أقول ليهو شنو؟
10-24-2012 10:32 AM

أقول ليهو شنو؟

الفاتح جبرا
[email protected]


لنفترض أن أحد (الأجانب) وهو يزور بلادنا سألنى واحد من الأسئلة التالية .. أقول ليهو شنو؟

• لماذا يشتغل المسؤولون بالأعمال الخاصة بينما الإسلام والدستور (ذاااتو) يمنع إشتغال المسئولين بالأعمال الخاصة .. أقول ليهو شنو؟
• لديكم الماء والأرض الخصبة الشاسعة ولكنكم تستوردون الغذاء من الخارج .. أقول ليهو شنو؟
• أولاد زعماء المعارضة لديكم مستشارين في الحكومة ... ممكن تفهمني الحكاية دي كيف؟ .. أقول ليهو شنو؟
• لماذا لا يبت في قضايا النهب المصلح لديكم بينما يبت سريعاً في قضايا السرقات المنزلية وأنتم دولة إسلامية .. أقول ليهو شنو؟
• كل الدول في العالم نجد أن الدولة توفر المواصلات الدخلية للمواطنين .. بصات .. ترام .. مترو .. لماذا لا تقوم حكومتكم بتوفير المواصلات للمواطنين .. أقول ليهو شنو؟
• لماذا تقتصرون الحدود في جلد السكاري ولا تقتصون من سارقي قوت الشعب .. أقول ليهو شنو؟
• لماذا تقومون بتشييد مسجد داخل مستشفي بألاف ملايين الجنيهات والمرضي بالمستشفي (ذاااتو) يموتون لأنهم لا يجدون ثمن الدواء ... أقول ليهو شنو؟
• في كل دول العالم يمكنك أن تحتفل بزواجك حتي صباح اليوم التالي .. لماذا تنتهي حفلات زواجكم عند الحادية عشرة مساء؟ أقول ليهو شنو؟
• بلدكم دي ليها ربع قرن والمسئولين فيها ياهم نفس المسئولين .. إنتو السودان بتاعكم ده ما فيهو غير الناس ديل؟ ؟ ... أقول ليهو شنو؟
• وكت أصلو عندكم الوزارات والمؤسسات ممكن تجنب ليها قروش لا تتراجع ولا يتعرف التصرف فيها كيف .. طيب أورنيك 15 بتاعكم ده فايدتو شنو؟ .. أقول ليهو شنو؟
• وكت أصلو (القصة ما دينية) والجنوب وافقتوا على فصلو طيب ليه إنتو قعدتوا تحاربو السنين دي كووولها وصرفتو دم قلبكم على الحرب وألاف من شبابكم مات فيها ؟ .. أقول ليهو شنو؟
• ليه تستغرق صيانة كبري لديكم سنيتن ونص ؟ الكبري ذااات نفسو بيتعمل في مده أقل من كده .. أقول ليهو شنو؟
• المسئول عندكم بيستقيل لمن يجلط ليهو كم جلطة؟ ... أقول ليهو شنو؟
• أي فريق كورة عندكم يتغلب يرميها طوااالي في حكم المباراة .. هو أصلو عندكم مافي فريق بيتغلب عدييييل كده؟ ... أقول ليهو شنو؟
• في حالات جرئم الإغتصاب المثبته على الأطفال عندكم لاحظت إنو الأحكام متفاوتة مع إنو الجريمة (متماثلة تماماً) ... تلاقي قاضي يحكم بالجلد وواحد تاني بالسجن وواحد تالت بالإعدام .. هو شنو كل قاضي عندكم عندو قانون براهو ؟ أقول ليهو شنو؟
• مع إنو قاعدين تسمو شارع (الخرطوم- مدني) شارع الموت وهو شارع غير مطابق لأبسط مواصفات السلامة وقاعد يكتل فيكم بالعشرات ليه الحكومة ما عاوزة تلصلحو ؟
• مع إنو عندكم حرس حدود وجمارك ومكافحة تهريب وهيئة مواصفات ومقاييس لكن كل البضاعة الفي أسواقكم مضروبة وتقليد ! أقول ليهو شنو؟
• الزول العمل ليكم ثورة التعليم العالي وفتح ليهو تلتمية جامعة ده ما كان عارف إنو لازم يوفر فرص عمل للخريجين وللا كان عارف .. أقول ليهو شنو؟
• هل الشريعة مطبقة في بلدكم دى وللا ما مطبقة ... ؟ ... أقول ليهو شنو؟

كسرة :
خليكم من الفوق ده كووووولو هسع لو سألني عن الكسرة التحت دي ... أقول ليهو شنو؟
كسرة ثابتة :
أخبار ملف خط هيثرو العند النائب العام شنو(ووو وووو ووو)؟





تعليقات 27 | إهداء 0 | زيارات 6745

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#496548 [عبدالعظيم]
3.13/5 (4 صوت)

10-27-2012 10:06 AM
ولو الخواجه دا سألنى جبرا دا بجيبها من وين أقول ليهو شنوووووووو؟


#496524 [دهشان]
2.25/5 (3 صوت)

10-27-2012 09:11 AM
قولليهو حاسد ولا بغران


#496257 [abirh]
3.00/5 (2 صوت)

10-26-2012 06:14 PM
لو الخواجه ده سالني انت سودانيييييييييييييي ؟؟ أقول ليها شنو ..)8


ردود على abirh
Sudan [محمد جمال] 10-27-2012 12:35 PM
والله كملت الكلام


#496092 [حمد محمد الشيخ]
3.38/5 (6 صوت)

10-26-2012 11:39 AM
استاذ الفاتح
الله يديك العافية وكل سنة وانت طيب
والله لو ناس الحكومة بطلعوا علي عمودك دا والله ما يقعد فيهم زول
لكن ناس ما عندهم دم
طيارات تحرق وطيارات تدمر والحكومة قاعدة ذي ما هي لا وزير يستقيل
ادينا عرض اكتافه ولا ريس يفوت ولا نايب يموت اها مكنكسين فيها كدا
لحدي زيت زيتنا يطلع كان باقي فيه زيت


#495957 [monamie]
2.50/5 (4 صوت)

10-26-2012 02:21 AM
الاستاذ الكبير الفاتح كل سنه وانت طيب اوريك تقول ليه شنو؟ قول ليه قول انت بقيييييييييييي


#495186 [ابوغره]
3.00/5 (4 صوت)

10-25-2012 12:30 AM
(• لماذا تقومون بتشييد مسجد داخل مستشفي بألاف ملايين الجنيهات والمرضي بالمستشفي (ذاااتو) يموتون لأنهم لا يجدون ثمن الدواء ... أقول ليهو شنو؟)
ذلك لأن حكومتنا مفتكره انو بناء المسجد اللي هو الشوفانيه اهم عند الله من انقاذ حياة مريض .


#494910 [huwidah]
3.00/5 (5 صوت)

10-24-2012 06:22 PM
غايتو انا حلمت قبل كم يوم كده انو لاقاني واحد خواجة قال لي انتي الزول ابو صلعة الاسمو جبرة ده كل يوم قاعد يكتب وبناقش قضية معينه دحين في زول من ناس الحيكومه قاعد يهببو ليهو...
وحاتكم ما عرفت اقول للخواجة شنو....


#494908 [fax]
2.50/5 (4 صوت)

10-24-2012 06:20 PM
طيب نحنا نقول ليك شنو يا جبرة؟؟؟


#494905 [سمبلة]
3.38/5 (11 صوت)

10-24-2012 06:09 PM
لو سمحت ممكن اجاوب علي بعض الاسئلة
1/لديكم الماء والأرض الخصبة الشاسعة ولكنكم تستوردون الغذاء من الخارج .. أقول ليهو شنو؟
اقول له الحاجات دي بتاخد وقت طويل لغاية ما نقدر نبلع منها لكن الاستيراد البلع من ساهل وسريع
2/أولاد زعماء المعارضة لديكم مستشارين في الحكومة ... ممكن تفهمني الحكاية دي كيف؟ .. أقول ليهو شنو؟
اقول له لانه لا الحكومة حكومة ولا المعارضة معارضة كله ضحك علي الدقون المهم فيد واستفيد
3/لماذا تقتصرون الحدود في جلد السكاري ولا تقتصون من سارقي قوت الشعب .. أقول ليهو شنو؟
علشان السكر ده بيجب لينا فضيحة لانه الزول السكران بيمشي في الشارع والناس كلها بتشوفه وبيعرفوه سكران لكن سارقي قوت الشعب شغلهم بام غمتي ، يعني ما في فضيحة ولا حاجة
4/لماذا تقومون بتشييد مسجد داخل مستشفي بألاف ملايين الجنيهات والمرضي بالمستشفي (ذاااتو) يموتون لأنهم لا يجدون ثمن الدواء ... أقول ليهو شنو؟
تقول ليه يازول انت كافر ولا شنو ؟؟؟ ما يموتوا الناس ولا يروحوا في ستين داهية ، انت عاوزني افوت مواعيد الصلاة اللي بتبدأ قبل مواعيدها بنص ساعة وتنتهي بعد مواعيدها في نص ساعة بنقضيها تحت المكيفات ، الله يهديك الي طريق الصواب .
5/ في كل دول العالم يمكنك أن تحتفل بزواجك حتي صباح اليوم التالي .. لماذا تنتهي حفلات زواجكم عند الحادية عشرة مساء؟ أقول ليهو شنو؟
اقول له والله دي الحسنة الوحيدة اللي عملتها لينا الحكومة دي انها ريحت راسنا من الخبط والرزع الليل كله في اغاني تافهة وحناجر حميرية ووفرت علي الميزانية ملايين الدولارت اللي كنا بندفعها تمن البندول اللي بنطفحه بعد كل عرس في الحي اللي بعد حينا من شدة الازعاج
افتكر كفاية كده


#494873 [كوكو]
2.75/5 (6 صوت)

10-24-2012 04:20 PM
قوليهم بيريحون ناسهم وأعضاء حزبهم بس والشعب الباقى خلى دين أمهم يطلع اصلو شعب زاحمنا ساى أى والله ده كان رد كوز فى كورة فى نقاش لكن والله صاحبكم اليوم مقطع من لغم حق الترمس ماعنده


#494849 [زهجان من الغربه.. ما تمشوا خلونا نرجع]
4.19/5 (7 صوت)

10-24-2012 03:31 PM
ولو قال ليك عندكم حق خروف العيد تقوليهو شنو؟؟؟؟؟؟؟؟؟؟؟؟؟؟؟؟


#494828 [أبو الغيث]
2.50/5 (3 صوت)

10-24-2012 02:59 PM
كل سنة وانت طيب يا جبرة


#494827 [عبد الواحد المستغرب أيما إستغراب!!]
3.38/5 (6 صوت)

10-24-2012 02:58 PM
قول ليه ببساطه.. كده اول(إستغفر)!! ياخواجه..نحن (بدنا الجنه التى عرضها السموات والارض حيث الحورالعين ) وإنتو إخترتو الدنيا ومباهجها.. ونحن كما قال الشيخ /جمال البنا (متهكما على المسلمين وهو بالمناسبة الشقيق الاصغر لحسن البنا (الهارينا بنظرياتو! حتى وهو فى باطن الارض!) بنتولد عشان نموت ونخش الجنه وما لينا غرض فى الدنيا!! وعليه فأسئلتك إنصرافيه ومردوده إليك يا خواجه يا وش النحس..يا حاسد!!.


#494800 [محموم جداً]
2.75/5 (5 صوت)

10-24-2012 02:26 PM
لا تقولو و لا يقولك لأنه هو من الكوكب الارضي و نحن السودانيين شعب تدحرج من الكرة الارضية و متجهين نحو كوكب آخر الى أن نصل اليه سنجيب على كل هذه الاسئلة حسب اللغة الجديدة التي نتبناها في ذلك الكوكب الجديد؟
أما بخصوص الكسرة القديمة المتجددة يا جبرا إنت لسع ما سك في خط هيثرو لما ضيعت الخطوط الجوية السودانية و الخطوط البحرية و السكك الحديدية ومشروع الجزيرة و المطار الجديد و بنك الخرطوم و وزارة الصحة و الذهب و البترول و الجنوب و الناس الطاشة في بلاد الله..و...و...الخ


#494781 [الزُول الكَانْ سَمِحْ]
2.50/5 (4 صوت)

10-24-2012 02:09 PM
يا أستاذ جبرا

ولو الزول دا سألك عن الطيارات الإسرائيلية البتجى تضرب فى البلد شرق وغرب..وما فى زول شافها؟؟تقول ليهو شنو؟؟

ولو سألك إنتا يا أستاذ إشتريت خروف الضحية؟؟تقول ليهو شنو؟؟

كل سنة وإنتا بألف خير..والقابلة على عرفات ..حج سياحى..


#494751 [بكري كريل]
3.00/5 (4 صوت)

10-24-2012 01:33 PM
سالينى سعودي معاي فى الشغل تصنيع حربي ومخزن زخيرة في وسط العاصمة؟؟ اقول ليه شنو؟؟؟؟؟؟؟


#494706 [أبو محمد]
3.38/5 (7 صوت)

10-24-2012 12:48 PM
يا ود جبرا قول ليه اجلي النظر يا صاحي الطائرات بدأت تدك الخرطوم ههههههههههههااااااااااااااااي واللمبي نايم في العسل


#494681 [اوهاج]
2.50/5 (4 صوت)

10-24-2012 12:21 PM
لو سالك عن حريق مصنع اليرموك حتقول ليه جبرة والشجرة وابوادم دى زى جونقلى فى جنوب السودان تكثر فيها الحشائش عشان كده ارتفعت السنة اللهب اذا سالك عن حكايات الطائرات البقولوا عنها ناس الكلاكلات قول ليه يااخى انا الفاتح جبراوعارف حبرا والعزوزاب واللاماب وكل المنطقة دى وما حولها وكلام الصوارمى هو الصاح القصة كلها فى الحشائش على كل حال اذا انت من سكان جبرا ربنا يكتب سلامتك
كسرة يا جبرا:
اخر طيارة اسرائلية اخترقت الاجواء السودانية كانت بتاعت ترنسيت بورتسودان وقالوا نحنفظ بحق الرد
اخبار الرد ايه؟


#494660 [مدحت عروة]
3.00/5 (3 صوت)

10-24-2012 12:03 PM
قول ليهو يا الفاتح جبرا حالنا كده عشان حاكمننا خيرة وعمالقة اهل السودان فى السياسة والادارة والعسكرية والرياضة وكل المجالات !!!!(طبعا فاهم قصدى) !!!
كسرة:
انت اخبار المؤتمر القومى الدستورى شنو ؟؟؟؟؟؟؟


#494652 [أسامة عباس]
3.00/5 (4 صوت)

10-24-2012 11:56 AM
ياجبرا قول ليهو المسئول عندنا حتى لو جاتو جلطة مابستقيل لانها هى لله


#494644 [البعير]
2.50/5 (4 صوت)

10-24-2012 11:47 AM
والله اقول ليه شنو دى عيدية تمام التمام ، ولو سال قال ليك انتو دولة بصدر الثروة الحيوانية فيكيف

سعر الخروف عندكم اكثر من سعر الخروف في الدول المستوردة منكم تقول ليه شنو ، ولو سالك عن سبب الجوع

وتشريد الشعب السوداني في كل دول العالم مع انو انتو دولة مفروض تكون سلة غذاء العالم تقول ليه شنو

وكل سنة وانت طيب يا استاذ الفاتح جبرة .


#494643 [محمد دفع الله]
2.75/5 (4 صوت)

10-24-2012 11:47 AM
يا اخ الفاتح يا اخى انت يوم بتكقتل ليك زول . يا اخى اسئلة رهيبة عديل كده واى واحد يسالك قول ليه ح اشوفك ليك المسئولين.


#494635 [واحد تانى]
3.00/5 (5 صوت)

10-24-2012 11:43 AM
قول ليه الشعب السودانى ....جبان .


#494623 [ابو عبد الله]
2.50/5 (4 صوت)

10-24-2012 11:34 AM
قول ليه الشنينه أم قرينات .. ده السودان بلد المفارقات ___ أو ترد ليه السؤال بي سؤال من شاكلة أسرع الحصان ولا أطول البحرـ واذا عرف يجاوب معناها براه بنجح في الاجابة على اسئلتك دي


#494612 [abuawaab]
3.38/5 (7 صوت)

10-24-2012 11:22 AM
عندك كميه من الشهادات الجامعيه والفوق والتحت وشهادات خبره ولكن قاعد عاطل والماعندهم شهادات شغالين في اكتر من وظيفه .. اقول ليهو شنو؟


#494609 [المشتهى الحنيطير]
3.97/5 (7 صوت)

10-24-2012 11:21 AM
خلى ده كوووووولو. هسه لو قال ليك المقعدكم فى البلد دى شنو؟ تقول ليهو شنو؟


#494606 [حاتم عبد اللطيف]
2.50/5 (4 صوت)

10-24-2012 11:18 AM
ببساطة قول ليهو البغلة فى الإبريق...!!!!


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة