زرزرة الوزير فوق كم؟
11-25-2012 01:08 PM


في ما أرى
زرزرة الوزير فوق كم؟

عادل الباز:

لو كنت مكان صديقي الأستاذ علي محمود وزير المالية لتقدمت باستقالتي اللحطة..،كنت ساترك مقعدي خاليا للعباقرة الذين يفتون ليل نهار فى الاقتصاد ويتدخلون فيما لايفهمون ليفعلوا مايشاءون..،ظل علي محمود على الدوام فى مرمى سهام المتطرفين من جانب و العنصريين من جانب آخر وبعض أخر من السياسيين وأعضاء البرلمان الذين لايعرفون الفرق بين الكتلة النقدية والكتل البرلمانية !! .صبر محمود على بلاويهم سنينا فعصفت به الأوجاع حتى أصبح طريح المستشفيات بشكل دائم.، ماذنب علي محمود والقاصى والداني يعلم أن أزمة البلاد سياسية تهم القصر الجمهورى الذي يقبع فى الجانب الشرقى من وزارة المالية.
من أين للوزير المال لينفقه على ثلاث جبهات تشتعل فيها الحروب؟.تقضي ميزانية الامن والدفاع على 70 % من الموازنة العامة ، وتقول كل عام هل من مزيد؟.من أين لوزير المالية الأموال التى يصرفها على خمس سلع أساسية تستوردها البلاد وتحتاج لمئات الملايين من الدولارات فى ظل اقتصاد يعتمد بنسبة 60 % على عائدات عشوائية من الذهب.
الاتفاق مع الجنوب الذى كان منتظرًا أن يضخ ملايين الدولارات وصل الى أفق مسدود فمن أين لعلي محمود المال لتمويل الزراعة والصحة والتعليم؟.كان على السياسيين وهم يعجزون عن حل المشاكل السياسية أن يكفوا عن نقد تدهور الاقتصاد الذى تدهور بفعل تقديراتهم وليس بسبب عجز المالية،كان عليهم أن يجدوا مخرجا لأزمة الاقتصاد عبر السياسة ولكن للأسف يلقون على عاتق الاقتصاد تدهور الأوضاع السياسية!!.
أغلقت صناديق التمويل العالمية أبوابها وازدادت الاوضاع سوءا بتدهور العلاقات مع ما تبقى من صناديق تمويل عربية ، فمن أين لوزير المالية الاموال لينفقها على مشروعات التنمية؟.، أدى ذلك لتردي اوضاع المواطنين المعيشية فتصاعدت الضغوط داخليا بما لايسمح باضافة اى اعباء ضريبية او زيادات فى السلع الاساسية كما شهدنا فى السكر، فللأزمة بعد سياسى، فالخوف من أن تؤدى زيادات السكر للعصف بالنظام فى ظل أوضاع متأزمة جعل الحكومة تتراجع ودفع الثمن وزير المالية...فمن أين لعلي محمود الأموال التى تسد عجز الموازنة؟.
فى ظل خزينة فارغة تتصاعد المطالب النقابية ويشن اتحاد العمال حملة على الوزير، كأن للوزير أموالا مكدسة لايحب أن ينفقها على الشعب فى الوقت الذى أعلن فيه وزير المالية بشفافية ان الحكومة «مفلسة».فبدلا من ان يطالب اتحاد العمال اصلاح سياسات النظام يتظاهر ضد الوزير ليرضي عضويته!!.
لابد أن السيد وزير المالية يغنى أنا استاهل.... لو كنت مكانه لوضعت استقالتى على بوابة القصر ونفدت بجلدي،أعرف ان علي محمود لايطلب مجداً ولا مالا فلماذا يعرض نفسه لكل تلك الضغوط... لماذا لايتركها للعباقرة لنرى كيف سيديرون أوضاعاً اقتصادية خربة.
علي، أيها الصديق، نصيحة لوجه الله ..أستقيل الآن واتركها لهم يعبثون بها كما يحلو لهم،أقول قولى هذا وأنا أعلم انني لن أحظى بوزير مالية صديق بقية عمري....أتروننى مجنوناً أدعو صديقاً بيديه خزائن البلد ليستقيل...لست مجنونا ولكنى أعلم أن الخزائن الفارغة لاتسمن ولاتغنى من جوع.
حكى قريب لى صديق للشريف الهندى فقال.. حين عين الشريف الهندى وزيرا للزراعة فى ستينيات القرن الماضى ذهبنا اليه غاضبين ولما سألنا عن سر غضبنا قلنا له « ياخي زراعة شنو وكلام فارغ شنو ما كان يدوك وزارة المالية أحسن لينا». فنظر إلينا ضاحكا وقائلا« آه يامستهبلين يعنى ما دايرين تتعبوا لاعاوزين أراضي ولامزارع تزرعوها بس عاوزنى أخم من الخزنة وأديكم كاش طواالى».،أما نحن أصدقاء علي محمود فما عايزين حاجة بس يطلع من مصيبة الوزارة دى سليما معافى بدل كل يوم سكري وضغط وساهرون ويستبشرون... إضافة لسيل شتائم لايتوقف... فوق كم؟.. ملعون أبو الوزارة الوراها كل يوم زرزره.

الصحافة


تعليقات 20 | إهداء 0 | زيارات 3456

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#522700 [الزوُل الكَان سَمِحْ]
0.00/5 (0 صوت)

11-27-2012 01:13 PM
هييييي...زرزرة..عواسة الكسرة..والدردرة..على محمود ما بقدرا


#521998 [أبوأسامة المهاجر]
0.00/5 (0 صوت)

11-26-2012 05:27 PM
صاحبك دا براجع ساهرون ويستبشرون مش مستشفى أم درمان والخرطوم بسبب عواسة الكسرة لأنوا طالب الشعب السوداني بترك الرغيف والتوجه للعواسة فوراً ومن بعدها المدام ماريحتوا كل يوم تخمر ليه العجين وتقول ليه عوس عشان تكون قدوة حسنة.


#521726 [zayed]
0.00/5 (0 صوت)

11-26-2012 01:34 PM
يا بطانة السوء

الم تسمع بوزراء اليابان عندما تفشل سياياتهم ينتحرون

وزيرك البتتكلم عليهو ده ما كان ينتحر ويريحنا اصلو داخل النار حدف - استغفر الله تركبونا زنوب ساي
هو الشبهك ديل الخلوهو يفتكر انو مافي زول بيفهم غيرو - انت في كلامك قلته انو في كتير من الساسة بيتدخلو في شغلو وهم ما فاهمين حاجة ايه رايك انو زولك ده ما بيفهم اكتر منهم الا انو مدنو مكنة وزير
وهو لو ما ماسك في الكرسي ده شديد ومكنكش فيهو كنكشة الظالم بالحياه ساعة الموت
يا وهم خاف الله في البشر ديل


#521371 [الكابتن تنقو]
0.00/5 (0 صوت)

11-26-2012 05:14 AM
زرزره لانه حرامى أى حرامى مثله ومثلك وأى كوز زول سفر ولده امريكا ليعالج سوء السمع زول عنده عدة عمارات وبنايات ياخ عشان مانشتم امك وابوك ودينك اكتب كلام منطق او روح لعصام الترابى يديك حق القفه والمصاريف وعليك الله الوزير ده دفع اتعابك باى عملة حرة


#521347 [Kamil]
0.00/5 (0 صوت)

11-26-2012 02:56 AM
انت يا منافق نسيت فضيحة العقد الملياري الاعترف بيها هو نفسه
كان اولي تنصحو يتوب..معقولة بس بدل لبس 100 مليون
ياخ اتقي الله..انت يا الباز ناسي انو في يوم القيامة وربنا حيسالك
عن البتكتبو دا


#521199 [صادميم]
4.00/5 (2 صوت)

11-25-2012 08:05 PM
على الاقل كان يمكن ان يوفر الخمسة و ثلاثين الف دولار الانفقهم في علاج اذن ابنه هذا المبلغ كان يكفي لشراء ادوية لعلاج ثلاثة الف مواطن غير مستطيع على الاقل


#521177 [كمال الهدي]
5.00/5 (4 صوت)

11-25-2012 07:12 PM
الوزير البتتكلم عنه ده يا أستاذ عادل هو نفس الوزير الذي تكلم عبر قنواتنا الفضائية أكثر من مرة قبل الانفصال وقال أن الناس متخوفة من انفصال الجنوب ليه أنا ما عارف؟ انا لا عندي في الجنوب الزراعة ولا عندي الصناعة ولا عندي ولا عندي.. يا هو البترول ده وأنا حاسب حساباتي وعارف كيف أعوض الفجوة الناجمة عنه؟! يا هو ده الوزير ولا واحد تاني بالله؟! وبعدين شنو يعني القصر والحكومة مش هو جزء من هذا الفساد القائم، بل هو أحد أهم أعمدته؟ تعاملنا وكأننا شفع نفترض أن وزير المالية ده زول كده بمسكوه خزنة الخشب ديك وبعد داك يقولوا ليه اصرف هنا.. لا ما تصرف هناك..


#521174 [فاطمة محمد أحمد على الفاضل]
5.00/5 (2 صوت)

11-25-2012 07:06 PM
يا ســيدي هذا اسمه فقة المرحلة ، طوال عمر الانقاذ الطويل هل اعطيت وزارة المالية لاحد من الهامش ،طبعا لا ، اعطيت له بعد ان تاكد للابالسةان جزءا معتبرا من الايرادات سوف يذهب مع الجنوب ، لذلك اكرموا اهـل الهامش بهذه الوزارة ، وسوف تعود الى اهليها ( دناقلة ، شايقية ، جعليين ) بعد ان تزول الاسباب. وتابع كلامي هذا اذا مد الله في عمرك / عمرهم.


ردود على فاطمة محمد أحمد على الفاضل
United States [سوداني زهج] 11-26-2012 02:40 AM
الدنا قله سابو السودان وهاجرن من السبعينات يا أخت فاطمه ما تفشي غبينتك فينا نحن بعيدين وفي السودان في اقصي الشمال والباقي في الخارج دناقله قالت والله ما بتعرفي السرقو البلد مين للمعلومه أدى ذول رطاني ما بسرق


#521141 [abusabeeb]
5.00/5 (4 صوت)

11-25-2012 06:16 PM
انت ماعارف انو العمارة الجديدة ماخلصت وتقول لصاحبك استقيل عجييييييييب!!!!!!!!!!!!!


ردود على abusabeeb
United States [بس جيت أعاين] 11-25-2012 09:31 PM
تقول شنو بس يا أبوسبيب ! يستاهل الوزير عشان تاني يباري أصدقاء السوْ الما بيعرفوا ينصحوا !إستغفرتك يا مالك روحي..


#521088 [Muslim]
5.00/5 (1 صوت)

11-25-2012 04:49 PM
يا عادل
والله حيرتنا
كل يوم لك رأي مختلف
اليوم تدافع عن علي محمود
أنت راكب الليلة من وين
الرجل عاجز ولا يوجد لديه قدرات عقلية ولا أكاديمية
وفوق كل شيئ كضاب وما فاضي من نسوانه الثلاثة
علي العموم هو أشجع منك لأنه سعي ليهو نسوان
وأنت سعيت الصحافة
هو ينتج الأطفال وأنت تنتج الكذب
يا أخي خليك علي صفحة واحدة وما تتقلب كتير
الذين يكتبون ويهاجمون علي يعرفون الحقيقة وأنت راكب مسطح ساكت
أعادك الله إلي رشدي
وكفاية نفاق
ما في قروش في الخزنة يدوك ياها


ردود على Muslim
United States [سنهوري] 11-26-2012 12:55 PM
ياحاج هذه هي الصحافة عندما تكون لديك مصلحة ما, مع مسئول, تلمعه اولا بعد داك تقدم ليه ورقك
العالم الله في الغرض اللي اتكتب فيه المقال,,بس اقول للباز بي مقالك هذالاتستطيع ان تقنع الناس ان اللوبيا عفن هي فستق ولوز,,ياخ الوزير دا ذات نفسه عارف انه علي غير هدي


#521082 [بس جيت أعاين]
0.00/5 (0 صوت)

11-25-2012 04:36 PM
سبحان الله ! ما دام صاحبك الوزير " لا يطلب مجدآ ولا مالآ " إتعين كيف من الأساس ؟ لأنه دة الشرط الرئيسي للمناصب القيادية في حكومة الحرامية..معنى كدةإتعين غلط وبالتالي حيقيلوه من منصبه وما حيحتاج يستقيل..بس جهز ليه خروف الكرامة...محَن !


#521076 [النجمي]
5.00/5 (1 صوت)

11-25-2012 04:14 PM
مقال يدعو للخجل يا استاذ الباز فانت اكبر قامة من ذلك ... سيكون اضافة لك في حياتك تخجل منه بقية ايامك ... ان القرين للمقارن ينسب


#521068 [توفيق الصديق عمر]
2.00/5 (1 صوت)

11-25-2012 04:05 PM
طيب انت بدل ما تقترح عليهو الاستقالة
واذا هو حسب كلامك حايجيب القروش من وين
طيب ما هو الذي يكافح هذا الوزير من اجله ويصبح طريح المستشفيات
وهي يعلم انه يلهث من خلف سراب سراب سراب وهو يحسب ماءا قراح يسد به رمق البلد
بدل الماء الاسن الذي تسبب في تفشي امراض الفشل الكلوي في عموم البلاد؟المقعدوا شنو؟
اذا لم يكن عارفلو كتف يؤكل؟
نرجو له الشفاء العاجل وان يلحق نفسو
وله في السيد الرئيس وما اصابه ( ايضا نرجو له الشفاء) المثل الاعلي


#521053 [ود الراوي]
5.00/5 (3 صوت)

11-25-2012 03:46 PM
عدم الموضوع مشكلة.... (يعني اللي ما عندو موضوع يكسر تلج !!!) .... يا اخي يعني لازم تكتب؟


#521020 [حسين]
5.00/5 (2 صوت)

11-25-2012 03:11 PM
بالغت ايها الصحفى !!!!!! بى كم ؟


#521011 [ود صالح]
5.00/5 (5 صوت)

11-25-2012 02:41 PM
شهادتك فمجروحة لأنه صديقك كما ذكرت.

السيّد الوزير "سيد الحيشان التلاتة" قد داوي طبلة أذن ولده في أمريكا وعلى حساب الشعب السوداني وبما لا تسمح به القوانين المالية والتي هو مسؤول عنها. وإلى الآن لم نسمع عنه أنه قام بردّ المال لخزينة الدولة ولم يعتر عن ذلك للشعب السوداني الفضل.

واضح أن فهمنا ل"أنصر أخاك ظالما أو مظلوما" فيه غبش. الدفاع عن الصديق بالحق فقط وليس بالحق والباطل.


#520982 [مهاجر]
5.00/5 (1 صوت)

11-25-2012 01:59 PM
اها ان شاء الله بعد ده يلزقك بى حاجه بعد كسير التلج ده


#520973 [المغترب القديم]
0.00/5 (0 صوت)

11-25-2012 01:53 PM
تكسير ثلج


#520953 [أبو ناهد]
0.00/5 (0 صوت)

11-25-2012 01:33 PM
فالخوف من أن تؤدى زيادات السكر للعصف بالنظام:

أنت من عرابي نظام عصابة الدمار الشامل الفاسقة، سوف ترى يوم لا ينفع مالا ولابنون ما تستحقه من غضب الجبار في مناصرتك لهذه الضغمة الحاكمة بأمر البطش والطلم والقهر وقوة السلاح والتجسس والخساسة وتخطيط العصابات بعيدا عن تخطيط الدولة التي تحترم شعبها ورعاياها.

كيف يثاورك الخوف من إزالة هذا النظام الذي أصبح كل السودايين الشرفاء يتمنون زواله في الحال؟؟؟؟

قاتل الله عصابة الكيزان وكل من ساعدهم على إشاعة الطلم والفساد، بجهده أو بفكره أو بقلمه.


ردود على أبو ناهد
United States [إبن أبا] 11-25-2012 05:59 PM
يا أبو ناهد والله ظلمت الكاتب. يظهر إنك لم تفهم ما يعنى. فهو لم يخش أن تؤدى زيادات السكر للعصف بالنظام, إنما النظام هو الذى بخاف من ذلك. أعد قراءة المقال.


#520938 [العامري ابو ليلي]
0.00/5 (0 صوت)

11-25-2012 01:18 PM
كسير تلج تقيل


عادل الباز
عادل الباز

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة