انتو بتحكو عربي
12-11-2012 04:33 PM

انتو بتحكو عربي

سلوى محمد عبدالله
[email protected]

لي وقت قريب كنت بزعل من نفسي شديد لاني ماأجتهدت في تعليم بناتي اللغة العربية.. وأكتفيت "بعربي السودان" علي وزن "عربي جوبا" وكان دا بقي عن فهم وقعاد فوووق رأي ...بعد مالقيت نفسي سببت للعالم هنا مشكلة وسببت لي ولي بناتي إحراجات والسبب كدي احكي ليكم وقولو لي لو غلطانة "لو بتقدروا".
كل مانطلع انا وبناتي سوا نبدى نتكلم مع بعض تلفت علينا واحدة سورية وتقول لينا بي استغراب "إنتو تحكو عربي" بي لغتهم الاخير منها التركيه عاد اصلها لغة ما "منيحا" وبي نخنه ولا عراقية تقولينا انتو بتتكلموا عربي في البيت !!! بي قلبي بقول ليها بس في الشارع والله "خوش كلام" ولعلمكم بناتي بترجموا ليي لانهم المسيكينات اتهروا بي عربيهم العاجبهم دا
و برضوو كل ما نطلع الناس يبدو يتكلموا معنا صومالي نقول ليهم مابنعرف يقولوا لينا تقرينيا .....ليهم مابنعرف يقولوا لينا تقري نقول ليهم مابنعرف ويلا تعال شوف الورجقة والزعل واصلوا ماقدرنا نعرف السبب في الزعل دا كله شنو ولا زاتهاالناس دي بي تقول في شنو.
بس ربك رب الخير كشف لي السبب رحمة لي و لي بناتي من تعب يوم السبت لي رحلة مدرسة العربي
بالمناسبة مره عزة قالت لي ياماما انا مابحب مدرسة العربي
قلت ليها ليه ؟؟..قالت الناس في المدرسة كلهم زعلانين منها ليه حبيبة ؟؟..قالت عشان هي مابتعرف تقرأ وهي حبيبتي خجووولة نطت المفعوصة عهود قالت ليها لأ يا عزة كلنا مابنعرف نقرأ ديل اصلهم زعلانين براهم " تربية تمام" وانا كنت مبسووووطة
اها ارجع وأقول ليكم سبب زعل الجماعة مننا.
جات عهود تبكي من بره قالت المرا شاكلتها ليه؟ قالت بدت تتكلم معاي بي كلام ما فهمتو قالت رديت عليها بالسويدي قامت شاكلتني زيادة قمت رديت عليها بي العربي
اتاريها ارترية تعرف عربي قالت ليها انتو تطلعو من بلدكم تمشو السعودية تتكلمو عربي وتنسوا بلدكم وتجو هنا وتنكرو انكم ارترييين من أصلو يا تقولو سودانيين يا سعوديين وكووركت فيني.
الف كتر خير هذه المرأة الوفية لأصلها .
اها نحن العرب ماااااا دايرننا والافريقيين دارونا رايكم شنووووووو
وياناس البلد العربيها عجم سلاااااااااام


تعليقات 6 | إهداء 0 | زيارات 1745

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#534631 [عطوى]
1.00/5 (1 صوت)

12-12-2012 06:59 PM
الى المعلق باتع (عربى وعروبى وثقافتى عروبية )
انت بتشيل وبتكيل للرطانة فى شنو ؟؟؟ وانت اكبر رطانى يا مستعرب ؟؟
وتانى حاجة انت حكمت على كاتبة المقال بانها رطانية كيف ؟؟ كدى فهمنااااا يا ابو العباس ؟؟

اما الحديث عن العقد فاخر من يتحدث عنها (هى مجموعتك ولا اريد ان اذيد ) ..
وتانى حاجة ما تربط اللغة بالهوية يا باشا ؟؟
فمش معناتا السودانييين بيتكلمو عربى معناتا عرب .. فلو كان كدا صحيح مفروض البرازيل يقولو بانهم برتقال ؟؟ ومفروض المكسيك يقولو بانهم اسبان ؟؟؟
اما شوية اللون الفاتح برضو مش اثبات للعروبة فلو كان كان اللون دلالة على العروبة فاولى (بهاا اهلك الاحباش والارتريين يا ..... بس نقول شنو ..
اما لو حجتك بانك ليس لديك لغة غير اللغة العربية فهى دلالة على عروبتك فهذا مضحك هههههع
فمعروفة فكل الناس عارفين القبائل العربية الحقيقية اين تتواجد فهم (بدو رحل وناس بسيطين جدا ولا يعرفون حتى هذة الحكاوى العروبية وما ادراك ويسكنون اقصاصى وسهول السودان البعيدة يا هذا ..
اما النوع التانى فاععتقد بانك منهم وهم (المستعربة) وايضا السودانيين يعرفون عنهم كل شىء ووحتى فترة تحولاتهم وانسلاخهم من جلودهم ون اصولهم اختلاق انسابهم حتى اصبحو كارهين لافريقيتهم لدرجة الاسود (يرونة اخدرررر ههههه) ..
فاللغة لديها ظروف ومعطيات تاريخية ومنطقية تتيح لها الانتشار ولا ضير فى ذلك فكثيرا من قبائل سودانية لديها لغات اخرى تركوها وتعايشو مع الواقع اللغوى فقد تجد من النوبا جيل كامل لا يعرف لغتهم او رطانتهم الام مثل الدناقلة واهل جبال النوبة وبعض الحلفاويين وغيرهم كثر نسو لغاتهم الاصلية وتعاملو مع واقع اللغة العربية بدون اى مشكلة رغم اعتزازهم باصلهم ..
فيا اخونا ما تكرة الناس بحتة اللغة العربية ..
وفرق يا عزيزى بين الهوية وبين اللغة (كاداة تواصل ) ولو كانت اللغة العربية هوية اما اختاار اخوانا الجنوبيين اللغة العربية كلغة تواصل بينهم (فهذا اكبر دليل على ان الجنوبيين ليست لديهم مشكلة مع اللغة العربية كما ظل يروج المستعربييين ولكن مشكلتهم مع هوية السودان ذات اللمسة الافريقية الواضحة والتى (ماذال يتنكر لها احفاد الامهرا بئس وبئس الاغتراب النفسى ..

سين سؤال يا المتنطط عينيك :
لو افترضنا ان السودان دا فضا وانقرض منة كل (الرطانة شمال غرب جنوب شرق )
حتبقو عرب !!!!!!!!!!!!!


#534621 [منتظر الصباح]
1.00/5 (1 صوت)

12-12-2012 06:50 PM
بدلا ان نكون أحسن الأفارقة رضينا بان نكون اسوا العرب!!!! التسوي كريت تلقا................


#533996 [ذوالنون]
1.00/5 (1 صوت)

12-12-2012 01:22 AM
اها نحن العرب ماااااا دايرننا والافريقيين دارونا رايكم شنووووووو
وياناس البلد العربيها عجم سلاااااااااامعات

لو أن هذه القناعه ترسخت منذ البدايه لكنا خير العالمين اجمعين


ردود على ذوالنون
United States [مهيرة بت عبود] 12-13-2012 04:46 PM
ايه رايك نرسخها ونبدأ ثورة فكرية توازيا مع الثورة ولك التحية


#533846 [افريقي سوداني]
0.00/5 (0 صوت)

12-11-2012 08:55 PM
شكلك يا ام عزة قد تفح بك الكيل وبلغ السيل زبي مما تعانيه من اخوانك واخواتك في الدين والعرق في سوريا وانا متأكد لو لم تمر بمواقف عنصرية وحرجة كثيرة لكي ولبناتك لما قمتي بعكس معاناتك المرمونة اليوم ,
وفي الحقيقة انا عشت وما زلت في بلد عربي وافتخر بأصلي غير العربي في السودان حينما يسألني احد من مواطني البلد الذي اقيم فيه - من اين انت ومن اين تعلمت العربي - لا اتعقد ابدا بل اقول انا من السودان في افريقيا ونتكلم العربية لأني مقيم معكم وانتهي ولم اقف عنده او اعتبره اهانة لاني ليس عربيا ،
في المقابل الاخوة السودانيين من قبائل العربية في السودان وبالاخص ناس الوسط والشمال حالتهم صعبة والله واشفق عليهم دائما لأنهم عايشين في حالة يرسي لها وعقد وامراض نفسية دائمة لا هم قادرين يقولوا عرب ولا قادرين يقولوا افارقة والمواطنين العرب في هذه الدولة يضحكون ويسخرون من السوداني الذي يقول انه عربي فاحيانا يحاولون ابتعاد من اخوتهم في الوطن غير العرب ولا جدوي من ذلك ففي نظر العرب ما هم الا افارقة مثلهم مثل حبش مع ذلك مصممون بأنهم بني عباس ،
بدلا من العقد والنفسيات قولو نحن سودانيين وافارقة تحترمون وتكرمون لأن الملاحظ النيجيري او حبشي او غاني في البلدان العربية اكثر احتراما وكرامتا من العربي السوداني لأنهم يعتبرون لهم شأن وهوية وحضارة ولغة مختلفة بينما السودانيين في البلدان العربية الناطقين بالعربية يعتبرون عبيدا وتابعين للعرب وهذا هو الفرق


ردود على افريقي سوداني
United States [بابو] 12-12-2012 01:18 PM
والله العظيم كلامك صح فأنا من شهود العيان في الخليج لمدة أربعة وعشرون سنة عمر العرب والشوام لم يتعاملوا معنا كعرب بل والحسيس منا !! بيحس النفور منا كالمسوخ بعكس الافارقة الاصليين . ومثال لما نحن فية تعلق تركيا بأزيال الاتحاد الاوروبي في حين أنها ممكن أن تكون دولة الخلافة الاسلامية , كما نحن بالنسة للدول الافريقية فنحن مؤهلون تماما لقيادة أفريقيا كدولة عظمي . واحسبوها وكلموني !!!

United States [عربي وعروبي وثقافتي عربية ومادايرة غيرها تب ياجنا] 12-12-2012 11:33 AM
اقتباس..[...في المقابل الاخوة السودانيين من قبائل العربية في السودان وبالاخص ناس الوسط والشمال حالتهم صعبة والله واشفق عليهم ]
تشفق على مين يابابا. نحن لا سالين في البناء لا في البناول الطين.. طيب نحنا لو فرضنا انو عرب وجدنا العباس كيف نقول للعرب نحنا عرب وما بنعرف غير اللغة العربية وانتو تترطانوا في الخليج زيي البنغالة والحبش.

وبعدين انتو الان كرطانة قدمتوا شنو للسودان عشان يبقى افريقي.. كدي قول لي ثقافتك الان هي خليط من شنووووووو..[ المسلسل والفنان والفنانة والثقافة والهوى والرغبة] كلها عربية...
بتذكروني بالمثل اللي بيقول[ دايرة............ وخايفة من الحمل]


طيب انتو ليه زمنكم دا كلو وحتى كاتبة المقال الرطانية دي زمنكم دا كلوا كنتو لابدين عندما كان يطلق على السودان دولة عربية.. ليه من زمان ما فتحتوا الموضوع دا وما قلتوا نحن ما عرب..

وحاجة تانية أنا شاهدتها هنا في الخليج[ اكثر الجنسيات التصافا بالجنسيات العربية هو الرطانة [مصاهرة] شاهدت ممكن في الخليج حوالي (20) زيجات لسودانيات اصولهم رطانيات تزوجن من مصريين وسورييين واردنيين واعرف زيجتين لسعوديين من [ناس مكة] اصول افريقية سابقاً وعربيا حالياً... تتزوجون وتسعون وتعشقون اللون الابيض والشعر المسبسب بجنوب.

امسكوا مثلاُ في الخليج فئة كبيرة جداً من الرطانة في الخليج متزوجون من[ مغربيات ومصريات وسوريات وفلبينات] عندما تسمع بتلك الزيجات تعلم تماماً أن هؤلاء هم القوم الذين ينصبون انفسهم افارقة في السودان وعرباً للعرب...(رطانة) وبعدين تاني حاجة فيكم انتو شغالين بالمثل البيقول [ الفيك بدر بو ] يعني احسن تقولوا ما عرب قبل ما حد يقول ليكم انتوا ما عرب..

وتاني حاجة انتو كلامكم كلوا افارقة افارقة يوم واحد ما شفنا لينا واحد فيكم اغترب في افريقيا دي ومشى جاب ليهو منها افريقية بت عمو ولا خالو ومد كرعينو قدر لحافو... تمشوا الدول العربية ولا اوروبا وكلكم يا الرطانة همكم تتزوجوا من ذوات الشعر الأشقر والعيون الخضر.. ومشكلتكم اكيد واضحة عندكم عقدة لون ورواسب نفسية ومرضية..

انتو عايشين الضياع بحذافيره[ لا لامين افارقة ولا لامين عرب]

وبعدين كدا دقيقة دقيقة يا لرطانة السودان دا لو فرضنا انو داير يقدم نفسو للعرب كدولة عربية يقدمها كيف وبشنووووو؟؟؟؟!!! وانتم تتراطون كالبنغالة والنيباليين..

دحين يا رطانة أرحموا نفسكم ارحموا انفسكم ولا تعذبوا انفسكم ولا تلقوا بانفسكم في التهلكة..


ونصيحة ليكم يا رطانة[ إذا اردتم أن تكونوا افارقة وتعشقون هذا المصطلح فعليكم بالزواج من الافريقيات الاصليات عشان تطلعوا اجيال تعتز بافريقيتها... بعدين ممكن نقول السودان دولة افريقية..


بعدين تاني حاجة اوكي خلاص السودان دا كلوا مواقف يبقى دولة افريقية بكل السحنات اللي فيهو داير يبقى افريقي [ أه]

فعلا انه الضياع فعلا انه الضياع فعلا انه الضياع ولا شيء غير الضياع.. ارحموا انفسكم ارحموا انفسكم ارحموا انفسكم

United States [غاني] 12-12-2012 12:28 AM
نيجيري وحبشي وغاني وكل الافارقة في البلدان العربية صحيح يتمتعون باحترام عكس السودانيين عربا كانت ام عجما والسبب في اعتقادي تشبس سودانين بالعروبة والعرب في وقت الذي يعدون من ضمن الافارقة المزكورون اعلاه يعني بالواضح كدا عبيد العرب سودوسمر البشرة خدامين تابعين للعرب عكس الافارقة الاخري فهم لا تربطهم صلة بالعرب بس يا افريقي سوداني احيانا لمن يسألوك قول نيجيري


#533806 [سهيل احمد سعد]
1.00/5 (1 صوت)

12-11-2012 07:41 PM
على الشعب السودانى ان يصحى انا مغترب بالخليخ 13 سنة مالقيت بعربى واحد يتكلم عن عروبتنا باقتناع..........عندنا اغنية مابنمشى لناس مابجونا.........وكمان الاغنية الجديدة ....مسلمين نعم عرب فلا....وعاشت افريقيا ارض الشمس والقامات الشامخة


#533721 [Alczeeky]
4.00/5 (3 صوت)

12-11-2012 05:56 PM
انحنا بعد ما نكنس ناس الانقاذ طوالي نتخارج من جامعه الدول العربيه وماعايزين معاهم اي شغله وكل قرد يطلع شجرتو والعاوزهم يتخارج معاهم بلا لمه بلا كلام فارغ


سلوى محمد عبدالله
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة