الذكرى السنوية للكسرة الثابتة FAQ'S
12-12-2012 02:31 AM

الذكرى السنوية للكسرة الثابتة FAQ'S

الفاتح جبرا
[email protected]

بمناسبة الإحتفال (اليوم) بالذكرى السنوية للكسرة الثابتة يسرني أن أقوم بالرد على الإسئلة التى كان يسألنى لها القراء خلال هذا العام

س : ما هي قصة خط هيثرو والكسرة الثابتة التى تذيل بها مقالاتك منذ عام؟
ج : عشان تعرف اصل الحكاية أضغط على اللنك ده
http://alfatihgabra.wordpress.com/20...7%D9%84%D8%A9/
س : طيب ومافيش مسئول هببوا ليك؟
ج : برضو عشان تعرف الإجابه أضغط على اللنك ده
http://alfatihgabra.wordpress.com/20...1%D8%AA%D8%A7/
س : وهل تمت الإستجابه بعد مقالك ده ؟
ج : عشان تعرف كدي أضغط على اللنك ده
http://alfatihgabra.wordpress.com/20...3%D8%AF%D9%87/
س: طيب ممكن تورينا بالتقريب كده الخط ده إتباع متين؟ وبى كم كده؟
ج : قبل حوالي ستة سبعة سنوات ... يعني حوالى 50 مليون يورو !! لو ما أكتر
س: وهل الحكومة على علم بذلك؟
ج : والله (حمدو في بطنو) لكن هى أقرت بسرقة الخط قبل حوالي 3 سنوات من الآن
س : والحكومة عملت شنو؟
ج : قام البرلمان بإستجواب السيد وزير الدولة للنقل والذي قام بتشكيل لجنة تحقيق حول الموضوع
س : ولجنة التحقبق توصلت لشنو؟
ج : لجنة التحقيق توصلت إنو فعلاً الخط تم بيعه وتم تحديد الضالعين في مسألة البيع وكمان معاهم (السماسرة) وقد صرح حينها وزير الدولة للنقل عن اكتمال التحقيقات وتحويل الضالعين الي القضاء
(أضغط على هذا اللنك)
http://www.alsahafa.sd/details.php?articleid=47259
س : طيب والحصل بعد داك شنو؟
ج : القصة نامت .. ذيها ذي (الأقطان) ..ذيها ذي تجاوزات (المدينة الرياضية ) ذيها ذي أي ملف فساد
س : تفتكر نامت ليه؟
ج : عشان الناس طبعن تنسى الموضوع وكده .. ما نحنا شعب (زهايمر) وكده
س: يعني إنتا هسه الكسرة بتاعتك دى عشان توريهم إنو الشعب متذكر وقاعد منتظر محاكمة الناس السرقو خطو؟
ج : طبعن ... بالضبط كده
س : طيب ليه إنتا إخترتا (خط هيثرو) ده وما إخترتا أي ملف فساد تاني؟
ج : لأنو دي سرقة واااااضحة وما عاوزة ليها أي كلام ... يعني ما تفاوى فاسدة عشان واحد يجي يقول ليك نسبة الإنبات صحيحة أو ما فيها فطريات وللا شنو ما بعرف .. خط وإتسرق وإتباع لى شركة تانية وقاعدة تقدل بيهو !! يعني القصة ما عاوزة ليها المحقق كونان ممكن ضابط صف (يظبطا) وكده !
س : إلى ماذا تعزى تأخر تقديم المتهمين إلى محاكمة؟
ج : فقه السترة (طبعن) !
س : هل إذا تمت محاكمتهم سوف يسترد المواطن السوداني (خطو) وللا ح يسترد (قروشو)؟
ج : أفتكر دي مسألة قانون ..... (ده لو فضل فيها قانون) وكده
س : هل تعتقد أن الإحتفال بمرور عام على الكسرة الثابتة سوف يجعل المسئولين يقومون بتقديم المتهمين إلى العدالة؟
ج : عدالة مين ؟ يااااخ ديل عليهم تخانة جلد .... ما عادية؟
س : ليه مش المسئولين ديل بيطبقوا الشريعة؟
ج : أيوه بيطبقوها .......................... ويختوها يقعدوا عليها !
كسرة :
نشكر كل الصحف اليومية والإخوة الزملاء كتاب الأعمدة والمواقع الأسفيرية التى إحتفلت (حزنا) معنا بالذكري السنوية للكسرة الثابتة .. وسوف نشكر لها إحتفالها معنا بالذكرى (المئوية) إذا إستمر الحال كما هو عليه !!
كسرة ثابتة (نيو لوك) :
أخبار ملف خط هيثرو العند النائب العام شنــ(12+1)ــــو؟ ..... شكلها حلو مش كدة؟


تعليقات 32 | إهداء 0 | زيارات 6436

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#537584 [smsm]
4.07/5 (5 صوت)

12-17-2012 03:18 PM
الحكومة بتضحك علينا مرة في الشهر- عند صرف المرتب
ونحن نضحك عليها مرات عديدة- عند قراءة مقالات الفاتح
كتر منها عشان ما يجينا ضغط


#535366 [على الكرور]
4.07/5 (5 صوت)

12-13-2012 10:01 PM
اعتقد انه الفاتح جبر وكثير من القراء يعرفون تماما من الذى لهط الخط ولكن لسبب او لاخر لايودون الافصاح عن هذه المعلومات وتمليك القراء الحقيقة - فلماذا لاتودون الافصاح عن من السارق .


ردود على على الكرور
United States [هجم النمر] 12-14-2012 12:34 AM
أمثالكم يا كرور من يتخدثون بغير علم .. لا أظن أن الأستاذ جبرا يمتلك مستنداً واحداً يؤهله بأن يجزم بان فلان هو السارق لكنه بالطبع يستطيع أن يجزم ببيع الخط لأن وزير النقل قد صرح بذلك .. إنت الظاهر عاوز تودي الاستاذ في ستين داهية لكن الاستاذ على ما يبدو فاهم لمثل هذه الأشياء ولا أظنه ينجر لمثل هذه التحريضات اللا مسئولة .. هسه أفرض قال إسم زول وطلع ما هو ؟ يقول ليهم (كرور قال لي)؟


#535076 [هندسه]
4.19/5 (6 صوت)

12-13-2012 12:49 PM
يا جبرا كسرتك دي ضيف معاها وأخبار صلاح قوش شنو ؟ لانو حاسس انو قضيتو برضو حتموت وما حنسمع خبر يسرنا !!!


#535063 [ابو مبارك]
4.19/5 (6 صوت)

12-13-2012 12:33 PM
مشاركة لحبيبنا جبرا في كسرته الثابتة اقترح عمل مسابقة لأجمل نكته في الخط
وبسم الله ابدأ :

الام : يا ولدي خطك مالو شين كدي
الابن : بابا ... بابا صحى انا خطي شين ذي ما بتقول ماما
الاب : يا ولدي خطك ما شين ، الشين خط جبرا


#535026 [المؤكوك الفضائي]
4.07/5 (5 صوت)

12-13-2012 11:57 AM
العم الفاتح جبرا كل عام وانت بخير مع واواتك (12) والمثل بيقول سيد الرايحة بفتش خشم البقرة (لكن يا الفاتح وزير العدل لسع مالقي البقرة عشان افتش خشمة اصبرو علية كمان سنة اخري )والظاهر انها زي بقرة بني اسرائيل


#535001 [معتوه]
4.19/5 (7 صوت)

12-13-2012 11:18 AM
إلا صُح خط هيثرو نقلوه باريس ؟
دى اشاعات يا عمدة ، لازمن اشاعات ..


#534827 [ahmed]
4.11/5 (7 صوت)

12-13-2012 01:55 AM
سلام استاذنا...برضو اقترح عليك لتخليد ذكرى كسرتنا العزيزة ان تذهب الى المحكمة و تقوم بتغيير اسمك لى الفاتح كسرة بدل جبرة!!! بس ما تغلط في العنوان و تكتب الفاتح كسرة و الجبرة الثابتة


ردود على ahmed
United States [منتظر الفرج] 12-13-2012 07:44 PM
انت قصدك شنو؟ اكسِروهو ليك ولا شنو ؟


#534724 [الشايله هم البلد]
4.19/5 (7 صوت)

12-12-2012 09:54 PM
و الله انا خايفه عليك يا جبرا تختفي زي هناي داك و نقعد نقول اخبار الفاتح جبرا شنوووووووووووو


#534693 [حمدي]
4.19/5 (7 صوت)

12-12-2012 09:02 PM
عم جبرا انا خايف علي خط الصحافة ظلط و عايز اعمل ليهو نامين ساعدني في الحتة دي .


#534686 [خطاط]
4.19/5 (6 صوت)

12-12-2012 08:51 PM
نحن نسيبنا من الخط ونجيب كرت


#534609 [احمد ابونصر الشمالي]
4.07/5 (5 صوت)

12-12-2012 06:28 PM
كل سنة والكسرة ثابتة


#534586 [عباس]
4.07/5 (5 صوت)

12-12-2012 05:47 PM
شكلها يا استاذ انت البتاكل منها( ُكُسره) اكتر مما تكون( كسره ثابته) في عمود وما تحرك ساكن سنه كامله .....شوف ليك خطه بديله غير (12+1)


#534523 [kamy]
4.07/5 (5 صوت)

12-12-2012 04:18 PM
واللة يا جبرة فعلا جلدهم تخين انا كل ماافتح البوست اقول الفاتح الليلة يكونوادوهوحق السكات القاك انت لسع حرس


#534476 [kartagi]
4.07/5 (5 صوت)

12-12-2012 03:33 PM
يا أخوانا السرقة اولا خشم بيوت والحرامية فى الانقاذ ما بسموهم حرامية اسمهم وكلاء والحكومة لازم تحمى الوكلالانهم ثروة وطنية بغذو المؤتمر سورى اقصد الاقتصاد الوطنى بالعملة الصعبة ووكلاء الخطوط معروفين هم عبدالله وعبدالحليم وتمو الباقى انتو لانو لو تميتو انا ولد صاحبة الانداية بزعل !!!!!!!!!!!!!!!!!!


#534475 [ابوالهول]
4.07/5 (5 صوت)

12-12-2012 03:33 PM
(لايوووق لايووق ..يا جبرة )
صبر ايوب ..يا جبرا ...
............................
هيثرو ..هيثرو ...لما تفترو
هيثرو مين ..ديل باعو السودان انت بتلعب ...
على كل هابي بيرث داي تو يو ...عقبال خط الشنقيطي
شوف لينا عيشة ناشفه نبلها ونحتفل بيها ..وللا جــــــااااتو


#534370 [السماحة]
4.19/5 (6 صوت)

12-12-2012 01:20 PM
الشيء الخايف منو الفاضل / جبرا

1- يتم حقنك بمادة تصيبك بالزهايمر , ونتحرم من عمودك ,وطلتك , وما تقدر تبدع تاني

2- يتم فتح بلاغ جنائي في مواجهتك من قبل وزير العدل يتهمك فيه بالانتقاص من قدره ,وفهمه ,وتواطؤه مع حرامية الخط ..... أو تلميحك له بأخذ نصيبه من الخمسين مليون يورو لقاء تمويع وتمطيع القضية .

3- يتم إقامة دعوى مدنية تطالبك بالتعويض عن إشانة سمعة وزارة الـــــــــعدل ممثلة في وزيرها النقل مكتبه لمتابعة مجريات القضية ( ما عارفين رجع ولا لسه قاعد ) أو الحرامية ذاتهم ما تستبعد , ويطالبوك بتعويض يساوى مبلغ الخط المسروق .

4- يتم إقتطاع جزء من مبلغ الخمسسسسسين مليون يورو ويودع في حسابك ببنك الخرطوم لقاء حزف الكسرة وإستبدالها بقراصة تبرر سرقة الخط ......

5- ..................
6- .................
7 .................
8..................
9................
10.................................................................
العفو والعافية


#534367 [Alia]
4.07/5 (5 صوت)

12-12-2012 01:17 PM
الا رحم الله الخط رحمة واسعة واسكنه فسيح فضائه وجعل الهواء متنفسه وانصحك اخي جبرا تعمل ليك صرح او مجسم لاي طيارة واقعة او بدون طيار ( زي جندي مجهول كده ) وتزورها بين يوم والتاني وانسي موضوع الخط ده اولادك منتظرينك وخلي بالك من نفسك لا ضغط يزيد ولا سكري يرتفع وما تنفخ في قربة مقدوده


#534359 [د بله]
4.07/5 (5 صوت)

12-12-2012 01:07 PM
متعك الله بالصحة و العافية استاذ جبر بس المقال مفروض اسمو يكون
AAQWNA's
Always Asked Questions With No Answers


#534356 [عمر عبد الرحمن]
4.19/5 (6 صوت)

12-12-2012 01:02 PM
لكن يا جبرة سنة كاملة و ما وريتنا السرق الخط منو. إنت طلعت سفنتي فايف.هههههههههههههه
لكن كسرة صدقني مواعيد الكسرة الجاية إنشاء الله ما حيكونو قاعدين وحنعرف الحرامي منو ونعلقو في المشنقة.


#534335 [حذيفة أبووليد]
4.19/5 (7 صوت)

12-12-2012 12:42 PM
بمناسبة الكسرة الثابتة ، (أطال الله عمرها!) وأعز جندها ، أكتب إليك بضع كلمات تفطر قلوبنا ... بسم الله نبدأ.
حقو نعمل أغنية نذكر بيها الناس بالكسرة الثابتة ، ولازم تتعمل مسابقة من أجل التباري بين القراء الكرام سوف تقسم الى قسمين:
أولا : المسابقة الشعرية .
ثانيا: مسابقة أجمل لحن.
ثالثا: مسابقة أفضل فنان يؤدي أغنية (تأبين خط هيثرو).
يجب على كل مشترك أن يكون من ذوي الدم البارد ، ومن أصحاب الخيال الواسع، ومن أصحاب السيجارة الخضراء (الفاقع لونها تسر الناظرين).
نمذج لأغنية من الزمن الغابر محورة على طريقة جبرا:
سنة سنتين شوية..... وشايف الطائرة قامت ... دي ارتفعت شوية ..... هيثرو عزيز عليا.... والبكاء ما بجيبو ليا....
ومن حظنا انو الطيران عندنا ما بتقوم، للأسف إنها بتقع. ياساتر؟!
يا جماهير شعبي العزيز ............. هل تعلموا أن سودانير هي أول خطوط جوية غير أوروبية تنزل في مطار هيثرو؟
هل تعلموا أن سودانير كانت من أفضل خطوط الطيران في العالم وإفريقيا والشرق الأوسط ؟ وكان شعارها (اختيارك الأول لأفريقيا والشرق الأوسط).
هل تعلموا أن سودانير أخذت جائزة أفضل خطوط طيران تعمل بمعايير السلامة الدولية؟
هل تعلموا بأن سودانير هي من صنعت أغلب الخطوط الجوية المشهورة الموجودة في القارة الإفريقية؟
وأخر لا تعلمونها ... الله يعلمها...............!
الفاتحة على روح هيثرو... الإخلاص إحدى عشر مرة.
كسرة:
سوف نحتفل في 2050 بالميدالية الذهبية .
كسرة ثابتة:
أقترح الشكل يكون كالتالي......... أخبر الخط شنـ(12)ــو ... دي السنوية.
والزيادة كالتالي : أخبار الخط شنـــ(12)ــو و و..
كل عام واإنتو بخير.


#534329 [ود الراوي]
4.19/5 (7 صوت)

12-12-2012 12:39 PM
Happy birthday to our stolen air destination


#534310 [عزالدين]
4.07/5 (5 صوت)

12-12-2012 12:22 PM
الله يكون في عوناوعونك يااستاذ... الحكومة جلدها اتخن من جلد الفيل الله يقطع وشها..


#534299 [أبوأسامة المهاجر]
4.19/5 (9 صوت)

12-12-2012 12:11 PM
ما طنشونا وكده !
By الفاتح جبرا on 16 مايو 2012
قصة رائجة حدثت في مدينة عطبرة قبل سنوات عديدة .. تحكي أن أحد الباعة المتجولون كان يبيع الباسطة والكنافة والبسبوسة وما لذ وطاب من السكريات والنشويات وقد إشتهر صاحبنا بترويج بضاعته من خلال ترديده لبعض العبارات مثل (ما بالسمنة وكده) و (ما حلوة وكده) ، (ما سكر وكده) ، ما عسل وكده !
ما لبثت عبارات صاحبنا هذه أن صارت نوع من (المشاغلة) يستخدمها الشبان لمعاكسة الفتيات مما جعل المسؤولين يقومون بمنعه من ترديد تلك العبارات فأصبح صاحبنا يقف أمام بضاعته صامتاً وعندما يسأله المارة عن سبب صمته كان يقول اهم (ما منعونا وكده) فتلغفها الشباب هي الأخري ليتغير أسلوب المعاكسة من (ما بالسمنة وكده) إلى (ما منعونا وكده) !
عدد مقدر من القراء خاصة عبر صفحة التواصل الإجتماعي (الفيسبوك) يسألون العبد لله عن الكسرة الثابتة ومدي تجاوب المسؤولين معها وهل أدت غرضها في حثهم على عرض نتيجة التحقيقات لمعرفة من قام بسرقة (القرن ) أو ما يعرف بلغز إختفاء (خط هيثرو) !
كنت ولا زلت أجيب على هذا التساؤل بعبارة أشبه للعبارة التى كان يرددها (بتاع الباسطة) حيث أن ردى كان ولا يزال هو : ما طنشونا وكده !
الدولة بكامل طاقمها .. الرئاسي والبرلماني والأمني والعدلي لم تفلح هذه الكسرة الثابتة ذات (الواوات الخمسة) والتي إستمرت لمدة خمسة أشهر (وشوية) بتذكيرهم بأن الشعب السوداني الفضل يسأل عن نتيجة التحقيق ومعرفة أسماء (المتورطين) في القصة دي؟ !
إزاء هذا الطناش (الما عادي) فقد قرر (أصدقاء الكسرة الثابتة) والذين أقاموا لها موقعاً على الفيسبوك http://www.facebook.com/KasraThabta إقامة (الذكري نصف السنوية للكسرة الثابتة) والتي سوف تتم دعوة الفضائيات ووكالات الأنباء لتغطيتها .
تبدأ (المناسبة) بآيات بينات من كتاب الله الكريم تدعو إلى العدل ومحاربة الفساد تعقبها (وقفة حداد) على الشفافية حيث يقف الجمهور المتوشح بالسواد دقيقة حداداً على (إختفاء الخط) وصهينة المسؤولين بينما يحمل لافتات كتب عليها :
• .. الخط وينو أكلو الدودو .
• . الخط وين راح .. أكلو التمساح ..
• الخط كان وقع كتر البتابت عيب .
• . يا أمة ضخكت من خطها الأمم …
• الخط البجيب الريح أسرقو وإستريح ..
• كان عشقتا أعشق بط وكان سرقتا أسرق خط ..
• لا يستقيم الظل والخط أعوج !!

يعقب ذلك كلمة من (أصدقاء الكسرة الثابتة) تعبر عن مدى (حزن) وأسى (الشعب الفضل) لإختفاء (خطهم) ثم يلي ذلك فقرة قطع (التورتة) التي كتب عليها (لن ننساك يا خطنا) حيث يقوم بقطعها وإطفاء (نص الشمعة) ممثلون للفئات التالية :
- مرضي الفشل الكلوى الذين توقفت مراكز غسيلهم
- التلاميذ الذين لا يجدون وجبة الفطور
- المعاشيون الذين يساوي معاشهم الشهري 4 كيلو لحمة
- العاطلون عن العمل ممن زادت سنوان عطالتهم عن العشر سنوات
- المواطنون الذين تجاوزوا الخمسين ولم يستطيعوا اكمال نصف دينهم
بعد ذلك يتم إفتتاح معرض يضم عدداً من الرسوم الكاريكاتورية حيث نجد في احد الكاريكاتيرات مواطن يرفع يديه إلى السماء قائلاً : يا رب خليني أعيش تاني خمسين سنة عشان أحضر نتيجة التحقيق .. بينما في كاريكاتير آخر نشاهد أحد المواطنين يجلس أمام (وداعية) تخاطبه وهي تشير إلى (الودع) قائلة : الخط ده (إحتسبوهو) خلاس وحات عيوني ديل تاني ما برجع .. وكاريكاتير ثالث (بدون تعليق) نشاهد فيه طاولة إجتماعات يجلس عليها أعضاء لجنة التحقيق في إختفاء الخط وقد وضعوا على آذانهم (قطن) !
بعد أن ينتهي الجمهور من مشاهدة معرض رسوم (الخط) يبدأ عرض مسرحية (من سرق الخط؟) وهي مسرحية صامتة (بانتومايم) من مشهد واحد .. يفتح الستار لنشاهد كل المسؤولين على خشبة المسرح وقد علقت على صدر كل واحد منهم لافتة كتب عليها (ما أنا) .. وفجأة يخترق المسؤولين (مواطن) عاري الصدر .. نحيف (لمن عضامو ظاهرة) يتوقف في منتصف خشبة المسرح ثم يشير بأصبع يده إلى صدره وقد كتب عليه (أنا السرقتا الخط) ثم يقفل الستار !
بعد مشاهدة المسرحية تبدأ الفقرة الأخيرة وهى الحفل الغنائي والذي نستمع فيه إلى عدد من الأغاني (الجهادية) من شاكلة : ( أنا ليهم بقول كلام خط هيثرو خبرو نام) !

كسرة :
ما طنشونا وكده !

كسرة ثابتة :
أخبار خط هيثرو شنو(ووووو)؟


#534292 [صلاح مصطفي أحمد]
4.19/5 (6 صوت)

12-12-2012 11:58 AM
الأخ الفاتح جبرا والله أعمل حسابك ( الشغلانة زي ماقال الأخ هجم النمر بقت ترع يعني غرق وكان الله في عون المحسنين )


#534195 [خليل عزة]
4.18/5 (9 صوت)

12-12-2012 10:28 AM
HAPPY NEW YEAR

ج : أيوه بيطبقوها .......................... ويختوها يقعدوا عليها !

أخبار ملف خط هيثرو العند النائب العام شنــ(12+1)ــــو؟ ..... شكلها حلو مش كدة؟

الاتنين حلوين

بس قابلني لو في واحد اشتغل بينا..

قلت ليكم زمان الناس ديل بتعاملو مع المال العام على أساس أنو غنيمة. لانو نحنا كفار وغير متوضئن وكدة

هو الجهاد ده ساي لله كده..


#534181 [awad]
4.07/5 (5 صوت)

12-12-2012 10:16 AM
المفروض بمناسبة هذه الذكرى السنوية اللى أتلهط فيها الخط وقروشه ملئت الكروش تكون فيها وقفة حداد عام من الشعب المغلوب على أمره وتكون فى الشوارع الرئيسية فى كل مدن السودان ومنكسين شعار الخطوط وياريت لو كمان فيها رداحات يردحن فى الشوارع ويسون ووب حى على الفقيد وأهو ناس فقه السترة يجونا يشيلوا الفاتحة وكده. لا تحزن أخى جبرة وان كان الحزن اصبح شمة هذا الشعب المقهور ولكن حيجى اليوم الذى نأخذ حقنا جميعا منهم ومن ذرياتهم.


#534150 [ابو حازم]
4.19/5 (13 صوت)

12-12-2012 09:52 AM
الاستاذالمبدع الفاتح بن جبرا: كل عام وحرامية الخط اتحاكمو واتسجنو ...
ذكرت ان هناك أشياء لا يمكن سرقها ،وضربت مثلا بخط قرينتش ..لكن يا استااااذ الجماعة ديل قبال كدا وفي سنة 94 أو 1995 سرقوا خط طول بي طولو وعرضو ولليوم ، كالآتي :
تقع الخرطوم على خط طول : 32.9 شرق قرينتش .
تقع الرياض (عاصمة السعودية ) على خط طول 43.5 شرقاً .
في واحد من مهوسي الجماعة قام باختراع نظرية البكور التي جعلت توقيت الخرطوم مع توقيت الرياض في سرج واحد صيفا وشتاء ..والفرق بينهما حوالي 11 خط طول ..
أها ال11 خط طول ديل منهوبات من داك الزمن ويا الليلة ..
أها سرقة خطوط ولا ما سرقة خطوط


ردود على ابو حازم
United States [بت لأمدرمان] 12-13-2012 03:50 PM
والله إنت خطير يا ابو حازم

United States [مندكورو] 12-12-2012 10:55 AM
لكـن إنت ماراكب الفيــ ل


#534115 [وحيد]
4.07/5 (6 صوت)

12-12-2012 09:13 AM
ليه مش المسئولين ديل بيطبقوا الشريعة؟
ج : أيوه بيطبقوها .......................... ويختوها يقعدوا عليها ! الاصح بيبولوا عليها!


ردود على وحيد
United States [NASRELDEEN ALI] 12-12-2012 10:42 AM
بل الأصح أنهم بيطبقوها ويختوها فى الدولاب ويطلعوها عند مخاطبة الجماهير المخمومة


#534050 [بت أمدرمان]
4.19/5 (6 صوت)

12-12-2012 04:34 AM
كل سنة كسرة ثابتة و انت طيب يا عمو الأستاذ الكبير الفاتح جبرا و هابى انيفيرسارى , أتمنى أن تكون إستجابة ( المسعورين) ليك بالمناسبة دى ، تقديم الحرامية السرقوا الخط للمحاكمة العلنية


#534044 [ممكون وصابر]
4.07/5 (5 صوت)

12-12-2012 04:06 AM
انت مع احترامي الشديد بتنفخ في قربه مقدوده لا المسؤولين ولا النائم العام حايلتفتو للموضوع دة لأنهم كلهم حراميه أولاد كلب ولا نسيت مقوله الحرامي علي الحاج خلوها مستوره لانه أي واحد قابض على التاني بلاوي وبعدين ياأستاذي الفاضل انت ياتو شعب البتزكروا بي حقوقو المنهوبه ديل فاضين من قصه هيثم مصطفى وعلاء الدين يوسف دي عالم فاضيييييه


#534033 [هندسه]
4.19/5 (6 صوت)

12-12-2012 03:30 AM
FAQ Frequently Asked questions
يا زول السرقوا الخط شكيناهم لي الله !! انه على رجعه لقادر


#534018 [هجم النمر]
4.19/5 (19 صوت)

12-12-2012 02:40 AM
سوف يسجل لك التاريخ يا استاذنا أنك وقفت في فسطاط الحق ضد الباطل وإنك لم تداهن ولم تنافق وإنك وقفت مع قضايا شعبك الذي أفقره هؤلاء الفاسدون ... لن ينسى لك هذا الشغب هذا الصنيع ودمتم منارة للحق يا استاذنا الرائع ... بس بكرة ما يجيبوك غاطس ليك في ترعة .. دى تكون مصيبة !! الله يديك طولة العمر


ردود على هجم النمر
United States [السماحة] 12-12-2012 01:24 PM
هــا هــا هههههــــا
ضحكتني وطولت من الضحك ...... الفاضل جبرا أبعد من الترع والنيل والخيران .... كلم الاسرة يطمئنوا عليك باستمرار ...... ما تقفل موبايلك ..... فهمهم أنو اذا تلفوني مقفول معناه انا في خطر ....


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة