سنة حلوة يا جميل!
12-31-2012 11:18 AM

سنة حلوة يا جميل!

الفاتح جبرا

والعالم يستقبل عامه الجديد .. أبت (أمنا الحكومة) إلا أن تهدي المواطن (ميزانيتها) لهذا العام المقبل 2013 وهي تغني له كعادتها «سنة حلوة يا جميل!»

بالفعل هو مواطن (جميل) بل هو أجمل مواطن عرفته (الأوطان) منذ أن خلق الله الأرض وما عليها فهو أي المواطن من (جمالو) فهو لا يتعب نفسه بمعرفة إن كانت هنالك (ميزانية) من أصلو.. بل ويعتقد جازماً (من شدة سذاجته) أن الحكومة شغالة بدون (ميزانية) بل بدون (أقلام ودفاتر) وإنو المسألة ماشة ساااااكت.. فالمواطن (الجميل) يسأل نفسه في غباء يحسد عليه.. كيف يمكن لدولة أن تضع ميزانية وكل مسؤول فيها (مُجنِّب) ليهو (كوم قروش) وقاعد عليهو؟ شئ بالعملات المحلية وشئ بالعملات الأجنبية وشئ بالما عارف شنو؟ كيف يتم وضع ميزانية وهذه الأموال (الما معروفة) خارج الميزانية؟

بالطبع سؤال (المواطن الجميل ده) لا يمكن أن يرد عليه مسؤول (أياً كان) كما لا يمكن أن يرد عليه أي من نواب البرلمان الذين (صفقوا) من قبل عند زيادة أسعار (السكر والوقود) ! بالمناسبة من باب التغيير وكده المرة الجاية عاوزين نواب (يزغردوا)!

سنة حلوة يا جميل.. سنة حلوة يا مواطن.. فالموازنة العامة (أم تجنيب) يا مواطن تُشير إلى أن معدلات (النمو الاقتصادي) في ازدياد.. ليس بالضرورة أن يظهر لك ذلك على تفاصيل حياتك المعيشية.. وإن كنت تظن أنّ مُعدّلات النمو الاقتصادي من الضرورة أن تظهر على مستوى حياتك المعيشية فأنت لا محالة جاهل (وعاوز ليك درس عصر) ولا تفقه في قوانين الاقتصاد. فمعدلات النمو الاقتصادي (يا جميل) حسب قوانين (مندل) لا تظهر إلاّ بعد الجيل السادس على أقل تقدير، ومسألة إنو المسؤولين ديل (يوروك) ازدياد معدلات النمو المسألة دي الغرض منها إنك تكون في الصورة وتطمئن على إنو المسألة (ماشة كويس) وإنو (حفيدك) السادس عشر سوف تظهر عليه علامات الثراء (غير المفاجئ) إذا أمد الله في أيامك و(قرونك).

سنة حلوة يا جميل.. فقد فاقت المصروفات (كالعادة) إجمالي الإيرادات مما جعل هنالك عجزاً مليارياً سوف تقوم الحكومة (يا عيني) بسد هذا العجز.. طبعاً شئ استدانة وشئ قروض وشئ شنو ما عارف وأنت يا (جميل) قاعد متهني ومستريح ولا عليك والحكومة مشلهتة تستدين من هنا وتخش في (صناديق) من هناك وتتعب تعب السنين وترهق روحاً علشان تسد عجزك وعجز اللي خلفوك !!

سنة حلوة يا جميل.. فقد ركّزت الميزانية (كعادتها) في الصرف على الأمن والدفاع (بالنظر) على حساب الصحة والتعليم.. تعليم بتاع ايه؟ وصحة بتاعة ايه؟ أفرض إنك بقيت (عالم ذرات) وصحتك ذي (الحصان) شنو يعني لو ما كُنتَ (آمن)؟ ما لازم (أمنا الحكومة) تضمن ليك وتضمن (ليها) استتباب الأمن وتوفر ليك (آليات) الدفاع عنك يا جميل ضد أي (غزو خارجي) حتى لو يتطلب منا (أسبوعين) لمعرفة إن كان (بالطيارات) الطافية لمبة وللاّ (بالصواريخ) ماركة (أبو لمعة)!

سنة حلوة يا جميل.. فقد ضمنت لك الموازنة الجديدة بأن راتبك سوف ينفذ من يوم خمسة في الشهر بعد أن جاء فيها عدم وجود أية زيادة في مرتبات العاملين بالمؤسسات الحكومية.. يعني كل يوم الأسعار زائدة (وربع البصل حصل 30 ألفا) ومرتبك في (محلو).. نصيحتي ليكا (أربط الحزام).. معليش مفيش حتة يربطوهو فيها بس (إنتا أربط)!

سنة حلوة يا جميل.. والميزانية لا توجد فيها فرص (وظيفية).. معليش (أمنا الحكومة) عملت ليها ستمية ألف جامعة لكن (ما ختت بالا) من حكاية (التوظيف دي).. احتمال كانت مفتكرة المسألة (تثقيف) ساااكت.. معليش يا (جميل) صَرَفتَ دم قلبك في تعليم الأولاد و(بِعتَ) الوراك والقدامك لحدت ما اتخرجوا لكن ما مشكلة اشتري لكل واحد منهم (درداقة) وخليهو يخش السوق.. وللاّ أقول ليك بلاش عشان مافي ليهم طريقة.. (المحليات استولت على الدرداقات وكده)!

سنة حلوة يا جميل.. عموماً يا (جميل).. خليك متفائل.. أمنا الحكومة دي عارفة ربنا كويس.. وما بتعمل إلاّ بما يمليه عليها ضميرها، والناس العملوا الميزانية دي أكيد عارفين أكتر مني ومنك انو المسألة دي ح تصب في النهاية في مسألة ازدياد (معدلات النمو) والتي سوف (تصب) في النهاية في مصلحتك ومصلحة أحفاد أهل الخلفوك يا جميل !!

يا جميل حقو تحمد الله وتبوس إيدك وش وضهر علشان (حكومتك) حكومة (إسلامية) وبتعمل بما يرضي الله ورسوله.. هسه لو كانت (حاجة تانية) كان موقفك يكون شنووووووو؟ ياخ استهدي بالله وخليك متفائل.. وسنة حلوة يا جميل !!

كسرة:

لا بصحيح.. أموال التجنيب دي بره (الميزانية) وللاّ جوه (البنوك)؟

كسرة ثابتة:

أخبار ملف خط هيثرو العند النائب العام شنــ(12+1)ــــو؟


تعليقات 18 | إهداء 0 | زيارات 5821

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#549223 [awad]
0.00/5 (0 صوت)

01-01-2013 09:37 PM
الرائع الأستاذ جبره سنه حلوه ياجميل وربنا يحفظك ويكف عنك أولاد الحرام والله أتمنى كسرة ثابته لا تتحرك قيد أنملة عن مشروع الجزيرة الراح وخطفوا منو ماعارفين وأمكن يكون وقع فعين زول..بالله فتش معانا ولا أمكن ناس التجنيب ديل يكون فيهم واحد يدلنا عليه.متعك الله بالصحة والعافية وعقبال الفرحة الكبرى للمواطن الغبيان.


#548901 [أبوأسامة المهاجر]
0.00/5 (0 صوت)

01-01-2013 12:13 PM
رائع كالعادة يا ودجبرة

وللمعلقين البسألوا عن الكسرة الثابتة إطمئنوا الكسرة موجودة ومافي حد يقدر يحذفها لأن السيد الرئيس متابع موضوع خط هيثروا شخصياًوكل صباح بيسأل الحاشية عن الكسرة عشان يطمئن على إنو جماعتوا في أمان من المحاكمة ولو إختفى الموضوع الرئيس بتحسس كرسيه.

في حالة واحدة بس المواطن ممكن يحس فيها بالميزانية وهي أن يتم تسريح جيش الأمن والمخابرات أو أن يتم تصديره لسوريا لمساعدة بشار حتى ينتصر على الثوار وييأس الشعب السوداني من الثورة.


#548721 [غريب في بلدو]
0.00/5 (0 صوت)

01-01-2013 04:31 AM
كل لحم نبت مت سحت فالنار اولي به( صدق رسول الله صلي الله عليه وسلم) ..اللهم اغننابحلالك عن حرامك


#548553 [julgam]
0.00/5 (0 صوت)

12-31-2012 08:14 PM
فالموازنة العامة (أم تجنيب
ممكن تقو ل( أم جنيب)......وهى حية تزحف على جنبها....حية تقطع أصل الكيزان الما عندهم أصل


#548551 [زول]
0.00/5 (0 صوت)

12-31-2012 08:11 PM
المقال القادم عودة سيدي وعيد ميلاد سيدي


#548533 [mohammad saad]
0.00/5 (0 صوت)

12-31-2012 07:39 PM
يا أستاذ جبرا
أولاً سنة حلوة لك أنت يا جميل ولو أنك أصلع بس برضو مستحيل!!
أنا أظن ي حاجة فايتة عليك يا جبرة. قلت لي نورني الله ينور عليك.
المعلن عنه دة يا أخي دة بايظ الميزانية وأرجو أن تشرح للناس البايظ دة يعني شنو لأن التجنيب القلت عليه دة هو الميزانية الحقيقية والا أنا غلطان. في الواقع أنا ناسي الكنكان كدي ذكرني شوية قبل ما يقع البايظ الثاني دة ويحرق الأخ!!!!! ياتو أخ؟ ياخي أخ!
بس بالله ما تجيب سيرة المغتربين ديل واله ما عندهم أي ورق يلعبوا بيه؟!!!!!!!


#548452 [khalifaalsudani]
5.00/5 (3 صوت)

12-31-2012 05:26 PM
لك الله ياجبرة فشيت غبينتنا شوية


#548431 [بت حبوبتها]
5.00/5 (3 صوت)

12-31-2012 04:54 PM
أستاذ الفاتح, نحن نحترم كتاباتك وننتظر نزولها لأنها بتعبر عننا صاح وتفشنا في الفساد الحاصل دة, ولكني أختلف معك اليوم بقولك "المواطن الجميل يسأل نفسه في غباء يحسد عليه" لأن المواطن بسيط وصبور لكن مؤكد ما غبي ! عمومآ نحن واثقين إنك ما قاصد المعنى دة ولكن كان لا بد من التنويه..مع خالص الود والإحترام


ردود على بت حبوبتها
United States [ابو فاطنة] 01-01-2013 12:03 PM
والله غبي وشبعان غباء
وغباء فريد من نوعو كمان والبخيليهو غباء فريد من نوعو انو مواطن غبي وماعارف غباهو ...
عليك الله الحالة النحنا فيها دي في غباء اكبر منها
لكم التحية ..

United States [محمد حسن] 12-31-2012 09:30 PM
الأستاذ الفاتح لا يقصد إهانة المواطن .. ولكن في مقالات عووضة والفاتح بالذات أرجو دائماً أن نقرأ ما بين السطور..


#548405 [ضبه]
0.00/5 (0 صوت)

12-31-2012 04:17 PM
كسرة تالته
يعني ماعارف


#548367 [fax]
5.00/5 (2 صوت)

12-31-2012 03:19 PM
كسرة المطار يا أستاذ هي ختمك وتوقيعك و لازم تتزيل في مقالاتك وإلا سنعتبر المقال مضروب أو مزور حتي لو كانت صورتك مرفقة معه .
والحمد لله رجعت ويا دوبك ( إتكيفنا) وشكرا لك وشكرا لإدارة الراكوبة التي اهتمت بالأمر .


#548287 [alx]
1.00/5 (1 صوت)

12-31-2012 01:29 PM
يا استاذ جبره انت اوعي تكون نسيت انو اهم اهداف الانقاذ ومخرجاتها هي ( زياده عدد الحفظة) ودا هدف استراثيجي و قومي كبير ..لذا جاءت الميزانية مواكبه للتطلعات دي و كدا


#548257 [صادميم]
5.00/5 (2 صوت)

12-31-2012 12:57 PM
افتكرتك بتهني الصادق المهدي بعيد ميلاده والله اتلومت معاه


#548238 [حاتم عبد اللطيف]
5.00/5 (2 صوت)

12-31-2012 12:29 PM
الكسرة الكسرة وين؟ أوعى يكونوا ....
رائع يا جبرة قلت لى إذا أمد الله فى أيامك و قرونك.!!! هههه


#548219 [معتوه]
5.00/5 (2 صوت)

12-31-2012 12:01 PM
لا بصحيح.. أموال التجنيب دي بره (الميزانية) وللاّ جوه (البنوك)؟
دى اشاعات يا عمدة .. لازمن اشاعات ..


#548212 [المشتهى الحنيطير]
5.00/5 (2 صوت)

12-31-2012 11:53 AM
رائع كالعادة يا جبره.. ربنا يكفيك شر أولاد الحرام.!!


#548208 [ابوالمكارم]
2.50/5 (4 صوت)

12-31-2012 11:50 AM
ىااخى جهجهتونا وين الكسرة فتشت الموضوع قلبا وعدلا زى المودر لى حاجة زى خط هيثرو ومالاقيها ؟ عليكم الله ريحونا شوفو لينا الكسرة راحت وين ياناس الراكوبة مايكون زول باعها؟؟؟!!!


#548197 [fax]
3.00/5 (2 صوت)

12-31-2012 11:41 AM
سنة حلوة وجميلة عليك يا أستاذ بس إنت بقيت زي الحكومة في التجنيب ,,, اليوم جنبت كسرة خط هيثرو من مقالك ماالسبب يا تري !!!


ردود على fax
United States [ضبه] 12-31-2012 04:19 PM
يمكن عشان الكسره التالته


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة