الكلمة الشاذة
11-28-2012 11:14 AM


الكلمة الشاذة

الفاتح جبرا
[email protected]


إستخرج الكلمة الشاذة في كل من الكلمات التالية :
1- الملاريا – الرصاصة – تصريحات المسئولين – اللغم
2- موية النار –الموية المعدنية – الموية المقطرة – موية الحنفية
3- الدولار – الأسانسير – درجة الحرارة –الطائرة
4- الفكى – الطبيب– المطرب – البصير
5- ديوان الزكاة – هيئة الحج والعمرة – وزارة الأوقاف – وزارة السياحة
6- النفايات – الأوكسجين – المغادرة – الوصول
7- الصيدلية – محلات قطع الغيار – صناديق الإنتخابات – بنك الدم
8- الكندوم – الغلاء – شيرين – الختان
9- المجلس الوطني – المجلس الطبي – المجلس الهندسي – المجلس البلدي
10- كنبة – طاولة – سرير – كرسى
11- القاضي – المحاسب – أمين الخزنة - رجل المرور
12- شارع الجمهورية – شارع البلدية – شارع عبيد ختم – شارع الأربعين
13- الشلوخ – علامة الصلاة – الشامة – دق الشلوفة
14- الكرباج - تلفزيون السودان – الكهرباء – الموز
15- استادات كرة القدم – المسارح – الجامعات – الحدائق العامة
16- المايسترو – الأمة والإتحادي –مدرب الأسود – راعي الأغنام
17- نيجريا – الكونغو – مالي – غانا
18- الذبابة – الأميباء – كريات الدم – الرغيفة
19- الصلصة – الطحنية – الشيبس – الوزير
20- الفيل – وحيد قرن – المسئول – الحصان
21- السرقة – الإغتصاب – النشل – الإنقلاب
22- اللخمة – الزحمة – الزكمة – اللحمة
الإجابة :
1- الملاريا لأنها بتدي الزول فرصة وكده !
2- موية النار عشان بنملأ بيها البطاريات وبناكلا مع الفواكة (2 in 1)
3- الدولار لأنو الوحيد بينهم كان طلع ما بينزل تاني
4- البصير فهو الوحيد بين هؤلاء الذى لا يشترط عليك أجرة وبياخد الشئ البتديهو ليهو
5- وزارة السياحة لأنها الوحيدة بينهم التي لم تشهد فساد مالي وإختلاسات (بالله عليكم الله ده إسمو كلام؟)
6- الأوكسجين لأن البقية عليهم رسوم (على الأقل لحدت هسه)
7- بنك الدم فهو الوحيد بينهم محتوياته غير مضروبة أو مغشوشة (الصين والخج) !
8- الغلاء فهو الشئ الوحيد بينهم الذي لم يتحدث فيه العضو البرلماني المثير للجدل
9- المجلس الوطني لأن له إستخدامين (مجلس) و (مكان للنوم)
10- كرسى لأنو الوحيد بينهم الذى يمكن أن يتشبث به المسئول (عمركم شفتو ليكم مسئول إتشبث ليهو بى كنبه؟)
11- رجل المرور فهو الوحيد فيهم الذي يقوم بأعمالهم جميعاً
12- شارع عبيد ختم (عشان ختم بالفاء)
13- الشامة عشان هي الوحيدة الطبيعية وما ممكن يعملوها عمل
14- الموز لأن البقية كلهم أدوات تعذيب (ولو إنو هو ذاتو ممكن)
15- الجامعات عشان كميات البنقو فيها أكتر من البقية
16- الأمة والإتحادي لأنو هم بيمسكوا العصا ية من التص والباقين من الطرف
17- نيجريا لانها الوحيدة بينهم التي تتابع برنامج نجوم الغد
18- الذبابة فهي الوحيدة بينهم التي ترى بالعين المجردة
19- الوزير فهو الوحيد الذي ليس لديه تاريخ إنتهاء صلاحية
20- الحصان لأن جلدو ما تخين كما البقية
21- الإنقلاب فهو الجريمة الوحيده بينهم التي إذا نجحت في إرتكابها فإنك لا تعاقب (وإذا فشلتا وكده فشيل شيلتك)
22- اللحمة لأنو الزول ممكن يكون ملخوم أو مزحوم أو مزكوم لكنو ما ممكن يكون ملحوم !!

كسرة :

السؤال : العميد – اللواء- الفريق – المشير

الإجابة : (الفريق) عشان ممكن يشيل ليهو كاس .................. (ده لو ما كشفوهو قبل ما يشيلو وكده) !!

الكسرة الثابتة :
أخبار ملف خط هيثرو العند النائب العام شنو(ووو ووووو ووو)؟ - الإحتفال قريباً بالذكرى السنوية-




تعليقات 28 | إهداء 0 | زيارات 9684

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#524593 [ahmmed]
1.00/5 (1 صوت)

11-30-2012 07:22 AM
كلمات متقاطعة
الملاريا -يا حارقة لي دمي
ورصاصة في فمي
كلما اقول مسؤول بتزول
بتزول يزيد همي
الموية نار ياخوي
في المعدن المقطور
حنفية البابور
قطرات وفاتنا الدور
دولار طار الحار
صاعد كما الطيار
كل البلد محتار
في ها الفرنجي الطار
العيش بقي بدولار
موية الشراب دولار
حتي البصل ياخي
يطلع مع الدولار
ونتابع غدا


#524541 [saif]
1.00/5 (1 صوت)

11-30-2012 01:43 AM
بنك الدم راجع معلوماتك فيها ايا استاذ والله اكبر موقع للغش ونقل الامراض الخطيره دم ملوث وهي المصدر الثاني لنقل الايدز في السودان والكثير من تم نقل الدم لهم راحو فيها اعمل حسابك وفتح عينك واعمل بحث وشوف النتيجه كيف


#524455 [ياسر الزبير]
1.00/5 (1 صوت)

11-29-2012 09:13 PM
الراوي -القاص -الشاعر -الكاتب الصحفى


الكاتب الصحفى لانه يصيح بقدر قوة الضارب عليه قوة وضعفا(دلوكه وكده يعنى)


#524242 [ود الجد]
3.00/5 (3 صوت)

11-29-2012 02:09 PM
مشروع الجزيرة - سودانير - هيئة المواني البحرية - هيئة السكك الحديدية - اخلاق الناس
الاجابة : ولا واحدة لانها اتلحست جميعا


#523939 [Emad]
3.00/5 (3 صوت)

11-29-2012 02:08 AM
3,19,21 أوسكار يا استاذ


#523909 [تختخ]
3.00/5 (3 صوت)

11-29-2012 12:24 AM
جبرا غايتو بالغتا عدييييييييييييييييييييييييييييييييييييييييييييييييييييييييييييل كدا في بتاعت الفريق دي والله مبااااااااااااااااااااااااااااااااااااااااااااااااااااااااااالغه!!!!الصنف كدا ول لا بلاش .الله يجازي محنك


#523814 [الطاهر احمد]
3.00/5 (3 صوت)

11-28-2012 09:19 PM
سلام

السؤال الأول: الفاتح ـ الحاج يوسف ـ الوادي الأخضر ـ الشقلة

السؤال الثاني: جبرا ـ الصحافة ـ الأزهري ـ أركويت


#523792 [عدلان يوسف]
2.63/5 (4 صوت)

11-28-2012 07:58 PM
ياجبرا أخوي كدي حل لي دي :

ما الكلمة الشاذة فيما يلي :

المغتربين ـ عبد العاطي ـ أبو ريالة ـ أبو ساطور ...

شكلك ما عرفتها ؟!

الإجابة : المغتربين لأنو هم الوحيدين المغتربين مكانيا .. أما الباقين فمغتربين "ذهنيا "


#523778 [علي سنكل]
3.00/5 (3 صوت)

11-28-2012 07:30 PM
ربنا يديك العافيه يا جبرا . . .
مع كل هذا الابداع و أنت في منتهى التواضع و الأدب مع الناس.
ما عارف كان الهندي عز الدين لقا ذي عبقريتك دي كان عمل في الناس شنو؟


ردود على علي سنكل
United States [ابورفيدة] 12-01-2012 07:19 AM
الســـــــــــــــــلام عليكم
انا نفس الشئ حدث لي معه والله يا شاهد عيان اتصلت عليه وكنت متوقع نفس الشئ الانت كنت متوقعو لكن الاستاذ اخذ واعذي معاي في الكلام انسان في قمة الاحترام والتواضع ربنا يحفظو ان شاءالله
واتمني ان اقابله وان يكون لي شرف الاستماع لعبقريته وجها لوجه

United States [رد على شاهد عيان] 11-29-2012 11:23 PM
.. أستاذ الفاتح جبرا.. سوداني من النوع القديم..


وكلنا مدمني لكتاباته.. ولقاءاته الحوارية...


وما غريبة على السوداني هذا الفعل..


يا رب زيل غمتنا.. ورجعنا.. سودانيين زي زمان..


شكراً يا شاهد.. والله الموقف عجبني حد المتعة.....

United States [شاهد عيان] 11-28-2012 11:21 PM
نادرا ما أعلق في المنتديات لكن كلامك عن تواضع أستاذ جبرا وأدبه الجم جعلني لابد أن أدخل وأعلق عشان أحكي الموقف ده صداقاً لكلامك .. نحنا كل البيت بحب كتابات الاستاذ جبرا لدرجة الشغف .. الصغار والكبار مافيش مقال كتبه إلا نكون قريناه بل بعض المقالات حافظنها حفظ .. المهم قبل عيد الاضحية الفات ده لميت في رقم الهاتف بتاع الاستاذ قلت ما حيرد يرد على رقم غريب زى بقية الناس المشهورين لكن لسعادتي رد علي وكان في غاية الذوق وإتعرف علي وقلت ليه أنا عندي طلب عندك قال لي إتفضل قلت ليه يا أستاذ أنا والاسرة عازمنك فطور اول يوم في الأضحية لكن أنا عارف المسافة بعيده شوية عشان عارفك ساكن في في أم درمان ونحنا في الكلاكلة اللفة قام قال ليا ما مشكلة مع إنه أول يوم ده صعب لكن بجيكم بس ذكرني يوم الوقفه عشان أنا زول نساي . وفعلا ذكرت الاستاذ يوم الوقفه وتاني يوم وهو أول يوم في أيام العيد حوالى الساعة 11 جاني صوت الأستاذ عبر الموبايل وهو يقول (أنا في سوق اللفة قدام المجمع يلا وصف لي) وبالفعل بديت أوصف ليه لحدت ما وصل البيت حيث كنا في إستقباله وفطر معانا وشرب الشاي وإتونس وما حسسنا أبدا بأنه إتفضل علينا بشئ وبعد أن غادرنا ما كنا مصدقين إنه الاستاذ جبرا كان معانا لولا الكتب بتاعته الأحضرا معاهو وأهداها لينا .. وكان يوم من أجمل الأيام لاننا نحب هذا الرجل وهو جدير تماما بهذا الحب .. قل لي اخ علي سنكل أي كاتب في قامة الاستاذ جبرا يمكن أن يفعل هذا ..

United States [أجاك مكور] 11-28-2012 09:45 PM
بالغت انت كمان يا السنكل, هو لو الهندي ده كان عبقري كان بيسموه الهندي؟


#523755 [مالك]
3.00/5 (5 صوت)

11-28-2012 06:18 PM
غايتو يوم بتكتل ليك زول ... وريني نوع الصنف ده بتجيبو من وين ؟ الله يجازي محنك .


#523749 [awad]
3.00/5 (4 صوت)

11-28-2012 06:06 PM
قوية ياجبرة.(نيجيريا الوحيدة بينهم البتشاهد برنامج نجوم الغد) والله قوية طبعا الشريف عندو كشيفين فى السودان وفى نيجيريا وهاك ينغوا ليه وينغى الموزز على كيفه.


#523657 [ودامبعلو]
3.00/5 (4 صوت)

11-28-2012 03:59 PM
هسه عليك الله ناس المجلس الوطني ديل ينومو ليك وين يعني الواحد فيهم عندو مثني وثلاث ورباع والليل كله مساهر (صحه وكده) الحساده ليك شنو
نمره 11دي حلوه


#523614 [الزوُل الكَان سَمِحْ]
2.00/5 (3 صوت)

11-28-2012 03:25 PM
يا استاذ

السؤال : العميد – اللواء- الفريق – المشير

الإجابة : (الفريق) عشان ممكن يشيل ليهو كاس .................. (ده لو ما كشفوهو قبل ما يشيلو وكده) !!

الإجابة: (المُُشير) عشان عندو (ماجستير) وقرب يطير

طيب شوف دى

المصنع..مكنة اللحام..ود الخِدر.. فجر5 .. البوارج الإيرانية..عمود السحاب


ردود على الزوُل الكَان سَمِحْ
United States [الكدرفاني العديييييييييييل] 11-29-2012 03:00 PM
ود الخدر ..... لانو كلها لها علاقة .... بنهاية المصنع .... الا ود الخدر.... ما بيعرف الضرب المصنع شنو.... وما عارف الدخلوا في الموضوع شنو.... الا اخطبوطية الانقاذ...


#523610 [هجم النمر]
3.00/5 (3 صوت)

11-28-2012 03:23 PM
والله يا استاذ ما عارفين نقول ليك شنو؟ ياخي إنت زول مبدع حد الدهشة ... بالمناسبة لينا مده ما شايفنك في أخيرة الراي العام والله كنا بنشتريها من صباح الرحمن عشانك لأنو عمودك هنا بينزل متأخر ونحنا ما بنقدر على الإنتظار يا رائع


ردود على هجم النمر
United States [zayed] 11-28-2012 11:17 PM
يكون العمود بتاعو في الراي العام حصل عليهو ذي الحصل لي خط هيثرو وكدهـ

United States [زول النصيحة] 11-28-2012 08:27 PM
أنا برضه لاحظت أن الأستاذ قاعد ينزل عموده هنا وما قاعد ينزل في الرأي العام ... يكون الحاصل شنو؟


#523580 [حسين]
4.19/5 (6 صوت)

11-28-2012 02:49 PM
نويت التعليق / فسبقتنى جملة ( الله إديك العافية )- الله يعطيك العافية -


#523567 [ابن حلايب]
4.19/5 (6 صوت)

11-28-2012 02:39 PM
عرفنا كل شيئ دق الشلوفه دى شنو ؟


ردود على ابن حلايب
United States [ابن امدرمان] 11-28-2012 10:19 PM
ياخى بالغت عدييييييييييييل كدا انت ما سودانى ولا شنو؟
اسال حبوباتك


#523563 [ابوخالد]
4.07/5 (5 صوت)

11-28-2012 02:35 PM
الله يجازي محنك ياجبرة خليت ليهم شنو الناس ديل .خلي بالك ومتن حبالك ممكن الانقلاب الجاي يكون فالك.فالك طيب .


#523550 [مرسال الشوق]
4.19/5 (6 صوت)

11-28-2012 02:30 PM
جبره ياخي ربنا اديك الفي مرادك لانك بتريحنا شديد ابو الجبابره انتا فعلا جبار انا من اليوم بسميك ابو الجبابره واتجبري وكدهالسوال ليكي يا جبره انتا بس تجاوب عليهو اين الكلمه الشازه
ابوالجبابره ابوالعفين ابوساطورابو عصايه


ردود على مرسال الشوق
United States [ود اللالح] 11-28-2012 05:53 PM
وانا من عندي بضيف ابو رياله


#523542 [jarabandi]
4.19/5 (7 صوت)

11-28-2012 02:23 PM
الله يجازي محنك يا دكتور , انت الكلام النجيض دا بتجيبه من وين؟انت بتاع .....؟ والله بقينا ما بنضحك الا لما نقرأ كلامك . وان كنت ساخر سبيل لكن عمودك يساوي مئات المقالات الرصينة.


#523483 [ربش]
4.19/5 (6 صوت)

11-28-2012 01:01 PM
الرائع جبرا و الله أضحكتنا حتي أبكيتنا ... متعك الله بالصحة و العافية و الله كفيت ووفيت و فعلاً شر البليه مايضحك .


#523481 [Abu Areej]
4.07/5 (5 صوت)

11-28-2012 12:58 PM
يعني المعنى انت قاصد قووووش وكدة


#523477 [louba]
4.07/5 (5 صوت)

11-28-2012 12:51 PM
للاسف هذه المرة الثانية التي اكتب فيها تعليغ ويضيع.....


ردود على louba
United States [أجاك مكور] 11-28-2012 09:51 PM
أكيد بتكتب لما يكون باب الراكوبة مغلغ بالقاف وكده!!!

United States [عدلان يوسف] 11-28-2012 07:27 PM
عشان بتكتب "تعليغ " بالغين ... اكتبها بالقاف " تعليق " وما حتضيع ...


#523461 [عزالدين]
4.19/5 (7 صوت)

11-28-2012 12:37 PM
ههههههههه دي قوية عديييييييييل كدة يااستاذ...شكلك كدة كنت في زيارة للجامعة...


#523439 [جمال]
4.18/5 (8 صوت)

11-28-2012 12:14 PM
لكن يا جبرا انت فظيييييييييييع ... المصائب دي بتجيبا من وين ؟؟؟ . ماشاء الله عيني بارده .
لك مني كل خالص التحية .


#523433 [louba]
4.15/5 (8 صوت)

11-28-2012 12:06 PM
(الكسرة)البياكلوها ليست كسرة استاذ جبرة(الكورة)البيلعبوها ما حقت السودان(الثورة)البقوم بيها الشعب ما حقت الانقاذ (الكوره) عرس الكوره
الكلمة الشاذة هي الكسرة لانة ناس الانقاذ ما عارفين الشعب السوداني بياكلها.

كسرة اخبار الانقلاب الفي التحقيقات شنو......


#523425 [ابو بطن فاضية تكركر]
4.19/5 (7 صوت)

11-28-2012 11:56 AM
حقيقة كلامك صح ودي طريقة سليمة للافلات من مقص الرقابة الامنية على الصحف والمقالات الكاتب عشان يوصل رسالته لجمهوره لازم ياخد اللفة الطويلة دي وإلا ممنوع من النشر ودي طريقة ذكية نحي فيها كاتبنا المخضرم الفاتح جبرا لان كثير من المقالات وقفوها بسبب الاسلوب المباشر .


#523407 [سليمان الباقر]
4.19/5 (6 صوت)

11-28-2012 11:42 AM
علي الطلاق إنت مسطول عديل كدة ،، و كمان مصطول بالصاد


#523390 [حنظلة]
4.19/5 (7 صوت)

11-28-2012 11:30 AM
شكيت محنك يا جبرة...


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة