مدارس الإغتصاب الخاصة
01-02-2013 10:53 AM

مدارس الإغتصاب الخاصة

الفاتح جبرا
[email protected]

إذا وجدت أن إحدى الحكومات حريصة على أخذ حقوقها أكثر من القيام بواجباتها فأعلم أن البلاد تنهار .. هي مقولة للعبد لله (ملكية فكرية) .. طيب تعالوا ناخد أمثلة وبعدين نشوف أيه الجاب الكلام ده ..
أفتح مطعم .. ح تطالبك الحكومة بدفع رخصة تجارية ورخصة صحية وفتح ملف في الضرائب وفتح ملف في الزكاة وشهادات صحية للعمال ودفع رسوم نفايات ورسوم صحة ورسوم شنو وشنو وشنو .. وكل يوم يومين ح ينط ليك زول من ناس المحلية عاوز قروش .. السؤال : هل يوم جاك زول قال ليك (الحلل) دي وسخانة و(مكدبة) والضبان حائم (قدام الأكل)؟ هل في زول جاك شال ليهو (قطعة لحم) عشان يمشو يفحصوها يشوفوها تبع ياتو فصيلة من (الكلاب)؟ طبعن لا !!
طيب أفتح ليك صيدلية .. ح تدفع رسوم الدنيا والعالمين .. وتقدم شهادات ما أنزل الله بها من سلطان .. ومع إستخراج كل شهادة ح تدفع دم قلبك .. وتفتح الصيداية وتملأ الرفوف بالأدوية .. هل زول جاك عشان يشوف الأدوية دي ضاربة وللا مغشوشة وللا صلاحيتها منتهية وللا جاية من (أسرائيل)؟ طبعن لا !!
أدخل اي سوق .. (أم درمان مثلاً) ح تلاقي الأوساخ مالية الزقاقات بصورة (قميئة) على الرغم من أنو المحلية تتحصل رسوم حتى من (ستات الشاي) !! بتمشي وين (هو البمشي شوية) هل في مسئول في المحلية بعد ما أخد (حقوقو) قال يقوم بواجبو في نظافة السوق .. طبعن لا (ما خلاس شال القروش) ! !
كل الحاجات الفوق دي كوم .. والخبر الذي دعاني لكتابة هذا المقال كوم تاني .. فهو يخص أطفالنا مستقبل هذه البلاد .. الخبر أوردته الزميلة السوداني على صفحتها الأولي بالأمس وعنوانه يقول (القبض على معلم أساس في بحري بتهمة التحرش وإغتصاب 26 طفلاً) ويشير الخبر إلى أن المتهم كان يستقدم الأطفال الأبرياء إلى مكتبه ويشرع في إغتصابهم حتى وصل ضحاياه إلى 26 طفلا وذكرت التحريات إلى أن المعلم سبق وأن فصل من عدة مدارس حكومية لسؤ السلوك قبل أن يتجه إلى المدارس الخاصة .
إنتهي الخبر .. وعلى نسق ما أوردناه في صدر المقال من أمثلة .. عاوز تفتح مدرسة خاصة؟ ما مشكلة ممكن تكون (جزار) .. عندك محل (تشاشة) .. تاجر احذية .. قدم أوراقك وأدفع كل الرسوم .. وخذ التصديق وضعه في برواز جميل في مكتب المدير ثم أبدأ في تعيين معلميك (بدون أن تسألك الوزارة) إن كانوا خريجين كلية (الفنون) أم (السجون) !!
لقد بح صوتنا ونحن نحذر من هذه (الهيصة) و(الجوطة) التي تعم ما يعرف (بالمدارس الخاصة) وعدم وجود إشراف حقيقي عليها من قبل المسئولين .. كل زول أجر ليهو مبني .. وجاب ليهو (معلمين) وعمل ليهو كم إعلان وخلاس !!
للأسف لا يوجد إشراف ومراقبة ومتابعة من الجهات المسئولة .. المعلمين ديل مؤهلين؟ ما مؤهلين؟ سبق طردهم من مدارس لسؤ الأخلاق ؟ المدارس دي فيها بيئة مدرسية كويسه ؟ ما كويسه؟ قاعدة تدرس المناهج (وفي إنتظام) .. هل عدد المعلمين وتخصصاتهم يتناسب وعدد التلاميذ ام لا ؟ جداول الحصص (الفاضية !) ، الوجبات التي يبيعها البوفيه هل هي صالحة ؟ ووووو
لأن العبد لله يعلم أنه في هذه البلاد (الطيب اهلها) لا يوجد مسئول يقر بتقاعسه في أداء مهامه فهو لا يعتقد بأن الإخوة في وزارة التربية والتعليم (قسم التعليم الخاص) سوف يشذون عن ذلك وح يقومو يدخلو (بى حمد) ويطلعو (بى خوجلي) دون أن يعترفوا بتقصيرهم في هذا الأمر غير أن السؤال واضح ومحدد : ما هي الكيفية التي تم بها إستيعاب ذلك المعلم (الذئب) على الرغم من (ملفه الأسود) ؟
ولأن العبد لله ذو صلة بالمسألة التعليمية فهو يعلم تماماً (وفيها تحدي كمان) بأن عدداً مقدراً من المدارس (الخاصة) لا تدري الوزارة عن (المعلمين) الذين يدرسون بها شيئا مما يجعلنا عزيزي القارئ- موعودين بجرائم تقشعر لها الأبدان !

كسرة :
والحال هكذا لن نندهش إن وجدنا لافتة تحمل إسم (مدارس الإغتصاب الخاصة)

كسرة ثابتة (نيو لوك بمناسبة السنة الجديدة وكده) :
أخبار ملف خط هيثرو العند النائب العام شنو(وووو وووو وووو)+(وو)




تعليقات 28 | إهداء 0 | زيارات 9696



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#570914 [foxzamano]
0.00/5 (0 صوت)

01-29-2013 09:52 AM
انا ما عندى تعليق فى الموضوع دا
بس فى مدرسة أفظع من دىاسمها مدرسة الأوائل الخاصة العنوان أم درمان الثورات شمال جامعة التقانة (شارع النص ) المدرسة دى بستخدموا الأساتذة أتفه الألفاظ مع الطلاب بالاضافة قبل شهر تقريبا حصل بها اشتباك بين الطلاب والأساتذه أدى الى تدخل الشرطة وأشياء أخرى كثيرة
تخريمة (الأستاذ قال لى الطالب ....... المشهور سجارة البنقو دى أشربها بره المدرسة ما تلفها فى الحمامات وتشربها )
تخريمة خطيرة الطالب ...... الصف الثانى ثانوى يدخل الفصل وفى يده (قزازه) أنا قايلها سفن أب طلعت ........
وفى فيديو مصور للاشتباك


#553753 [محمد]
3.00/5 (1 صوت)

01-08-2013 09:28 AM
العيب للأسف الشديد والذنب ما علي هؤلاء المرضي الذين يتحرشون بالأطفال لكن العيب حقاً في من ينفذون القانون والعقاب ، لو كان من أول قضية أثارها الإعلام في إغتصاب الطفلة مرام _ وفجرت الوعي الإعلامي عن الحديث عن قضايا الإغتصاب _ كان حكموا علي الجناة بعقوبة القتل صلباً أمام الملأ وكان كل واحد ماري علي المصلوب أداه كف وبصق عليهو في وشه كان والله ما إتكررت ثاني لكن للأسف الشديد ،عملنا شنو بأقسام حماية الأسرة والطفل ليه ما تكون هذه الأقسام بها محاكم فورية زي محاكم الشريعة الفورية الي كان بذيعوها في الأخبار ،بعدين ليه دائماً نواري الأسماء ونرمز بالحروف فقط ، ليه هو المغتصب ده لما نفذ جريمته دي كان عمل حساب لفعلته دي وما يترتب عليها من آثرسلبي علي الأبرياء ديل عشان نحنا نجي في تنفذنا للعقوبة نراعي ليه.والله مافي شئ مضيع حقنا وحق أولادنا غير المضايرات دي .


#550835 [إبن السودان البار -----]
0.00/5 (0 صوت)

01-04-2013 01:00 PM
هذه الظاهرة الخطرة ومشينة قديمة والكل يعرف ذلك ؟؟؟ من منا لا يعرف عن بعض الأساتذة وشذوذهم وقصصهم ؟؟؟ وحتي النظار والمفتشين المسؤولين يعرفون عن بعض أساتذتهم الشواذ ويتعاملون معهم بسلبية ؟؟؟ والمجتمع لا ينبذهم كما يجب بل يقال عنهم انهم مبتلين وكان الله يحب المحسنين وتجدهم يتعاملون معهم بكل إحترام ويدعونهم للمناسبات العائلية وغيرها ؟؟؟ هذه الظاهرة المريعة تنتشر في كل الدول العربية وبمستويات مختلفة والي الآن لا توجد دولة عربية تناولت أسبابها بكل شفافية وحاربتها بكل جدية ؟؟؟ تخيلوا معي عندما يسمع شاب بشخصية شاذة علناً وله منصب كبير في الدولة ويحظي بإحترام الجميع ويؤم المصلين !!! علي سبيل المثال المرحوم حاج نور الذي كان من أساطين الكيزان والمؤتمر الوطني ؟؟؟ الا يشير ذلك له أن الشذوذ ليس بالعمل المنكر ومقبول من المجتمع ؟؟؟ هذا الشخص قال عنه كبيرهم الذي علمهم السحر الترابي أنه شخص طاهر وجسده فاسد ؟؟؟ هذه الظاهرة لها أسباب موضوعية ويجب علي علماء الإجتماع دراستها وإيجاد الحلول لها ؟؟؟ من ضمن هذه الأسباب إعطاء المدرس سلطة وهيبة فوق البشر ويعتقد الكثيرين أن له الحق أن يفعل بأبنهم كيفما يشاء ولا يسائلوا من اي كان انهم فوق البشر ؟؟؟ ( قف للمعلم وأوفه التبجيلا إن المعلم كاد أن يكون رسولا ) ؟؟؟ وهنالك جملة خطرة متداولة ومعمول بها وهي ( يا استاذ انت لك اللحم ونحن لنا العظم ) وهنالك من يأمر المدرس بأن يضرب ابنه بكل قسوة ليأدبه معتقداً بأن ذلك جزء هام من التربية ولا يستمع لشكوي إبنه ولا يعطيه الفرصة لكشف تحرش الأستاذ بأبنه ؟؟؟ ولا يدري بأن بعض الأساتذة الشاذين قد يستقلوا هذا الإرهاب لكسر الطفل وجعلة لقمة سائقة لبعض الشواذ ؟؟؟ عدم الشفافية مع الأطفال ليكونوا صريحين مع أبائهم ويخبروهم بكل شجاعة عن ما يتعرضوا له في الشارع أو المدرسة أو من أبناء الجيران الكبار يجعلهم ضعيفين وسهلي الإنسياق ؟؟؟ ومن المعروف عن تربيتنا السودانية العامة بأن الطفل لا يجب أن يتحدث كثيراً مع الكبار وخاصةً في مواضيع الجنس الذي لا محال أنه سيتعلمه من أولاد الفريق أو ما يسموا بالشوارعية ؟؟؟ عندما يجتمع الكبار الطفل يزجر ويبعد وحتي في الأكل فأنه يأكل بعد أن يشبع الكبار ؟؟؟ والملاحظ أن اطفال المصريين أكثر فصاحة وجرأة لأن تربيتهم تختلف وأباهم يستمعون لهم ويجاوبوا علي كل أسئلتهم ولا يزجروهم ؟؟؟ يقال أنه من أسباب الحريق الرئيسية في المنازل أن كل شخص يعتقد أن الحريق يمكن أن يشب في بيوت الآخرين وليس في بيته ؟؟؟ وكذلك الآباء يعتقدوا بأن الأساتذة الشواذ يمكن أن يتعرضوا لكل أطفال الغير الأ لطفله ؟؟؟ وهنا تكمن الخطورة فتجد الكل لا يبالي إذا سمع بأن في مدرسة أولاده أستاذ شاذ يتحرش بالأطفال ويجد ضحاياه بكل سهولة وبدون مسائلة حتي يصل عددهم الي 26 طفل ؟؟؟ فيا للهول ؟؟؟ وين يالبشير حكومتك الإسلامية وتطبيق الشريعة التي تدعيها وإنت حكومتك غارقين في الفساد حتي أذنيكم وتشجعونه وتحموه كذلك وتتخذوا من الشذوذ عقاب لمعارضينكم ( رحم الله المهندس بدرالدين إدريس الذي اغتصب بأمر نافع الما نافع وأمامه ؟ ليفقد عقله ويقتل بعض أفراد أسرته وينتحر ) إفتح قوقل وأكتب الدكتور فاروق محمد إبراهيم لتعرفوا قصة إغتصاب المرحوم؟؟؟ والثورة قادمة لكنس كل الدجالين وتجار الدين السابقين وطوائفهم والكيزان تجار الدين الجدد اللصوص القتلة مغتصبي الرجال والنساء قاتلهم الله ؟؟؟


#550337 [أبوأسامة المهاجر]
5.00/5 (2 صوت)

01-03-2013 02:47 PM
يجب إعدامه وصلبه في ميدان عام لأن هذا من الذين يحاربون الله ورسوله ويسعون في الأرض فساداً

كمايجب أن تلزم المدارس الخاصة بتزويد وزارة التربية بملف لكل معلم وموظف بالمدرسة يشتمل على اورنيك فيش وتشبيه وشهادة حسن سير وسلوك من الجهات الحكومية أو الشعبية والمشكلة إنو الفيش بقى يطلع بالرشاوي ودي مشكلة تانية

كما يجب أن تلزم المدرسة بعمل اورنيك تعريف يشمل ضامنين لسلوك الشخص المراد توظيفه في المدارس الخاصة.


#550209 [حرجولي]
5.00/5 (2 صوت)

01-03-2013 10:55 AM
الحصة الاولي تربية اسلامية
الحصة الثانية/ اقتصاب وليس اقتصاد
الحصة الثالثة/فقه
الحصة الرابعة / اقتصاب
الحصة الخامسة/ تلاوة
الحصة السادسة والسابعة / اقتصاب
الواجب المزلي / حفظ سورة يوسف وأل عمران والواقعة
والنتيجة النهائية
لن ينجح احد


#549849 [عصمتووف]
5.00/5 (3 صوت)

01-02-2013 07:13 PM
سمعنا بالاغتصاب الفرادي بقي بالجملة كمان انا مندهش للحكاية من حقي اسأل كيف هذا الشخص يختار ضحاياة ونوعهم وهل يكتفي بواحد او كمية في اليوم وهل تتم داخل المكتب ام المراحيض ومافي مدرس شافوا ولا خفير وبما انة مسجل خطر في االمدارس الحكومية لماذا لم تعمم نشره بعلم المباحث لجميع مدارس السودان والصحف وبالصورة وفي التلفزيون يجب فضحهم جميعالكل ( صقر عيالاتي )الوقاية خيرا من العلاج علي كل صحيفة تخصص نصف صفحة لنشر هذا الغسيل القذر وريحونا من ابوالقنفد عبدالعاطي ولا ابوالعفين ولا ادم ابوساطور ولا البشير ديل لو تم اغتصاب عيالهم ما مهم عندهم اصلهم طبقات مبتذلة


المشكلة يكون مريض بالايدز او اي من الامراض الجنسية الاخري لعنة الله عليك ايها النهم البشع مركب شنو هايدورليك تقعد تحفر تحفر الله يلعنك ويلحقك بقوم لوط وتشوفو في جني جناك


حليل المعلم مربي الاجيال والله العظيم شاهدتة مدرس شغال نقاش في مدرسته مقاولة والله العظيم وربي يسألني كم والمدرسة بالامتداد الثالثة سالنا قالوا ماسكة مقاولة هل هذا مدرس ومربي محترم وهل لو كنت طالب اهابة


#549833 [xxxx]
5.00/5 (3 صوت)

01-02-2013 06:40 PM
هو والله الطالب المسكين ده لو طلع من اغتصاب بتاع الحافلة ,اطلع ليهو الأستاذ؟.الله اكون فى عون الطلبة .


#549817 [واحد مستغرب]
3.00/5 (2 صوت)

01-02-2013 05:58 PM
زمان كان عندنا واحد استاذ بنفس الطريقة دي . و نحنا كنا بنشوف حاجات غريبة بيعملها مع بعض الطلاب و خاصة طلاب الصفوف الصغري . و المؤسف انو الاساتذة الباقين ما كانو بيصدقو كلام الطلاب الزينا . و ان شوفتو بيتصرف تصرفات و نظرات غريبة مع واحد طالب معانا , و عديل كدة دخلنا انا و هو و مكاجرة , بقي يلفق لي في المشاكل عشان اسكت من حركاته . المهم في الموضوع و بالذات يا (الشايل المنقة ). بعد ما انتهت السنة الدراسية و كانت بعد امتحان الشهادة صادفت الاستاذ الزفت ده في الشارع , و والله ياجماعة ياريت لو شفتو شكله في اللحظة ديك قرب يبول في هدومو الله يكرمكم . و انا بخبط و اكفت فيه لمن يدي وجعتني و كمان كفيت بتاع هلافيت مش بتاع شكلة , و هو ما حاول حتي يجري و صدقوني لو قلت ليه اي حاجه ... كان بيعملها لكن الحمد لله انا ودناس و بعرف الله . لكن انا متأكد انو الكفيت بتاع اليوم داك ما ح ينساه ابداً و لو تاني بكرة قابلته برضو بكفته و ما ح يقدر يتحرك حتي . علي فكرةانا حجمي ما داك الكبير لكن المرضان جبان ساكت . ارجو ان تعلن المدرسة عن اسم الكلب ده و اي واحد مجرد يصادفو يفهمو لحدي ما يموت , وكان طلع هو نفس الاستاذالقديم ده انا بكتلو .
و دام السودانيين رجال و البلد بخير و ربنا يصرف عننا التتر الجدد بوسخهم و عفنهم و عواليقهم


#549785 [الحر]
4.25/5 (5 صوت)

01-02-2013 05:04 PM
هل يعلم الجميع ان اول من بدا التعليم الخاص هم اناس من داخل النظام وبعدين يااخ الفاتح انت ادري منا بان الحكومة من زمان رفعت يدها من اشياء كثيرة من بينها التعليم وسلمتها للقطاع الخاص عشان يتاجرو اولا ويرتاحو من المسائلة وطبعاَ ده فهم خاطي جداَ وهم قصدهم دمار كل شي قبل ان يذهبو الي مذبلة التاريخ واول ماجو ماخلو كادر مؤهل ولازول بيفهم ولازول شريف في منصبه والتعين عندهم من اهم شروطه انك تكون حرامي ومرتشي من الطراز الاول الشرط الثاني انك تكون كوز طبعاَ وحافظ ليك كم اية كدة وكم حديث لزوم الشقل وفقه الحاجة الشرط الثالث انك تكون بارد ديوس ماعندك غيره حتي لو لقيت راجل نايم مع زوجتك عادي الشرط الرابع ان يكون عندك لسان سليط وتكون كذاب ومنافق واهم شرط انك تكون غبي وماعارف اي حاجة عن الوظيفة البتشتقل فيها


ردود على الحر
United States [أبو الفوز] 01-02-2013 07:25 PM
ههههههههههها دا كلو في الجماعة ديل ياالحر .


#549755 [عوص محمد احمد]
4.50/5 (4 صوت)

01-02-2013 04:20 PM
لا يسعنا الا ان نقول لاحول ولا قوة الا بالله - اتمنى ان يقتل ويصلب امام المدرسة ويكون التنفيذ يحد السيف - اكاد لا اصدق بعض ما يحدث في بلدى اشعر كانه كابوس ماذا حصل حسبي الله حسبي الله حسبي الله ولا حول ولا قوة الا بالله- نفذوا شرع الله


#549743 [cour]
4.50/5 (3 صوت)

01-02-2013 04:09 PM
هاك جارى كان بياع كتب فى مواقف المواصلات البيقولو كتاب بجنية +كتابين هدية .الان هو مدير مدرسة من الروضة للثانوى مشغل معاه صاحبي حرامى كان شرطى تم فصلة وسجنة الاغرب من كدة اخر السنة التلاميذ بينجحو


#549708 [فاطمة محمد أحمد على الفاضل]
0.00/5 (0 صوت)

01-02-2013 03:17 PM
هذا هو مشروعنا الحضاري ولو ما عاجبك اشرب انت ومن معك من البحـر.


ردود على فاطمة محمد أحمد على الفاضل
Israel [alx] 01-10-2013 04:25 PM
طيب يا فطومة دايرين نتحضر شويه اصلو الايام دي تعبانين من عدم الحضارة ... ايه رايك ؟؟


#549703 [الذئب البري]
5.00/5 (3 صوت)

01-02-2013 02:59 PM
بالله يا جبرا ليه تشبهني بالحيوان ده ؟؟؟؟؟؟؟؟؟ أنا حيوان محترم ولا أفعل مثل هذه الفعلة الدنيئة بتاتا . ارجو الا تكررها فقد جعلتني ابكي كما بكي اخوة يوسف حينما جاءوا أباهم عشاءا يبكون .


#549684 [وليد عثمان]
5.00/5 (3 صوت)

01-02-2013 02:07 PM
عزيزى ساخر سبيل تطرقت اليوم لقضية اخطر الف مره من ملف هيثرو وهو ملف يخص النشئ السودانى الذى سيقف عندهم جميع ملفات الدوله واذا كان المربيون فى الدوله لايهتمون بطرق تنشئتهم يجب ان تغيير الكسرة الى اخبار دوله السودان ومستقبلها شنووو لنطرق مثل هذا القضايا الحساسه وحكهها لما تجيب الدم


#549669 [nasereddin]
5.00/5 (2 صوت)

01-02-2013 01:35 PM
والذي يغتصب وهو نائب والي ومسؤول أمني !!!!... والذي اغتصب الوطن كله !!!!ماذا نفعل لهم ..صدقنا البيان الأول بتاع البشير (حنجيب ليكم أطهر ناس!!!)صدًقناكلام الراجل و(المؤمن صدًيق)...وعايزنا نصدق 24 سنة قادمة ...


#549661 [إبن السودان البار -----]
5.00/5 (3 صوت)

01-02-2013 01:27 PM
الله يرحم حاج نور أحد كبار الكيزان المشهورين ؟؟؟


#549649 [د بله]
5.00/5 (3 صوت)

01-02-2013 01:09 PM
تحياتى يا استاذ و كل سنة و الشعب السودانى طيب و بخير
ده اسمو فقه (( غض الطرف))
بتاع مطعم بدفع يفتشوا حللو ليه؟
صيدلى بدفع يفتشوا ادويتو ليه؟
مدرس بيدفع- اتحرش , اغتصب, اتنيل بستين نيلة ما مهم- المهم بيدفع يفتشو مدرستو ليه؟
قال الشاعر قديما( لكن ما شديد خالص)
فغض الطرف انك من سودان فلا حبشة بلغت و لا ارتريا!!

كسرة:- عليك الله يا استاذ خت علامات التعجب فى العنوان و كده. اى نعم نحن مات الاندهاش و التعجب فينا من هول ما نرى و نسمع لكن اذا ما كنا بنندهش حقو (نتداهش) عشان ما تموت الدهشة فينا كلو كلو و عشان الاجيال القادمة لأنو المقالات دى قاعدة و محفوظة فى النت.


ردود على د بله
United States [cour] 01-02-2013 04:17 PM
يا فاكس المدرس تم معاقبتة من قبل حوالى 114 مرة عشان كدةالعقوبة المرة الظاهر حبعد الى اى من سفارات السودان

United States [alx] 01-02-2013 03:22 PM
المعلم دا اكيد كوز .. وبعد العمايل دي حيدوه كم سورة كدا ؟؟و حديث ؟؟ للحفظ غايتو مسكين حيتعب شديد


#549638 [ابو مبارك]
5.00/5 (1 صوت)

01-02-2013 12:48 PM
بمناسبة النيو لوك انا خايف يوم نجي نلقى مقالك يا جبرا كلو بقى كسرة ثابتة (مجليه) يعنى كدا:
الفاتح جبرا
كسرة :اخبار ملف خط هيثرو العند النائب العام شنو( وووو)+ (وو)

يعنى بدل ما تكون صحفي تبقي ترزي ، وبدل ما تكتب مقالك تخيطو ، يعنى تبقى كاتب ووو خياط ، اهو مهنة في اليد بدل الصحافة اللي ما جايبه ليك همها دي
والا اقول ليك استعين بالـ copy والـ paste مالخياطين مالين البلد الايام دي
مع خالص احترامي وتقديري لك ولكل الترزجية الشرفاء الذين يأكلون من عرق جبينهم وليس من عرق جبين القلابة .


#549616 [الشايل المنقة]
5.00/5 (14 صوت)

01-02-2013 12:13 PM
...والـ 26 طفلا ديل , ما فى واحد منهم عندو والد عاقل كده يشيل مسدس ولّا عكاز يكتل المجرم المعلم المريض ده..!!؟؟؟


ردود على الشايل المنقة
United States [ابن حلايب] 01-03-2013 01:30 PM
أخوى الشايل المنقة رجعت ليك تانى يوجد خبر فى صحيفة الاهرام المصريه عدد اليوم الخميس ( 03/01/ 2013 عن واقعة تحرش جنسى لطالب ارجو منك قراءة الخبر وردة فعل والد الطالب و احد اقاربه .

United States [cour] 01-02-2013 04:25 PM
واللة يا الشايل المنقة ديل اوليائهم دائما فى اجتماع او سفر او عند المرة الصغيرةفبتالى هم مش فاضين اوى

United States [ابن حلايب] 01-02-2013 01:59 PM
آآآآآآآآآآآآآآآآآآه يا يا خوى الشايل المنقة لقد تملكنى إحساس أدمى قلبى و كأن ال 26 طفل ديل ابنائى . فعلا اين اولياء امور هؤلاء الاطفال و لماذا لم يغتصو من هذا الساقط !!!!!!!!!!!


#549614 [عزالدين]
5.00/5 (1 صوت)

01-02-2013 12:04 PM
سبحان الله التدريس مهنة انسانية بس ديل حولوها حاجات ابعد ماتكون للانسانية اللهم اكفي البلاد واكفنا شرهم يارب العالمين


#549613 [karlos]
5.00/5 (1 صوت)

01-02-2013 12:04 PM
أخبار ملف خط هيثرو العند النائب العام شنو(وووو وووو وووو)+(وو)

ما قالوا ليك الملف وصل لرئيس الجمهورية انت خائف من رئيس الجمهورية؟؟؟


ردود على karlos
United States [مواطن حر] 01-02-2013 01:21 PM
يعني راح شمار في مرقه.... وهو الرئيس ألبليد ده ألبخاف منو منوا.


#549602 [خليل عزة]
5.00/5 (2 صوت)

01-02-2013 11:45 AM
آن لابا خليل أن يخلف رجليه ويقول:

ملعون أبوك بلد ..

!!!!!!!!






هسه واحد يجي ناطي ويتفلسف : البلد دخلها شنو؟


ردود على خليل عزة
United States [احمد ابونصر الشمالي] 01-02-2013 03:42 PM
قالو قبلك مالك عقار .. كنا نتمناه من الاستاذ جبر ان يمتب هذا المقال ومقالته عامة في احدي الصحف السودانية الاكثر انتشاراً حاصاً في السودان ... مع علمنا بان الاستاذ محمي جامد


#549600 [جنوبي]
5.00/5 (1 صوت)

01-02-2013 11:42 AM
لا حول ولا قوة الا بالله ..


#549596 [أبو أحمد]
5.00/5 (5 صوت)

01-02-2013 11:34 AM
يمرقوك بي خوجلي القريب دة يا جبرا والله المبرراتية ديل يدخلوك بي الحاج يوسف ويمرقوك بي مانشستر ..تتصور مرة إيمان بركيةاستضافت وكيل وزارة التربية والتعليم صاحب حافز الامتحانات أبو مية وستين مليون الكان تبريره بأنه لا يدري شيئاًعن مقداره وهو وقف للفقراء والمساكين والعاملين عليها يصرف بمعرفة مدير مكتبه ولا يدخل في جيبه مليم منه بالغاً مابلغ...المهم في البرنامج أستعرضت المقدمة تقرير عن مدرسة في شرق النيل ليس فيها من المدرسة سوى الاسم فهي بدون سور وفصولها أيلة للسقوط والبهائم تسرح مع الطلبة والزبالة تحيط بها من كل الجهات ولا موية لا نوراً دنا ثم سألته بالله دي هسع يسموها مدرسة؟فقال ليها عرفتها دي مدرسة البروف؟ قالت ليه بالله تتوقع إنه يطلع منها بروف؟ قال بروف واحد والله بروفات وقولي معتصم عبد الرحيم قال، سألته بالله كيف مدرسة ما يكون فيها سور؟ أعتدل في جلسته وقال ليها دون أن يرمش له طرف: إنتي ما شفتي ولا سمعتي بالتوجه القائم في بريطانيا(مدارس بلا أسوار) تصدق...فقلت في نفسي حسبي الله ونعم الوكيل اللهم لا تسلط علينا من لا يخافك ولا يرحمنا... إنه لأمر مؤسف حقاًأن يكون في مدارسنا مثل هؤلاء المعلمين ولكن الأكثر أسفاً أن يقوم على أمر الوزارة نفسها مبررون يتعقدون في قرارة أنفسهم إن تبريرهم في الله وتقصيرهم في الله وحوافزهم في الله


#549587 [معتوه]
3.75/5 (4 صوت)

01-02-2013 11:19 AM
دة مدرس ثقافة جنسية ولا شنو ؟ معقولة ست وعشرون تلميذا ؟ ماذا اقول ؟ هذا ماراده لنا الانقاذيون . تبا لهم ووا اسفاه على وطن يُلاط فيه الغلمان ( جيل المستقبل ) انشاء الله القيامة تقوم تريحنا من هكذا حياة


#549581 [الطيب]
3.50/5 (2 صوت)

01-02-2013 11:16 AM
والله العظيم ان كان ولي أمرنا البشير به زرتين من تقوي وأخلاق لتناول هذا الامر بنفسه وقام بواجبه امام الله .


#549576 [دربكين الليل]
5.00/5 (3 صوت)

01-02-2013 11:13 AM
لعنة الله على المعلم......نطالب الدولة بتنفيذ حكم الإعدااااااااااام في مكان عام.


#549569 [kayletoud]
5.00/5 (1 صوت)

01-02-2013 11:06 AM
لا حول ولا قوة إلا بالله !

يا هو ده السودان !


الفاتح جبرا
الفاتح جبرا

مساحة اعلانية

تقييم
9.93/10 (8 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة