جمهورية السودان الغزَّاوية..!!
01-07-2013 01:57 PM

بالمنطق

جمهورية السودان الغزَّاوية..!!

صلاح الدين عووضة
[email protected]

* هكذا أقترح أن يكون اسم دولتنا السودان..
* فهو يُشبع رغبة لدى أنصار (عدم الدغمسة) منا في الإعلان عن التوجه العروبوي من جهة..
* ويشبع رغبةً لديهم في إظهار التوجه الإسلاموي من جهة أخرى..
* فالقضية الفلسطينية هي قضية (العرب)الأولى من لدن عبد الناصر والى أيام صاحب (الجرذان)الأممي..
* والقضية الحمساوية ـ بالذات - هي قضية الإسلامويين الأولى من لدن لحظة ظهور بن لادن وحتى لحظات ظهور أنظمة ما بعد الربيع العربي..
* ولأن من بيننا هنا ـ في السودان ـ من يسعى إلى نيل (الشرفين) معاً
الإسلاموي والعروبي ـ فإن القضية الغزاوية حاضرة في بلادنا بأكثر مما هي حاضرة ببلاد أهل حماس أنفسهم..
* فلا غرو ـ والحال هكذا ـ أن تدعم بلادنا (الفقيرة) حكومة حماس بالدولارات تارةً وبالمعينات تارةً أخرى وبالدعوات تارةً ثالثة..
* وآخر تمظهر (عرو إسلاموي) من الشاكلة هذه ما أُعلن عنه البارحة من تسيير قافلة الى غزة باسم أهل السودان كافة..
* ومفردة (كافة) هنا هي على سبيل المجاز ـ بالطبع ـ إذ أن الذين سيحظوا بـ(السفرة) هذه هم المهمومون بإعلاء شعار(لا لدغمسة هويتنا)..
* يعني كاتب هذه السطور وأشباهه ـ مثلاً ـ لا مكان لهم في طائرة (العزة) المتجهة إلى (غزة)..
* ومن قبل طارت طائرات مشابهة نحو عاصمة (الصمود العربي) - بغداد - بُعيد الغزو الصدامي للكويت..

* وحين (راح) صدام و(بقيت) الكويت حفيت عجلات الطائرات هذه ذاتها من كثرة الجري على مدرج مطار الكويت - إقلاعاً وهبوطاً - من أجل إعادة العلاقات الى سابق عهدها..
* وقبل أيام تساءل كاتب عربي(قح) - لا دغمسة في عروبته - ساخراً: (هل تريد حكومة السودان أن تكون حمساوية أكثر من حماس نفسها ؟!!)..
* فحماس علاقتها مع حكومة محمود عباس سمن على عسل هذه الأيام ..
* وحكومة عباس علاقتها مع إسرائيل سمن على عسل..
* وحكومة محمد مرسي (الإسلامية) علاقتها مع إسرائيل (قشطة ومهلبية).. حسبما ذكر أحد قادة الاستخبارات الإسرائيلية بعظمة لسانه..
* وحدهم العروبيون منا الذين (يعرضون خارج الزفة)..
* ونضرب لهم الطبول نحن – خلال عرضتهم هذه - تشجيعاً ونصيح: (عاش السودان جمهوريةً عربيةً قرشيةً عباسيةً عظمى)..
* وإن رأوا أن الاسم هذا يُذكر الناس بليبيا القذافي فلنختصره اختصاراً ذا مغزى ونقول (جمهورية السودان الغزاوية)..
* كل الذي نرجوه - من المتوجهين إلى غزة هؤلاء - أن يدعوا لنا ما (تبقى) من غذاء وكساء ودواء ..
* وأن يتركوا لنا - كذلك - ما (فضل) من دولارات !!!!


الجريدة


تعليقات 12 | إهداء 0 | زيارات 3512

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#554062 [غاندى]
5.00/5 (1 صوت)

01-08-2013 06:04 PM
يا عووووضة ما نشوف لينا واسطة مع الجماعة ديل فى الطبارة انشاءاللة شخسيات بارزة فى عجلاتها


#553442 [زكريا باسي]
5.00/5 (2 صوت)

01-08-2013 01:05 AM
والله يا اخ عووضة بلدنا غني جدا بموارده وبسماحة أهلة ودماثة خلقهم وكرمهم ووسع صدورهم ولو تركنا الخلافات والتمييز العنصري وتعالى بعضنا على البعض الآخر وأحب الشمالي منا أخيه من الجنوب وأحب الشرقي منا أخيه من الغرب وركزنا على استغلال ما حبانا الله به من تلك النعم الجبارة والله لأتى إلينا العرب صاغرين يستجدون ودنا وصلتنا فنحن نملك ما لا يملكه العرب مجتمعين نحن نملك الماء العذب والارض الخصبة وما أدراك ما الماء العذب وما الأرض الخصبة ؟


#553430 [ابو محمد]
5.00/5 (1 صوت)

01-08-2013 12:48 AM
الله يديك العافية قلت كل ما اريده لكن اريد ان تحلل نفسيا وتشرح لنا كيف نفسر من يقدم هدايا الضان وشعبه مالاقي اللحم اليس اولي بهذه الهدية شعبه الجائع


#553411 [إبن السودان البار -----]
5.00/5 (4 صوت)

01-08-2013 12:17 AM
إحتمال اولاد الفلسطينيين في المعسكرات ما لاقين وجبة الفطور زي أولاد مدارس عاصمتنا الخرطوم 150 الف منهم لا يتحصلون علي وجبة الفطور حتي لو موية فول بي قرقوش ؟؟؟ الغريب نشوفهم في الصور كضومهم مليانة وحمر وشبعانين وكمان عندهم مدارس بمقاعد محترمة وما فيهم واحد جالس علي الأرض أو علي بطارية سيارة ؟؟؟ وأطفال الشرق والغرب ينخر صدورهم السل ويعجزهم المرض حتي علي الوقوف للتسول ؟؟؟ قاتل الله الكيزان اللصوص القتلة مغتصبي الرجال والنساء ؟؟؟


#553389 [مدحت عروة]
5.00/5 (3 صوت)

01-07-2013 11:34 PM
السودان يا ود عووضة راح فيها مما انضم للجامعةالعربية ورفض الكومونولث وترك الديمقراطية وبقى يحاكى الانقبات العسكرية العربية بتاعة القومة العربية ووحدة عربية واشتراكية وهلم جرا!!!
لو بقينا دولة سوداناوية(لاننا شعوب مختلفة اثنيا وثقافيا لكن بقت عندنا ثقافة سودانية تختلف عن العربية والافريقية) ديمقراطية مدنية وما تابعنا الشمولية العربية والاسلام السياسى كان بقينا ناس وليس زبالة زى الآن!!
يالمناسبة الاسلام لا ينتشر الا فى ظل الحرية والديمقراطية لانه دين الفطرة وما عايز ليه حركة اسلاموية يعنى حتى لو السودان بقى دولة علمانية مدنية كان الجنوب ده بعد سنين يكون اغلبه مسلمين زى ما قال سلفاكير مرة لو لا غباء الانقاذ لاسلم معظم اهل الجنوب!!!
والله الذى لا اله غيره اكبر نكسة للسودان والاسلام هى هذه الحركة الاسلاموية السودانية او الانقاذ اخذهم الله اخذ عزيز مقتدر!!!


#553343 [واسوداناه]
5.00/5 (3 صوت)

01-07-2013 10:29 PM
ياأستاذي العزيز عوووووضة
سبق وأن قلت لك: وجه الدهشة أن يدهشني خلل في وطني المختل !!!
عادي جداً أن نكون ملكيين أكثر من الملك!!
أنظر إلي تهافتنا نحو العرب منذ امد بعيد وماذا جنينا غير سخريتهم
وقديماًقال أحدهم:(كان من الممكن للسودان أن يكون أفضل الأفارقةبيد أنه أختار أن يكون أسوأالعرب)أو كما قال .... ودقي يامزيكا!!


#553289 [صقر الكواهلة]
5.00/5 (1 صوت)

01-07-2013 09:12 PM
طيب يا فاهم انت الواحد لوعربى قح يعنى ما مهجن يعمل شنو يشيل قبجتو فى راسو ويرحل من السودان انت قايل السودان دا كلو نوبة الشمالية عدد السكان فيها ستمائة الف والجزيرة تسعة تسعة مليون عرب نرحل يعنى ونمشى وين ؟؟؟


ردود على صقر الكواهلة
Israel [ابو سكسك] 01-08-2013 02:49 AM
الاستاذ عوضة لم يقل بطرد العرب من السودان ولن يستطيع ان يقول ذلك. هو بقول ليكم اتو زاتكم جيعانين وبطونكم مطوطوة من الجوع ولي اسع انتو ساكنين في اوض (جمع اوضة) جالوص يعلم الله الضب لو شاوروه ما يسكن فيها، ادبخانتكم حفر ساكت محفورة في وطاة الله الوااااحدة دي سقف ما فيها وغالبا بابها مغطى بخيش مقدد وموية ما فوقا الا كان شلت ليك ابريق واللا علبة. فوق ده كلو كان الواحد فيكم مرض دوا ما يلقاه ولو مشى الاستبالية بدون قروش يطردو طردة الله يلاقينا. اليوم الفوقنا ده كوستي ما فيها رغيف زي ما قريت في صفحة الاخبار. والله حياتنا العايشنها دي ناس القرون الوسطى عاشو افضل منها. عليك الله انت براك شوف الفلسطينيين عايشين كيف، عندم مخيمات بسم الله ما شاءالله، كهربه، موية، مجاري، مستشفيات اللهم لا حسد، ولو الكهربه قطعت ليهم يوم وااحد او نقص دوا، تلقى العالم ده كلو سمع بالحكاية دي وبتكلم بيها و القوافل ما تديك الدرب.
بعدين القضية الفلسطينية دي قضية شائكة والعرب الصحي صحي لكلكو فيها كده لامن فترو ولمن شافو المسألة دي بتهدد امنهم القومي براااحة زاغو منها وفضلنا انحنا.
والله العظيم قدر ما حكيت راسي عشان افهم المغزى من الحركةالبتعمل فيها الحكومة دي ما قدرت افهم اي حاجة، انت لو فاهم حاجة عليك الله نورني نور الله قدرك.
اوع تقول لي انحنا وانحنا ناس كرم وجود نتقاسم معاهم النبقة وكع كع كرع. نصيحة لي الله، الشغل البنعمل فوقو ده عوارة ساااكت.
غايتو للضمان كده خلينا نهتف مع عووضة: (عاشت جمهورية السودان الزغاوية)


#553271 [البطنو طاااااااااااااامه]
5.00/5 (2 صوت)

01-07-2013 08:48 PM
الاقربون اولى بالمعروف ويا جماعه غزه دى مش اقرب لينا من ناس دارفور والنيل الازرق وجنوب كردفان وما عارف شنو كدا حلايب انتو ما عارفين ياسر عرفات جزورو من السودان والشهيد احمد يس من حلفا وكمان مشعل ما عارف من الجزيره الناس ديل لحم ودم ومالو ان ساعدناهم مش مستطيعين وعندنا الذره والنفط والغاز والدهب كماااان وعربات الاسعاف ماليه البلد (اخ يا انا انا بطنى طااااامه)


#553108 [Alczeeky]
4.00/5 (1 صوت)

01-07-2013 05:04 PM
الم تسمع يافتي بقول سيدنا عمر بن البشير رضي الله عنه ,لا لدنيا قد عملنا نحن لفلسطين فدا,


#553092 [كتكوت]
4.00/5 (1 صوت)

01-07-2013 04:51 PM
تقول لى شنو وتقو لى منو


#553089 [اللاحس كوعه فرع الصعيد]
4.00/5 (2 صوت)

01-07-2013 04:46 PM
وأزيد على وصيتك ياود عووضة ماينسوا السوداني (عصمان ) الذي طلب حق اللجوء ومازال متشرداً ينام في الخيران ويأكل من الزبالة وأطفال رام الله يلاحقونه ويضايقونه والجميع يطلق النكات على لهجته العربية الغريبة وبدل عثمان أسموه عصمـــــــان
صحيح حكومة ود اب ذهانة حرم شعبها حتى أكل الطين


#553036 [جراداي في سروال ما بعضي لكن قعادو ولا حلو]
4.50/5 (2 صوت)

01-07-2013 03:43 PM
يدعوا لنا ما (تبقى) من غذاء وكساء ودواء ..
* وأن يتركوا لنا - كذلك - ما (فضل) من دولارات !!!!


... "يؤثرون على أنفسهم ولو كان بهم خصاصة"...


صلاح الدين عووضة
صلاح الدين عووضة

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة