المقالات
ثقافة وآداب، وفنون
أحمد الملك
أفضل الناس في القرية هم المجانين!
أفضل الناس في القرية هم المجانين!
01-04-2016 10:12 PM



بدأ الشتاء، هبت رياح الشمال الباردة فإكتسحت أوراق الاشجار المتكومة في الأفنية ، فتطايرت في الفضاء مثل الفراشات. كان شيخ النور يجلس في الشمس أمام المسيد، تعوّد منذ وفاة والده المسن قبل أيام أن يقضي معظم وقته في المسيد، هرع الناس جميعا الي الحواشات فأصبحت القرية خالية وموحشة، جاء بعد قليل سليمان الاعرج وحاج بشير وفارس المجنون،
قال شيخ النور: وانت السنة دي ما ناوي تزرع؟
قال فارس زراعة شنو السنة الفاتت شلت سلفية من البنك وزرعت يوم الحصاد جو ناس البنك شالوا المحصول كلو ووكت ما كفاهم ساقوني انا ذاتي معاهم!
وضحك شيخ النور وقال : أخير ليهم كان يسوقوا حمارك يمكن يجيب أحسن منك في السوق ويتم ليهم قروشم الناقصة
!
وقال الحاج بشير: وداير تعمل شنو يا ولدي؟ داير تمشي العمرة؟
قال فارس: السنة الفاتت مشيت حاولت العمرة قالوا تمشي في الأول تعمل الخدمة الإلزامية في الجيش ، مشيت عملت جواز جديد، زدت فيه عمري عشرين سنة ، برضو لقيتهم زادو سن الخدمة الوطنية. لكن السنة دي عندي فكرة جديدة.
قال شيخ النور: أها ناوي علي شنو.
قال فارس : داير أمشي أجاهد في الجنوب!
ضحك شيخ النور واشار الي جركان العرقي الصغير الذي يحمله فارس المجنون في حله وترحاله وقال :
انت جهاد نفسك غلبك ماشي تجاهد الناس التانيين!
قال فارس : دة شغل، قالو تمشي تقضي كم شهر هناك، طبعا ما تمشي تكابس قدام، تكون في الصفوف الورا ، تجيب الموية للناس البيحاربو، تربط لي زول مجروح يدو، تعمل ليهو جبيرة لو اتكسر، بعد تكمل كم شهر يدوك شهادة مجاهد، دي لمن ترجع بتفتح ليك الدرب!
سمعوا من علي البعد صوت عزف حزين علي الصفارة، تسرّب الصوت ببطء في خمول الضحي واختلط برائحة القهوة ودخان النار التي بدأت النسوة في اعداد خبز القراصة لطعام الفطور عليها. قال العم بشير : دة باين عليه سيد قيلة!
ظهر امامهم بعد قليل سيّد قيلة المتسول الموسمي، الذي يظهر في القرية في مطلع الشتاء ويختفي فجأة ليظهر في نفس الوقت بعد عام، توقف سيد وحيّاهم من علي البعد وطلب حسنة لوجه الله، كان يرتدي جلبابا جديدا وعمامة ناصعة وحين يتحدث كان ينادي بصوت جهوري وكأنه زعيم سياسي يلقى خطبة بمناسبة عيد الثورة، و كان يتسول من موقف قوة وثقة وكأنه يطالب بحقوق له عندهم، وبدا كأنهم هم الشحاذين وليس هو، وكان يطالب في الغالب بمبالغ ضخمة ليستثمر الصدمة في الحصول علي مبالغ معقولة،
أصدر أمره : شيخ النور داير لي مية ألف !.
ضحك شيخ النور وقال : لو بعت الحلة دي كلها بناسها وبهائمها ما تجيب ليك نص المبلغ دة!
أصدر سيد قيلة أمره البديل : طيب أديني بطانية أبوك تبقي ليه صدقة جارية.
ضحك شيخ النور وقال : ابوي لو كان عندو بطانية ما كان مات، أبوي مات بالبرد!
قال مخاطبا شيخ النور وكأن فارس المجنون غير موجود: فارس دة ظروفو كيف داير لي منو عشرة ألف !.
قال شيخ النور : فارس دة رأسماله الجركان دة، لو داير عرقي ممكن تتملي فل، لكن كاش والله اعلم ما عنده!
ضحك فارس وقال : نتصدق بالعرقي كمان ولا شنو؟
واصل سيد قيلة مخاطبة شيخ النور: وعمك بشير دة كيف، ولده مغترب في السعودية ما ممكن يشوف لي مية ألف؟ لو ما عنده بالجنيه بنقبل العملات الصعبة!
قال شيخ النور: نقّيت علي ولده من السنة الفاتت قالو هسع طردوه، لم في الكفيل دقاهه دق الرخصة عملو ليه خروج بدون عودة! حتي الحج ذاته ما يقدر يمشيهو تاني!
وسأل سيد قيلة: وهسع شغال وين ولده؟
قال شيخ النور : رجع قالوا شغال سمسار في السوق العربي.
نفض سيد قيلة جلبابه الممزق وجيوبه المحشوة بالورق وقال: أحسن بترولنا طلع .. بعد دة ممكن الناس يجوا يحجوا عندنا!.
ضحك شيخ النور وقال : بترولك دة وينو ؟ ما شفنا منو التكتح، نفس الجوع والغلاء، أمبارح محمد علي ودا اولاده المستشفي عندهم اسهال، قبل ما يطعنوا الجلكوز للولد طلبوا منه يدفع تمنه!وكت ما قدر يدفع ساق الاولاد وشرد من المستشفي!
واردف شيخ النور: انت بدل كدة ما تمشي مع فارس الجنوب تجاهدوا وتاخدوا شهادة الجهاد قالوا بتفتح ليكم الدروب يمكن بعد داك تلقوا ليكم قطعة واطة يا سلفية من البنك يسددوها اولادكم بعدين!
عبر في تلك اللحظة حسن المجنون الذي يركب علي ظهر حماره طوال اليوم، يقف في مكان واحد ونادرا ما يتحرك، فاجأه سيد قيلة: أديني الحمار دة يا حسن بديك صفارة بوص!
نزل حسن علي الفور وسلّمه الحمار وتسلّم صفّارة البوص، ضحك سيد قيلة بصوته الاجش وهو يعتلي صهوة الحمار وقال : والله المجانين في الحلة دي أحسن من العقّال! قبل ان يضرب الحمار ويمضي.
جلس حسن يعزف بجانبهم علي الصفارة، وواصل شيخ النور كلامه مع فارس: وانت هسع ضامن تجي راجع من الجنوب حي؟
وقال فارس: ما قلت ليك انا ماشي أقيف بي ورا، أجيب الموية وأعالج الجروح.
وقال شيخ النور: طيب الضربة ما ممكن تجي من ورا. ولا يقوم بيك لغم يبقي بدل ما تلم قرشين وتجي تعرس، يعرسوا ليك الحور العين.
قال فارس : وعرس زي دة كويس معاكم هنا تمشوا تتملوا علي حساب الحكومة واكون انا رحت شمار في مرقة!.
وقال شيخ النور: ميزتو الوحيدة عرس الشهيد انه بدون كشف!
أخرج فارس المجنون ورقة وقلما ليحسب الارباح المحتملة من رحلة الجهاد، غفا شيخ النور قليلا ثم إستيقظ علي صوت آذان الظهر، تساءل قائلا : يا اخوانا أنا فسيت؟ شميتو ليكم شئ؟ خايف يكون الوضوء اتقطع!.
لم يجبه أحد ، كان فارس مشغولا بحساباته، فيما مضي حسن المجنون بعيدا ونغمات صفارته تمزق صمت الحياة في الشتاء.

للحصول على نسخ بي دي اف من بعض اصداراتي رجاء زيارة صفحتي:
https://www.facebook.com/ortoot?ref=aymt_homepage_panel

[email protected]


تعليقات 3 | إهداء 0 | زيارات 4254


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1396230 [سوداني]
5.00/5 (1 صوت)

01-06-2016 02:27 AM
هذا بديع. شكرا للمبدع احمد الملك

[سوداني]

#1396027 [كتمت]
5.00/5 (1 صوت)

01-05-2016 04:12 PM
دا نوع الكتابة البطول العمر لأنها بتشيل كمية من الهموم والأحزان في هذا الزمن الرديء شكرا لك يا ملك .....أكتب يا أخي أكتب لأن في كتاباتك شفاء أفضح هؤلاء حتى لا يبقى في وجوههم مزعة لحم...أحييك مرة وألف لأنك ببساطة ثروة قومية يجب المحافظة عليها لحين شروق سمش السودان لنقول للعالم هاكم أقرءوا كتاب مبدعينا.

[كتمت]

#1395867 [عبد الإله زمراوي]
5.00/5 (1 صوت)

01-05-2016 10:27 AM
رائع يا أخي والله رائع. نفحات الشمال ورائحة الحقول الشتوية تُشَّم من خلال سردك الأنيق الجميل.

كان عندنا درويشٌ يعطي كل طفل يردد يا لطيف قليلاً من السُكر وكان لا يتحدث ابدا هذا الرجل الذي يشبه الأولياء. ولعلك سمعت عنه في منطقتكم حيث كان يجوب بحماره المنطقة الواقعة ما بين أرقو وكرمة يوميا. والأغرب أن أحدا حتى الآن لا يعرف مصدر حصوله على السكر.

[عبد الإله زمراوي]

أحمد الملك
أحمد الملك

مساحة اعلانية
تقييم
9.50/10 (2 صوت)





الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر.
علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.


Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة