صابر والعيد
10-27-2012 11:53 AM

صابر والعيد

الفاتح جبرا
[email protected]


لم يعرف النوم إلى عيني (صابر) سبيلاً حيث قضي ليلته يفكر في ما عساه ان يفعل حين يطل فجر الغد .. فجر العيد الذي من المفترض أن يكون سعيداً لولا أنه لم يستطع الإستعداد لقدومه إذ لم تسمح جيوبه الخاوية من شراء ملابس العيد لاطفاله الصغار ولا حتي (الخروف) الذي دأب على شرائه منذ أن تزوج قبل أعوام طويلة .. ومع إنبثاق الفجر وهو على هذى الحال أتاه صوت من بعيد
- أنا العيد !
- إتشرفنا وأنا (صابر)
- لا ما أقصد .. أنا العيد الوااحد ده البيفرحو فيهو الناس ويضبحو فيهو الخروف ويلبسو فيهو جديد
- ياخي بالله الواطه صباح أدينا عرض أكتافك من غير مطرود .. اصلو راسنا مسخن من الفلس
- ياخي معقولة ؟ تطردني؟ في زول بيطرد العيد !
- والله أطرد ليك الوقفة ذاااتا
- مالك إنتا زعلان ياخ هون عليك
- أها شفتا أنا جني وجن ناس (هون عليك) و(أحسب أن) دي
- ودي دخلها بالعيد شنو؟
- عندها دخل ما عندها دخل أنا مما أسمعا بتعمل ليا عصبي ! أنتا عاوز تصاحبني شكلك كده ؟
- لا والله الحكاية بسيطة أنا قلتا بس أجيك عشان تفرح بيا وكده
- أفرح بيك؟ إنتا من زمن المواطن بيفرح بيك؟
- كيف؟
- ده كان زمان يا عيد .. أيام الخروف كان (عشر) المرتب .. هسه المرتب (عشر) الخروف
- يعني هسه إنتا ما فرحان بيا ؟
- عاوز النصيحة وللا حاجه تانية ؟ هسه والله مما تقرب (تجهجه باكاتنا) ذااتا وتخلينا في حالة (شرود ذهني) وسيحان في المفاصل !
- بالله أنا كعب كده؟
- ياخي ما تفهمني غلط أنا ما قلتا إنتا كعب .. نحنا الكعبين !
- ما فهمتا
- ما فهمتا كيف؟ إنتا العيد بتاع (كوريا) وللا اليابان ؟ مش عيدنا القاعد معانا هنا ده !
- لا ما قاعد ... بغيب عنكم سنة كاملة وبعدين بجيكم !
- أها شفتا السنة الإنتا بتغيبا دي هي المشكلة
- كيف؟ لو عاوزنني أجيكم كل أسبوع ما مشكلة !
- ياخي عليك الله ما تهظر هو أنحنا كل سنة قادرين عليك .. إنتا قايل نفسك براك ؟
- أنا عارف نفسي ما براي معاي أخوي (عيد الفطر) !
- عيد الفطر بس؟ وعيد المدارس وعيد الجامعات وعيد العلاج وعيد المواصلات وعيد الدواء وعيد الكهرباء وعيد الموية وعيد (القفة) !
- (مقاطعاً) : بالله دي كووولها اعياد عندكم (ثم) وبرضو بتضبحو فيها؟
- لا بننضبح !
- بي مناسبة ننضبح دي .. ما سامع ليا صوت خروف عندك !
- يجيبوهو بي شنو؟ أجيب ليا ملايين من وين؟
- كيفن يا صابر ما تشوف ليك يسلفك ؟ أو يديك ليهو بالأقساط؟
- إنتا عاوز تبقى ليا زى (الجماعة) وللا شنو؟ قول إستلفتا وللا أشتريتو بالأقساط أسدد قروشو دي من وين؟ الناس دي يا (عيد) بتتكلم سااااكت
- كيف؟ ما قالو ليك المسألة دي جايزه
- القضية ما جايزة وللا مكروها .. القضية هي إنو ظروفي ما بتسمح ليا أدفع أي اقساط !
- طيب إن شاء الله تكون فرحتا الأطفال وإشتريت ليهم ملابس عشان يقابلوني بيها !
- والله إنتا ما عارف حاجه ساكت .. تغيب ليكا سنة وتجي وما عارف ملابس الأطفال أخير منها الخرفان !
- يعني شنو؟ إنتا السنة دي ما معيد بيا ؟
- بلاش إستفزاز معاك .. أمشي شوف ناس (أحسب أن) المعيدين .. الساعة بقت تسعة .. خلينى أمشي أجازف ليا (فول ورغيف) أفطر بيهم الأولاد ديل !!

كسرة :
(خروف) مافي .. . (رادار) مافي ... الله في !!

كسرة ثلبتة :
أخبار ملغ هيثرو العند النائب العام شنو(ووو وووو ووو)؟




تعليقات 18 | إهداء 2 | زيارات 8073

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#499261 [aboosi99]
0.00/5 (0 صوت)

10-31-2012 01:09 PM
منو القال رادار مافي دا ومال عرفناهم اسرائلين كيف وتجارة السلاح ماله دولارات البترول دي اعوضوها ليكم كيف والكباري الكل يوم قايم واحد مابنرول ولاتجارة سلاح سلام سلاح سفن ايرانيه لحماية تجارة الحدود دي برضها مافيها رادارات


#499110 [البانوشى]
0.00/5 (0 صوت)

10-31-2012 10:36 AM
يا جبرة كل سنة و انت طيب

رادار مافى صحيح بس استراتيجية الدفاع بالنظر فى ؟؟؟


#497812 [أمير أبوقنايه]
0.00/5 (0 صوت)

10-29-2012 04:29 PM
الاستاذ جبره
لك التحيه والتجله
وكل عام وانت والجميع بخير واعاده الله علينا جميعا بالخير واليمن والبركات
أتصور إنو عنوان المقال هو ما جاء في آخره قبل موضوع هيثرو:
خروف) مافي .. . (رادار) مافي ... الله في !!
ولا رأيك شنو
أعاده الله علينا بالخير واليمن والبركات


#497720 [abuawaab]
5.00/5 (1 صوت)

10-29-2012 02:34 PM
لك التحيه وكل عام انت بالف خير يا استاذ جبرا مع تمنياتي بدوام الصحه والعافيه
انا شخصيا اكتر عيد تعبتني يا استاذ جبرا واتمني من الله ان يعيد علينا ونحن احسن حالا
وان يولي الله امرنا من يخافه ويرحمنا يا ارحم الراحمين


#497540 [موسى الدكوم]
0.00/5 (0 صوت)

10-29-2012 10:18 AM
نلبس الاولاد الزلط ونضحى ليهم بالكبارى والسد@


#497418 [الجمبقلى]
0.00/5 (0 صوت)

10-29-2012 01:49 AM
تعرف الخروف البشرى يا استاذ الفاتح ؟هو الشاب الذى تستقله الشابه وفى النهايه يطلع ملوص

هذا هو حال الأنقاذ مع حماس


#497388 [اسعد الطاهر]
0.00/5 (0 صوت)

10-29-2012 12:04 AM
عبدالرحيم فى!!!!!!

هارون فى !!!!!

كرتى فى !!!

الشيوخ فى !!!


#497259 [musa]
5.00/5 (1 صوت)

10-28-2012 05:47 PM
لله دى حلوة ا ستاذ جبرة خروف مافى رادار مافى ورد ابواسامة احلى ضحكتونا ٠كل عام وانتم بخير٠


#497206 [موجوع بالصح]
0.00/5 (0 صوت)

10-28-2012 02:57 PM
صدق والله "وأحسب أن" دي فعلا مما أسمعا بتفور العصبي عديل.. بالغت يا جبرا يديك العافية..


#497119 [أبو الغيث]
5.00/5 (1 صوت)

10-28-2012 11:32 AM
رائع ودجبرة وكل سنة وانت طيب


#496934 [أبوأسامه المهاجر]
5.00/5 (9 صوت)

10-27-2012 10:54 PM
رادار مافي جعجعة في
مضادات مافي حلاقيم في
سلاح مافي عبدالرحيم في
تخطيط مافي تخبط في
سلام مافي إتفاقيات في
رد مافي تهديد في
إنجاز مافي إعجاز في
ديموقراطية مافي توالي في
وحدة مافي جدة في
زراعة مافي نهضة زراعية في
بترول مافي الجاز في
شريعة مافي نفاق في
سودان موحد مافي الخرطوم في
تعليم عالى مافي جامعات في


ردود على أبوأسامه المهاجر
Saudi Arabia [أبوأسامة المهاجر] 10-30-2012 12:20 PM
يديكم العافية يا طه والكيشة ومظهر

[طه محمد عمر] 10-28-2012 07:11 PM
ابدعتا اكتر من جبره

South Africa [الكيشة] 10-28-2012 02:34 PM
يا Mazar ابو اسامة المهاجر كاتب بالعكس يعني: في جعجعة مافي رادار
في نهضة زراعية مافي مافي
and so on

Sudan [mazar] 10-28-2012 12:24 AM
هههههههه الذ شي
رادار مافي جعجعة في
مضادات مافي حلاقيم في
سلاح مافي عبدالرحيم في
تخطيط مافي تخبط في
سلام مافي إتفاقيات في


#496911 [خروف اليرموك]
4.88/5 (6 صوت)

10-27-2012 09:50 PM
أدام لله عليكم الخيرات و أبعد عنكم الانفجارات
و جنبكم السكن فى جبرة والكلاكلات والنوم بجوار مصانع الذخيرة والمستودعات
و كل عام و أنتم بخير ..


ردود على خروف اليرموك
Germany [abuawaab] 10-29-2012 02:45 PM
امين .....امين.....امين....امين ......امين.......امين.......امين........امين....امين يا رب العالمين
وكل عام انت بخير يا خروف اليرموك

Netherlands [ودالبلد الأصلى-كان أسمو السودان] 10-28-2012 11:48 AM
يعنى النايمين فى الصالحة صالحتم ولا خلتهم ينومو !!والله كان مشيتو كادقلى زاتها برضو وراكم!


#496901 [جمال / عطبرة]
5.00/5 (2 صوت)

10-27-2012 09:18 PM
قبل 15 سنة قابلت عم حسبو جالس في برندة في سوق عطبرة يوم الوقفة باليل معاه ام العيال شايلة واحد في كتفها و واحد في البطن و 5 حول عم حسبو -- سلمت عليه و قلت ليهو انشاء تكون قضيت حاجات العيد ما رد السلام و قال يجي العيد و يفرح كل الشعوب الا الشعب السوداني - و في العيد دا ما عارف عم حسبو فرح و لا لسه قافلة معاه -- لك تحياتي عم حسبو .


#496810 [Anya O]
5.00/5 (3 صوت)

10-27-2012 05:15 PM
صحيح الله في حسبنا الله و نعم الوكيل


#496801 [زول]
5.00/5 (2 صوت)

10-27-2012 04:51 PM
احسبو ان الشربوت خمر عندك


#496713 [محمد سكر السعوديه]
2.95/5 (8 صوت)

10-27-2012 02:01 PM
انشاء الله العام القادم كل الشعب يضحى الا ناس احسب اناوجماعه المشروع الماحضارى وناس الدفع الرباعى وناس فتاوى زواج الاطفال بعد ماشبعوا فى البنات الكبار اتجهوا على القاصرات قصر الله ايامهم المزواجين والشعب ماقادر اضحى


#496690 [المشتهى الحنيطير]
4.69/5 (5 صوت)

10-27-2012 01:20 PM
لا يا جبرة..!!! رادارات فى. و قدرنا رصدنا و صدينا الطائرات بتاعتهم!!!! انت نائم وللا شنو؟ الظاهر الخروف مطشش بيك ساكت.. لكن الله فى دى حلوة


#496650 [ملبوش]
4.50/5 (5 صوت)

10-27-2012 12:26 PM
اللهم فرج كربنا


ردود على ملبوش
Greece [القرم تفاحة ابل] 10-27-2012 02:49 PM
احسنت


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة