"مش راح ينفع يا شيخ"..!!!
11-14-2012 04:08 PM

بالمنطق

"مش راح ينفع يا شيخ"..!!!

صلاح الدين عووضة

* حكينا مرة طرفة بلدياتنا عكاشة الحلفاوي صاحب الفرن..
* فخلال خطبة من خطب يوم الجمعة أسهب الإمام في الحديث عن أهوال يوم القيامة فإذا بعكاشة هذا يبكي بكاءً مراً له نحيب..
* وعقب الفراغ من الصلاة اقترب رجل من عكاشة - وهو لايزال يكفكف دموعه- ليقول له :( مش راح ينفع البُكا يا شيخ ، كبِّر الرغيف)..
* وسبب تذكرنا للطرفة هذه اليوم أن جاراً يدير مؤسسة ما طفق يتحدث في مناسبة اجتماعية بالحي عن رعب تملكه إبان وعكة مفاجئة ألمت به..
* قال إنَّ سنين حياته الطويلة اُختزلت في لمحات مرت أمامه كشريط سينمائي قصير..
* وفي الشريط هذا تراءت له(أشياء) ود أن لو لم تكن حدثت من تلقائه..
* كما تراءت له - كذلك - حسنات ودَّ أن لو كان أكثر منها..
*وأشار إلى محاضرة دينية عن يوم القيامة سمعها- أثناء علته هذه - جعلته يرتجف رعباً إلى حد البكاء..
* وحين كان (المدير) هذا يتحدث انتبهت إلى همسات متداولة بين نفر من الجالسين ورائي..
* والتقطت من بين الهمسات هذه واحدة يجزم صاحبها أنه (شخصياً) أحد ضحايا المدير (الباكي) خلال فترة عمله معه سائقاً...
* قال إنه (أكله) في مستحقاته عن ثلاثة أشهر كاملة..
* وحين ذهب إليه متظلماً - الهامس هذا- قال إن المدير أمر سكرتيره بطرده من مكتبه وهو يصيح في وجهه :( روح اشتكي)..
* ويمضي الهامس قائلاً بصوت لا يسمعه إلا من هم حوله :( وشكيتو لي الله).
* وانتبهت إلى (المدير) - مرة أخرى- وهو يواصل حديثه ذاك عن أثر المرض والمحاضرة على نفسه..
*ثم تحول هو ذاته إلى واعظ يحض الجالسين على الإكثار من تذكر يوم الحساب..
* وقال إن المرء إذا لم يحاسب نفسه في هذه الدنيا فسوف يُفاجأ بمن يحاسبه يوم الموقف العظيم..
* وأذن المؤذن - في اللحظات تلك - لصلاة العشاء ..
*وقام الناس للصلاة ليؤمهم رجل ذو صلة قربى بالسائق ذاك الذي قال إن (المدير) قد ظلمه..
* وسمع الناس نحيباً شديداً حين بلغ الإمام الآية التي يقول فيها الحق تعالى:( يوم لا ينفع مال ولا بنون إلا من أتى الله بقلب سليم)..
*وعند الفراغ من الصلاة لاحظ الناس أن (المدير) يمسح دموعه بطرف عمامته..
*وسمعوا (السائق) وهو يصيح - عوضاً عن الهمس - من بين الصفوف الخلفية :( لو توبتك دي نصوح انصف مظاليمك وأنا أولهم)..
* وتذكرت (ساعتها) طرفة عكاشة (الباكي) والرجل يقول له :( مش راح ينفع البُكا ياشيخ، كبِّر الرغيف)!!!!


الجريدة


تعليقات 35 | إهداء 0 | زيارات 5141

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#516474 [واحد من الناس]
5.00/5 (1 صوت)

11-19-2012 08:40 PM
دى يا ود عووضة ما سبقك فيها زول
والرسالة وااااااااااااااضحة .


#513407 [Kalifa Ahmed]
5.00/5 (1 صوت)

11-16-2012 08:41 PM
مادام إعترف السيد رئيس جمهوريتنا بالظلم والنكد الذي سببه لشريحة من شعبه فيجب عليه ومنذ اليوم أن يعمل على إنصاف المظلومين ويرد الحقوق حتي يقابل ربه بقلب سليم!!!!! لكن مايشكل ليها لجنة ولايعمل ليها ديوان ويصيع المظلومين تاني بمصاريف المواصلات !!! أنا شخصيا حقي مخليهو ليوم ظل إلا ظله ونعم بالله من وكيل......


#512932 [فرقتنا]
5.00/5 (2 صوت)

11-16-2012 06:06 AM
رسالتك وصلت وفهمنا بس هو ما فاضي لي رسالتك دي لانو عندو مرتين


#512881 [اشرف]
5.00/5 (1 صوت)

11-16-2012 02:28 AM
عشان كده بي سبب المقال ده هكرو ليك صحيفة الجريدة


#512394 [عبدالواحد المستغرب أيما إستغراب!!]
5.00/5 (1 صوت)

11-15-2012 12:59 PM
والله ياود عووضه محنة المرض الذى تعرض له البشير ينبغى أن ينظر اليه هو شخصيا ومن حوله بشكل جاد ويجعله حدا فاصلا بين غفله وغيبوبه عاشها وعيش فيها شعب بآثره ولما يقارب الربع قرن من الزمان وعلها تكون درسا للاخرين !! وصحوه لابد منها لمراجعة النفس دون لف او دوران ودون تعالى وكبرياء على شعب ولاه الخالق عز وجل عليهم، وسبحان الله الذى بيده الداء والدواء وسبحان الله الذى يمهل ولا يهمل وسبحان الله الذى لا يغفل ولا ينام وسبحان الله الذى بيده مقاليد كل شىء وسبحان الله المحى والمميت !!والبشير أمامه فرصه يستطيع أن يثبت فيها أنه إستفاد من الدرس الذى آقر به على نفسه ولم يجبره عليه أحد كائن من كان وتحدث عن (ظلمه) الذى اورده هذا المورد.. وجميل منه أن إعترف أن الظلم ظلمات فى الدنيا قبل الاخره وهى ظلمه فى الدنيا لانه ذهب صاغرا بقدميه للاستشفاء وأخضع نفسه لاشخاص وأقصد الاطباء وطاقم التمريض علهم يكونوا سببا فى شفائه وإنصاع لهم وهو الذى تعود على أن يأمر فيطاع وتجلة فيهم قدرة الله وآياته أن الحاكم مهما تجبر وتكبر ثمة قدرات أكبر من قدراته يضعها الله سبحانه وتعالى فى يد من هو أضعف من الحاكم،والبشير إذا اراد أن يثيت لشعبه أنه إستفاد من محنة الابتلاء ولديه النيه الصادقه لتصحيح مساره عليه أن يبداء بأهل بيته واقصد الزوجات والاشقاء والخال وأقربائه وأصفيائه ويفهمهم بأن هذه البلاد لم تكن يوما ملكا لهم وحصرا عليهم ثم عضوية الحزب وخاصة الذين سلبوا ونهبوا خيرات البلاد وكانوا سببا فى ظلمه للعباد ومن لا ينصاع منهم ورفض رد الامانات المنهوبه لابد من مواجهته بكل صرامه وحزم ولا مجال لاى مجاملات، ونذكر البشير أن القوانين مازالت موجوده لكنها مجمده فى مواجهة هؤلاء الذين أشرنا اليهم على وجه الخصوص ويومها عليه أن يتأكد أن الله سوف يقبل توبته وينصره وسبحانه وتعالى لايخلف وعده و سوف يسخر له الشعب الذى شمت على مرضه وله أسبابه بطبيعة الحال وسوف يقف بجانبه وخاصة ان قضيته لم تكن معه شخصيا إنما كانت قضيته مع الممارسات السيئه التى مارسها من تحلقوا حوله الذين أطلق لهم العنان وجعلته يقر صراحه وهو تحت تأثير نعمة الشفاء بظلم أناس لا يعلمهم ولم يراهم ولكنهم يعرفونه ويعرفون أن الله ولاه عليهم راعيا ومسئولا عن حسن رعايتهم طبقا لقول الرسول عليه أفضل الصلاة وأتم التسليم (كلكم راعى ومسئول عن رعيته وبداء بالحاكم بإعتباره سنام ومناط الرعايه الاولى بالاهتمام برعيته ثم تدرج فى التكليف كل حسب موقعه من الرعيه.


ردود على عبدالواحد المستغرب أيما إستغراب!!
Saudi Arabia [ابو مبارك] 11-15-2012 01:56 PM
البشير يصحا كيف يا عبد الواحد والجماعة الضالين والمضلين ديل حولينو كل ما يحسوا انو فاق يدوه ليك كاس ينسوهو ليك حنانو ، شوف الاستقبال بعد العودة من رحلة الاستشفاء كان كيف ، وبعد دا كله تقول ليّ صحوة .


#512019 [ادم ساطور]
1.00/5 (1 صوت)

11-15-2012 12:17 AM
بعض سكان ابوادم واليرموك وما جاورها والشجرة تركو منازلهم بعد ضرب غزة اليوم قد رايته بعضهم مشو على اهلهم سبحانه الله بقينا دول مواجهة


#511975 [سحت × سحت]
5.00/5 (2 صوت)

11-14-2012 11:06 PM
مش راح ينفع يا شيخ رجع لبن البقر لكافوري ..
مش راح ينفع يا شيخ رجع الاكل لمستشفى المناقل ..
مش راح ينفع يا شيخ رجع لحم الاسود و موز القرود لحديقة الحيوان ..
مش راح ينفع يا شيخ .. رجع الحقوق لاهلها مع الامتثال لقضاء العباد وانتظار حكم رب العباد


#511967 [بت الخرطوم]
5.00/5 (1 صوت)

11-14-2012 10:51 PM
يا راجل حتى انت بقيت تغيب عقولنا قال بلديتنا عكاشة وجارك المدير هاهاهاصدقناك والرسالة وصلت يا ظريف الحلفاوين لا تنس ان الله غفور رحيم نسال الله الرحمة لنا ولكم ولجميع امة سيدنا محمد عليه افضل الصلاة والسلام


#511961 [توتو كورة]
5.00/5 (1 صوت)

11-14-2012 10:37 PM
ما تقول لى .. بصاتك سيدا والعجب احتاروا فيها .. وكبر الحبل يا بشة .. مع اقتراب فك التسجيلات


#511942 [الطبجى]
1.00/5 (1 صوت)

11-14-2012 10:20 PM
يا ربى ده مدير بنك التنمية التعاونى الكان بنك اسلامى ؟؟؟؟؟؟؟؟؟

المدير المسافر ومعاه مجلس الادارة


ياربى البنك المركزى عنده راى ؟؟؟؟؟


#511939 [حبال المشنقة]
5.00/5 (2 صوت)

11-14-2012 10:15 PM
المشكلة تكمن فى أوبة مديركم و هو يمسح دموعه .. وآخرين فى انتظار(العمود) لمسحه بطرف العمامة.. و برضو تقول لى كفارة !!!!!


#511870 [أبوكراعا حديد]
4.00/5 (1 صوت)

11-14-2012 08:31 PM
الله الله عليك يا ود عووضة هذا لزوم الإحتياط لكن هناك دائما من يوصل مثل هذا الكلام لسيادتو و هم معروفين ممن ينقل الكلام بعد زيادتو حبتين لكن برضو ما بينفع معاهم ديل عايزين إف 15 من النوع أياه الذي أصابوا بيهو اليرموك؟؟؟ موش اليرموك بتاعة الآسد؟؟؟ لا دي بتاعة شـمال مايوو التي شوت خروف العيد قبل مواعيدو؟؟؟ولا عووضة قول لي بلدياتكم عكاشة الحلفاوي كبر العيش و لا نقصوا زيادة؟؟ أصلوا صاحبنا دا ناوي يعمل حاجات كثبرة ليست في صالح: ( محمد أحمد)المسكين؟؟؟ و لكن لزوم تعويض مستلزمات المؤتمر الثامن الذي سوف يعقد منتصف هذاالشهر لأنه يبدو أن الخزينة فرغت بعد أن نقل صلاحياته إلي نائبه الأول ودغفير حديقة الحيوانات ؟؟
زولنا داك وزير التأصيل وينو هل قابل زملاؤه أكيد هو الآن في أحلك أيامه بين السين و الجيم؟؟؟ و ربنا يستر ؟؟؟ و من لم يمت بالطائرة مات بالقاضية أو كما قال عمنا جحا عندما سألوه كيف مات حمارك؟؟ أجاب كنت أعطيه ربع ما يحتاج إليه من علف و ماء حتي ضعف و نحل جسمه فتركته في الخلاء ذات مرة و قلت ربما وجد شيئا يأكله أو يأكله؟؟ و فعلا جاء بعد أيام فوجد حماره قد أكله السبع؟؟؟؟؟؟؟؟؟
يا ليت بشبش يتركنا في خلانا نأكل أو نؤكل مما يجود به ذاك الخلاء؟؟؟ و لكن هيهات حتي هذه المعيشة الضنك يقاسمنا فيهابأن يأخذ منا المعلوم و بالقانون؟؟؟ و من وضع القانون إنه ذاك الشخص الذي لا يهمه أن جاع الناس أم شبعوا المهم أن يملاء هو بطنه و ينفخ جيبه؟؟؟
الكترابة


#511800 [مارتن لوثر]
5.00/5 (1 صوت)

11-14-2012 07:03 PM
رغيف الانقاذ عمرو ما يكبر


#511797 [الزُول الكَانْ سَمِحْ]
5.00/5 (2 صوت)

11-14-2012 07:01 PM
يا عووضة

أنا أعرف واحد كبير من المدعين الإسلام كباالزوغة بقيمة 5 شهورإيجار بيت كان يستأجره قبل التمكين.
لكن زولكم بتاع الرغيفة دا..الظاهر عليهو بركب أفيال..والله فطستا من الضحك


#511794 [فاهمك]
5.00/5 (3 صوت)

11-14-2012 06:58 PM
اهه وصاحبنا القاصده ده يسوي شنو ....الا يصغر القبور العملها دي....لكن لو عبد الحي جاء من المانيا بالسلامه ببلغو انو فعلا ربنا كفر عنو وانتها الموضوع..


#511786 [البطحاني]
5.00/5 (2 صوت)

11-14-2012 06:50 PM
اااها يعني انت قصدك كفارة مرض عمر البشير ما نااافعة ... كبر الرغيف يا عمر


#511776 [وطن حدادى مدادى]
4.50/5 (2 صوت)

11-14-2012 06:36 PM
متعك الله بالصحة يا ود عوضة...الآن فهمتكم وح نرجع الديمقراطية...سبحان الله الشافى...يصاب الأنسان فيما ساء به للبشر لسانه وحلقومه...علها عظة...اللهم لا شماتة...أحفظنا وأهلنا يالله وتقبلنا عندك قبولاً حسن.


#511770 [murtey]
4.00/5 (2 صوت)

11-14-2012 06:31 PM
واللبيب بالاشارة يفهم الكلام ليك يا المطير عينيك


#511768 [مستاء]
4.50/5 (2 صوت)

11-14-2012 06:27 PM
مش تنفع يا شيخ عفن الرغيف .
طبعا فرعونا لا يمكن ان يمر بهذا الموقف ده الفرعون يا شيخ ان للفرعون بهذه عظة . وكمان الجماعة حول فرعون لا يتركون له فرصة ليتعظ ابدا لانو لو اتعظ حيروحوا فيها هم لذا تلاقيهم دوما يهمسون له انت الاسد . انت ود البلد . انت العظيم . انت ............. الخ من الالغاب الجميلة البطولية حد انهم سيطلقون عليه موحد الامة والوطن ؟
والشئ الاخر يصلي فرعوننا في المسجد المعلوم وكل خطبه معلوم انها تذهب للتمجيد اكثر مما تذهب للوعظ والارشاد خصوصا وان امامها دكتور معروف بالبشاشة والهشاشة وحبه للشعر والطرب . لذا نامل ان يمر ولو يوم فرعوننا علي النت ويقراء مقالكم عسي ولعل بفعل فيه ما لا يفعله الامام الدكتور ..........................


#511765 [يسقط البشير!]
4.50/5 (2 صوت)

11-14-2012 06:22 PM
واهم من ظن يوما ان للثعلب دينا


#511763 [awad]
4.00/5 (1 صوت)

11-14-2012 06:17 PM
ياود عووضه سيبك من قريبك الحلفاوى ومن المدير الظالم وأدخل فى كرش الفيل وقول له أنت المعنى بهذا الكلام وطبعا هو بشبش وأمكن يعملك مساعد نصائح وجائز ربنا يجعل هداه على يديك ويقوم برد الفلوس اللهطها هو وزوجاته وأخوانه والمقربين والمحاسيب ويحاسب لينا كل من لهط حق الشعب وتكون أصبت حسنات كثيرة.


#511731 [زول ساكت]
3.75/5 (3 صوت)

11-14-2012 05:38 PM
الله يجازيك ياعووضة قاصد بشبش لمن قال يكون فى ظلم لناس حصل ونسأل الله الطهارة ههههههههههههه


#511729 [كان زمان]
3.00/5 (2 صوت)

11-14-2012 05:35 PM
قوية..... يا شيخ وشدييييده والله


#511727 [ود شندي]
4.00/5 (3 صوت)

11-14-2012 05:34 PM
يا ود عووضة إنت قاصدوا عديل الزول العارفنوا ولكن من الذي سيوصل له هذا الكلام قبل ما يلقاه في قبره


#511724 [جادو]
1.00/5 (1 صوت)

11-14-2012 05:32 PM
الشبكة طشت


#511716 [عثمان سليمان]
3.88/5 (4 صوت)

11-14-2012 05:25 PM
سؤال برى
إلتهاب خفيف فى الحبال الصوتية = كم رغيف و بالحجم المعروف !!!!


#511714 [كنى]
4.50/5 (2 صوت)

11-14-2012 05:22 PM
ده منافق وبتاع وهمات الظاهر والله اعلم دى كنته ساى تكون ده مخطط جديد لنج (وكثير من الفاسدين اصبح يتبنى النهج هذا ) نظام انا صالح وما حرامى ويكون شبه لمن بيقادى وهذا النهج متوفر فى الكيزان بكثرة


#511709 [محمد الامين]
3.50/5 (3 صوت)

11-14-2012 05:18 PM
مش راح ينفع ياعمر


#511704 [عبدالرحمن أحمد المهيدي]
3.50/5 (3 صوت)

11-14-2012 05:10 PM
الرسالة وصلت تماما يا شيخ - واذا استعملنا طريقتك في الكتابة نقول ( إياك أعني واسمعي يا جارة)
يديك العافية قول امين .


#511703 [رجمٌ بالحق]
5.00/5 (2 صوت)

11-14-2012 05:10 PM
سبحان الله.


#511699 [كتكوت]
4.00/5 (3 صوت)

11-14-2012 05:02 PM
هههههههههه

دى ما كفارات وكدا !!!!

وتانى اه اه اه اه اه اه اه


#511690 [jangy]
5.00/5 (2 صوت)

11-14-2012 04:56 PM
اطلق الحريات ادفع دية مجدى وجرجس والثمانية وعشرين طابط والاف دارفور والنيل الازرق وجنوب كردفان وملايين الجنوب و و و والعندو يضيف


#511674 [sheeria]
4.50/5 (2 صوت)

11-14-2012 04:41 PM
ملعوبه بحرفنة بميسي ...... خطيييير يا عوضه


#511670 [أبوأسامة المهاجر]
4.50/5 (2 صوت)

11-14-2012 04:38 PM
كلامك دا مابنفع مع الجماعة ديل ولو كانوا يتعظون لأعتبروا من زملاءهم الذين رحلوا عبر الإنتنوف واللانكروزرات.


#511656 [الغضنفر]
4.00/5 (3 صوت)

11-14-2012 04:24 PM
قوية والله ... لكن عملتها واااااااااااااااااااضحة يا عووضة


ردود على الغضنفر
Sudan [شلفن] 11-19-2012 12:46 PM
قد اخرجنا من بيوتنا دون حق وقد استعنا بالله و هو نا صرنا دون شك وقد دعونا الله ان يرينا غضبه فيه وقد استجابه الله دعوتناونطب المزيييييد
84


صلاح الدين عووضة
صلاح الدين عووضة

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة