نمرق وين ياهاشم صديق
12-16-2012 08:35 AM


نمرق وين ياهاشم

حسين شنقراي
[email protected]

كل الود والإحترام للأستاذ هاشم صديق والتحية لنضالاته ضد الظلم والعهود الديكتاتورية والتحية لحسن ظنه في الشعب السوداني الذي كان معلماً للشعوب في أدب المقاومة منذ المهدي وعلي عبداللطيف وعبدالفضيل الماظ والقرشي وغيرهم ممن كتبوا صفحات التاريخ بدمائهم الذكية ثم أتي من بعدهم زرية ضعفاء أضاعوا كل أمجاد آبائهم وأجدادهم ورفعوا الراية بيضاء لهؤلاء ولأمثالهم أهدي هذه الكلمات وليس تطاولاً علي القامة معلم الشعراء الأستاذ هاشم صديق.
نمرق وين ياهاشم
كلمات: حسين شنقراي
نمرق وين ياهاشم
الشعب إتبوم
وأصبح كاضم
ما ظني يحاجج
أو حتي يناضم
مهما يطعن
فيهو الحاكم
وعهد الردة
الطوًل ظالم
يمرقوا وين ياهاشم
-------
حليل إكتوبر
والناس الماتوا
حليل القرشي
القدم للحرية
حياتو
مهما الشعب
إتعذب وزادت
مأساتوا
خوفاً مابلعن
حاكم سراً
في صلاتو
ما الليل الحالك
طالت سنواتو
ولازال العهد
الغاشم
ويمرقوا وين يا هاشم
-------
مهما تموتو
ومهما يجيكم
وكلما تولع ناراً
فيكم
خوفكم دايماً
طافيكم
من وين الحرية
تجيكم
قنعان من
خيراً فيكم
شوفوا فكي
يداويكم
شان ما تصبحوا
إنتو الشعب
الخادم
ويمرقوا وين ياهاشم
-------
الناس الحاسين
الوجعة
وضايقين هما
الفجعة
ديل القاعدين بره
وكايسين الرجعة
الديمة بولعوا
للحرية الشمعة
وزادهم أصبح
بكية ودمعة
وآلام في
الجوف الكاتم
ويمرقوا وين ياهاشم

- - - - - - - - - - - - - - - - -
تم إضافة المرفق التالي :
نمرق وين ياهاشم.doc


تعليقات 8 | إهداء 0 | زيارات 2144

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#537948 [الفاضل الهاشمي]
0.00/5 (0 صوت)

12-18-2012 06:43 AM
نمرق وين ياهاشم
الشعب إتبوم
وأصبح كاضم
ما ظني يحاجج
أو حتي يناضم
مهما يطعن
فيهو الحاكم


الشعب اتبوم؟؟؟ نآن دا ما غلت ؟؟؟؟. كلامك دا اعدلو ياشنقراي ...اقرأ التاريخ ...كلو فى النهاية لصالح الشعوب... قصايدك التانية كلها مع الشعب الذي يحاول ويحاول. ويقدم الشهداء

الفاضل الهاشمي


#537023 [أبو الدقير]
0.00/5 (0 صوت)

12-16-2012 05:34 PM
لا تفقد ايمانك في الشعب أخي شنقراي...بكرة تقول ابو الدقير قال...فالشعوب أقوى من جلاديها.


ردود على أبو الدقير
United States [Hussein Shingrai] 12-16-2012 08:33 PM
الأمل موجود والثقة لازالت بس كمان الخوف أصبح حاجز ولا بد من إستفزاز المشاعر والتحدي لكسر الخوف


#536835 [بنت الغضب ..]
5.00/5 (1 صوت)

12-16-2012 01:01 PM
لالالالالالالا زم نمرق !
شعر / بنت الغضب..
***
لازم نمرق من الخوف
ونطلق مارد كان مكتوف
طوّل ساكن ، وقلنا ظروف
***
دعوة هاشم وقلمو الفاهم
وقال ياناس أبدا مانسالم
قاصد اناغم فينا مكارم
وحسا راقد وعامل نايم
فوق الصمت الكاتم وناقم
***
وهاشم شاعر حاسي وشاعر
بى وجعتنا .. وفاير وثاير
وحاضن جرحا .. في الجوف غاير
لا بخاف بندق لا بهاب غاير
يجي متلثم .. بالليل زاير
وعارف الدنيا .. صروف ودواير
***
الكان ( قوشا ) صايل وجايل
هاتك عفة... أسمى جدايل
وزل ّ رجال الشرف الطايل
وكان منفوخ بالسلطة وقايل
بعده سحاب الآخرة الشايل
شوف الليلة مصيرو هوايل
***
وان كان نافع ..لابد دافع
تمن اقواله وكيف حايدافع
من غير منطق بيهو يرافع
عن أفعالوا.. وكل القالو
أكيد ينهار ..يوم يقسى سؤالو
يلعن حالو .. ويبكي مآلو
***
وتبقى عدالة ثورة تحاسب
لاهي بتظلم لا بتناصب
أى عداوة ..الا الغاصب
أو كان كاذب وفعلا كاسب
بالزور ..ناصب ..
من أموالنا ..وبهدل حالنا
وسده حيالنا
طريق أمالنا
وخطف السلطة
احتل مناصب
لازم نمرق
وهن الروح
الجد منجرحة
ولا خلاص حتموت الفرحة
يلا أمرقوا حماة السمحة
أو نديكم نحن الطرحة
***
بنت الغضب ..


ردود على بنت الغضب ..
United States [ودنفاش] 12-17-2012 11:14 AM
انتي ما بت غضب انتي بت بلد ربنا يديك العافية زي مارديتي لينا العافيه المرقه مننا كاتب المقال في لحظة غضب منه ومن غير قصد وتسلموا الاتنين وتسلم شاعريتكم الفذه . ويا شباب ما تيائسوا انا اتذكر تماما قبل فتره قصيره جدا في بلاد الغربه وكنا مجموعه من الشباب العرب لمن نتكلم عن الحكام وفسادهم كان معانا تونسيين ما كانوا حتي بهمسوا بكلمه من شدة ما اتمكن فيهم بن علي واها في الاخير لمن ربنا اذن وقال ليها كوني كانت باذن واحد احد .. هل كان في واحد متوقع انو الربيع العربي يطلع من شباب تونس الموصوف بانه اوروبي الهوي ؟؟؟ والله اشد المعارضين تفائلا في تونس كان يامل انو بن علي يموت قريب او قلبه يحن علي شعبه ده حتي ما كان في عشم في انقلاب عسكري فكيف بالسودان البغلي كله ؟؟ قربت ان شاء الله وانا متفااااااااااااائل خير

United States [awad] 12-16-2012 09:33 PM
عفيت منك بنت الغضب قصيدة جميلة وكل سودانى وطنى غيور على بلده وعرضه يقرأ هذه القصيده مش يمرق بل يمرق فاتح صدره يتحدى الجائر الظالم الذى ترهبه الصدور العارية التى لا تهاب الموت والموت يا بنى وطنى واحد وممكن الواحد فجأة يطب ساكت بذبحة أويموت بعضة جوع أو يموت مفزوع ولكن ميتة العز هى فى الدفاع عن الحق الضائع والمسلوب عينى عينك ويموت زودا عن شرفه الذى أنتهكته عصابة الحكم.لا بد من أن نمرق ونسترد الحقوق ونذل الذى أذلنا وأهاننا ومها قيل فينا فنحن شعب لن نخاذل ونداهن ولن نخاف وغدا سوف يعرف جلادنا بأننا ليس لاحسى الكوع ولا شذاذ افاق. غدا سوف يهربوا كالجرذان ونقيم المقاصل لكل من أرتكب جريمة فى حق هذا الشعب.

United States [Hussein Shingrai] 12-16-2012 08:29 PM
تسلمي أهو أستفزيكم زحركت مشاعر كانت كامنه وهذا هو القرض من القصيدة


#536824 [wudoof]
0.00/5 (0 صوت)

12-16-2012 12:42 PM
السودان يلد الرماد....؟؟؟


#536817 [سوداني أصيل جداً جداً]
0.00/5 (0 صوت)

12-16-2012 12:28 PM
تحياتي لك واقدر مفهومك ... لكن اقول ليك الشعب السوداني ما كده ياخي .. والله الشعب السوداني بناضل ... والدليل على ذلك الجبهة الثورية تقاتل من أجل إنقاذ الشعب السوداني البطل...

راجع مواقفك .. ولك مني الف تحية وتقدير


ردود على سوداني أصيل جداً جداً
United States [زروق] 12-16-2012 10:05 PM
وين الجبهة الثورية وين الثوره وين الناس ماشفنا الا حكومة السجم الرماد عندما يثور الشعب سوف يذهب بالجميع الي الجحيم


#536778 [المأمون علي أخوات فريقه]
5.00/5 (1 صوت)

12-16-2012 11:40 AM
كنافي السابق بنضحك على الشعوب الجبانة والآن أصبحنا نحن الأضحوكة . الرجال راحو مع الأزهري وزروق عليهم رجمة الله .


#536748 [وانا زول غلباااااان]
0.00/5 (0 صوت)

12-16-2012 11:00 AM
السادة والسيدات ... الكاتبين والكاتبات ... القرئين والقارئات ... في صحيفة الراكوبة ... كل الشعب السوداني وانا أولهم انبطح وصار لعبة في يد الحكومة ... كاذب من قال أنه سيخرج لأسقاط النظام ... نحن نناضل فقط في الفيس وفي الصحف الاكترونية وفي الجرايد والونسات ... لكن ساعة الحارة الجد الناس كلهااا بتستخدم الساتر .. لان هذا الخوف هو ما ربته وكبرته وسمنته فينا الحكومة متمثلة في المؤتمر اللاوطني ... كلنا أصبحنا نحب الراحة والانبطاحة ... والشعب خلاص فقد الثقة في نفسه وفي الحكومة وفي المعارضة التي اصبحت نمر من ورق ,,, لالالا النمر من الورق ذاتو بخوف الشفع لكن المعارضة اصبحت كاذبة وغشاشة كما المؤتمر الوطني .. دة يدقو بيهو دة... يا هؤلاء لا تصدقو المعارضة فهي يوم مع الشعب ويوم مع الحكومة ... وصدق رسول الله صلى الله عليه وسلم عندما أخبر انه ستكون هناك فتن كقطع اليل المظلم... والعاقل فقط من يعتزل الفتن ... الا هل بلغت اللهم فأشهد .......


#536703 [Abu Al- Toumat]
5.00/5 (1 صوت)

12-16-2012 09:54 AM
الناس الحاسين
الوجعة
وضايقين هما
الفجعة
ديل القاعدين بره
وكايسين الرجعة
الديمة بولعوا
للحرية الشمعة
وزادهم أصبح
بكية ودمعة
وآلام في
الجوف الكاتم
ويمرقوا وين ياهاشم


هذا هو اصدق تعبير ولما قريت قصيدتك والله خنقتنى الدمعة وما لينا غيرها من تعبير عن المشاعر _ شكرا لك على قصيدتك الرائعة والتحية للشاعر هاشم صديق والمرقة بقت برا البلدسترة حال ومعيشة عيال لمان الناس انفزرت ومال الحال


ردود على Abu Al- Toumat
United States [Hussein Shingrai] 12-16-2012 08:31 PM
لك الشكر أبو التومات وكلنا في الهوا سوا بس الصباح قرب طلوعة والرجعة لابد منها


حسين شنقراي
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة