رادار محلي,,,
11-07-2012 02:00 AM

رادار محلي,,,

أسماء الجنيد
[email protected]

ناس الخشم بليلة والحيلة قليلة، قلعوا لينا بي فهم جديد وفكرة نادرة.
قالوا البلد مافيها تكنلوجيا تمكن الحيكومة بت اللذينة من شوفة صواريخ إسرائيل.
مع إنه وزير دفاع البلد الهاملة قال بدافع بالنظر ! ولي هسه امخاخ الناس السمعوه مدورة سبعة لفات
في قصة الدفاع بالنظر دي كيف ؟؟
ما عرفوا قصدوا شنو !! لكن رغم تصريحه العبقري ده ، برضو ما لقى ليه مخارجة لي ناسو من صواريخ العدو إسرائيل.
اهاانا عندي ليكم فكرة احسن من دفاعكم بالنظر القلتوه ده ..
الفكرة هي تصنيع رادار محلي ، قليل ، التكلفة قوي المفعول، يشوش على كل الشبكات الخارجية والمحلية ، ده إن كمان ما عمى ليكم عويناتكم الما بتشوف غير ضرر بلدها واهله الغلابة.
اها الرادار ده اصلو دخاني , يعني دخان كثيف وابدا ما بكلفكم مليم واحد, البلد تحمد سيدها ملااااانة كوش (جمع كوشة ) مش كوشة العرسان ,, لا أبدا .. كوشة ملاااانة قمامة الله يكرمكم وملانة اكياس فاضية .
اها مع المغارب جهزوا ليكم كم ركشة فيها ناسكم الما عندهم شغلة، كنتوا مجندنهم ايام المظاهرات يجمعوا ليكم لساتك العربات، خوفا من شباب المظاهرات.
اهاناسكم ديل مهمتهم يتلبوا في الكوش ويشختوا فيها كبريتة, والدخان يقوم والأكياس تتفرطق في رأس البلد ، والريحة تطفش الذباب الساكن الكوش .
في أقل من نص ساعة البلد دخاخينها تصل الجيران من الدول, وبما إنه الأكياس في كل زاوية من الكوشة ، والكوش في كل شارع في الحي, والأحياء مكنزة في العاصمة المثلثة، البقت بي قدرة قادر مدورة ومحوطة بي ميس كبير ملان قاذورات ومستنقعات وحشرات مائية وبرمائية، مشوه الواجهة وكل العاصمة.
رغم ذلك حسنتها الوحيدة في قباحة المنظر ده إنه حافظة لينا البلد من شر العين الحارة والحسد. نحمد الله وشكر فضله..
وبعد الحريقة تقوم والنار تصل الأكياس ’ تبدأ المتفجرات و تتصاعد الأصوات للأعلى بفضل فرطيق ألأكياس، وطبعا الأصوات تخوف إسرائل وروسيا زاتها, إنتو قايلين روحكم هينين ولا يعني هينين؟
كمان لو نزلتوا جمب الكوش دي ومارستوا هوايتكم المعهودة، هللتوا وكبرتوا تكبيرة نفاقكم المعروفة,ورقصتوا ليكم كم رقصة تكون تمت الناقصة.
لأنه الشواطين بسم الله الفي الكوش كلها بتمرق عليكم تحييكم وتصفق ليكم،وتبشر معاكم،وتنحني تقديرا لي جهودكم الجبارة الفاتت شياطين الدنيا كلها.
وبما إنه شبهكم الشياطين وياهم رفقتكم في الدنيا دي. يبقى لا إسرائيل ولا غيرها بتجيكم مارقة .
صوتوا صواتتكم وعوسوا عواستكم وخلوا شعبكم ينعم بي نوموا الطويل ...
وكده تكونوا انجزتوا عملين مهمات بي فد حريقة.
منها شوشتوا على صواريخ العدو، ومنها كمان نضفتوا البلد من الوباء المكندك العاصمة والساكن في الكوش الما ليها حد.
ومحمد معانا ما تغشانا ....

متاوقة
دحين هسه بتقدروا تشوشوا على تلفزيونكم القومي ده ؟؟؟ خلي تشوشوا على صواريخ العدو!!!!
غايتو يوم بتجننوا الشعب الفضل ده بي محنكم دي!!!!




تعليقات 7 | إهداء 1 | زيارات 2032

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#505790 [القرفان]
0.00/5 (0 صوت)

11-08-2012 08:26 AM
ممكت يمشوا السجانه لبتاعين المكيفات المحليه يولفوا ليهم رادار ,,,,,,,,,,,,


#505657 [moony]
0.00/5 (0 صوت)

11-07-2012 11:56 PM
niiiiiiiice good idea.


#505565 [ابراهيم الكدرو]
0.00/5 (0 صوت)

11-07-2012 09:26 PM
بالفعل فإن موضوع تأمين مجالنا الجوي شئ محير!! فقبل أن تهاجمنا الطائرات الإسرائيلية لمرات أربعة وبطائرات متقدمة سبقهم علي ذلك المقبور معمر القذافي في العهد المايوي وبطائرة روسية متخلفة مقارنة بالطائرات الأمريكية أغارت علي مدينة أم درمان دون أن (نجدعها) بحجر علما بأن الدفاعات الجوية الليبية أسقطت طائرتين أمريكيتين عند ماهاجمت الطائرات الأمريكية باب العزيزية بعد حادثة إسقاط طائرة (بان أميركان) لكن يابت الجنيد... الجيش السوداني ظل يقاتل في (الأرض) منذ العام 55 وحتي اليوم ولم يترك له التمرد فرصة لينظر لأعلي!


#505461 [ود ارباب]
0.00/5 (0 صوت)

11-07-2012 06:49 PM
يا اسومه انت بتجيبي الافكار دي من وين بعدين وين جماعة الصافات ياأختي العزيزه البلد مطلوقه والمصرين بلعوا حلايب وشلاتين ويمكن يبلعوا أرض المحس كمان الله يهون..قال مشروع حضاري قال


#505205 [الفنجري]
0.00/5 (0 صوت)

11-07-2012 02:28 PM
والله فكرة جهنمية يا بت الجنيد..أنا مستغرب كيف فاتت على دراويش اليرموك على الرغم من الدخان والكوش ملح..أهو كده الأفكار ولا بلاش..


#504908 [عباسى]
0.00/5 (0 صوت)

11-07-2012 10:37 AM
خشيت مطار الخرطوم
منتظر شخص قادم من الحج
دخلت اتوجهت عى مكتب صغير مكتوب فيهو الاستعلامات
لقيت فيهو اشنه بتين شفهم فى حياتى
قلت ليهم : مساء الخير
قعدوا يبحلقو فينى زى العاملين عملة
قلت ليهم الطائرة السعودية بتنزل الساعة كم
قالو : والله ماعارفين
هى قامت من هناك ولا لا
ولا عارفين جاية متين
(علما بان الطائرة تبقى لها نصف ساعة للوصول)


ردود على عباسى
[القرفان] 11-08-2012 08:28 AM
حلوات ولا شينات انت عاوز بيهن شنو؟ وكدى امشى الجمارك والله تجيك نفسيات من الشنا............


#504714 [القرم تفاحة ابل]
5.00/5 (1 صوت)

11-07-2012 05:01 AM
بكره حايعملو دمغة كبريت


ردود على القرم تفاحة ابل
Greece [القرم تفاحة ابل] 11-07-2012 06:16 PM
دا منو الحاول يخفي نفسو

United Kingdom [هاشم ابورنات] 11-07-2012 02:51 PM
حاول يخفي نفسه هل يخفى القمر في سماه


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة