عندما حرد عنترة الليمون
11-07-2012 11:47 AM

عندما حرد عنترة الليمون

الفاتح جبرا
[email protected]

كانت الساعة تشير إلى الثانية عشر منتصف النهار .. الهدؤ يعم الحي عندما دق باب الشارع بعنف .. خرجت مسرعاً لأفتح الباب .. وجدته شخصاً فارع الطول ضخم الجثة يرتدى ثياباً غريبة ذو شارب كثيف
- الله كريم ...والله يا حاج طالعين من عيد و(فلس شديد) إلا غايتو أجيب ليك أكل !! نظر لي نظرة غضب وهو يخاطبني :
- (أما عرفتني يا هذا)؟
- شنو كمان جابت ليها لغة فصحى؟ لا والله يا حاج؟
- ( وهو يمسح شاربه الكثيف) : أنا عنترة بن عمرو بن شداد بن عمرو بن معاوية بن قراد بن وقبيلتى تنسب إلى عبس بن بغيض بن ريث بن غطفان !!
- عنترة الوااااحد ده؟ لا حولة ولا قوة إلا بالله .. والجابك لينا شنو؟
- جئت لأحمي حمي الديار وأرد الغزاة !!
- كدي طيب إتفضل أدخل جوه نكرمك وبعدين نشوف الحاصل
- (يجلس على أحد الكراسي وهو يتلفت ناظراً في إندهاش ثم ) : لقد قطعت قرابة الألفي عام لأصل إليكم بعد أن علمت إن الأعداء قد إستباحوا أرضكم؟
- بالله هي القصة وصلت ليكم !
- نعم ما أن علمت بأنكم تتعرضون إلى غارات من الأعداء حتى إمتشقت سيفي وتمنقت درعي وحملت رمحي بيميني وإعتليت صهوة حصاني الأدهم فأنتم أيها السودانيون (أخوالى) لأنكم من صلب (حام) ألم أنشد فيكم شعراً من قبل :
إنّي لتعرف في الحروب مواطني *** في آل عبس مشهدي وفعالي
منهم أبي حقّـــــــــاً فهم لي والـــدٌ *** والاُمّ من (حــام) فهم أخوالي
ثم مواصلاً :
- (والشرر يتطاير من عينيه) : أين هؤلاء الأوغاد .. إين هم
- كدي يا عنتر يا خوي أشرب (كباية الليمون) دي وروق شوية .. الأعداء ديل بعيدين جنس بعد
- إذن كيف قطعو تلك المسافات الطويلة كما تقول لينالوا منكم !
- يا زول إنتا بتهظر .. الإف 16 دي معاها كلام والله القصة كووولها ما تاخد ليها دقايق !
- وما سلالة هذه الخيل 16 !
- لا لا .. دي سلالة أمريكية ومحسنة كمان
- أهي أقوي من فرسي الأدهم ؟
- أدهم مين يا عمي ..إنتا من زمن (الحصين) والسيوف والكر والفر ؟ والله هسه يضربوك الضربك ذاتو ما تعرفو !
- أحقاً لا تعلمون أي القبائل قد غارت عليكم وضربتكم؟
- بلى .. أجل يا عنترة نحنا بنعرف الضربنا منو بس بعد ما هو يصرح وكان ما صرح تبقى القصة (مكنة لحام) !
- ألم تأسروا بعضاً منهم ؟ ألم تنظرو إلى وجوه قتلاهم؟ لتعلموا من أى القبائل هم !
- قتلاهم؟ جرحاهم؟ أسراهم؟ والله تتخيل الكلام ده ما حصل ؟ مع إنو لينا ربع قرن بنقول ليهم (ليكم تسلحنا) !
- وأين سلاحكم يا رجل !
- قاعد وموجود .. لكن إنتا يا عنترة ما عارف الحكاية !
- عرفني بها أيها الرجل
- الحكاية إنو الحصين أقصد الطيارات بتاعتهم بتجي (طافية النور) !!
- أيغيرون عليكم بالليل
- بالليل بالنهار بالصباح .. أي وكت .. ما خلاس بقينا ملطشة
- (في غضب) : دلوني عليهم لأبيدنهم جميعا
- ياخي ما تباااالغ .. تبيد ليهم شنو؟ الأمة العربية كوووولها ما قادرة تعمل ليهم حاجة
- (في لهجة صارمة) : لن أعود إلى قبيلتي أن لم أقتص لكم منهم
- كان كده ياكا الطلعتا ليك (رقم وطني) وقعدت معانا !

كسرة :
من الزعل عنتر (حرد) كباية الليمون وطلع ركب حاصنو ثم إختفى !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ - قريبا الإحتفال بالذكري السنوية


تعليقات 42 | إهداء 3 | زيارات 8501

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#506696 [اللمبي بمسي]
4.54/5 (6 صوت)

11-09-2012 01:54 AM
ياخي انت هثرو شنو!! قول اخبار الرادار شنو اللي اشتري الماسورة ده منو!! بعدين عنتره ده قوليهو انحنه لااخوالك لاشي اخوالك ماتو زمان من كرري ولاكدي!! القاعدين ديل ناس عرضه ساي والتسليح القاصدنو ده ات ماعرفو!! زمان نمن نقول الزول ده مسلح كنا قاصدين طيارات!! العتب علي النظر ات ماعارف سلاحنا ساي!! اخاف الامريكان كمان فهموها غلط !! نحنه كنه قاصدين الامريكيات ليكم تسلحنا!!!


#506503 [salih ramtool]
4.60/5 (8 صوت)

11-08-2012 08:49 PM
يا استاز جبرا كان تسالو تقول ليه انت الكلمك منو ؟
اكيد زولكم حاج ساطور نائب الرئيس
لانه من زمن الحرب بالسواطير والناس شغالين طيارة بدون طيار
وامريكا امس جربت غواصة ولا سفينةما عارف بدون طيار واساطور داير يمشي برا قال ,
قول لي عنترة يستقر معانا ويملا بطنو موية فول ويموت من الانيميا
ونحن نحتفظ ب حق الرد في الزمان والمكان المحددين والعقبة عندكم في المسرات


#506250 [noureldeen]
4.19/5 (6 صوت)

11-08-2012 02:30 PM
ياجبرا انا نسيت اسالك الذكري السنوية دي الاحتفال بيها كيف حولية فتة ذكر لازم نساهم معاك جيب ثور علي شرط لونه اسود عشان عيشتنا مسودة وتعبر عن حزننا بفقدان الخط بعدين انتا ما عندك موضوع و هم غير الخط ده شوف خط غيره خط موبايل خط مدني خط بورسودان خط الانقاذ الغربي خط السكة حديد خط مضيق هرمز انشاءالله لانه قصتك فاشلة فشل ذريع بعد السنة دي اعمل ختمة وترحم عليه وسافر اعمل عمرة وادعو في البيت الحرام يارب انسي الخط حتي لو لقوه امين


#506200 [noureldeen]
4.19/5 (6 صوت)

11-08-2012 01:59 PM
انتا يا جبرا مسئول من الخير تتذكر الطيارة النزلت في ميدان الكورة في مدني والجماعة الركبوا ركشة ومشوا وجو وطاروا تاني حصل فيها شنو ورينا عليك الله


#506119 [noureldeen]
4.19/5 (6 صوت)

11-08-2012 12:52 PM
قول لعنترة ارتاح شوية الطيارة ذاتها بدون طيار يعني حيضرب منو خليه يمشي للخليفة العادل للامم المتحدة با كي مون يتفاهم معاه ويعمل معاه مؤتمر صحفي وكده الموضوع فيه احتفاظ بحق الرد وعنترة ده ما يزيد لينا البلاوي بتهوره وغضبه ووقفوفه معانا مشكور الحكاية عاوزه صبر وما ينسي يشيل مكنة اللحام وبعر البعير كدلائل علي اعمال اسرائيل الغاشمة


#506107 [mohammadsaad]
4.60/5 (8 صوت)

11-08-2012 12:40 PM
بالمناسبة دي يا خال عنترة جبرة بهديك الغنوة دي:
أنا بدخلوا الصالون أنا بشربو الليمون
أنا بشبو الليمون أنا بصافحو بالقانون
حتي ... حتي ابشرا
أقلبي... قلبو البلا


#505931 [lordbkry]
4.07/5 (5 صوت)

11-08-2012 10:36 AM
اذا كان رب البيت للكذب ضارب فشيمت اهل البيت الدجل والمماطلة مرة لحام ومرة خطا عامل لله دركم ايها المنافقون


#505869 [ود الخضر]
4.10/5 (6 صوت)

11-08-2012 10:01 AM
انا خايف يكون فارسك دا جعلي لان جعلية الحوش ينتمون الى بنى عبس كما يدعون دا واحد من الامنجية بتاعين الانقاذ متنكر اصحى للون يا ربريش
ناس الانقاذ قالوا امريكيا روسيا قد دنا عذابها
تغنت المغنية وقالت
1- وينا الرجالة وينا الشطارة منو البصد الغارة وينو وين يا ناس
تذكروا زمان عائشة الفلاتية تغنت وقال
طيارة ام قدوم دار تضرب الخرطوم ضربت حمار كلتوم ست اللبن يالله زمان كانت فى رادارات تكشف عن الطيارات ويتغوا بها


#505697 [عاشق النامير]
4.07/5 (5 صوت)

11-08-2012 01:12 AM
دييييييييييييييييييييييييييييييييييينك يا ابو الافيال


#505678 [asd]
4.07/5 (5 صوت)

11-08-2012 12:20 AM
هاهاهاهاهاهاهاهاهاهاهاهاهاهاهاهاهااهاهاهاهاهههاهاهاهاهاههههاااههههاااا

قـــــــــــــــصــــة مــــؤثــــرة شديد...


#505651 [محمد جمال]
4.19/5 (6 صوت)

11-07-2012 11:42 PM
بس ما تقول داير تعمل صندوق دعم للإحتفال ده


#505649 [محجوب عبد المنعم حسن معني]
4.07/5 (5 صوت)

11-07-2012 11:41 PM
والله يا خال مبالغة،الله ستر الواحد قرب يببب في هدومه من الضحك، غايتو لو في زول مهون علينا الحاصل ده ياهو انت الله يديك العافية ويحفظك للسودان.
عجبني نص الحوارالبقول( أدهم مين يا عمي ..إنتا من زمن (الحصين) والسيوف والكر والفر ؟ والله هسه يضربوك الضربك ذاتو ما تعرفو !
- أحقاً لا تعلمون أي القبائل قد غارت عليكم وضربتكم؟


#505626 [عصمتووف]
4.07/5 (5 صوت)

11-07-2012 11:11 PM
أكيد طلع الحقة وضربها بكوعه و كف يده وفتحها ودردم سفه تحت لسانه وصر زمبته اليمني وغادر ال شقته الجديده بحوش بانقا


#505572 [nader]
4.07/5 (5 صوت)

11-07-2012 09:35 PM
يا ابو ناجى شفتك فى تلفزيون الوالى اعمل حسابك جنس الكلام الكاتبو ده ما بعجبهم وتانى ما بستضيفوك ،،،،،،،،،، اخبار قناة الضحى بتاعتك شنوووووو


#505527 [ابو زينب]
4.07/5 (5 صوت)

11-07-2012 08:26 PM
صاحب نظرية عسكرية جديدة (نابليون السودان ) الدفاع بالنظر ههههههههههههههههههههههههههه طيب يا طيرة لو الطيارة جات بالليل كيف يكون الدفاع بالنظر ؟؟؟؟؟؟؟؟ قال للجحش طاهر توم : تخيل انك في بورسودان والساعة 8/30 مساء يعني بعد العشاء يعني مافي اضاءة ؟ هل ايها الحمار اتت هذه السيارة . اقصد الطائرة بطريق كورنيش ايلا؟


#505468 [ودالحاج جابر]
4.18/5 (8 صوت)

11-07-2012 07:05 PM
كان تقول ليهو الناس (الكيزان)عديل ياعنتر قاعدين يكتبو قصائد فى عبله ...وبعدين وصف ليهو القصر الجمهورى .


#505455 [عبدالواحد المستغرب أيما إستغراب!!]
4.19/5 (7 صوت)

11-07-2012 06:42 PM
هل تود أن تقول ياحفيد (الحج جبرا) أن الديار ليست بها أسلحه مكتشفه حديثه تبز أسلحة (عنترتك هذا) ..تبا لك يارجل؟! ثكلتك أمك بعد عمر طويل بعون الله الواحد القهار!! وماذا تقول فى (الساطور) الذى تحدث عنه عمنا نائب رئيس الجمهوريه؟ ألا ترى إنها أكثر فعاليه من تلك التى كان يستخدمها ابناء عبس قاتلهم الله جميعا؟!!حيث يمكنك (فنها) صوب الاف16 إلا وترى رأس ناتنياهو شخصيا بين قدميك ودعك من سلاحهم العقيم التى من فرط خورها وجبنها تلقى بحممها و(تزوغ) فى جنح الظلام حتى لاترى بالعين المجرده!!وأزيدك أن الفرق بين سلاحنا المتطور التى نستخدمه بكفاءه ومهاره عاليه فى كسر عظام الاضاحى كل عام وربما نلجاء اليه فى مناسبات الختان وغيره من المناسبات التى لا توجد لدى الصهاينه الاجلاف وربما لا تعلم يا اخا العرب ودى (مشكلتك لاشك فى هذا أنهم لايذبحون الذبائح لانهم بؤساء وفقراء يستجدون ما يطعمون بها كلابهم الحقيره الهزيله من نفايات قاره مكتشفه حديثا إسمها أمريكا التى نسأل الله أن يجعل عاليها سافلها بشرط فى أقرب الآجال وإستثناء بعثاتنا الدبلوماسيه هناك حتى لا يؤخذور بجرائرهم تلك القاره التى لم يمضى على إكتشافها ما يناهز ربع قرن ويزيد وبالتالى ينبغى علينا إعمال نظرية (المكر والخداع )التى اجازهما سيد الخلق أجمعين فى الحروب وإبراز (السواطير) فى الوقت والزمان المحددين بعد جر أرجلهم النجسه لديارنا ونعمل فيهم فتكا وتقتيلا ونحن نهتف (الله على الظلمه يا مفترين)!!.


#505449 [awad]
4.19/5 (8 صوت)

11-07-2012 06:32 PM
لم لم تقل له ياخال صه يافارس بنى عبس فأبناء أختك العبسيين ما قصروا وسوف ينتصروا على الأعداء بالأكثار من الدعاء والتسلح بسيوف العشر والسواطير ولا تخشى عليهم ,ان الأعداء رمونا بمنجنيق هذا العصر وأستباحونا بحصين طائرة لا يبان لها ضوء ولا يسمع لها صهيلوبعدين ياجبرة أتلومت لم لا تأخذه لأبن أخته الطيب مصطفى ليواسيه.


ردود على awad
Finland [abo yosef] 11-08-2012 10:50 PM
hhhhhhhhhhhhhhhhhhhhhhhhhh


#505410 [أبوأسامه المهاجر]
2.50/5 (6 صوت)

11-07-2012 05:52 PM
لقد قابلت عنترة وهو يهم بالخروج من القيادة العامة لقوات الشعب المسلحة وهو يمتطي عربة لاندكروزر ورايت كتفه قد إمتلاْ نجوم ومقصات وفي صدره نياشين ورايت الفريق عبدالرحيم محمد حسين يحاول منعه من التوجه لأسرائيل وقد أكد له أنه يعد العدة لأبادة إسرائيل وأن حاملة الطائرات البشير قد عبرت قناة السويس في طريقها لمساندة حاملة الطائرات وداد الرابضة قبالة السواحل الإسرائيلية وأن حاملة الطائرات نافع في طريقها لتحرير الخليج العربي من السفن الحربية الامريكية ثم إقتنع عنترة وتهلل وجهه وذهب لمعاينة قصره الذي ينشئه في ضاحية كافوري.


#505406 [كان زمان]
5.00/5 (1 صوت)

11-07-2012 05:45 PM
دي في المليان يا معلم
بس خلي عنتر يقعد شوية في انتظار أم السواطير بقيادة الحاج تكملة العدد


#505401 [مفوت صامولة]
0.00/5 (0 صوت)

11-07-2012 05:41 PM
يا أخي كلم أخوك ود عووضة ... ما قال الزول ده قريبه ومن منطقة واحدة .. أهو شوف جنس السجم البرمد فيه ده ... قال الطيارةما كانت مولعة نورها .. كانوا يولعوه عشان يأمنوا .. والله كنا وريناهم المكشن بلا بصلة ...ولكن الله ستر عليهم وطفو النور وشغلو البوري .. وعليك الرسول بوري


#505370 [abumohd]
0.00/5 (0 صوت)

11-07-2012 04:56 PM
هههههههههههههههه الله عليك ياجبره


#505353 [Mohamed]
3.00/5 (1 صوت)

11-07-2012 04:34 PM
انا مصر يا خال انك بتركب الفييييييييييييييييييييييييييل


#505340 [ahmmed]
5.00/5 (3 صوت)

11-07-2012 04:25 PM
وتظل تسخر بن جبرة طالما
سخر الفوارس من صليل حسامي

ولطالما جهل الرجال مطيتي

هل قد دري الاعداء خطو حصاني
قل للبشير علي الجهاد فانني
اعددت ساح الحرب في ام درمان
بكل كل نافع بن عاط جيئتهم
وبكل طيب اوابنه عثمان
ولقد حشدت من الرقاب كتيبة
اكلت كتوفا من لحوم الضان
سكنت شعاب بني كافور هم
قتل العدا في قري السودان
انا عنترة العبسي جيئت دياركم
قد كنتمو قبلا عظيمي الشان
انا عنترة العبسي جيئت اقودكم
فوجدتكم جيشا من الحملان


#505311 [صادميم]
5.00/5 (1 صوت)

11-07-2012 04:03 PM
حصان عنتر اسمه الابجر و ليس الادهم فالدهماء هم من يحكموننا الآن


#505294 [حسكنيت]
5.00/5 (3 صوت)

11-07-2012 03:45 PM
دون كيشوت ... دونكى شووت ... دون شروط ( حرقتوا كتاوتنا)


ردود على حسكنيت
Sudan [عاشق النامير] 11-08-2012 01:06 AM
و الله عسل يا حسكه


#505271 [Ali Alsunni]
0.00/5 (0 صوت)

11-07-2012 03:27 PM
يا أخي كان تدلو على القصر الجمهوري عشان الجماعة يعينوا قائد لكتيبة ( السواطير) ..!!


#505258 [ابو سليمان]
0.00/5 (0 صوت)

11-07-2012 03:18 PM
والله نحن في الخارج اخجلنا كلام وزير الدفاع ( ابو ريالة) ( عنتر بتاعكم ده ) قال الطائرة جات طافية النور بتاعها يعني خلاص يا ابو عرام انت عارف اي شئ حتى كمان شفتها طافية نورها طيب لمن شفتها طافية نورها مالك ما قلت ليهم ولعوا النور واضربونا عشان نقبض عليكم والله دي مهزلة شديده. بصراحة نحن عندنا تيس ما عندنا وزير داخلية والله ده كان مع الغنم ما مع البشر قولوا لي نحن نتقدم كيف مع ناس ابو ريالة ده والله الكلام ده راعي ما بقولوا ( جات طافية النور ) هو انتوا ما عارفين الضربكم منو وفي الاول قلتم انفجار وبعد ما سمعت جميع خلق الله بتصريح اسرائيل قال اخير نتفلسف ونقول جات طافية النور يعني نحن عارفين اي حاجة وشفناها كما والدليل هي كانت طافية النور يا اخي ما تفكنا الله يطفي نورك قبل اسرائيل .


#505242 [دهشان]
5.00/5 (3 صوت)

11-07-2012 03:02 PM
طيب الليمون الحردو الشربو منو؟


#505173 [مواطن من البدون]
5.00/5 (3 صوت)

11-07-2012 02:01 PM
لاكن ياجماعة انااقترح وحفاظاً لماء الوجه اصلااً لو ماجف من زمان

نشيلا مكنة اللحام وباركوها ياجماعة
وقول لعنترة كتير خيرك وده العشم يا ابن الاخت
بس قبل ماترجع مر على عمامك الخال الرئسى وصحبه وسلم عليهم


#505156 [ابوعلى]
5.00/5 (1 صوت)

11-07-2012 01:44 PM
يا سلام عليك يا عنترة, انا ارشحك نائبا لرئيس المجلس الوطنى.


#505150 [محموم جداً]
5.00/5 (3 صوت)

11-07-2012 01:39 PM
يا جبر ألم تخبر عنترة عن الذين يرموكم صرعى في زمن قياسي و من مسافة قياسية يعني لم تخبره بهذه المقاييس الجينسية و الم تخبره بأن الخارجية لم تسمع بما قالت وزارة الدفاع كما أن دراويش الدفاع كانوا في حضرة الشيخ عبد الرحيم في حولية الطائرات المصنوعة في السودان غنج و كلم عنترة الجماعة ديل لو جو المرة الجاية بيرموك خارج الزمن العربي الغابر يرموك ما يرموك ديل رموا السودان في زبالة الأمم الله يرميهم من طائرة وراء طايرة من طيارات الاسكراب


#505134 [ابو ساطور]
4.88/5 (4 صوت)

11-07-2012 01:23 PM
يا شيخنا عنترة لم يغضب انما ذهب لياتى بالمزيد من الفرسان حاملى السواطير بقيادة نائب رئيسنا البطل الحاج آدم ..


#505115 [الزوُل الكَان سَمِحْ]
5.00/5 (5 صوت)

11-07-2012 01:07 PM
يا أستاذ

نسيت ما كلمت عنترة بإننا المرة الجاية ..سوف نقابلهم بالسواطير وسيوف العُشر..لنقتص منهم


#505109 [عبد الرحمن]
5.00/5 (5 صوت)

11-07-2012 01:04 PM
أو لم تقل له بأنهم وجدوا عبد الرحيمنا"أعجمي في العسكرية" فلعبوا به؟ إن لم تكن قد فعلت، فقد أجرمت يا هذا. كما كان عليك أن تبلغه بأنه معذور لأنه لم يدرك أياً من اليرموكين، يرموك خالد و يرموك اللحام. أفهمت يا ابن جبرة؟


#505078 [ساطور]
5.00/5 (2 صوت)

11-07-2012 12:30 PM
ههه و الله يا جبره دى قوية عدييييل. عليك الله الصنف ده بتجيبوا من وين؟


#505068 [محي]
5.00/5 (2 صوت)

11-07-2012 12:25 PM
بعد كدا أعمل قوس وفي داخله حرف الواو مضروباً في عدد المرات


#505057 [وحيد]
5.00/5 (7 صوت)

11-07-2012 12:19 PM
عنترة بن شداد؟ ناس الطيب مصطفى ما حيرضوا بيهو


#505055 [dergham]
5.00/5 (3 صوت)

11-07-2012 12:18 PM
هذه سخرية و جات على نظم قصيدة من قال لو نزلو لينا في الواطه كنا أدبناهم بالسواطير ، خذو ما تأخذونه من الغيبيات و لن يستهدف العدو غيركم طالما كبيركم كمان على شاكلة قوم عنتر ، قال "لو رجال ينزلو لينا هنا!!" و هنا دي زاتها ما معروفة ، و لو سألت اللي قال كده مع عدم إحترامنا ليه ما أظن عندو الساطور ده بل عندو مغانم و ملذات غرقان فيها لشوشتو ، خلونا لآلامنا و مآسينا و ما يضير الغرقان البلل.


ردود على dergham
Sudan [fattah] 11-08-2012 10:44 AM
صدقت اخى ضرغام ومايضير الغرقان البلل ولكن انى اشم فى هذه المصيبه رائحه تورط مصرى لاننى كنت بالامس استمع لبرنامج الطبعه الاولى على تلفزيون دريم الذى جاء فيه ان اهالى بعض المدن الرئيسيه ومنهم القاهره قد اصابهم الكثير من الرعب بسبب التدريبات التى قام بها الدفاع الجوى المصرى فجر اليوم التالى لضرب اليرموك وقد جاء فى تحليل مقدم البرنامج والذى لم اسمع له يوما كلمة ود تجاه السودان وشعبه ان هذه التدريبات كانت استعدادا لان اتت اسرائيل مرة اخرى وعبرت الاجواء المصريه لضرب السودان تخيلو مايقوله هذا المنافق رغم ان هنالك معلومات مؤكده لدى بعض الجهات تثبت ان الرادرات المصريه قد قضت الطرف عن تلك الطائرات.هذا وارجو ان تكون تلك المعلومات غير صحيحه لاننا كشعب نحب مصر ونتمنى ان يعود التكامل والوحده معها خاصه واننا وبحمدالله قد تخلصنا من ذلك العب والذى يسمى الان دولة جنوب السودانر وشكرا


#505050 [mohamed]
5.00/5 (1 صوت)

11-07-2012 12:15 PM
LOOOOOOOOOOOOOOOOOOOOOOOOOOOOOOOOOOOOOOOL nice nice


#505049 [ود الجد]
5.00/5 (2 صوت)

11-07-2012 12:14 PM
قال الطيارة كانت طافية نور لا وازيدكم انها لم تدق بوري كمان....... شيء عجيب وزمن غريب


#505044 [sudani]
5.00/5 (2 صوت)

11-07-2012 12:11 PM
hahaha you made my day...mubalgha


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة