شباب شارع الحوادث
01-26-2013 11:38 AM

شباب شارع الحوادث

الفاتح جبرا
[email protected]

في ندوة عن (مستقبل التدوين في السودان) عقدت في الأسبوع الماضي وبعد أن فرغت من تقديم ورقتي تقدم شابان في مقتبل العمر نحوي وبعد إلقاء التحية وتقديم نفسيهما قالا لي : يا أستاذ والله نحنا عندنا مشكلة ومحتاجين ليك نقعد معاك وين ومتين؟ أجبتهما بإنو مافي مشكلة ويمكنهما أن يسجلا لي زيارة بالمنزل في اليوم التالي.
جلسا لي في اليوم التالي في منزلنا المتواضع ، إ بتدر أحدهما الحديث قائلاً .. نحنا يا استاذ (شباب شارع الحوادث) ، وقبل أن تكتمل دهشتي أكمل لي الشاب الآخر القصة التي سوف أرويها لكم :
بدأت القصة قبل خمسة ستة أعوام .. لا أحد بالضبط يعلم متي بدأت بالتحديد ومن قام بها .. مجموعة من الشباب من الجنسين تشمل مختلف الشرائح طلبة ، عواطلية ،عمال وموظفين ياناوبون الحضور والجلوس في شارع حوادث مستشفي الأطفال على مدار 24 ساعة يقسمونها فيما بينهم مهمتم إستقبال الأطفال المرضى وذويهم وتقديم المساعدة لهم بتوفير الأدوية والفحوصات والأشعة وخلافه .
كيف يتم ذلك ومن أين التمويل .. أقول ليكم :
هؤلاء الشباب أنشأوا لهم صفحة على موقع التواصل الإجتماعي (الفيسبوك) أسموها (شارع الحوادث) وضعوا عليها أرقام هواتفهم تقوم الصفحة بإستقبال الحالات التي تحتاج إلى مساعدة فيقوم قراء الصفحة بالتكفل بنفقات الحالة المعينة بعد تحديدها بالإسم والذهاب لمقابلة هؤلاء الشباب في موقعهم أمام المستشفي لمعاينة الحالة وعمل اللازم .
لهولاء المجموعة من الشباب حسابات (جرورة) بعدد من الصيدليات قاموا بفتحها حتى لا يتعطل الأطفال المرضى (كما قالوا لي) ، وقد علمت منهم أنهم لا يمسكون قرش احمر (في ايدهم) إذ على المتبرع التعامل مباشرة مع المريض الذي يود مساعدته
وعلى من يود دعم عملهم أن يقوم بتسديد جزء من حساب الصيدليات والمعامل وقد علمت منهم أن هنالك الكثير من المواطنين يذهب جزء من مرتبهم شهرياً إلى حساب هذه الصيدليات كما أن هنالك عدداً مقدراً من أرباب المعاشات ميسوري الحال تذهب معاشاتهم شهرياً لنفس الجهات ولك ان تعلم عزيزي القارئ أن منصرفات الشهر الماضي من دواء وفحوصات وصور مقطعية وخلافه بلغت 300 مليون جنيه (بالقديم) !!
لله دركم أيها الشباب .. لله دركم .. كم أنقذتم من أرواح وكم أزلتم لوعة أباء وأمهات يعانون الفقر والمسغبة والهوان وهم يرون فلذات أكبادهم يإنون من وطأة المرض والألم ... لله دركم .. ماذا يمكنني أن أقدم لكم ؟
الحقيقة يا استاذ نحنا جينك عشان قبل كم يوم كده جانا زول معاهو طفلو عمرو زي 9 سنوات عيان ومفروض يرقد في العناية المكثفة عشان يدوهو أوكسجين .. المستوصفات والمستشفيات الخاصة الزول لو ما دفع أمنية 15 ما بدخلوهو وبعد داك اليوم الواحد في العناية المكثفة بي حوالي مليون إلى مليون ونص .. ومستشقى جعفر بن عوف للأطفال فيهو غرفه عناية مركزة واحده وتعبانة وفيها جهاز واحد وبتاع (دم) .. أها ما عرفنا نعمل شنو .. عملنا إتصالات وحاولنا نجمع قروش من بعض لكن يا استاذ المرض ما بينتظر .. والولد مات قدام عيونا !
جيناك يا أستاذ عشان عاوزنك تقيف معانا عشان الناس القاعدة تقرأ ليك كتيرين ولو كل واحد فيهم ساهم معانا بي اقل حاجه ممكن نعمل لينا غرفة عناية مكثفة للأطفال (مكتملة الأجهزة) ونحنا سألنا لقيناها بتكلف حوالى 260 ألف (مليون بالقديم) .
الشعب السوداني شعب عظيم .. العبد لله متأكد إنو ممكن نجمع لينا حق عشرة غرف عناية مكثفة في يومين .. بس المشكلة في كيفية جمع التبرعات .. والشراء (يعني في التنفيذ) ... أولادي ديل قالوا ليا نخلي الناس ترسل لحساب المستشفي .. قلتا ليهم كده القروش دي ممكن تروح (مكاتب وستائر وموكيت) عشان كده أدوني فرصة نسأل القراء عشان نشوف إقتراحاتهم شنو؟ فيا أعزائي ورونا أنا والشباب ديل نعمل شنووووو؟

كسرة :
لنقف جميعاً تجلة وإحتراماً لشباب شارع الحوادث .. الذين بدلاً أن تقوم الحكومة بتشغيلهم .. إشتغلوا بدلاً عن (الحكومة)

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)



تعليقات 121 | إهداء 1 | زيارات 17726



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 2 من 2<12
التعليقات
#568412 [سوداني وأفتخر]
3.00/5 (5 صوت)

01-26-2013 02:39 PM
انا اقترح أن توخذ رسوم المغادرة بالمطار والتي تؤخذ من المسافرين - 30000 - صرة في خيط ويؤسس بها صندوق مالي لمثل هذه الحالات - غسيل كلي - سكر - عيون - سرطان اطفال نساء وولادة وخلافه - وكذلك تعمير المستشفيات بكل ما تحتاجه . يعني لو فرضنا أن المسافرين يوميا 1000 شخص سيكون المجموع 30000000 يوميا - يعني 900000000 شهريا - يعني مأئة وثمانية مليار سنويا وبذلك نكون قد قضينا علي هذه المشكلة .


ردود على سوداني وأفتخر
United States [تربال] 01-26-2013 04:37 PM
اقتراحك جميل ياسوداني بس ماكل المغتربين بيرجعوا السودان سنوياً وهم لهم رغبة في التبرع. كما اقترح عرض الموضوع على قناة قوون بها برنامج ممكن يدعم هذا المشروع وهم لهم خبرة في كيفية جمع التبرعات من اهل الخير.


#568410 [وحيد]
2.13/5 (7 صوت)

01-26-2013 02:36 PM
الله يوفقهم و يعينهم و ييجزيهم خير الجزاء .... بس يعملوا حسابهم لان عملهم دا ضد المشروع الحضاري، المشروع اياه يعمل على ابادة الشعب السوداني الفضل عمدا لذلك لن يرضى ابالسة المشروع على اي عمل لدعم المرضى على الشفاء و ثانيا القروش دي كلها تندفع بدون ما ياخدوا عليها ضرائب او اي نوع من الجبايات؟؟ الآن الجماعة عرفوا مصدر جديد للجبايات و بعد يوم يومين ستتحرك قوافل " المجاهدين" للبحث عن هؤلاء الشباب و القبض عليهم باي تهمة من الاتهامات الجاهزة في قانون امن المشروع الحضاري، و ستجد جيوش الجباة التابعين للمحليات يبحثون عن تلك الاموال المدفوعة لفقراء المرضى ليتحصلوا ضرائب و زكوات المشروع الحضاري!


#568408 [كمال العجمى]
5.00/5 (4 صوت)

01-26-2013 02:33 PM
التحيه لهؤلاء الشباب ولك اخى جبرا

معكم و جاهزين لكل تبرع و كل شىْ ولن السؤال الى متى سننوب عن الحكومه فى واجباتها؟ لماذا لا نعيد الروح الى الشعب و نخرج به لنقطلع هذه الحكومه التى لا توفر للاطفال جرعة دواء و فقكم الله


#568400 [حسكنيت]
5.00/5 (3 صوت)

01-26-2013 02:24 PM
أوع تعملوا ليه لجنة
ولى قدام يا شباب


#568399 [mansour]
5.00/5 (3 صوت)

01-26-2013 02:22 PM
عزيزي الفاتح جبرا ان مثل هؤلاء الشباب يذكرني بى ايام كنا شباب قبل ان نهرم ولكن ليس معني هذا انهم من الزمن الجميل واقترح ان يتم فتح حساب عبر صحيفه الراكوبه وتكون انت امين المال ولاكن احذروا ان يكون هذا المال في يد الحراميه وانت عارفهم.


#568397 [ساجي]
5.00/5 (4 صوت)

01-26-2013 02:21 PM
وينك ياودجبره مالمشفي زاتو لحقوه امات طه!!! عندك خبر حيفتحو تاني!! ات مصدق!!!
ورغما عن ذلك هذا اجمل خبر سمعته في بلد المأسي ونضع عمامتنا ذي مابقولوا لهؤلاء الشباب الهميم الخيربارك الله بهم !! فالحقيقة لم نعلم بهذا الجهد الصادق النزيه في بلد الالف جمعية خيريه تنهب وتتعيش علي شعار العمل الخيري في بلد تكاد تكون فيه هذه الثقافه حقيقة معدومه!!اما ديوان الذكاء فهو ليتذاكي في الاستمتاع باموال الزكاة ولا نريد منهم شيئا!!! فقد بح صوت الجميع ومللنا الحديث عنهم رغم مكاتبهم في لشافي التي يستمتع موظفيها تحت التكييف بلا عمل!!
ولدعم هذا العمل اقترح مثل حملة سرطان الاطفال عمل حساب للتبرع بعد تاطير العملب اضافة شخصيات لاخلاف عليها مثلك تبرعا وكلاخ الاكبر محجوب صالح وبروف محمود مستشارالاطفال كلجنة مهمتها الاشراف علي بالتضامن معا هؤلاء الشباب للاشراف علي توزيع الشيكات من الحساب للصيدليات واظن الصيدليات التي وافقت للتعامل مع هؤلاء الشباب جديرة بالاحترام فقد اقدمت علي مخاطره من اجل المرضي وهي جديرة باستمرار الخدمة ويمكن الاستعانه باحد اصحاب هذه الصيدليات في اللجنة!! واذا لم توفقوا بعمل حساب او لم يوفقوا فنحن نثق فيهم وفيك مشرفا عليهم فخصصوا رقم جوال للتبرع عن طريقه ويمكنك كتابته او اضافته بصورة يوميه بعد هثررررررررررررررررو للتبرع وسنرسل لك مانستطيع!! فالتحيه لك ولهم فمثلكم يبقي الامل في هذه البلادولو لاظروف العمل لتبرعت معهم ولكن يكفي ان نمدهم بالمال ونشد علي اياديهم البيضاء.


#568389 [ام حقين]
5.00/5 (2 صوت)

01-26-2013 02:14 PM
واحد من المتداخلين طالب كاتب المقال بان يترك امر خط هيثرو ويلتفت الى هؤلاء الشباب ومساعدتهم لكن انا بالعكس اطالبه الملاحقة والمحاككة الى ان تعاد تلك الاموال المنهوبة وتعطى لهؤلاء الشباب ايه رايكم ..
وكمان كل اموال الحرامية من الدستوريين الذين تحدث عنهم القراى فى مقاله الاخير عندها لن يجد كل سودانى وينعم بعلاج مجانى ...

الله يقطع الاخوان فى كل مكان ويدمرهم كما دمر عاد وثمود وارم ذات العماد بريح شعبية عاتية تقتلعهم من جذورهم وصياصيهم وعماراتهم وفيللهم وعماراتهم الشاهقة ومزارعهم الفتنة التى ظنوا ان لا تبيد ابدا قولوا امين


#568372 [احمد البجاوى]
5.00/5 (2 صوت)

01-26-2013 01:52 PM
دعونى اولا اقف تجلة واحتراما لهؤلاء الشباب واريد ان اشكرهم بطريقتى الخاصه التى تجعلنى واحدا منهم ......


مجرد اقتراح بسيط وهو ان تبنى غرفه منفصله داخل حوش المستشفى ولاتكون للمستشفى الحق فى ادارتها ماليا بل يتم اختيار مجموعه من هؤلاء الشباب تلقى عليهم المسؤليه بصوره دوريه ..... والسبب فى ثقتى فى الشباب تنطلق من تفانيهم لتقديم المساعده لشريحه تستحق العون .. لا اقول اصبت فيه ولكن القيت حجر فى بركه ساكنه


#568369 [زين العابدين]
5.00/5 (2 صوت)

01-26-2013 01:49 PM
سبحان الله حميدة مهموم بترقية استثمارات يستبشرون والزيتونة فى وسط البلد مع الاجتهاد في تشليح حوادث الاطفال جنوبآ حتى وصل بشائر الحزام الاخضر بدلآ عن تأهيل المستشفى المركزى بشارع الحوادث وتخفيف الضغط عليه بتأهيل الاطراف .. وربنا يسخر لنا من يجرد نفسه للصالح العام ويبعد عنا من ينظرون بعين الرضا لاستثماراتهم الخاصة بينما يغضون الطرف عما وكلوا به من عمل عام و لهم التنظير فى الفارغة والمقدودة لصرف النظر عن فشلهم و انانيتهم بينما شباب بلادى يقومون بسد منافذ تقصير هؤلاء ..
اقترح بتسجيل شرائح اتصالات جديدة بشركات مختلفة زين _ سودانى _ ام تى ان .. وتعمل كسرة اعلانية ثابتة تحت كسرة هيثرو وبها ارقام الشرائح و كل يحول على قدر استطاعته ومن بعد تعمل لجنة شباب الحوادث على تسييل هذه التحاويل أما اصحاب الدفعيات المليونية فيمكن فتح حساب بنكى باسم لجنة شباب الحوادث مع الترويج له ايضآكما سلف .. ويمكن مخاطبة القنوات التلفزيونية فى امكانية الترويج المجانى لهذا المشروع الخير و كله بثوابه .


ردود على زين العابدين
United States [بت حبوبتها] 01-26-2013 04:14 PM
تعظيم سلام لشباب شارع الحوادث !

أتفق مع الأخ زين العابدين بتخصيص شرائح اتصالات لهذا الغرض يبدأ بعدها المتبرعون بتحويل الرصيد, لأن فتح الحساب في بنك سيغري الحكومة بالتدخل في الموضوع إما بتجميد الحساب بدعوى أن في تصديق ناقص أو بتحويل الفائض من المبلغ "لأني متوقعة الناس تساهم بأكتر من المطلوب" لحساب وهمي يصب في جيب مسئول..بينما هذا الفائض سيستخدمه هذا الشباب لسداد ديون الصيدليات..

تحية واحترام مرة أخرى لهؤلاء الشباب وربنا يعظم أجرهم, آمين


#568365 [BABA]
5.00/5 (3 صوت)

01-26-2013 01:47 PM
نعلق نقول شنو يا الفاتح!!
انت ما سمعت خبر مامون حميدة الذى قرر وبدأ فى ازالة مستشفى جعفر
ابنعوف. يعنى الشباب ديل عايزين يعملوا غرفة العناية وين !!!
الوضع اكبر بكثير من حوجة طفل لغرفة عناية. انا أرى ان ان يذهب
الشباب الى شارع آخر ويقوموا باجتثاث الكيزان من الجذور .


#568360 [عبدالماجد قنديل]
5.00/5 (2 صوت)

01-26-2013 01:42 PM
تحول المبالغ في حساب بأسم الأستاذ / الفاتح جبرا وأنا واثق منو ويكون الصرف من المبلغ بتوقعين
واحد أستاذ الفاتح والثاني يختار من هؤلاء الشباب ولكم التحية أستاذ جبرا والتحية والتجلة
لهؤلاء الشباب ودمتم


#568359 [محمد علي]
5.00/5 (2 صوت)

01-26-2013 01:41 PM
المسألة كلها في سوء استغلال أمكانيات الدولة80%من ميزانيتها موجه للامن معالجتها باسقاط النظام


#568357 [kayletoud]
5.00/5 (1 صوت)

01-26-2013 01:40 PM
وفقكم الله وسدد خطاكم وفي ميزان حسناتكم ان شاء الله

عمل عظيم تشكروا عليه ! ولكن الحكومة لن تتركم في حالكم اذا حصل فتحوا حساب او ما شابه !!! الضرائب وما شابه ذلك !!!

ولكن فليكون التبرع لكم مباشر أحسن .


رحمة الله عليك يا سودان !!!


#568356 [محمد علي]
3.00/5 (2 صوت)

01-26-2013 01:39 PM
المسألة كلها في سوء استغلال أمكانيات الدولة80%من ميزانيتها موجه للامن معالجتها باسقاط النظام


#568349 [OMDURMANI]
3.00/5 (2 صوت)

01-26-2013 01:37 PM
وبكرة الحكومة تعمل احتفال بفتح غرف عناية مركزة ويستلمو القضية كان هم العملوها... حيرونا يحبو الملح ويبقو اسيادو


#568344 [محمد فضل الله]
5.00/5 (1 صوت)

01-26-2013 01:34 PM
اجمعوا القروش واشتروا الغرفة وسجلوها وقف اسلامى قبل ما تودها لأى مستشفى او مركز صحى..عشان تكون مضمونة وما يتصرفوا فيها ويشلعوها


#568338 [kuwal]
5.00/5 (1 صوت)

01-26-2013 01:31 PM
الحل في ازالة هذه الحكومة الجاثمة على صدر هذا البلد المعطاء وبعدها لن تكون هنالك حاجة لشباب شبارع الحوادث ..؟؟!..والا سنظل نحتاج لشباب عند كل منعطف ومصلحة ومؤسسة وحتى عند دور العبادة ..؟؟

الامم المتحدة اليوم تصرف على السودان وعلى قواتها الموجودة بالسودان ومنظماتها مبالغ كان يمكنها حل كل مشاكل السودان وما جاورها ، الاقتصادية والسياسية والاجتماعبة والانسانية و...................الخ ، اضافة الى ما صرف ويصرف في تلك الحروب العبثية 40 مليار دولار في دارفور وحدها...؟!.. فقط لو قام المجتمع الدولى فقط برفع الغطاء عن هذه الطغمة الفاسدة ...؟! ومن ثم توجيه كل الجهود المبعثرة في ما يفيد البشر وليس الشر او اليشير ...؟؟!!


#568335 [واحد تانى]
5.00/5 (4 صوت)

01-26-2013 01:30 PM
اتمنى منك يا استاذ جبره ان تكون المسئول عن هذا المشروع ..


#568334 [زول حقاني]
5.00/5 (3 صوت)

01-26-2013 01:29 PM
لله دركم أيها الشباب الذين فيهم الخير والبركة .. ونرجو منكم الكثير لخدمة المواطن والشعب السوداني ..
على العموم نحن جاهزين لأي تبرع ورونا بس أرقام حساباتكم والباقي علينا


#568333 [ابراهيم]
5.00/5 (1 صوت)

01-26-2013 01:28 PM
انشاء الله نكون من الاوائل معكم وابدو والله بتم عمل الخير


#568332 [خالد السوداني القرفان]
5.00/5 (4 صوت)

01-26-2013 01:28 PM
السلام عليكم ورحمة الله وبركاته ، أستاذنا جبرا ، جبر الله خواطركم جميعاًوالشعب السوداني الفضّل، وجزاك الله كل خير وهؤلاء الشباب والمحسنين من الشعب السوداني أيضاً، والله يا أستاذ الفاتح أنا أقترح عليك بخصوص هذا الموضوع أن تتولى أنت هذا الأمر بفتح حساب ويتم تحويل التبرعات بإسمك ونعرف مُسبقاً أنها واصلة مباشرة لمحتاجيها. وطبعاً فيها زيادة تكاليف عليك لكن ثقتنا فيك لا تحدها حدود، أنا شخصياً ممكن أرسل ما أقدر عليه عن طريقك لو أنت قبلت بهذا التكليف، وعلى ثقة بأن جميع قرائك سيساهمون في عمل الخير وينوبكم جميعاً ثواب، ولوأنت وافقت يا أستاذ الفاتح أظهر رقم الحساب ( بعدفتح الحساب) في شكل كسرة ثالثة وثابتةيومياً ، على أن تكون الكسرة هكذا: < كسرة ثالثة للتبرع يومياً وسترى من الجميع ما يسُر الجميع من تكاتف ، ونسأل الله أن يتمم الشفاء على جميع المرضى صغاراً وكباراً. وكلنا أمل في موافقة سيادتكم لإجراء عمل الخير هذا وأثابكم الله جميعاً خير الجزاء.


#568324 [Ali]
5.00/5 (5 صوت)

01-26-2013 01:16 PM
ارجو فتح حساب في احد البنوك واكتب لينا رقمو .. وخليك انت حلقة الوصل .
والله اول مرة اسمع بهذا الموضوع، والله دموعي تجري من نص الموضوع لحدي كتابتي لهذه المداخلة . والله لقد وصل الامر حد لا يصدق.
يا الله يا الله اللهم فرج عنا هذا الكرب


#568323 [بلدى ياحبوب]
4.88/5 (9 صوت)

01-26-2013 01:15 PM
والله ياستاذ جبره دى نقل نوعية مباركة من عملتوا لينا شنوا لى نعمل شنوا وحقيقى انا اندهشت واتاثرت للعمل الكبير والمبالغ الضخمة القدروا يجمعوا الشباب ديل ويساعدوا بيه المحتاجين من غير ضجة وانا بقترح طريقة ارسال الرصيد لجمع التبرعات . وممكن فتح حساب فى احد البنوك وايداع تبرعات القراء.


#568318 [dr.khalilanees]
5.00/5 (2 صوت)

01-26-2013 01:06 PM
أحيك و احي قبلك شباب شارع الحوادث ..مستعدين للدعم ..لاقو طريقة مضمونة للدعم و لسه بلادنا بخير و الخير في السودانيين موجود...بس اولاد الحرام يكرمونا ويبعدوا


#568317 [Kudu]
0.00/5 (0 صوت)

01-26-2013 01:05 PM
أدوها لمنظمة سند الخيرية


#568316 [الطيب]
3.00/5 (2 صوت)

01-26-2013 01:04 PM
الحمد لله. الحمد لله. الحمد لله
شباب بلادنا لسه بخير وفيهو الخير

اكثر الله من امثالكم وجزاكم الله كل الخير وفتح الله عليكم

اما الحكومه
فشكيناها لى الله


#568315 [الشايل المنقة]
3.00/5 (5 صوت)

01-26-2013 01:03 PM
...كل الاقتراحات ح تقول المبلغ ما تشمو الحكومة ولا الصحة ولا إدارة المستشفى ,وعليه اقترح فتح حساب فى بنك فى لندن , وتكوين قروب انجليزى أصلى _ زى قبل 1955 عندنا_ يعنى ما انجليزى من اصل باكستانى ولا فلسطينى ولا حتى سودانى ,ويكون مسيحى , يقوموا بكل العمليات حتى تركيب الغرف,,وياخذوا اتعابهم على داير الجنية الاسترلينى او اليورو,ويركبوا خط هيثرو ويمشوا لا اهلهم ,,بعد التركيب إن شاء الله الحكومة تجى تكسرها ,بس دى الطريقة , غير كدة يكون مجرد حرث فى النهر..!!


#568309 [ابوبكر]
5.00/5 (1 صوت)

01-26-2013 12:59 PM
لله دركم من شباب ... بارك الله لكم في أعماركم ... وانتم الشمعة المضيئة في ظلام هذا الزمن الغابر... يفتح حساب في أحدى البنوك بأي مسمى ترونه حتى نستطيع نحن الذين في الخارج ان نساهم فيه . نسأل الله العلي القدير أن يجعل ذلك في موازين حسناتكم .. والله لقد اثلجتم صدورنا .


#568305 [abdo]
5.00/5 (1 صوت)

01-26-2013 12:54 PM
والله يا استاذ دى الحاجه الوحيده البتخليك تسيب خط هيثرو شويه وتركز معانا فى مشروع الشباب ديل
وصلا يا استاذ لو الحكومه ختت يدها فى المشروع ده اقنع من قرشا يجيك ...اقترح بان يشترو الجهاز المحتاجين ليهو ويختوه فى عيادة طبيب يتبرع بالاشراف (لو مشى مستشفى الرسوم محمداهو ) والتبرعات تتواصل بنفس الطريقه باشراف نفس الشباب بس نصيحه ابعدو الحكومه من الموضوع ده .


#568304 [عبد المغيث ابو شيخة]
5.00/5 (1 صوت)

01-26-2013 12:54 PM
الاستاذ الفاتح جبرا انا احد قراء عمودك - واقتراحي لك ان تتبنى هذا المشروع بنفسك ولثقتنا فيك كما وثق فيك هؤلاء الشباب ولاهتزاز ثقتنا في الحكومة نرجو ان تضع لنا تصور وبرمجة مكتملة الاركان لايصال ما يمكن ان نساهم به نحن في دول المهجر ولو كان بمعدل واحد ريال في اليوم نحن في المملكة السعودية نربو على اثنين مليون يمكن 2 مليون ريال يوميا تعادل 3 مليار جنيه سوداني - تصور هذا المبلغ - واستنفر كل من له قلب رحيم واعانك الله وانسى خط هيرثوووووووالعند النايم العام وليس النائب !!!


ردود على عبد المغيث ابو شيخة
United States [mansour] 01-26-2013 02:54 PM
اوعي يسمعوك ناس الحكومه يقوموا يفكروا ليكم في رسوم ماتخلصوا منها لو قامت الساعه


#568303 [ابو اليسر]
5.00/5 (3 صوت)

01-26-2013 12:52 PM
انا شخصيا افتح التبرع واعوذ بالله من انا بمبلغ نصف مليون بالقديم بس وروني اديها لمنو


#568295 [رشاد عباس]
5.00/5 (1 صوت)

01-26-2013 12:46 PM
انا راي يا استاذ يتم فتح حساب باحد البنوك ويكون توقيع الصرف منه لك ولاحد الشباب ويتم التنسيق من طرفكم مع احد الاطباء الثقة لترتيب امر شراء اللازم وما شرط يكون متواجد بالسودان ممكن اكون مقيم خارجه عشان الخيارات عنده بتكون اكتر وطبعا لازم يكون في تنسيق مع الجماعة الماكلين قروشنا (تخش عليهم بالساحق والماحق انشاء الله) عشان تسهيل الاجراءات والجمارك وكده


#568294 [صديق الكندى]
5.00/5 (1 صوت)

01-26-2013 12:45 PM
استاذى العزيز جبرة تحياتى العزيزة لك والتجلة والاحترام وتعظيم سلام لهولاء الشباب ونسأل الله ان يجعلهم دائما من الذين خصاهم الله بقضاء حوائج الناس عليه ان يرسلوا لنا رقم جوال ورقم الحساب حتى يتسنى لنا مساعدتهم وسوف نقوم بجمع التبرعات من المعارف والاصدقاء وكيفية ارسالها بطريقة رسمية ونسال الله التوفيق
مع خالص تحياتى


#568293 [ابو مريم]
5.00/5 (1 صوت)

01-26-2013 12:45 PM
شعب عظيم وشباب اسال الله ان يكون فى ميزان حسناتهم فى يوم لاينفع مال ولا بنون الا من اتى الله بقلب سليم .... أين البروف مامون حميدة من هذا ... الذين يكنسون الذهب والفضة


#568289 [badreldin magdi]
5.00/5 (1 صوت)

01-26-2013 12:43 PM
في البدء والله عيناي تزرف وانا اقراء هذا العمود ز حقيقة انا الان مشتت وما اقدر اكتب اي شي الشي الوحيد ورونا رقم الحساب وانا معي مجموعة من الاصدقاء الذين نظن فيهم الخير الكثير سوف نساعد بشي مقدر . والله يجازي الحكومة بقدر ما عملت في خلق الله


#568288 [khalid kisha]
5.00/5 (2 صوت)

01-26-2013 12:42 PM
1/ يفتحو حساب في بنك
2/ يعملو تحويل رصيد وتحديد ارقام لاستقبال التبرعات
3/ يحددو مكان لاستقبال التبرعات العينية
4/ يعملو تصور مالي وفني للمشروع ويتصلو برجال الخير وسفارات دول الخليج مثلا
5/ يجب ان لا تتدخل الحكومة في هذا العمل باي شكل من الاشكال خاصة في استلام التبرعات ايا كانت
7/ يجب ان تدعموهم بالاعلان استاذ جبرة بعلاقاتكم الاعلامية

ربنا يوفقكم لعمل الخير


ردود على khalid kisha
United States [باختصار..] 01-26-2013 08:12 PM
.. المختصر المقيد..

مع مقترح خالد..

وهذه أرقام معتمدة بتحويل الرصيد...

تعلن في عمود الأستاذ جبرا..

والباقي كما ذكرت..


#568286 [يحيي العدل]
5.00/5 (1 صوت)

01-26-2013 12:42 PM
اللهم لك الحمد والشكر
اللهم وفق هؤلاء الشباب

أنا واحد من كثر نود الانضمام لهؤلاء الشباب رغم شيبي .

أقترح لجنة من :

جبرا
الطاهر ساتي
برقاوي
عووضة
شريفة شرف الدين
القراي
فيصل محمد صالح

مهمة هؤلاء الشرفاء الاعلاميين تحديد خط سير التنفيذ


ردود على يحيي العدل
United States [kuwal] 01-26-2013 06:06 PM
المجموعة دي لو قدرت لميتا مفروض يقوموا باسقاط الحكومة وبالتالي يكونوا حلو مشكلة كل السودان مش الاطفال بس .؟؟

United States [الحسن] 01-26-2013 02:42 PM
باختصار كدة كل كارهى الكيزان


#568274 [اول متبرع]
3.50/5 (3 صوت)

01-26-2013 12:30 PM
السلام عليكم استاذنا الفاتح جبرة..انا عايز اكون اول متبرع ..عليك الله بس ادينا العنوان والتلفون بتاعكم..انا مقيم فى انجلترا لكن عندى زول بوصل ليكم القروش لغاية عندكم ان شاء الله


#568272 [kkk]
1.00/5 (1 صوت)

01-26-2013 12:29 PM
بصراحة كدة انت وشبابك ديل ما عندكم وموضوع
مسؤولين الحكومة يتمتعوا بقروش الاطفال والايتام وينغنغوا انتو دجايرنانا نعمل غرفة عناية للاطفال وهم ذاتهم بخلوكم تعملوها وزارة الصحة بتعمل فى ايه وبعدين المنااااااااااضل ابو قردة ما قال كان متمرد علشان مشكلة الوطن والمواطنين اها بقى وزير عمل شنوا وافضليته على الكيزان شنو الشعب السودانى يموت واطفاله المساكين ولدوا ليموتوا والشعب لا بد ان يكون فقيرا لان الفقراء يدخلون الجنة او كما قال عادل امام


ردود على kkk
United States [ساجي] 01-26-2013 04:25 PM
يازول لوقعدنا في انتظار الحكومة تفوت!!
تكون كل الشفع شبعت موت!!!
ولوقادرين ماجلسنا عيالنا تموت!!
ولا الراجنو بعدم اخير من احزاب التوت....!!!
خلينا نلم بعضنا ونسوي شي بدلا الوقوف ذي حمار الكوت!!!
ومافي زول بيكتل المستقبل ويقول انتظروا الحكومه تفوت!!
وقلعه ماهوسر.. فشلنا ولامن يجي يومه خلينا النزرع القوت!!
وننقز كمين نفس يمكن يكون فيهم ودطحويه وودقنه وحتي الحوت!!
واقلو العمل.. اخير من الشراكه بوجوم في قلوب بتموت !!!
ولوعندك عيال الزعل اقلو.. وكبيدك علي الجنيات اكيد مهرود!!!
ونحنه بالقروش مامنردجميل ولاشكر لينا.. بس خجل يوم نلاقي الموت!!
نقول وله قصرنا وخفنا وفشلنا لكن كنا دايمن اصحاب سبق ممدود!!
مدينا يدينا وكفينا الدمع... وانت العليم بالجود!!!
واقترح الحل المعقول... والتغيير طريق منشود!!!!
مامنقدر ومالازم نقيف ننتظر وجنياتنا الصغار يازول... بتممممممممممممممممممممممموتتتتتتتتتتتتتتتتت!!!!!!!!!!!!!!!!!!


#568271 [ود الخضر]
5.00/5 (1 صوت)

01-26-2013 12:28 PM
ياهو الكلام التمام سيبكم من منتظرين جهات رسميه و معارضه لتحسين الحال هيا استنفرو كل الخيرين و ياريت استاذنا الفاضل تتبني هذا العمل الانساني الضخم و تكون المشرف عليه و يتم تنظيم ادارة من الشرفاء الصادقين امثالكم كثر حتي نساهم بتوفيق من الله من ازالة الم من طفل او شيخ او ام او اخت انه عمل عظيم و يتم فتح حساب له و مستعدين للمساهمه ووضع الدعوات الاستنفاريه التي تشحذ الهم مثل جنيه لانقاذ اخيك جنيه لانقاذ طفل .. الخ


#568270 [ودشريف]
5.00/5 (2 صوت)

01-26-2013 12:28 PM
لهم ولك التحية الاستاذ الفاتح جبرة حقيقة عمل يعبر عن انه لسة البلد بخير وفيها شباب يسعد ويشرف جد ده عمل اكثر من رائع ويجسد كل معانى الانسانية ونشكرهم عليه ونشد على ايديهم وللاامانة ياستاذ العمل الذى يقوم به هذا الشباب الدولة رغم انه ده واجبها وهى مقصرة تب تقصير شديييد المشكلة ياستاذ انه الدولة تعرف وتقوم تضع ليهم العصي في الدولايب وتقيف ضد هذا العمل الانسانى لانه هم عندهم شباب محتاج وهو الجدير يكون محل الشباب ده وطبعا اهم شي يجمعو قروش عشان الشباب حقنهم ديل كل واحد يركب سيارة ولازم يعملو ليهم مكتب في كل مستشفى زى ناس الزكاة وكده وبعدييين يطلعو ليهم رواتب مجزية من التبرعات دى واهلنا واطفالنا المرضى الشافى هو الله ما الشغلة هى كلها هى لله ياستاذ ولا في زول عنده اعتراض انه الشفاء من الله ضبعا هم مابيعرفو انه في اسباب غايتو انا في راى نهائى ماتمشي قروش للدولة لا نثق في اى احد ينتمنى لهذه العصابة ولا حتى هئية كبار العلماء والايمة ماعندنا فيها ثقة الثقة في هولاء الشباب يعملو كيان مدنى خاص فيهم الدولة زاتها ماعايزين حتى منها اعتراف بيهم والله ياستاذ الفاتح بقينا نخاف من شي اسمو حيكومة لانه بتاكل بس مابتدى وده الاتعلمناهو من ال 24 سنة اى شى بيسوى المواطن رغم انه بيدفع ضرايب والبنعرفو انه الضرائب المفروض تتنزل للمواطن خدمات بس انحنا الدولة الوحيده البيشترى المواطن العامود والسلك والعداد وكمان بيجيب العمال من شركة الكهرباء ويفطرهم ويديهم اكرامية يومية يعنى وكذلك في الموية وكل زول يدبر راسو في الصرف الصحى وياكل نارو كان مرض عنده يتعالج ماعنده ياكل جازو براهو ولاهمها الدولة تموت ولاتعيش والمدارس الصيانة مسؤلية مجلس الاباء ووووووو قلت ليك دولتنا مابتسوى شي للمواطن وكان ملاحظ ياستاذ كل الانجازات وهمية كلو بالدين ومال الدين كبارنا قالو قاطع البركة تقول يوردوها للمستشفى والله دى بعدين تمشي في قسمة فائض الميزانية زى ماورد في عمود سابق لازم تتصفر الخزنة اوع من مستشفى ومن دولة بس الشغلة تتركوها للشباب ديل وهم الخير والبركة ونسال الله يوفقهم بس نصيحتى اذا تدخلت الدولة والمسعولييين الرماد كال حماد


#568267 [sara]
3.00/5 (2 صوت)

01-26-2013 12:26 PM
اقلك وردوها في حساب الوزير بتاع الصحة عشان يشيل الذنب بتاع الاطفال دية اقتراحي


#568259 [سوداني بيحب البلد]
5.00/5 (1 صوت)

01-26-2013 12:16 PM
ربنا يقدرنا على فعل الخير اكتر والله انهم شباب بحق وحقيقي
اقترح انشاء جعية خيرية باسم شياب شارع الحوادث وفتح حساب باسم هذه الجمعية
ثم بعد ذلك الاعلام في المواقع الاكترونية والخ من وسائل الاعلام
وجزاهم الله خيرا واتمني من الله ان ان يزيح عننا هذه الغمة وتعود بلادنا وتصبح دولة حقيقة تساعد مواطني بلد


#568258 [سوداني بيحب البلد]
0.00/5 (0 صوت)

01-26-2013 12:15 PM
ربنا يقدرنا على فعل الخير اكتر والله انهم شباب بحق وحقيقي
اقترح انشاء جعية خيرية باسم شياب شارع الحوادث وفتح حساب باسم هذه الجمعية
ثم بعد ذلك الاعلام في المواقع الاكترونية والخ من وسائل الاعلام
وجزاهم الله خيرا واتمني من الله ان ان يزيح عننا هذه الغمة وتعود بلادنا وتصبح دولة حقيقة تساعد مواطني بلد


#568257 [ياسو]
5.00/5 (1 صوت)

01-26-2013 12:15 PM
الفكرة تورى انه الشعب ده شعب كبير واصيل
الجماعة ديل يتفقوا مع شركة شركتين بتاعات اتصالات
يعملوا مكتب دعاية مبتكر للاعلان
يتفقوا مع بنك تجارى وما اكترها يفتحوا ليهم حساب
يربطوا شركة الاتصالات بى البنك بتوريد التبرعات المستلمة بواسطة الشركة للبنك
ادارة مالية
لوائح منظمة
{بجنيه انقذ مواطن من براثن الحكومة }
وبــس


#568256 [سوداني بيحب البلد]
0.00/5 (0 صوت)

01-26-2013 12:15 PM
ربنا يقدرنا على فعل الخير اكتر والله انهم شباب بحق وحقيقي
اقترح انشاء جعية خيرية باسم شياب شارع الحوادث وفتح حساب باسم هذه الجمعية
ثم بعد ذلك الاعلام في المواقع الاكترونية والخ من وسائل الاعلام
وجزاهم الله خيرا واتمني من الله ان ان يزيح عننا هذه الغمة وتعود بلادنا وتصبح دولة حقيقة تساعد مواطني بلد


#568254 [hussam tomabi]
5.00/5 (2 صوت)

01-26-2013 12:14 PM
الهم اكثر من امثالهم

لمن الواحد يشوف شباب مثل هولاء يعرف انة انسان صغير وحقير مقارنة مع عظمة البعملوة


#568252 [عبدالعظيم عبدالرحيم خميس]
5.00/5 (2 صوت)

01-26-2013 12:11 PM
اللهم اجزهم بقدر ما اعانو مرضاك واجعلهم في الجنة يارب العالمين نادرون هؤلاء الانقياء في هذا الزمن الغريب على كل حال اذا كان التفكير جعلها جمعية خيرية في العلن سيدخل اصحاب المصالح وستموت الفكرة اتركو الذين بدؤ الفكرة لانهم انقياء ولا يفكرون في مصالحهم علينا ان نبحث لهم عن دعم من انقياء امثالهم انا عن نفسي سابحث عنهم واقدم ما اممكننا الله لهم دعم


#568240 [بسام]
5.00/5 (1 صوت)

01-26-2013 11:58 AM
اول حاجة جيب موافقة من الجهات المختصة بفتح مستشفى وكده-وبعد الموافقة شوف حتفتحو وين وجيب التصديق وكده- وجمع التبرعات دي ساهلة وتكون في المرحلة الاخيرة


ردود على بسام
United States [mohamed omar] 01-26-2013 04:47 PM
انا اتبرع بصالون من منزلي

United States [بسام] 01-26-2013 03:01 PM
بسام الوهم .. إقرأ دون ان تتسرع


صفحة 2 من 2<12
الفاتح جبرا
الفاتح جبرا

مساحة اعلانية

تقييم
7.08/10 (57 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة