فكي (تخريبيات) بالدجاج ..!!
12-07-2012 12:01 PM

بالمنطق

صلاح الدين عووضه
[email protected]


فكي (تخريبيات) بالدجاج ..!!

*اقترح على والي الخرطوم إن يُنشئ مجمعاً بالعاصمة خاصاً بـ(الفُكوة) إن جازت صيغة الجمع هذه لمفردة (فكي) ..
*فـ(الفكوة) هؤلاء أضحوا - بالنسبة للكثيرين في زماننا هذا - أهم من الأطباء والاستشاريين والاختصاصيين ..
*ولكن المشكلة تكمن في صعوبة وصول (ذوي الحاجات) إليهم لانزوائهم في الأطراف والضواحي و(العشوائيات) ..
*ثم - تماماً كما في مجمعات الأطباء - يُكتب تحت اسم كل فكي تخصصه الذي يبرع فيه ..
*(يعني) - مثلاً - الفكي (شبكة) ، اختصاصي عِلل التهديف في المرمى كحالة سكواها (بتاع) المريخ ..
*والفكي (ربطة) ، اختصاصي (الربط) بأنواعن كافة ؛ الخفيف منه والمتوسط والثقيل والـ(مافيش خالص) ..
*والفكي (هندسة) ، اخصائي الامتحانات والاختبارات والمعاينات ..
*والفكي (رادار) ، اخصائي اكتشاف واستخراج كل أشكال (العمل) ولو كان في جوف بئر ..
*والفكي (جكيس) ، اختصاصي أمراض الحب و(الشوكشة) والتعدد و(الدفع الرباعي) ..
*والفكي (ماسورة) ، اخصائي إحالة أيما مبدع في مجاله إلى (ماسورة) بناءً على رغبة العميل ..
*والفكي (تخريبي) ، اختصاصي إنجاح (محاولات) كل قائل من الزبائن : (واحد تخريبي بالدجاج وصلحو) ..
*والفكي (استخباري) ، اخصائي ( رصد) ما يعمل على إنجاحه زميله (التخريبي) ..
*والفكي (انقلابي) ، اختصاصي الانقلاب على أنظمة الحكم (ليلاً) ..
*والفكي (تأميني) ، اخصائي تأمين الانقلابات الناجحة - أي (الثورات) - إلى أن (تتمكن) ..
*وفضلاً عن أهمية تجميع (الفكوات) في مكان واحد - تسهيلاً للمواطنين - فإن ثمة فوائد سوف تجنيها حكومة الولاية..
*فالبنسبة للخريجين العطالى يمكن للولاية أن ترتاح من (همهم) عبر تسكينهم في وظائف سكرتيرين ومستقبلين و(محصلين) لدى (الفُكوة) ..
*ثم التحصيل هذا - والذي سيكون كثيراً ولا شك – يذهب جانب منه إلى خزينة الولاية تحت بنود (إيجار، حماية ،ضرائب ، دمغات ..... إلخ )..
*والأهم من ذلكم كله هو سهولة (رصد) عملاء (فكوات الدجاج) على وجه الخصوص ..
*ونأتي أخيراً إلى أهم فكي من هؤلاء على الاطلاق ونُطلق عليه لقب (كبير الاختصاصيين) ..
*إنه المتخصص في شؤون (تسخير الجن) لصالح الحاكمين ..
*ونظراً لحساسية تخصصه نقترح تمييزه عن (بتاعين الدجاج) ووضعه في جناح خاص أعلى (برج الفكوات) ..
*ثم يُكتب على لافتته (فكي رئاسي) !!!!


الجريدة


تعليقات 18 | إهداء 0 | زيارات 4112

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#531030 [بنياس]
0.00/5 (0 صوت)

12-08-2012 10:28 PM
الناس ديل ما فهموا كلام سيدنا الفكي !!!
هو ما قاصد جدادة
هو بيقصد نعامة و بالتحديد (نعامة المك)


#530840 [عبدالله عبدالله]
0.00/5 (0 صوت)

12-08-2012 04:21 PM
وماذا عن الفكي "مالية" الذي يجعل رجلاً فاشلاً، فاسداً، مدمراً كعلي محمود يظل في منصبه ولو أهلك الحرث والنسل، ويجعل من البشير قطاً وديعاً أمام وزير ماليته ولا يجرؤ على سؤال وزيره مجرد سؤال عن أين بدد مبلغ 2 مليار دولار في ظرف 15 يوماً؟


#530621 [NASRELDEEN ALI]
0.00/5 (0 صوت)

12-08-2012 12:26 PM
يمكن شراء ماكينات لحام ببعض المال المجنب


#530556 [ود دفع الله]
0.00/5 (0 صوت)

12-08-2012 11:34 AM
الجمع فوكيا يا ود عووضة( جمع فكى) وهو الشخص الذى يتعامل مع المحاية ويكتب لك لكى تكون ذكيا وتدخل جامعة الخرطوم ويكتب لك لكى تكون محظوظا وتتزوج اجمل بنت فى قريتكم ويكتب لك لكى تهاجر الى الخليج وتشتغل مدير وتاخذ الهلل حتى لو ما عندك شهادات .


#530425 [هادى]
0.00/5 (0 صوت)

12-08-2012 09:35 AM
ردا على بنت ملوك النيل ويحيى
اللغة العربية بها لهجات كثيرة جدا وابدال الحروف عادى جدا فمثلا انا حضرت احدى
دول الخلملة يج فبل عامين ووجدت انهم يقولون فى معاملاتهم الرسمية كلمة حسم ( بالحاء المهملة والسين بدلا عن كلمة خصم (بالخاء المعجمة والصاد وكثير مثل هذا ونحن عرب فصحاء


#530243 [ود كردفان الغرّاء أم خيراً جوّة و برّة]
0.00/5 (0 صوت)

12-08-2012 12:15 AM
هههههاا.. اضحكت سننا يا ود عووضة!!
اسلوبك المرة دى يشابه اسلوب الفاتح جبرة.. الله يديكم العافية انت و جبرة طول ما الدجاجة حافية القدمين.. بس تلبس الدجاجة بعديها الله لا يديك عافية! على قول اهل الشام


#530131 [عبار عبارين]
0.00/5 (0 صوت)

12-07-2012 08:07 PM
أنا يادوب عرفته البشير ده بتكلم ساى عشان المعه دجاج


#530100 [انا]
0.00/5 (0 صوت)

12-07-2012 07:27 PM
فى فريتى الصغيرة هناك فكى مدير خلوة الحلة يعمل له الجميع الف حساب وحساب وحتى فى احد الرمضانات وفى ا الايام وضعنى حظى العاثر فى ان اكون احد الفاطرين فى هذه الخلوة التى ينتظر اهلها حتى ياذن الفكى بالاذان ولا عبرة له فى ان تسمع كل اذانات الجوامع فى القرية والقرى المجاورة التى تكون عادة قبل 9 او 10دقائق قبل اذان الفكى وفى هذه الخلوة فى الامسيات تجد عربات المسؤلين وزراء ومدراء عامين واخرون دون ذلك او فوقه من اجل البقاء فى الوظيفة اطول فترة ممكنة او من يريد الترقى هؤلاء ينافسون النسوة المسكينات الائى يردن ابن الحلال زواجا كان او خلفة هذا حالنا


#530096 [يحي]
0.00/5 (0 صوت)

12-07-2012 07:20 PM
بالمناسبة كلمة فكي فهي في الاصل محرفة من كلمة (فقيه) ولكن بعض السودان ابلد من البلادة نفسها .لماذا تم إرجاع كلمة فاطنة الي اصلها العربي اي فاطمة ولم يتم إرجاع كلمتي أبكر وفكي الي اصليهما العربيين :أبوبكر وفقيه ؟؟؟؟؟؟؟.


ردود على يحي
United States [بت ملوك النيل] 12-08-2012 12:14 AM
انا برضو مغيوظة زيك ..وما عرفت انو فكي مقصود بيها فقيه الا لمن جيت الخليج..ويقولو ليك عرب..
كسرة: يا ريت نرجع همزة لأصلها حمزة برضو


#530085 [Alsudany 24]
5.00/5 (1 صوت)

12-07-2012 07:00 PM
في واحد جنب مدنى فكي بتاع حب اسمو (تايتانيك)
والله دا معلم اختار اسم عجييييييييييييييب


#530079 [..... أم بتاري .......]
5.00/5 (1 صوت)

12-07-2012 06:54 PM
وفكي صلي ... ما بصلي
فكي صلي ... ما بصلي

جيبو الصوت ... الله أكبر!


ردود على ..... أم بتاري .......
United States [بت ملوك النيل] 12-08-2012 12:16 AM
ههههههههههههه دي طلعتيها من وووووووين؟؟؟بس بقولو جيبو السوط الله اكبر..اضحك الله سنك


#530066 [الزُول الكَانْ سَمِحْ]
5.00/5 (2 صوت)

12-07-2012 06:36 PM
يا ود عووضة

طيب على كده كل ولاية تكون محتاجة تعدد من الفكوات بحسب تصنيفاتك لأنه من غير المعقول أن يغطى الفكوات المركزيين كافة الولايات....مجرد إقتراح

ولد ددده


#530046 [ابو سكسك]
5.00/5 (3 صوت)

12-07-2012 05:50 PM
قلنا نساهم معاكم:
حملت امرأة سفاحا من خلف الله وذهبت الي المحكمة بعد ان أنكر ورفض الزواج بها. خاف خلف الله خوفا شديد وذهب الي فكي ابو طاقية وحكي له مشكلته. فقال له فكي ابو طاقية (ما تخاف، انا حأخفي ليك لغاليغك في يوم المحكمة، لو القاضي سألك قول ليهو أنا من الله خلقني ما عندي لغاليغ زاتو، انت بس جيب لي دجاجة سودا يكون شايلها لواء في الجيش من قرايبك في الصندوق الخلفي لسيارته وخلي الباقي علي). قام الفكي ابو طاقية بالمهمة وكانت ناجحة لابعد الحدود.

في يوم المحكمة وقف خلف الله بكل ثقة أمام القاضي وقال له (يا سيادة القاضي، المره دي كضابة ساي، أنا من ما أمي ولدتني ما عندي لغاليغ، وعشان اكد ليكم الكلام ده جيبوا أي دكتور يكشف لي. بالفعل أمر القاضي بالكشف الطبي على خلف الله، وجاء تقرير الطبيب صادما للمرأة’ وأهلها (خلف الله ما عندوا لغاليغ). حكم القاضي ببراءة خلف الله.

خرج خرج خلف الله مزهوا من المحكمة واتجه مباشرة صوب بيت الفكي لاستعادة لغاليغه وعند اقترابه لاحظ إن هناك صيوان منصوب أمام بيت الفكي ابو طاقية، فجعل قلبه يدق بقوة وهو يردد (الله يستر....الله يستر.... الله يستر.... الله يستر) حتى وصل الي الصيوان ورفع الفاتحة وسأل (يا جماعة المات منو؟) فرد له الجالسون (فكي أبو طاقية) فما كان منه إلا أن أجهش بالبكاء. بكى خلف الله بكاء مريرا حتى ظن الجالسون بالصيوان ان خلف الله هو شقيق الفكي. جعل خلف الله ينتقل بين الموجودين في الصيوان وكان في كل مرة يسأل (يا جماعة الفكي ده ما خلى ليكم أي امانة قبال ما يموت؟) فيأتيه الرد صادما (لا لا والله ما خلى أي امانة او وصية لأنو مات فجأة) فيزيد من بكائه. عاش خلف الله بقية عمره بدون لغاليغ الي ان توفاه الله بعد اربعون عاما من ذلك الحادث.


#529985 [ودامبعلو]
5.00/5 (2 صوت)

12-07-2012 03:43 PM
كدي شوف لينا واحد فكي كارب وصلحو عشان يقول لينا قربنا نطلع الشارع وله لسسسسسسه شويهش


#529954 [Dokom]
5.00/5 (4 صوت)

12-07-2012 02:23 PM
أخي عووضة، السلام عليكم

جمع فكي ْفكيا، بضك الفاء وفتح الباقي، هكذا أخبرتنا عنقالية جرجيرة.


#529952 [الطيب]
4.63/5 (4 صوت)

12-07-2012 02:22 PM
.
محن
الجماعه ديل مالاقين ليهم واحد عاقل يقول ليهم
سيبو العباطه والعواره البتسوو فيها دي
ياخى اصغر طفل ما ممكن يفكر بطريقتم دى
غايت فلم العواره والعباطه والجهل بتاع الكيزان دا يحلنا منو الله .
.


ردود على الطيب
United States [واحد تانى] 12-08-2012 01:42 PM
يا ناقش انت داقس .....!!

United States [ناقش] 12-08-2012 09:18 AM
أول حاجة قصتك (بوخها يلوي)، تاني حاجة لماذا أخترات اسم (خلف الله) بالتحديد ؟ طيب ما تخليك واضح ياخي وتختار اسم (العوض) بدل (خلف الله)


#529909 [بت الخرطوم]
5.00/5 (6 صوت)

12-07-2012 12:54 PM
الله يجازى محنك اجدت وابدعت بس نسيت فكى مهم جدا انت شخصيا يهمك فكى صحفى اخصائى تنقيح واختيار صحفيين ذات كفاءةعالية لابطال وتفنيد اكاذيب الطيب ومروح وتيتاوى وبقية مجموعة الدجالين والدراويش وذلك باستخدام ديك لون زينب


صلاح الدين عووضه
صلاح الدين عووضه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة