دي شغلانة
01-29-2013 05:15 AM

دي شغلانة

الفاتح جبرا
[email protected]

كانت الحياة تسير طبيعية في ذلك الصباح في أحد أزقة المنطقة الصناعية .. أصحاب الورش يقومون بفتح أبوابها .. وكنس ورش المكان .. بعضهم يقوم بإخراج العربات التي تحت الصيانة إلى خارج المحل وبعضهم جلس يرتشف شاي الصباح .. الجميع يقومون بإستقبال يوم جديد .. الحاجة قسمة (ست الشاي) تجلس عل (بنبر) وهي (تهبب) في كانون الشاي بعد ان قامت بترتيب المكان بعناية عندما توقفت أمامها عربة بوكس تحمل لوحات صفراء حكومية ترجل منها شخص يحمل لوحة حديدية كما لوحات (المرور) كتب عليها الرقم 512
- ده شنو يا أولادي؟
- دي حقتك إنتي يا حاجة
- سجمي جبتو ليا شاهد من هسه وقبال ما أموت؟
- يا حاجة قولي خير .. ده ما شاهد .. ده رقمك !
- رقمي ياتو إنتو كل يوم بتدونا رقم؟ قبال يومين ما مشينا عملنا الرقم الوطني القلتوهو ده .. ح تقعدو ترقمو فينا كده لمتين؟
- لا يا حاجة ده رقم تاااني .. ده رقمك إنتي .. كل ست شاي أديناها رقم بتاعا
- وتاعبين روحكم قدر ده ليي؟ حديد وزاوية وخرسانة ما تلبسونا فنايل زي بتاعين الكورة وخلاس
قام العمال في همة ونشاط في حفر حفرة تكفي لتثبيت اللوحة خلف بنبر (حاجة قسمة) مباشرة وأهالوا عليها بعض الخرسانة ثم عادوا ومعهم رئيسهم أدراجهم منطلقين بالبوكس الهيلوكس .
- شنو يا حاجة بقيتي (محطة بص) ونحنا ما عارفين؟
قالها الأسطي (عرمان) وهو يطلب منها كباية قهوته المعهودة فردت عليه وهي تقوم برفع (الكفتيرة) وإصلاح (الفحم)
- والله يا أسطي الناس ديبل بطبقوا فينا جنس نظريات .. قال شنو؟ عاوزين ينظمو الشغلانه هو عليك الله المنظم في البلد دي شنو؟
- والله يا حاجة برضو النظام حلو وبيني وبينك أنا سمعتا إنو الحكومة عاوزه تساعدكن وتنظمكن
- والله يا أسطي أنحنا أكان ما الحياة الصعبة دي ما كنا بنرضى بالمرمطة دي .. لكن الظروف

ما أن قامت حاجة قسمة في صباح اليوم التالي بتجهيز المكان للزبائن من رش (للواطة) وتوزيع للبنابر وإيقاد (للكوانين) حتي توقف بقربها (بوكس) ذو (لوحة صفراء) نزل منه شخصان يرتديان بدل سفاري (بيجية) ويضعان على عينيهما نظارات سوداء قاتمة
- (أحدهما مشيراً للعمال) : نزلو الحاجات بتاعت الحاجة دي
- (الآخر) : إذيك يا حاجة
- أهلاً يا ولدي
- بالله يا حاجة قبل ما تعملي اي حاجة لمي حاجاتك دي كوولها عشان نحنا جبنا ليكي حاجات جديدة غيرها
- (في إندهاش) : جبتوا ليا شنو؟
- جبنا ليكي كفتيرات (إستينلس إستيل) بدل كفتيراتك المكدبة دي .. وجبنا ليكي (شرقرقات) للقهوة .. وكانون بالغاز بدل الفحم الشغالة بيهو ده .. وعلب تختي فيهم الشاي والبن والنعناع وباقي (الدواء) .. وكبابي ما خمج .. الملاعق .. حتى الملاعق دي يا حاجة جبناها ليكي !!
- (وهي تقطع زغرودة أفاقت على إثرها كل المنطقة الصناعية) : الله ينصر دينكم يا ولدي .. والله دي الحكومة وللا بلاش .. والله مما شفتا علامة الصلاة دي في وشوشكم عرفتكم ناس خير سااااكت
- طيب سلموا للحاجة دي .. 2 كفتيرات 3 لتر و 3 كفتيرات لتر ونص .. شرقرقين نص لتر .. كانون غاز شعلتين .. أنبوبة غاز 12 رطل .. دستين ملاعق صغيرة .. دستة طقم علب دواء (يلتفت ناحيتها) نصرف ليكي كم كرسي يا حاجة !
- (في إرتباك) : دستة .. وللا أقول ليك خليهم تلاتة دست
بعد أن تم تسليم الحاجة (قسمة) معداتها وهي في ذهول تقدم أحدهما وهو يحمل دفتراً :
- اها يا حاجة موقعك ده رقمو 512 ودي الحاجات الإستلمتيها جيبي صباعك اليمين ده وابصمي لينا في الحتة دي
- أبصم ليك دي شنو يا ولدي أنا خريجة (الأحفاد) تربية وعلم نفس !
قامت الحاجة (قسمة) ببيع (عدتها القديمة) ودفع قسط جامعة إبنتها الكبري التي تدرس في إحدي جامعات (الفكة) ولسانها يلهج بالشكر لولاة الأمر الذين أعانوها بحسبانها تنتمي للشرائح الضعيفة التي سوف يسالهم عنها الله يوم يفر المرء من أخيه !
بعد أسبوع قبيل المغرب وبعد أن إنتهت حاجة قسمة من (رهق اليوم) وهي تلم في عدتها توقف ذات البوكس الذي يحمل لوحة حكومية صفراء ونزلت منه نفس (الوجوه) ..
- السلام عليكم
- عليكم السلام يا وليداتي
- الشغل ماشي كيف يا حاجة؟
- والله ما بطال .. كانون البوتوجاز ده سهلا علينا شوية
- (وهو يخرج من جيبه دفتراً و ينتزع منه ورقه ) : 115 ألف وأربعمية وعشرين قرش
- (في ذهول) : بتاعت شنو كماااان
- 7 في 3 دست كراسي الكرسي اليوم بي جنيه .. يعني 36 في 7 بي 252 .. وعندك الكانون وأنبوبة العاز اليوم بي 5 جنيه يعني الاسبوع بي 35 جنيه وإتنين كفتيره 3 لتر الكفتيره الواحده بي 2 جنيه في اليوم و...
ترقد الحاجة قسمة في (عنبر الحريم) بمستشفي التجاني الماحي بعد أن فقدت النطق غير أنها تستعين عوضاً عن الحديث بلغة الإشارة فتراها ترفع يدها نحو السماء وهي تمد سبابتها ثم تنزلها بصورة متكررة ... وباللجوء إلى متخصص في لغة الإشارة أفاد بأنها تقول (شكيتكم على الله) !!
كسرة :
عشان ما تقولو الفاتح جبرا ده بتاع (موبالغات) القصة دي عملوها ناس محلية (كرري) بس ما جابو (الكبابي والملاعق والكوانين) ..إكتفوا بتأجير الكراسي ... (للنساء طبعن) !!!
.. بالله عليكم دي شغلانة ؟

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)





تعليقات 34 | إهداء 0 | زيارات 8644

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#573068 [عبده الحاج حسن]
0.00/5 (0 صوت)

01-31-2013 06:13 PM
الصين شغالة في تصنيع عدادات الأكسجين ،بس الجماعة ديل محتارين إركبوها ليكم وين،


#572034 [أبو الريف]
0.00/5 (0 صوت)

01-30-2013 02:45 PM
والموقع أدوهو لـ منو ؟؟؟


#571484 [nasr]
0.00/5 (0 صوت)

01-30-2013 02:06 AM
يا أخى الفاتح أستغل موهبتك فى الكتابة الساخرة دي وأعمل ليك مسرحية كوميدية لعرضها فى المسرح وأنا أضمن ليك أنها حتكسر الدنيا


#571306 [mohammad saad]
2.50/5 (2 صوت)

01-29-2013 08:07 PM
سلام يا استاذ الفاتح
طبعاً أنا متهمك بأنك عميل متعدد الوجوه وكل يوم بتأكد لي على التهمة دي.
يعني مافي داعي تفتح عيون وعقول الجماعة ديل على مشاريع نحن آخر ما فكرنا فيها.
واحد صاحبنا بدأ في عمل بزنس يجني منه قرشين يستر بيهم حاله وما لقى غير طريقة واحدة مافي جني فكر فيه. قلت لي عمل شنو؟
جمع عدد من الصبيان الذين يقومون بغسيل العربات في الشوارع وسمى المؤسسة ياسمه وبدأ يدخل بيهم المجمعات الكبيرة السكنية والخدمية والبنوك وغيرها ويوزع عمال غسيل العربات ويرفع مطالباته آخر كل شهر للجهات المستيدة ويستلم مستخلصاته منهم وأكيد مستفيد بالهبر والصبيان برواتب شهرية منتظمة وحوافز ورعاية وشروط خدمة وزي أحسن من الزي المدرسي لمدارس فرتكان العالمية والحالة ماشة مية مية؟ !
الفكرة العملتها دي بكرة بتبقى مشروع والهيمنة تجي من الكبار وتعض أصبع الندم. اقترح تغيير سايس الفيل بتاعك دة!!!!!!!!!


ردود على mohammad saad
United States [ودالنيييييل] 01-30-2013 02:30 AM
والله يا ود سعد بالغت يغيرو عدييل________ يا خي نحن دايرين نجيب ليهو فيل هندي بدل

أفيال واو البقت طقة قديمة .... وآخر الأخبار انو الفيل الهندي ده شغلته كلها بالانترنت

وأفكاره بتجيب ليك خبر المشاريع خمسة خمسة يعني ودجبرا ملياردير أفكار في اسبوع.


#571280 [الكليس]
3.50/5 (2 صوت)

01-29-2013 07:17 PM
في كبري كوستي 13 كشك واذا جئت تسوق لوري وشاحن ماشي الغرب تعال شوف :
تدخل المرور السريع وتطلع تدخل القبانه تطلع تدخل دمغة الجريح تطلع تدخل
الزكاة تطلع تدخل ترعتي كنانه والرهد بما انها انتهت من زماااااان المهم
واحد صاحبنا بعد الكشك الــتلطاشراوي لقى اتنين عساكر فاكين العمود بيتغدو
عزموهو رفض ياكل معاهم .. سألوهو ليه ؟ قال ليهم تقومو تقولو لي ادفع دعم
غدا .. فضحك الشباب وأعفوه من رسوم دعم الولايه ..

كسره : انت ياجبره قاعد تدفع رسوم كتابة عمود ؟ اصبر بس


#571264 [صالة المغادرة]
3.50/5 (2 صوت)

01-29-2013 06:56 PM
فى واحد دينكاوى زمن السودان كان واحد مشي يجيب موية من الحفير بمنطقة مافيها مصدر مياه غير تلك الحفيرة وبعد ان قام بملء باغات الموية ظهر له خفير تلك الحفيرة وطالبه بدفع رسوم الموية فصاح الدينكاوى مندهشا وه وه وه هكومة ببيع جرجر وجرجر هذه بلغة الدينكا هى المطر الناس ديل باقى ليهم حاجة واحدة هى تركيب عدادات دفع مقدم للاكسجين ويتحكموا فى نفسنا الطالع ونازل بسلة الروح الله يغطس حجركم زى ما جهجهتو اهلنا المساكين الغلابى


#571259 [عبدالواحد المستغرب أيما إستغراب!!]
3.00/5 (2 صوت)

01-29-2013 06:52 PM
اليوم الذى لم يذكره جبرا....وفى اليوم الرابع وقفت ثلاث عربات طويله عريضه سوداء اللون وهى تحمل لوحات عليها العلم السودانى ومكتوب فيها القصر الجمهورى وترجل منها عدد من الرجال وطلبوا من الحاجه قسمه ان تسطحبهم (للخرابه) التى بالجوار فإنصاعت الحاجه الى طلبهم دون ان تدرى المصير المنتظر ودخلت بقدميها الى الخرابه!!وبعد لحظات إرتفع صوت الحاجه (عيب يا أولادى أنا ذى أمكم ..سجمى.. ياولد سيب البتاع الله يهديكم!!)..وإنطلق صوت رجالى أجش (يا حاجه هى الحكومه بتدى الناس الحاجه ببلاش.. انتى ما نصيحه؟..انتى ما شايفه الشعب السودانى ماشى كيف فى الشوارع الواحد فيهم ماشى (مفتول)ذى الكاسر عمود نص ..وكلو بتمنو يا حاجه والحكومه ما بتدى الشى ببلاش ومعليه شعيرة (الدفع والرفع)!! الحاجه بصوت خافت ومتحشرج (انتو ما قلتو هى لله هى لله)..احدهم (انتى كنت مخزنه وين يا حاجه انتى من زمن الخزعبلات دى!!.


ردود على عبدالواحد المستغرب أيما إستغراب!!
United States [أنا قالوا على شقى ومجنون] 01-29-2013 09:02 PM
أجججى يالمستغرب!!!!!


#571242 [عبد الله]
5.00/5 (1 صوت)

01-29-2013 06:23 PM
انا لا استغرب اى شي يصدر من هؤلاء الحرامية فقد افقدوا الدهشة دهشتها


#571192 [محمّد عمر]
0.00/5 (0 صوت)

01-29-2013 05:18 PM
والله يا أستاذ/ الفاتح قربت أسبقك في إنهاء القصة وأمد يدي وأصحي الحاجة دي من حلمها الجميل دا !! !
لينا وليكم وليهم (ستات الشاي موش ناس اللوحة الصفراء - ديل عليهم الله) الله يا أهل الله


#571162 [راشد راشد]
5.00/5 (1 صوت)

01-29-2013 04:35 PM
ارجو يا أستاذ الفاتح أن تكتب لنا عن موضوع الكشك العملوهو ناس هيئة الحج والعمرة وقالو دا مجسم للكعبة الناس تجي تعمل رخصة انهم بيعرفو يحجوا وكمان لو تموهو لينا باكشاك مسوواك شرعي و احرام شرعي ... يعني تكون زي مدارس تعليم قيادة السيارات ..بعد التعلم تمشي تمتحن ويدوك. رخصة قيادة.. وعقبال رسوم الصﻻة في المساجد. ويكون ناس المحليات كملوا الناقصة.


#571152 [aaa]
5.00/5 (1 صوت)

01-29-2013 04:18 PM
والسرير فى مستشفى التجانى الماحى إيجار زى الكراسى ولاكيف ؟


#571135 [مستغرب]
0.00/5 (0 صوت)

01-29-2013 03:56 PM
- الكلام في تعين ناس وبوكس، وطبعا حق بنزين وبيع الفائض منه لمن يسوق البوكس وجماعته، ده غير ان البوكس خسران يحتاج لاسبير مع تصليح القديم وبيع الاسبير الجديد والساقية مدورة والجدادة تبيض ذهبا،،، واصبح كوم الفساد يمشي على قدمين ،،،،، ده كوم
الكوم التاني كويس جدا ان كل يوم من ايام الظلم تنضم مجموعة لصفوف محاربة هذا النظام، اذا ذهبت هذه المرأة الُمكافحة الى مستشفي التجاني الماحي (عافاها الله) فالأخريات سيعرفن أخذ حقهن وبكل السبل وسوف ينظمن أنفسهن بشتي الطرق لأن أكل العيش دونه المهج،، وهذا اصل الحكاية،،، ولأن الاقتصاد وتبعاته ينعكس على السياسة وليس العكس فتتعري كل الأكاذيب السياسية في تخدير الناس بالكذب والإفك فيما يقال من افواه ساستهم.
على كل مع رفع الاصبع للشكية لله تعالي، فالننحني على الأرض لالتقاط الحجاره بهذه الاصابع فهو سلاحنا الوحيد.


#571092 [koko]
0.00/5 (0 صوت)

01-29-2013 02:58 PM
احد ابتلاءاتنا فى السوءدان هى المحليات ... اللهم اكفناهم بما شئت وانت الكافى


#571052 [زيزو]
0.00/5 (0 صوت)

01-29-2013 02:18 PM
ونحنا زااااتنا شكيناهم على الله....


ويديك العافية.. يا جبرا..


#571010 [اوهاج]
0.00/5 (0 صوت)

01-29-2013 01:28 PM
الله يجازيك يل جبرا القسمة القسمها ربنا لقسمة عرفناها قعدت اضحك واضحك لاحدى ما اغرورقت عيناى بالدمع السخين لكن وقعت فى مطب ولا خط هيثرو بتاعك زملاء العمل من الهند والفلبين وباكستان ومصر عايزين يعرفوا الحكاية اشرحها كيف اترجمها كيف ما عرفت والله على كل حال كل شىء قسمة ونصيب وعليه اتخذنا قرارنا بعد قرات اى مقال لك فى حالة حضور بتوع شرق اسيا على فكرة ذكرتنا بواحدة فنانة اسمها قسمة وين راحت دى ؟


ردود على اوهاج
United States [واحد تانى] 01-29-2013 04:04 PM
قسمة ....شغالة حنانة..


#570978 [ود توتي]
0.00/5 (0 صوت)

01-29-2013 12:52 PM
يعني فيها شنو لو اجروا ليها الكراسي يعني عايز الناس تتفرشخ في الواطه ساي يا جبرا


#570924 [اب كرش]
4.50/5 (3 صوت)

01-29-2013 11:58 AM
شوف دى ياالفاتح.. ناس القضائية كمان . واحد اخوى اتسرقت منو كل الاوراق الثبوتية بتاعتو وبتاعت بناتو شهادات الميلاد . الجنسية...كل شئ وماعندو اثبات انو ديل بناتو ..مشى المحكمةبتاعت ام درمان عشان يطلع بدل فاقد.. طالبوه بى شاهدين عدلين..ساهلة دى لقاهم جاهزين برة ومستعدين للحليفة لكن شوف صورة القسم دى(اقسم بالله العظيم اننى رزقت من زوجتى امنة بهاتين البنتين على فراش الزوجية والله على مااقول شهيد)...وطبعا ده بعد دفع الرسوم القضائية وحق الاتنين الشهدو معاهو...

قال محلية قال

ديل فضل ليهم يشيلو مننا رسوم وضريبة للنكاح .. وطبعا ديل مكلفة للشباب..لكن بيستفدوا منه الناس الكبار زينا كده.

وان خايف الناس يقومو يعملوها لسد العجز للموازنة.

قال خميس قال


#570879 [مدحت عروة]
5.00/5 (3 صوت)

01-29-2013 11:23 AM
طيب ما يعملوا زقاق زى ابوصليب ويجمعوا منه القروش ما اصلا الشباب والشابات مفلسين وما لاقين عرس واهو كله يمشى لدعم شرع الله!!!!
زى شنق ناس العملة!!!
والفصل للصالح العام!!!
والفساد المالى والادارى لزوم التمكين طبعا!!!!
ما كله لتمكين شرع الله!!!
اها ونسيت ممكن يعملوا بارات اسلامية لدعم شرع الله!!!!
ناس الحركة الاسلاموية انا غايتو ما شفت ناس زيهم وياريت لو الانتفاضة اتاخرت شوية ايام نميرى لحدى ما يرجع من امريكا وعمل فيهم مثل ما عمل فى الشيوعيين ايام هاشم العطا!!!!!!


#570876 [المغربي]
5.00/5 (2 صوت)

01-29-2013 11:18 AM
لهن الله .


#570866 [kayletoud]
5.00/5 (2 صوت)

01-29-2013 11:12 AM
حسبهم الله ونعم الوكيل !!!


#570811 [محجوب عبد المنعم حسن معني]
5.00/5 (3 صوت)

01-29-2013 10:35 AM
سلام يا خال من على البعد
والله ضحك مبالغة من الصباح، وجد شر البلية ما يضحك، ياخي انت الوحيد المهون علينا المصائب ، اضحك الله سنك، اتخيل ده في كرري مع حجة قسمة، طيب ناس منال في نمرة اثنين يا ربي حسابها حا يكون كم.
( الرقم 512
- ده شنو يا أولادي؟
- دي حقتك إنتي يا حاجة
- سجمي جبتو ليا شاهد من هسه وقبال ما أموت؟)
تعرف الاربعة اسطر ده براها ، في ناس من الضحك والله كان مافي حمام قريب(اعزكم الله) الا يشيلو شيلتهم. وتسلم يا خال.
راجين موضوع شباب اولاد الحوادث يا خال، بالله اسرع عشان الموضوع ده ما يموت ونحنا جاهزين بس انت ابدأ


#570801 [حسن]
5.00/5 (2 صوت)

01-29-2013 10:32 AM
محظوظة الحاجة قسمة وجدت لها مكان في مستشفي التجاني الماحي
في كثير لافات في الشارع ... ورافعات اصابعهن الي اعلا
الشكوي ليك يا رب

والخط ما منو اي خبر .... و مافي مسئول يهبب ليك يا جبرا


#570782 [awad]
5.00/5 (3 صوت)

01-29-2013 10:16 AM
والله ياجبرة أهل الدين ديل(طبعن أهله)حيرونابس ياجبرة ديل بأى وجه يقابلوا ربهم- ياأخى جننوا الناس وطلعوا زيتهم لو بقى فى الناس زيت.بس المحيرنى الكيزان ديل الشعب ده عمل ليهم شنو ينتقموا منه بهذه الصورة والمصيبة ليتهم بيأكلوا حق الأغنياء حقارتهم فى الضعفاء ونسأل الله ونرفع سبابتنا ونرفع أصواتنا للسميع العليم أن يأخذ كل الكيزان من بشيرهم لأصغر دلدول فيهم يأخذهم أخذ عزيز قوى مقتدر(امين).


#570734 [صلاح مصطفي أحمد]
5.00/5 (1 صوت)

01-29-2013 09:39 AM
الأخ الفاتح جبرا والله ضحكت جنس ضحك لأنو كنت متصور هذه النهاية لكن قلت ياولد عسس وعلا يخيب ظني لية ما اكون متفائل لانو أمة محمد مازالت بخيره ( وبصراحة وبدون مبالغة دي تصلح مسرحية أوفلم ) مما يمكن الحاجة دي وبنتها الطالبة من الوفاء بما يطلب منهما,


#570730 [محمود عطية الله]
4.63/5 (4 صوت)

01-29-2013 09:38 AM
ههههههههههاى..والله يا جبرا قطعت مصارينى بالشبال بتاع الحاجة قسمة فى مستشفى التجانى الماحى

طيب هاااك دى:

سودانيين إتقبضوا فى الكشة فى السعودية واحد منهم أبكم..ودوهم القسم....العسكرى بيسألوا عن أوراقه الثبوتية فهم إنو مامعاه أى أوراق..قال لى واحد أسألو كيف جاء هنا..الزول عمل ليهو إشارات الأبكم فهم قصده... قام حرك إيديهو اليمين جهة الشمال والشمال جهة اليمين بحركات متتاليه.

العسكرى سأل المترجم...ويش يقصد..قاليهو ..قال جا عوم!!!


#570729 [karlos]
5.00/5 (2 صوت)

01-29-2013 09:34 AM
اتوقع اى حاجة من الحكومة بعد ذهاب البترول فى خبر كان


#570694 [abakora]
5.00/5 (2 صوت)

01-29-2013 09:04 AM
والله ياأستاذ الفاتح في البلد دي اي حاجه متوقعه والله ممكن الحكومه تعمل كده لأنه استثمار في نظرهم وماهماهم ست الشاي او غسال العربات في النهايه تدفع وبس


ردود على abakora
United States [بسام] 01-29-2013 11:25 AM
يااخي كيف تقول ممكن الحكومة تعمل كده؟ فعلا ده الحاصل الناس شغالين بالاجار من الحكومة
ويوميا بيدفعو للمحليات - اصحو يا ناس


#570692 [وكتين يضيع عرق الجباه الشم شمار فى مرقه]
5.00/5 (11 صوت)

01-29-2013 09:02 AM
لا إلله إلا أنت سبحانك إنى كنت من الظالمين
اللهم صل على سيدنا محمد عبدك ورسولك وخليلك وحبيبك
صلاةً نرقى بها مراقي الإخلاص وننال بها غاية الإختصاص
وسلم تسليما عدد ما أحاط به علمك وأحصاه كتابك
كلما ذكرك الذاكرون وغفل عن ذكرك وذكره الغافلون .

اللهم ياعدل ياصمد .. اللهم ياعزيز ياجبار
إليك المشتكى ولا حوله ولا قوة إلا بالله
اللهم عليك بهم ظلموا عبادك فى أرضك
اللهم حاربوا عبادك فى أرزاقهم
ربى ياقوى يامتين يامنتقم ياجبار
ربى عليك بهم بجاه عظمتك ومحبة نبييك محمد
وحملت عرشك وملائكتك الكرام وبكل الصالحين فى ملكوتك
ياجبار السموات السبع والأرضين السبع ... ياالله ... ياالله ... ياالله .
إليك المشتكى ولا حوله ولا قوة إلا بك .


ردود على وكتين يضيع عرق الجباه الشم شمار فى مرقه
United States [وكتين يضيع عرق الجباه الشم شمار فى مرقه] 01-29-2013 09:31 PM
الاخ: [khalifaalsudani]
تسلم على التوضيح وغلطه مطبعيه كبيره نستغفر الله العظيم
لكن يااخوى انتا قاعد تعاين لجوهر الامر وله بتدقق فى تصحيح الكلمات
دى مثل الرجل الشيعى اللى سئل امام الحرم عن حكم قتل ذبابه فى الحرم فقال الشيخ له عجبا لكم يااهل ... تقتلون ابن بنت رسول الله وتسئلون عن حكم قتل الذباب
وعلى العموم هفوه مطبعيه ونستغفر الله العظيم وتسلم كتير وعاين برضو لجوهر الاشياء وجل من لايسهو .

United States [khalifaalsudani] 01-29-2013 07:23 PM
بدأت دعاك ب( لا الله سبحانك إني كنت من الظالمين يا أخي أستغفر الله فالصحيح لا إله - علي كل حال انا اعتبر الموضوع غلطه في الطباعة فاستغفر ربك


#570684 [بتاع جرجرة]
2.00/5 (5 صوت)

01-29-2013 08:47 AM
يا أستاذ حاجتك دي طماعة جدا، معقول 3 دست، عندها عقد زواج ولا ّ جايبة ترباس ؟؟ !! يعنى كان نص دستة كفاية عليها، وبما أن معظم قروش الايجار كانت علي الكراسي يبقى تتحمل غلطتة طمعها، هي ما عارفة أنو (الملح) الكتير بيزيد الضغط.


#570675 [بلال]
5.00/5 (1 صوت)

01-29-2013 08:25 AM
يا استاذ الفاتح مقالك رائع بس يعني ايه (بنتها تدرس في إحدي جامعات (الفكة)؟؟؟؟؟؟؟؟؟؟


ردود على بلال
United States [المتفائلة جدا] 01-29-2013 05:13 PM
جامعات اللا فتات بدل الفكة رايك شنو ..أما موضوع رقم ست الشاى والله أنا فى دى ما كنت متفائلة عرفت إنه وراه مصيائب .زمن نوع ناس حق النفايات وضرائب وزكاة وهلم جرا .. الله يلطف بستات الشاى والشعب ..الما فضل ليهم إلا يطلعوا روحه ..الله تطلع روحهم ..المن أين أتى هؤلاء ديل مابشر عاديين ديل معجونين بموية شواطين أعوذ بالله..


#570661 [jangy]
5.00/5 (2 صوت)

01-29-2013 07:57 AM
انت زاتك اخوى الفاتح حيطلعو ليك دفتر مش الدفتر البالى بالك لكن دفتر عديل كدى يلمو فية افكارك المهببة دى ويودوك فى ستين


#570646 [صدقونى]
5.00/5 (5 صوت)

01-29-2013 07:06 AM
ما تقول محلية
قول مرية
حنضلية
سرقتية
همبتية


#570644 [وكتين يضيع عرق الجباه الشم شمار فى مرقه]
4.97/5 (6 صوت)

01-29-2013 07:01 AM
لا حوله ولا قوة إلابالله - شكيناكم للقوى المتين .. شكيناكم للحى الذى لايموت
شكيناكم للعدل الذى لايظلم عنده أحد , ياديان السموات والارض عليك بهم
يــارب فرجك ... يارب يارب يارب ...اللهم إليك المشتكى وأنت أعلم بالحال .


#570638 [Elamein Hussein]
3.00/5 (2 صوت)

01-29-2013 06:15 AM
اخباره زى باقى اخبار ابقناية كله تحت الغطاء


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة