حاجات تغيظ
11-26-2012 01:33 PM

حاجات تغيظ

الفاتح جبرا
elfatih.gabra@gmail.com

- عندما يتحدث أحد المسئولين عن الإسلام و الله قال والرسول قال وهو يمتلك فيلتين تلاتة في ارقي أحياء العاصمة وعدداً من (العربات والزوجات) الفارهات مع إنو قبل كم سنه كان ساكن إيجار
- عندما تقرأ بأن مال (التجنيب) الذي خارج (المراجعة) يبلغ مئات المليارات و(عااااااادي) !!
- عندما يتغيب الموظف أكثر من ساعة زمن بينما المواطنون يجلسون في إنتظاره ثم يجيب على تساؤل أحدهم (ياخي إنتا كنتا وين؟) بأنو كان قاعد يصلي الضهر .. (يا خي ما قلنا ليك ما تصلي لكن سااااعة)
- عندما تشاهد ذلك الإعلان .... (صعايدة يروجون لخدمة سودانية) !
- عندما تستمع إلى مذيع وهو يخاطب ضيفه بدكتور فلان وهم يعلم تمام العلم بأنه يحمل دكتوراة فخرية
- عندما يتم إيقاف إقامة حفلات التخريج (خارج الجامعات) بينما لا يتم إيقاف تعاطي المخدرات (داخل الجامعات)
- عندما يتم إفتتاح أكبر مصنع للسكر في أفريقيا (كما يقولون) وبعد شويه يقوموا يزيدو سعرو
- عندما تشاهد رجل مرور وهو (سايق ليهو) موتر بلا (لوحات)
- تشاهد رسماً كاريكاتورياً وقد أشار فيه الرسام بسهم إلى رجل مريض ويكتب (الحركة الشعبية) ثم (سهم) يشير إلى (مسدس) ويكتب (إتفاقية نيفاشا) ثم (سهم) يشير إلى (قنبلة) ويكتب (قطاع الشمال) ثم (سهم) يشير إلى (خرطوش النفط) ويكتب مش عارف أيه ... ياخى طيب ما تكتبو مقال الله يهدينا ويهديك
- عندما يتشنج مشجعو الكرة لدينا ويثورون ويتظاهرون بينما يتفاعلون ببرود شديد تجاه الإرتفاع (اليومياتي) لأسعار الضروريات
- عندما تتلعثم المذيعة في نطق إسم الضيف الذي تستضيفه
- عندما تجد (منقبة) وهي تشير إلى (سائقي الملاكي) ليقفوا لها (فضل ظهر وكده) !
- عندما يقوم المصور باخذ صورة من الخلف لضيف البرنامج مظهراً صلعته كاملة الدسم (هسه ده لزومو شنو ؟ بالمناسبة بتحصل ليا طوااالي)
- عندما يعظك الطبيب عن مضار التدخين وهو يضع علبة السجائر في جيبه الأمامي .
- عندما يتحدث (مسئول) عن (تداول السلطة) وهو قاعد في كرسيهو ليهو ستين حول
- عندما يكون هم الناس هو تشجيع (الكورة) وليس سعر (البندورة)
- عندما ترى شخص يرتدي (قوق الخمسين) قميص (مشجر) ... طبعاً غير (الصبغة) !
- عندما تري شخص يمتطي برادو 2012 وهو يرمي (الفاضي) في قارعة الطريق !
- عندما يكون ثلاثة أرباع الصفحة الأولى لصحيفة (إعلان) .
- عندما تستمع إلي صوت مطربة تتحدث عن التربية والاخلاق والالتزام وهي أمبارح (جاية من نيجيريا)
-
- كسرة:
- عندما تسمى الاشياء بغير اسمائها .. محاولة (إنقلايبة) يقولوا ليك (تخريبية)



كسرة ثابتة :
أخبار ملف خط هيثرو العند النائب العان شنو(ووو ووووو ووو)؟ - قريباً الإحتفال بالذكرى السنوية -




تعليقات 25 | إهداء 0 | زيارات 7871

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#523197 [ahmed]
0.00/5 (0 صوت)

11-28-2012 03:52 AM
بدون تعليق


#523166 [الزين الطيب الصادق خير سيدو]
0.00/5 (0 صوت)

11-28-2012 01:14 AM
يا اخي ما تتحدث لينا عن المشير عمر البشير معقول ما عندك حاجة كدة ولا كدة عن المشير و الصحابية وداد و الخال الرئاسي و حوش بانقا نسخة كافوري لانو حاجة تقلق واحد عامل ساخر و يسخر و يسخط و ما يهبش السبب...حاجة عجيبة ولا خائف من خروف الضحية صبيحة العيد و هو مربوط و منتظر


#522796 [BAHAR ABU ALKUL]
0.00/5 (0 صوت)

11-27-2012 03:02 PM
عندما يتأثر المعلقين بطريقة حديث المصريين.


#522446 [Mohd]
0.00/5 (0 صوت)

11-27-2012 08:26 AM
عندما تشاهد ذلك الإعلان .... (صعايدة يروجون لخدمة سودانية) !



بالجد دي فاقعة مرارتي والزول العملها دا وفكر فيها واحد رخيص حقير واهبل وعبيط

وحمار كمان


#522378 [سند]
5.00/5 (1 صوت)

11-27-2012 04:28 AM
حاجة تغيظ لما تقرأوا كل هذه الغرايب والمصايب و تعلقوا بنفس قاتحة . انتو ما بتزهجوا .


#522204 [awad]
0.00/5 (0 صوت)

11-26-2012 09:49 PM
عندما وعندما وعندما وكل العندما تلك وغيرها سيئة الذكر ياجبرة سببها أبليس الأنقاذ(الترابى) الذى أتى لنا بسئى الذكر الذين لم يلدهم السودان أبدا, ولذلك ظهرت لنا كل العندمات هذه والسبب الاخر هو عندما جبن الشعب من عام 89م ولم يتصدى لبنو قريظة أتعلموا فينا ركوب الفذرة فأصبحنا لا نهش ولا ننش فتضمت وتحوصلت كل العندما.


#522203 [nader]
5.00/5 (1 صوت)

11-26-2012 09:48 PM
اه ه يا ولاد النيل الحاج ابوساطور ال ايه ال تخريبيه عجبى ،،،،، بعدين مالهم الصعايده مش احسن من زولك الراكب ليه دفار طائر


#522165 [بت الخرطوم]
3.50/5 (2 صوت)

11-26-2012 08:43 PM
لما جبرا يعمل نائم وما يتكلم عن المحاولة التضليلية اسفة التخريبية


ردود على بت الخرطوم
United States [عدلان يوسف] 11-27-2012 12:09 AM
يابت الخرطوم إنتي بتقري سطر وتفطي سطر ولا شنو ؟؟!! كيف يابت أمي ما تحدث عن تمثيلية

المحاولة الانقلابية .. ماقال بصريح العبارة :" عندما تسمى الاشياء بغير اسمائها .. محاولة

(انقلابية ) يقولوا ليك (تخريبية)" .. وده كلام غريق لو فهموه الجماعة إياهم !!!

بالمناسبة ـ للقراء المتسرعين ـ جبرا انتقد 19 من أسوأ ما أفرزته الإنقاذ : النفاق السياسي

، التدين الكاذب ، سيطرة أصحاب الولاء على أجهزة الإعلام الضعفاء حتى في لغتهم الركيكة ..،

انصرافية الشعب السوداني ولامبالاته وصهينته ، التغلغل المصري في السودان حتى في الإعلان لشركة

اتصالات سودانية ، الكذب السياسي في مسألة تداول السلطة، خراب الخدمة العامة على أيدي صبية

الجبهة ... وهلم جرا ..

يعني في كلام كتير بين السطور حتى ترى السطور النور ...اتمهلي وروقي يابت

الخرطوم !


#522063 [عدلان يوسف]
4.50/5 (2 صوت)

11-26-2012 07:00 PM
تعرف أكتر حاجة تغيظ شنو يا جبرا أخوي :

عندما الشعب السوداني يرى الظلم ويسكت عليه ...

وعندما يسمع كل هذا الكلام ويصهين ويصهين حتى يصير صهيونيا ....


وعندما يطلع الشباب في المظاهرات الأخيرة .. والشعب السوداني يتفرج عليهم ويعلق !! أي والله !


وعندما تخرج كل الشعوب العربية حتى أطفالها وشيوخهاضد أنظمة القهر والتسلط ... ويظل الشعب

السوداني في غيبوية عميقة !


وعندما يفشل ألف مقال في الراكوبة .. وعشرة آلاف حالة تعذيب .. في إخراج الشعب عن صمته !

وعندما يقول الصادق المهدي بصريح العبارة " مافي مظاهرات تطلع من هنا " وبعد أشهر يظل يردد

في " سنتحرك لو ما استجاب النظام " ...

وعندما يسكت علماء السوء عن عمايل النظام .. ويلمعون جزمته صباح مساء ..

وعندما ترتكب المجازر في دارفور .. ولا تخرج حينها مظاهرة واحدة في الخرطوم تندد بمايحصل !

وعندنا يكون على رأس نظام : رقاص ، وأهطل ، وأبو العفين ، ودجال ، وكبشة من علماء السوء ..

وعندما يخرج من السودان 6 ملايين ... والبقية في الطريق ....

يا أخوي الفاتح جبرة .. المابغيظ شنو كان ناس النظام بقرو مثل هذا الكلام ... وينومو نوم

العوافي ... لأنو عارفين أنهم وصلوا إلى "نواة " الإنسان السوداني وغيروها .. فأصبح يسردب لهم

ظهره .. ويسردب ... ويسردب حتى صار سردابا !


ردود على عدلان يوسف
United States [كوع ما عندي موضوع] 11-26-2012 11:58 PM
والله يا عدلان جبت كل الغيظات ما خليت غيظه واحده والله نحن من الغيظ فرنا وهبطنا ياااااااااااااااااااااخي الشعب ده لو رفعوه بحملات بقع


#522031 [عبدالواحد المستغرب أيما إستغراب!!]
0.00/5 (0 صوت)

11-26-2012 06:10 PM
عندما يترك الفاتح جبرا الاشياء الملحه ويحدثنا عن الصلع وقتاتة المصورين !!
عندما نقراء يوميا موقع الراكوبه ونجد بعض كتابها مهمومون بالكره التى صارة (كتربلاص ساكت!!)
عندما نجارى النظام فى كذبه ونصدق المحاوله التخريبيه التى زعموها!!
عندما لا نجد كاتب عليه العين قاعد فى القاهره بحكم إنه معارض ولا يتواصل مع أجهزة الاعلام المستقله هناك وينقل لهم تجربة النظام (الانقاذيه) وإنها مطابقه لما يجرى هناك الان!!
عندما لانجد من يفهم النخبه المصريه أن قرارات مرسى الاخيره ستقود أحزاب المعارضه هناك لكى تكون أحزاب (توالى)بإمتياز!!وخاصة ان المصريين ما (ناقشين) الحصل لينا هنا من قبل عشرين سنه!!
عندما لا نجد من يفهم المصريين إنهم إذا ما خضعوا لجماعة الاخوان المسلمين (سيلفلفوهم كعب داير) وأن لابد لهم من مكافحة هذه الجماعه وهم ما زالوا فى طور الشرنقه!!).


ردود على عبدالواحد المستغرب أيما إستغراب!!
United States [عدلان يوسف] 11-26-2012 06:38 PM
يا عبد الواحد حرام عليك في الأولى بتاعة "عندما يترك الفاتح جبرا الاشياء الملحه ويحدثنا عن

الصلع وقتاتة المصورين !!... يا اخي الفاتح جبرا عمروا ما كتب إلا في الأشياء الملحة ..

وقلمه وحده يساوي مظاهرة كاملة ضد النظام ..لكن لازم يتكلم عن "قتاتة المصورين عشان جماعة

عطا ما يوقفوه .. وعشان لازم ينتقداجتماعيا برضو .. لأن عللنا اجتماعية مثلما هي سياسية ..


افهموها بقة !!!!!!!!!!!!!!


#522023 [سانبو]
0.00/5 (0 صوت)

11-26-2012 06:01 PM
بكره احلى انشاء الله


#522021 [الهادي]
5.00/5 (4 صوت)

11-26-2012 06:01 PM
حولية ملف خط هيثرو فتة ولا قراصة ؟؟؟؟


#522003 [الزُول الكَانْ سَمِحْ]
5.00/5 (1 صوت)

11-26-2012 05:36 PM
يا أستاذ
عندما يتفنن جهاز شئون المغتربين لإبتكار إنشاء بنك(سِعِنْ) لترويب حليب المغتربين
عندما يختفى نائب الرئيس الأول ومساعده عن الإدلاء برايهم فى فعاليات العملية التخريبية
عندما يلقى القبض على أبناء مسؤولين حكوميين سابقين فى ليلة حمراء داخل مزرعة


#521956 [الحاله زين]
5.00/5 (2 صوت)

11-26-2012 04:49 PM
وهو يمتلك فيلتين تلاتة .... تخيل ياجبره انا قريتو فنلتين تلاته شفت طموحي عالي كيف!


ردود على الحاله زين
United States [كوع ما عندي موضوع] 11-27-2012 12:03 AM
ههههييييييي والله يا الحاله زين انت عسل ضحكتني رغم اني عيان شديد ولي زمن ماضحكت كده الله اديك العافيه

United States [ابو محمد] 11-26-2012 07:34 PM
الله يجازى محنك يا الحاله زين والله فطستنى بالضحك وبالمناسبه انا زاتى قريت اسمك الحاج الزين... هو بالمناسبه صحى الحاله زين


#521943 [أبوأسامة المهاجر]
0.00/5 (0 صوت)

11-26-2012 04:41 PM
حاجات تانية تغيظ

- عندما يمرض الرئيس بورم خبيث وتصرح أم الرئيس أن ولدها شديد ولضيض
- عندما يقوم نظام بتدمير البلد ويسمى نفسه إنقاذ
- عندما يسمى رئيس منبطح بأسد العرب طيب نسمى (الفحل) صدام حسين شنو
- عندما تسمع مذيع تلفزيون السودان يحدثك عن مشاريع التنمية التي إنتظمت السودان والناس مالاقية تأكل ناهيك عن العلاج والتعليم.
- عندما تفتح قنوات السودان وتجدها كلها في نقل مباشر لخطاب الرئيس (لازم تراجع الطبيب لقياس الضغط والسكري)
- عندما تسمع القنوات الأعلامية تتحدث عن صفات السودانيين ولاتسمع شيئاً عن الكسل وعدم الطموح والمجاملات الزائدة والفشل السياسي والإقتصادي والإجتماعي والرياضي
- عندما تقام مؤتمرات التخطيط الإستراتيجي والخطط العشرية والخمسية والمئوية ولاترى نتائج هذه الخطط ولا تقييم للأداء.


#521888 [taj alsafa]
0.00/5 (0 صوت)

11-26-2012 03:43 PM
ألأخ الساخر الحقّاني جبرة
بمناسبة اقتراب حولية الكسرة الثابتة عن خط هيثرو، فإني أقترح عليك ان تستبدل يوم السنوية احرف الواو الكثيرة بالواو الضكر، قد يحدث لنا ذكرا!!


#521874 [باش تمرجي]
0.00/5 (0 صوت)

11-26-2012 03:32 PM
هوووويه يا جبرا كسراتك دي الكسرت بلاعات ود دفيعة وجاتنا لبطن الحوش .. شكيتك لهيثرو الضيع النائب العام !


#521872 [أبو سامي]
0.00/5 (0 صوت)

11-26-2012 03:30 PM
الأستاذ الفاتح جبرة علمت من مصدر موثوق " زي مصادر ربيع عبد العاطي " أن خط هيثرو عاد مرة أخرى إلى مكاتب سودانير ولكنه لم ولا طيارة !! بالله دي مش حاجة تغيظ برضو؟؟


#521866 [محموم جدا]
5.00/5 (1 صوت)

11-26-2012 03:26 PM
قال لي مهندس مسلم أجنبي ذهب للسودان مع بعض المستثمرين وهو يحكي عن دولته الاولى التي هاجر منها الى كنداأن دولتهم لم تعلن الحكم الاسلامي لكن يأخي كل شي واضح البار واضح و المسجد واضح و مافي اي تقاطع بينهما (يعني البرقص ما بغطي دقنه) لكن عندكم في السودان أول مرة اشوف مسؤل في قمة المسئولية يلف و يدور حول رشوة واضحة جدا تدفع لمكتب خارجي لمتابعة التسهيلات و غيرهاو بعد نهاية الآذان يتقدم الصلاة كإمام و يقرأ بتجويدقراءة جميلة مرتلة فقال المهندس عجبا تعجبت لكم يا أهل السودان كيف تمسكون كل هذه المتناقضات بيد واحدة!!! و يا جبرا لسع إنت متغاظ
الراجل نايم يشخر و المعاه في الغرفة بيسال فيه إنت نمت!!!
الراجل عمل إنقلاب و الجماعة بيحققوا معاه في محاولة تخريبية!!!
و جما عتك الطيروا خط هيثروا عملوا فيها ما بيسمعوا و لا يدرون!!!
و السودانية عملوها صحن بوش بالشطة الخضراء و بيلحسوا في أصابعهم و ما شبعوا!!
القطن لهفوه و خلوا الناس عرايا في شارع القصر منتظرين!!
ولسع متغاظ يا جبرا !!!


#521854 [مدحت عروة]
0.00/5 (0 صوت)

11-26-2012 03:20 PM
وعندما يتحدث شذاذ الآفاق اللى هم ناس الحركة الاسلاموية عن شرع الله وهم اجهل من مشى على رجلين بالكتاب والسنة بس عارفين وصايا المدعو حسن البنا!!!!!!
وعندما يتحدث مندور المهدى ويقول ان الحركة الاسلامية هى الوصلت السودان لما هو عليه الآن وهو يحسب انهم احسنوا صنعا!!!!


#521835 [Abu Areej]
0.00/5 (0 صوت)

11-26-2012 03:10 PM
سؤال يا استاذ- انت ما زهجت من خط هيثرو دة؟؟؟ يا اخي هو زاتو زهج!!!

رأيك شنو في ترشيح فنانة لرئاسة اتحاد الفنانين!!(الرجال كملوا)


#521799 [هاشم ابورنات]
0.00/5 (0 صوت)

11-26-2012 02:49 PM
عنما يموت الضمير وينتهي العزاء بانتهاء مراسم الدفن


ردود على هاشم ابورنات
United States [هاشم ابورنات] 11-27-2012 12:05 AM
ولا يا سفر الدموع اما انك جاهل بالواقع او متعمد التجاهل ...بيوت الاشباح ظهرت في عهد الانقاذ وليس عهد نميري
ثانيالماذا الاصرار على الارسال مرتين اذا كنت من الانقاذ قالرد سيأتيك في الزمان القادم واذا كنت لاتدري فتلك مصيبة واذا كنت عضوا حاقدا عمل في جهاز نميري خلينا نشوف فايلك
ثالثا عندما قامت الانتفاضة ظلت وسائل الاعلام تطبل من المواطنين ان يتقدموا بشكاويهم عن ممارسات الجهاز فلم يتقدم بشكوى الامجموعة من اولاد حزب البعث وحوكم فيها خمسة متهمين والمتهم الاول طلع برئ ومن يومين نحنا كنا في الراكوية بنضحك على قصة متهم اول طلع برئ في وزارة الزراعة ياسفر الدموع لما يطلع المتهم الاول برئ معناها القضية فيها انا

United States [سفر الدموع] 11-26-2012 07:52 PM
الضمير كان وين زمن بيوت الاشباح ياامن نميري

United States [سفر الدموع] 11-26-2012 05:39 PM
عن اي ضمير تتحدث يا امن نميري يا بيوت الاشباح


#521783 [مؤمن]
0.00/5 (0 صوت)

11-26-2012 02:31 PM
إذا ؤسد الامر لغير أهله فأنتظر الساعة


#521761 [ابوشنب]
5.00/5 (1 صوت)

11-26-2012 02:08 PM
ان تسمي المحاولة الاخيرة تخريبية وعندما يقوموا بيها ناس الغرب يقولو محاولة عنصرية


ردود على ابوشنب
United States [بت الخرطوم] 11-26-2012 08:39 PM
افو يا ابو شنب حكومة الانقاذ فيها على الحاج وحاج ساطور ونايل ايدام ومحمد الامين الخليفة والتجانى مين كدا ازيدك ولا كفاية سموها ثورة عنصرية ديل كلهم ناسيهم ولا مهجين زى ما قالوا لجسورة سمية هندوسة

United States [سفر الدموع] 11-26-2012 07:54 PM
الترابي وعلي الحاج الجابو الكيزان والانقاذ من الشمال برضو

United States [القرم تفاحة ابل] 11-26-2012 05:43 PM
حكومة الكيزان ما جابوها ناس الغرب الترابي وعلي الحاج وغيرهم


#521737 [كسرة قوية]
1.00/5 (1 صوت)

11-26-2012 01:46 PM
يا دكتور حقو تأجل موضوع الإحتفال ده شوية علشان الريس بعيد عنك مريض يعاني سكرات الموت يعني تراعوا لشعورو شوية ولا رأيك شنو؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة