حجوة أم ضبيبينة !!!
01-20-2013 05:30 PM

حجوة أم ضبيبينة !!!

أسماء الجنيد
[email protected]

سلاما حزينا لكل القرآء بحجم الحزن المعشعش في كل الديار وبحجم الفقد الجلل
رحم الله فقيد الشباب والوطن والفن الراحل المقيم الإنسان البسيط محمود عبد العزيز , رحمه الله برحمته الواسعة التي تسع كل شيء ,, الدوام لله ...

حجوة أم ضبيبينة حجوة اهلنا الزمان، ما قالوها عبث , حسب معرفتي البسيطة, إنه الحجوة دي سميت بأم ضبيبينة كناية عن نوناي أو طنين الضبيبينة صغيرة الحجم دون ان تسكت وليس لها نهاية معلومة
حال البلد المائل وحال الشعب المائل اكثر منه، من الوعيد والكلام البنسمعوا سوف يحصل لهؤلاء السرقوا وطننا وارضنا ، وغيره من تهديد ووعيد يشبه تماما حجوة أم ضبيبينة..
كل ما حدث امر اغضب الشارع وهيج الوجدان, نبدأ بتشمير الأيادي والجعجعة الفارغة, ، ليس من رجل الشارع البسيط فقط ، بل حتى من معارضي هذا النظام الفاشي , كلام لو رصيناه كان حرق العالم كلو من دخاخين حروفو, !! وعيد لا طائل له ، وتهديد لا بودي ولا بجيب,, وعجلة الإنقاذ مااااااشة ونحن نصرف في النضمي المجان!
كلام على شاكلة , ليكم يوم ! وسوف تحاسبون على كل جرائمكم، وسوف نخلص حقنا منكم ونرد كل الديون السرقتوها وسوف نعذبكم كما عذبتوا الأبرياء في بيوت الأشباح ،ونضربكم ونفضحكم ونعريكم امام العالم و.. و... و إلي ما لانهاية!!
سؤال بسيط يا جماعة.!
لمتين نحن نفضل نرص في الكلام ده؟ كلام يتقال ويتكتب فقط وبدون اي خطوة إيجابية!! أكثر من 23 سنة وهم ما زالوا في غيهم يعمهون! والجاي في كل لحظة أكثر فظاعة من القبلو , كأنه نحن نؤيدهم و نشجعهم ونديهم دفرة لي قدام على فساد البلد الإنتهى مجاميعو!! باعوا كل شيء وما زال جرس دلالة البلد معلق في شارع النيل، ياهو الفضل من البيعة، باعواأرضا،و جوا،و بحرا !!
النتيجة شنو ؟هل الكلام خوفهم ؟ ولا أرعبهم ؟ ولا جهجه باكاتهم؟
طيب قلنا ايوة خافوا ورجفوا !! اها والنتيجة شنو؟ غير إنه ملتهم جشع وهلع وشفقة في الخم بالجملة وليس بالقطاعي !! والعجلة ما زالت ماشة, طبقوا كل نظرياتهم واعادوا تطبيقها فينا من جديد ، وبرضو عجلتهم ماشة وطالعة في نافوخ الشعب ده وهردت لحمو على عضمو وبرضو ماااشة!!
اها نحن حانفضل نجعجع ونكورك كده لمتين؟ حا نحاسبهم متين؟ شابوا وعجزوا وخرفوا!! كبروا وكبروا اولادهم واستمتعوا في دينيتهم دي بحق الغلابة! وأصلهم هم ما خايفين من الله ! حققوا طموحاتهم بالطول والعرض! ونحن لسة بنحجي في روحنا بي حجوة أم ضبيبينة!! شبعوا وقنعوا وطلعوا ليهم بي ميثاق فجر جديد وفكرة عشان يورثوا احفادهم بعدما اولادهم لقوا فرصة كبيرة في حكم البلد الهامل ! فكروا في جنا الجنا لازم يدوه فرصة! كييييف ما البلد هاااملة دي حقتهم برااااهم وناسها زاتها مافاضين! مشغولين بي حجوة ام ضبيبينة!!
حكاية مشاركتهم الميثاق الجديدواضحة زي الشمس, ياها نفس العمم ونفس الدقون ونفس الأفكار ونفس الخبث, بس المرة دي جوا داخلين بالنفاج بدل ما كانوا بتلبوا فوق الحيطة ويحتلوا البلاد!! جربوا كل السبل ونجحوا بجدارة في تنفيذ مخططتاتهم وتمرير اجندتهم الخفية,, !
مرة تلبوا بالليل زي الحرامية ومسكوا الحكم! ومرات كنكشوا فيه بي خج الإنتخابات! وقبل الأخير دخلوا اولادهم يقدلوا بي باب مفتوح ضلفتين مشاركين في الحكم عينك عينك والشعب يتفرج وبرضوا يتوعد! والمرة دي بالنفاج!! والناس ساااكتة وتعاين!! انا لا الوم الشعب البسيط الكادح بقدرما ألوم كل الذين مرت عليهم خدعة هؤلاء القوم الذي بلغ ذكاؤه في الخبث الثريا!!!
من خبثهم الفات كل التوقعات ! تجنيهم على حرمة الميت!!! وإدعاؤهم في تصريح رسمي أن الراحل المقيم محمود حبيب الشعب كان نقيب في جهاز الأمن!!!
طيب ليه ضربتوه وسجنتوه لما كان حي وسطكم؟ ليه أهملتوه وما عالجتوه؟ ليه ما صرحتوا بالكلام ده قبل رحيله؟ ماعندكم الفنانيين التابعين ليكم ومصرحين بيهم رسمي وشعبي ومبروكيين عليكم ياهم شبهكم ومنكم وفيكم .إشمعنى صرحتوا بي ناس فرفور واخفيتوا محمود عبد العزيز لو كان فعلا كلامكم صحيح؟؟؟؟
الشعب المخلص للراحل لو سكت على التجني والظلم الباين ده يبقى مافي اي إخلاص ولا حب حقيقى له!
و رغم كل الحاصل ده ،برضو نحن قاعدين ومتحكرين ونحجي في بعضنا بي حجوتنا الأدمناها أم ضبيبينة و نعدد في اصناف العذاب والويل والحساب الذي نكتنزه لهم ليوم حسابهم الأكبر حسبما نحلم به في حلم اليقظة!!

متاوقة
المسيرة الهادرة الطلعت لي تشييع الحوت رحمه الله، ليه ما تطلع لي جنازة البلد المات وشبع موت من 23 سنة!!! نعم كلنا نعشق الحوت، ولكن ايضا نعشق الوطن حد الثمالة.. ما نكون وطنيين ومخلصين برضو للوطن الماليهو تمن!!
يمهل ولا يهمل

أسماء الجنيد


تعليقات 9 | إهداء 1 | زيارات 5172

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#564674 [الكردفاني العديييييييييل]
0.00/5 (0 صوت)

01-22-2013 09:34 AM
لا فض........... فوك..........

الى الامام .... كلم جارك.... اقنع صاحبك.... وصي ابنك.... لا تبيع ضميرك.... من سار في ركاب الظالم .... فهو حتما ظالم...... لتتمايز الصفوف.... البلد بلدك... .. لا وصي عليك... عاقل وراشد.... لا قداسة في السياسة.... ولا قداسة للاشخاص.... لا تكن امعة.... حرر قيود... التبعية واعتق نفسك..... من التابعية.... ناس سيدي وسيدك..... جعلك الله حرا.... وسيحاسبك وحدك....... عش مع الله ...وتوكل على الله..... ضع اغلال السلبية..... شارك ايجابيا ...تجاه الوطن تجاه المحرومين الثكالى اليتامى.... المشردين داخل البلد وخارجها.... الى متى الهوان...الى متى الذلة والصغار..... انها دعوة لفعل القلوب وشحن الهمم....اما يكفيك تجارب الخيبة والانكسار .... ممن اتخذك سلما لمآربه..... اما زلت مصدقا ...انهم صادقون.... انها دعوة لتجاوز اسباب.... الهزيمة...هزيمة القيم الاصيلة التي تربينا عليها....

الى الامام............ الا ان الانجاس لا محالة الى زوال.............
الى الامام............ الا ان الانجاس لا محالة الى زوال.............
الى الامام............ الا ان الانجاس لا محالة الى زوال.............
الى الامام............ الا ان الانجاس لا محالة الى زوال.............
الى الامام............ الا ان الانجاس لا محالة الى زوال.............
الى الامام............ الا ان الانجاس لا محالة الى زوال.............


#564392 [زكريا باسي]
0.00/5 (0 صوت)

01-21-2013 09:54 PM
ما أجمل مقالك وما أصدق كلامك ! إلى متى نستمر في تهديدووعيد من أفقر الشعب وأورده موارد الهلاك ثم قتله وقتل فيه الأمل والحلم الجميل ؟إلى متى نتوعد من فرض في الوحدة وبتر الوطن وغير من خارطته الجغرافية ؟إلى متى نظل نهدد من شرد شعبه وأسكنه مخيمات النزوح واللجوء القميئة في مناظر تعيد ذكريات الحرب الكونية الثانية ؟إلى متى نظل نسمع جعجعة ولا نرى طحينا ؟إلى متى نملأ الدنيا ضجيجا وساقية الإنقاذ تستمر في الدوران وسفينتها تستمر في الإبحار إلى ما لا نهاية ؟إلى متى نظل ننبح كالكلاب وجمال الإنقاذ تمشي غير عابئة ولا آبهة بنا؟إلى متى …..


#563887 [عاصم]
0.00/5 (0 صوت)

01-21-2013 09:41 AM
بينوشيه وزوجته شاوسيسكو وعائلته بوكاسا وزوجته كلهم جرت عليهم سنة الحياة وعمر البشير وزمرته لاحقون بالذين سبقوهم من المتسلطين آفات الشعوب لا تغنطى من رحمة الله يا سليلة الكنداكات .


#563661 [Zingar]
0.00/5 (0 صوت)

01-20-2013 10:14 PM
هل حقا نحن نعيش حياة كريمه..والأجابه طبعا ما عايزه درس عصر...سوريا أرخص الدول العربيه معيشه وإنتفاضتها ليس من أجل الخبز لأن مشكلة الخبز تخلص منها حتى إنسان العصر الحجرى ماعدا السودان التى أيضا تستوطن فيها أمراض إنتهت من العالم ولكنها لازالت تؤانسنا بدليل نحن الدوله الوحيده فى العالم التى لازالت تستعمل كرت الحمى الصفراء عند السفر...وعند عودتى من الأجازه الشهرى الماضى وعند إغلاق الطائره القطريه أبوابها أبتدأ الطاقم رشنا بمبيدات الجراثيم وفضلت اتأمل فى وجوه أهلنا (الغبش) ولكن لاتعابير تذكر وكأن الأمر لا يعنيهم...وهذا طبعا لايقتصر على القطريه فقط ولكن كل طائره مغادره الخرطوم.
الشباب السودانى الوحيد من دون شباب المعموره ليس له طموح فى الحياة لأن الحياة بالنسبه له رحله قصيره ليس لها معنى وزى مابقولوا (دى جنتهم لكن نحن جنتنا بعدين).....ولكن إنتوا خسرانين دنيا وآخره.


#563622 [كمال شندي]
5.00/5 (4 صوت)

01-20-2013 09:29 PM
الكلام القالتو الاخت /اسماء حقيقة ما في شك -- لكن برضو تشوف الشعب عمل شنو -- في شهري يونيو و يوليو 2012 تحرك الطلاب و الشباب الوطنيين في مظاهرات قوية من الجامعات في الخرطوم و الولايات -- و كانت اطلقت شرارتها طالبات جامعة الخرطوم في 2012/6/16 و استمرت في بعض المناطق مظاهرات ليلية ارهقت الشرطة و الرباطة -- و كانت مظاهرات الجمع لحس الكوع و الكنداكة و غيرها -- هذه الهبة افزعت النظام بصورة كبيرة و تعامل معها بوحشية مبالغ فيها -- و من هذه التجربة اليسيرة ايقنت جموع الشعب ان هذا النظام يفهم لغة واحدة هي لغة الكلاش و الدانة و لذا اتجهت كل الانظار صوب الجبهة الثورية السودانية ووجدت الترحيب والدعم السياسي و المعنوي -- و ببزوغ الفجر الجديد اكتملت الصورة و دخل النظام في جحر ضب -- و ما يفتكروا الخرطوم بيعيدة و في مأمن -- فقط 12 ساعة و كل قوات الجبهة ستكون علي مشارف امدرمان و الخرطوم و بعد دا تسمعي و تشوفي : دخلوها صقيرا حام الجد جد -- وما ترمي كلامي دا ساكت -- المباغته و المفاجأة هي عنصر الحسم و النصر باذن الله .


#563619 [awad]
5.00/5 (1 صوت)

01-20-2013 09:26 PM
يا بت الجنيد هذه هى الحقيقة البتورم الفشفاش شعب يحب فنان لدرجة الجنون ومايحب بلده الطشت وراحت فى مليون داهية ولو المسيرة الحزينة الباكية التى قام بها الشباب لفقيد الوطن والفن وفقيد أسرته الصغيرة لو عملوا واحده بس زيها فى سبيل الوطن الذى ضاع وهتفوا من أعماقهم لسقوط عصابة الدجل والشعوزه وسارقى قوتهم وقوت أسرهم لسقط النظام وقامت قيامته,والله تأثرنا لموت محمود عبدالعزيز ولكن لا بد للشباب أن يكون لهم حب للوطن ويتجلى هذا الحب عندما يخرجوا فى مسيرة تدك عرش الماسونيين وأقتلاعهم.


#563524 [عبد الهادى مطر]
5.00/5 (1 صوت)

01-20-2013 07:14 PM
التحية ليك يابت الجنيد،نعم كفاية تنظير ،يجب العمل والعمل المسلح وليس بعثرة الوعود والامانى التى لم تقتل ليها ذبابة


#563508 [ود بحرى]
0.00/5 (0 صوت)

01-20-2013 06:52 PM
ما ناديتى يا بت الجنيد اذ ناديتى حيا



ولكن يا بت الجنيد لا حياة لمن تنادى





شعب يستاهل يحكموا التتر


#563466 [ابوكرنك]
0.00/5 (0 صوت)

01-20-2013 05:43 PM
تنفخي ليك في قربة مقدودة يا بنت الجنيد


ردود على ابوكرنك
United States [الكردفاني العديييييييييل] 01-22-2013 09:38 AM
لا يأس مع الحياة....... اين ملك ملوك افريقيا....اين شين الهاربين....اين... القائد الضرورة..... اين الطغاة الجبابرة..... النصر آت آت................

United States [فرقتنا] 01-21-2013 03:15 AM
لا داعي للتنكيل بالشعب السوداني واشباه الرجال من وثقوا فيهم انكروهم وشاركوا النظام في غيه فالشعب بخير والله بخير


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة