المقالات
السياسة
ارشيف مقالات سياسية
حرية يا سودان
حرية يا سودان
12-12-2012 03:21 PM

سمية هندوسة :حرية يا سودان
=================


اطلع الى الشارع
يا شعب بات جيعان
ما يهمك العسكر
ما يهمك البمبان
سارق البلد خواف
ملعون حرامى جبان
يا والدة ما تبكى
اولادنا فى الميدان
هبت اسود العز
لنصرة السودان
وطنك صبح محتل
ضرع الوطن جف
و الشعب هو الغلبان
ملعون ابو البرجع
يختانا اى جبان
يا شارع العزة
يا شعبنا الباسل
يا صانع التاريخ
و المجد للانسان
ساند شباب حييك
وانضم للثورة و اهتف
نشيد الروح حرية
حرية يا سودان .
حرية يا انسان
الثورة هى المخرج
شان الوطن يرجع
و جرح الوطن يبرأ
و جنوبنا نلقى هنا
و دارفور تزيح الظلم
والغبن و الخزلان
اطفالنا فى الاحرش
و الفى الحفر واقفين
خايفين من الطيران
و الفى الكراكير مات
بى لدغة الثعبان
راجيك تجيب حقوا
راجيك تزيل خوفوا
و يشعر بوطنه امان
و شهداء المجازر وش
دارفور و كادقلى
العيلفون و كجبار
طوكر و بورسودان
راجين تجيبوا التار
بى ثورة شعبية
شان يرجع السودان
و طنا جميل و حنين
يبتر يمين الظلم
و يهد ساس السوس
الضيعوه زمان
الثورة هى الحل
و صوت الشعوب
هدار و غضب
الشعوب بركان
ثورتنا سلمية
ثورتنا للاطفال
ثورتنا ضد الجوع
و الثورة ضد الفقر
و من قسم السودان
يا ايها الكيزان
الافعى و الجرذان
و كت الخلاص قرب
و حزن الوطن افراح
المات شهيد شعبه
و العاش بجيب حقه
و يستأصل السرطان .
كتمت خلاص ضاقت
و سور الوطن زنازين
و حضن الوطن سجان
للخونة و المارقين
الباعو شرف الشعب
و حكمونا باسم الدين
ما تكتروا الصولات
ما تهدروا الاموال
و تستوردوا البمبان
كتمت خلاص يا ناس
سودانا ثار و طلع
لا بهزمك رصاص
لا برعبك رشاش
لا بينفع البمبان
الثورة حق و بركان
المجد للشهداء..
العزة للاحياء ...
النصر للثوار ...
و القومة للسودان .


تعليقات 8 | إهداء 0 | زيارات 3586

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#535099 [الفاضل]
0.00/5 (0 صوت)

12-13-2012 01:17 PM
القومة ليك يا وطن


#535054 [منتظر الفرج]
2.00/5 (1 صوت)

12-13-2012 12:23 PM
والله كبرت فى عيونا وحبيناها أكثر لمن قرأنا تعليق سمير محمد أحمد التلب .


#534575 [ahmadmohamed]
0.00/5 (0 صوت)

12-12-2012 05:35 PM
لنا نصر قريبآ بإذن الله


#534560 [خالد بابكر ابوعاقلة]
1.75/5 (3 صوت)

12-12-2012 05:17 PM
يختانا أي جبان ..
عامل حساب بمبان ..
نحن ال (قدرنا ) زمان ..
نكسر عصا الطغيان ..
نرجم طغاة الجان ..
بالحربة ..بالمدفع ..
في كرري في شيكان ..
الليلة نحن كمان ..
ناوين على الفيران ..
نافع وأخو السجمان ..
نافع وصاحبو مدان ..
ملعون أبو البرجع ..
الليلة ما بنرجع ..
يختانا أي جبان ..


ردود على خالد بابكر ابوعاقلة
United States [دخول العرب السودان] 12-12-2012 08:56 PM
وما تنسي اللمبي السجمان


#534558 [المشتهي موية الفول]
0.00/5 (0 صوت)

12-12-2012 05:13 PM
يابتي الشباب ديل يموتوا هم ويحيا الحوت وبيموتوا من أجل شطب هيثم مصطفى قلوبهم خلاص ماتت الله يبارك لينا في المناضلين الزيك


#534551 [المأمون علي أخوات فريقه]
5.00/5 (1 صوت)

12-12-2012 05:05 PM
أصيلة ونبيلة دائماً.


#534531 [توفيق الصديق عمر]
5.00/5 (1 صوت)

12-12-2012 04:37 PM
نحنا مهيرة بت عبود ما شفناها لكن سمعنا بيها
اها الان نسخة شايفنها قدام عيونا
وعايشنا وبنعيش العذابات التي تعرضت وتتعرض لها
والحرقة الطالعا من جوفا
والتي لن تنطفي الابانطفاء( قريدة الانقاذ التي لا يجب ان تصبح رتينه)
والتي نسال الله ان يواصل في مدها بالزيت
لتواصل الاشتعال
هذه هي النسخة الاصلية الواقعية الجديدة
لسمية بت هندوسة
التي نراها امام اعيينا وهي تشتعل لتفجر فينا غضبا
مخدر
نسال الله ان يفك عنه الخدر ليتفجر


#534490 [الشايل المنقة]
3.00/5 (2 صوت)

12-12-2012 03:45 PM
...لو هم عارفين إنك ح تشتعلى نار كدة,اصلو ما كان كووك بالنار..لكن هم دائمًا كدة,الطغاة لا يتعلمون ابدًا,وهم كل ليل بيخسروا مساحة...لكن نحنا كل صباح بنكسب مناضل ومناضلة بطعم النار.


ردود على الشايل المنقة
United States [سمير محمد احمد التلب] 12-13-2012 08:52 AM
اول اعتقال لسمية هندوسة كان سنة 2000 بسبب قصيدة (ناس حاكمانا بالاعدام ) وكان عمرها لا يتجاوز الواحد و عشرين سنة ولديها مئات القصائد فى وصف نظام الانقاذ و حال الناس مثل ( اتعلم تحب وطنك ) و ( معا من اجل الافساد )و بعضها منشور فى النت و كانت هنالك محاولات لديوان شعر باسم ( اغنيات لاجل موطنى ) او (شمس الحرية) ولكنها لم تنشره لانها كانت لا تريد ان تقطع صلتها بالسودان, فسمية هندوسة لم تتفجر قريحتها الشعرية بسبب الكى و الاعتقال بل تم اعتقالها و كيها بسبب ما تكتبه من مقالات و اشعار .

United States [ahmadmohamed] 12-12-2012 05:44 PM
لا يحمك حيجى يوم حتكويهم بالنار ذى ما كووك


سمية هندوسة
سمية هندوسة

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة