(الخيابة)..!! لم ينشر
01-23-2013 02:16 PM

بالمنطق
صلاح الدين عووضه
[email protected]


(الخيابة)..!! لم ينشر

* أستاذنا في مرحلة الدراسات العليا محمد عبداللطيف (الصعيدي) كان محباً لإطلاق النكات ذات الرمزية السياسية..
* كان دائم السخرية من مبارك ورموز مبارك، وسياسات مبارك، و(سنين) مبارك..
* ومن رموز مبارك هؤلاء الذين نالوا نصيب الأسد من نكات أستاذنا هذا الرئيس (الدائم!!) - سابقاً - لمجلس الشعب فتحي سرور..
* وحين نضحك - بفعل النكات هذه - كان (الصعيدي) يصيح غاضباً: (يا خيبة الرِجَّالة لما تضحك!!)..
* ثم لا يرى في اعتماده إسلوب (التورية) هذا أي ضرب من ضروب (الخيبة) التي لا تلائم (رجالة) الصعايدة..
* ومحمد فتحي سرور هذا - بالمناسبة - (يقابله) عندنا في السودان الرئيس (الدائم!!) للمجلس الوطني أحمد إبراهيم الطاهر..
* وإن كان ثمة فرق بين (الدائِمين) - ولا دائم إلا الله - فهو توق الأخير هذا للـ(شهادة) دون أن (يبرح!!) مقعده الوثير أبداً..
* وبما أن الشهادة هذه ربطها الطاهر بطائرات (الأنتينوف) فلا مجال لتحقيق الأمنية المذكورة إذاً إلا أن تسقط واحدة - لا سمح الله - على مبنى البرلمان..
* أي أن تأتي الشهادة لطالب الشهادة لحدِّ عنده!!)..
* ولا أدري ما كان سيقوله البروف محمد عبداللطيف إزاء (قعود!!) مماثل من تلقاء رئيس المجلس الوطني (بتاعنا)..
* ولا أدري ما كان سيقوله - كذلك - إزاء (خيابات!!) بالجملة هذه الأيام في بعض إعلاناتنا المسموعة والمرئية الخاصة بشركات الهواتف السيارة..
* وكاتب هذه السطور تمنى يوماً أن (يرى) أصحاب (الخيابات) المشار إليها بعد أن شبع منها (سمعاً) إلى حد (القرف!!)..
* تمنى أن يشاهدهم - صاحب هذه الزاوية - ليرى أيَّ (صنف!!) من (الرجال) السودانيين الذين (يتمايعون) هؤلاء ..
* وبالأمس فقط رآهم - وليته لم يفعل - ليتذكّر على الفور أستاذ الفلسفة الصعيدي ذاك..
* رأى ثلاثة من الشباب يتغنون ويتبسمون ويتمايلون و(لا أجعص رقاصة في شارع الهرم!!)..
* ثم يرتدون من الثياب (المزركشة) ما لا يدري إن كانت (نسائية!!) هي أم رجالية..
* ثم يروجون لشركة اتصالات خصمت جنيهاً من كل مشترك - قبل أيام - تحت مسمى (دمغة مكالمات!!)..
* ودمغة المكالمات هذه يمكن أن تقرأ (دمغة الجريح!!) من منظور ما يمكن أن يلحق بالمشترك من أذى مزدوج..
* أذى جراء (الخصم!!) المتكرر من جهة....
* ومن جراء (الخيابات!!) الإعلامية المتكررة من جهة أخرى..
* وكم هو (طيب) محمد عبداللطيف الذي كان (يؤذيه) محض ضحك بلا سبب فيعده ضرباً من (الخيابة!!)..
* فـ(إيش حال) لو كان حاضراً عهدنا ذا (الخيابات) هذا ؟!!!!


الجريدة


تعليقات 14 | إهداء 0 | زيارات 5330



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#566964 [اللمبي بمسي!!]
2.00/5 (1 صوت)

01-24-2013 02:12 PM
ولله ضحكتوني الله يجازي ابليسكم خاصة بتاع الطياره البتقع في الادبخانات!!! ياخي الراجل امنيه ساكت كرهتو فيها!!وهو بيني بينكم ماقاصد للاستهلاك ساكت !!لانوعارف انو لوكان صادق النية لادركها!!! مش الواحد يقع من الطياره وتمرقو قروش الناس عشان ماينال الشهادة!!! ده التاني المرتو قالت بيقرا وردو كل صباح(طبعا حيشهد للعروس منو غير دلاكته) وبياخد عمولات من تصبح لامن تمسي مابخلي حاجة تمر ناشفه من تحتو!! ده طبعا عشان ما تنقض ليهو الوضوء!! عليك الله ده كلام ياب رويس!!


#566491 [اللمبي بمسي]
5.00/5 (2 صوت)

01-24-2013 12:07 AM
مابحتاج يشوف احمدبس كان حيشوف خيابيتنا الماوردت علي حد!!!
اسه عليك الله مش خيابه!!
نيل جاري وعطشانين!!
ارض خدره وجعانين!!
دهب بره وفلسانين!!
وحكومه فاسدة وبغم ماقادرين!!
شوية عصابه عليها ماقادرين!!
باعت البلد !!شنو منتظرين!!!
خليهم ارقصو كلنا جوانا من الخوف راقصين!!!
والرجاله ماها شنب!!قدره وعزه وفلوس بتقنع الجاهلين!!!
كان البابا طرطور ماقادر ياكل السمحين!!
ولاقادر علي حق المدرسه اويوظف العاطلين!!
والاشغال الميه جايبه ليها خبز ولالحمن شوية سمين!!
تنفخ في منو وتقول امين!!!
مالوليه لافه بتاكل ليها جنين!!
والبت شغاله لي اخرالليل في كنتين!!
والولد داشر بفرق الحال العليهو مع الداشرين!!!!
والبجي اخرالليل مهدود وله سارق ليهو خزين!!ده منو منهم البقول لامتين!!!
للكايس الحلال واصل وله الحرامي حزين!! كده شوف مخرجات ديله اقلو ولاد بايظين!!!
الاول يمكن عقوبة ربو سلط علي الداِ{]،!! التاني منوالبعاقبو دحين!!!
وديل ملو البلد والمشكله ولدو راقص وهو ليهو دقين!!!!


ردود على اللمبي بمسي
United States [حازم] 01-24-2013 08:35 AM
يا لعبقرية التشخيص كل كلمة في محلها مين زيك
كمان بلدينا ما قصر يفتح لينا أفاق التفكير - دمتم جميعا


#566418 [عبدالله عبدالله]
0.00/5 (0 صوت)

01-23-2013 09:23 PM
أتريد من أحمد إبراهيم الطاهر أن يذهب ليستشهد ويترك الثلاثين مليون التي يتلقاها شهرياً بمختلف المسميات: راتب، بدل سكن، مخصصات دستوريين بدل ميل حوافز، الخ؟ ومن الذي سيحقق مراد الحكومة غصباً عن مراد بعض النواب الشرفاء (وهم قليل) عندما تريد أن ترفع الدعم عن المحروقات وعن السكر وعن وعن وعن ومن الذي سيرهب النواب حتى يصفقوا بعد أن يزيدوا المستضعفين رهقاً على رهق حتى تزداد رفاهية أحمد إبراهيم الطاهر وشركاه من بقية الحرامية (أقصد الدستوريين)؟


#566363 [ابراهيم الكدرو]
3.00/5 (1 صوت)

01-23-2013 07:55 PM
صدقت ياصقر الكواهلة.. الأستاذ مفتون بالمصريين لدرجة الهيام فلايكاد يخلو مقال من مقالاته من سيرة المصريين وأمثاله كثر من المهزومين ثقافيا وفكريا والمبتلين بعقدة النقص..رحم الله عبود وجزاه خيرا فلو لا تهجيرهم لانضموا لمصر.


#566259 [الحلفاوى]
1.00/5 (1 صوت)

01-23-2013 05:48 PM
يا اخوى انت لسانك بقى طويل خالص اعمل حسابك تلحق ودطه الله يرحمه


#566247 [صقر الكواهلة]
1.75/5 (3 صوت)

01-23-2013 05:40 PM
حاجة واحدة مدفونة فى المقال والمقال لة ثلاث اهداف نتفق ونختلف مع كارة العرب والعروبة
1- اوصل السادة القراء انة درس دراسات عليا ممكن نقول ماجستير لانو هذا الشخص لو منح درجة الدكتوراة (على الطلاق الا نرحل من البلد)
- يفتخر بصلتة بالمصرييين وعلى الطلاق المصرى اخير منو البنغالى
- يتعنصر ويجاهر بالعنصرية حتى عرف عندنا بالعنصرى
واحد بلدياتنا واحد من النوبة انا نوبا نوباوى --- قرب يقول انا اسمى صلاح عاووضة حتشبثوت بن عن خامون التحتمسى


ردود على صقر الكواهلة
United States [أبوهبة] 01-24-2013 03:08 PM
ياصقر الكواهلةخليك من إفتتان الأستاذ عووضة بالمصريين ياراجل بعد الشفناهو من المصريين وومواقفهم والله نحن البنغالى أحسن مننا .... أدعوك لمشاهدة برنامج الدكتور باسم يوسف ( البرنامج ) الذى يبث على القناة المصريية سى بى سى يوم الجمعة الثانية عشر ليلا بتوقيت القاهرة ويمكن مشاهدة ما فاتك على اليوتيوب ولأتحداك إن لم تراجع موقفك وتغير رأيك عن المصريين ... باسم يوسف نموذج لشاب واعى مثقف شجاع يحمل روحه على كفه وسط هذا الهذيان من المجانين والمهوسيين غير هياب ولا وجل وباسم واحد من ألاف من الشرفاء الشجعان فى مصر الذين أحسوا ووعوا لما يدبر لمستقبل بلدهم من دمار ووقفوا دون خوف ليقولوا كلمتهم ... يعنى المواجهة أول بأول ونحن منذ ثلاث وعشون عامآ يانا نحن أخر محاولات لإثبات رجالتنا وأملنا الأخير إنو أسرائيل تجينا بالواطة.... الدنيا إتغيرت يارجل .

United States [فرقتنا] 01-24-2013 01:22 AM
يعني المره كدة طلقااانة بس قول ليها ما تحزني (تعريض) لو فهمت البين قوسين

United States [ما ممكن يا فردة] 01-23-2013 08:05 PM
يا صقر قريش
خليك منطقي وسيب الانصرافية
عند رأي تجاه المكتوب يلا ورينا
ما عندك احسن لك اتكتم وبلاش صياح


#566205 [ابو سامي]
5.00/5 (3 صوت)

01-23-2013 04:21 PM
لو الطايرة الانتينوف جاتلو في محله وفي المجلس الواطي سيكون المجلس في اجازة ولا تصيبه


#566193 [ما مرتاح ..... وما مرتاح]
5.00/5 (3 صوت)

01-23-2013 04:03 PM
وكم هو (طيب) محمد عبداللطيف الذي كان (يؤذيه) محض ضحك بلا سبب فيعده ضرباً من (الخيابة!!)..
* فـ(إيش حال) لو كان حاضراً عهدنا ذا (الخيابات) هذا ؟!!!!
ده لو كان حاضرا لزماننا هذا كان مات بالمغصة ساكت !!!!!!!!!!


#566189 [ابو ضرغام]
1.00/5 (1 صوت)

01-23-2013 03:59 PM
بالله ايه اللى يعجبك فى بلادنا؟؟


#566181 [عبدالواحد المستغرب أيما إستغراب!!]
4.75/5 (7 صوت)

01-23-2013 03:42 PM
ياودعووضه وهذا دليل آخر الى أن البلد بما يحمله على ظهره من شجر وحجر وبشر كله مكانك سر وما دروا أن العالم العربى بما فيهم(النوباوى والنوبى!!) قد تحول الى (اللهجه اللبنانيه) بفضل المسلسلات التركيه المدبلجه باللهجه المشار اليها وبما إنها صارت هى السائده الان عن جداره وربما تلحظها بسهوله فى الطريقة التى بات يتحدث بها بعض (الصبايا) عندنا حتى بتنا نخشى على (لغتنا النوبيه الجميله)التى كادت ان تندثر بسبب التهجير اللعين وتغول أفكار امثال الطيب مصطفى وغيره من المستعربه المنبتين!!وانا على يقين بأننا سوف نسمعه اقصد الطيب مصطفى وقد تحول الى اللهجه اللبنانيه عما قريب ولن نعجب عندما يقول لمناهضيه (هيك بتفكروا فى برم النظام.. تقبرونى!!)اما بخصوص الماده الاعلانيه وبما أن المسأله ليست فيها اى إبداع عليك أن تعمل فكرك وأقسم تكلفة الاعلان على (ثلاثه) من المنتفعين وهذا هو الهدف الاهم!!!اما صديقنا احمد ابراهيم الطاهر نقول له الشهاده الجد..جد يسعى لها من آمن بها وأنا لا أرى له أى نيه صادقه!! وإذا نوى الشهاده فعلا فالحل سهل جدا فقط عليه أن يحسن النيه ويسعى لزيادة جرعات هرموناته الانثويه وإلاقتران بفحل لايخشى فى الله لومة لائم وإنتظار مدة التسعة أشهر المقرره ثم يلاقى حتفه أثناء المخاض وقد افتى بعض العلماء الاجلاء(طبعا ليس بينهم أى من الكائنات المحليه) بأن الانثى التى تتوفى أثناء المخاض تحتسب عند الله شهيده بإذنه تعالى وأعتقد أن هذه الفكره تلائم تكوينه وتتناسب معه ثم انه لم تتبقى طائره اخرى صالحه للطيران وبارك الله فى طياريها الذين ذهبوا بالاجر كله والشيخ نفسه لم يدلى بتصريحاته إلا بعد أن إطمئن على أنه ليست هناك ثمة طائره آخرى صالحه للطيران لكى تطير حتى تسقط وتدق عنقه!!.


#566178 [كاريوكا]
5.00/5 (3 صوت)

01-23-2013 03:36 PM
انت ماشي بعيد مالك ؟؟ كفاية عليك أبلة ظاظا وهو يتمايع طربآ عند كل احتفال .


ردود على كاريوكا
United States [الحلنقى] 01-25-2013 12:46 AM
بس قاعد يجامل .. حلوة دى يا......

United States [صقر الجو] 01-24-2013 08:11 PM
ظاظا المقصود هو أقلكم رقصا، وانتو الرقيص أهلو وعاملين ليهو (لبس) عديل كدا، أما (ظاظا) فان رقيص الرجال ليس من ثقافة قبيلته، وهو لا يرقص بمعنى الكلمة، بس قاعد يجامل ناس رقيص الرجال من صميم ثقافتها، ولو مغالط قول لي انت من ياتو قبيلة، عشان أفحمك ... رغم غلاء (الفحم) !!!!!

United States [طبال كاريوكا] 01-24-2013 01:33 PM
يالمتفائلة لو جبنا اسمه الهوى بقسمو .. وابلة ظاظا قدوة شباب الاعلان فى الرقص .. سمين و مدردم و بنى جامع و حجا و جا وبحب غنا شندى والدكيم .. كفى ولا نزيد ؟؟؟

United States [المتفائلة جدا] 01-24-2013 06:40 AM
أبلة طازا مين ؟؟


#566170 [الضعيف]
4.75/5 (4 صوت)

01-23-2013 03:26 PM
الله يرحمه..ويعني بقت على ديل يا أستاذ عووضة!!
ما الرجال ماتت في كرري زمان ولا عندك شك!!

وحسي سكوتنا على الحكومة السجم دي ما أكبر خيابة.. وزي ما العافية درجات الخيابة مثلها..


#566164 [عبد الله]
5.00/5 (7 صوت)

01-23-2013 03:12 PM
عندى قروش اودعتها فى حسابى ببنك النيلين للتنمية لمدة 6 شهور ولما جيت اسحبهم خصموا منى 200 الف جنية قالو لى دى رسوم ايداع !!!! فى كل بنوك الدنيا البنك بيدى المودع ارباح نظير ايداعة لقروشة بالبنك الا فى سودان السجم والرماد كل جهة تمشي ليها تخصم منك رسوم حتى البنك الذى اودعته قروشك
بالله عليكم فى دولة فى العالم بتعمل كدا ؟


ردود على عبد الله
United States [مغبون] 01-23-2013 06:24 PM
تستاهل ... انت الشلاقة عليك شنو ؟؟ الوداك ليهم شنو ؟؟؟

United States [صقر الكواهلة] 01-23-2013 05:43 PM
نعم اى بنك فى الدنيا بخصم رسوم خدمات من العميل انت متخلف ولا شنو بتجيك رسائل نصية عند السحب والايداع او المشتريات عبر البطاقة الالكترونية بتستعلم عن رصيد بتشيل كشف حساب الموظفين بتاعين البنك ديل البصرف ليهم ماهيتهم منو اصرف ليك ولا كفاك

United States [زول] 01-23-2013 05:26 PM
انت شفته حاجه يازول بقينا الواحد مايعرف الضكر من الانتاية وكان دخلته المطاعم ومحلات الحلاقة بتقوم جاري وكان علي الجامعات الأولاد الشواز بقو مابيدسوها وادخل أي جامعة تجد الود بتنافس مع أي بت في السحسحا


#566144 [Shah]
5.00/5 (5 صوت)

01-23-2013 02:42 PM
الرئيس الدائم للمجلس لو ركب طائرة أنتينوف ... فى أول مطب هوائى "يلبس برشوته ويتلب".


ردود على Shah
United States [في جوبا] 01-24-2013 03:25 PM
يديكم العافية يا معلقين الراكوبة و الله كتلتونى بالضحك

United States [فرقتنا] 01-24-2013 01:26 AM
اوعي اكون دا الطلب من الفكي اكتب ليهو في مؤخرتو زي ما قالوا علماء السلطان

United States [wedhamid] 01-23-2013 05:43 PM
يا shah دا قالليك الرئيس الدائم للمجلس مثبت فوق كرسيهو بى غرا و ما بيتعتع من كرسيهو دا ....و الشهاده ماحيناله إلا الأنتينوف دى تقع فوق مجلسو ...زى الطياره بدون طيّار ديك البتقع فوق الأدبخانات ....


صلاح الدين عووضه
صلاح الدين عووضه

مساحة اعلانية

تقييم
10.00/10 (5 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة