مواطن 5 أمبير
11-24-2012 11:53 AM

مواطن 5 أمبير

الفاتح جبرا
[email protected]

لعلكم أعزائي القراء قد لاحظتم في السنوات الاخيرة إن شعبنا لم يعد ذلك الشعب الهمام الذي يعج نشاطاً وحيوية فترى الطلاب والعمال والموظفين يسيرون في الشوارع صباحاً نحو أعمالهم كما الاسود مقارنة بهم اليوم وقد أصبحوا (ضبلانين) و(حيلهم ميت) لا يقوون على بذل أي مجهود ، العبدلله عزي هذه الظاهرة الشاملة إلى عده عوامل منها تناول أفراد هذا الشعب (الفضل) للمواد منتهية الصلاحية كما وايضاً إستخدامه مكرهاً للمياه (ذات الطحالب) والخبز ذو (البروميد) ولحوم ذوات (الاضلاف) .
إلا ان العبدلله أكتشف مؤخراً السبب الرئيس لهذه الحالة الغريبة وهو أنو الشعب ما قاعد يمشي محلات (البنشر) عشان يشحن (روحو) الشئ الخلى (بطاريتو نازلة)
وعشان تعرفوا التفاصيل تعالوا نقرأ هذه الخبر الذي ورد مؤخراً بإحدي الصحف اليومية والذي جاء فيه :
افاد البروفيسور عمر محمد صالح اخصائي إنتاج الخضر والفاكهة بمركز بحوث الاغذية بشمبات بأن معظم ثلاجات الموز والبرتقال التجارية تستخدم حامض الكبرتيك الحارق " موية النار " لأنضاج الفواكه منذ أربعين عاماً دون ان تتحرك السلطات المختصة . وقال انهم يحصلون على موية النار من محلات بيع وشحن البطاريات نسبة لثمنها الزهيد ، مؤكداً ان حامض الكبرتيك يسبب الفشل الكلوي والسلطان وتليف الكبد ، مبيناً انهم ظلوا يتابعون هذا الامر منذ عام 1975م وانهم كانوا ينبهون الجهات المختصة دون فائدة ، واوضح ان اصحاب الثلاجات يضعون حامض الكبرتيك في درجة حرارة تصل الى 140 درجة فهرنهايت ، واشار الى انهم حصروا حوالي 30 ثلاجة في الخرطوم ويوجد العديد منها في امدرمان وبحري والمدن الاخرى .
إنتهي الخبر ... وأنا أقول لنفسي من زمااااان والشعب بطاريتو نازلة وما ماسكة (نار) أتاريهو علشان مش قاعد يشحنها؟ يعني القصة بقت واضحة .. الشعب زمان كان شغال (تش) بفعل (موية النار) التى كان يأكلها مع (الفواكه) التى كانت في متناول اليد ولكن بعد أن ساد الغلاء وإرتفع سعر الفواكه وبقية الضروريات وما عاد الشعب يتناولها فقد أصبحت (بطارية الشعب) ما بتمسك (كهرباء) و(مويتا ناقصة) على طول والمواطن بعد أن كان (50 أمبير) أصبح مواطن 5 أمبير .
بالله ده إسمو كلام؟ وفي ياتو دولة من دول العالم (الرابع عشر) ممكن يحصل الحاصل لينا ده؟ يعني أيه انحنا ناقصين (كهرباء) وللا ناقصين (أحماض) وللا ناقصين (كبريت) بعدين المواطن ده ما قاعد ياكل ليهو مية الف سنة قاعد )ياكل في خاطرو) كمان بقت فيها (موية نار) ... لا وايه شوف معاي إهتمام الدولة بصحة المواطن .. من سنة 1975 وناس مركز البحوث بيتابعوا في المسالة دي وبينبهوا المسئولين .. سبعة وتلاتين سنة والمسئولين ما قادرين يعملو حاجة والشعب بياكل (موية نار) .. والعنابر في المستشفيات بتستقبل في المرضى الذين تراكم عليهم (حامض الكبريتيك) وتعدت بطارياتهم حاجز الـ 12 فولت !!
ومع إنو كما جلء في الخبر أنه قد تم حصر ومعرفة الثلاجات التي تستخدم الفعل القاتل إلا أنه لم تتحرك جهة حتي الآن بتشميع هذه الثلاجات أو تقديم اصحابها إلى المحاكمة وعلى الشعب الفضل أن (ياكل نارو) وكده ...

كسرة :
أتاريهو معظم المواطنين أصبحوا ما يقوموا إلا (دفرة) !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ - قريباً الإحتفال بالذكرى السنوية- !!






تعليقات 20 | إهداء 1 | زيارات 6740

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#521594 [سعد]
0.00/5 (0 صوت)

11-26-2012 11:08 AM
العملوالدراسه هل لمدة 25 سنه مااكلو فواكه اذا اكلو بكونو كذابين واذا ما اكلو يكون السوال هل الانسان ممكن 25 سنه ماياكل فواكه ياربى بكون الكل شنو؟:اكيد اكل نننننننننننننننييييييييييييييم


#520984 [محموم جدا]
0.00/5 (0 صوت)

11-25-2012 01:59 PM
يا دوب يا جبرا أنا عرفت سبب ارتفاع اسعار الروائح السودانية أخواتنا و زوجاتنا تعبانات بلا فائدة يشيلوا و يخلطوا و ما جايب فايدة ( و الجماعة كلهم من طراز دلكتوا و أداني عنقرتوا)حقوا نعمل تنظيم جديد اسموا (حزب الكبريتيك الوطني) و يعمل حكومة ظل مهمتها تفشل كل انقلابات النسوان و تقلباتهم لأنه مافي فايدة الى أن يمرر دستورا دائم يسمح باستيراد القورو من نيجيريا و الجنزبيل من الهند و الكافيار من أيران و الفياغرا من تايلاندو يدعم البحث في شمبات لخلط هذه المكونات لتنتج لنا وجبة فيها سعرات حرارية تقلل من الكروش و الخلفيات و تعيد الزمن الفيه الرجال تكسر السرايييير يا جبرا إنت ما قنعته من خط هيثرو و لو تلحس كوعك ما في زول بهبه ليك يا اخي ألحق الآثار التركوها أجدادنا في الشمالية تحت الرمال الناس حفروها و سرقوها داير تجيب لي خط معلق في الهواء بين الخرطوم و هيثرو و تمشي و تجي بالسلامة


#520974 [النون الساكن]
5.00/5 (1 صوت)

11-25-2012 01:53 PM
غريبة يادوب عرفت ليه عربيتي كلما تشوف ليها موزة تدور مع انو من الصباح بتتعبني تعب شديد..اشكرك المشكلة اتحلت تقريبا..


#520853 [عبدالواحد المستغرب أيما إستغراب!!]
0.00/5 (0 صوت)

11-25-2012 11:35 AM
ياجبرا إنت كده وبصراحه لفت نظر النظام لشىء لم يخطر على باله وخاصة أن النظام كان يجفف المواطنين بأسلوب هيجة عليه العالم وأحرجته أمام المجتمع الدولى والمنظمات الحقوقيه!! وطبعا إنت عارف ان ألنظام كان بينتهج فى تنفيذ خطته القتل المباشر بواسطة الرصاص الزهيد الثمن وبدا بالجنوب ثم إتجه الى الغرب ثم الجنوب الشرقى يعنى الموضوع ماشى بالترتيب وبطريقه مدروسه!! وكما يولد الزمان القناة وبما أن الانسان فطر على المحافظه والظفر بحياته نزح عدد لا يستهان به الى ولاية الخرطوم بإعتبارها منطقه غير مستهدفه حتى الان وآمنه والنظام كان محتار يعمل للكائنات دى شنو؟!!وإنت كده اوجدت ليهم حل عبقرى وسحرى بمعنى أن النظام سوف يقوم بدعم الفواكه والخضروات وموية النار لتكون فى متناول اليد ويقبل المستهدفون على الفواكه والخضروات ويموتون (من سكات) كما يقتل الجواسيس (بسم السيرين) ومعلوم أن سم السيرين هو سم مازال لغزا محيرا يقتل ضحيته لدرجة أن الضحيه يندهش للطريقة التى مات بهاوهو فى قبره ولا يعلم من الذى قتله تحديدا!! المهم وبهذه الطريقه المبتكره يستطيع النظام التخلص من المواطنين (العوالق)الذين لا قيمة لهم بل هم (وجع رأس)وعبء زائد على النظام بطريقه لا تجلب له غضب المجتمع الدولى وحقوق الانسان ولسان حاله يقول للمجتمع الدولى والجمعيات الحقوقيه (الما بيعرفش يقول عدس!!).


#520806 [حسن]
0.00/5 (0 صوت)

11-25-2012 10:53 AM
قالو السودان اصبح زى جنينة الحيوانات
تقوم الصباح من النوم زى ابو القدح
تجرى لشغلك زى الكلب
تشتغل زى الحمار
ترجع البيت تنوم مع بقره


#520531 [غاندى]
0.00/5 (0 صوت)

11-24-2012 11:17 PM
يا ود جبرا ماتسال عن ملف خط هثرو أكيد أكلو الدودو ,


#520527 [رجاء]
0.00/5 (0 صوت)

11-24-2012 11:14 PM
يا استاذنا وانا اطالع الفقرة الاولى خطر ببالي موضوع مويه النار لتنجيض الفواكه و ابتسمت عند توافق الخواطر.

نتمني ان تثبت الدراسات عدم تاثر الفواكه من الداخل بحماية القشرة وتسرب و تركز حامض الكبريت فيها.

ويا وطني


#520488 [awad]
0.00/5 (0 صوت)

11-24-2012 10:05 PM
ماتنسى الدفرة دى عند بعض المتزوجين مابتنفع الا يغيروا ليه بواجى جديدة وكويل جديد ومع ده الله يستر. أما شباب اليوم فوعملوا ليهم مليون أشتراك لشحنهم يستحيل أن يفيدوا بشىء حتى لخروج الشارع لرفس زبالة الأنقاذ لن يستطيعوا طالما الولد من البنت مابتعرفوا وسيبهم للأغانى والرقيص المائع.


#520337 [البشير على نافع الجاز الفللى]
0.00/5 (0 صوت)

11-24-2012 05:21 PM
طيب المتهمين بالانقلاب ديل حاتكون بطاريتهم كم؟


ردود على البشير على نافع الجاز الفللى
United States [فرقتنا] 11-25-2012 04:30 AM
سالبة لانو فشل


#520330 [أبوأسامة المهاجر]
5.00/5 (4 صوت)

11-24-2012 05:08 PM
الآن عرفت السبب وراء نشاط الحاج ساطور وحماسه لإبادة اليهود بالسواطير فقد كان معارض ومالاقي حق الفطور (قوة 2 أمبير) وبعد أن اصبح نائب رئيس وأكل مالذ وطاب من الفواكه أصبح قوته 500 امبير والكهرباء الزائدة طارت ليه في رأسه.


#520288 [القرم تفاحة ابل]
5.00/5 (4 صوت)

11-24-2012 04:08 PM
عشان كدا بني كوز بمارسو الل.... عشان يوصلو لي بعض كهرباء


ردود على القرم تفاحة ابل
United States [القرم تفاحة ابل] 11-25-2012 03:29 PM
اخوتي اسال الله لي ولكم ان لا تاخذنا العزة بالاثم قوله تعالى : وإذا قيل له اتق الله أخذته العزة بالإثم فحسبه جهنم ولبئس المهاد

United States [muslim.ana] 11-25-2012 01:08 PM
كلنا قد نخطئ بتعليقاتنا يا أخي (القرم التفاحة) ولكن قليل منّا من لديه شجاعة قبول النصح مثلك!
بارك الله فيك.

United States [حسن] 11-25-2012 11:22 AM
هو عبد الرؤف ده بنى كوز يعنى طاهره فى جسد ماعارف شنو

United States [فرقتنا] 11-25-2012 04:34 AM
يا القرم تفاحة ابل انت كان لازم تجيب سيرة عبدالرؤوف ما قلنا ليك ما تخوض في اعراض الناس اها اليلة بتمشي وين بعد ما اتوعدك بالويل والثبور

United States [واحد تانى] 11-25-2012 03:22 AM
يا (القرم تفاحةابل )انت انسان ذو اخلاق حميدة ويظهر ذلك من ردك على الاستاذ عبد الرؤوف .

United States [القرم تفاحة ابل] 11-25-2012 12:22 AM
جزاك الله كل خير استاذ عبد الرؤوف نسال الله المغفرة

United States [عبدالرؤوف] 11-24-2012 04:58 PM
( ويل لكل همزة لمزة ) ... اتقى الله ياود اخوى فالموت اقرب للانسان من لمح البصر وجاء فى تفسير الثورى للأية أن اللمز باللسان والهمز بالعين . . أما الويل فلا يحتاج لكبير شرح فلو وعدك انسان بالويل لجعلك ترتجف فما بالك برب العباد دع عنك مالايفيدك فى شئ وقد يكون وبالا عليك وماغرضى الا النصح والاشفاق عليك والله المستعان .


#520274 [ود الجد]
0.00/5 (0 صوت)

11-24-2012 03:31 PM
الله يجازي محنك يا استاذ جبرة


#520189 [الحهج عبدالله]
0.00/5 (0 صوت)

11-24-2012 01:40 PM
الانسان يعني بقي (الي) والسيارة الاتماتيك ما بتقوم دفرة


#520188 [mohamed omar]
0.00/5 (0 صوت)

11-24-2012 01:36 PM
والله يا اخ جبره دفره زاتو ما قاعدين نقوم شئ دخن وشئ كوارع وشئ ...... وطبعا الفياجرا شعرا ماعندنا ليهو رقبه اسعار فوق وخليها مستوره من شاكلة فقه الستره وكده


#520164 [تختخ]
5.00/5 (1 صوت)

11-24-2012 01:06 PM
ياود جبرا علي الطلاق بت كامل ختت ليك (واحدة)مع سجاراتك .الله يجازي محنك ومحنا.


#520144 [خالد فارس]
4.63/5 (5 صوت)

11-24-2012 12:38 PM
يعني كلمة (اكل نارك )ما قيلت من فراغ بعض الناس عارفه لكن مطنشة عشان كدة السرطانات اتفشت والفشل الكلوي لحق الناس امات طه ( يعني بعد شوية اي واحد يكون شايل سلك اشتراك ويقول ليك ممكن تشحني شوية لانو كهربتي نزلت عشان امس مااكلت موز وبرتقال)الله يهديهم اهل الثلاجات قرضو الناس قرض


#520140 [أم برمبيطا]
3.00/5 (1 صوت)

11-24-2012 12:32 PM
( كسرة :
أتاريهو معظم المواطنين أصبحوا ما يقوموا إلا (دفرة) !!)
دي زادت فيها المحلبية يا جبرا . ربنا يعين المواطن الفضل من السحت وأكل مال الحرام بشتى أنواعه وأضف للطامه الكبرى ضعف الإيمان ، حسبنا الله ونعم الوكيل .


#520137 [دفار]
0.00/5 (0 صوت)

11-24-2012 12:28 PM
يااااااااااااااااااااااااااااااااااااااااااااااه
الان فهمت سوق المنشطات الجنسية ازدهر ليه


#520132 [watangalee]
5.00/5 (1 صوت)

11-24-2012 12:25 PM
يأخي كتلتنا بالضحك كتلة طيب الله خاطرك بس اوع يكون قاعد تاكل فيه إن الشعب عند هؤلاء الكيزان الفاسدين يساوي صفرا كان الله في عون الناس ياكلون الكبريت ويشربون الديدان والفراخ التي تصبح دجاج في 15 يوم والاسمدة والمبيدات الفاسدة في المشاريع الزراعية الا يعمل هؤلاء انه من قتل نفسا فكانما قتل الناس جميعا


#520118 [الزوُل الكَان سَمِحْ]
4.00/5 (2 صوت)

11-24-2012 12:04 PM
يا استاذ

والله الدفرة ذاتا بقت مابتقومم..لأنه البدفروهم ذاتهم عايزين دفرة..

وتقول لى حاج ساطور..ما يقوم ستارتر


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة