قرض حسن
01-24-2013 10:58 AM

قرض حسن

الفاتح جبرا
[email protected]

107 فولت ؟ 107 كلم/الساعة ؟ 107 مليلتر/الثانية؟ .. لا .. عزيزي القارئ ، دي 107 (حاجة تاني .. عشان تعرف هي شنو .. تفضل وتابع معي المقال :
العبدلله يبصم بالعشرة ويقسم بكل مقدساته في الدنيا بأنه لم تتم إستباحة للمال العام كما تتم في ظل هذا العهد الرشيد .. إستباحة بالعلن والمفتشر ودون ذرة حياء واحدة وبالقانون ! أيوه القانون الوااااحد ده .. وإلا قولوا لي بربكم كيف يمكننا أن تفهم أو نفسر هذا الخبر الذي أوردته صحيفة الإنتباهة والذي تم نشره في عددها بتاريخ الثلاثاء 22 يناير الحالي يقول الخبر :
طالبت نيابة المال العام السلطة القضائية بإلغاء التسوية التي تمت بينها وبين أحد الموظفين «67 عاماً» أُدين أمام محكمة المال العام يوم الخميس الماضي بسبب أخذه مبلغ «225» ألف جنيه من خزينة السلطة القضائية. وعلمت «الإنتباهة» أن نيابة المال العام مثلت الادعاء، وصدر قرار إدانة من المحكمة للموظف بالسجن ثلاثة أعوام ورد المبلغ لصالح حكومة السودان. وأبلغ مصدر الصحيفة أن نيابة المال العام تفاجأت بتقديم السلطة القضائية تسوية قضت بأن يدفع المدان مبلغ «300» جنيه شهرياً لمدة «40» عاماً، وقبلت محكمة المال العام بها رغم اعتراض نيابة المال العام، وأكد المصدر أن النيابة هي الجهة الوحيدة المختصة بتمثيل المجتمع أمام المحاكم الجنائية وليس الجهة الشاكية «السلطة القضائية»، مؤكداً أن المال مال المجتمع وليس مال السلطة القضائية. وعلمت «الإنتباهة» أن رئيس نيابة المال العام وجه وكيل نيابة المال العام بمخاطبة رئيس القضاء لإلغاء التسوية، مبيناً أنه بعد انقضاء فترة السداد يصبح عمر المدان «107» أعوام. وأشار المصدر إلى أن مثل هذا الإجراء يعتبر دافعاً ومشجعاً على الاعتداء على المال العام، ولفت إلى أن مثل هذا التقسيط لا يتم منحه لأصحاب المشروعات الصغيرة في التمويل الأصغر، وتعود تفاصيل القضية إلى حدوث عجز في الخزينة الرئيسة للسلطة القضائية أثبتته المراجعة الداخلية.
إنتهي الخبر ولم تنته دهشتنا لما آل إليه الأمر في دولة المشروخ الحضاري .. هذه السابقة التي لم يسبقنا عليها أحد لا في الأولين ولا الآخرين توضح تماماً كيف أننا معظم أفراد الشعب السوداني الفضل قد أصبحنا كالأيتام على موائد اللئام فبينما يموت المئات بل الآلاف لعجزهم عن توفير الدواء (يخمش) مثل هذا (اللص المسنود) مئات الملايين فيحكم عليه بالسجن وإسترداد ما أخذه غير أن مخدمه (يظهر ع الخط) مخاطباً (المحكمة) بأنه قد توصل إلى (تسوية) معه في خرق واضح للقانون وللأسف الأسيف لم يكن المخدم إلا (السلطة القضائية) لتكتمل الدهشة في هذا العهد التعيس !!
التسوية من وجهة نظرنا لا غبار عليها (بل كتاحة) وإن كانت فترة سداد (القرض غير الربوي) (واسعة شوية يعني) إلا أننا نحمد لمن قام بها إنو حفظ للمواطن الغلبان (حقو) وقروشو (في الأخير) ح ترجع ليهو وكده ، فقط لدينا عدة ملاحظات لمن تكون في تسويات (في المرات الجاية) :
1- أن تكون عدد سنوات الأقساط حسب المعادلة التالية :
(عمر المختلس لحظة الإختلاس+سنوات الأقساط) = 100 وذلك جتي يحتفل المختلس بعيد ميلاده المية وإنتهاء سداده للأقساط في بروقرام واحد
2- أن تقوم الجهة التي قامت بالتسوية بإلزام المختلس بالتأمين على خياته بحجم المبلغ المختلس (طبعن من القروش اللاغفا) ، وده عشان نضمن للمواطن الغلبان (حقو) وكده
3- أن يتم دفع القسط بقيمة الدولار عند الدفع عشان مفيش حد عارف الجنيه ح يكون قيمتو أيه عام 2053 (أي عند القسط الأخير) !
4- أن توضع صورة من التسوية في دار الوثائق المركزية
5- أن يكون عنوان المختلس واضحاً ومحدداً .. احمد شرفي .. البكري .. مع توضيح رقم المقبرة !!

كسرة :
بختو لا (قيمة مضافة) لا (دمغات) لا (زكاة) لا (ضرائب) ولا أرباح !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)


تعليقات 31 | إهداء 0 | زيارات 5901



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#568623 [adil]
0.00/5 (0 صوت)

01-26-2013 09:50 PM
والله اذا وصلت القضاء منو العوض وليهو العوض ( ممكن يدفعها القضاء من الفنادق والمكاتب الخمس نجوم القاعد يبنيها فى الولايات ) هم ذاتم خامنها وبعيدين عن المراجع العام.

ده زول شاف الاكل عند ناس القضاء ذاتم. مسكين رفقا بالمعاشيين شال حقو وحق اخوانه المعاشيين


#568204 [المؤكوك الفضائي]
0.00/5 (0 صوت)

01-26-2013 11:10 AM
ياربي بتمر كم حكومة حتي يكمل اقساطة؟


#567509 [Zoul sakiit]
0.00/5 (0 صوت)

01-25-2013 12:03 PM
الشي الجاب التسوية انو الموظف دا عمرو 67 سنة والمفروض انو سن المعاش 60 سنة عشان كدا اكتشفوا غلطتهم بان الزول دا مفروض يكون في المعاش ليهو سبعة سنوات واختلس هذه الاموال وهو من أرباب المعاشات عشان كدا ورفقا به عملوا ليهو التقسيط المريح دا*


#567355 [المسيكني ودالمجاور]
0.00/5 (0 صوت)

01-25-2013 07:45 AM
يا اخوانا ماتبقو ناس حاسدين الراجل ده عملو ليه تسويه والكلام ده تحت فقه الستره


#567342 [صدقونى]
0.00/5 (0 صوت)

01-25-2013 07:18 AM
برافو
السرقة كدة يا بلاش
ضرب وحسب حقوقو فى الدنيا كلها وشالا
ويكون عمل قسم الله مع بتاع التسوية


#567243 [فرقتنا]
0.00/5 (0 صوت)

01-25-2013 12:23 AM
أي التناقض دا مفروض ارجع القروش وسجن 3سنوات طيب وهو مسجون 3سنوات باعتبار انو دا الحق العام ح اجيب الاقصاد لي مدة 3 سنة من وين علما بما انه اصبح متردد سجون هل ناس المصلحة الهو شغال فيها ما عندها اي عقوبه طبعا وتعتبر ليهو المحكمة اجازه مفتوحة والراتب ماشي ؟؟؟؟!!!!!!


#567176 [هندسه]
5.00/5 (1 صوت)

01-24-2013 09:35 PM
صراحه الزول دا حريف وعجبني شديد بعدين احتمال نيتو يتدين من الدولة بدل يتزله عند الناس ... اهو دين وكلها اربعين سنه وبرجعو بواقع 12*40= 480 شيك ( دا لو حيبصم على كل شيك بصمتو حتروح)...

وعمر ال 107 سنه دا هين المشكله يصلو ويكون لسه في عز شبابو وتاني يتدين من الدولة..
107 سنه.. دا الا يبقى سلحفاء


#567119 [fadeil]
0.00/5 (0 صوت)

01-24-2013 07:56 PM
المشكله يا أخوانا مش في الفلوس التي حكم بارجاعها خلال أربعين عاما ، المشكله هل سيعيش هذا المختلس حتي يكمل سداد هذه الأقساط الشهريه ، هذه مهازل دنيانا التي نعيشها في هذا العهد الضلالي .


#567088 [awadahmed]
0.00/5 (0 صوت)

01-24-2013 06:31 PM
طيب ياجبرة عمر البشير لو علواليه تسوية لأموالنا الملهوطة بما فيها مسجد أبوه حيقسط الشعب لسنة كم؟طبعا دى حسبة ما أظن الالات الحاسبة تقدر عليهاوبرضو تقول لى حماة شرع الله.


#567073 [nader]
0.00/5 (0 صوت)

01-24-2013 05:48 PM
شكلها مش عام 2053 بس حا تكون قاعده على قلبكم الى يوم يبعثون ما فى اى افق للتخلص من السراقين ديل حتى لو لحستو كوعكم


#567064 [سوداني مبارك]
3.50/5 (3 صوت)

01-24-2013 05:31 PM
السيد دوسه كفاية دوس اخير تستقيل بعد الفضيحة دي حالتو انت قلت مافي زول بتدخل في شغلك


#567055 [زول]
5.00/5 (1 صوت)

01-24-2013 05:12 PM
حكومة تلب


#567047 [الكليس]
0.00/5 (0 صوت)

01-24-2013 04:54 PM
دي ما المشكله ياحبيب !!!

المشكله أنه سوف يلأتي المسئولون الكبار ويقولو أن القضاء السوداني من أفضل (القضايين )
في الدنيا كلها , والمغالط يمشي يسرق عشان يشوف ..


#567045 [كلك كلو]
0.00/5 (0 صوت)

01-24-2013 04:51 PM
دي يحلها الشربكها


#567043 [mansour]
0.00/5 (0 صوت)

01-24-2013 04:49 PM
طبعا التسويه دي من غير المألوف لأن المألوف ان تتم المعالجه بفقه الستره وعليه وحسب رأى المامحسوبولوحساب ان هذه التسويه في مصلحه الشعب السوداني100%


#567024 [ابوعبدا]
5.00/5 (1 صوت)

01-24-2013 04:15 PM
العندو ظهر مابيندق على بطنو


#566947 [كتاحة]
5.00/5 (5 صوت)

01-24-2013 01:42 PM
التسوية لاغبار عليها بل (كتاحة) .. كمان جابت ليها نبز يا جبرا هههههه

المعنى انو الزول ممكن يلغف 3 مليار و يسددا القرن الجاي .... و تقولوا الحكومة ما بتراعي للمواطنين يا ناكرين الجميل


ردود على كتاحة
United States [كنت سوداني زمان] 01-24-2013 05:33 PM
دي ماكتاحة يااستاذ جبرا دي عاصفة رملية لاتبقي ولا تذر


#566931 [اللاحس كوعه فرع الصعيد]
5.00/5 (2 صوت)

01-24-2013 01:22 PM
يعني بالطريقة دي محتاجين لعالم في الرياضيات وعالم في الفلك وكمان الم في تحضير الأرواح
يحسبوا أقساط الجماعة السرقوا خط هيثــــرو (وووو وووو وووو)+(وو)

دايرين ليهم كم سنة عشان يرجعوا الفلوس اللهطوها من الشعب المسكين


#566924 [ثائر ضد الفساد]
0.00/5 (0 صوت)

01-24-2013 01:17 PM
ههههههههههههه سيجارة دي صاموتية جبتها من وين


#566896 [الحزين]
5.00/5 (3 صوت)

01-24-2013 12:33 PM
اذا كانت السلطة القضائية ذات نفسها تدلع منتسبيها وتحضهم على استباحة المال العام كما فى حالة المستشار مدحت وهذا البلدوزر الذى سوف يقضى عقوبة السجن بينما فلوسه المنهوبة مدورة بالخارج .. فقد وجدنا الجواب لماذا كثرت القطط السمان فى عصر الانقاذ .. ببساطة لانعدام القضاء النزيه و حاميها حراميها .. وتانى رجعنا للجاهلية تسرق سخلة لاطعام اطفالك يقطعوا يدك بينما الكبير يسرق جملآ يفرج عنه بالاقساط المريحة و ربما رقوه ..


ردود على الحزين
United States [الحزين] 01-24-2013 04:30 PM
ود جمعة لا ابرر سرقة السخلة لاطعام الاطفال ولكنى رمزت لذاك الذى سرق خروفآ بالكلاكلة وقطعت يده ابان فورة الاحكام الحدية من قضاة المحاكم الايجازية .. وما ارمى اليه انهم قوم اذا سرق فيهم الشريف تركوه واذا سرق الضعيف اقاموا عليه الحد .

United States [ودجمعه] 01-24-2013 02:25 PM
ماذا تقصد بهذا الكلام تاني رجعنا للجاهليه تسرق سخله لاطعام اطفالك يقطعو يدك


#566894 [ود فارس]
5.00/5 (1 صوت)

01-24-2013 12:32 PM
والله فعلا مهزله البطولة فيها للقضائية


#566893 [ابو عمر]
0.00/5 (0 صوت)

01-24-2013 12:31 PM
بامو الحد عليه وخلو القوى يسرق_‏ الراجل المختلس ده موظف غلبان خزنته فرقت حبسوه قبل خمسه سنين وطلع لمن تم عمره 70سنه مش الخميس الفات وباعو بيته وشالو مكافأته معاشه والمبلغ ده عباره عن معاشه الشهرى بدفعو لى جريمه ماعندو ذنب فيها السؤال هو عملو شنو لقوش الحسابه فى البنوك مليارات وكيل النيابه الراجل ده خليه يورينا


#566891 [ابو مريم]
5.00/5 (1 صوت)

01-24-2013 12:29 PM
لا حولا ولا قوة إلا بالله ... أستغرب من شخص ياكل اولاده حرام ... الفساد فى السودان وصل مرحلة لا يمكن السكوت عليها ... اللهم اخذهم اخذ عزيز مقتدر


#566887 [د -بله]
5.00/5 (1 صوت)

01-24-2013 12:20 PM
شنو يا جبرة, الراجل اخد القروش دى دين. المثل بقول اتدين و بعدين اتبين.
بعدين كده احسن على الاقل نضمن للاجيال الجاية انو فى قروش حتدخل- لكن وين , الله اعلم-


#566885 [محمد حسن]
5.00/5 (1 صوت)

01-24-2013 12:19 PM
هو يعلم تماماً بأخذه لهذا المبلغ لن يحاسب عليه لأن الذين عينوه في هذا المكان أتاحوا له الفرصة حسب إتفاقهم معه.. وسياسة التمكين التي إبتدعها الكيزان هي نفس سياسة اليهود.. يعني حتى يمكن أن يعطوك رأس المال كما حصل للكثيرين تستثمر تعمل شركة تعمل أي شغل المهم هناك ضريبة خاصة بالتنظيم تحت الطاولة تدفعها لهم يعني (تفيد وتستفيد) لذلك نرى في هذا العصر (عصر الإنقاذ)الحالات المبالغ فيها في التعدي على المال العام وكترة الحرامية النبلاء وليس النبلاء الحرامية.


#566876 [خمـــــــاش]
0.00/5 (0 صوت)

01-24-2013 12:06 PM
يا استــاذ هو الراجــل ما دام عمرو 67 سنة ما إخلو الحساب

قداااااااام(الزول قرب ما باقيى ليهو كتير من الحديث : أعمار

امتى ما بين ال ............) يعني هسي عمك بكون لو ما اجراءات

المحكمة بخــتم في ملفو عــند نكـــــــير .


#566860 [يحيي العدل]
5.00/5 (2 صوت)

01-24-2013 11:55 AM
هي لله هي لله .

القضاء طبعن حر ( يعني حر فيما يعمل )

يا جبرا مثل هذه الاخيار لن تدهشنا . ياخي جيب لينا خبر يستاهل حاكم نحن جلدنا تقيل زي فهمنا .


الله يقطع الحسكنيت .


#566850 [الجعلي]
5.00/5 (1 صوت)

01-24-2013 11:43 AM
ههههههههههههههههه والله حلوه رقم المقبره دي


#566849 [salah]
5.00/5 (1 صوت)

01-24-2013 11:43 AM
دى مش واسعة وبس دى حكومة ذمتها عرييييييضة


#566838 [ودشريف]
5.00/5 (1 صوت)

01-24-2013 11:22 AM
هذا زمانك ياماهازل فامرحى
استاذنا الفاضل الفاتح جبرا هذه هى دولة المشروع المدمر لا اخلاق لاذمة لا دين هم لايفهمون شي غير جمع المال العام الفساد عم القرى والحضر والبلد من ساسا لى راسا عارفة ولا احديحاسب طالقة يعنى واذا كان رب البيت بالدف ضارب فما شيمة اهل الدار انحنا ماعارفين بلدنا دى لسه اسمها السودان ولا بقت مملكة المؤتمر اللاوطنى وانحنا رعايا فيها والله يجيرك ويجيرنا في خط هثرو العند السيد النائب العام ولسة ماعرف الباعو منو ؟


#566835 [Petro]
5.00/5 (1 صوت)

01-24-2013 11:21 AM
300 في 12 في 40 يساوي 107 !!! القروش 225 الف والقسط الشهري 300 القروش دي هترجع في كم سنة !!!
وانت يا ود جبرة ليك سنتين ماسك خط هيثرو يغلبك الحساب !!


ردود على Petro
United States [السودان الذى كـــــان] 01-24-2013 07:31 PM
يا شباب المسألة ما دايرة لولوة وغلاط وحساب والباقى ليهو كم من العمر عشان يسدد وكم من الزمن الضائع عشان أولادو المساكين ما يموتو من الجوع وشايفين الأهتمام بالمواطن الغلبان زى ما واحد بيعلق وطبعن بالفهم دا -الراجل دة ماشى على الحساب وهناك حيجبوا الراجل، والشعب المسكين، القروشوا أتأكلت و حيجيبوا القروش! ومافى أى مشكلة! وحيجيبوا ليكم الخط الرايح وحاجاتكم كلها محفوظة فى أمانة الله!

United States [محمد احمد] 01-24-2013 03:16 PM
فهم السؤال نصف الاجابة! عمر الموظف المختلِس 67 عام.
حقو يا جبرة يدخلوك في برنامج المناهج المدرسية حياكون المنهج اكثر ارتباطاً بالواقع احسن من تفاح و برتقال و اتوقع قفزة نوعية في تعليم الرياضيات خاصة انو الارقام فلكية وفي فرق عملة و ارباح و .....

United States [هادى] 01-24-2013 12:27 PM
يا اخى كنلكم ما عارفين جساب المبلغ فى نهاية المدة =144 الف يكون طالبينه 81 الف جنيه


الفاتح جبرا
الفاتح جبرا

مساحة اعلانية

تقييم
10.00/10 (6 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة