المقالات
السياسة
ارشيف مقالات سياسية
أي زول ضد الإنقاذ معناته ما داير شريعة؟!!
أي زول ضد الإنقاذ معناته ما داير شريعة؟!!
01-09-2013 09:49 AM

أي زول ضد الإنقاذ معناته ما داير شريعة؟!!

عمر الفاروق عبد الله
[email protected]


أي زول عنده راي ضد الإلحاس يعتبر راي ضد الشريعة .. أي جهة تحمل سلاح بدعوي التهميش ضد حكومة الإلحاس تكون بتحارب في الشريعة .. ناس المعارضة القديمة والجديدة بعارضوا الإلحاس لآنهم عندهم راي ضد الشريعة .. أي زول جيعان فقران عيان عريان زهجان يعتبر زول ضد الشريعة!!!!

الكلا م ده ما من عندي بل من عندياتهم وراجعوا خطب بشبش ربنا يبشبش الطوبة الراقد تحتها والسيد نافع ينفعنا بلحساته الكوعية والنائب التاني يكفينا شر سواطيره .. وغيرهم من اصحاب التصريحات كلهم كلما ادلهم لهم ليل وجاتبهم مصيبة يقولولك هذه إبتلائات تصيب المتمسكين بالشريعة .. عندما انفصل الجنوب وهلل لذلك ناس المنبر الكسروا البمبر قالوا خلاص ارتحنا من الجنوب وصداعه وبعد ده نحكم الناس الاصيلهم مسلمين بالشريعة

ولإنهم ناس شريعة لما انفصل الجنوب ببتروله قالوا ربنا فتح لينا خزائن الأرض بديلا عما فقدناه من بترول وادانا الدهب والعايز الدهب يشيل زاده وزواته وما ينسي لو عنده قريشات يشتري كاشف الدهب عشان يلقط اكبر كمية ممكنة وكم من ناس مشت هناك وحصدت السراب وكم من ناس مشت تفتش ففقدت ارواجها .. ولأنه الضرورات تبيح المحظورات لما ازنقوا في توفير موارد للسد السد وللكباري الجد وغيرها من عجوزات في الميزانية قالوا القرض الربوي في هذه الحالة متاح .. ولما سرق بعضهم او قول كلهم جونا بفقة السترة أستر إنقاذياً فاسدا لاحسا سترك الله ومن كان منكم بلا خطيئة فاليرمها بحجر .

وغير كدة ابتدوا يبيعوا في مقدرات وممتلكات الشعب السوداني الغافل وخصصت المشاريع العملاقة في السودان باسم تحرير الاقتصاد الهالك .

ومرات كده وللأسف الشديد وكأنه الشريعة السمحاء دي عقاب رئيسهم في احدي كواريكه الخطابية قال "حنكمكم بالشريعة" وجوا الآن بالشريعة العقابية يعني لما يتململ منهم متململ او يرفع صوته يعاقبوا بحفظ جزء تبارك أو سورة البقرة وهم يحفظوا النسل بالزواج مثني وثلاث.

الشريعة سمحة بعدالتها ومساواتها بين الناس .. ومن ما قمنا مسلمين نصلي ونصوم ونزكي بالقوة عن طريق جهاز المغتربين وزكاتنا دي بتمشي وين الله اعلم ودونكم الاتهامات الموجهة لديوان الزكاة بلحس بعض من موارد الزكاة وعدم تقسيمها عبر مصارف شرعية .. مسلمين بتواددنا وتراحمنا وبصلة رحمنا وبسيرتنا الحسنة في كل مكان .. فهل هي شريعة اخري غير التي نعرف؟ كدي نورونا والشريعة التي نعرف هي غير الشريعة التي تتاجرون بها وتستهبلون بها علي الناس





تعليقات 9 | إهداء 0 | زيارات 1143

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#555686 [تمر الفكى]
0.00/5 (0 صوت)

01-10-2013 10:55 PM
كلام مافيهو كلام


#555310 [ابوكوج]
0.00/5 (0 صوت)

01-10-2013 01:07 PM
أي زول ضد الإنقاذ معناته ما داير شريعة؟!!

هل (لي) ان اقول بصراحة لا والف لا لشريعة تفرض من قال غيركم انه لا حكم الا بشريعة اي شريعة الم نقرأ قوله تعالى وهوالحق (قل الحق من ربكم فمن شاء فليؤمن ومن شاء فليكفر انا اعتدنا للكافرين نارا احاطبهم سرادقها )سورةالكهف وقوله تعالى فذكر انما انت مذكر لست عليهم بمسيطر الا من تولى وكفر فيعذبه الله العذاب الاكبر )سورة الغاشية )من هذه الايات نفهم على عدم فرضية اي كان الامر حتى في طاعته سبحانه وتعالى فمابال قوم يريدون قولة حق ارادوا بها باطلا وقد اراد الله سبحانه وتعالى ان يكون لعباده حق الاختيار وفي ذلك توجيه واضح لاصفيائه من النبيين والرسل بالنصح والتناصح والذكر ولا عقاب الا لمن ( اعتدى وتجبرعلى العباد )فيات من هؤلاء الذين نعرفهم وبعضهم اراذل قوم رفعوا لواءًاً هم لها ناكسون لها حيثماما طاب لهم لنا الله يا بلد ولكم في القصاص حياة يا اولي الالباب


#554952 [عامر]
0.00/5 (0 صوت)

01-09-2013 10:34 PM
زمان قبل 30 سنة او اقل كان الواحد لما يسمع كلمة شريعة او حكم اسلامي جسمو كلو يكش رهبة و اجلال -- لكن علي الطلاق هسي و بعد الشفنا من ناس الانقاذ في 23 سنة الفاتت دي ماعايزين شريعة و لا دستور اسلامي عديل كدا و مستعدين ننضم للجبهة الثورية و نحارب اي و احد يقول عايز يحكمنا بالدين تاني -


#554782 [عبد الرحيم]
0.00/5 (0 صوت)

01-09-2013 04:41 PM
ياخي ديل كل واحد عامل لية دقن وشايل لية سبحة تقول الشريف الرضي وتلقي اكبر حرامي


#554613 [kuwal]
0.00/5 (0 صوت)

01-09-2013 12:49 PM
الشريعة والانقاذ خطان منوازيان .....؟؟!!


#554609 [hamid]
0.00/5 (0 صوت)

01-09-2013 12:44 PM
إنشاء الله يبقى لحس كوع بس ما يتطور أو يتدهور


#554605 [al-lord kinz]
0.00/5 (0 صوت)

01-09-2013 12:39 PM
ياخي نظام ما يعرف زوراً وبهتاناً (بالحركة الاسلامية) ده زى الزول ولدو ليهو بت سماها جميلة ولما كبرت طلعت قرد لكن برضو اسممها جميله كذلك هى الانقاذ سموها نظام اسلامى لكن بعد مسكت السلطة طلعت عصابة قتل واغتصاب وسرقة وتشريد وتجويع .... وهلم جرا وبرضو بتتكلم عن الشريعة الاسلامية عن أى اسلام تتحدثون ايها الكيزان المنافقون تباً لكم.


#554541 [ابوخوجلي]
0.00/5 (0 صوت)

01-09-2013 11:39 AM
ياخي ديل كرهونا الشريعة والدين زااااتو بكذبهم ونفاقهم ولحس اكواعهم وكواريكهم البتجيب سرطان الحلق وسواطيرهم.


#554498 [ود السجانة]
0.00/5 (0 صوت)

01-09-2013 10:51 AM
سؤال واحد لعموم أهل السودان منذ 30 يونيو المشئوم وحتى اليوم 9 يناير 2013م أين الشريعة في السودان من يجدها يلحس كوعه اليمبن والشمال !!!!!!!!!!!


عمر الفاروق عبد الله
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة