معركة ذات السواطير ..!!
11-07-2012 03:21 PM

إليكم

الطاهر ساتي
tahersati@hotmail.com

معركة ذات السواطير ..!!

**ومن موسوعة لطائف جاري العزيز، البروف البوني، نقتبس ما يلي .. يحترف أحد أعمامه مهنة النجارة بمهنية عالية، وبين الحين والآخر يصنع - من ذات مواد النجارة - أوراق اللعبة المسماة شعبياً بال( ضومنة)، ثم يجمع الأصدقاء والمعارف على مائدة اللعب..يغلبهم جميعاً، ثم يسخر منهم قائلاً ( تغلبوا النقطا؟)..وتلك عبارة تعني أن العم لا يحترف اللعبة فحسب، بل يتقن صناعة أدواتها أيضاً ..والحكاية - بمغزاها - مهداة للبرلمان الذي يعد الناس بالنظر في أمر زيادة ميزانية الدفاع في موازنة العام القادم، لتكون الدولة قادرة على هزيمة إسرائيل وسحق أمريكا في أية مواجهة أخرى..هذا التفكير مدهش للغاية.. !!

** نتجاوزه مؤقتاً..عسى ولعل تمدنا دول الغرب بأحدث أسلحتها، لنهزمها بأسلحتها تلك، وكذلك نهزم إسرائيل، وبهذا نكون ( غلبنا النقطا).. طرائق تفكير البرلمان تتسق تماماً مع طرائق تفكير نائب رئيس الجمهورية، إذ يقول سيادته متحدياً بالنص الموثق في صحف الأثنين الفائت : ( سندعم حماس، ونواصل دعمها)، ثم ينظر إلى ما حدث لمصنع يرموك ويواصل متحدياً أيضاً : (كانوا ينزلوا لينا تحت في الأرض، لحسمناهم بالسواطير)..تفسير ما بين الأقواس ليس بحاجة إلى كثير تفكير، فالعقل - وكذلك الواقع - يمضي بنا إلى تفسير فحواه : لنهزم إسرائيل - ولنسحق حليفتها أمريكا - يجب إندلاع (معركة ذات السواطير)، وليست ذات الصواريخ والطائرات..وهذا صحيح، ولاينكره إلا مكابر..ولكن إسرائيل لن تعيد قوتها العسكرية إلى مستوى جيوش العصر الحجري ذات العتاد الذي من شاكلة (الرماح والسواطير)، وكذلك أمريكا لن تحطم قوتها العسكرية بحيث يكون حجم عدتها وعتادها في مستوى تسليح (عصابات النيقرز).. !!

**ولذلك، أي لأن جيوشهم لن تتجرد من قوتها بحيث تكون في حجم التحدي المذكور في تلك الأقواس، يجب إستبعاد نزولهم - تحت في الأرض - بحيث ينازلونا في (معركة ذات السواطير)، أو كما يشتهي نائب رئيس البلد..وكذلك على البرلمان أن تعيد طرائق تفكيره، وليس من العقل أن تدخل دولة تموت من الفقر فئرانها في سباق تسلح مع إسرائيل وحليفاتها.. لتسلح دول العالم الثالث نظم وقواعد، وليس من بينها مجاراة الدول ( المنقطها)..لسنا بدولة ضعيفة بمعيار الدول التي تجاورنا شرقاً وغرباً وشمالاً جنوباً، ولسنا في حرب مع دولة ذات أطماع إستعمارية، فليس هناك داع لإفتعال متاعب - لسنا بحاجة إليها - بمثل هذه التصريحات السالبة التي تبثها وسائل الإعلام وتترجمها السفارات، وتعتمدها الأنظمة وكذلك (الرأي العام العالمي) ..!!

** فالكل مرهق، وطناً وشعباً وجيشاً، ولايزال هذا الكل يدفع أثمان أطول حروب القارة الإفريقية، وهي الحرب التي لم يحسمها (سلام نيفاشا)، إذ لاتزال لظى آثارها تؤرق الناس والبلد بالنيل الأزرق وجنوب كردفان ودارفور..فالمسؤولية الوطنية تقتضي إطفاء هذه ( الحرائق الداخلية)، لكي ينعم الوطن بالسلام والمواطن بالرخاء، بدلاً عن الزج بالبلاد في أتون (حرائق خارجية)، لا ناقة لنا فيها ولا جمل، وكأن تلك لا تكفي حرقاً للنسل والزرع والضرع .. فالأنظمة - والناس أيضاً - تستفيد من أزماتها بإستيعاب دروسها.. وكثيرة هي دروس قضية يرموك، ولكن السلطة الحاكمة لم - ولن - تستوعبها، إذ مستوى تفكيرعقولها يعود إلى عصر (النزال بالسواطير).. !!


تعليقات 35 | إهداء 0 | زيارات 6143

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#507305 [عباس]
0.00/5 (0 صوت)

11-09-2012 08:42 PM
الم يروا كيف فرتكت جيش صدام وكيف دمروا ترسانة القذافى وصارت قطع مبعثره فى شتى انحاء العالم


#506538 [واحد]
5.00/5 (1 صوت)

11-08-2012 09:37 PM
نائب الرئيس من قرية عد الغنم ما شاف الكعك والبسبوسه الا في داخلية الجامعة


#506052 [أنور]
5.00/5 (1 صوت)

11-08-2012 11:52 AM
الحاج نفخة ، هسع كان جوكم الامريكان بالسواطير بتثبتوا ؟ و الله تجروا جري السواد ... ياخ انتو عقولكم مابتنتج معرفة عشان كده انتو لسع مع حكاية السواطير ... شوفوا حكاية عرس البنيات الصغار مثنى و حتى عشرمية بنظرية عرّس طلق و خليكم من حكاية السواطير و الفرارير ما المال سايب ، اصلو السودان غنيمة باردة ليكم .... بعدين يا العشي اب لبن الكان الحكاية سواطير ناس الحركة الشعبية كان لحقوكم امات طه زمان لكن انتو معاهم تستعملوا الطيران و عايزين الاسرائيلين يجوكم بالسواطير؟ ياخ انت مالو مخك معفن كده ياخ ؟ سواطير تاخد رقابكم السمينة دي ، بلا يخمكم


#506031 [Chilica Moon]
5.00/5 (1 صوت)

11-08-2012 11:42 AM
الشعب يضربو رصاص واسرائيل يقابلوها بالسواطير.عجائب والله ده نائب رئيس ده............جاتكم البلاوي


#506025 [شقيق التاية]
5.00/5 (2 صوت)

11-08-2012 11:38 AM
كلامك سليم والله يااب ساطور
فالاجهزة القمعية تدربت كثيرا على استخدام السواطير في الشارع السوداني
واخر احتكاك ليها بهذا العمل في انتفاضة 17/6/2012 المجيدة


#505988 [الصادق الهواري]
0.00/5 (0 صوت)

11-08-2012 11:12 AM
يستحق أن يطلق علي حكومتنا لقب حكومة النقيرز بجدارة ..بس المشكلة هي كيف يدقوا السستم بالجلابية


#505970 [أبو مهند]
5.00/5 (1 صوت)

11-08-2012 10:58 AM
نسأل الله ياحاج آدم ساطور جزار ياخد عنقرتك ويريحنا منك فقعت مرارتنا ..


#505840 [كتكوت]
5.00/5 (1 صوت)

11-08-2012 09:35 AM
ههههههههه ها زول ها الزول انت قايل نفسك فى نشاط جامعة الخرطوم فى الحالة دى حقو تستعين بالطيب سيخه .


#505687 [taj alsafa]
5.00/5 (2 صوت)

11-08-2012 12:50 AM
السلام عليك يا ود ساتي
سمعت بان احد الشعراء السودانيين قد قال:
الناس بتمشي لي قدام ونحن بنمشي القهقرا
أو كما قال. لقد إستمعت حديث اوباما الذي ارتجله فوق مؤيديه حال فوزه. شكر الجميع دون فرز. وعد الجميع خيراً وتفاخر بهم دون فرز، ابيضهم و أسودهم واصفرهم و " خاتف لونين أو أكثر"، المواطنين منهم و اللاجئين والمقيمين و حتي المتسللين وعدهم بتكافؤ الفرص وحق التعليم.
أما نحن فأدبياتنا اليوم; اكسح، أقرشو حي و اكلو ني، تحت جزمتي، وكل حرف من حروف الأنتباهه و العياذ بالله و فوق ذلك سواطير و بعر و سيوف عشر!!!!! بعد كل ذلك هل الي إصلاح من سبيل؟


#505607 [koko 2]
0.00/5 (0 صوت)

11-07-2012 10:43 PM
كدي يا الطاهر انسالك: النيب ده البوديك تسمع ليهو شنو ولا دايرو يجننك الزول المطرطش ده


#505600 [احمد]
5.00/5 (1 صوت)

11-07-2012 10:33 PM
إننا نناطح الهواء ونتحدى طواحين الوهم. إن نظام الإنقاذ يستثمر في الظلام ويعيش طفيلياً على مخلفات الحروب ونزف الدماء البريئة. ولن تخلو جعبة نظام الإنقاذ من فرية أخرى كي يضمن عمراً آخر ككائن يقبع على ريادة فصيلة الرميات. فقد قسموا جنوب السودان بفرية تمهيد الطريق للمشروع الحضاري الإسلامي، وهاهم يشعلون فتيل جنوب كردفان والنيل الأزرق كي يكون السودان أعراباً فحسب.


#505596 [ابوكاره]
0.00/5 (0 صوت)

11-07-2012 10:31 PM
يا استاذنا الطاهر انت الجماعه ديل مانزلواجماعتنا كانوا وين بسيوفهم وسواطيرهم؟؟؟؟؟؟الاقاويل الجماعه جرواوهرولوا هروله ماعاديه التقول مشاركين فى سباق؟؟؟؟؟؟؟؟؟؟؟؟؟؟


#505553 [yasso]
0.00/5 (0 صوت)

11-07-2012 09:06 PM
* يا استاذ عايز من برطمان الفسيخ ده كلام كويس ؟ اذا كان نائب الريس بتاعم عايز يهزم اسرائيل بي السواطير - عقليات بتفكر بي مستوى دخلوها وصقيرها حام والبطان وضرب السيطان اعتقادا منهم ان الحرب مازالت في عهد عاشتو مهيرة بت عبود ناسين ان حرب الكر والفر والطعان قد ولى عهدها قبل الف وخمسمائة سنة فاكرين ان سواطرهم هزمت ثورة شعب السودان صانع الثورات عشان كده ممكن يهزموا بيها اسرائيل وامريكا ويعملوا بيها مشروع حضارى فى الصين والشعب الصينى يتحول لي كيزان استينلس استيل

* يا استاذ اذا تجاوزنا عن تقصير نوامنا الكرام في انهم اخر مرة شافوا فيها الناخبين ايام الانتخابات ما يختوا في عيونهم حصوة ملح ويناقشوا سبب موقعة اليرموك عشان يتافادوا الجايات مش يزيدوا مخصصات الدفاع عشان تزيد من حجم الكروش والمزارع والعمارات وتقعد البلد بدون رادارات ويتسلحوا بالسواطير

* هم قايلين الانتخابات الفاتت دى اخر انتخابات وحيقعدوا لي القيامة ما يمكن الشعب الفضل المرة الجاية ما يفوت قصة (خجخجة) الانتخابات بعد التكنولوجيا الحديثة في الامكانية البتديها - ما حاقول كيف عشان ما يشوفوا ليهم طريقة معاكسة يخجوا بيها الانتخابات الجاية نخليها لي اوانها كان الله مد في العمر

* ولو دايرين نصيحة زول قلبو علي البلد ناقشوا قضية التنمية اطفوا نيران الحروبات خضروا البلدشجروا الصحاري حلوا مشكلة العطالة بي بدائل منتجة مش تشجعوا الشباب علي اعمال خدمية تدوه تمن ركشة يخرم بيها الاوزون واضنينا - اعرفوا انو المستثمر الجاد اللي بينتج مش اللي بيعمل ليه مطعم ولا حلوانى اعرفوا انو التنمية ما شوارع زلط في ولاية الخرطوم وكبارى التنمية زراعة بشقيها وصناعة موادها الاولية تكون من البلد من الارض السودانية اتصالحوا مع السودان الجنوبي واتكاملوا معاه مش تكونوا الشحمة والنار بعد داك عرسوا اربعة نسوان شوفوا كان في زول قال ليكم تلت التلاته كم


#505539 [الزُول الكَانْ سَمِحْ]
0.00/5 (0 صوت)

11-07-2012 08:45 PM
ههههها
والله يا طاااهر نحنا بقت عندنا غزوات كتيرة خلاص...أولها غزوة ذات البلوف..بتاعت خالد موية

وتانيها غزوة ذات سيوف العُشر بتاعت مندوب السودان فى الأمم المبعثرة

وهسه إنتا طلعتلينا بغزوة ذات السواطير بتاعت الضبع والنعاج

فلا تستعجب ولا نستغرب نحن لأن المُخاطب يعرف تماماً مدى فهم وإستيعاب المُخاطبِين من شريحة تعد الأكثر جهلاً فى هذا البلد..


#505489 [hajabbakar]
5.00/5 (3 صوت)

11-07-2012 07:43 PM
" لا أعرف الأسلحة التي ستستخدم في الحرب العالمية الثالثة ، لكني متأكد بأن أسلحة الحرب العالمية الرابعة هي العصي والحجارة " ألبرت آينشتاين.
ربما يكون الحاج ساطور بعبقرية اينشتين عندما تحدث عن اسلحته الجديدة
ولكن مشكلتنا الكبرى مع اسرائيل هى فى اطفاء انوار طياراتها مما يحرم دفاعاتنا الجوية من ممارسة
حقها المشروع. سادتى نحن نعيش فى زمن العبقريات
وهنيئا لشعبنا بامثال هؤلاء


#505475 [opti]
0.00/5 (0 صوت)

11-07-2012 07:15 PM
والله ينزلوا ليكم تحت في الواطة الا تقوموا جارين!!
تحسبو لعب يا سيادة النائب الاول؟؟


#505460 [الممغوص]
5.00/5 (1 صوت)

11-07-2012 06:49 PM
هههههههههه والله شر البلية ما يضحك
الزول دا عارف لا هم بقدرو ينزلوا لينا
ولا نحن بنقدر نطلع ليهم عشان كدا قال نصرح
بأي كلام.
بعدين هوما سمع بالمدرعات والراجمات والاسلحة
الحديثة للاشتباك المباشر ولا شنو


#505454 [رجمٌ بالحق]
0.00/5 (0 صوت)

11-07-2012 06:41 PM
عندما وجهنا سؤال لأحد الكيزان، فحواه لماذا يتسلح النظام لمواجهة شعبه فقط. كان رده، لم تتعد علينا جهة خارجية . فقلنا له كيف تم احتلال حلايب والفشقة. قال هؤلاء جيراننا وعلاقتنا بيهم طيبة عشان كدا نريد معالجة هذا الامر بالدبلوماسية...سبحان الله أنظر كيف كان رد هذا الكويز. لكن جاء سؤال اضافى الآن. لقد تعرضت بلادنا لقصف اسرائيلى وهى لم تكن جارة لنا لماذا لم تستخدموا سلاحكم لمواجهته اسرائيل. أظنه يقول لى مجلس الافتاء أفتى بعدم جواز منازلة اسرائيل فى هذه الايام لأن الرئيس مريض.


#505443 [Kalifa Ahmed]
0.00/5 (0 صوت)

11-07-2012 06:26 PM
أستاذ الطاهر نردد مع الفنان محمد عبده قوله (ما لنا غير الله) وفعلا مالنا غير الله إذا كان هذا هو قول نائب رئيس جمهريتنا الصقرية....... من الذي أعطي هذة الشرذمة القاب علمية تسبق أسمائهم ولا تتسق مع فعلهم ولا قولهم ؟؟؟؟؟؟؟؟؟


#505427 [MAHMOUDJADEED]
5.00/5 (3 صوت)

11-07-2012 06:10 PM
ساطور الحاج آدم ذكرني قصة واقعية حصلت في سبعينات القرن الماضي حينما رفع احد الأخوة مسدساً في وجه الآخر فقام الآخر برفع عصا كان يحملها ( عكاز ) في وجه صاحب المسدس وقال ليهو لو راجل اضرب وشوف اليحصل ليك شنو ؟ !! يعني صاحبنا بعد ما ينضرب بالمسدس وسوف ينتقم بالعكاز ( سبحان الله ).


#505424 [عاشق النامير]
4.50/5 (3 صوت)

11-07-2012 06:06 PM
رئس الجمهوريه و نائبه ومستشاره و قشو و امسح و ما تجيبو حى و صاحب الكتيبه الاستراتيجيه الذى هدد بالسحل دى لغة الحكام فى السودان فعادى الحاج ابو ساطور يقول كلام زى ده بس انت ما تزعل (فى حكاياتنا مايو)


#505413 [البشير على نافع الجاز الفللى]
5.00/5 (2 صوت)

11-07-2012 05:56 PM
يصحون من النوم ويدعكون عيونهم ويقولون كلام -اى كلام- مش هم هنا عشان يتكلموا؟
اننا نتأذى من حصاد السنتهم ياليتهم صمتوا


#505412 [خالد حسن]
5.00/5 (3 صوت)

11-07-2012 05:54 PM
اخوان نفعيين متخلفين وعساكر اكثر غباءا
70% من الميزانيه ماشه للعساكر المغفلين الماقادرين يحما
ولاسماءا ولا ارض ولايحرروا حلايب والفشقتين
ووزير دفاع ريالته سايله يغشوا تجار السلاح ولاهو مستفيد من الصفقات الضاربه ويجيب لينا دبابات ضاربه
ومافي دول يحاسبه لابرلمان مخجوج ولارئيس حلقومه مقدود
وبعد ده دايرين يزيده مسزانية العسكر الاغبياء ! عشان يعملوا سنو وعشان يصلوا لي شنو ؟
اللهم الايكون عشان يربوا كروش واصلاب


#505400 [كان زمان]
5.00/5 (2 صوت)

11-07-2012 05:39 PM
لا فض فوك يا الطاهر
إنهم يبررون لأعداءنا و يهيئون لهم كل الأسباب التي تبرر الإعتداء علينا و يظهر المعتدي و كأنه يستبق العدوان السوداني الخطير و كل العالم يشهد و مما سمع عنا يبارك العدوان علينا بذريعة ما سمع منا من تهديد ووعيد وأسلحة كيماوية مزدوجة و صواريخ عابرة للقارات.
ونحن ندفع كل الفواتير + حافز للمجلس التشريعي و المجلس الماعارف .... وووزارة الرادار البصري و نحتفظ بي حق الرد.


#505361 [ود النوبة]
5.00/5 (2 صوت)

11-07-2012 04:39 PM
سواطير؟


#505358 [كوز نضيف]
4.00/5 (3 صوت)

11-07-2012 04:39 PM
هههههههاي
وحيات دين أمي لو جونا قوات إسرائيلية
بريه ومسلحه بالسيطان بس
ح يهزمونا
وح يدخلو القصر في عز الضحي
فكنا من نفخو وزعيقوا دا
تظ في حماس
وتظ في ايران
وتظ في الكيزان
وتظ في السودان ذاتو


#505336 [طال السفر]
5.00/5 (2 صوت)

11-07-2012 04:21 PM
الساطور بى كم؟ مدعوم ولا فيه دمغة جريح ؟


#505334 [مشتهى السودان]
5.00/5 (2 صوت)

11-07-2012 04:20 PM
الله يفش غبينتك زىمافشيت غبينتنا فى هذا ( الغبى )
اللهم عجل بهم ، فانهم لو استمروا سيهلكون الحرث والنسل بال( غباء )
ياخفى الالطاف لطفك يارب


#505330 [ali alkartoyby]
5.00/5 (2 صوت)

11-07-2012 04:19 PM
للاسف الشديد هذا السودان ملئ بالاغبياء واصحاب العقول الصغيرة والذين يسمون انفسهم بالدفاع الشعبى والدبابين والذين غر بهم وتم زجهم فى حروب الكيزان تجار الدين بينما هم يموتون فى الادغال ويمنون نفسهم بالحور العين ناس مجرم الحرب اليشير وابو ريالة اللمبى والدلاهة بكرى والاعور قوش والمخنس نافع وبقية قوم لوط ينعمون برغد العيش ويسكنون الفلل ويركبون الفارهات من سيارات و نساء وياكلون ما لذ وطاب ويجوبون العالم يا لكم من مغفلين يا اتباع الكيزان


#505321 [فزاع]
5.00/5 (2 صوت)

11-07-2012 04:10 PM
يا اهل السودان انتو مدركين الخطوره اليهود طائرتهم فوق روسنا تضرب وتهز الارض من تحتنا وتجعل سماءنا ليله نهارا ونحن ما عارفين ده منه ولا هو شنو يعنى بالعقل لو نزلو على الارض معنها احتلال للسودان اه تانى بطلعهم منو ابو ساطور المنافق المعرف عنهوا ذو الوجهين الله ياخده هذا الحاج سجم ده


#505320 [التوم الله جابو]
5.00/5 (2 صوت)

11-07-2012 04:07 PM
انت يا الطاهر ساتي مقتنع انو الحمار الاسمو الحاج ادم المتهم الهارب ده صحي نايب الخايب؟ هل يا اخواني قراء الراكوبه المحترمين فيكم واحد مصدق انو المتهم الهارب ده دكتور و بستحق منصب نائب رئيس فريق في الليق ناهيك عن رئيس جمهورية ؟ المشكله انو نحنا شعب انتهت كل خصاله الجميلة و ظهرت سؤاتنا و الدليل علي ذلك : يحكمنا اصحاب العاهات الكذابون المنافقون (عملاء اسرائيل)....نعم عملاء اسرائيل كلهم من علي عثمان مرورا بصلاح قوش انتهاء اسحاق احمد فضل الله.


#505313 [وحيد]
5.00/5 (2 صوت)

11-07-2012 04:04 PM
ياعزيزي يبدو ان جماعة الانقاذ الحاكمين و المطبلين ايضا- قد اجريت لهم عمليات " ازالة مخ" و تم حشو الجمجمة الفارغة بالزفت و شريحة كلام فارغ.... في كل قرارات المسماة حكومة الانقاذ وفي تصريحات المسئولين و من يؤيدهم بالهتاف، يغيب العقل و المنطق و التفكير السليم، لذلك فقد ادخلوا الوطن و حصروه في حفرة عميقة، و كل يوم يزيدون هذه الحفرة عمقا بفعل الكوارث التي ياتي بها نظامهم الحاكم... و اذا كانت موقعة "ذات السواطير" المتوهمةتلك هي مستوى تفكير نائب الرئيس و الذي يحمل شهادة دكتوراه، فما بالك بعامتهم؟


#505312 [AHassa]
5.00/5 (2 صوت)

11-07-2012 04:03 PM
في كلام نائب الرئيس لا يوجد عاقل يضيع وقته او وقت شخص اخر للتعليق عليه. اذ ان المشكلة من هم الذين اتوا لمثل هذا الرجل حتي يخطب فيهم مثل هذا الكلام. عندنا قسم من هذا الشعب لا يمكن لهم الحصول علي اي ادني وعي يمكنهم من الدراية بهذا العالم و خالق هذا العالم.


#505300 [حسكنيت]
3.00/5 (2 صوت)

11-07-2012 03:50 PM
كان راجل طالعنى الخلاء


الطاهر ساتي
الطاهر ساتي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة