وتدحشت البصات
11-21-2012 12:13 AM

حاطب ليل -

وتدحشت البصات

د.عبد اللطيف البوني

قال احدهم بعفوية شديدة (ياخوانا حكومة الجن دي تبيع الخطوط الجوية وتفقد المطارات والطيارات وتقوم تجيب ليها باصات لموصلات العاصمة ؟) فرد عليه اخر (اريتا كان نجحت فيها ,, جابت بصات مضروبة وادتها ادارة ماسورة خربت المواصلات وقعدت) لااظن ان هناك رمية تصلح كمدخل لقضية المواصلات وازمتها المستفحلة هذه الايام في العاصمة اكثر من هذا الحوار
هذا السودان كانت به حركة نقل برية ومائية وجوية لاباس بها مهما كانت محدوديتها ففي النقل البري كانت سكك حديد السودان(ليها شنة ورنة) فالان تدمي قلوب من عاصر مجدها لقد ذهبت في خبر كان وبعدها لم يكسب قطاع النقل البري ولا الاقتصاد السوداني عافية ولم يبق الا اجترار عبارة لابديل للسكة حديد الا السكة حديد اما النقل النهري بشقيه البحري والنهري فقد لحق هو الاخر امات طه فالخطوط البحرية السودانية اصبحت افرغ من فؤاد ام موسى من السفن . النقل النهري اودت به الحرب الاهلية التي اصبحت الان حربا دولية اما النقل الجوي فلا نحتاج ان نكتب عما حل بسودانير التي كانت تسمى سفريات الشمس المشرقة فقد باعتها الحكومة بثمن بخس ثم اشترتها من من باعت له بثمن مرتفع مع انه باع خط هيثرو فاتضح انه فعلا (عارف) بالاكل فهو كالمنشار طالع ياكل نازل ياكل
كان الله رحيما بعباده في السودان رغم كل الدمار الذي تقدم فقد تقدم القطاع الخاص وسد ثغرة النقل بجدارة غير عادية فالعربات خمسة طن (اوستن وبدفورد ) ربطت كل اجزاء السودان ثم جاءت الشاحنات الكبيرة ففاضت عن حاجة السودان وكذا البصات الكبيرة التي تعمل بين العاصمة والاقاليم وبين الاقاليم ثم الحافلات (روزات وهايسات ثم امجادات) للعمل داخل المدن فهذه التشكيلة نجحت في تخطي وعورة الطرق لابل نجاحها الاكبر كان في عملها رغم يد الدولة الجبائية الثقيلة ,, جمارك عالية ,, رسوم ترخيص اعلى ,, وفوق ذلك صفافير طريق عشوائية وايصالات ملونة حتى المرور اصبح له ربط فالحكومة هنا لم تدس المحافير بل كسرتها على عينك ياتاجر وهي لاتدري انها بذلك قد حطمت قطاع النقل الذي هو شريان الحركة الاقتصادية
المواصلات في العاصمة كانت تمضي في امان الله رغم كل شئ فالحافلات لم تقصر نعم كان سيكون جميلا لو كانت مواعين النقل في العاصمة بصات كبيرة لتقليل الازدحام ولكن عوضا عن تشجيع القطاع الخاص لاستجلاب تلك البصات الكبيرة قامت ادارة العاصمة باعادة الروح لشركة مواصلات العاصمة واستجلبت بصات مضروبة واعطتها امتيازا في الطرقات فانسحبت الحافلات ثم (تدحشت) البصات فانفجرت الازمة وتكدس الناس في المواقف والطرقات . نسالكم بالله ماذا تقولون في هؤلاء العباقرة ؟؟؟ الشغلانة كانت ماشة في امان الله وانت تفرض في جباياتك المباشرة وغير المباشرة (على جالون البنزين) تقوم تجيب خاذوق يكلفك في اليوم الواحد عشرات الملايين وتخلق ازمة ؟؟؟ انها ازمة ادارة وازمة معرفة وازمة اخلاق قبل ان تكون ازمة مواصلات.

السوداني


تعليقات 8 | إهداء 0 | زيارات 1981

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#518060 [عمر عبد الرحمن]
0.00/5 (0 صوت)

11-21-2012 05:57 PM
انتو عارفين جالون البنزين في السعودية بكم؟ بريال و70 هللة لمن تضربها في 1.62 سعر صرف الريال يبقي سعر الجالون (2 جنيه و80 قرش سوداني) . اما جالون الجاز في السعودية بريال واحد يعني( جنيه و62 قرش سوداني)والكلام ده مش لانو السعودية غنية لكن لانهم عارفين اهمية الوقود في حياة الناي عشان كده بيدعموه.اما وهمنا ديل فما عاوزين الشعب يعيش مرتاح ابدا.تفووووووووووووووووووووو


#517985 [عبد الله]
0.00/5 (0 صوت)

11-21-2012 04:06 PM
بالله عليكم قولو لى من يوم ما حل علينا عام 1989 الاسود ماهو الشي الذى نجحت فيه هذه العصابه ؟


#517753 [ahmmed]
5.00/5 (1 صوت)

11-21-2012 11:38 AM
ياحليلي وياحليلي
مالقطر راح ياخليلي
كان بلد ماش بالعديلي
قطنو ابيض مالو مثيل
وكان قطارو الشايل التقيلي
الا صفر لمن جونا ليلي
التلبة العادمة الدليلي
بالجبايات انهد حيلي
وصرت قرعي ونزهي هميلي
ياحليلا ايامي الجميلي
من محطة وسندة فحليلي
قصرت السكة الطويلي
بالانس والناس النيلي
ويلي منن فجرة وذليلي
باعو قطري وجوي ونيلي
حرقو زرعي وضلي الضليلي
سرقو فرحي ومرحي وشليلي
ياشليل وين رح ياصغيري
طفشوك يازين يا عديلي
المدلقن ياهو العميلي
قالوا اهل الراي قبيلي
السرق من بيت رسولي
والاكل حق الجهيلي
اليتامي وعابري السبيلي
شرد الناس والقبيلي
وشوه الدين الجميلي
ياحليلي وياحليلي
القطر راح ياخليلي
والبلد واقف ممحن
في التلبات الهميلي
وياحليلو وياحليلي
بوني جيت بالراي العديلي
ضاعت الاخلاق ياحليلي


ردود على ahmmed
United States [ود الجد] 11-22-2012 12:21 PM
وصف ممتاز عافاك الله من كل سوء فأنتم والله مسرة لقلوبنا الحزينة بوركت اخي الغالي احمد

United States [مفوت] 11-21-2012 09:40 PM
أحمد................ أنت منو يا أخي ... أكيد ما زول هملان زينا ... أنت شاعر ...وما عادي !!!!!!أحبك


#517674 [مجاهد الكترونى]
0.00/5 (0 صوت)

11-21-2012 10:39 AM
الله يفتح عليك......... الموضوع فى كل البلد وليس فى المواصلات وحسب هو ازمة ادارة وأخلاق


#517631 [ود الحاج]
0.00/5 (0 صوت)

11-21-2012 10:04 AM
خسرنا المواصلات وكبسناك يابروف تضرب في الفيل لا ظله عودا حميدا مستطاب،،،،،،،،،،،،،،دا الشغل والله بلاش كتابة والكلمة امانة.


#517600 [Abu Areej]
0.00/5 (0 صوت)

11-21-2012 09:45 AM
المنفعة الشخصية طغت على العامة ولذلك كل يملآ جيبه ولا يهم خزنية الدولة .. بل ولا يهم الانسان السوداني المغلوب على امره ..


#517591 [هجايم]
0.00/5 (0 صوت)

11-21-2012 09:38 AM
تعرف المواطن بقى حريص لدرجة انو صاحب الحافلة بقى يبدلها بأمجاد وصاحب الامجاد قلصها لرقشة .. وكلو عشان الصرف .. الله يازى الأزانا .. يا ربى المقال دا يا دكتور هز الاوتار سامعين انو وزير النقل مشى بورتسودان .


#517379 [سند]
5.00/5 (2 صوت)

11-21-2012 01:14 AM
اخيراً يا دكتور ادركت انها ازمة ادارة و اخلاق .و انت سيد العارفين يا دكتور البلد دي امانة في رقابنا و قلمك هو سيفك فأجعلة بتاراً في وجة كل ظالم وفاسد و لا تهادن.


ردود على سند
United States [ابومى] 11-21-2012 09:23 PM
ازمـــــــــــة اخلاق

للاسف من تولوا امر البلاد همهم وسعيهم وراء المكسب المباشر لانفسهم ونحن نطبل لهم سير سير سير ,,,,,,, الى ان سار وثار ومازلنا فى نوم عميق
اللهم ارفع مغتك وعضبك عنا
ولا تواخذنا بما فعل الجبهجية منا


د.عبد اللطيف البوني
 د.عبد اللطيف البوني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة