حظك
12-03-2012 10:55 AM

حظك

الفاتح جبرا
[email protected]

برج الحمل :لا تقلق يا عزيزى لتحويل ملفك إلى النائب العام فهنالك تنتظر الكثير من الملفات التي لم ينظر فيها يعني لو كل ملف أخد ليهو كم سنة زى بتاع هيثرو ده فملفك عاوز ليهو كم وتسعين سنة .. لا تقلق يا عزيزي حصل شفتا ليك زول إتحاكم؟
الثور : سوف ينتهي مرتبك يوم خمسة في الشهر .. ستجد أن سعر صرف الدولار إرتفع وبذلك إرتفعت معه إسعار السلع .. لا تهتم لذلك كثيراً فكل شئ من الله (إنتا ما مسلم ولا شنو) ؟
الجوزاء : التوتر الذي تشعر به سببه سماعك وقراءتك لـ(تصريحات المسئولين) من خلال الصحف وقنواتنا وإذاعاتنا المحلية ننصحك بالابتعاد عن المنبهات مثل القهوة والشاي وكذلك ننصحك ببيع التلفزيون (أهو تتخلص من سماع التصريحات دى وتطلع ليك بي قرشين حلوين) برضو مع الفلس الحاصل ده .
الحوت: أجعل بينك وبين رؤوسائك مساحة ولا تحاول أن تكون قريباً منهم حتى إذا ما ثارت (شبهات الفساد) حولهم وعرفت الناس (الفلل والعمارات) والمزارع و(الحسابات) لم يتهموك بأنو أنت الزول الطلع (البلاوى دى)!
الدلو : سوف يمر عليك هذا الأسبوع بتاع العوائد وبتاع الموية وبتاع اللبن وبتاع النفايات كما إن (الجزار) سوف يطالبك بما عليك من مديونية متراكمة .. أقترح عليك )تعمل نائم(
الجدي : أخيراً سوف يتم تعيينك بعقد سري .. لا تنسي بدل العيدين وبدل اللبس وبدل العربية وبدل السفرية وبدل الدواليب وبدل التخصص وبدل التلصص !
القوس: حاول بقدر الإمكان أن تتجنب القيادة في الجزء الأيسر من الشارع فتدهسك إحدى عربات المسئولين المسرعة أو إحدي عربات الإسعاف (فارغة المحتوى)
العقرب : انت محظوظ حقا لأنك بعد الآن لا تحتاج إلى خارطة طريق عند خروجك من المنزل ... (محمد سيد الدكان) تعيش إنتا !
الاسد : بختك يا عم .. أمورك كووولها محلولة بإذن الله .. ح تصاب (بالصمم) وتركب عربية ع الزيرو وآخر موديل وح يكون مرتبك الشئ الفلاني وح يكون عندك دولاب مليان بدل وعمم وجلاليب و ومكتب تكييف مركزي وآخر أبهه .. ح تعين نائب في البرلمان
العذراء : سوف يطرد إبنك من المدرسة لعدم سداد الرسوم .. لا تسأل عن مجانية التعليم لأنه ليس هنالك مجانية تعليم بل هنالك شئ إسمه مجانية الحديث عن مجانية التعليم
السرطان : أخيرا سوف تودع الفلس والعطالة إذ صرح وزير المالية بوجود 30 الف فرصة عمل في الموازنة الجديدة ... (هي واسعة شوية) لكن عليك التمسك بالقشة !
الميزان : لا تتفاءل بالتغيير كثيرا .. يبقى الحال كما هو عليه وعلى المتضرر أن يرفع كفيه نحو السماء

كسرة :
قال أيه حظك .. هو فضل فيها حظ ؟

كسرة ثابتة :
أخبار ملف خط هيثرو العند النائب العام شنو(وووو وووو وووو)؟ - قريبا الإحتفال بالذكرى السنوية-




تعليقات 18 | إهداء 0 | زيارات 6751

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#528492 [watangalee]
0.00/5 (0 صوت)

12-05-2012 11:31 AM
الاستاذ الرائع دائما جبرا للاسف الاسيف سيعتبرك هؤلاء الخبثاء من المهرجين لانو طبعا هم عاملين فيها احسن ناس فاهمين أتمنى ان تعود للسودان عافيته قريبا وتنتهي ابراج النحس وتعود ابراج الحياة ويذهب من تسبب في اذى المواطنين الى الجحيم


#527840 [وانا زول غلباااااان]
5.00/5 (2 صوت)

12-04-2012 12:19 PM
#إتنين إتنين#
إتنين ما بتعلمو (خجلان ورافع نخرتو)
إتنين ما بزيدو (المرتب ووزن الرغيف)
إتنين ضيعوا البلد (الحكومة والمعارضة)
إتنين ربطوهم مع بعض (الكهرباء والموية)
إتنين اتنين ما بشبعوا (النار والمسئول)
إتنين ما بنزلو (الضغط والسكري)
إتنين سعرهم ما بيقل (السكر والدولار)
إتنين ما بمشو لي قدام (السودان وجنوب السودان)
إتنين ما تصاحبهم (..........و..........)
إتنين ما بيجتمعوا تاني (الوطني والشعبي)
إتنين شغلوا الشباب (المصارعة والفيس بوك)
إتنين ما إستفدنا منهم حاجة (البترول والدهب)
إتنين كرهونا القنوات السودانية (كثرة الكلام الساي والغناء)
إتنين حصريا على السودان (الكمونية وأم فتفت)
إتنين ملو البلد (صوالين الحلاقة وستات الشاي)
إتنين اي سوداني عندو (الملاريا والموبايل)
إتنين في الحدايق (إتنين إتنين)
إتنين ما يسكتو (المذيعة والفنان)
إتنين ما بيجيبو كاس (الهلال والمريخ)
إتنين صعبين شديد (الفلس والعرس)
إتنين مابشمو لي قدام (مواصلات الخرطوم ومدينة الأبيض)
إتنين عليهم الفاتحة (سودانير وخط هيثرو يا الفاتح جبرا)
إتنين حاولو التخريب (ههههههههيكا وههههههي هواء)
إتنين بحبوا بعض (إنتي وأنا)


ردود على وانا زول غلباااااان
United States [أبوأسامه المهاجر] 12-04-2012 05:07 PM
إنت مصيبة مش غلبان


#527674 [ود الجد]
0.00/5 (0 صوت)

12-04-2012 09:39 AM
استاذي الكريم خالص جبرة
انا من مواليد برج الجدي ولوحظي حايكون مثل ما كتبت حاعزمك علي صحن بوش فول بس زيت السمسم الفيه زايد شوية


#527660 [محموم جدا]
0.00/5 (0 صوت)

12-04-2012 09:29 AM
يا جبرا نحن الوحيدين في العالم الذين غيروا خطوط الطول و غيرنا الزمن بحجة البكور و غيرنا العلم مرتين و غيرنا الحدود الجغرافية لدولتهم و غيرنا التعليم و غيرنا الاقتصاد حيث لا يتأثر بأي اقتصاد عالمي يعني غالبنا نغير 12 برج و معهم خط هيثرو بتاعك دا اليكون وصل بين الخرطوم و جوبا و أنت لسه تسأل عنهأقترح عليك أن تركب من مطار اليرموك لتصل الى هيثرو عن طريق تل أبيب و في وقت اللاندينج ستسمع أن السودانيين غيروا حظهم الى برج السرطان (حظك مع جبرا)


#527525 [الحاله زين]
5.00/5 (1 صوت)

12-04-2012 12:20 AM
برج الفاتح : حيجي يوم تلقاهو راقد برش لأنو اسرائيل ما حتلقى هدف يستاهل خسارة صاروخ غير البرج دا ..
كسره : بيني وبينكم احسن برضو لأنو واقف براهو ذي العوير والأهبل


ردود على الحاله زين
United States [قلبي على وطني] 12-04-2012 03:38 PM
وقادننا بيه في كل القنوات الفضائية تقريبا


#527383 [عوص محمد احمد]
0.00/5 (0 صوت)

12-03-2012 07:21 PM
اخى الفاتح احوالك انشاءالله الظروف اتصلحت ولقبت طريقهلى وزاره او وكيل او نائب وزير او والى او اى حاجه انشاء الله نائب في برلمان ولائى فكلها اتجاه واحد نحو العمارات والفلل والمزارع والحسابات الداخليه والخارجيه- اما موضوع الابراج فكل الشعب السودانى من مواليد برج النحس ماعده المسعولين ايين كان موقعهم او وظيفتهم- المهم كل الطرق تودى الى المزارع واخواتها وعليك بالاجتهاد بالتقرب من ناس من اين تؤكل الكتف ودى نصيحه منى لمصلحتك - واسال لى عن اخبار الملياردير مدحت موضوعه وصل وين والا ملفو جاور ملف خط هيثرو مع ان السيد وزبر العدل نقل مكتب عند ناس نيابة الفساد ومأ شائف ولا حتت فساداي طلعت - الظاهر معاليه نسى موضوع مستشاره مدحت
لك وللقراء تحياتى


#527370 [سودانى ساكت]
0.00/5 (0 صوت)

12-03-2012 06:47 PM
يا زول متاكد محمحد سيد الدكان مات الحمدلله الواحد بعد ده ممكن يمشى وراسه مرفوع


#527276 [عوج الطندب]
0.00/5 (0 صوت)

12-03-2012 04:39 PM
وياجبرا ماهيتك كم ..ورطل السكر بقي بي كم ..
وجالون البنزين حايبقي بي كم ..
ياجبرا انا لي خمسة شهور ما ضقت لحمة ..يكون حظي مالو ؟؟؟؟؟؟؟؟؟؟؟؟؟؟؟؟
بعدين انا رافع يديي من زمن الجامعة للسماء ...اهو اسي بدت تمطر ..


#527257 [lالمقتول في عزة]
0.00/5 (0 صوت)

12-03-2012 04:08 PM
ياجبرا غير لو ما العواليق ديل اتخارجوا حظنا اصلو ما بيتصلح قال مشروع حضاري قال افقرتم البلد ...


#527222 [ياسر الزبير]
0.00/5 (0 صوت)

12-03-2012 03:27 PM
بىمناسبه الابراج السودان 1/1/1956

يعنى برج الجدى .

الابراج المتوافقه معاه (السرطان -الثور -العقرب).

كونوا حكومه من الاحزاب التلاته ديل .

طبعا الامور ماحا تمشى لانو الابراج التسعه حا يبهدلوهم .

والله دى مشكله.

اه يا وطن .

دى اه يا وطن ما51 يا وطن.


#527106 [ربش]
5.00/5 (1 صوت)

12-03-2012 01:05 PM
الرائع جبره تحية و إحترام و دعوة المظلوم ليس بينها و بين الله حجاب و الشعب السوداني كلو مظلوم عدا أقلية الأبالسة فهم الظلم نفسو قاتلهم الله .


#527085 [حسن]
0.00/5 (0 صوت)

12-03-2012 12:41 PM
والله بإجبار انت قمة واكثر من رائع


#527037 [منتظر الصباح]
1.00/5 (1 صوت)

12-03-2012 12:00 PM
تعرف يا دكتور من نكد الحال العايشنو اختفى و انعدم الحظ بدرجة يصعب اليوم شرح هذه المفردة لأولاد اليوم،عليه اقترح شطب هذه المفردة من القاموس( يا حليل زمن الكرتلة )


#527014 [الغاضبة]
0.00/5 (0 صوت)

12-03-2012 11:34 AM
الجدي : أخيراً سوف يتم تعيينك بعقد سري .. الخ...

هههها حظي، ح اشيل شنطتي واجي طايرة على البلد، حاضر ما ح انسى البدلات واهم حاجة بدل العيديدن وراس السنة والكريسماس والايستر وشم النسيم ....


#527013 [الزوُل الكَان سَمِحْ]
0.00/5 (0 صوت)

12-03-2012 11:33 AM
يا أستاذ

ما خليت لينا فرقة نكتب فيها..ولايمكننا إضافة برج جديد.. يديك العافية والسيجارة الصافية


#527002 [awad]
0.00/5 (0 صوت)

12-03-2012 11:17 AM
ياجبرة متعك الله بالصحة والعافية وماعندى شىء أقوله ألأ أبداع الأبداع وهات من التقيل على طووووول.


#526991 [Abu Areej]
0.00/5 (0 صوت)

12-03-2012 11:12 AM
طيب وقت مافي حظ لماذا تصر اصراراً وتلح الحاحاً على ملف هيثروووو؟؟؟؟؟؟؟؟؟؟؟ يا سيد جبرا ما عذبتناااااااااااااااااااااا


#526985 [المشتهى الحنيطير]
0.00/5 (0 صوت)

12-03-2012 11:08 AM
الثور : سوف ينتهي مرتبك يوم خمسة في الشهر .. ستجد أن سعر صرف الدولار إرتفع وبذلك إرتفعت معه إسعار السلع .. لا تهتم لذلك كثيراً فكل شئ من الله (إنتا ما مسلم ولا شنو) ؟
مية مية يا عمك... دى بالغت فيها عدييييل ههههههههه


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة