صراع الدرقة والسيف
11-27-2012 01:37 AM

حاطب ليل -

صراع الدرقة والسيف

د.عبد اللطيف البوني



الانشطار اصبح من متلازمات الاحزاب السودانية وان جينا للحق فهو امر ملازم لكل الاحزاب في الدنيا فطالما ان الحزب منظمة طوعية اختيارية تقوم على المساواة والرضا والمصلحة يكون من الطبيعي ان تتبارى داخله تيارات متباينة تصل مرحلة المدابرة فيحدث الانشقاق فينهض تنظيم جديد لكنه لن يكون في قوة التنظيم الاصل.. حزب الامة لايعترف بالمنشقين ويعتبرهم افرادا خرجوا على الحزب فالمرجعية هنا هي طائفة الانصار نفس الشئ انطبق على الحزب الاتحادي مؤخرا فالختمية اصبحت المرجعية . الحزب الشيوعي يسمى الخارجين عليه انقساميين وقد وصفهم الراحل نقد ذات مرة انهم يقطعون شريانا في الحزب ويسيحون الكثير من الدم . الحركة الاسلامية لم تثبت على مصطلح فعندما خرج عليها صادق عبد الله عبد الماجد والحبر بعد مصالحة نميري ورجعوا للاسم القديم الاخوان المسلمون اسمتهم الحركة الخوارج ولكن لم يسر عليهم هذا الاسم اما الانقسام الذي حدث للحركة في الانقاذ وطني / شعبي فقد اسموه المفاصلة والاسم اظنه يرجع للترابي ( لزوم التاصيل وكدا ؟)
مؤتمر الحركة الاسلامية الثامن الذي انعقد في الايام الفائتة حدثت فيه خلافات في الرؤى حول الدستور واشواق للتغيير تفوق تلك التي ادت للمفاصلة وتكوين الشيخ لحزبه الخاص في 1999 في تلك المفاصلة التي بدات بمذكرة العشرة كان الخلاف المعلن هو التعديلات الدستورية المتعلقة بانتخاب الولاة وكان يمكن حسمها داخل المجلس الوطني كما حدث لحكاية اختيار الامين العام في المؤتمر الاخير . انعدام المبرر الكافي للمفاصلة جعل البعض يظن ان الحكاية كلها تمثيلية (هذا الظن موجود حتى اليوم) ولكن يبدو ان المفاصلة كان سببها ماكان ينوي الترابي القيام به من تغييرات في كابينة القيادة وقد بداها بالكلام عن الفساد ثم جولته في الاقاليم ثم تأديبه لاصحاب المذكرة في اقرب مؤتمر عام فحدث الانقلاب عليه الذي سمى مفاصلة
تباين الرؤى وتراكم النقد والململة التي يمكن ان تقود لمفاصلة جديدة كانت اكبر واوضح في مؤتمر الحركة الاخير من المفاصلة السابقة ولعل احسن توصيف له ماقاله حسين خوجلي من ان المؤتمرين جاءوا للمؤتمر بنوايا متباينة فالبعض يريد الحركة درقة والبعض يريدها سيفا فما ابعد المسافة في الوظيفة بين السيف والدرقة فالمؤكد ان الذين يريدونها درقة قد اكتسحوا المؤتمر ورغم ذلك لم تحدث المفاصلة فما السبب في ذلك ؟ غازي صلاح الدين كان اول العشرة في تلك المفاصلة في المؤتمر الاخير كان رمزا للتغيير وكان هذا واضحا من مجريات المؤتمر فمعه تسعمائة بدلا عن تسعة ولكن رغم ذلك كان زاهدا في المفاصلة لابل سعى للتهدئة فهل اختار اخف الضررين ام هناك حاجات حامياني ؟ هل اجاد جناح الدرقة اللعب (غير النظيف ) وكسب الجولة ؟ هل هناك تقارب غير ظاهر بين الفريقين ولعب على عنصر الزمن وعناصر اخرى غير مرئية للمراقبين ربما كان اختيار الزبير واقعا في هذا البند ؟ هل هناك احباط وعدم تمسك بالمقاومة وضرب اصحاب السيف بيوتهم ؟ ام ان الامر قد تجلى في المحاولة التخريبية , الانقلابية , الاستباقية سمها ما شئت على حسب فهمك لها , فان كان ذلك كذلك فان الامر اصبح مفاضلة بين المفاصلة والمحاولة فايهما سيكون الاعمق اثرا ؟ صبرا يبل اللابرى وياخبر اليوم بفلوس باكر ببلاش.

السوداني


تعليقات 6 | إهداء 0 | زيارات 2217

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#523141 [الزين الطيب الصادق خير سيدو]
0.00/5 (0 صوت)

11-28-2012 12:17 AM
انت من كم سنة كنت بروف مع ثورة التعليم العالي رجعت تاني دكتور المركب بعد ما غرقت شارد منها وين و بعدين وين لخمتك لينا في who is who يا كيزان السجم و الرماد الذاكرة قوية ما بننسي لو انت نسيت بطل الدجل يا افاك


#523031 [صباحي]
0.00/5 (0 صوت)

11-27-2012 08:43 PM
الكيزان قصـتهم باظـت ودكتور البوني صار في حيرة من أمره ما عارف يسوي شـنو؟ الله يعينك يادكتور.


#523000 [امل]
0.00/5 (0 صوت)

11-27-2012 07:44 PM
انتخابات المؤتمر في 1999 كانت انتخابات اقرب الى الواقعية وفاز فيها الترابي ولذلك انقلب عليه الانقلابي ابو صقر و 3 نجوم ( طبعا الصقر كان ........... وال3 نجوم كانو على عثمان والزبير ومحمد الامين ) لانو الترابي لمن اترشح عمل حمله انتخابية لف بيها الولايات كلها واستغل الشخصية الكارزمية الشهيرة بالضحكة ابو 3 نجوم - وطبعا الطرف الثاني عمل حملة انتخابية لعبدالرحيم على وفشل لانو الراجل ما قدر على الاعيب الجماعة ديل , واعتقد انو حزب الحرية والعدالة قدم نموذج محترم لاختلاف الرفقاء وعمل انتخابات شفافة داخل الحزب بفتح باب الترشح قبل شهر وفتح باب الطعون ثم باب الانسحابات واخيرا اعطت اللجنة قوائم اعضاء الحزب للمرشحين حتى يعمل كل واحد حملته الانتخابية ويطرح برنامجة والناس بعد داك تخش المؤتمر وتبدا الترشيح وكملوا النموذج بطريقة محترفة وشفافة وما فيها اي خم ولا زر للرماد في العيون زي جماعتنا وفي النهاية فاز الكتاتني واعترف الفريق الثاني بالهزيمة . ام عن النوذج السوداني فقاموا جابو كيزان الدنيا كلها ونسو موضوعهم الجو عشانو ( خم للعضوية ) وبعدين حكاية المرشحين يتعرفو يوم المؤتمر ولا قبل يوم او يمومين وما يكون في فتح باب للترشح للكل وقانون واضح ينظم العملية الانتخابية والناس تتفاجأ بالمرشحين داخل المؤتمر ده كلام حق طلاب وجامعات واستصغار للعضوية وحجر باب الترشح والاستعداد للمنافسة من قبل القواعد حتى لا تجد وقت للملمت قواها وترضى بالمرشحين المعدين في الخفاء والناس سابت حكاية الفوز بالتزكية والاجماع السكوتي ده زمان , وكان ما فزته نديك نايب , السياسة السودانية من خلال الاحزاب التقليدية تكرس لمثل هذه الممارسات يعني لو ما المهدي اكيد اله ولو ما المرغني اكيد اله ولو ما مات نقد ما في زول بمسكه والراجل يقول يتجاوز ياسر عرمان في الحركة الشعبية , النظام خايف من موضوع الجمعية العمومية للمؤتمر الوطني لانو اكيد خم الحركة الاسلامية بتاعم ده ما حيمشى عليهم تاني , عشان كده بدا يلعب على عضويته حكاية , كان ما ختيتو الكورة في الواطة بنخليكم تقطعو الحطب بالليل , واخيرليكم البنختاروا انحنا مما يجيكم قوش


#522820 [اقبال حامد]
0.00/5 (0 صوت)

11-27-2012 03:26 PM
سؤال جاد يادكتور .انت مع منو في ديل .احترامي .


#522421 [ahmmed]
0.00/5 (0 صوت)

11-27-2012 07:17 AM
مالك تقول جاهل
وات من جماعة الحوش
وعارف الحصل وحاصل
وانو الزعيم مدغوش
واصلو الامر سيدي
نقص الظروف وقروش
اتقسم الرفقا
صارو تلاتة دويش
واحد وفي نافع
ديل الضروس وكروش
واحد كمان مرحوم
مالاقي حق البوش
والتالت المحروق
اللمة لي ناس قوش
اصلو البلد عاقرة
غيرن همو مافيش
اما الشعب نحن
ذي النمل بشيش
عارفين خلاصنا تمام
من الغبش ماالديش
وشمس الخلاص تشرق
بالصدق لا الغشيش
وباكر قسم نمرق
ونكلبشن كلبيش
كل من طغي واذي
للطيب الدرويش
من سلبو عافيتو
شال منو حق العيش
عبداللطيف افصح
وخليهو ده الغشغيش
مابينفعك والله
بيت الرخام والريش
درب الفجر واحد
مو محكمة تفتيش
والشعب سيد الامر
مو هو البشير اوقوش


#522409 [واحد]
0.00/5 (0 صوت)

11-27-2012 06:53 AM
اسئله اسئله انت كنت وين صحفيين اخر الزمن


د.عبد اللطيف البوني
د.عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة