لماذا ماتت الدجاجة؟
12-10-2012 10:37 AM

لماذا ماتت الدجاجة؟

الفاتح جبرا
[email protected]

جاء في تفاصيل الاعترافات التي أدلى بها المتهمون في المحاولة (التخريقلابية) الأخيرة التي تم نشرها مؤخراً بالصحف مشاركة (فكي) ليقوم بأعمال الدجل والشعوذة، حيث أقرَّ (الفكي) بأن ضابطاً برتبة اللواء لجأ إليه للقيام بعمل يمنع تحركات قيادات متنفذة في الحكومة وجهاز الأمن وذكر (الفكي) في إفاداته أنه طلب من المتهمين إحضار (دجاجة) ، وعندما جاء بها أحدهم في (ضهرية) عربته وجدها (ميتة) .... ترى لماذا ماتت الدجاجة :
• ميكانيكي : شوف يا معلم الجدادة دي ختوها في ضهرية العربية والعربية الظاهر المساعدين الوراء بتاعنها خفاف ومع الحفر والمطبات الجدادة ما إستحملت ولحقت أمات طه
• جزار : هو ذاتو ده إنقلاب وللا (دقة ظار) جدادة شنو كانو يكلمونى كنتا جبت ليهم خروف عمبلوك لو ختوهو في الفرن ما يموت مش ضهرية عربية
• معالج بالأعشاب : مفروض كان قبل ما يدخلوها ضهرية العربية يدوها شوية من بذر الكتان ويخلطوا معاها فنجان محريب وشوية حبة سوداء عشان المشروب ده بيعالج السخانة والكتمة بتاعت الضهرية
• حماية المستهلك : نحن دائماً ننبه المواطنين إلى ضرورة التأكد من صلاحية المنتج والحفظ والتخزين السليم له ومن الواضح أن هذه الدجاجة لم تحفظ في درجة حرارة مناسبة مما أدي إلى نفوقها
• طبيب بيطري : القصة ما عاوزة ليها أي نقاش الدجاجة دى ماتت بي أبوفرار (السحائي يعني) .. خاتينها في ضهرية العربية في الشمس الحارة دي ولافين بيها لحدت ما حصل ليها الحصل ليها
• ريئس تحرير : لو ماتت ما تموت الأهم من ده كولو المانشيت : (دجاجة تقرر مصير امة) !
• خضرجي : كان لازم تموت .. الجدادة دي تكون ماتت بالأنيمياء .. الجداد زمان أيام الدنيا بي خيرا كان بيدوهو في البيوت باقي الرجلة وباقي الخدرة هسه البيوت بقت ناشفة وما فيها حاجة يرموها للجداد
• تاجر إسبيرات : شوف يا معلم واضح جداً إنو الجدادة دي ما (أصلية) وتجارية ساكت .. لانو لو أصلية كانت إتحملت السخانة وكده .. السوق كلو بقى مضروب
• عالم نفسي : ليس الأمر هو في موت الدجاجة بل في رد الفعل النفسي والحالة العصبية للشخص الذي قام بفتح الضهرية ووجدها ميتة
• إداري فريق قمة : غايتو أنحنا الفكي لمن يقول لينا جيبو جدادة وللا ديك قاعدين نوديهو ليهو بي (ركشة) عشان جنس الحاجات دي
• سمسار عربات : كان يكلموني والله وعلي بالطلاق بالتلاتة كنتا جبتا ليهم جدادة (كرت) موديل السنة وكمان (فل أوبشن) بدل البتكتلا السخانة دي
• خطيب : لقد قدر الله سبخانه وتعالي أن تموت هذه الدجاجة قبل ذبحها لأنها كانت ستقدم قرباناً للشيطان وفي هذا إثم وشرك عظيم
• عجلاتي : شوف يا اسطي السخانة دي مش تكتل ليها جدادة دي ترخي (الجنزير) وتفتل (الميزان) ذاااتو لو ما نفست اللساتك
• مهندس كمبيوتر : 2 مروحة (بروسيسور) في الضهرية وكانت المشكلة إتحلت والجداده كان وصلت (للفكي)
• شرطي مرور : والله أنا بفتكر القصة كووولها من (كترت الأستوبات) الجدادة دي مما إشتروها من السوق وختوها في الضهرية يكونوا وقفوا بيها في ستمية إستوب لحدت ما السخانو قرضتا
• كاتب رياضى : والله نحنا بنعرف (حمام ميت) لكن جداد ميت دي ما أدونا ليها
• سياسي معارض : عرفنا الجماعة ديل ما بيعرفو يختو الرجل المناسب في المكان المناسب كمان (الجداد المناسب ) في المكان المناسب ما بعرفو يختوهو؟

• كسرة (إعلان مكيفات) :

الكامير في سوق الدجاج .. مواطن يشتري من بائع الدجاج (دجاجة) يفتح ضهرية العربة ويضعها ثم يحكم أغلاقها وينطلق .. يصل إلى منزله .. يترجل من العربة ويفتح الضهرية .. يمسك بإحدي يديه بالدجاجة ويرفعها في الهواء وهي تصيح وباليد الأخري مروحة وهو يقول :
- إنها لا زالت حية لأنها كانت تستمتع بهواء مراوح (تي أم تي) .. مراوح (تي أم تي) تقوم بتلبطيف الجو حتى لو كان في سخونة هذه الضهرية !

كسرة ثابتة :
الأربعاء 12/12/2012م الإحتفال بالذكرى السنوية للكسرة الثابتة بإذن الله تعالى – تابعونا -




تعليقات 37 | إهداء 1 | زيارات 7350

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#539023 [adil]
5.00/5 (1 صوت)

12-19-2012 01:04 PM
ياجبرة الجدادة دى مماتت براها , فى جهدة معادية دخات العربية وكتاتها _ اسرايئل ولا الولايات المتحدة. دى كلام ناس الانقلاب. اما تعليل ناس الحكومة الكتل الجدادة سر الاهى لنظام الشريعة- بطريقة ردهم فى كيدهم.............


#533718 [عبد القادر]
5.00/5 (1 صوت)

12-11-2012 05:52 PM
ود جامعة:
ياى حرام عليهم لكن
كانو ادونى اوديها بالتيكو بتاعى
هسى يا عمو جبرا السخانة دى الناس قادرين عليها ؟
اام فرى سورى ماى دييييير


#533673 [أبوأسامه المهاجر]
0.00/5 (0 صوت)

12-11-2012 04:41 PM
أنا عاوز أعرف من اين يستقئ هؤلاء دينهم مرة واحد داير يقلب الحكم بفكي وواحد مسئول في حلفا بطل عمله وعمل ناس القرية وقعد يحفر ليه في بيت عشان في فكي قال تحته كنز وعمر البشير مؤمن بأنه سيحكم 61 سنة على قول ست الودع.


#533346 [mosa6i7]
5.00/5 (1 صوت)

12-11-2012 11:30 AM
انا سامع بتحت تحت ان ناس الامن بحققوا مع السواسيو عيال الجدادة ودايرين يعرفو اخر ايام المرحومة كانت بتسوى شنو منو كان بيزورا


#533340 [خالد فارس]
5.00/5 (2 صوت)

12-11-2012 11:28 AM
محلل سياسي الدجاجة دي مؤتمر وطني وقالت احسن تموت شهيدة (هي لله لا للسلطة ولا للجاه)


#533301 [مدحت عروة]
5.00/5 (2 صوت)

12-11-2012 10:50 AM
اللواء الانقلابى يمشى لى فكى!!!!!!
وده كان عايز يحكم البلد كيف؟؟؟؟؟؟
يا امة ضحكت من جهلها الامم !!!!!!!!!
والله السودان ده بلد منكوب فعلا !!!!!!!


#533163 [ابو عبد الله]
4.50/5 (2 صوت)

12-11-2012 08:53 AM
بتاع حقوق انسان .. حبس الجدادة في ضهرية العربية مناقض للمواثيق الدولية


#532986 [توفيق الصديق عمر]
5.00/5 (2 صوت)

12-10-2012 11:23 PM
عزيزي الفاتح
ارجو ان تضيف الحته دي كمان لي باقي الكيمان
يكونش الفكي دا عمل عمل للجدادة ذاتها وجندلها
بعدين قام مشي بلغ ناس العطا بالموضوع


#532951 [أبو علأمة]
5.00/5 (1 صوت)

12-10-2012 10:41 PM
انت يا جبرا اللواءات بتاعين الجيش ديل علاقتهم بالجداد شنوووو !!!!!!!!!!!!

قبل كده في الثمانينات كان في طيارة عسكريةقادمة من الابيض فسقطت جنوب الخرطوم

منطقة الاقمار الصناعية !! وتوفي كل كائن حي كان بداخل الطائرة إلا ضابط

من الجيش برتبة لواء وكذلك دجاجة !!!! فاصبحنا نطلق عليه (اللواء ابو جدادة )

اها دحين اللواء ده جدادتو ماتت !!! يعني نطلق عليه (اللواءأبو جدادة ميتة )

يعني ولا شنو ؟ .


#532883 [عوص محمد احمد]
5.00/5 (1 صوت)

12-10-2012 09:29 PM
والله يالفاتح اخوى من الضحك غلبتنى الكتابه واحد من المعلقين سالك جائبه من وين دى قويه شديد - كان لينا زميل زمان في الجنوب يقوليك في الحالات الذى دى وارد نمولى ولكن اظنها دى جايه من يوغندا عن طريق نملى ترانزيت - اما موضوع الانقلاب اظن ده وارد نمولى المساله مابتدخل الراس لو جابوا ليها جمل وراكب قلاب 26 متر -اما موضوع الاحتفال بمرور عام على الذين هبرو خط هيثرو فانا ساحتفل بهذه المناسبه بذبح ديك وليس دجاجه وسارسل ليك الكمونيه والكبده وللشعب السودانى العزاء في ديوان النائم العام - بالمناسبه السيد وزير العدل رجع مكتبه الوزاره وله لسه في مكافحدة الفساد - وماشفنا حتت فسادايه واحده - هو عنده مدحت جاهز ؟؟؟؟


#532809 [awad]
5.00/5 (1 صوت)

12-10-2012 07:14 PM
سمعنا أنه الجداده سكند هاند ومن أول أستوب سلمت روحها لبارئها وكمان جماعة محمد عطا مصرين بعد موتتهادى يدخلوها فى عمارة موقف شندى.


#532766 [بت أمدرمان]
5.00/5 (1 صوت)

12-10-2012 06:06 PM
ليه جدادة ما ديك ؟؟؟ إشمعنى يعنى ؟؟؟؟


#532713 [احمد ابونصر الشمالي]
0.00/5 (0 صوت)

12-10-2012 05:16 PM
الدجاجة كانت ميت عند الشراء بس جنابو ما كان منتبه


#532675 [المؤكوك الفضائي]
5.00/5 (2 صوت)

12-10-2012 04:28 PM
والله ياجبرا الدجاجة دي اصلها من مشروع المتعافي (عندما كان والي علي الخرطوم استوردوها ومدة صلاحيتها انتهت )


#532625 [أم دان]
0.00/5 (0 صوت)

12-10-2012 03:41 PM
رائع أستاذ جبره الله يسلمك- لكن تاريخ الإحتفال بالذكرى السنويه رهيب 12/12/2012 وعلى فكره ده آخر تاريخ ح يكون بالصوره دى يعنى ما ح يجي تانى فى اي سنه تانيه مثال 10/10/2010-11/11/2011


ردود على أم دان
United States [rasha] 12-10-2012 11:53 PM
لو القيامة ما قامت حيجي تاريخ زي 1/1/3001


#532606 [بكري الصائغ]
5.00/5 (9 صوت)

12-10-2012 03:28 PM
هيئة جهلاء السودان اصدروا فتوي بان الدجاجة ماتت شهيدة!!


#532585 [احمد]
5.00/5 (1 صوت)

12-10-2012 03:13 PM
كلمة عمبلوك تطلق على الفتى من ذكور الماعز وهو مادون التيس عمرا you must differentiate between goats @ sheeps


ردود على احمد
United States [دقنة] 12-10-2012 05:48 PM
يا ولد !!!!


#532550 [ود كردفان الغرّاء أم خيراً جوّة و برّة]
5.00/5 (1 صوت)

12-10-2012 02:26 PM
• ((إداري فريق قمة : غايتو أنحنا الفكي لمن يقول لينا جيبو جدادة وللا ديك قاعدين نوديهو ليهو بي (ركشة) عشان جنس الحاجات دي))

دي زى حكاية كريستال البلح.. الّا باغة يعنى؟ ما تشيلوها فى كيس..

الّا الطهرية يعنى فى الشمس الحارة دى؟.. على العموم حصل خير بس المرة الجاية(ده لو فيها مرة جاية) الخطأ ده ما تقعو فيو..الواحد بيتعلم من الايام

بس ما قلتو لينا.. جدادة بطرية وللا بلدية وللا فيومية.. سوداء حمراء بيضاء وللا لون زينب.. مبرقعة مشختة منقرطة سادة وللا كاروهات..

جاتكم داهية انتو والفكى بتاعكم.


#532522 [شمندورة]
5.00/5 (1 صوت)

12-10-2012 01:51 PM
بتكون عندها سميرة دنيا وكدا!!!الله لا كسبكم ياكيزانالسجم بالله دي امة برفعو ليها علم. فكي قال !


#532517 [عباس بن عباس]
5.00/5 (2 صوت)

12-10-2012 01:49 PM
يا اخوانا ما تظلموا الفكي.كل هولاء الدجالين عندهم مشكلة مع ناس الشرطه والامن دايما بطلبوا منهم اتاوات وحق الفطور- الفول- الا والكشه...اليوم داك الفكي شاف الزبون مريش ولواء قال احسن يبهج ناس الشرطه عشان كدي طلب جدادة.... والله اعلم


#532513 [محموم جدا]
5.00/5 (1 صوت)

12-10-2012 01:44 PM
كان يجيبوا مصران ينزلوه مع الدجاجة تقوم تبلعوا و ينفخوا فيه لتصبح الدجاجة ساكته بدون ما حدي يسمع مكنها كاك كاك و الناس تتلمه...و لحدي ما يصلوا الملجة يفكوا المصران لكن المشكلة يا جبرا منو البشتري ليه دجاحة مسروقة!!!
المفتاح:
طريقة المصران= دي طريقة سرقة الدجاج سابقاً.
الملجة = سوق الدجاج و البهارات و الخضروات و اللحمةو الفواكه و السمك و العتان..


#532499 [جمال]
5.00/5 (1 صوت)

12-10-2012 01:28 PM
أجمل حاجة أنه الدجاجه دي ما ماتت بسبب مرض سمير الذي كان يصيب الدجاج سابقاً لأن سمير أختفى من الحياة السودانية عموماً حتى من الثقافة ( مجلة سمير ) وكمان من الطرب الاصيل يا سمير بي نظرتك أو في الميعاد وحل محله حرامي القلوب تلب .


#532491 [محمد على السعوديه]
5.00/5 (1 صوت)

12-10-2012 01:20 PM
يادكتور جبره اكتب عن دجاجه التجنيب فى بعض الوزارات الحكوميه والشعب يدفع الضرائب بدون خدمات من الحكومه لاصحه لا علاج وهم يتعالجوا خارج السودان


#532467 [حسن]
5.00/5 (1 صوت)

12-10-2012 12:48 PM
روعة يا جبرا


#532460 [الهادى كلين]
0.00/5 (0 صوت)

12-10-2012 12:32 PM
ورب الكعبة انه الكمال فى فن السخرية - اقترح ان تعتزل الكتابة بعد الان وتتفرغ للتدريب يااستاذنا جبرا ، بعد اذن محبى ومدمنى ابداعاتك


#532449 [Badrudin]
5.00/5 (1 صوت)

12-10-2012 12:20 PM
أبدعت وكفيت ووفيت.


#532447 [Abu Areej]
0.00/5 (0 صوت)

12-10-2012 12:17 PM
عندها سمير


#532446 [جراداي في سروال ما بعضي]
5.00/5 (3 صوت)

12-10-2012 12:17 PM
سياسي معارض : عرفنا الجماعة ديل ما بيعرفو يختو الرجل المناسب في المكان المناسب كمان (الجداد المناسب ) في المكان المناسب ما بعرفو يختوهو؟

سياسي إنقاذي: بركة الماتت اسه إن بقت حية ما كان ركبتنا التونسية!


#532408 [ِAli Algarabandi]
5.00/5 (4 صوت)

12-10-2012 11:47 AM
كويس انها ماتت لانو لو وصلت حية ونجح الانقلاب كان ح يسمو "ثورة الدجاج الوطني"


#532407 [سمبله]
5.00/5 (3 صوت)

12-10-2012 11:46 AM
(الكامير في سوق الدجاج .. مواطن يشتري من بائع الدجاج (دجاجة) يفتح ضهرية العربة ويضعها ثم يحكم أغلاقها وينطلق .. يصل إلى منزله .. يترجل من العربة ويفتح الضهرية .. يمسك) به جهاز الامن...يسألوه بعنف...مودي الجدادة دي لمنو....إنت ما عارف انو سوق اجداد بقا مراقب لمنع وقوع اي انقلاب؟؟؟؟؟


#532392 [بتاع zoology]
4.50/5 (2 صوت)

12-10-2012 11:34 AM
بتاع zoology من أهل العوض : ما في حاجة اسمها خروف عمبلوك، كلمة العمبلوك تطلق على ذكور الأغنام، يعني ممكن تقول تيس عمبلوك، وهي مرحلة (سنية !!) تماثل شرخ الصبا وفورة الشباب عند الانسان.


#532380 [خليل عزة]
5.00/5 (2 صوت)

12-10-2012 11:26 AM
خطيب : لقد قدر الله سبخانه وتعالي أن تموت هذه الدجاجة قبل ذبحها لأنها كانت ستقدم قرباناً للشيطان وفي هذا إثم وشرك عظي.

للتعديل

بدل خطيب : مفتي


ردود على خليل عزة
United States [واحد تانى] 12-11-2012 02:23 AM
وبدل (سبخانه):سبحانه...


#532372 [محجوب عبد المنعم حسن معني]
5.00/5 (1 صوت)

12-10-2012 11:18 AM
سلام يا خال من على البعد
المشكلة يا خال مافي الدجاجة المشكلة في الزول الرسله يجيب الدجاجة، تعرف ادو ثمن الدجاجة لكن طبعا عشان البلد خلاص بقت كلها سمسرة ونهب، عمك مشى بدل ما يشتري دجاجة اشترى ليهو قمرية


#532355 [خالد الزمزمي]
5.00/5 (1 صوت)

12-10-2012 11:00 AM
طالما الدجاجة دي يا استاذ الفاتح مطلوبة للمحاولة الانقلابية فأكيد أراد اصحاب المحاولة حتى لا ينكشف أمرهم إسكات صوتها وعليه واحد من أمرين هما سبب موتها :

1/ تعرضها لجرعة مخدر زايدة.
2/ موتها خنقاً نتيجة سد فمهابشئ ما .


#532354 [نصر الدين محمد]
5.00/5 (1 صوت)

12-10-2012 10:57 AM
الظاهر يامعلم عدم كتابة الكسرة الثابتة بالطريقة المألوفة دليل على خطة للإنسحاب التكتيكي من السؤال عن الخط بعد الإحتفال بمناسبة مرور العام.


#532353 [الزوُل الكَان سَمِحْ]
5.00/5 (1 صوت)

12-10-2012 10:57 AM
يا استاذ جبرا

هو أصلاً زى الفكى دا المفروض يكون عنده قفص جداد فى بيته..لزوم الشغل وكدا..عشان يضمن إنو لاسمح الله لو ماتت جدادة قبل العملية يكون فى بديل..

فكى أغبى من الألوية


#532345 [fan]
5.00/5 (1 صوت)

12-10-2012 10:51 AM
يا ود جبره حقيقي انت رائع وكنز الله يعطيك العافية
بس ما وريتنا راي ابو ساطور كان يضبحه قبل ما تصل
الجماعه ديل حتي الخداد عدموهو النفس


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة