المقالات
السياسة
ارشيف مقالات سياسية
مـعـذورة يا مطر الندى ...
مـعـذورة يا مطر الندى ...
11-28-2012 12:55 PM

بسم الله الرحمن الرحيم

مـعـذورة يا مــطــر الندى ...

عروة علي موسى
[email protected]


معذورة يا مطر الندى
لو كان غناك
نازراهو شان النيل فِدا
روح الحروف من سر غمامك
لابس وشاح ريدك ِردا
وطلة الشمس البتشرق من عيونك
راجية من شرقك نِدا
شان تشوف روعة النيل المجرتق
بي شوق غناك وكوم قصايد
ممتدة في جواك مدى ..
معذورة يا مطر الندى
ومعذور معاك كل الحنين الفي غناك
البيهو حرفك كم شدا
وخليك كدا
منتظرة لي موسم تباشير الخريف
والليل إناغم رشة المطر الهِِدا
ولما الصباح أنوارو لاحت في المدى
تلقيني مستنيك مع الأمل الفَراش
ومتلفحك نسمة دعاش
ومسدار غنا رفرف مع الصمت الصدى
واتظللك غيمة فرح جابت المرح
خلت مسافة الخطوة ليك مخضرة يانعة مفرهدا
وخليك شمس خجلانة من بينات السحاب
شان تسقي عتمات الدروب بي نور هدى
واتظللك نيمة وعبير
وأشواق تطير
فرحانة بي وعد الندى
مطرانة بي مطر الندى
عشمانة في المطر البدا
واتظللك
طلة صباح لابسة الوشاح
فاردة الضفائر بي انشراح
واتظللك
هودج رحيل لي الشوف بدا
جاب الفرح لي قليب بيسأل عن حبيبتو وإنشدا
معذورة يا مطر الندى
ومعذور معاك كل الحنين الفي غناك
واتظللك في الليل نسيم
مازج سلاف نيلاً حميم
قالع عبير مطراً وسيم
واتظللك
في الصيف ندى

عروة علي موسى ،،،



تعليقات 2 | إهداء 0 | زيارات 1173

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#523700 [ahmmed]
5.00/5 (2 صوت)

11-28-2012 04:48 PM
يا شايلة من الغيم ندا
ياناذرة عطرك للضفاف
فاحت مواسمك بالشذا
فاضت حروفك بالسماح
لبسك جلال النيل وشاح
يامارقة من ليل الفرح
ومالية البراحات بالنداوة ولرضا
ناثرة الجدايل للرقيص
مالشوق هديلك ياسماح
بهدي المسافات الهديل
ويجرتق اللحظات فرح
مالك خطاويك ما بدت
والنيل سكن حضن عشق الضفاف
مستني جيتك وطلتك
والرزاز ملا نفسو بالاشواق يغار من مشيتك
والنخيل اتشابه لي باب السماء
مليان مهابة ومقدرة
راجيها عنوان بسمتك
ياسمحة ذي زفة عرس
وجذابة ذي اول لقا
بهواك غيم
احسك هديل
برجاك فرح
طالع من البوح والحلم
مستني جيتك فالمواعيد قربت
ولاحت بشارات الحضور


#523595 [كاهل ابوعرب]
5.00/5 (2 صوت)

11-28-2012 03:06 PM
مبدع انت يا عروة سير فالدرب اخضر مع كل تباشير الخريف رائع انت روعة الجرايه لما تخاوي السراب والطين رغم الغرق والبوار .


عروة علي موسى
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة