مقالات المناسبات
10-29-2012 12:16 PM

مقالات المناسبات

الفاتح جبرا
[email protected]

عندما يهل شهر رمضان الكريم تقوم الإذاعة بنفض الغبار عن شريط أغنية (هلا هلالك يا رمضان شهر التوبة والغفران) ثم ما أن يشارف الشهر الكريم على الإنتهاء حتي ياتيك صوت (ميرغني المأمون وأحمد حسن جمعة) وهما يصدحان (أوحشتنا شهر الصيام من بعد ما شرفتنا شهر الصيام) ثم يأتي العيد فتقوم بفتح المذياع صباحاً لتشنف اذنيك ذات الأغنية التي تسمعها صباح كل عيد والتي يتغني بها الفنان الذري ابراهيم عوض برائعة الشاعر عبدالرحمن الريح (يا عيد تعود يا عيد بالخير علينا سعيد) !
العبد لله يعتقد بأنه كما أن هنالك أغنيات تذاع سنوياً عند المناسبات والأعياد فإن لديه عدد من (مقالات المناسبات) التي تصلح للنشر عند كل مناسبة كما هي دون إضافة أو تجديد .
فعندما يأتي الخريف (كل عام) ما على العبد لله إلا أن يخرج من أرشيف مقالاته ذلك المقال الذي بعنوان (وجاء الخريف فجأتن) .. والذي يوضح فيه الكاتب كيف أن تصريحات المسئولين عن جاهزيتهم لإستقبال الأمطار لا تقل عن جاهزية فريقنا القومي لدخول تصفيات كاس العالم !
وعندما تسقط إحدى طائرات (الأنتينوف) ما على العبد لله إلا أن يقوم بنفض الغبار عن مقاله الذي درج على نشره كلما مرت هذه المناسبة (غير السعيدة) والذي يوجد به هذا (الفورم - البيان) المعد ليقوم المسئولون بملئه :
• تحطمت (صباح/مساء) اليوم …….. الموافق ……………….طائرة نقل أنتنوف 12 بعد (إقلاعها/هبوطها) بقليل (من/على) مطار ……………… (متوجهة/قادمة) (إلى/من) مدينة ……………… كان على متنها ………………… شخصاً إضافة إلى طاقمها المكون من ………… أشخاص توفي في الحال منهم …………… شخصاً ونقل …………. إلى المستشفي وقد كان سقوط الطائرة نتيجة لعطل فني في محركاتها .
أما عندما تخترق الطائرات الحربية الإسرائلية أجواء بلادنا وتصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) فما على العبدلله إلا أن يقوم بفتح درج مكتبه وإخراج مقاله الذي بعنوان (صندوق دعم الرادار) والذي يتحدث فيه الكاتب عن الغبن والأسى والمهانة التي يحس بها كمواطن وهو يري أجواء بلاده تستباح والذي يخاطب فيه المسئولين (كلما جاتنا ضربة) قائلاً :
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار)
نعم .. بصراحة، لم نعد بحاجة إلى الكتابة وتنوير المسئولين عن مكامن السلبيات املا فى إصلاح الحال وإيقاف هذا السيل من البلايا والرزايا والكوارث والمحن التي نعيشها.. ما أهو قاعدين كل خريف بنكتب مقال (جاء الخريف فجأتن) والحال ياهو نفس الحال وكل سقوط طائرة قاعدين نكتب (أنتوفيات) والحال ياهو نفس الحال وكل ضربة (إسرائلية) قاعدين نكتب (صندوق دعم الرادار) والحكاية بتتكرر والمسئولين سادين دي بي (طينة) ودي بي (عجينة) !
نعم للأسف الاسيف انه لا حياة لمن تنادى وأن القافلة تسير دون أن تلتفت إلى (نباحنا) المتكرر لتلافى أوجه النقص والقصور عشان كده أالعبدلله ببفتكر إنو ما على هذا الشعب المؤمن الصابر (المحتار) إلا الدعاء نعم (فقط الدعاء) بأن يقي الله هذه البلاد شر الفتن والكوارث وأن يقينا تصريحات المسؤولين التى أصبحت (تحرق الدم) وتصيب المواطن (بالغبينة) بعد أن إنفقعت (مرارتنا) من زماااااان !

كسرة :
مجرد رجاء أن يقوم المسئولون عن أمن (البلاد والعباد) بإزالة مجسم تلك (الطائرة) من أعلى مبني براج (القوات الجوية) بوزارة الدفاع وكذلك مجسم (السفينة) من أعلى برج (القوات البحرية) عشان (الصهاينة ) ديل بدون (مجسمات) مطلعين عين أبو أهلنا وما ناقصين اليوريهم وكده !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟



تعليقات 24 | إهداء 0 | زيارات 6058

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#498878 [حليم-براغ]
4.07/5 (5 صوت)

10-30-2012 10:50 PM
عزيزي جبرا كل عام والجميع بخير ..
خط هثرو خط هيثرو ..بقه خط تل إبيب.


#498749 [ابو مازن]
4.16/5 (6 صوت)

10-30-2012 07:16 PM
ياخي ماتتعب نفسك لو عندك اي حاجة وعاوز الريس البشكبر يهتم بها ما عليك سوي انك تصبح مريخابي موت وتدعم المريخ وتكتب الكلام المعسول عن المريخ وجمال الوالي حتي تكسب ود الوالي ثم بدوره تكسب ود وداد ثم بدوره البشكير مايقدر يرفض ليك طلب مادام التوصية جات من فوق وتريح بالك وتربي عيالك


#498405 [أبوأسامة المهاجر]
4.07/5 (5 صوت)

10-30-2012 12:35 PM
زاوية للكسرات

أستاذنا الجليل كسرة أقصد جبرة أنا إقترحت عليك أن تخصص عمود في أحدى الجرائد ويكون مخصص للكسرات وبما أن قضايا الكسرات من القضايا المعقدة وأن النائب النام لازال نائماً نومة اهل الكهف لذلك يمكنك إضافة واو كل أسبوع حتى يصحى النائب النام على ان يتم حذف كل قضية بعد خروجها من مكتب النائب النام للقضاة.

بس كتروا صفحات الجريدة لأنه ستتحول لجريدة كسرات الإنقاذ


#498400 [عطبراوي آخر]
4.07/5 (5 صوت)

10-30-2012 12:30 PM
أخي العزيز الفاتح جبرا ... كل عام وأنت بألف خير وأقترح عليك كسرة ثابتة أخري

وهــي ... حكاية نحتفظ بحق الرد دي أوانها ماجاء لحدي حسع والله راجين بيها الري والله شنوووو ؟؟؟؟؟؟؟


ردود على عطبراوي آخر
Saudi Arabia [ابو مازن] 10-30-2012 07:23 PM
ياعطبراوي ماقالو ليك الرد السد يعني سد مروي ولاماسمعتها دي


#498159 [دهشان]
4.19/5 (6 صوت)

10-30-2012 08:00 AM
خط هيثرو منتظر الواو الحداشراوى
والديموقراطية أصلها أن تسمع الحكومة صوت الشعب وتستجيب لمطالبه وتعمل الف حساب لما يقول
وليست فقط انتخابات وحق تظاهر


وأعجب من حكومة ظالمة تشتكى من الظلم!!!
فهى تتهم مجلس الامن بالسكوت على جرائم دول بعينها والكيل بمكيالين
وهى ذات نفسها تفعل الشى ذاته مع شعبها وقضايا الفساد والتقصير
وزير الدفاع يزأر كالاسد في كردفان طيارات في قنابل في الخ مخوفا الثوار
فأين كانت تلك ساعة ضرب اليرموك؟؟؟؟!!!


#498146 [فرقتنا]
4.16/5 (9 صوت)

10-30-2012 07:12 AM
بالله !!!!!!!!!!!!!! هو في نائب عام بالجد يا جماعة استحلفكم بالله اسمو منو والله والله عمري ماسمعت بيهو ولاشفتو وما عارف عدم ثقافة مني ولا لي قلة نشاطو ما عارف ولا امكن اصبت بي فيروس الجهل في 23 سنة دي؟
ياجماعة ما طولوا علي بالجابة عشان امكن الدهشة ترجع لي الذاكرة شووووووووووووووووووووووووووييييييه


#498079 [يت أمدرمان]
4.19/5 (10 صوت)

10-30-2012 02:20 AM
يا عمو جبرة قلنا إسمو النائب النام مش النائب العام ، لأنه عمره ما حيصحى يوريك الحصل لخط هيثرو شنو


#497909 [عبدالعظيم]
4.19/5 (6 صوت)

10-29-2012 07:56 PM
يا أستاذ جبرا الحكايه وما فيها أنو نحنا كنا غاشين الإسرائليين وخاتين ليهم رادار فى شارع التحدى باعتباره رادار للمرور وقام إنسرق وكده عشان كده الطائرات جات ومشت وما كفشناها .


#497886 [ود البلد بالجد]
4.19/5 (9 صوت)

10-29-2012 06:40 PM
جبرة يا جبرة كل سنة وانت طيب وخط هثرو كمان في امان عند الاخوان او في رف الدكان عنوانك زكرني مجموعة بتاعت مساطيل بتلموا كل يوم وبيحكو نكت لبعضهم البعض وكانت متكررة فقامو بدل الاعادة كل يوم وضياع الزمن بترقيم النكات فيجلسوا في جلساتهم ويبدوا 12 ويبدا الضحك 22 ويموتوا من الضحك و في احد الايام كانوا معزومين عرس فجلسوا وبدو في النكات 23 ويضحكوا 33 وينفجروا من الضحك فكان هناك واحد جالس اظنه من ناس الحكزمة فانتبه للارقام فقال 13 فرد عليه المساطيل ده شنو يا قليل الادب دي نكتة بيقولوها في مكان عام. فعليه عزيزي ارجو ترقيم مقالات المناسبات بدل تتعب نفسك في نكت الدرج ونحنا بنفهمك لانو ما تابعين للوهم وماشغالين رادارات نظرية بس اوعك من الرقم 13


#497799 [جابر]
4.19/5 (10 صوت)

10-29-2012 04:12 PM
ومعقولة دى يزيلوا مجسم السفينة والطائرة من مدينة الملاهى العسكرية !!! أمال ناس عبودى و بشبش يلعبوا بلى استيشن و ضمنة وين ؟؟؟؟؟ كفاية عليكم رادار بورتسودان و مطار الخرطوم موديل 1980


#497797 [free]
4.19/5 (8 صوت)

10-29-2012 04:09 PM
يا أستاذ عندي ليك إقتراح بعد إذنك وهو :
نحن قراء الراكوبة نعلن بأننا نعد العدة لنحتفل بالسنة الأولي للـ ( الواوية ) بتاعة كسرة مطار هيثرو أها رأيك شنو ؟


#497789 [انتنوف]
4.19/5 (7 صوت)

10-29-2012 03:55 PM
الحكومة شغالة بمبدأ
خليهم يضربوا زى ماعاوزين ونحن محتفظين بحق الرد فى مكان امين ومضمون ومحمى من السرقة والنشل
وحنستعملوا فى اليوم الاسود (هو فى اسود من كدا؟؟)


#497786 [Jedo]
4.19/5 (9 صوت)

10-29-2012 03:52 PM
تحياتنا ليك استاذنا جبرا وكل الود والتقدير

بهطل وجهل وزير الدفاع او كما سماه احد معلقي الراكوبة الاعزاء "زير الدفاع" بنيت ابراج وزارة الدفاع حسب تقسيمات القوات وافتكر اللمبي ان منظر البرج وتشييدة على اشكال معينة يدل على القوة ويرهب الاعداء وطبعا ده كلو لانو مخ المقاول قال ليهو كدة لكن مع اول اختبار طلع كل ده فشنك وطلعت ابراج القيادة اخير يقلبوها فنادق اربح ليهم
وزير فشنك وقيادة فشنك وبنايات فشنك وصرف مهول من الميزانية على فشنك واتفشكي....


#497773 [أبو الغيث]
4.19/5 (9 صوت)

10-29-2012 03:35 PM
الله يخليك انت للشعب السوداني وتكفينا


#497756 [تمساح الدميرة]
4.19/5 (10 صوت)

10-29-2012 03:15 PM
أخى جبرة فى المرة القادمة كلم أخواننا الإسرائيليين يمرو على سوق الناقة أو قندهار ويأكلو ليهم شية ويشربو جبنة علشان رأسهم يزبظ وبعدين يواصلو الرحلة وبالهناء والشفاء.


#497728 [اسير الشوق]
4.19/5 (8 صوت)

10-29-2012 02:40 PM
والله يا جبره شي مخزي ومخجل انا بكتب ليك والعبره خانقاني من الحال التي ال اليها البلدياخي والله الاختشو ماتو تتخيل يا جبره انا كنت اكتر زول بدافع عن الهمج ديل والله ما برضا فيهم كلمه كنت من اكثر المدافعين عنهم ولكن خاب ظني خيبه ويا لها من خيبه سقط القناع وانكشف الزيف والخداع باسم الدين ربنا انتقم منهم كلهم انشا الله واورينا فيهم يوم اسود انه علي دلك قدير وبالاجابة جديرز


#497700 [kinkeej]
4.16/5 (8 صوت)

10-29-2012 02:12 PM
كسرة في الأول :

انت يا الفاتح البتاعة الضربت الهناي ماركتها شنو ؟؟؟؟؟؟؟؟؟

بمناسبة الدعاء نحن لينا كم سنة بندعو على امريكا و اسرائيل و اعوانهم بان يشتت الله شملهم و لا يذر لهم من باقية؟
الى اين يرتفع دعاء من يؤم الناس و هم له كارهون ؟
ياخي انت ما عارف انه اذا ربنا احب عبده ابتلاه ؟
وأن امر المؤمن كله خير؟ كان جاهو الخريف ضجر و كان انضرب اليرموك صبر ؟
ياخ اصبر ان الله مع الصابرين


#497695 [ابوكرنك]
4.19/5 (12 صوت)

10-29-2012 02:05 PM
وعندما تحل بنا مصيبة وتضربنا طائرات اسرائبل تقدم اغنية ميرغني المامون واحمد حسن جمعة جددننا زمان وصونا علي الوطن.


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة