حكاية فؤاد
01-09-2013 10:31 AM

حكاية فؤاد

الفاتح جبرا

جاري فؤاد ما أن نلتقي حتى يشكو لى الست (زوجته) فهى كما أخبرنى قد أحالت حياته إلى جحيم وحولته إلى (فأر تجارب) .. والقصة عزيزى القارئ أن زوجة أخينا (فؤاد) مولعة بل مدمنة على مشاهدة (البرامج الطبية) التى تبثها معظم القنوات الفضائية هذه الأيام والتى يستضاف فيها الأخصائيون فى كافة فروع الطب (الأصيل) والطب (البديل) وطب (الأعشاب) والطب الما عارف شنو داك .

ما أن يعلن فى أى حلقة تبثها هذه الفضائيات عن دواء أو (إكتشاف جديد) يعتقد أن فيه شفاء لأي علة كانت حتى تهرع زوجة (فؤاد) لتطبيقه عليه :

- شنو الخيار (الرادماهو) ليا فى الصينية ده ؟

- أسكت ساااكت .. والله الدكتور البجيبوهو فى قناة (الطبية) قال الخيار ده أحسن حاجة للضغط ! وكمان بيقوى الذاكرة وبينعش خلايا المخ !

يقوم (فؤاد) بضرب عدد مقدر من (الخياريات) بناء على نصيحة زوجته ثم بعد أن يصاب بتخمة خيارية (ياخد ليهو نومة) فيصحو وهو يحس ببعض علامات الجوع فيتجه نحو (التلاجة) ويخرج بقية (صينية الخيار) :

- (تمسكها منو) : شنو الشايلو فى أيدك ده !

- ده ما باقى الخيار الفى الصينية . !

- (تسحب منه الصينية) : لا أوعك .. هسة دى الدكتور بتاع قناة (سين بين إن) قال الحبوب الموجوده فى الخيار دى بتعمل حصاوى فى المثانة !!

يقول لى جارى فؤاد ، لم يمر يومان حتى إستيقظت من نومى صباحاً لأجد أمامى ثلاث

زجاجات (حجم عائلى) ممتلئات بالماء وأمامهن كوب :

- إنتى الليلة عازمة ليكى ناس ؟ شنو قزاز (السفن آب) ده ؟

- ده ما (سفن آب) دى مويه عادية ساااكت .. إنتا ما شفتا (الدكتور) بتاع قناة ( الطب البديل) قال شنو؟

- قال شنو؟

- قال ليك مفروض الزول أول ما يصحى من نومو يشرب ليهو تلاته لتر موية عشان (الكلى) بتاعتو (تتسلك) والكبد يقدر يقوم بى مهمتو .. ده غير إنو الموية بتخلى (الصفائح الدموية) تحافظ على سيولتها !

هنا إلتفت إلى صديقى (فؤاد) وسألته :

- أها وشربتا التلاته لتر موية ؟

-(وهو يضحك) : إنتا جنيت والله لو شربتها كان مشيت أحمد شرفى!

- وطيب عملتا شنو ّ

- غايتو شربتا ليا كباية كبايتين .. لكن دى مش المشكلة !

- المشكلة وين ؟

يواصل فؤاد : فى اليوم التالى صحوت من النوم وأنا أحس بالعطش نسبة لسخونة الجو فهرعت نحو التلاجة وأمسكت بإحدى زجاجات المياة (الحجم العائلى) وما أن شاهدتنى حتى صرخت فى قائلة :

- أقيف .. أقيف أوعك تكمل القزازة دى .. عشان الدكتور البجيبوهو فى قناة (خليك معانا) قال شراب الموية الكتير بيؤدي الى انخفاض معدل (المغنيسيوم) في الدم وبالتالي إنخفاض فى دقات القلب وإحتمال الزول تجيهو دوخة ويروح فيها !!

قلت لجارى فؤاد مواسياً :

- ياخى الولية خايفة عليك وحريصة على صحتك وكمان بتثق فى كلام الدكاترة البجيبوهم فى التلفزيونات ديل !

- يا أستاذ ديل مش دكاترة .. فى مبدأ فى الطب بيقول ليك .. (لا طب إلا والمريض حاضر) !

-لكن يا فؤاد ده هسه كلام عام وإرشادات ساااكت

- إرشادات شنو ؟ أنا ما تميت ليك القصة ..

وبدأ فؤاد يكمل القصة ..

أمبارح جيت من الشغل وبعد ما إتغديت ورقدتا .. لقيتا قاعدة تشاهد فى قناة (الطب للجميع) عندهم فقرة إسمها (كيف تتعلم الجراحة فى تلاتة أيام) ، المهم خليتا تتفرج وأنا أخدتنى نومة وبعد مسافة صحيت ليك بى كركبة لقيتا ليك ماسكة سكين المطبخ وواقفة قدامى :

- شنو شلتى ليا الزائده ؟

-زائده شنو؟ أنا عملتا ليك (كبدة فراخ) ما حصلت عشان الدكتور قال بتشيل (السكرى) وتمنع التجلطات

كسرة :

قال لى فؤاد أنه لم يكن يعانى من السكر قبل رؤيته للسكين والهجمة الحصلت ليهو !!

كسرة ثابتة :

أخبار ملف خط هيثرو العند النائب العام شنو(وووو وووو وووو)+(وو


تعليقات 16 | إهداء 0 | زيارات 6442

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#555459 [ود النيم]
0.00/5 (0 صوت)

01-10-2013 03:34 PM
الموضوع ده فوقو سر المرة دي بتاعة تنظير التقول عاملة الراجل فار تجارب.


#555275 [ابو هتون]
0.00/5 (0 صوت)

01-10-2013 12:34 PM
يديك العافية يا استاذ جبرة .... بس ميل بينا شوية على مواضيع الساعة الساااااااااااااااخنةالنظام السودانى الحاكم مكتظ بالمواضيع البتفقع المرارة


#555252 [المشتهي الكمونية]
0.00/5 (0 صوت)

01-10-2013 12:05 PM
يا جبرة يا أخونا حكاية جارك دي هينة ، شوف لينا حكاية الانقاذ دي نتخارج منها كيف ، دي جابت لينا السكري والضغط وفقعت مرارتنا عديل ، ورينا نسوي شنو مع المرة المطلوقة الاسمها الانقاذ دي ، انت بس وصف ليناالعلاج وخلي الباقي علينا


#555068 [زول]
5.00/5 (1 صوت)

01-10-2013 07:42 AM
اللبيب بالإشارة يفهم


#554812 [عبد الواحد المستغرب أيما استغراب!!']
2.00/5 (1 صوت)

01-09-2013 05:28 PM
كلما صاحبك (فؤاد) يا جبرا


#554809 [ود كردفان الغرّاء أم خيراً جوّة و برّة]
5.00/5 (2 صوت)

01-09-2013 05:24 PM
هههههه والله ضحكت حدى ما دمعت..
24 سنة والحكومة شغالة في البلد تجارب ساى.. جارك فؤاد طلع بس بى سكرى اما البلد قطعوه وشرشروه ولو ما لحقوه مقابر شرفى ما اظن يوقفوا تجارب..


#554747 [صدقونى]
5.00/5 (1 صوت)

01-09-2013 04:10 PM
موضوعك ده اتمنى الرئيس البشير يقراهو
شان يمووووت من الضحك


#554692 [محمد محمدين]
0.00/5 (0 صوت)

01-09-2013 02:44 PM
والله يا جبرة هذه حكاية حقيقية ونحن نأتي لعزابة في مدينة الرياض لعلب الكوتشينة، ولاحظت إنه كل ما يأتي أحد بعلاج (حبوب أو شراب) يسأله هذا حق شنو ؟؟ وكل واحد يأخذ منه والشيء الغريب إنه صاحب الدواء لا يتضجر ولا يزعل ، حتى حصلت الكارثة ، وهو قدوم أحد الضيوف عابر طريق ونام معهم ليلة واحدة ووضع علاجه على المنضدة وهي حبوب تشنجاتTigretol ونام، وما كان من أحد الشباب ألا أن تناول منها 3 حبات مرة واحدة، وفي نفس الليلة صبحنا الشمس في المستشفى مع هذا الجاني وفي حالة هستيرية خطرة وعندها عرفناالسبب. .
.سألت أحدهم وقلت ليه أنا ملاحظ أنكم جميعاً تستعملون العلاج بدون مرض فقال لي نعم لأنه في اعتقادنا أنه لما تأخذ علاج مصاب فهو وقاية لك من هذا المرض ، ولذا أخونا فلان .. كثر منها لأنه علاج غالي وفي نفس الوقت قال سيوقيه من مرض التشنج نهائي ، وكاد أن يوقيه نهائي وللأبد لولا لطف ربنا سبحانه الذي من عليه بالشفاء بعد اسبوع ...


#554633 [الخليل جاد الله]
0.00/5 (0 صوت)

01-09-2013 01:24 PM
والله يا استاذ الفاتح يا مفتح دي ابدعت فيها عدييييل


#554615 [محموم جدا]
0.00/5 (0 صوت)

01-09-2013 12:56 PM
يا جبرا إنت أدوك غطيسة في ترعة و الله زرت صلاح قوش و ودابراهيم في سكنهم الجديد و الله لحقوك عثمان ميرغني و الله بقيت تهدر بارك دا مقال شنو و الناس في شنو!! الناس وصلو لحدي الفجر الجديد ( يعني السودان بقى إسمو الفجر) إنت صح أخوانا المصريين بينطقوا الفجر الفقر يبقى المصطلح معناه ( الفقر الجديد) يعني هو نفسو السودان عشان ما يبنو وثيقتهم على قسمة الثروة يشوفو حاجة تاني يجو يتقاسموها مع السلطة و دي نفسها الانقاذيين سوها مرة توالي و مرة مجالس محلية و أخرى بقت شمار في مرقة كثرة ولاه و وزراء و لائيين و كل يوم ولاية جديدة كملوا الاتجاهات الجغرافية لكل ولايةأنا ما عارف الولايات الجديدة حا تكون مستنسخة من القديمة..

كسرة: عاديتنا بالحمى الطايرا لك في رأسك ...


#554606 [سوداني حبوب]
0.00/5 (0 صوت)

01-09-2013 12:40 PM
الله يجازي محنك يا استاذي الفاضل .. قال لى فؤاد أنه لم يكن يعانى من السكر قبل رؤيته للسكين والهجمة الحصلت ليهو !!

توجد قصص كثيرة في البيت السوداني لما تسمعها من صاحبها تموت من الضحك وفي نفسك تتمنى ان لا تقع في مثلها .. تحياتي لك


#554583 [الرمنـتــــــــــوج]
5.00/5 (1 صوت)

01-09-2013 12:09 PM
كـــ(وووو وووو وووو)+(ووع والله اليوم ما عندك مــــ(وووو وووو وووو)+(ووع


ردود على الرمنـتــــــــــوج
Israel [ذات الشامة] 01-10-2013 12:43 PM
يا (الشريف)، عايز تعمل لينا فيها (اسقاطات) وزول فاهم وتقرأ ما بين السطور. يا خي الفاتح جبرة دا لا قاصد حكومة ولا شعب، بيقول في قصة عشان الناس يقرأوها ويضحكوا ويطلعوا من جو الاحباط العايشين فيهو، تجي تعمل لينا فيها (فهيم فهمي الفاهم). في مية موضوع سياسي ممكن تمشي تنظر فيهو،، كرهتونا يا خي بالسياسة بالتنظير بتاعكم الكتير دا... والمشكلة كلها عرضة برة الحلقة، كلام لا بيودي ولا بيجيب.

[القضنفر] 01-09-2013 07:41 PM
الشريف اخوي الله يصون شرفك ... مالك ناطي للناس في رقابهم وعامل فيها ابو الفهيم ... كدي خلينا النشوف ردك انت شخصيا علي هذا الموضوع ... ما تنظر لينا في الفاضي ... واسع النسالك مربت مرت الراجل مالك ... خلتو وحيد وعايشة وحيدة مالك عليها ... الا غلبك المنطق.

United States [الشريف] 01-09-2013 02:12 PM
انت الما عندك قدرة على الفهم العالى انت قايل فؤاد ده منو فؤاد ده الشعب السوداني والست مرة (راجله) دي الحكومة الفاشلة دي يومي تسمع ليها وصفة تطلع بيها باقي زيت الشعب تقوم تجرب فيه الوصفة دي تتذكر حكاية مجدي بتاع العملة دي كانت وصفة مل الخزينة الفارغة والان اصبحت تجارة العملة وصفة لفراغ الخزينة من النقد الاجنبي ولو دي ما فهمتها امشي لقطبي المهدي يوريك كيف وجكاية الكهربا والموية في فاتورة واحدة دي ان ما قادر افهمها بس احتمال لانوا الموية ما بتجي الا بالموتور والموتار داير كهربه والكهربة عند الخزان والخزان داير موية والموية عند المطر والمطر عند ربنا ياربي تجيب المطرة ويا ربي تجيب المطرة عشان تريح جبرة وتطهرنا من الانقاذ وناس المشروع الحضاري والنفرة وبدر الكبرى يا نافع


#554580 [jangy]
0.00/5 (0 صوت)

01-09-2013 12:07 PM
رائع كالعادة اخوى الفاتح ودى شكلها بدون خيال واسع معلومة صغيرة وهى البوتاسيوم وليس الماغنسيوم الدى يتحكم في ضربات القلب ودمتم


#554545 [أبو محمد]
0.00/5 (0 صوت)

01-09-2013 11:44 AM
شنو يا جبره مواضيع سرقة ناس الحكومه للشعب السوداني وكده إنتهت خلاص تقوم تنجر لينا قصص من بنات أفكارك؟


ردود على أبو محمد
United States [الشريف] 01-09-2013 02:22 PM
يا ابو محمد ما تخليك مفتح هو بقى في حاجة تاني بتتسرق انت ما شايف الجماعة بيقوا يسرقو في بعض انت قال قوش قبضوه لشنوه لان الجماعة عارفين ان البلد بقت عدمانة نفاخ النار قالوا يسرقو من الحرامية القدام الكبار الجماعة اول حاجة عملوها جرو يفتشو في قروشنا العند قوش الموجودة في حساب مرة واخوه ومنو ما تعرف وخليك تفتيحة يا عمك اخبار سيد الدكان (الدير حسابو منك) شنو
معليش يا أبو حميد ناسف للرد الئم ده ولله ما رباطابي بس الظروف جبرتنا والمهنة ما حقتنا والظروف جبرتنا


#554512 [ابوخوجلي]
0.00/5 (0 صوت)

01-09-2013 11:10 AM
كدة عليك الله ياجبرة وضح لينا ملف خط هيثرو ده عشان نفهم معاك.وشكراً


#554510 [ابو عبد الرحمن سويلم]
5.00/5 (1 صوت)

01-09-2013 11:10 AM
الله يقطع مصارينك يا جبرة زى ما قطعت مصارينا من الضحك والله دا الحاصل لى زاااتو بس الحمد لله المرة سافرت السودان وقعدت مع ولادها للدراسة حتين جانى النوم
كسرة
الدكاترة ديل بتاعين التلفزيونات ماعندهم علاج لى ناس حزب البعث العربى والناصرى والحزب الشيوعى الماركسى الدايرين يطبقولنا نظرياتم الفاشلة دى زى موية مرت فوءاد هههههههههههههههه
البلد خلت من منظرين يسولينا نظرية تتناسب والشعب السودانى الفريد


ردود على ابو عبد الرحمن سويلم
Israel [عصمتووف] 01-09-2013 09:21 PM
ماعندهم علاج لى ناس حزب البعث العربى والناصرى والحزب الشيوعى الماركسى

*البعث العربي ادب شعب العراق لا طائفية ولا فبلية وكانت العراق رمزا للنظافة والثقافة ذهاب البعث اطل العبث قتل تفجير اقصاء


** الناصرية ايضا زوبت اللحمة المصرية وقاتلت الطائفة الدينية (الالهية ) انظر لمصر سابقا وحاضرا وغدا


*** العقدة الكبيرة الماركسية المجني عليها ثقبت الارض وطالت السماء (غزو الفضاء) مخك ما يمشي بعيد

**** امارة الاخوان الاسلامية الانقاذية لنري نظرية (الجلباب القصير ) احتلال الاطراف وسقوط سروالهم (الجنوب )نعرات عنصرية سفك دماء سرقات كذب تضليل انها اعظم انجازاتهم

United States [الشريف] 01-09-2013 02:34 PM
يا ابو عبد الرحمن الحمد لله انو مرتك سافرة السودان للدراسة واتمنى انها تربت والسنة بي ثلاثة سنوات
بس المشكلة يا صاحبي الحا يسفر الحكومة دي شنو لانو عمك جبرة ما قاصد فؤاد جارو قاصد الشعب السوداني الفضل ومرتو (راجلوه) دي الحكومة وكل يوم تطبق فينا وصفة جديدة وماشاء الله الحكومة مليانة دكاترة من الاسنان لى النساء والولادة وخاصة ناس الولادة ديل كتار كترة لانو ما ممكن دكنور واحد ولا اتنين يولدو الشعب ده كله رجالو قبل نساوينوه ربنا يرجع اولادك بالسلامة وانشا الله دوام العافية


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة