إذا توقف !
11-19-2012 10:55 AM

إذا توقف !

الفاتح جبرا
[email protected]

• إذا توقف العمل بما يعرف بالصراف اللآلي يكون كويس .. (صراف واحد شغال وعشرين ما شغالين )
• إذا توقفت مشاركاتنا الخارجية في كرة القدم ربما نحفظ ماء وجهنا بعد أن اصبحنا ملطشة بين الامم
• إذا توقفت تعيينات الخريجين على (الواسطة) و(حامل هذا الكارت يهمنى أمره) فأعلم أن أمر البلاد لا يهم أحداً
• إذا توقف قضاء المصلحة على الرشوة في دواويننا الحكومية فالإثم (قطع شك) على المرتشي دون الراشي (يعني الناس تعمل شنو؟)
• إذا توقفت (نقة) زوجتك فأعلم انها تعاني من إلتهاب في الحنجرة
• إذا توقفت كشات المرور فسوف يستقيل الجنود (تاني ياكلو سمك عند عوضية وين؟)
• إذا توقفت الحركة في الطريق وتكدست العربات على الجانبين وتصبب الناس عرقاً وتأخرو عن أعمالهم فده معناتو إنو في (موكب مسئول) جاي ماري !
• إذا توقفت (علوية باغات) عن الغناء فلن تتأثر خريطة السودان الفنية
• إذا توقف المسئولون عن التصريحات إذن لسلمت مرارتنا من الإنفقاع
• إذاتوقفت تقارير النائب العام عن إيراد الإختلاسات والفساد المالي عندها أعلم أننا قد بدانا في تطبيق الشريعة !
• إذا توقفت عربات حمل النفايات عن العمل فالحكاية واااحدة إذ أنها تنفض (نفاياتها) وهى تسير
• إذا توقف التنقيب عن الذهب فلن يحدث أي شئ (هو يعني عامل لينا شنو؟)
• إذا توقف الدعاء بهلاك اليهود والأمريكان يكون كويس عشان برضو فيهم ناس كويسين وكده وإحتمال كمان يكون فيهم امريكان مسلمين !
• إذا توقف السؤال عن ملف خط هيثرو العند النائب العام أو لم يتوقف
تظل الأوراق (حبيسة الأدراج) لنقدمها يوم الموقف العظيم !
• إذا توقف إستيراد العربات قليلاً فلن تتصاعد أختناقات المرور أكثر مما
هو عليه الآن
• إذا توقف ذلك الفنان العجوز عن الغناء (يكون كويس) فحباله الصوتيه قد شارفت على الإنتهاء بعد (الإرتخاء)
• إذا توقفت الجبايات عن الطرق والأسواق فسوف تجد أن اسر كثيرة ما لاقية عيش ...(حرام)
• إذا توقفت طائرات الأنتينوف عن التحليق في سماواتنا سوف يحرم عدد غير يسير من (الشهادة)
• إذا توقف سعر صرف الدولار عند الستة جنيهات وشوية (أكون طيرة ومباري السيرة) !
• إذا توقفت الصحافة الرياضية عن المهاترات والكلام الفاضي (تبيع كيف؟)
• إذا توقفت عربة لشابه تقف في شارع (عبيد ختم) الساعة عشرة بالليل فده أكيد (ما فضل ظهر) بل فضل حاجات تانية وكده
• إذا توقفت الإعلانات التي تقوم الشركات بصياغتها عبر لهجات مصرية وشامية ومش عارف ايه .. يكون وزير الإعلام شايف شغلو
• إذا توقف القصف الإسرائيلي لمنشأآتنا فحقو في الفترة دي نعمل لينا دفاعات عشان المرة الجاية نفاجئو وكده !
• إذا توقفت دعوة الحركة الإسلامية السودانية عند (منظمة الدول الإسلامية) فده ممكن .. لكن الحديث عن بديل (إسلامي) للأمم المتحدة (فدي واسعة شوية)
• إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
• إذا توقف (الشيخ حبيساً) عن التعليق على الاحداث يكون كويس لأنو هو الزول الوحيد الفي العالم الما مفروض يفتح خشمو
• إذا توقف (الإمام) برضو يكون أحسن لأنو دخل موسوعة (جينيس) للزمن المخصص لمسك العصاية (من النص) !
• إذا لم يتوقف (أبوهاشم) عن الصمت يكون احسن عشان ما معقول الزول يكون ساكت خير .. شر
• إذا توقف المسئولون (قليلا) وتريثوا عن التصريح إبان الفواجع لما دخلت (ماكينات اللحام) القاموس السياسي .. (هم لاحقين شنو) ما يصبرو لحدت الحاجات تنكشف والناس تعرف الحاصل بالضبط
• إذا توقفت لك (حافلة ركاب) حتى تعبر الطريق يجب مراجعة القوى العقلية للسائق
• إذا توقف ضخ مياه الشرب في المواسير أكيد (العلة) تكون في (النيل)
• إذا توقف السودانيون عن أكل (اللحمة) بعد أن وصل كيلو الضان إلى 60 ألف فليهم الف حق !! (مع باقي المكونات يعني الحلة عايزه ليها 100 ألف) !!

كسرة :
• إذا توقف قلبك عن النبض أكيد تكون سمعتا بتصريح (السواطير) بتاع (هم الإسرائليين ديل كان رجال ما ينزلو لينا بي تحت) !!

• كسرة ثابتة :
• أخبار ملف خط هيثرو العند النائب العام شنو(ووو ووووو ووو)؟ - قريبا الإحتفال بالذكرى السنوية-





تعليقات 32 | إهداء 1 | زيارات 7668

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#518091 [انا]
0.00/5 (0 صوت)

11-21-2012 06:49 PM
(هم الإسرائليين ديل كان رجال ما ينزلو لينا بي تحت) !!................. وانت كان راجل ما تطلع ليهم بي فوق (سبحان الله انت لسع من راجل ومرة)


#517356 [سمبلة]
3.38/5 (5 صوت)

11-20-2012 11:58 PM
إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
انا متبرعة لك بتلفزيون 6 بوصة ابيض واسود ،،، ممكن ترسل لي ايميل علشان ارسل لك ايميل بالعنوان عشان ترسل عربية عشان تاخد التلفزيون، بس ياريت العربية تكون بوكس علشان يكون في مساحة للتلفزيون ، وبس


#517228 [aboalbra]
2.75/5 (4 صوت)

11-20-2012 06:33 PM
امدك الله بالعافيه استاز جبرا الملف بتاع هيثرو يمكن يكون راح ...
كسره اسال سماسره حي الصفاء جوار المطار تعرف قرووووووووووش
هيثرو راحت وين


#517037 [منتظر الصباح]
4.00/5 (3 صوت)

11-20-2012 01:45 PM
إذا توقف الفاتح جبرا عن الصياح ده يعني طلوع الصباح و نهاية النواح


#516933 [أبوأسامة المهاجر]
4.25/5 (7 صوت)

11-20-2012 11:52 AM
رائع يا استاذ جبرة وبرضو

لو توقف عرض السواطير في السوق فأعلم أن الحكومة تحتكرها لمحاربة إسرائل
لو توقفت الإنتنوف عن التحليق في السودان نتخلص من اللصوص كيف
لو توقف الكلام عن النهضة الزراعية المزارعين يجيهم الضغط والسكري من وين
لو توقف التحضير لضخ النفط الجماعة بيفطسوا من الفلس
لو توقف هيثم مصطفى عن اللعب تاني الرئيس يتدخل في شنو


#516773 [ود الجد]
3.00/5 (4 صوت)

11-20-2012 09:50 AM
اذا استفال وزير الزراعة ومعه الحاشية خاصته وترك أمر مشروع الجزيرة للخبراء والاخيار من اهل الجزيرة لازدهر هذا المشروع العملاق وعاد بالخير الوفير علي اهله الطيبين


#516428 [الشايله هم البلد]
3.50/5 (8 صوت)

11-19-2012 07:15 PM
اذا توقف الشعب السوداني عن الفرجه من منازلهم ونزل الشارع فاعلم انه ركب خط هيثرو


#516420 [Anti Koaz]
4.25/5 (7 صوت)

11-19-2012 06:59 PM
إذا توقفت (نقة) زوجتك فأعلم انها تعاني من إلتهاب في الحنجرة . اعمل حسابك ياجبره التصريح ولا التلميح !!!!!


#516406 [فيصل]
4.00/5 (3 صوت)

11-19-2012 06:45 PM
قال توقف الصرافات 00؟ اين هى الصرافات 00يعمينى ماشفت فى الدنيا صراف الى محروس بالمجنزرات الا عندنا ووسط السوق العربى ؟؟؟؟؟؟؟؟؟؟؟ تقول لى صراف الى ؟؟؟؟؟؟؟؟؟؟؟؟


#516370 [القرم تفاحة ابل]
3.00/5 (11 صوت)

11-19-2012 05:36 PM
اذا توقفت ريالة اللمبي فاعلم انه تم تغير المجاري وبدا جريان المخاطة


ردود على القرم تفاحة ابل
United States [القرم تفاحة ابل] 11-20-2012 02:08 AM
يا دابي السار دي الدارجي السوداني العربي عندك انت \سطر ونسف\ الدخل كلام المصريين شنو انت ما سوداني يا بتاع مرسي

United States [دابي السار] 11-19-2012 10:52 PM
ريالة، مجاري، مخاطة،مخاتي. التعليق والرد عليهو عبارة عن سطر ونسف وردت فيها كل هذه الكلمات... دا عربي يامرسي !!!!!

Netherlands [القرم تفاحة ابل] 11-19-2012 08:36 PM
معليش يا اخي سم زعاف اللمبي دا مقطع مصاريني من زمان

United States [سم زعاف] 11-19-2012 07:19 PM
والله يالقرم التفاحة دي رهيبة جبرا ذاتو ما عرف ينجرها. ياأخي أرحم مصاريناأنا حسي مخاتي كابة من الضحك وما قتدر أوقفها.


#516345 [زول]
2.50/5 (3 صوت)

11-19-2012 05:09 PM
اذا رفعنا ايدينا لله سبحانه وتعالى تاكد انه يمهل ولايهمل 24سنة مافى زول منهم مرض ومات موت طبيعى ياعمو إيه رأيك أنا بقراء كورسات تعلم لغة الاشارة عشان اشتغل فى القصر الجمهورى مترجم بس ماقدر أترجم للميرغنى والصادق بالاشارة اعمل شنو


ردود على زول
United States [دولار] 11-19-2012 08:12 PM
اعمل شاي بي لبن !


#516248 [محمد على]
2.75/5 (4 صوت)

11-19-2012 03:17 PM
إذا توقفت هذه المصائب كلها ... تكون الأرض قد توقفت عن الدوران ..
وكسرة جديدة ...
أخبار بترول البحر الأحمر المفتاحو عند إيلا شنوووووووووووووووو ؟


#516182 [ابو زهانة]
4.00/5 (3 صوت)

11-19-2012 02:29 PM
اذا توقف بطل الفلم الهندى عن الرقص والجعير فاعلم بان نهاية الفلم قد اقتربت .


#516173 [عكليت]
3.38/5 (5 صوت)

11-19-2012 02:22 PM
اذا توقف صقر بجانبك فاعلم بان ذاك النائب البرلمانى ينصب شركآ للطائرات الاسرائيلية .


#516160 [شقى الحال]
4.19/5 (6 صوت)

11-19-2012 02:16 PM
اذا توقف ابو قناية عن نصب قنايته فاعلم بان خيمة الفساد قد تمدد ظلها .


#516119 [عبدالواحد المستغرب أيما إستغراب!!]
3.25/5 (3 صوت)

11-19-2012 01:43 PM
وماذا يا جبرا إذا ماتوقفنا عن التغنى والتباهى بسودانيتنا بأن (نحن الشرف البازخ) بلا خجله والنظام يعمل معنا وفينا مالم يعمله النجار بالخشب والحداد فى الحديد والترزى بالقماش وإسرائيل بمصنع اليرموك؟!! ماذا لو توقفنا عن العمل بشكل جماعى وخاصة اولئك الذين يشعرون بوخذة الضمير ويؤمنون بأن هناك رقيب عتيد يسجل كل ما يقترفونه من آثام وكبائر وهم يرددون فى دواخلهم (الضرورات تبيح المحظورات)؟!!.. ماذا لو توقف المغتربون من تحويل مدخراتهم عبر القنوات الرسميه ليجبروا النظام على (فتح البلف)؟!!وحتى يذكروا النظام أن رسالة نبينا تحض المسلمين على الايفاء بالوعود والمسائل ماهى (ذنديه)؟!!..ماذا لو توقف النظام من إيثارة المشاكل فى كل بقاع السودان وحقن الدماء التى تسيل مدرارا دون أى سبب مقنع وإعطاء كل ذى حق حقه؟!!.. ماذا لو طلقنا نسائنا وشردنا أبنائنا بسبب ضيق ذات اليد؟!!.. ماذا لو أودعنا آبآئنا وأمهاتنا وخالاتنا وعماتنا الذين نعولهم ونكسب من وراهم (ثواب ثوابين)فى دور للعجزه (إن وجدة) لنفس السبب السالف ؟!!.. ماذا لو توقف بعض المغفلين من الذين يحسنون الظن بالنظام عن تريد (هى..لله..هى لله..لا للسلطه ولا للجاه)و (وما لدنيا قد عملنا نحن للدين فداء) دون أن يتنبهوا الى أن الذين وضعوا هذه الشعارات فى آلسنتهم فارقوا الدين الاسلامى كما فارق الطريفى لجمله أو بمعنى آخر رموهم بدائهم وإنسلوا.. وخلوهم (معلقين ذى بورى السياره!!)وذهبوا الى إتجاه آخر معاكس تماما لا علاقة له بالشعارات؟!!.. ماذا لو عرضنا ما تبقى من السودان فى مزاد علنى كبير ودون التقيد بأعلى سعر لضمان المشترى وبشرط تسليمه خاليا من السكان ولا نشترط أن يكون المشترى (دوله) ويمكن لاى عربى ثرى من دول الخليج أن ينافس فى المزاد؟!!على الاقل سوف يضمن كل من كان على قيد الحياة ومعه رقم قومى قرشين ثلاته (يتشبرق بيهم) قبل أن نفقد الوطن بلا (قرش او تعريفه)!!.


#516117 [جقّلو - ياوليد]
3.00/5 (2 صوت)

11-19-2012 01:40 PM
الإحتفال بالذكرى السنوية-دى فرصتك الوحيدة تتخارج بيها من موضع الكسرة الثابتة ده يا استاذ جبرا
ودى اول مرة واخر مرة اقدم ليك فيها نصيحة قيمة زى كدة ، اغتمنها والا فلا تلومن الا نفسك .

مع تحيات جقلو


#516100 [ابن حلايب]
3.75/5 (6 صوت)

11-19-2012 01:22 PM
إذا توقف البشير عن النبيح ما معناه يتوقف عن هز الوسط .


#516076 [مدحت عروة]
3.13/5 (4 صوت)

11-19-2012 01:04 PM
الانقاذ هى مسرح اللامعقول واكبر حكومة بهلوانية وانتيكة فى العالم!!!وفاقوا العالم اجمع!!! انت نسيت يا جبرا انهم عملوا انجاز طيارة بدون طيار وطيارين بدون طيارات!!!! انت اخبار حركة اسود الثورة بالنص شنو وفهود الصافية شنو؟؟؟مش الحركات المسلحة كترت بعد ما انفصلت دارفور وجنوب كردفان والنيل الازرق وبقت دول مستقلة؟؟؟انت سنجة تابعة لجمهورية السودان الفضل ولا لجمهورية النيل الازرق؟؟؟؟


#516052 [السارق مالنا ودمنا]
3.57/5 (5 صوت)

11-19-2012 12:42 PM
اذا توقفت يا جبره عن الكتابة فده ما لأن الحكومة اعتقلتك ولكن أكيد براك ابيت الكتابه


#516024 [deing]
4.29/5 (6 صوت)

11-19-2012 12:23 PM
من هسع انا متبرع بي هدايا الاحتفال بالذكري السنوية للواو ....اصلي من صغير بحب حرف الواو ...وكمان معاها كاس لاحسن شهر في حرف الواو ..


#516016 [البروف]
3.25/5 (3 صوت)

11-19-2012 12:20 PM
سلام استاذ الفاتح يا تفتيحة
قال : •( إذا توقف سعر صرف الدولار عند الستة جنيهات وشوية (أكون طيرة ومباري السيرة) !)
يعني يا استاذ انت لسه ما طيرة ومباري السيرة , ما نحنا كلنا طير ومباريين السيرة ولينا
تلاتة وعشرين سنة ولسة ما وصلنا بيت العرس .
وشارع عبيد ختم حقو يسموه شارع ( فض الختم ) .


ردود على البروف
United States [هناي داك] 11-19-2012 11:03 PM
يا تو ختم يا شاب اللي منتظر فض في الشوارع دا ! بعدين أوعة تدس بس


#516011 [Mohd]
4.00/5 (4 صوت)

11-19-2012 12:16 PM
واذا توقف البشير عن الحنث باليمين والطلاق لما ابتلاه الله بورم في حنجرته

واذا توقف البشير عن الحنث باليمين بحماية حدود البلاد لما اصبح مهزلة في العالم

واذا توقف اغبياء الانقاذ عن التصريحات الغير مسئولة والغبية فأعلم انهم مزنوقين


#516000 [محموم جدا]
3.38/5 (5 صوت)

11-19-2012 12:05 PM
إذا توقف العمل بما يعرف بالصراف اللآلي يكون كويس .. (صراف واحد شغال وعشرين ما شغالين )
يا جبرا إنت من زمن الصراف الآلي يأخي إنت قديم قدم الترمس الصرافات في البيوت و أسأل الحرامية؟؟

• إذا توقفت مشاركاتنا الخارجية في كرة القدم ربما نحفظ ماء وجهنا بعد أن اصبحنا ملطشة بين الامم
يا جبرا نحنا ملطشة بس في الكورة و الله إنت متفائل جداً نحن و الحمد لله ملطشة في الهجرة (راجع صالات القادمين بالبحر في جدة من سواكن) راجع مطارات العالم وشوف الجواز السوداني نحن ملطشة للغاشي و الماشي و المولع نوره و الطافيه

• إذا توقفت تعيينات الخريجين على (الواسطة) و(حامل هذا الكارت يهمنى أمره) فأعلم أن أمر البلاد لا يهم أحداً
يا جبرا الوظائف دي حاجة قديمة الحكاية فيها شركات باسم الأخ و الزوجة و إبن الأخت و غيرهم ممن يهمك أمرهم بلا راتب و سكن و مواصلات إنت قايل الراتب دا بالدولار !!!

إذا توقفت (نقة) زوجتك فأعلم انها تعاني من إلتهاب في الحنجرة
يا جبرا دي بتقصد فيها سنو (شيني سين) عسان عندي وجع حلق و ماسي الشعودية!!!


#515991 [jarabandi]
3.69/5 (6 صوت)

11-19-2012 12:00 PM
يا دكتور : اذا صدقت أن الرئيس سوف يمارس فضيلة الصمت رغم عملية الحنجرة , الترابة في خشمك


#515982 [دوكة]
3.75/5 (4 صوت)

11-19-2012 11:56 AM
اذا توقف الفاتح جبرة عن كسرة خط هثرو ده معناهو القضية سوف تمشي كويس


#515981 [جمال]
4.35/5 (7 صوت)

11-19-2012 11:55 AM
إذا توقف الاستاذ الرائع جداً الفاتح جبرا عن الكتابة الصحفية فهذه خسارة كبيرة لنا وللصاحفة السودانية .


#515979 [NASRELDEEN ALI]
4.29/5 (6 صوت)

11-19-2012 11:54 AM
كنت أنوى أن أكتب :أنت مبدع وكفى
لكن لأن كل وقفة من هذه الوقفات توقف القلب فلابد من أن أدلى بدلوى فى بعضها(( وأحسب أن لى أجرا )):

• إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
• إذا توقف (الشيخ حبيساً) عن التعليق على الاحداث يكون كويس لأنو هو الزول الوحيد الفي العالم الما مفروض يفتح خشمو
• إذا توقف (الإمام) برضو يكون أحسن لأنو دخل موسوعة (جينيس) للزمن المخصص لمسك العصاية (من النص) !
• إذا لم يتوقف (أبوهاشم) عن الصمت يكون احسن عشان ما معقول الزول يكون ساكت خير .. شر
• إذا توقف المسئولون (قليلا) وتريثوا عن التصريح إبان الفواجع لما دخلت (ماكينات اللحام) القاموس السياسي .. (هم لاحقين شنو) ما يصبرو لحدت الحاجات تنكشف والناس تعرف الحاصل بالضبط


• إذا حصل ما ورد فى النقاط أعلاه فاعلم أن فى الدنيا ((( خير )))
OTHERWISE ابقى زول آخرة ساى


#515960 [ana]
3.38/5 (6 صوت)

11-19-2012 11:38 AM
اذا توقف الامين العام للحركة الاسلامية عن احتكار عمل الصرافات الالية تكون شركته فشلت


#515954 [جرقندي]
3.25/5 (3 صوت)

11-19-2012 11:33 AM
ياجبرا مالك علينا؟ نحن الفينا مكفينا... بالله عليك مذكرنا تصريح السواطير ليه ... خلاص شيل الفاتحة لروحي اللهم أرحمني وأغفر لي وأرحم جبرا إذا ما صار لما صرت‘ إليه آآآآآآآآمين إستوووووووووا يرحمني ويرحمكم الله.


#515948 [الزوُل الكَان سَمِحْ]
3.69/5 (6 صوت)

11-19-2012 11:29 AM
إذا توقفت مصادرة الصحف اليومية..معناهو العبيد روح!!!

إذا تمت إقالة وزير الدفاع..يكون البشير لقى سواق تانى!!!

إذا توقفت كتابات جبرا زى الفوق دى..يكون فى أزمة فى (....)


#515942 [awad]
3.38/5 (5 صوت)

11-19-2012 11:23 AM
أذا توقف البشير عن الكلام فأعرف أنه جاته داهية فى حنجرته.اذا توقفت ريالة اللمبى فأععرف أنه الطائرات الطافية نورها مابتجينا تانى. أذا توقف نائب الرئيس عن لملمة السواطير فأعلم أن الأسرائيليين المرة الجاية حيجونا أرضا.أذا توقف الكيزان عن لملمة الأرهابيين وأحضارهم للمؤتمرات فى ديارنا لتغير حالنامع الغرب.


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة