طب الزمن الأغبر
11-10-2012 11:11 AM

طب الزمن الأغبر

الفاتح جبرا
elfatih.gabra@gmail.com

عزيزي القارئ الكريم .. ربما يكون قد طرأ إلى علمك في يوم من الأيام أن إدارة أحدى المستشفيات قد قامت بفصل (طبيب) عن العمل لتقاعسه أو إهمالة في نجدة مريض تستدعي حالته التدخل السريع ولكن هل نما إلى علمك أن إدارة مستشفي قد قامت بفصل طبيب لأنه تسبب في إنقاذ مريض من الموت ؟
هذا ما حدث في هذا الزمان الاغبر الذي تحولت فيه هذه المهنة الإنسانية إلى تجارة وشطارة همها الأوحد جمع (الفلوس) .. تعالو معاً لنتعرف إلى القصة والتي جاءتني عبر رسالة ثم مهاتفة من إحدي بناتنا الطبيبات ..
أستاذي الكريم الفاتح جبرا
تحية وسلاماً
الدهشه كلمه لا استخدمها كثيرا.. لأن الواقع فات حد الدهشه.. و لكن ما سأقصه عليكم اليوم وسع نطاق الواقع المدهش فى نظرى.. و غير بعض موازنات الانسانية التى أراها فى ربوع بلادى.. ليقف (التاجر) لا (الانسان) على حيثيات هذا الحدث..
فى زاوية فى صالة الطوارئ بإحدي مستشفيات الأطفال (الخاصة) .. كانت (تجبد) فى نفسها بصعوبه.. بت خلينا نقول كبيره (عشان حتة الكبر دى فيها فهم نشوفو بعدين).. جاءت للمستشفي مرافقه لواحد من الأطفال المرضى.. زاد عليها ضيق النفس.. كانت فيما يبدو تعاني من أزمة (ربو) حادة .. كان ليها وافر الحظ فى النجاة منها.. لأنها قد جاءتها فى المكان المناسب (مستشفى) على الرغم من إنو في ناس شافوهو ما مناسب..
قامت إحدى زميلاتي (الطبيبات) مسرعه لنجدة البت الكبيره (نشدد على الكبيره دى تانى).. مستحضرة الواجب المهنى و الأخلاقى تجاه كل مريض.. بعيد عن حسابات الماده.. و برتوكولات التخصصيه وكان أن قامت بإسعاف المريضة على الوجه الأكمل غير أن (مدير المستشفي) كان عندو فهم تاااني
- يا دكتوره انتي ما ينفع تشتغلى معانا خلاص..
- ليه؟ حصل شنو انا ما فاهمه؟
- نحنا أخلينا طرفك و حتاخدى مستحقاتك كلها .. ربنا يسهل ليك فى مكان تانى
- انا ما سألتا عن مستحقاتى .. انا بسأل المشكله شنو؟
- بصراحه كدا إنت أخليتى بسياسة المستشفى وعالجتي ليكي حالة ما تبع المستشفى
- الواحد لما يعالج ليهو مريض بين الحياه و الموت بكون اخل بسياستكم!!
- خليكي (إسبيسيفك) يا دكتوره.. انتى أيوه عالجتى عيانه لكن العيانه دى ما تبعنا..
- الحالات الطارئه مافيها تبعنا و ما تبعنا!!..
- اها دى (اللخبته) البقول ليكي عليها.. مريضه كبيره تمشى تتعالج فى مستشفى كبار..
(بااااااااااااس – عزيزي القارئ- دى قصة الكبر البنقول عليها من قبيل.. كبرك يحدد مصيرك فى حضرة مستشفى ..................... للأطفال/ الخاص )
- ما كان حتصل إنتا عارف الأزمه براك!!..
- أيوه عارف خطورة الأزمة و أى حاجه لكن اللوائح لوائح.. انتي يا دكتورة اخدتي من زمن الاطفال العيانيين..
- كان أخليها تموت يعنى!!
- يا دكتوره البكتل اليوم.. عيانينك أولى بإهتمامك.. إتفضلي أمشي أخدي مستحقاتك ربنا يسهل عليكي
أستاذي العزيز :
ماذا أنت قائل ؟
إبنتك الدكتورة (س)

الرد :
نقول شنو؟ حسبنا الله ونعم الوكيل

كسرة :
ألم أقل لكم أنه زمان اغبر؟

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ - قريبا الإحتفال بالذكرى السنوية-



تعليقات 35 | إهداء 0 | زيارات 7031

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#509232 [دهشان]
5.00/5 (1 صوت)

11-12-2012 07:45 AM
الظاهر خلى بالك
انو الدكتورة دى شينة


#509204 [ahmmed]
0.00/5 (0 صوت)

11-12-2012 05:06 AM
اقسم بالله العظيم،انا والله خير الشاهدين،في التسعينات جابو امراة عمر ١٨ سنة لي مستشفي ابوعشر،جابوها من الشرق لي م الكاملين م الكاملين حولها م ابوعشر،البت كانت بين الحياة والموت في حالة وضوع كان في اليومين ديك ماسك الولادة طبيب سوداني قال نحن ما بنشتغل طوارئ الا يدفعو لينا قروش العملية مقدما ودوها الحصاحيصا لكن لوماتت في الطريق ما مسؤليتي، اماتها قالن بندفع خلو ابواتها يجو نحن جينا مستعجلين،الداية نادتني قالت لي المرة دي اتعسرت لو ما دخلت عملية بتموت،انا متلقي حجج،حواشتي جنب المستشفي،قلت لي الدكتور المرة دي لو ما عملت العملية ،قال بتموت،اعملها،القروش اول،ناضمتو،قال لي بطل فلسفة جيب القروش،اديتو العندي،ماتمن ،ابي،ست شاي قدام العنبر،والداية دفعن الباقى،اقسم بالله،حرش علي ناس الامن،صبحيته جا مدير المستشفي،عسكري بي بندقية ،زول الامن لحقوني في الخلا ،ودوني القسم قالو ادخلت في اللوائح حقت المستشفي واسات للطبيب،ضابط الشرطة كان جدع،فكاني قال لي ديل مستهبلين،لي قدام لقيتو زاتو فكو عكس الهوا،اتمني ان يمر علي هذا التعليق،التانية في مدني العيون سبعينية جهزوها حلقوها بنجوها،مرقوها قالو مادفعت حق العملية،الله غالب


#509190 [ahmmed]
1.00/5 (1 صوت)

11-12-2012 03:58 AM
استاذ جبرة الناس انجنت
وبلدك هاصت ذي جبانة
المستشفي الكانت تشفي
صارت تكتل بالجبخانة
والدكتورة النتفو ريشها
اخدت احمر شان انسانة
والله مهانة
يا ودجبرة نشيل الفاتحة
نشيلا بلادك للكرخانة
الدكتورة اطلعو زيتها
والرفدوها عشان انسانة
التبقي معانا
نحن اليوم ما جونا الكهنة
صرنا عطالة والله معاها
والله معانا


#508857 [ودالخضر]
0.00/5 (0 صوت)

11-11-2012 05:30 PM
العيب فى وزارة الصحة لان من المفروض يكون هنالك قرار باستقبال الحالات الطارئة والطبيب هو الذي يحدد نوع الحالة انا لو فى محل الطبيبة كان دفعت مصاريف العلاج طبعا مدير المستشفى واحد انقاذى كان عايز يدبل بالدكتورة ولكنها رفقضت عشان كدا عايز ينتقم


#508838 [النسيان]
0.00/5 (0 صوت)

11-11-2012 05:01 PM
يا دكتورة : انتى عملتى الواجب وارضيتى ضميرك فى بلد انعدم فيها الضمير ويازوله والايهمك دى حاجات بسيطه فى عالم السودان عالم عجييييييييب
كسره
ناس الخليج طالبين دكاتره وخاصتا" سودانين يازوله اتخارجى مالك ومال القرايه ام دق هنا يقيموك ويكرموك وتحسى انك بتقدمى رساله انسانيه بالجد .
كسره
ياربى الغلط من الدكتور والا من الكبر والامن وزير الصحه والا من الوالى ولا من وزير الدفاع ولا من اسرائيل
كسره
اخبار مكينة الحام شنووووووووووو؟


#508735 [همد]
0.00/5 (0 صوت)

11-11-2012 02:30 PM
اجرها عند الله اذا كانت القصة حقيقية وحسابه عند الله الذي لايظلم



واذا كانت الحكاية ونسا وركلاسا وعايزا تعمل انوا شاطرا وقالت تنقذ انسانة فهذه الحساب عند الله



ومن حق المدير ضبط العمل



واذا كان اجحاف وتقصد لاي سبب كان فصل هذه الطبيبة فوا الله لتجدن عند الله الاجر العظيم ويحاسب هو


يوم الموقف العظيم


#508536 [صبري فخري]
0.00/5 (0 صوت)

11-11-2012 10:46 AM
اكيد المدير ده خريج رومانيا

0123652351


#508415 [سامر المدنى]
0.00/5 (0 صوت)

11-11-2012 08:52 AM
لا حول ولا قوة الا بالله العلى العظيم ,,, حسبى الله ونعم الوكيل فيكم .. وهذا زمان حكومة الكيزان .. مهزلة فى ثياب بيضاء .ز اللهم اليك نشكو وانت المستعان


#508348 [زول ساي]
0.00/5 (0 صوت)

11-11-2012 06:36 AM
ناس تراقب الجو بالنظر ودعوات زي الله يغتس حجرهم وبلة العجيب داك وبوليس ينط للدكاترة جوا المستشفى يدقهم....السودانيين محنوا الفشل زاتو.......الداهية جاية والبلاء كبير وربنا يستر على الغلابة.دكوها ووزعوها من جديد.خلو الورق دا يتغير الله يجازي الورق.


#508253 [الشايقي]
5.00/5 (1 صوت)

11-11-2012 12:00 AM
والله يااخوه انا عملت في المستشفيات لسنوات الحقيقه امر من هذا بكثير ماقالته الاخت جانب وهنالك جوانب اخري انتم لاتدرونها اضف لذلك الدكاكين البتخرج الطلاب والله انا عملت كمحاضر هؤلاء لاعلاقه لهم بالطب مساكين ابناءنا الطالب يتخرج من دكان مامون ولادكان قرشي ولا نصرولا ولا وهو لايعرف شئ مايدرسه طالب الطب في هذهالدكاكين لاعلاقه له بمايدرسه طلابنا في جامعة الخرطوم ونصيحه للمواطنين يطالبو بدباجه تكون علي كل طبيب تحدد الجامعه التي تخرج منها ولو لقي واحده من الدكاكينالواحد فيهم اخير يمشي لاقرب حبوبه في البيت او عند الجيران حتي يجد علاج عنها افضل من اولاد المصارين البيض ديل اي واحد داير ولدو ولابتو تبقي دكتوره ويمنح الشهاده لكن حبوبه احسن اقول هذا وانا قد عملت في هذه الجامعات هؤلاء يخدعوكم يااوزلياء الامور.اللهم بلغت فاشهد.


ردود على الشايقي
Netherlands [عمر محمد الامين الطاهر] 11-12-2012 08:52 AM
طيب انت هسي يصدقوك كيف وانت نكرة ولم تضع أي ديباجة وتعرف بنفسك، إما أن تكون شجاعا وتعرف بنفسك ليمكن تصديقك وإما أن ترحمنا وترحم ضعفك وتساعدنا بالسكات والصبر الجميل.


#508128 [عبدالعظيم]
0.00/5 (0 صوت)

11-10-2012 09:08 PM
والله العظيم مره طعنى مسمار مصدى داخل مستشفى الشعب بالخرطوم وكنت حضرت لزيارة أحد أقربائى بالمستشفى خليت الزياره وقعدت أفتش فى حقنة التتانوس


ردود على عبدالعظيم
Netherlands [Ali Saleh] 11-12-2012 11:04 AM
وطبعاً لهسع لافي ومالاقيها.......!!!

ياخي بالغت !!! كان أخير تكمل زيارتك. وتفتش بره اكيد كان لقيتها على طبلية بباب المستشفى.


#508107 [شهيرة]
5.00/5 (2 صوت)

11-10-2012 07:53 PM
والله دي هينة ، في دكتورة في مستشفي احمد قاسم رفضت تعالج مريضة بفشل كلوي علشان المريضة مسيحية ، المريضة حسي اتوفت وهي بين ايدين مولي كريم ، ولكن انا اثق انها تحمل شكواها معاها . والله عااااااادل
لا يظلم احد ولا يغفر لظالم متجبر ،،، لك الله يا وطني


#508045 [أبو محمد]
4.75/5 (3 صوت)

11-10-2012 06:04 PM
اتركوا الكلام الكتير ، كان فيكم ذرة رجولة اطلعوا الشارع واقلبوها وفي حالة العدم تستاهلوا اكتر من كده ، قال رجال قال الرجال ماتت في كرري ، اتعودتوا على الذل والهوان ومن يهن يسهل الهوان عليه ما عارف الامة كيف انجبت ازهري والمحجوب وعبدالخالق ونقد والمهدي والميرغني وحسن عوض الله وزروق واحمد السيد حمد ومامون بحيري والجلابي الهزم الترابي والشفيع أحمد الشيخ وأسد الحوبه جعفر محمد نميري وفاطمة أحممد ابراهيم ونفيسه أحمد ابراهيم والعبادي وود الرضي والله فعلا النار ...... الرماد ، قوموا لفوا بلا مرض معاكم عايشين هلى التاريخ والذكريات يا وهم.


ردود على أبو محمد
Netherlands [واحد تانى] 11-11-2012 03:03 AM
صدقت...نحب التاريخ والذكريات....!!


#507948 [زول قديم]
5.00/5 (1 صوت)

11-10-2012 03:24 PM
اتمنى انو الحصل ما يغير قناعاتك و احترامك لى انسانيتك, الناس الزيك = وطن.


#507914 []شقي الحال السوداني]
0.00/5 (0 صوت)

11-10-2012 02:43 PM
ما الجديد يا سيدي فمن عندة مال ونفوذ يموت من التخمة ومآتم 7 نجوم اما الما عنده فهو ممن كان يجب ان يودعوا من زمن بعيد حسب مقولة الفضلوا
اما الطب فعاد تجارة وشطارة ووالله لو المجلس الطبي عدل كان كثيرين من الأطباء والمستشفيات خارج الشبكة.
وحين يمرض من اصبحوا كبار مسئولين يسافرون للخارج.
هم يتعالجون ويتسوقون ويتعلمون ويصحون وينومون ويرفهون ويعملون في عالم أخر صنعه ضعفنا وهواننا وتخاذلنا
اما كسره هيثرواحسن تعملها تحت صورتك وكلما اشوف صورتك يظهر لي الخط والذي استخدمته ايام عز سودانير ومجدها والدولة لا تهتم وشنو يعني خط اصلو خط كوفي ما خط والسلام وقدم مع الأيام
شكرا على لياقتك ومثابرتك التي بلغت 9 بقياس اللزوجة واللياقة القصوي ودي بنت خالة ريختر واكيد ما سمعت بيها واهو برضة نثقفك وأخاف عليك يوم الحساب يقولوا ليك دينك تقول شنو اخبار هيثرو ومع وجع الخط والطناش اليحرق الفشفاش يبقى السؤال شنو اخبار مشروع الجزيرة والأقطان و وطق الفشفاش مع استمرار الطناش الطناش


#507895 [حسكنيت]
5.00/5 (3 صوت)

11-10-2012 02:17 PM
يعنى ( أبو مروءة) راح شمار فى مرقة..
رأيك شنو فى الموضوع دا يا شيخ عبدالحى ؟ ( ألمانيا ما معانا)


#507861 [ابوعلى]
4.50/5 (2 صوت)

11-10-2012 01:39 PM
يجب عدم السكوت على مثل هذا السلوك لأنه يزرع فينا اللانسانية و يكرس للذاتية و الابتعاد عن القيم و الاخلاق الفاضلة.
1- عليك يا استاذ فضح المستشفى و كتابة اسمه المستشفى بالكامل و اسم المدير.
2- عليكم اثبات الواقعة و عمل شكوى للمجلس الطبى و وزارة الصحة بهذا الخصوص.
3- على الطبيبة التقدم بشكوى لمكتب العمل و المطالبة بتعويض للضرر المادى و الادبى لأن الفصل تعسفى و غير قانونى و غير مبرر.
اصلا وجود قانون او لائحة بهذا المعنى فى المستشفى يخالف قوانين وزارة الصحة و المجلس الطبى التى تحث الطبيب بل و تأمره على انقاذ حياة المرضى فى وقت و اى مكان دون النظر الى جنس او عرق او عمر او ............الخ.
لا حول و لا قوة الا بالله


ردود على ابوعلى
Netherlands [wedhamid] 11-10-2012 08:14 PM
الأخ أبو على.... تحيه ..... جميل دائما أن نلجأ للقانون ...و نصيحتك بأنه .....(على الطبيبة التقدم بشكوى لمكتب العمل و المطالبة بتعويض للضرر المادى و الادبى لأن الفصل تعسفى و غير قانونى و غير مبرر) عين العقل و الحق ..و لكن أخى و المشكل دائما فى لكن هذه..... هى إنو ناس الإنقاذ أطاحوا بكل القوانين و الأعراف التى تحافظ على حقوق العاملين و أطاحوا بكل المكتسبات النقابيه للعاملين خاصة فى القطاع الخاص إذ لا تحرر أى عقود عمل قانونيه و سوف لن تجد عند هذه الدكتوره أى صوره لعقد موثق يمكن أن تستند عليها للمطالبه بحقوقها .... و كل المعينين الزمن دا بيتعينوا فى القطاع الخاص كخدم المنازل بدون عقد أو بتحرير عقد صورى غير قانونى أو غير مكتمل....


#507859 [عبدالله]
0.00/5 (0 صوت)

11-10-2012 01:36 PM
رسالة الي مدير مستشفي الاطفال الخاص
عمر البشير قبل ايام اتعالج في مستشفي خاص ( للكبار) والطبيب المعالج اخد ميدالية

كسرة
مافي ثقة في مستشفياتنا ولا في اطبائنا عشان المشير يعمل عملية (صغيرة كما قالو) بره.

سؤال
هل نفس العملية لمواطن بسيط القمسيون حيوافق انو يعملا بره

طيب
صلحو لينا اسبتالياتنا عشان نتعالج فيهاوانتو معانا


#507849 [من المسئول!!!!]
4.88/5 (4 صوت)

11-10-2012 01:24 PM
لا لفت إنتباه ولا توبيخ علي طول ( رفد ) الظاهر الدكتور أساسا عينه علي الوظيفة وكان يترصد أقل خطأ من الدكتورة ليقوم بطردها ويتم تعيين ( كلب ) من الكلاب التابعين للنظام!!!!
يا عمر البشير إن شاء الله السرطان يشق حلقك مرة واحدة علشان أي مصيبة تحدث لمواطن أنت مسئول عنها بحكم إنك ( أمير المؤمنين ) وتطبق الشريعة حسب إدعائك.


#507844 [عبدالواحد المستغرب أيما إستغراب!!]
4.92/5 (8 صوت)

11-10-2012 01:15 PM
المشكله بالضبط وين يا جبرا؟ عادى جدا!! إذا الرئيس ذات نفسوا بيعترف بلسانو الحياكلو الدود بيقول (نحن ظلمنا ناس كتيرين) والسعاده تغمره من ساسو لراسو وإنه شخصيا مكتفى بالعقوبه الربانيه وإعتقد واهما إنها كفاره له وبالمناسبه لا يظنن أحدكم بأن الرئيس كان سعيدا لشفائه إنما سعادته كانت نابعه من كونه قال الحقيقه مجرده بأنه ظلم الشعب والما عاجبو داك البحر يكفى شعوب العالم ويزيد !! (طبعن) كلامو ده (دشاه) فى أذان أخواننا المغتربين الغلابه بإعتبارهم الحلقه الاضعف فى المعادله السودانيه الذين غادروا مكرهين ديارهم تاركين الولد والاهل ليتجرعوا مرارة الغربه والعجيب لم يتصدى له احد ويذكره بأنهم فى الغربه نتيجة ظلمه لهم!! ولم يسأله أحد لماذا لجاء للمستشفيات السعوديه بعد ربع قرن وهو على رأس السلطه ولم يوفر لمستشفياته مثل هذه الامكانيات حتى اليوم؟ والمدهش لم يسأله أحد كم من الشعب السودانى يعانون من نفس المرض الذى يعانى منه فخامته وأسواء من مرضه!! وهل فى الامكان وطالما عجزة الدوله من توفير الامكانيات الموجوده فى مستشفيات السعوديه معالجتهم على نفقة الدوله فى نفس المستشفيات او حتى فى معسكرات اللاجئين التى توفرها المنظمات العالميه وعلى نفقة الكفار الذين يدعمونم بغير من او أذى؟ أم هى إمكانيات الدوله (يادوب) تكفيه هو وطغمته ومنهم وزير الماليه الذى طار بفلذة كبده الى أمريكا ليعالج من إلتهاب الاذن الوسطى طالبا من الشعب أن (يتصبر بالكسره!!) الى أن يعود!! وكذلك (نسابته) الذين توضع الطائره الرئاسيه تحت خدمتهم على مدار الساعه!!الظلم بإعتراف الرئيس سياسه عليا لا ينبغى الخروج عنه و(مشى بيه حالك) طالما هناك أمراض هى كفاره له ، والرئيس يضمن لك مرضك بمياه وأطعمه ملوثه وطاقم حكام هم أشد فتكا ببنى الانسان من المياه والاطعمه الملوثه والرئيس نفسه (طبعن) على رأس أشد الكائنات فتكا بشعبه وخاصة عندما يلقى خطبه التى تحاكى الاسلحه الاسرائيله التى دمرة مصنع اليرموك .


#507840 [رجاء]
3.75/5 (3 صوت)

11-10-2012 01:13 PM
لا طبعا الطب مهنه انسانيه اولا

اطبائنا السودانيين من اكثر اطباء العالم انكار للذات وعطاء بلا مقابل فهم يدفعون من جيوبهم للفحوصات وللروشتات لكثير من المرضي وقصه الطبيبه هذة خير مثال فضلا عن الوقت والخبرة التي يهبونها للمرضي دون مقابل اذا كان للجيران والاهل كما للاغراب .

ارحموهم فلا الدوله تجزيهم بعد سنين الدراسه الطويلة والمضنيه و لا الناس تشكرهم.

لاادري التفاصيل الحقيقيه للقصه و لا اطعن في الرجل الانسان محامينا ومفرحنا ومبكينا استاذنا الفاتح جبرا ولكن عودتنا الحياة والصحافه علي وجود اكثر من وجه للحقيقه و الوقائع.

من جانب تاني ليت اولياء الامور والتربويين يوجهون ابنائهم وطلبة العلم بان التوجه لدراسة الطب يتطلب في الفرد علو النزعه لمساعدة الضعفاء المرضي وتكريس الوقت لذلك قبل ان تكون برستيج او مدعاة للغني ثم انه تخصص يحتاج لمقدرات ذهنيه عاليه حتي نخرج به اطباء شطار و باحثين ايضا نتفادي بهم كثير من "الورطات الطبيه" الحاصله في مجتمع الزمن الاغبر.

تحيه لك استاذنا.

كسرة:

كديه نشوف مدير مستشفي الاطفال التخصصي كسر كدا ليه.


ردود على رجاء
Netherlands [أبو نورة] 11-11-2012 11:53 AM
مش كل الاطباء السودانيين ملائكة .. بعضآ منهم دخل مجال الطب بالخطأ ..


#507832 [ابو ابراهيم]
5.00/5 (3 صوت)

11-10-2012 01:00 PM
اللهم ارفع عنا الكرب


#507811 [Abu Areej]
0.00/5 (0 صوت)

11-10-2012 12:31 PM
يا بروف جبرة .. اذا الانسان ما عنده قيمة فما بال خط هيثرو؟؟؟؟؟ مع انه اصرارك على الكسرة الثابتة دي (هيثرووووووووو) زهجتنا نحن القراء والله لو عندنا الرد كان ردينا ليييييييك .. غريبة الجماعة ديل ما يزهجوا من اصرارك دة.. وعاملين اضان الحامل طرشا...!!!

الله يكون في عونك ويصبرك اكثر ويقويك


#507808 [غلبان]
5.00/5 (1 صوت)

11-10-2012 12:28 PM
الجزارة و الهمبتة دى الخلت كبيرنا يتعالج فى قطر والسعودية ..اذ صارت مشافينا الخاصة بقالات لبيع الموت و الاخطاء الطبية و نحر الجيوب .. والما عاجبه يروح المانيا .. وحسبنا الله و نعم الوكيل


#507793 [Maher abdeen]
0.00/5 (0 صوت)

11-10-2012 12:01 PM
ًماموقف وزاره الصحه؟ وماهي الجهه المحايده التي يمكن اللجوء اليها؟
حسبنا الله ونعم الوكيل


#507790 [algandawi]
0.00/5 (0 صوت)

11-10-2012 12:00 PM
والله في هذا الزمان الأطباء نسوا/ تناسوا أخلاقيات مهنة الطب وقسم أبوقراط ناهيك عن الإنسانية التي أصبحت من مصطلحات الماضي الجميل .. وأعطيكم معلومة هامة جداً وهي : إذا كان هنالك مريض في حالة حرجة ولم يقم الطبيب ،أي طبيب بمساعدته-يعني أسعافه-وتقدم المريض أو ذووه بشكوى ضد ذاك الطبيب فإن القانون يحاكمه في الدول التي تحترم حقوق الإنسان.الله المستعان................تغريدة خارج السرب:((البعيش الدنيا ياما تشوفهتشقيه بفرقة عزيز))...


ردود على algandawi
Netherlands [دا كلام صاااااح] 11-10-2012 02:32 PM
نعم

لو فى الشارع او محطة البص او المترو .. وكان هناك مريض فى حالة طارئة للأسعاف .. اذا كان واحد من الحضور او المارين طبيب ولم يتدخل .. فانه يحاكم ..فما بالك داخل المستشفى؟؟
المدير تعامل مع الموضوع كاى موظف يمارس البيروقراطية مع اى ملف
الأعجب من كدا .. اسى تكون المستشفى حائزة على جائزة فى الجودة الشامل


#507781 [sudaneseonline]
0.00/5 (0 صوت)

11-10-2012 11:54 AM
هل دمر الانقاذأخلاقيات الشعب السودانى الى هذا الحد؟؟؟؟؟؟؟؟؟؟؟؟


#507772 [دي العدة]
5.00/5 (1 صوت)

11-10-2012 11:49 AM
مستشفي فيها ذول ذي دا... مكان مناسب لدينزيل واشنطون يسوي فلمو John Q
مع تغير طفيف في السيناريو
الفاتح جبرا...الواضح إنو الدكتورة فعلا غلطانة
ومدير المستشفي علي حق
ذول بطبق في قانون..بغض النظر علي صحتو ولا غلطو
عشان كدا فصل الدكتورة وهو واثق انو ما حا يحاسب
ويحاسب ليه...
ما البلد كلها ماشة كدا
مشروع حضاري ....
والله يكضب الشينة


#507770 [المارد]
0.00/5 (0 صوت)

11-10-2012 11:48 AM
الــــــي متــــــي ؟؟


#507769 [باش تمرجي]
0.00/5 (0 صوت)

11-10-2012 11:47 AM
يا استاذ .... انت كمان مرفوووود ...


#507766 [زول واجب]
5.00/5 (2 صوت)

11-10-2012 11:44 AM
يا أستاذ جبرا، والله قد أثرت موضوع أخطر من موضوع الخط وكسرته الثابتة بألف مرة. ونرجو أن تواصل وتكشف اسم المستشفى، حتى لو كان بواسطة التعليق على المقال، ان كنت تخاف مقاضاة الجريدة وتلتلة رئيس التحرير في المحاكم.. ثانيا نرجو أن تكشف عن اسم الطبيبة، لأن هناك الكثيرين الذين سوف يساعدونها في الالتحاق بمستشفى أحسن مية مرة من هذا المستشفى أقصد (السوبرماركت)، ونرجو أن تجد هذه الطبيبة أن تستحق من تكريم.


#507757 [كايلتود]
5.00/5 (1 صوت)

11-10-2012 11:40 AM
لا حول ولا قوة الا بالله ...

إذا صلح الراعي صلحت الرعية !


#507751 [صلاح مصطفي أحمد]
4.25/5 (3 صوت)

11-10-2012 11:36 AM
اقول لاختي الدكتور س حسبنا الله ونعم الوكيل وربنا معاك ووالله لا تظلمي بعدهم أبدا بأذن الله نوع المدير دة هو اللي ود الخدمة المدنية في ستين داهيه رغم أن مهنه الطب مهنة إنسانية 100%


#507739 [الزوُل الكَان سَمِحْ]
5.00/5 (2 صوت)

11-10-2012 11:24 AM
أستاذ

رأينا نحنا خليهو..رأى وزير الصحة شنو؟؟ده طبيب درس طب فى الجامعة وإتخرج ومسك إدارة مستشفى خاص للأطفال...ده ما أخير منه..طبيب عطبرة الذى لم يدرس الطب وصار طبيباً بالممارسة وإنساناً

حليل زمن الأطباء قروا الطب


#507738 [hamid]
5.00/5 (4 صوت)

11-10-2012 11:23 AM
ما قال ليكم بيكتل اليوم هي دي عايزه فهامة.على الطبيب أن يجلس و يصف المرضى أمامه فالذي تم يومه يموت و الذي لم يتم يومه يرجع البيت وسلم لي على أبو قراط


ردود على hamid
Netherlands [Bagera Cooper] 11-11-2012 01:58 AM
الكـلام ده غير صحيح ده كلام ممجوج


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة