فكي ماسورة ....
12-03-2012 01:28 PM

فكي ماسورة

أسماء الجنيد
[email protected]


حتى الفكي طلع ماسورة ؟ معقول دجال يصدق دجال ؟ دي غايتو قلبتوا فيها الهوبة يا ناس أبو جكة !!!
اها والفكي ده رتبته شنو ؟ فكي بي 3 دبابير ولا عسكري بي شريطين؟ولا زول عنقالي ساي؟
إنقلاباتكم بي فكي! إنتخاباتكم بي الخج والتزوير! تعييناتكم بالواسطة , تصريحاتكم بالرجالة، كلو شغل أوانطة!!
لكن حكاية فكي يساعد في الإنقلاب و إستلام الحكم دي قوية جدا جدا.
نهنئكم على الإنجاز الغريب وعجيب، والفهم الحامض أكتر من العرديب،والأفق القصير أقصر من طول العنقريب!!
هسه الفكي ده يا ربي حا تنتقموا منو كيف؟ بعدما فشلت المحاولة وقبضتوا عليه؟
معقولة تحاسبوه وإنتو اصلا مؤمنين بيه؟ يعني بتسجنوه وتعذبوه في بيوت الأشباح؟
ولا بتخافوا منو يجيكم ناطي الصباح؟ وينقلب ليكم وطواط بالليل ويوريكم الويل؟
غايتو التسوي بي إيدك يغلب اجاويدك!! يا ربي الفكي ده واحد تاني غير بلة الغائب ؟
الفكي الحدد المدة الزمنية بالسنة والشهر واليوم والساعة لبقاء الرئيس في الحكم ؟؟
دخل في حكم الله !! سبحان الله !! ويقولوا ليك نحن بالدين إهتدينا !! ياتو دين ده وياتو سنة دي عليكم الله؟حكمتو باااالغة.
اها نجي لي فكي الإنقلابات والمهمات المستحيلة !!
إتخيلت الجماعة ديل ملمومين في دارة ووسطهم الفكي الماسورة ضاحك علي دقونهم ولابع ليه كم مليون كده.
وما بعيد يكون عنده كم عمارة وعربية وجواز دبلوماسي !! ما اصلو الحكاية جايطة ، يعني بقت على الفكي ؟
يكونوا قاعدين والفكي مدور بخورو ولابس كشاكيشو وقاعد ليه في نصيبة تصدر منهااصوات غريبة لزوم الرهبة والتخويف.
ويبدأ يهضرب , شخارم بخارم ,, كوزنا الظالم ودفاعوا الكاضم , نصو حائم ونصو نائم وكلو طاشم ,كو كرو كب كرب لب ..
بدون شطارة، تخبتنا الطيارة،نسمع الصفارة ونجريى نتضارا وكيف الدبارة؟
نمرق نتدبأ نشوف الخسارة ونفك الجوعارة وروروروروووو. هي لله هي لله.. نعم للسلطة ونعم للجاه ..
بلة الغائب في الركائب لهطونا ضرائب، سرقوا حلايب،جانا كلب، سنونو صفر، عيونو حمر، حلب الناقة في السنقاقة.
(( كرج يا فلان))الرئيس الجاي منو؟((طبعا كرج))دي فيها قرصة حااارة من الفكي للزول البتقع يدوا عليه.
لازم يستحمل القرصة لأنه إحتمال يكون هو الرئيس القادم حسب بخرات الفكي! كلو بي تمنو !
وانا اقول الجماعة ديل مشلوطين و محروقين وممغوسين كده ليه؟؟ تراه كلو من قريص الفكي الطلع ماسورة !
يومك نحس يا فكي الجن، شيل شيلتك وشوفلك دبارة مع ناس دفاع الساطور والنظارة! مغايس الخسارات دي كلها بفكوها فيك..

وهكذا الفكي الضلالي يكون شغال طوااالي مدور وسطهم و الجماعه متنحين ومجهمين حوالينو!!
وهكذا حال البلد في ال 23 سنة الفاتت مشاركين في حكمها دجالين ومشعوذين!!
وما نستغرب إن وجدت عندهم وظائف كبيرة ومميزات ومخصصات من مال هذا البلد الهامل!!
معقولة يا عالم مستوى الجماعة ديل وصل الحضيض للدرجة دي؟
لو قلنا الناس ديل ناس دنيا ساااي! معقول مستوى تعليمهم و ثقافتهم مضمحل للدرجة دي؟
ومعظمهم دارع ليه شهادة دكتوارة في ضهره!! جهل مركب وعقلية متخلفة لدرجة إنهم يصدقوا الخرافات والدجل ده؟؟؟
و كانوا ماسكين البلد دي بي ياتو شريعة وياتو فهم؟؟ ودكتوارتهم دي جايبنها من ياتو جامعات؟وبرضو تقولوا علينا شذاذ آفاق ؟؟

حسبي الله ونعم الوكيل ,,,


متاوقة
معقولة يا ناس الحكومة ؟ عندكم بلة الغائب وما تقدروا ترجعوا حلايب ؟؟




تعليقات 26 | إهداء 3 | زيارات 4387

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#527983 [كركر]
0.00/5 (0 صوت)

12-04-2012 03:49 PM
يا اخوانا قصة الفكى دى ما جديدة فى الثورة الحارة الثامنة فى فيلا جميلة جدا كانت وقتها تساوى مليار ومئتين مليون اشتروها لفكى الكنكشة فى الوزارات والمناصب الرئاسية وشفوفو عفش بليلة هاوس المفروش فيها تعرفوا منو اللى اشتراها وفرشا بعدين فى واحد فكى مشهور جدا كان مطارد من ناس الامن لحدى مسالة الجنائية بتاعت الرئيس قال طلبهم بوش لحماية الرئيس هم مجموعة كبيرة ولما قالوا ليه الامن معذبهم فى شغلتهم اداهم شهادات ممهورة بتوقيع رئيس الجمهورية تؤكد انهم اطباءشعبيين ويضعونها فى عياداتهم وعند سفر الرئيس الاول بعد الجنائية للدوحة بتتزكروا ارجعوا لليوتيوب واطلبوا رحله الرئيس للدوحة وشوفوا المعاهو منو واحد ما بعرف اسمو ولكنه من بلد قوش ومشهور جداوسافر معاهو وبدون ياور وكذلك المتابع لدخول قوات خليل امدرمان فى اليد الطويلة الحكومة كانت مصرة فى الاعلام تظهر الحجبات المع القوات مماياكد ان العقلية واحدة حكومة الدجل والكجور والجاية باسم النبى ومرة تحكمك القبور


#527978 [ياسو]
0.00/5 (0 صوت)

12-04-2012 03:36 PM
* تحية لبنت الجنيد ( اسماء)
* وضعت يدك على جرح اجتماعى ينزف منذ عهود طاربة جذورها في مجتمعنا وكان العزاء الذى اسكت الكثيرين ان من يتعاطى تلك السموم هم الجهلة في المجتمع ولذلك فقد تعامل المستنيرين داخل هذا الاطار وحتى لا ننكر عليهم جميلا فقد نجحوا الي حد في الحد من هذه الخزعبلات برفع الوعى فى اوساط الجهلة.
* ولكن للاسف البغيظ انو في كتير من حملة الشهادات والمفترض يكونوا الغدوة يؤمنون بهذه الخرافات وبالفكى والعمل والتنجيم والحظ ودة دليل على انو ما كل متعلم مثقف والعكس صحيح - اما مؤهلات الفكى فهى بكل بساطة انو يكون ذكى جدا ويستخدم ذكاءه بحرفنة لجر زبائنه الغافلين مهما علا شانهم



ء




0


#527804 [محتارين]
0.00/5 (0 صوت)

12-04-2012 11:42 AM
يا اخت لوشرحو ليك معني ماسورة تاني ماتقوليها ابدا واصبحت متداولة حتي بين وزراء الهج والخمج


#527662 [اركا بركة]
0.00/5 (0 صوت)

12-04-2012 09:31 AM
حتى انتي يا عمتو اسماء بقيتي تعرفي ( الفكي ) ابو ماسورة ....


#527646 [fan]
0.00/5 (0 صوت)

12-04-2012 09:14 AM
قوش الحبيس مين الرئيس ؟؟؟؟؟؟؟؟؟؟؟


#527606 [جيبوها لي انا]
0.00/5 (0 صوت)

12-04-2012 07:34 AM
واللة داء كلام عجيب جدا


#527521 [ياسر الزبير]
0.00/5 (0 صوت)

12-03-2012 11:59 PM
يا اخ حمد والله انا مقال تضامنا مع بت قوش ما رضيته لانو البت لا تؤخذ بجريرة ابيها عشان

كده علقت على المقال .

والمقال ده خلى بالك ماشى مع الشارع السياسى لانو الشارع السياسى ما معروف ماشى وين.

اما موضوع الا ذاعه انا بدلعها وبكتبها الازاعه .

بعدين ما تزعل لانو انا طالع بعد الرد مباشره للحته النزلته منها .(لمن تصل الحته دى عليك

الله قول احسن).


#527505 [ود البلل]
0.00/5 (0 صوت)

12-03-2012 11:17 PM
بعيدا عن السياسة

اذا كان في فكي واحد وبكرر واحد فقط لديه القدرة على فعل شئ
لما خرج كأس العالم من قارة افريقياالتي لم تنله قط.

لكن عندما يجتمع الطمع مع خفة العقل يزدهر سوق الدجل.


#527491 [سند الدعجة]
0.00/5 (0 صوت)

12-03-2012 10:48 PM
أحسن خبر وصل لنا ان الامن السوداني ألقى القبض على صقر يتجسس ويصور مناطق ويرسلها الى اسرائيل عن طريق ألجي بي اس مباشرة من دارفور يا اخوان هل استغلال واستغفال الشعوب وصل الى هذه الدرجة كيف تم القبض على الصقر اذا وزير الدفاع بيقول ان الطائرة التي ضربت الخرطوم طافية النور مع العلم ان ثمانية طائرات شاركت بالضربة وكانت تسرح وتمرح في أجواء الخرطوم يا ناس اليوم أقمار صناعية وطائرات تجسس ما في حاجة لصقر ولاحمام زاجل اذا بدك تكذب كذبة خليها صغيرة حتى الناس تصدقها لكن هذا كثير يا حكومة الشعب السوداني ذكي بس الحكومة عقلها صغير.


#527478 [حمد ود خوجلى]
0.00/5 (0 صوت)

12-03-2012 10:19 PM
إنت يا الإسمك ياسر الزبير
إنت زاتك نازل من ياتو محطة ومقبل على وين وداير شنو بالضبط؟
من امس ملاحظ ليك مباري الأستاذة وبتنتقد نقد مكاجرة وشوفوني !
إسلوب الأستاذة سوداني قح وعاجب كتيرين من القرآء , ما يخصك إسلوب زعيط ولا معيط
بعدين إتعلم لغة عربية صحيحة لما تجي تمد لسانك وتغلط الناس!
الإذاعة بكتبوها بالذاء ذاء ذنب يا وهم, مش إزاعة!
كونك ما فهمت الغاية من المقال ، معناه واحد في إتنين يا إما إنت كوز بتتغابى
أو اصلا ما متابع الشارع السياسي وبالتالي ادينا عرض اكتافك يا خينا
لأنه إنت الوحيد المفندر بي ردك المشاتر، بالتالي اقصر الشر وما تقرأ للأستاذة
أو إتثقف واقرأ ردود الناس المتابعة غيرك وما تضحك الناس فيك.


#527476 [سودانى ود بلد]
0.00/5 (0 صوت)

12-03-2012 10:09 PM
يابت الجنيد يخدر دراعك وين ما تقبلى ...ضحكتينى والله شديد وشر المصائب ما يضحك ..حكومة تخلف عقلى وكدب ووهم ودجل وفساد وسفلى حاشاك الله وحاشا القراء ..عليكم الله دى ما فضيحة حكومة تقبض فكى لاشتراكه فى انقلاب ما بعملها الا زول موجود فى حكومتنا دى..وامس قالو قبضو صقر اسرائيلى وعندو اجهزة بث وبصور فى دارفور وبكرة حيطلعوا المارد بتاع علاء الدين ويساعدهم فى استخراج ماس وللا يورانيوم ...ملحوظة : ما تشتغلى بى ياسر الزبير او الجداد الالكترونى باين عليه غباء جماعتو وهبلهم وبلادتهم زول العربى ما بعرف يكتبوا عايزاهو يفهم كلامك ..ديل حقدين على الناس وفاقد مجتمع مهما على صوتهم


#527420 [malla]
0.00/5 (0 صوت)

12-03-2012 08:29 PM
يا اخوانا ناس الامن ديل اذا ما عارفنو فكي كارب وسبق ان تعاملوا معاه لزوم حجبهم من طلقات ومدافع الثوار ما كان القوا القبض عليه 0 وكمان بتعامل مع رؤساءهم وقيادتهم المطلوبين للعدالة0 ما شفتو كيف طير اوكامبو وجاب ليهم البنية المسكينة فاسو0 واقول ليكم حاجة تانية الزول دا لو فعلا ما ابتاري ساكت خلي يطلع من الجماعة الاعتقلوه يعني كدة بالصباح يلقو زنزانتو فاضية 0 عمومايا اخوانا ان بقى بلة الغائب بتاع سوبا صفارتو قامت 0 مسكين الفكي ومسكين قوش البداء يامل 0 دي الشلاقة الودت سيدا لحبل المشنقة يا فكي مالك ومالهم ديل ماك عارفهم بكتلوا الكتيل وبمشوا في جنازتو


#527406 [moony]
5.00/5 (2 صوت)

12-03-2012 07:58 PM
الفكي بيكون وعدوه الجماعة بالشئوون الدينية والاوقاف يا حليلك يا الشعب السوداني من دجالين لي دجالين


#527387 [ركابي]
5.00/5 (3 صوت)

12-03-2012 07:31 PM
ههههههههههههههه يادوبك كده الواحد عرف السبب في سكات الشعب السوداني 23سنة علي رغم العملوهو فينا تقول بالع سد الحنك اتاريهو الناس ديل بتاعين فودو ماجيك وسفلي وبلاوي
ربنا يفك سحرك ياشعب يابطل ومُعلِم وترجع لسابق عهودك كما كنت في اكتوبر 64 وابريل 85


ردود على ركابي
United States [ابومحمد السعودية] 12-05-2012 11:55 AM
أنت ماسمعت زيوت الطعام المكجره


#527354 [واحد]
5.00/5 (1 صوت)

12-03-2012 06:18 PM
بتتريقي علي بله الغائب !!! قالو وداد بعد ابراهيم شخص الدين سمشيآ اتوفي مشت ليهو قال ليها لو دايره نجيبو الغائب قالت ليه مخصماك بالنبي سيرتو ما تجي وللان ما اتعرف هو وين وبالمناسبه فكي غازي صلاح الدين شغلو كلو =فك كتابات = اصلو خواف شديد


#527304 [سودانى ود بلد]
0.00/5 (0 صوت)

12-03-2012 05:21 PM
بت الجنيد الله يخدر ضراعك محل ما تقبلى . ضحكتينى والله وشر البلية ما يضحك حكومة وهم ودجل وقصور فكرى وتخلف وفساد وسفلى واباليس وجنون وبلة الغايب وما خفى اعظم ...اها فى الزنقة يبانوا على حقيقتهم وياما حنشوف فيهم القران والدين المتغطين بيه دا ربنا حينزعوا منهم على قدر ما كدبوا علينا وعلى الدنيا كلها شوفى جنس العبط داقابضين فكى وبحققوا معاهو فى انقلاب عليك الله مش فضيحة وكمان قابضين صقر اسرائيلى ههههههههههه والطيارات تتقدل فى سمانا زى ما عايزة ...ولسة الجاية اغرب ... ما تشتغلى بالكوز المندس ياسر الزبير واحد من القوم المذكورين اعلاه .. باين عليه من صنف الوهم والتخلف العقلى تلاقيه لاهف كم مليون وفرحان بيها والعربى لسة ما بعرف يكتبوا خليك على قول المثل الكلاب تنبح والقافلة تسير ...وليهم يوم اولاد الهرمة


#527288 [برعي حسن برعي]
0.00/5 (0 صوت)

12-03-2012 05:00 PM
هو فكى ولا وداعية ؟


#527277 [عوج الطندب]
4.00/5 (1 صوت)

12-03-2012 04:41 PM
هووووووووووووووووووووووووووووووووي يا اسماء الجماعة ديل بلحقوك (سميةالرزيقية)
ولا عندك باروكة احتياطي .. ولا يكون عندك (فكي ) مكرب ..يروب الموية ...
لك التحية ...


#527258 [أبو ناهد]
4.00/5 (1 صوت)

12-03-2012 04:08 PM
إيييوه أديهم بالجهة الفيها الحديدة يا بت الجنيد إديك العافية


#527227 [الغاضبة]
0.00/5 (0 صوت)

12-03-2012 03:35 PM
كانوا ماسكين البلد دي بي ياتو شريعة وياتو فهم؟؟ ودكتوارتهم دي جايبنها من ياتو جامعات؟وبرضو تقولوا علينا شذاذ آفاق ؟؟


هم ماسكينها اصلا، هم فاكنها ماشة براااااها وهم في وادي والبلد في وادي والشعب الفضل في وادي...


#527212 [Petro]
5.00/5 (2 صوت)

12-03-2012 03:13 PM
الفكي دة بيكون فكي مذدوج !!!


#527203 [ياسر الزبير]
5.00/5 (1 صوت)

12-03-2012 03:03 PM
الاسلوب ده حق حاجه نفيسه فى الازاعه بتاعت امدرمان الصباح كل يوم بتحاول تعالج كم مشاكل

لانو برنامجه ازاعى مربوط بى زمن مافى مشكله تستشفى منها الاسلوب لكن لمن تستخدميه لمقال

مفروض تلتزمى بادبيات كتابته واهم جزئين افتقدهم المقال الموضوعيه معناها انا داير اكتب

فى شنو مصادرى شنو ومن بدايه الموضوع لى نهايته ما اطلع من الموضوع الاساسى (الفكى الماسوره-

تزوير الانتخابات -بيوت الاشباح-واحد صفر لى نائب الرئيس -واحد صفر لى وزير الدفاع -موضوع

شهادات الدكتوراه-وصف الحكومه للمتظاهرين -ومساله حلايب) وكده بنصل للجزء التانى المفقود

الغايه مما اكتبه يعنى هسه كان زول لقانى بقراء المقال وسالنى بيتكلم عن شنو المقال ده

اقول ليه شنو؟ ذى الامام البطلع المنبر وما محضر للخطبه يحمد الله ويسلم على نبيه ويلا على

ايه مع حديث على جنه على نار على حقوق زوجه على حقوق طفل على حج على عمره والسلام عليكم

ذى ما قال وجدى غنيم.


ردود على ياسر الزبير
United States [abumuhanad] 12-04-2012 12:24 AM
خلاص وقت ماعارف تفهمها وخايف اسالوك ماتقرا وكمان تعلق تبقي انت يااهبل يابتتهابل

United States [حمد ود خوجلي] 12-03-2012 05:05 PM
إنت يا الإسمك ياسر الزبير
إنت زاتك نازل من ياتو محطة ومقبل على وين وداير شنو بالضبط؟
من امس ملاحظ ليك مباري الأستاذة وبتنتقد نقد مكاجرة وشوفوني !
إسلوب الأستاذة سوداني قح وعاجب كتيرين من القرآء , ما يخصك إسلوب زعيط ولا معيط
بعدين إتعلم لغة عربية صحيحة لما تجي تمد لسانك وتغلط الناس!
الإذاعة بكتبوها بالذاء ذاء ذنب يا وهم, مش إزاعة!
كونك ما فهمت الغاية من المقال ، معناه واحد في إتنين يا إما إنت كوز بتتغابى
أو اصلا ما متابع الشارع السياسي وبالتالي ادينا عرض اكتافك يا خينا
لأنه إنت الوحيد المفندر بي ردك المشاتر، بالتالي اقصر الشر وما تقرأ للأستاذة
أو إتثقف واقرأ ردود الناس المتابعة غيرك وما تضحك الناس فيك.


#527167 [قاسم قاسم]
0.00/5 (0 صوت)

12-03-2012 02:29 PM
هو انت يااستاذه اسماء مصدقه الحاصل ده ,ما اظن انو غايب ليك امور البهلوه والدغمسه بتاعت اهلنا الساكنين العلالى وناسيين الزول محمد الرادح فى اكل العيش الكريم. ناس تاكل الربيت وناس تشفض الكورنفلكس ....حسبى الله ونعم الوكيل حسبى الله ونعم الوكيل.ربنا يجعل كيدهم فى نحرهم وانشاءالله ربنا يفتنهم فى بعض ويفضلوا ياكلوا فى بعضهم لمن يكملوا من الدنياونرتاح منهم.


#527164 [samijaber]
0.00/5 (0 صوت)

12-03-2012 02:22 PM
هويىىىى يا بتنا انتي مكانك امن عشان ما يلحقوكي هندوسة ديل اصلا كلاب مسعورة


#527151 [الفاقد حنان الوطن]
0.00/5 (0 صوت)

12-03-2012 02:02 PM
لكي كل التحية والتقدير
يافكي الكيزان تركبهم الطيران
وتلحقهم امات طة زمان
وتريح جميع اهل السودان
من اشباة ناس نافع وود عثمان
المامبختشو واهانو النسوان
ياحليل حبوبتي ام التيمان


#527143 [لالا]
5.00/5 (1 صوت)

12-03-2012 01:56 PM
الفكى ده يا ربى المنصب الوعدوه بيهو شنو؟ انتو عارفين هسى لو فتشنا تحت تحت بنلقى كتار من ناس الحكومة ديل اصلا فكيا(جمع فكى) الله يفك الفى ايديهم,قولوا آمين.احتمال يكون الشيطان البتعامل معاهو الفكى ده هو ذاتو موالى للنظام وما ضمنوا ليهو حقو عشان كده وصل المعلومة.لا لا احتمال الفكى بتاع الهلال والمريخ الزمااااااااااااان داك.لالالا ياخ الفكى ده احتمال لخبط بين القوش والبوش ووقع جوه الحوش واكل القرقوش وسحرو طلع فشوش معقولة يا عشوش.


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة