رسائل بلغة "الونسة"..!!
12-05-2012 01:42 PM

بالمنطق

رسائل بلغة "الونسة"..!!

صلاح الدين عووضة

* إلى وزير المالية إثر تأكيده البقاء في الوزارة لأن (جلده تخين) ولا يتأثر بأحاديث (الاستقالة):
*(أيوه كده يا علي محمود ينصر دينك، وري الوالي كبر تخانة الجلد الصاح
و البلد ح تلقى أحسن منك وين؟ ولو ما إنت كنا رحنا في ستين داهية، والناس اللي بحتجوا على الأوضاع الاقتصادية ديل كلهم خونة ومارقين ومندسين ومخذلين وعملاء ، وعقبال كده عشرين سنة في الوزارة ولو كره الحاقدون، وبالمناسبة أوضاع الناس لسه فيها شوية "نفس" وتحتمل المزيد من الزيادة في الأسعار والدولار)..
*إلى الصادق المهدي الذي صرَّح قائلاً:( قوش قال لي النظام بلا رأس ، تعال قودنا):
*(إنت يا الإمام ياخوي دحين ما متذكر جماعة قوش ديل كانوا قالوا ليك شنو زمااان قبل إنقلاب الإنقاذ؟ كانوا بحاولوا يتأكدوا أنو ناسك بتاعين الأمن والاستخبارات والداخلية ما سربوا ليك الخبر وأنك قاعد بـ"غباك"، أها هسع قوش عمل معاك نفس الشئ عشان يتأكد أنو أولادك اللي "جوه" قاعدين بـ"غباهم" وما ناقشين أي حاجة)..
*إلى وزير الصحة على خلفية العقار الإسرائيلي الفاسد الـ(منتهك لحدودنا):
*طالما أن العقار (منتهي الصلاحية) فأكيد دخل البلاد وهو "طافي لمبة" عشان كده لم تتمكن أجهزة "الرصد" من مشاهدته ، وكمان ربما يكون اتسلل بـ"الليل" والناس في" صلاة العشاء " فتصعب بالتالي عملية "المشاهدة" أكتر وأكتر، وعليه نقترح إنشاء لجنة عليا تكون عيون أفرادها غير مصابة بـ"العشا الليلي" ونظرها ستة على ستة)..
*إلى النائبة البرلمانية سعاد الفاتح وهي تقول لزملائها النواب معاتبة:(قاعدين زي تلاميذ المدارس!!)..
*(حرام عليك يا حاجة سعاد، "إخوانك" ديل شايفين شغلهم كويس بدليل أنهم "بصفقوا" لقرارات زيادة أسعار السكر لمن يحسوا أنو البلد ح تنهار بدون الزيادات دية، بعدين يا "أختاه" ديل "اتجرأوا" على الحكومة ذاتها مطالبين بتحسين أوضاعهم المالية فكيف يعني تشبهيهم بتلاميذ المدارس اللي "بتجلدوا" هذه الأيام تلاتين وأربعين وخمسين جلدة؟! وآخر هام: انت ليه عاوزاهم يناكفوا الحكومة في كل شئ ماداموا هم شايفين أن الأمور تمام التمام؟! اتقي الله يا حاجة)..
*إلى المحتفلين بالذكرى السنوية للشيخ حامد أبو عصا:
*أها يللا شيلو شيلتكم مع " الوريث الشرعي" للشيخ أب عصاية غازي سليمان، وكمان عاملين الاحتفال غرب سوق الموردة بدلاً من جنوب منزل غازي بالخرطوم "2" ؟! هو لو ما حفيد أبو عصاية ده اللي قلب "180" درجة من أقصى المناوأة إلى أقصى المنافحة كانت الإنقاذ دي قعدت لحد هسع؟! ما كان زمان "التحالف الديمقراطي" جاب خبرها)..
*إلى الذين ضبطوا مجموعة من الشباب (بعملوا مع بعض حاجات مش كويسة) ويتم تصويرهم بالفيديو:
*(وإيش دراكم أن الأولاد ديل غير مشاركين في "فيديو كليب" خاص بواحدة من أغنيات هذا الزمان؟!
يعني مثلاً أغنية "سيدي البريدو، خلاني وحبَّ سيدو" كيف يمكن تجسيد قصتها تمثيلاً في رأيكم بغير هذا "التلاحم" الذكوري؟!!!!


الجريدة


تعليقات 14 | إهداء 0 | زيارات 3724

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#529460 [عبد الله]
0.00/5 (0 صوت)

12-06-2012 04:24 PM
ما زول يكتب لينا كلام حلو عن السودان ؟


#529390 [ودامبعلو]
0.00/5 (0 صوت)

12-06-2012 02:46 PM
اها يا الحبيب حنمرق الشارع وله لسسسسسه شويه
وله اقول ليك نحن برضو حنتخن جلدنا وما طالعين والرهيفه التنقد ( كان لي اسه مانقدت)


#529347 [jangy]
0.00/5 (0 صوت)

12-06-2012 01:55 PM
وليش سؤ الظن حب الاسياد دا عند المريدين لسيدى على وسيدى الحسن وللا نسيتهم خلاص


#529248 [ابو عزام]
0.00/5 (0 صوت)

12-06-2012 12:17 PM
والله يا ود عووضة ...
البلد في خراااااااااااااااااااب
والكلام درااااااااااااااااااااب


#529078 [حسبو ودبدر]
3.00/5 (2 صوت)

12-06-2012 09:17 AM
مقال في منتهي الجرأة والفعالية وضارب مجموعة(صقور)وليس عصافير بحجر واحد،تسلم البطن الجابتك أستاذنا الجليل(عووضة)


#529074 [المشتهي الكمونية]
1.00/5 (1 صوت)

12-06-2012 09:13 AM
والله يا ود عووضة ونستك بلحيل حلوة ، عليك الله تونسنا زيادة


#529037 [حنظلة]
1.00/5 (1 صوت)

12-06-2012 06:43 AM
سيدي البريدو، خلاني وحبَّ سيدو"
و الله دى بالغت فيها عديييييل. هههههه


#528997 [أحمد]
0.00/5 (0 صوت)

12-06-2012 03:00 AM
حاجة سعاد الله يزورها بيت المصطفى. بالمناسبة بت الغبشاوي وين؟ مافي وزارة مطرفة كده لي سناء حمد؟ ورجاء حسن .. ديل بيجيبوا نسوانن ديل من ياتو كوكب؟


#528842 [Dakeen]
1.00/5 (1 صوت)

12-05-2012 08:18 PM
ونسك دقاقة شدييد ،،، والاشد منها طابور الصباح ،، يا ربي بكون في تفتيش على العمم ،، الجيوب ،، مثلا العمة بي اقل من 5 مليون ما يخش الفصل ،، والما عندو حساب في دولة اوربية ما يدخل الفصل ،، والما بحب الرياضيات ما يخش

يا ربي الألفة بياكل سندوتشات الطلاب الضعيفين برضو ؟
وبياخذ امتيازات من مرشد الفصل مقابل خدماتو الاستخبارية ؟؟


لكن الحاجة شكلها واعية شديد؟؟


#528834 [hajabbakar]
0.00/5 (0 صوت)

12-05-2012 08:06 PM
ياخى حرام عليك نسيت تخرم على الوزير ابو تقاوى غير فاسدة والقطن الماعارف ايه ويادوب قضى نصف عمره فقط مستوزرا وبتاع العواسة دا خلاها ليهو عمك الجاز بعد ان تاكد انو مافيها فايدة ومافى طريقة يلم بيها ايرادات غير زيادة اسعار الجاز والبنزين
وماتنسى انو الناس ديل وريث غير شرعى لشيخ ولكنه بدون عصاية والكل فى انتظار الاحتفال بحوليته
وحولياتهم كلهم لانهم يخاطبون بعضهم بكلمة شيخ لايشيخ والماعجبو بنقد ليهو عينو ونخلى ليهو التانية عشان يشوف بيها الطيارات


#528745 [جراداي في سروال ما بعضي]
4.75/5 (3 صوت)

12-05-2012 05:52 PM
الأدوية الإسرائيلية براها, قال ليك في صقر إسرائيلي عديل كدا انتهك حدودنا!


#528698 [خليل عزة]
5.00/5 (2 صوت)

12-05-2012 04:30 PM
إلى المحتفلين بالذكرى السنوية للشيخ حامد أبو عصا:
*أها يللا شيلو شيلتكم مع " الوريث الشرعي" للشيخ أب عصاية غازي سليمان، وكمان عاملين الاحتفال غرب سوق الموردة بدلاً من جنوب منزل غازي بالخرطوم "2" ؟! هو لو ما حفيد أبو عصاية ده اللي قلب "180" درجة من أقصى المناوأة إلى أقصى المنافحة كانت الإنقاذ دي قعدت لحد هسع؟! ما كان زمان "التحالف الديمقراطي" جاب خبرها)..

ده غايتو زمآآآان مرة كدة قال للشفيع انحنا جاهزين تعال صيغ لينا البيان

اها قام وداه الماسورة

ياربي المرة دي (بكون عندو يد)...

ما أظنك (طريتو) عبث..


#528636 [الأرباب]
5.00/5 (1 صوت)

12-05-2012 02:27 PM
الحاكم الغبي يخاف الأذكياء..... لذالك لا يحيط نفسه الا بالأغبياء والجهلاء في كل المناصب بقدر الإمكان ... وبعناية فائقة
يتأكد لي هذا بعد كل مقابلة تلفزيونية تجري مع المسئولين من نواب ، وزراء الي اقل مسؤول في أي شباك حكومي .....آخرها بالأمس مع رئيس مجلس إدارة مؤسسة الأقطان السودانية الذي تم تعينه بعد فضيحة الفساد الشهيرة ...هذا الرجل لا يدري ما يقول وما هو فاعل .... وهو يجلس علي راس مؤسسة كانت قبل لإنقاذ تجلب الي خزينة الدولة 40% من دخل السودان من العملة الصعبة !!
.لذالك بحساب الاقتصاد .....اذا كان البشير من الجهل والغباء .....لدرجة فقده ثلث مساحة البلاد( دون مقابل ) .....لك أن تتخيل ماذا فعل الأغبياء الذين اختارهم باقتصاد السودان .... الجهل هو سبب الخراب الذي نحن فيه!
الحاكم الجاهل يخاف من هو اعلم منه .... لذالك ضيقوا في الرزق علي كل ( ذو فهم وعلم ) مع قلتهم'لتخلوا لهم الساحه واصبح البلد يقوده الغنم من البشر الذي لا هم له غير الطعام ....وجماعة دعوني أعيش !
بلد...الناهي والأمر فيه حامل شهادة ثانوي ومش كدة وبس بل أيضاً عسكري وفي العسكرية بتاع مدرعات....
مشكلة السودان الاساسية تكمن في ان اذكيائه قلة وبسطائه كثر ...... وثقافتهم دينية بالدرجة الأولي وما عداها ضعيف شديد وخاصة الدنيوية.... (الزائلة)
باختصار فاقد الشئ لا يعطيه .....وكما تكونوا يولي عليكم
والله من وراء القصد...


#528608 [الزوُل الكَان سَمِحْ]
4.00/5 (2 صوت)

12-05-2012 01:52 PM
ههههههااااى..خلانى وحبا سيدو!!!!

ولد ددده


صلاح الدين عووضة
صلاح الدين عووضة

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة