المقالات
منوعات
مـرايا صِبانا تلبس توب مواجـعنا غُـنايً مُـر ...
مـرايا صِبانا تلبس توب مواجـعنا غُـنايً مُـر ...
11-21-2012 01:39 PM



مـرايا صِبانا تلبس توب مواجـعنا غُـنايً مُـر ...

عروة علي موسى
[email protected]


أشواقنا منك يا عصافير
للبوادي والجروف
لليالي العامرة بي نسمة المطر الملّون
بالفراشات والطيوف
غريب زيك
ترِك في الجوف
غنيواتنا
تعربد في المآقي أسى
تهد الروح
معاها نخاف
نروح ما نطوف
ظلال حلتنا
والمطرة الصباحية
تِقي البلدات
ملانة ضجيج
وصوت قمرينا كم ناجانا
في الفجرية عشان نشقى
مرايا صبانا تلبس توب مواجعنا
غنايً مُر
وآه يا كل قوافل الهم
شقينا معاك
كم غرَّبنا كم شرَّقنا
ولا هجدت مواجعنا
ولا نامت حقائبنا
على أمل القيام باكر
صباحاً ضاوي نحن صغار
نقالد فيو مدارسنا
غريبة حكاية الوطن
البحزَّم لي حقائبنا
وإشتتنا سحاباً في البلود محتار
بلوداً يمة كان شفتيها
ما بتعرف سحاب فجري
ولا قيمة بريق قبلي
ولا عينة طريف هطَّال
بتعرف كيف تشيلو الغيم
وكيف تَمْصُر سحاباتك
سحابك يمة أبقى عطيش
وآهـ يا ديار جزاها الشوق
جزاني هواك ...
وكت نشتاق
بتضوي الليل بروق الشوق
تزيل العتمة قدامك
بمشي معاك زمن ممحوق
اجري اسابق الأشواق
عشان القاك
سنين جايات
نسيبو الماضي
وعمر الشوق بكون ميلاد
وحس موعود
وطيف ممدود
نشيل أشواقنا في الإيدين
ونقدل فوق سمانا الزين
تَدْخُل فينا روح أبواتنا
في الزمن القبيل غناي
حنين الكاهلي لما إنم معاهو الشوق
بشوف الدنيا في الراحتين
نجيم ملهوف
اساسق بين تخاك وتخاي
( حليل عزي دار الكواهلة أم نوق
حليل ضامر الحشا منو الوداعة دفوق
حليل صيد الخلا والمطرة كاجة بروق
طرايك يا أم عهود إلا الظرف لايوق )
وآه يا ديار جزاها الشوق
جزاني هواك
وسكن جواي
ربيع أيامنا
نشتاقك
خفق طيفك ..
جزاه هواي ..
وآهـ يا ديار جزاها الشوق
جزاني هواك ..
عروة علي موسى ،،،




تعليقات 0 | إهداء 0 | زيارات 622

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عروة علي موسى
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة