضحة تجاه هذه الشرزمة والمافيا الكوزانية
وشفت الواسطات والمحسوبيات والولاءات واللاكفاءات
المشكلة الخاصة لاتنفصل عن المشكلة العامة في البلد (الحالها واقف)، بل هي احد افرازاتها
فياباشمهندس انضم لصفوف المناضلين من اجل وطن العدالة والحرية والمساوة وحينها سيكون الوطن احلى مما تتمني
وستكون انت ونكون كلنا ويكون الوطن
كن بخير


#493247 [الزوُل الكَان سَمِحْ]
5.00/5 (2 صوت)

10-22-2012 11:49 AM
إبننا حسين

ماعليك إلا أن تقوم بتثيق شهاداتك ..وتتجه جنوباً إلى الدولة الوليدة وأسأل الله أن تجد اوظيفة الملائمة لمؤهلك ..مع تمنياتى لك بالتوفيق..

ويا استاذ جبرا..حقو إقتراحك ده يعملوهوا فى مصفاة الجيلى يعملوا أيسكريم بنزين وأيسكريم ديزل وأيضاً أيسكريم زفت


#493240 [awad]
5.00/5 (1 صوت)

10-22-2012 11:40 AM
أخى الفاتح جبرة مشكلة هذا الأبن توجد الألف منها للخريجين وأى كفاءة أو مبرز فى مجال من المجالات لا يجد عمل فى مجاله بل ما بشتغلوا بيه الشغله وهذه افة التمكين الجابوها ليها ناس الهدم وليس الأنقاذ لعنة الله تغشاهم فدمروا الشباب وأكثروا الفساد وشتتوا العباد الله يشتت شملهم .حاجة تعمل أرتكاريا فى الدماغ.بالله ياود جبرة أجيب على سؤال الأديب الراحل الطيب صالح(من أتوا هؤلاء)؟.كسرة سابتة متى يحلوا ويغوروا ووووووو من حياتنا؟


#493227 [وضح.. أبن... أفصح]
0.00/5 (0 صوت)

10-22-2012 11:29 AM
يا ولدنا يا حسين... إنتا لسع تحت تأثير الصدمة... سنة شنو القعدتها وقعدت تبكي وتشكي منها... أنا بعرف ناس اتخرجو (في نفس مجالك ده) من أكتر من خمسة سنوات ولسع ما اتعينو... بل وصلوا (سن اليأس) من حكاية الوظيفة والذي منو (ومنها)... وهم في الحقيقة مروا بمراحل الشعور بالألم وطعنة الإبرة بتاعت البنج ومرحلة فك البنج مروراً بفترة النقاهة (اللي هي عدم المبالاة (والتبلد) الوصولو ليها لعدم التوظيف "يعني بقت ما فارقة معاهم... الواحد يصحى نصة نهار يشوف ليهو شاياً يشربو... وأكان لقى ليهو رغيفة مضغها يكون ما بطال... يطلع على أصحابو يلعبو كشتينة والعصر كورة وبالليل أكان (جازفو) ليهم قروش يمشو السينما وفي حال العدم يقعدو يتونسو"... وبقوا راجين رحمة الكريم... وباقي لي إنت ح تمر بنفس المراحل دي... بس شيل الصبر... وما تكتر الجرس والكواريك... أركز زي ما ركزوا أخوانك السابقين.


ردود على وضح.. أبن... أفصح
Saudi Arabia [وضح.. أبن... أفصح] 10-22-2012 07:31 PM
ليك كده يا [sudanesesonline]؟... الراجل عندو مشكلة وبيشكي منها وأنا قدمت ليهو علاج (مع إني مقتنع معاك إنو كعب)... لكن هو العلاج الوحيد المتوفر (غصب)... و(الصبر مفتاح الفرج)... وألا إنت عايزني (أعوم في "ومع" بعض "التيارات") (كالإمعات)؟.
ح أجيك في (حضنك) "لكن بطريقتي الخاصة" وأقول ليك: الوضع (العام) ما بيعجب لا عدو ولا صديق... لكن بيبقى السؤال: الـ Approach بتاع (الحل الشامل) من وجهة نظرك شنو؟ (مع إني تقريباً عارف الأجابة)... هل عاجبك حال الجيران المحيطين بينا (فإجابتي الخاصة بي إنو لا عاجبني حالنا ولا حال جيرانا... فإنت إجابتك شنو؟)... وبشوف إنو الناس تواصل في الماشا فيهو أسع ده... لأنو الحصل منهم (والح يحصل) دي كلها جهود بدأت نتايجها تتضح وتتشكل... فالناس حقو ما تستعجل النتائج (لأنو العجلة دايماً بتطلع الطبخة ملكوكة ونتيجتها بتكون مغص ومستشفيات "وإمكن موت")... والحلول المتهورة والسريعة كـ(كنس آثار مايو) و(اجتثاث حزب البعث) وغيرها من الشعارات الما بتختلف عن الممارسات البتشابه (التصفيات العرقية) ما ح نجني وراها إلا كل ندم ومآسي... فخطوة خطوة الناس بتصل للحد الأدنى (على الأقل) من أمانيها... ولو دام الوضع ليهم كان دايم للسبقوهم.
فأها... برضو أنا والبيشبهوني السبب؟.

Norway [sudanesesonline] 10-22-2012 05:26 PM
دى نصايحك ياسلبى .؟؟؟...انت وأمثالك السبب الرئيسى فيمانحن فيه


#493192 [كايلتود]
5.00/5 (1 صوت)

10-22-2012 11:00 AM
ليس لك الا الهجرة ... كما نحن فيه الآن .

وأسفاي علي بلد !!!


ردود على كايلتود
[ود الّذين] 10-22-2012 03:51 PM
يا أبو حسام، يا خي قول حاجة معقولة، عايز ناس الجنوب ينصفوه !! طيب بالاول خليهم يلموا مواطنيهم اللي عالقين ليهم سنة في الخرطوم ديل.

United States [Abu Hossam] 10-22-2012 12:24 PM
الله يكون في عونك .. ومن رأيي المتواضع رسل السي في لوزارة النفط بدولة الجنوب علهم ينصفوك ولو في امكانية للتجنس فتوكل على الله وغير الصنف الصلف !! وأسأل الله لك التوفيق ولا تجعل لليأس طريق في قلبك أبدا وتأكد بأن الله سيكون في عونك بإذنه أحد .


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة