حالة تسمم
11-10-2012 09:23 AM

حالة تسمم

ايمان حموري
[email protected]

بالدارجي

دلف الاسعاف الي المستشفي العسكري وبداخله السيدة الاولي مشترك (ودة) وهي تتلووي من الالم مغص حاد في البطن، اعلنت حالة الطواري !! وتم الاتصال علي الطبيب الرئاسي، الممرض الرئاسي وجهز السرير الرئاسي والعلاج الرئاسي . سندت الممرضة ( ودة )علي الوسادة التي كانت خالية ولكنها الان سند الخيريه !! ثم قامت الممرضه بخلع حذاء ودة الماليزي الصنع ووضعته تحت السرير ارادت الممرضه ان تضع حقييبة ودة السوداء جانبا ولكن وده رفضت ، فسلمتها الممرضه الحقيبه والوطن !!
المهم حضر الطبيب الرئاسي علي عجل ومازالت ودة تتلوي من الالم وتستفرغ وكان الحوار التالي

الدكتور: خير يا مدام

السيدة الاولي مشترك: اوع ااوع مغص شديد يا دكتور!
الدكتور: ياسساتر مغص رئاسي؟؟
السيدة الاولي مشترك : لا لا ادكتو بطني موجعاني
الدكتور; الوجع حاصل والله!!
الدكتور: كدي افتحي فمك وقولي آآآآآآ ؟
(بعد ان فتحت فمها راي الدكتور كل مالذ وطاب من خيرات البلاد داخل جوفها !!!!)
الدكتور : اخذ الدكتور السماعة لسماع نبضات قلبها وكانت المفاجأ دقات قلبها تقول( سند،سند، سند، سند سند،)فتاكد ان صحتها علي مايرام
اخذ الطبيب يدها لجس النبض وكا ن بصره محدقا الي اعلي
الدكتور: يامدام انتي اكلتي شنو؟
السيدة الاولي مشترك : سلطه بس !!!
الدكتور: سٌلطه و لا سَلطه
السيدة الاولي مشترك ; سَلطه طماطم بصل اخضر وعجووروجرجير
الدكتور : يا مدام انتي في حالة تسمم
الممرضه : سجمي تسمم رئاسي !!
الدكتور: دا كلام خطير ونحن لازم نفتح تحقيق في الموضوع دا عاجل وفورا ؟؟
كتب الدكتور روشته الادويه والمسكنات وكميه من الدربات (الملح ) زي ما عايزة .!!!!!!

بدا التحقيق داخل العنبر عفوا اقصد الجناح الطبي الدكتور و3 متحرين بعد ان تاكد الفريق الطبي من سكون الالم بدات التحريات
المتحري الاول : يامدام انتي اكلتي السلطه
الساعة كم ؟
السيدة الاولي مشترك; امن اكلت السلطه كان الحَماراحمر(الشفق) موارب
علي صفحة السماء علة الساعه كم مانا متذكراها
المتحري التاني: غريبه في القصر ما في اي اكل غير الطماطم؟
السيدة الاولي مشترك ; والله الاكل راقد لمن مدفق علة ساعات لمن تهف لي بتذكر الماضي (الكسرة بي مويه والفتريته الحمراء)
المتحري الاول: طيب منو الاشتري الطماطم دي؟
السيدة الاولي مشترك: ما في زول اشتراها جاتنا هديه من مشروع الجزيرة.
المتحري ا لاول: قلتي مشروع الجزيرة ؟
المتحري التاني : منو الجاب ليكم الطماطم بالظبط؟
السيدة الاولي مشترك : زول في وزارة الزراعه!! لكن الرسول اجانبو كان ما عفيتني من الاسم
المتحري الاول : ما حا اقدر اعفيك يا مدام لانو كدة حياتك وحياة المواطنين في خطر!
السيدة الاولي مشترك : اومأت براسها محدقة في خطوط الحنه السوداء علي اطراف اناملها ولاذت بالصمت الرهيب
المتحري التاني يامدام لازم تساعدينا؟
السيدة الاولي مشترك : يعني ما حا تعفيني اجانبو؟
المتحري التاني : انتي هسي اتعافيتي وانا ما بقدر اعفاك
السيدة الاولي مشترك : كم اخاف الكضب التقول الجاب لينا الطماطم المتعافي
المتحري الاول : ما في حل غير اعفاء المتعافي!!!!!!!




تعليقات 4 | إهداء 0 | زيارات 1705

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#508811 [رواند]
0.00/5 (0 صوت)

11-11-2012 04:15 PM
يلقي احدنا الكلمة فلايلقي لها بال تهوي به سبعين خريف في النار هل انت متاكدة من صحة ماقلتيه ام هو مجرد لهو ولعب بسمعة الناس واحوالهم مفتكرة ماكتبتية شي ذي فائدة ويحمل قيمة
عافاك الله من ما انت فيه


#508037 [ركابي]
0.00/5 (0 صوت)

11-10-2012 05:55 PM
حلوة الفكرة ودمها خفيف يااستاذة ...لكن الفيل المغربي ده ما تخمسي لينا منو ههههههههههه


#508009 [أبو الدقير]
0.00/5 (0 صوت)

11-10-2012 05:12 PM
أردمي هذه الأسرة الفاسدة ردمهم بلا....مزيد من الإبداع تسلمي كتير.


#507680 [الطافى نورو]
3.00/5 (1 صوت)

11-10-2012 10:36 AM
عها رسلو جابو الفكى أبو طاقية ( باقى بقى فكى رئاسي) وبس من ما وصل قالهم ماداير لى تب شيتاً من لغاويس الدكاترة المكربين صلبتن ديل (حاشين القمصان) وجيبو لى نص وقة حبة سودا ال ليلة جبال النوبة وربع رطل شيح من حق الغرابة واغلوهن بى موية ,, وبس من ما شربتن وتقول ليك عوووووع بالطراش ,, وعووووووووع بالطراش ,, مرقتو شى أسود لايوووووق والفكى يهز فى راسو ويقول ( امرق يا لايووق ,, امرق يا لا يووق ) والشعب يزغرد ويرقص من الفرح وقيقم وشنان يقوقوا ساكت وعبد المعطى يعرض ويهز فى عكازو ( عكازو المكسى بى جلد النمر الأفريقى ) والحمد لله تم الشفاء لأم المومنين وعاش الشعب العربى القرشى السودانى فى أمن وامان !!!!


ايمان حموري
ايمان حموري

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة