تضامنا مع بنية قوش....
12-02-2012 01:11 AM

تضامنا مع بت قوش

أسماء الجنيد
[email protected]

أيها الشعب الطيب المتساهل ، لمدة 23 سنة ملطوش و مغشوش ، نرجوكم التضامن مع بنية قوش المكشوش.
وبما إنه يا شعبنا المسامح ومسالم وصائم ديمة, متحمل كل المعاناة بأنواعها على مر كل السنين الفاتت والجاية! لذلك نرجوك كمل جميلك وإتضامن مع البنية دي في ال 8 يوم الما أكلت فيها يا حليها، تمااانية يوم وآآ شري عليها، لا جبنة لا زيتون ، ولا كبدة لا بيض عيون ولا بيرقر ولا كستليتة ، ولا فراخ ولا ضلع ولا سمك, ولا سلطات بالطحينة، و لا المكسرات وشيتا تاني إسمو كتر( بضم التاء) زي(المانجنيز) كتييير فينا ما بخبروا,و لا( كورن فليكس) ده برضو شفعنا كتاااار ما شافوه!وكمان لا تحليات ولا فواكة ولا مربات ولا جغمت عصائر ولا اي نوع من الببسي كولات! مع إنه كلو راااقد شيء معلبات وشيء معبأ بالباقت في التلاجات والفريزرات!! وآآ شري عليك والله تقطعي المصارين!
لكن يا جماعة بي إرادتها وكامل قواها حرمت نفسها من النعيم الفوق ده عنوة , إنتو يا شعبنا الحنين يعني فيها شنو كان الوجبة الوحيدة ويتيمة دي خليتوها!!ما فيكم زول حا يموت ،ولا حا يموت لو فط ليه فد صحين بي موية بوش !!( موية مش فول ) ولا كان فطيتوا ليكم يوم سخينة بي حبة ملحة زي فاقد السوائل!!
عليكم الله صوموا صلحة وسترة على قول أهلنا الكبار, إنتو ما بتجيكم عوجة تب, متعودييين على كرب البطون و جوعكم ما زي جوع الباهوات ولا زي جوع اولادهم الهشين ومرطبين وعلى الشقاوة ماهم متعودين!!
يا بنية كل زول ما برضى في ابوه, ولا بنلومك ونحن مانا عارفين عمرك كم؟ولا لايمنك تـــب في حردتك دي!
لكن اسرتك التانية الفيها العاقل والكبير وعارفين البير وغطاها وعارفين عمائل الغول ابوك( قوش) اللهط كيمان القروش ولهط المعدوم في سوق الخرتوم!! أسألي اهلك ديل كلهم من طرف ! من أمك زوجة المجرم الكبير وختير لي أخوه الخايف عليه لي القبيلة كلها بي رأس القايدة زاتوأبوك قوش! أسأليهم هل في يوم فكرتوا في الشعب المطحون ده؟ هل حسيتوا بي معاناة اليتامى والأرامل؟ هل شفتوا عذاب بيوت الأشباح؟ لوما عارفين هل فكرتوا يوم و سألتوا قوش ده ليه بعذب الناس في بيوت الأشباح؟ وليه جهاز الأمن مقطع الناس النفس والهواء حق الله ده!!
هل سألتوه من إنتهاك حقوق الغير وإنتهاك الحرمات وتعذيب الأبرياء من مواطنين وموظفين لي طلبة الجامعات !!
حقكم حاااار ناار وبحرق في الحشا وحق الناس التانية ما مهم!؟البموت يموت والبمرض يمرض والمعذب ولا إتسجن ظلم وتسلط.
منهم من جن وطفش بالبلود،ديل برضو ما بهموكم ؟
ناس مسجونة بالشهور والسنين ، ظلم وغدر وجور !! نساء وشباب زي الورد حرقتوا حشا أهلهم، وحرقتوا جلدهم بي موية النار وكويتوهم بالمكواة زي كأنه جلودهم دي ما جلود بني آدميين ولا هم معتبرنهم بشر زيكم !!!
اما قوش مش كتر خير الحكومة السمحت ليه بي مستشفى الجهاز؟ قطع شك خدمات سبعة نجوم!! بعد ده كلو ماكم رضيانين؟
دايرين يودوه ليكم مستشفي القلب التخصصي؟؟والله سبحان الله , ناس مرضانة بالسنين وفي الشوارع قدام المستشفيات مجدعين ، يتوسلوا ويتسولوا العلاج من ناس الحكومة , المخزنين القروش برة لي مصالحهم الخاصة ومصالح اسرهم واولادهم !
يوم واحد قلبكم لا حن لا رق عليهم ولا على غيرهم من المسجونين من عامة الشعب الجريمتهم فقط الإحتجاج على ظلمكم وجبروتكم وعلى جرائمكم التي لا تحصى ولا تعد!!!
ولسه السجون مستفة من نساء لي رجال و شباب من الجنسين!! كلهم محبوسين ظلم واهلهم حفوا من المطالبة بي شوفتهم ولا حياة لمن تنادي! شوفوا وجربوا يا جبابرة جربوا الضيم ولو لحين,وجربوا لوجع والمر والخوف . والذل والعذاب وسهر الليالي على جنا الحشا.
ده غير القتلتوه وحرمتوا وليداته من حضن الأب , وياما زوجات إترملن بسبب عمائلكم وتسلطكم!!
دحين يا بنية قوش كلمي اهلك ديل وأسالي ابوك من الظلم الزرعوا في البلد في الزمن الفات ده كلو ، أكيد مصيروا يحصد عمايلوا من دعوات الغلابة اضعاف أضعاف !! وبعد الحصل ليه ولسه حا يحصل ، لا إتذكر المظلومين ولا خاف من رب العالمين !!
ولسه السجون مكتظة بالأبرياء , من الغلابة المطحونين, أختنا جليلة خميس ’ عيديـــــــــن إتنين خلف القضبان محرومة من اسرتها وحارمين اسرتها منها, مسكينة لا ذنب لها ولا حولة ولا قوة لها وغيرها كتير وكتير من الإتشردوا والطفشوا خلوا ليكم البلد كلها..!!
بلد قوانينها مقلوبة.
حرامي وقاتل ابرياء حر وطليق ينعم بكل الخيرات!و يأمر وينهي ,وعنده هيئة مكونة من 100 محامي !!!
وبعد ده يتدلع في الحكومة والناس وبي بجاحة وبرا خجلة !!
وناس مظلومة خلف القضبان وعدمانين القرش و محامي واحد فكر فيهم مافي ؟؟
الواجعني المحامين الدرسوا القانون وعرفوا الظلم كيف و وين !! هل مقتنعين إنه دفاعهم ده صاح؟ وكمان متبرعين؟؟
تدافعوا عن مجرم يا ما إترملت نساء بسببه وياما أتيتمت اطفال بسببه, وياما إتحرق حشا امهات بسببه!!!
حتى لو فرضنا دفع ليكم مال قارون ، هل ضماائركم مرتاحة ومقتنعين إنكم تدافعوا عن المجرمين وتتركوا الأبرياء!!!؟
والله البلد إنتهت بي قيمها ومبادئها , ناس صامتة و الفساد والظلم يقدل وسطهم مفتول العضلات ! عيانا بيانا, زول واحد بحتج مافي!
اللهم إلا من رحم ربي!!!
طبعا مع إضراب الطبقة الحاكمة عن الطعام والشراب, حتى ولو كان فرد واحد زي البنية دي! بكون عمل خسارة كبيرة جدا في مبيعات البلد من خبز ( رغيف ) ومشروبات وغيرها ,طبعا بكون في مخبز ومصنع مشروبات ومطاعم فاخرة خاصة بالبنية دي! اصلوا الجماعة ديل ملقطين رزقهم من النوعية دي! و(كوش) الأحياء المميزة تحمد سيدها بتكون جاتها اعداد مهوووولة من الأطعمة المستوردة الفاسدة التمت 8 يوم مافي زول اكلها, وبالتالي هنيئا لي كدائس كافوري بالوجبات الدسمة , وأكيد الكدائس احسن من سكان البيوت ، قلوبها رحيمة وبترحم معاها كدائس الهامش و السكن العشوائي, تضامنا معاها لأنها 23 سنة محرومة من بقايا الأكل المميز ده والكان زمان مجدع في كل كوش البلد!
سبحان الله مغير الأحوال من حال إلي حال !! غايتو لو ناس الحكومة ديل عندهم عقول بتفكر, يفترض قوش ده يكون ليهم عبرة, ويفتحوا عينهم ويتعظوا والجاي أعظم ! دحين فتحن عويناتكن يا حريم باقي العصابة..
وحسبي الله ونعم الوكيل عليكم جميعا ......

متاوقة
يا جماعة أنواع الأكل الكتبناها فوق دي من قائمة طعام المتسلطين دي أسماء أكلات حقيقية ما خيالية ولاأفلام كرتون !!!
المهم هسه يا بنية قوش لو الناس دايرة تضامن معاك تعمل شنو ؟ والله إلا يصوموا يومين ويفطروا تالت يوم بي موية فول ....
يمهل ولا يهمل




تعليقات 26 | إهداء 4 | زيارات 4488

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#527284 [عوج الطندب]
0.00/5 (0 صوت)

12-03-2012 04:53 PM
والليلة والليلة جبتي براكي لنفسك ياأسماء ..البنية هينة بنضامن معاها وناكل البوش ...بعد الصيام ..لكن انتي شعرك الطوال ده يلقوا ليك باروكة وين ..بعد يتحلق ....الباروكات زاتا كملت ما في في السودان لانو الدولار ارتفع والموردين بقوا مابوردوها ...غايتو بكلم الفاتح جبرا يجازف ليك باروكة قديمة يجيبا ليك ...


#526670 [راجي حقي يوم الحساب]
0.00/5 (0 صوت)

12-03-2012 01:09 AM
أتأملوا قول الله تعالي( ياايهاالذين آمنوا قوا أنفسكم وأهليكم نارا وقودها الناس والحجارة)نسال الله السلامة.وتاملوا الأثر الطيب (المرأ يحشر مع من احب)...مهداة لآل كوز و بوش ومن أحبهم


#526619 [malla]
0.00/5 (0 صوت)

12-02-2012 10:50 PM
بت الكلب يا القضارف0 وين الشعارات الرنانة ووين الاناشيد الجهادية وزمرا في الجنة والذي منو0 وهاك يا هي لله وفي سبيل الله قمنا0 وعاشق لشذاها وسكران الجنه ههههههههههههه كخكخكخكخكخ 0 بالله مش عيب الشهادة دي جاتكم يابت قوش في بيتكم مالكم عليها في زولا مجاهد بيابا الشهادة0 ولا ناس على عبد الفتاح وشمس الدين ما عندهم مكانة لديكم0 ولا نسيتي المدفع اب رزام ابطلقاتا منصدرا ولا جبل الضرة المافي سيل حدرا والنار ولعت بي قلبي ب\فيها 0 صحيح الاختشو ماتو حلال عليكم الدنيا ونعيمها وحرام على رفاق دربكم وعلى المهمشين وشهداء بيوت الاشباح 0 قولي الروب انتي ومرة ود ابراهيم 0 ابكن يابنات قولن ووب وحيا وا سواد امو قوش وود ابراهيم 0 واتن يا ثكالى الهامش منكن العوض وليكن العوض0 الله يجازيك يا الترابي 0 اتاري كلامك صاح مافي حاجة اسمها جهاد في قاموس الكيزان بس لزوم نخم الشعب السوداني المسكين البسيط0 ليكم يوم وما تخافي يا حبيبتي 7يوم وماسمعنا حاجة من الذي منو الحصل لي شهداء انتفاضة رمضان المباركة وبقول ليك سدي دي بطينة وديك بعجينة وبكرة ابوك الشافو سفير السودان في لاهاي زاتو ماكضب


#526591 [ياسر الزبير]
0.00/5 (0 صوت)

12-02-2012 09:56 PM
هستين .

هسه كان كاتبه المقال اسمها اسماء قوش.

وبت قوش اسمها بت الجنيد .

موقفك فى الامم المتحده يكون كيف ؟

وهسه اسماء الاكلات الذكرتيهم ديل من باب الثقافه الغذائيه ولا من باب التعاملات اليوميه ؟

السؤال مطروح للجمهور .

كرررررررررررن الو .ممكن اشترك فى المسابقه ؟ طبعا ممكن معانا منو ؟ معاك الشعب السودانى

المغلوب من الجميع حكومه ومعارضه .

والاجابه من باب التعاملات اليوميه . الاجابه صحيحه .وعندك جائزه عباره عن شوال اعتذارات

.شكر ليكم كتير يا تلفزيون الوطنيه ممكن اهدى الجائزه ؟ طبعا ممكن. بتهديها لى منو ؟

لى بت قوش وبقول ليها نحن عندنا اي شوكه بتمرق بى دربها.


#526572 [تفتيحة لمن فضيحة]
4.00/5 (1 صوت)

12-02-2012 09:24 PM
وديني وأيماني أنا تفتيحة دا حاليا لأأملك حق (البوش)!والله علي ماأقول شهيد. تقولو لي بت (قوش)؟ بالله عليكم الله عمر البشير بصدق كلامي دا؟
تحياتي ليكم من كرتون كسلا.‏‎ ‎


#526528 [النقر عثمان]
0.00/5 (0 صوت)

12-02-2012 08:16 PM
الى المدعو برعي حسن برعي

لو دي كتابتك " يوا لازم تتحرى الحقيقة وانتا المزعلك قدر دا شنو ؟؟؟ والله لاكين يابرعي ؟ كلامك هو المنتهى السخف"
أمشي يا ولد اتعلم الكتابة ظاهر عليك اتفطمت في الانقاذ
(لكنتها شديد)


#526356 [Moto]
2.00/5 (1 صوت)

12-02-2012 03:59 PM
أنا اعلن تضامني مع ابنه قوش بالصيام معها
لأنو ما عندي شي آكلو ولكن لو اتبرعت لي
بالإكل ال رفضته بفطر طوالي


#526264 [الزوُل الكَان سَمِحْ]
3.50/5 (2 صوت)

12-02-2012 02:00 PM
أخت أسماء

أتمنى ممن له صلة ببنية قوش هذه..أن يرسل إليها المقالات التى وردت وتعليقات المعلقين عليها لتدرك حقيقة أبيهاالذى بسببه قد وهبت نفسها للموت جوعاً..وسنرى ماذا هى فاعلة بعدها
أتمنى ..أتمنى


ردود على الزوُل الكَان سَمِحْ
United States [برعي حسن برعي] 12-02-2012 05:24 PM
مية ليك


#526161 [سونو]
5.00/5 (1 صوت)

12-02-2012 12:00 PM
تسلمي يا استاذة اسماء -- وانا ما اظن مصدق اضرابا بس تقولي شنو
حركات النظام كتيرة -- والحكاية يا بت الجنيد من تجيب ليها رخوة
بتطلع ليك حاجات زي دي -- اضراب طفلة قوش -- ورحيل اسرة ود ابراهيم
من بيت الحكومة -- رفقاء البشير وزمرته يقولون محاول تخريبية
والصف الثاني يقول انقلابية الصف الثالث انقلابية تخريبية
ووساطات وعشائر تدخل ف الموضوع - حركة الاصلاح والتضامن
وهيئة المحامين المدفوعين دفعا للدفاع عنهم
واحلف ليك يمين : شفتي الحركات دي كلها
عشان تطلقوا سراحهم
ومافي شعرا بتمسهم ابدا
لانو مرة اقولوا ليك الجيش متزمر من اعتقاله لانهم صفوة
في صفوة احسن من الذين اعدمتوهم وسممتوهم
ليكم يوم إنشاء الله - بتموتوا بالجملة
وصدق حدث الشيخ محمود محمد طه


#526133 [النقر عثمان]
5.00/5 (2 صوت)

12-02-2012 11:33 AM
مقال منتهى السخف للأسف ،،، إن تناول موضوع البنت موضوع هايف أيه دخل البت بعمل أبوها هل كان من المفروض تمشي تقول ليهو إنت شغال شنو قاعد تسرق في مال الشعب ليه؟؟؟ قاعد تعذب الناس ليه؟ هل كان يحق ليها أن تدخل مكاتب الأمن وتمنعه من ممارسه عمله لأن فيه ظلم للناس ؟؟؟
أختي الكريمة هي بنت عادية والبنت عادة سواء أكانت سودانية أو غيرها تتأثر لكل نازلة تنزل بأبيها من مرض وكره وغيره ،،،
ليس من أخلاقنا السودانية أن نشمت على موت أو مصيبة أحد ،،، يحق لك نقد قوش كما يحلو لك لكن عائلته ده مالا ترضاه أخلاقنا السودانية السمحة


ردود على النقر عثمان
United States [برعي حسن برعي] 12-02-2012 05:26 PM
ايوا لازم تتحرى الحقيقة وانتا المزعلك قدر دا شنو ؟؟؟ والله لاكين يابرعي ؟ كلامك هو المنتهى السخف

United States [TIGERSHARK] 12-02-2012 03:12 PM
يعني بفهمك ده الابو برضو ما من حقو يسال بتو شغاله شنو وله بتجيب القروش من وين!!


#526122 [البوشي]
5.00/5 (2 صوت)

12-02-2012 11:25 AM
حرام عليك يابت الجنيد لو سمعك عبدالباقي الظافر (عبدالباقي عدس) مابيرضى الكلام داء في قوش اصلو هو مشكرو شكر وقال قوش رجل بر وخير لأنه اتبرع ليهم في مرة بي ثلاجة جديدة؟؟ طبعاً مسكين ماعارف انه النلاجةدي من مال الشعب المطحون الغلبان.. بس البنية دي ذنبها شنو يكون ابوها الذيب داء ؟؟


#526111 [ابو مازن]
5.00/5 (2 صوت)

12-02-2012 11:19 AM
والبنية المسكينة ذنبها شنو ؟ هي من اختارت ابيها خافي الله ولا تتخذي من مصائب الناس موجة تركبيها


ردود على ابو مازن
United States [النقر عثمان] 12-02-2012 07:52 PM
تسلم يا ابو مازن الموضوع اساسا كلو سخف لانو مبني على البت والتهكم عليها موضوع تشتم منه رائحة الشماتة وكأن البت اختارت ابوها ،،، يعني لو في محاكمة البت تتحاكم والام تتحاكم ولا شنو ،،، نحن لسنا ممن يؤيد الانقاذ وبؤرة الفساد ولكن نحن في النهاية سودانيين ،،، الحريم والبنات والاسرة كوم ،،، ومن أذنب في حق الشعب موضوع تاني يستاهل كل النقد وأكثر ولا بد من المحاسبة للكل طال الزمن أو قرب

United States [برعي حسن برعي] 12-02-2012 05:28 PM
بطلو الالتفاف حول المقال ما عندكم شغلة نهائي وخليكم موضوعيين قال البت المسكينة انتا لو عارف الناس البتموت من الجوع ما كان قلت الكلام دا وما هامانا تموت من الجوع ولا لا


#526102 [omer.kodi]
0.00/5 (0 صوت)

12-02-2012 11:09 AM
اللة يديكى العافية


#526089 [سوداني مغترب مظلوم]
0.00/5 (0 صوت)

12-02-2012 10:53 AM
تسلمي بت الجنيد : بنيّة قوش 23 سنة مرطبة ومبسوطة من مال الشعب - يمهل ولا يهمل - اليوم الدور جاء عليهم خليها تضوق الويل من العانو شعبنا المظلوم - وخلي قوش يشوف الأشباح العذبو بيها الأبرياء - وحسبنا الله ونعم الوكيل عليهم .....


ردود على سوداني مغترب مظلوم
United States [برعي حسن برعي] 12-02-2012 05:30 PM
للاسف قوش ممكن بالكتير يكون تحت الاقامة الجبرية زي الترابي وكمان في نعيم الشعب


#526078 [الإدريسابي]
5.00/5 (2 صوت)

12-02-2012 10:41 AM
يا اخوانا يعني مضربةمن الحاجات القالته بت الجنيد لكن الايام دي بتاكل فول وقراصه وكسرة وعدس وكدا.


#526050 [عدلان يوسف]
0.00/5 (0 صوت)

12-02-2012 10:14 AM
كتبت أسماء بت الجنيد :

"ناس صامتة و الفساد والظلم يقدل وسطهم مفتول العضلات ! عيانا بيانا, زول واحد بحتج مافي!


اللهم إلا من رحم ربي!!!"..

الشعب ، أختي أسماء ، في جب الخوف العميق ، والذل العميق ، والغيبوبة العميقة ،

لايعي ولا يتحرك في زمن تحرك فيه حتى الحجر احتجاجا على الظلم والطغيان ..


ترى ماذا يحس المواطن السوداني (المشغوف بمتابعة أخبار العالم ) وهو يرى أطفال سوريا يخرجون

في التظاهرات تحت قصف الطائرات والقنابل العنقودية ، والبراميل المتفجرة؟

ترى ماذا يحس وهو يرى حتى أطفال البحرين وطفلاته يتصدون للقمع بصدورهم الغضة ؟؟؟؟

ترى ماذا يحس هو يرى ظلم النظام وبشاعته في كل شبر في السودان ..ويصهين ؟؟؟!!


ويطمع في حكمه العتل قوش ويصهين ؟؟؟؟!!!!

ويعجز عن توفير الحد الأدنى من لقمة العيش ـ وهو يرى ماله ينهب وينهب ــ... ويصهين ...

ويرى بلاده تباع للمصريين.. والمستثمرين من كل مكان ويصهين .. ووالله لو أعلنوا عن بيع النيل

نفسه لما تحرك هذا الشعب الغريب ..فقد اتخذ قرارا باللامبالاة الأبدية ؟؟؟؟؟؟


وحتى لاننسى :

كانت فيما يسمى بالاستراتيجية القومية الشاملة كانت هناك فقرة ملتوية ترجمتها بالعربي

الفصيح : نريد تغيير "نواة " الإنسان السوداني حتى يتآلف مع " الإنقاذ " ولا يخرج إلى الشارع

مطالبا بحقوقه ..وهذا كلام معناه : سنخصص للشعب السوداني خبراء في غسيل المخ حتى يدخل في

غيبوبة عميقة لا يعي فيها ما حوله ..

بعد ثلاثة وعشرين عاما نقول بحزن شديد : لقد أفلحوا في ذلك ...وإلا كيف نفسر تصدي مائة محام

(من أبناء الشعب السوداني في النهاية ! ) في الدفاع عن مجرم انتهك أعراض أخواتهم وأخوانهم

وجعل التعذيب مسلمة من مسلمات جهاز الأمن ، وتحدث في خطاب شهير عن ذبح وسلخ وتقطيع أوصال

الشعب السوداني إذا ما مس أسياده " السابقين " بكلمة !!!!!!!!!!


وكيف نفسر أنه عندما كانت مظاهرات النساء السودانيات الباسلات تخرج في قضيةالصحفية لبنى أحمد

حسين كان المقبور حيا إسحق فضل الله يكتب في الصحف مقالا بعنوان " مظاهرة العاهرات " .. أي

والله .. ولم يحرك أحد ساكنا ..حتى أسر هؤلاء النسوة العظيمات...ودس هؤلاء المحامون رؤوسهم في

الرمال ..وولوا كأن في أذنيهم وقرا ...

حالة الشعب السوداني الحالة تستدعي فريقا على أعلى مستوى من المحللين النفسيين ،

والاجتماعيين، والسياسيين كما تستدعى جهودا ضخمة لفك حالة الغيبوبة التي أدخلوه فيها .. ولن

يفلح مليون مقال في المواقع السودانية .. ولا عشرة آلاف حالة تعذيب في إخراجه منها، ولا اعتراف

النظام نفسه بـ"عمايله "المريعة !!!!

آآآآآآآآآآآآآآآآآآآآآه يابلددددددددددددددد!!!!!!!!!!!!!!!!!!!!!!


#526025 [عجب]
0.00/5 (0 صوت)

12-02-2012 09:35 AM
والله ما خليتي ليهم جنبه يتكوا عليهامعطيهم معط ده لو كانوا بحسوا أصلا... لكن عمرك شفت تمساح بمعطو ليه ريشه ... كمل الكلام


#526019 [عدلان يوسف]
0.00/5 (0 صوت)

12-02-2012 09:32 AM
سلمت يدك يا أسماء بنت الجنيد ..

كم تنيرين بصائر هذا الشعب العظيم الذي أفلحوا في وضعه في غيبوبة أعظم .. كم تنيرين " لكن

قومي لا يعلمون " !


#526014 [سودانى ممغوس]
0.00/5 (0 صوت)

12-02-2012 09:29 AM
اللهم لاشماتة


#525945 [أجاك مكور]
5.00/5 (1 صوت)

12-02-2012 05:53 AM
"عارية وأدوها سوط" حسع البت دي جادة في إضرابها دي؟ وراجية منو يحن عليها؟ أن شاء الله ما تكون ولعت في نفسها النار زي بوعزيزي الكان جادي خالص في إصرايو؟ وبعدين أنحن أكان أكلنا حركات أبوها لبادة في بطنا البخلي نافخ وأبوريالة وحاج ساطور يحنو علي أبوكي شنو؟ نافخ ده تف في وش أستاذو العجوز لأنو بس درسوا زمان نظرية النشوء حقت داروين.
صفات أبوكي الكعبة ناس الراكوبة ما قصرو تب , وصفوه بالحيل ووثقو جرايمو الوحشية لاكن يا بتي أنا حنيت عليكي عديل كدي وما قادر أتخيل الجوع الكافر ده البيعضي في بطونا المليانة حصحاص ده كيف بيكون علي بطن رخو زي بطن بت قوش اللين؟
لو في زول بيوصل ليكي كلامنا في الراكوبة خليهو يقول ليها إتفكفكي بسرعة من بيتكم قبال ما ناس محمد عطا يفكرو في حركاتهم المعروفة ويوروكي الويل. شوفي أبوكي محل ما دس الدولارات المنهوبة وشوفي ليكي أقرب دولة إتخارجي ليها ان شاء الله تمشي غزة أصلك ما أخت نسيبة. الإضراب ده لا بحلك لا يحزنون.
كمان في مصيبتين راجيات أبوكي من ناس ود عطا: يا إما ياخد خشبة تخينة توديه التوج او يجيبوا ليه فرد الامن صاحب ال30 سم المتخصص في ..... ويعمل فيهو الكان بيعملو أبوك في المعارضين.
وكمان لو حصل أنقلاب وأبوكي لسع في المستشفي السياحي داك طيارتو بتكون قامت عديل كده.
حسع قلتي لي انت مضربة من الطعام منذ 8 ايام وبس بتشربي عصاير ولبن وتاكلي فواكه بس؟ حرررراااام عديل كده, ده كلو من العتوت, ولا ما بتعرفي العتوت؟


ردود على أجاك مكور
United States [ياسر الزبير] 12-02-2012 11:48 PM
يا اخونا اجاك الحريات الاربعه مافيها حرية التحدث عن بنات الانقلابيين السودانيين

لانو ده شان داخلى وبعدين الانتر نت متاح اعملوا ليكم راكوبه الكترونيه وانتكلموا

فيها ذى ما دايريين.


#525924 [Sakwaha]
3.00/5 (1 صوت)

12-02-2012 04:21 AM
يا جماعة الكورن فليكس ده شنو ؟؟ لحمة و للا حاجة تانية يعني الناس بقت حايمة بي أوريا و أمريكيا و أستراليا و بقوا يجيبوا لنا كلاماً كدي لا سمعناه في البطانة لا في دار كبابيش حيث الحلاب و الصر


ردود على Sakwaha
United States [برعي حسن برعي] 12-02-2012 05:32 PM
لا دي ملوخية ناشفة بس بكبو ليها شوية لبن


#525892 [عباس بن عباس]
4.00/5 (1 صوت)

12-02-2012 03:09 AM
انا الموقع ادناه اعلن كامل تضامني مع ابنة المجرم اسف المتهم قوش..ومن هذه الليله وحتي يتم اعدامه علي يد الشعب اتوقف -تضامنا- عن اكل اي نوع من انواع البوش خاصة هماك ندرة في المياه .... اتوقف عن تناول السخينة بكل مشتقهتهاو من دون قرقوش يا بت قوش خاصة انو اسعار البصل في ازياد والله علي ما اقول شهيد


#525880 [سودانى ود بلد]
0.00/5 (0 صوت)

12-02-2012 01:55 AM
البهرى المصارين والبمغص فى الموضوع المية محامى الاتلقطوا للدفاع عن قوش ...وكانو قوش معتقل سياسى زيو وزى اى مناضل اخر طيب وين ميات المحامين وليه ما رفعو قضايا ضد قوش والقضايا بالمئات والالاف فى الناس الاتعذبو واتقلوا تحت يدقوش ...ما دام مية محامى بتطوعوا لقوش المجرم الفاسد القاتل والسفاح فى البلد الغرائبيةدى ما غريب مصطلح اضراب عن طعام من بتو او اعتصام او مسيرة سلمية من نسوانو اكيد عندو اكتر من واحدة ...وهن واخواتهن والسائحئات ... عجب يا بلد


#525876 [ركابي]
5.00/5 (4 صوت)

12-02-2012 01:47 AM
أيها الشعب الطيب المتساهل ، لمدة 32 سنة ملطوش و مغشوش ، نرجوكم التضامن مع بنية قوش المكشوش.
فال الله ولا فالك يااستاذة 23سنة ما 32 سنة ونرجو انو رقم 13 الفي 2013 يكون رقم النحس علي الكيزان ويطيروا طيرة ام ريش من الدريش

انا حااتضامن مع بت قوش وما حااكل لا بيض سمك حفش ولا مارون جيلاسية اما الكورن فليكس فخليناهو من كنا شفع ايام الزمن الجميل واولاد ملاح وبقالة الاخوة


ردود على ركابي
United States [حنين] 12-02-2012 08:37 AM
ارجع للمقال ياخي الرقم صحيح 23 وليس 32 كما زعمت !!!!!!!!!!!!!!


#525875 [MG]
4.50/5 (3 صوت)

12-02-2012 01:42 AM
نسيتي الباسطورمه والمورتاديلا والهوت دوق أجارنا وأجاركم الله. والله المسميات بس تخلي الواحد زي أخونا وزير الدفاع لا يستطيع أن يدفع عن نفسه الرياله


#525871 [بكري الصائغ]
0.00/5 (0 صوت)

12-02-2012 01:33 AM
كورن فليكس) ده برضو شفعنا كتاااار ما شافوه!!

***- ولا الكبار!!


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة