المقالات
منوعات

02-01-2013 01:09 AM

• أمدرمان مدينة متميزة ، شكل انصهار القبائل المتنوعة فيها لوحة رائعة الجمال والتفرد ،ولذلك نجد إعتزاز سكانها بها عميق وحبهم لها متأصل فى نفوسهم.
• ولكن هذا الأعتزاز في كثير من الأحيان يفوق حد الخيال ويبدو أقرب الى الأستعلاء والإستهبال على الآخرين.ولك أن تعلم عزيزئ القارئ أن هناك بعض النوادي الأجتماعية فى أمدرمان لاتقبل إلا الذين ولد آبائهم في أمدرمان. والمضحك" حد التدحرج" على الأرض عندما يدور حديث عن الخرطوم أو بحري ينبري لك أحد أبناء امدرمان رضي الله عنهم قائلا (الخرطوم دي لحم راس) .
• واللوبي الأمدرماني المسيطر على وسائل الاعلام القومية والخاصة ، جعل من امدرمان مدينة فاضلة ،ورسخ عبر عملية التكرار والبرامج المملة أحجية أن الناس قسمين أمدرمانيون ـ وعشاق أمدرمان.و أصبحنا نتأفف من قصص حسين خوجلي المصحوبة بغَرودة العيون وسماجة خالد عز الدين..
• ولان التاريخ لايكذب فيستحيل أنت تكون أمدرمان الحضارة وهي التي شيدها المهدي ودراويشه، وفي جنوب الخرطوم تقبع حضارة سوبا العتيقة. وسنار وما أدراك ما حضارة سنار. وكرمة وما أدراك ما حضارة كرمة .
• وفي مجال الفن يحاول اللوبي الامدرماني الغير مركزي أن يصور لنا أن الفن والطرب والكورة صناعة أمدرمانية ، ولأن عثمان حسين أعتلى سدة الفن فى البلاد تجد شخص مهبوش مثل حسين خوجلي بأستعلائه الأهوج يقول لك " عثمان تربية أمدرمان"
• وحتي أغنية الوسط يحاولوا أختصارها عليهم بتسميتها الأغنية الامدرمانية.
• وانا شخصيا أعشق الأغاني الكردفانية وأبذل جهدا للحصول عليها لأنها غير متوفرة فى التلفزيون القومي.
• وأصبح العقل الجمعي السوداني يؤمن أن أمدرمان مدينة الطرب والفن رغما عن انف الكاشف وعثمان حسين وحتى فرفور والحوت.
• وتجد المطربين والأدباء الذين ولدوا لآباء غير أمدرمانيين تجدهم يفرضون أنفسهم على وسائل الاعلام عبر الأنتشار الجماهيري فى الحفلات .
• ومبدع مثل الهادي حامد خطأه الكبير أنه لم يولد أمدرمانيا وهو صاحب مدرسة متميزة فى الفن السوداني، ومبدعي ولاية الجمال مدني عليهم الجمع والتمام وأخذ التابعية الأمدرمانية .
• الطريقة اللامركزية التي يعمل بها اللوبي ساهمت كثيرا في جعل التفوق الامدرماني الكاذب من المسلمات في ذهنية السوداني البسيط
• لاضير فى أن يحب أبناء أمدرمان مدينتهم، ولكن فرض ذلك على الآخرين عبر الوسائل القومية لن يجدي نفعا ،وهو أمر غير مقبول، ويجب على التلفزيون القومي أن يمنح الفرص للمدن بالتساوي بالرغم من صعوبة هذا الأمر نسبة للوجود الكثيف للأمدرمانيون داخل الحيشان التلاتة.

shosh3@hotmail.com

---------------
* إعلامي مقيم بالدوحة


تعليقات 39 | إهداء 0 | زيارات 4836

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#589678 [ود العمده]
0.00/5 (0 صوت)

02-19-2013 07:56 PM
معليش يا أم درمان أتحملي فأنت الأم الرؤوم لكل من كتب عنك . فلقد تعودنا منك دائما الصفح والعفو عن كل من أساء لك
فأنت في منزلة هيهات أن يدركوها ورحم الله عمنا فقد كان يقول دائما أم درمان يا القمت بجهلك لميتي الغريب ورميتي أهلك ..


#589019 [أم درمانية......... وأفتخر]
0.00/5 (0 صوت)

02-19-2013 07:56 AM
سلام للجميع
اولا الاخ كاتب المقال تحدث عن عصبية اهل امدرمان ومقاله عبارة عن عصبية و جهوية تطلع من نطاق الطرح العادي لكلام زول [ ممغوص وكاره] يا أخ انت براك في اول المقال اعترفت بعضمة لسانك أقصد عضمة قلمك وقلت [أمدرمان مدينة متميزة ، شكل انصهار القبائل المتنوعة فيها لوحة رائعة الجمال
،ولذلك نجد إعتزاز سكانها بها عميق وحبهم لها متأصل فى نفوسهم]


ما دام انت عارف دا انصهار قبائل يعني عرفت السبب الحقيقي لظهور امدرمان وتميزها على جميع المدن وبالتالي تميز انسانها الذي لا ينتمي لقبيلة ولا عرق قدر انتمائه لمدينته الحبيبة - وبعدين القبائل المتنوعة ما هي الا تمثيل للسودان في كل جهاته – امدرمان منذ اكثر من مئة سنة احتضنت اهل جنوب السودان ويجانبهم اهل الغرب و واهل الشمال وقليل من اهلنا في الشرق لانهم بطبعهم لايحبون العيش بعيد عن موطنهم الاصلي وكثير من الاجانب هنود –اغريق- مصريين –شوام . بالتالي المفروض امدرمان هي كل اهل السودان دون غيرة او حسد او شتيمة وقلة قيمة .
ليه مستغرب انه الفن والاعلام كلو لامدرمان ؟ المفروض كدا عشان حجم انتاج ناس امدرمان الادبي الغزير – كدي بالله اتخيلوا معاي لانو لو سحبنا الاغاني الامدرمانية من الإعلام حا يحصل شنو؟؟؟؟ طبعا تكون الإذاعة والتلفزيون نشرة اخبار – أحسن يعلنوا الحداد عديل-
نحن في امدرمان ما متميزين وبس نحن التميز ذاااااتو- افراحنا غير واتراحنا غير وملاحنا غير حتى كلامنا غير وكلكم بتتكلموا لهجتنا – بعد تتعلموها- ، وبعد دا بنحب كل جميل مدن امدرمان الاخرى وحتى ما خارج السودان ودا من اسرار التطور الاعتزاز بالاصل والتجاوب مع إيجابيات الآخرين.
بعدين يا ابناء المدن الاخرى حبوا مدنكم واظهروا محاسنها بدل الإساءة والعقد من ناس أمدرمان-
في الاخير انا بقترح على كاتب المقال اللآتي :
ما تسمع إذاعة
ما تشوف تلفزيون- ما تمشى اي كورة في استاد الهلال ولا المريخ – ومن الليلة ما غرضك بتاريخ من حكموا السودان- لامهدي لا ازهري لا نميري لا الصادق المهدي – والفن والغناء قاطعوا


#586005 [بابو]
5.00/5 (1 صوت)

02-15-2013 08:05 PM
واحد زمان قال امدرمان دي فيها شنو غير القبطة والمسلمين العبطة !!!


ردود على بابو
United States [هناء] 02-19-2013 08:00 AM
إنشالله تكبر يا بابو عشان تعرف


#584555 [أمدرمانية ....... وأفتخر]
5.00/5 (1 صوت)

02-14-2013 08:05 AM
سلام للجميع
اولا الاخ كاتب المقال تحدث عن عصبية اهل امدرمان ومقاله عبارة عن عصبية و جهوية تطلع من نطاق الطرح العادي لكلام زول [ ممغوص وكاره] يا أخ انت براك في اول المقال اعترفت بعضمة لسانك أقصد عضمة قلمك وقلت [أمدرمان مدينة متميزة ، شكل انصهار القبائل المتنوعة فيها لوحة رائعة الجمال
،ولذلك نجد إعتزاز سكانها بها عميق وحبهم لها متأصل فى نفوسهم]


ما دام انت عارف دا انصهار قبائل يعني عرفت السبب الحقيقي لظهور امدرمان وتميزها على جميع المدن وبالتالي تميز انسانها الذي لا ينتمي لقبيلة ولا عرق قدر انتمائه لمدينته الحبيبة - وبعدين القبائل ما هي الا تمثيل للسودان في كل جهاته – امدرمان منذ اكثر من مئة سنة احتضنت اهل جنوب السودان ويجانبهم اهل الغرب و واهل الشمال وقليل من اهلنا في الشرق لانهم بطبعهم لايحبون العيش بعيد عن موطنهم الاصلي وكثير من الاجانب هنود –اغريق- مصريين –شوام . بالتالي المفروض امدرمان هي كل اهل السودان دون غيرة او حسد او شتيمة وقلة قيمة .
ليه مستغرب انه الفن والاعلام كلو لامدرمان ؟ المفروض كدا عشان حجم انتاج ناس امدرمان الادبي الغزير – كدي بالله اتخيلوا معاي لانو لو سحبنا الاغاني الامدرمانية من الإعلام حا تكون الإذاعة والتلفزيون نشرة اخبار – أحسن يعلنوا الحداد عديل-
نحن في امدرمان ما متميزين وبس نحن التميز ذاااااتو- افراحنا غير واتراحنا غير وملاحنا غير حتى كلامنا غير و لكم بتتكلموا لهجتنا – بعد تتعلموها- ، وبعد دا بنحب كل جميل مدن امدرمان الاخرى وحتى ما خارج السودان ودا من اسرار التطور الاعتزاز بالاصل والتجاوب مع أيجابيات الغير
بعدين يا ابناء المدن الاخرى حبوا مدنكم واظهروا محاسنها بدل الإساة والعقد من ناس أمدرمان-
في الاخير انا بقترح على كاتب المقال اللآتي :
ما تسمع إذاعة
ما تشوف تلفزيون- ما تمشى اي كورة في استاد الهلال ولا المريخ – ومن الليلة ما غرضك بتاريخ من حكموا السودان- لامهدي لا ازهري لا نميري لا الصادق المهدي – والفن والغناء قاطعوا عديل لانو لو سحبنا الاغاني الامدرمانية من الإعلام حا تكون الإذاعة والتلفزوين نشرة اخبار – أحسن يعلنوا الحداد عديل


#584036 [فيصل الفاضل]
3.00/5 (3 صوت)

02-13-2013 01:41 PM
ام درمان هي فكرة قبل ان تكون مدينة .. ام درمان هي ذكرى قبل ان تكون واقعا .. ام درمان هي انموذج مثالي لكل مجتمع .. ثم يا اخوان حب المكان هو من شيم الكرام .. ولا عيب فيه ابدا .. فحبيبنا المصطفى عليه أفضل الصلاة والسلام كان دائما ما يحن لمكة مسقط راسه ومدينته رغم كل ما وجده من أهلها .. فمبالك في مدينة ام درمان التي يحب اهلها الآخرين ويجد كل قادم إليها نفسه ولا يخالط من يسكنها الاحساس بالغربة ابدا ..


#582405 [جركان فاضى]
0.00/5 (0 صوت)

02-11-2013 05:26 PM
لك ان تعلم اخى ان جميع شعراء الحقيبة ليسوا من مواليد امدرمان ماعدا سيد عبد العزيز يرحمهم الله جميعا- ثم بعد ما مات شعراء الحقيبة مات الفن والادب فى امدرمان -ما الذى تفتخر به امدرمان غير الحقيبة؟ ثم ان اساطين العلم مثل بابكر بدرى فهو من قرية الشريق بمنطقة الرباطاب والبشير الريح والمليك من رفاعة


ردود على جركان فاضى
United States [فيصل الفاضل] 02-13-2013 01:53 PM
على العكس اخي جركان فاضي فإن معظم شعراء الحقيبة من مواليد ام درمان .. ابو صلاح، العبادي، عتيق، عمر البنا، سيد عبدالعزيز، عبيد عبدالرحمن، عبدالرحمن الريح،


#582392 [جركان فاضى]
5.00/5 (1 صوت)

02-11-2013 05:14 PM
زرت الابيض مرة واحدة فى حياتى فبهرتنى حيويتها وطيبة اهلها وعراقتها فسوق ود عكيفة اكثر عراقة من زنك الطواقى فى امدرمان وفونتانا وجروبى والرديف وحى القبة والربع الثانى اكثر عراقة من احياء امدرمان ومقاهيها- لماذا غيب عننا الاعلام السودانى المحتكر امدرمانيا كل هذا الجمال؟لماذا لانعرف الابيض الجميلة الا عندما نزورها؟اما مدينة مدنى يبهرك فيها الاسلوب الحضارى الراقى اناس لماحين لكل شئ جميل-لماذا لانعرف عن مدنى عروس الجمال كل هذه الابهة؟وبوتسودان وكسلا وسنار ومدنى وعطبرة؟ واءءءءءءءءه لما اقول عطبرة-لقد اخفت اذاعة وتلفزيون امدرمان كل الجمال السودانى من خلال اذاعيين ضيقى الافق ضحلى الثقافة متعصبين لمدينة شوارعها الاكثر اتساخا على وجه الارض وتنعدم فيها ابسط متطلبات الصحة وانت تاكل فى مطاعمهما ورائحة البول تفوح حولك


#574744 [محل الطيارة بتقوم ؟]
4.00/5 (3 صوت)

02-02-2013 06:37 PM
أسة عليكم الله شفت ليكم واحد من بحري بيقول أنا ود بحري؟؟؟؟؟؟؟ ولا اولاد سنتر قلبها بقولو نحن اولاد الخرطوم ؟؟؟ زول غيركم فاكيها فى روحوا ماف ياناس امدرمان ؟؟


#574698 [واحد نسيبو من امدرمان]
0.00/5 (0 صوت)

02-02-2013 05:55 PM
يا أخوي يامجدى انا من منطقة اللخيا, لية فى شنو

واحد نسيبو من امدرمان


#574686 [كلامك ما شين يا ود الزين]
1.00/5 (1 صوت)

02-02-2013 05:36 PM
أؤيدك يا كاتب المقال جملة وتفصيلا. دي جهوية واستعلاء جديد بعض انتشار جهويات القبيلة والعرق.. كل اجزاء السودان وطن لكل سوداني. رغم انني شمالي واسكن في وسط السودان


#574571 [شطة]
4.00/5 (3 صوت)

02-02-2013 04:17 PM
غايتو عشان جنس الكلام ده الناس مكجناكم ؟ امدلرمان شنو غير الأوساخ والشوارع غير المخططة ،،،،والعطالى على الشوارع ،،،،،امدرمان مدينة بتاعت سيدي وسيدك ،.؟ اسياد وعبيد ؟ قوموا لفوا ؟ ،،، غايتو تشبكونا امدرمان امدرمان واول ما الواحد يلقى ليهو قريشات يجينا في الخرطوم ؟ والامثلة راااااااااااااااااااااااااااااقدة


#574427 [Mohd]
0.00/5 (0 صوت)

02-02-2013 02:33 PM
أمير المحسنين عبد المنعم محمد "ذاك المحسن حياه الغمام"، ولد بحي الشهداء بأم درمان، 1896-1946، عليه رحمة الله، وهذا مثال للوطنيين المحسنين، "ان الله يحب المحسنين"، شيد مدرسة وعمر مسجدا بالخرطوم علاوة على وقف عمارة البنك التجاري بشارع الجمهورية وثلاث مراكز صحية، وقائمة المحسنين تشمل على سبيل المثال أبو زيد البلك، الضو حجوج ...الخ،
1927م تبرع المحسن احمد حسن عبدالمنعم بمنزله كدار موقت للمدرسة الاهلية الوسطى وشيدت المدرسة بموقعها الحالي بتبرعات أعيان امدرمان، وثم أضيف إليها القسم الثانوي 1945، وانتقل القسم الثانوي لموقعه الحالي 1955 وتغنى بادي عليه رحمة الله بقصيدة قيلت بهذه المناسبة "في الفؤاد ترعاه العناية......، نحن للقومية النبيلة ما بندور عصبية القبيلة"..
هذا جانب من جوانب امدرمان. ....
تم اقتطاع المسجد والمختبرات العلمية والملاعب والكافيتريا من مدرسة امدرمان الأهلية الثانوية وتحويله لمبنى جامعي، تم تغيير اسم ومباني مركز صحي بالمظاهر ولكن أعيد الاسم بعد الوقفة القوية من أهل الحي، وحاولوا سرقة مدرسة الأهلية الوسطى والملعب لدرجة قيام شخص بادعاء ملكية الأرض وفشلوا بعد الوقفة القوية من أهل الحي، صحيح الاختشوا ماتوا...
تم التخلص بليل من بعض الساحات والميادين والمباني الحكومية بالبيع والتوزيع ..
"يا قطيع الضأن هل رأيتم كف عجز زيفت تاريخ امه"
وبالتأكيد كل مدينة لديها جوانب كثيرة مشرقة نتمنى أن نسمع من أهلها وكلنا أذان صاغية، ونتمنى أن نقرأ عن المبدع الراحل د. خليل عثمان عليه رحمة الله وغيره من الوطنيين الذين تركوا بصمات في ربوع الوطن.


#574036 [محجوب عبد المنعم حسن معني]
5.00/5 (2 صوت)

02-02-2013 01:09 AM
عاد ده كلام يا شاذلي الزين يا اخوي بتجيبو الكلام لنفسكم براكم
تعرف العم ابو سارة الهادي نصر الدين (المشهور با الهادي الضلالي) طلع ليهو اسبوع من المستشفى وهو الان في فترة نقاهة ونسال الله ان يمتعه بالعافية والصحة، غايتو تعرف الزول نحنا بس بنقول ليهو بتعرف في واحد اسمه شاذلي الزين، كتب في الراكوبة كلامه المسيخ ده، غايتو الله يستر عليك من رده، ممكن سبحان الله تيقى اشهر كاتب سوداني بعد ما يرد عليك الهادي، ها زول ات ماك نصيح ولا شنو في زول بقول الكلام ده عن ام در، شايف رد الاخوان والاخوات ده بس صدقني بيكون مناظر، وبعدين ارجى ناس عم شوقي بدري وبعدين بدورك يا اخوي تحدثنا ات ياللخو من وين، خلاص كملتو كل شئ جايين تفكو عقدكم فينا، زمان سينا قال الله ينعل قراية القروش ، ده كمان كان ما عرفته تبقى مصيبة كبيرة، خليتك بعافية يا اخوي ، بس عليك الله ثاني ما تجي، عشان ات اتلومته بالحيل


#573990 [سند]
0.00/5 (0 صوت)

02-01-2013 11:55 PM
تاني تجي يا شاذلي يا زين!!!!!!!


#573932 [واحد نسيبو من امدرمان]
3.00/5 (1 صوت)

02-01-2013 10:11 PM
لو داير تعرف فرق ناس أمدرمان خلى اسرة أمدرمانية يعزموك وجبة غداء عشاء الخ , وشوف طعم الاكل وشكل الاكل.

ماتشوف بيوت الجالوص دى جواها ناس دهب ,
ديل ناس بعرفو الواجب
واحد نسيبو من امدرمان


ردود على واحد نسيبو من امدرمان
United States [ود فارس] 02-02-2013 03:50 PM
يانسيبك من امدرمان انت كانت فايته فيك جوعه ولاشنو قبله نسبك ده

United States [Majdi] 02-02-2013 11:23 AM
ردك قمة في السطحية عشاء شنو يا ود الناس
انت اهلك من وين يا اخوي


#573902 [مواطن]
4.75/5 (3 صوت)

02-01-2013 09:25 PM
أمدرمان العاصمة الوطنية .. أم درمان ثورة اللواء الأبيض ومؤتمر الخريجين والأحزاب السياسية
منها :
اسماعيل الأزهري ومبارك زروق ومحمد نور الدين وعبد الخالق محجوب وصلاح أحمد ابراهيم
وشقيقته فاطمة أحمد ابراهيم وهاشم العطا وبابكر النور وجعفر نميري
هذا في السياسة
وفي الشعر: الشاعر أبو صلاح وعبد الرحمن الريح وعبيد حاج الأمين وصديق مدثر
و في الغناء : الراحل ابرهيم عوض وعبد الدافع عثمان والتاج مصطفى والجابري
وابراهيم حسين وزيدان ابراهيم وغيرهم ....
وفي الرياضة :
صديق منزول وجكسا وسانتو وعلى قاقارين ومصطفى النقر وسامي عز الدين

أم درمان تنبذ العنصرية والجهوية ... فلاداعي للمقالات التي بها رائحة الجهوية
التي فاحت بمجئ الكيزان للسلطة .... فأنا أحد أبناء أم درمان مولدا ونشأة
فليتوحد الجميع لأجل هدف واحد هو اسقاط هذه العصابة التي مزقت السودان
وللأسف بعض الكتاب يسيرون بنهجهم ..


ردود على مواطن
United States [مواطن] 02-02-2013 06:51 PM
الأخ مجدي هؤلاء الذين ذكرتهم ولدوا ونشأوا في أم درمان ... أم درمان صهرت جميع قبائل
السودان ولم تكن فيها عنصرية الا أن الكيزان هم من أيقظ الفتنة أما أنا فمن الجيل
الذي كان يمكن أن يبدع لولا مجئ هؤلاء المنافقين الى حكم السودان ...سؤال من أي
منطقة في السودان أنت ؟

United States [Majdi] 02-02-2013 11:25 AM
الناس الذكرتم ديل جاءوا بموروثاتهم من مواطنهم الاساسية لي ام در عشان كده ابدعوا
انتو الورثة للاجيال دي قدمتو شنو
ام درمان اصل العنصرية وسلطة المركز


#573832 [Zingar]
3.00/5 (3 صوت)

02-01-2013 07:20 PM
ملاحظاتى إنه فى الغربه الكراهيه معلنه لأمدرمان وأهل أمدرمان...لماذا؟


ردود على Zingar
United States [Mohd] 02-02-2013 10:32 AM
ممكن تورينا ليه يا سيد العارفين

United States [بت ملوك النيل] 02-02-2013 12:10 AM
حساااااادة بس يا اخوي.


#573821 [الصادق صديق الصادقين]
5.00/5 (5 صوت)

02-01-2013 07:02 PM
لم يفرض عليك أحد ذلك. انت من أتيت لأمدرمان وعليك أن تحترم إعتزاز أبنائها بها كما هم يحترمون إعتزاز أبناء المدن الأخرى بأقاليمهم ومدنهم. ولم يطلب أحدهم أن يلغى الفن الكردفاني من الخارطة السودانية ولا فن وثقافة أي أقليم آخر. أنا من مواليد أمدرمان في الخمسينات وأطرب وأردد اللوري حل بي دلاني في الودي، جنى الجدي الجفال ما بيحمل الهبشة، الله الليموني البرتكان الناير وغيرها. لا تدعوا الغيرة تجهز على ما تبقى من لحمة الشعب السوداني الفضل، يكفينا ما حدث من إنفصام عرى المودة بين جميع فئات الشعب السوداني القديم


#573768 [صالة المغادرة]
4.94/5 (6 صوت)

02-01-2013 05:03 PM
اقول ليك وتزعل ام درمان دى زى مسيى فى برشلونة فهى التاريخ والاصالة والتميز ولاهلها الحق فى ان يفاخروا الاخرين بها وانت كان عاجباك اى مدينة تانية مبوك وبخيت عليك نحن ام درمان دى شايفنها بعد مكة والمدينة يا خى ما ترفع كثافتك امدر اولا وثانيا وثالثا ورابعا وخامسا واحسب للصباح


#573731 [بت ملوك النيل]
5.00/5 (6 صوت)

02-01-2013 04:09 PM
امدر اماني وقبلة اماني انت جنة وداري الامين.امدر مان السياسة والرياضة والريادة والفن والادب والرقي والتماسك الاجتماعي وكل حاجة حلوة..قسما بالله انا في الغربة بعرف نسوان امدرمان والعجب العجايز منهم من لبسهم في الشارع واسلوب سلامهم..تعاشر ولأ تجاور ناس امدرمان تعرف يعني شنو اصالة وادب ورقي .ما عايزة اشير لأسر بعينها بس كل من ينتمي لامدر يمتاز بحسن الخلق..والدليل ولأ مرة طلع لينا كاتب من امدر شتم علي بحري ولأ الخرطوم ولأ نقص من شأن اي مدينة!!!


#573721 [babko]
4.94/5 (6 صوت)

02-01-2013 03:56 PM
السودان إنهار لمن حكموهو ناس من برة امدرمان , ناس حوش بانقا ,حجر الطير وحجر العسل وغيرة من الحجارة, فانتشرت المحسوبية وموالاة كل مسؤول اتى من قرية ولة حلأل لاهل حلتة، القضائية و الطاقة والامن مثالا لاحصرا, فاتو بثقافة القرية المتخلفة, شيلنى واشيلك , الواسطة واستغلال صلة القرابة, لبس البنطلون حرام ,فانتشرت القبلية بوجهها القبيح بصورة لم يسبق لها مثيل والرغبة فى الغنى والاستحواز على قطعة ارض فى الخرطوم باى وسيلة كانت وترك حياة القرية و مابها من مردود زراعى ورعوى فاصبحت الرشوة ليس عيب او حرام.

نحن فى امدرمان لانعرف القبلية ولا العرقية النتنة وعندنا الرشوة عيب وبت الجيران اختك و العجوز ابوك.
وكاتب المقال يجب ان يشكر اولاد امدرمان فالسمعة الجيدة التى يتمتع بها السودانيين في الغربة اصلها اولاد امدرمان المغتربين القدامى فنقلو ثقافة وطباع اهل امدرمان فاسسؤ السمعة الطيبة التى يعرف بها سودانيين المهجر , التاج حمد(حى الهجرة) كمال حمزة(بيت المال) احمد عوض الكريم(بيت المال) فقط كمثال.
أخى أمدرمان ليست مدينة فقط امدرمان سلوك.


ردود على babko
United States [Majdi] 02-02-2013 11:33 AM
الناس ما عاجبنك ديل (المن بره امدرمان) هم اهل السودان
وبعدين الاسماء الذكرتها جات لي امدرمان من وين ؟؟؟


#573713 [ود الحاجة]
5.00/5 (4 صوت)

02-01-2013 03:37 PM
كبر دماغك يا زول و خليك سوداني اصيل فالمجتمع الامدرماني من المفترض ان يكون انموذجا لبقية المدن و الولايات , بدلا من هذه النظرة السلبية!
لا اعتقد ان هناك غرورا من ابناء امدرمان و المشكلة هي ان البعض من ابناء المدن الاخرى يحاولون ان "يتلصقوا" في امدرمان

عزيزي الكاتب انظر الى الامور بايجابية و كن جميلا ترى الوجود جميلا


#573710 [خضر عابدين]
5.00/5 (3 صوت)

02-01-2013 03:30 PM
المشكلة اليوم المؤتمر الوطني واتباعة الحرامية امدرمان لن تجد فيها من ينخدع او ينساق بمعسول الكلام وحتي لوكان ذلك قران عديل كدة انهم اكثر الناس دفاع عن الحقوق وحق المهمشين لانهم خليط من كل ربوع السودان لن تجد اي اسرة في ام درمان من اثنية واحدة المشكل في حكومة البشكير وابو العفين وشهادة لاهل امدرمان البشكير زات نفسة قال الحمد الله انة ليس بينهم من ابناء امدرمان..!


#573706 [سند]
4.88/5 (9 صوت)

02-01-2013 03:23 PM
يا ناس امدرمان اسالكم بالله عدم الرد و المداخلة فهؤلاء الاحساس بالدونية كاتلهم .... ليه انا ما عارف فامدرمان لم تترفع يوماً و لم تدعي الصفوية المادية!!!.عمرنا ما ترفعنا فينا الوزير و كمدان الشزطة و العتالي و الترزي و النقلتي و الصرماتي و الرئيس و بياع العفشة. بالله عليكم حاسدننا علي السوق الكبير و زنك الطواقي و الطرماي الطابية حوش الخليفة دار الرياضة الدايات الاذاعة التلفزيون المسرح الهلال المريخ الموردة ميامي خيرات جورج مشرقي ود الريح سيف الدسوقي سيد عبدالعزيز عوض جبريل و... ابراهيم عوض محمد احمد عوض الجايري اولاد البنا و...عيييييك و البكري حمد النيل و احمد شرفي .و نحمد الله انه حكومة السجم دي (وذي ما قال نافع المانافع انهم تربوا مع الحمير) انها همشت امدرمان فقد استعفت الي حد كبير من دنسهم و نجاستهم و مالهم الخبيث و عهرهم الاجتماعي فقد تسابقوا و تنادوا و تكدسوا في احياهم الراقية من كافوري و المنشيات و يثرب و الراقي و المجاهديين و احياء زمان الغفلة . فبالله عليك خلينا في حالنا في بيوت طينا و جخاننا و حيشانا و نفاجاتنا و امدرمان لو ما كانت درة و مصون و عفيفة كانت راقت و جذبت اغنياء السحت و اكلي اموال اليتامي و الارامل و المرضي و تجار اخر زمن و لكن امدرمان مغنطيس لا يجذب الا الذهب و الكرام . ختاماً اقول ليك....و الناس قد قالوا افي هوي تلك يستدمي محاجره..و ليس فيها ما يحلو و يعتبر..فقل هم البهم ماتوا قبل ولدوا...اني دروا كنه من يحيا و يعتبر!!!!!!!!!!!!


#573674 [عبد الله الشقليني]
5.00/5 (3 صوت)

02-01-2013 02:19 PM
تحية لصاحب الملف ، وشُراك التعليق .

بالود كله أحييكم .و لندع صراع المدن جانباً ، أو آراء " حسين خوجلي " ، فهو صاحبها
ولا نتفق معه في كثير شيء ، فلولا فُسحة من الغلو السياسي ، لما وجد كثيرون القدرة على العطاء .
نرجو من الأفاضل الاطلاع على الملف أدناه ، ولينتظروا بصبر ليتعرفوا على وجه من أوجه أم درمان :


(كمال الجزولي - مصطفى السُني- مصعب الصاوي) تحت دوحة علي المك.

http://www.sudaneseonline.com/cgi-bin/sdb/2bb.cgi?seq=msg&board=420&msg=1356735445&func=threadedview

وتقبلوا من الشكر أجزله


ردود على عبد الله الشقليني
United States [محجوب عبد المنعم حسن معني] 02-02-2013 03:21 AM
التحية للرجل القامة عبد الله الشقليني
والله شئ رائع وجميل والتحية للخبير كمال الجزولي ولكل من غرس وردة في امدرمان وللبروف علي المك عليه رحمة الله ، امدرمان هي السودان حنان اهلها

United States [سند] 02-01-2013 11:57 PM
يا سلام عليك يا شقليني كفيت و اوفيت

United States [سودانى طافش] 02-01-2013 06:04 PM
غايتو يا ( شقلينى ) الزول دا زمان لو جا مارى بمقهى ( يوسف الفكى ) ..قطع شك مابطلع ( سليم ) !


#573640 [السفاح]
1.00/5 (1 صوت)

02-01-2013 01:17 PM
أمدرمان قبل المهدي لم تكن شيئا؟؟؟؟؟؟ واللوبي موجود فى الأعلام؟ وكل ماذكر صحيح


ردود على السفاح
United States [سند] 02-02-2013 12:00 AM
فعلاً سفاح اسماء من ثقافة الظلامية و ارعي بقيدك!!!!!!!!!!!!


#573639 [hajabbakar]
5.00/5 (2 صوت)

02-01-2013 01:16 PM
امدرمان لم تقم على عصبية وهى سودان مصغر تقبل كل من ياوى اليها فميدعيها اتوا من كل فجاج السودان شرقا وغربا شمالا وجنوبا وكذلك بقية مدن بلادنا الحبيبة
لاللتعصب ولاللقبيلة ولا للجهوية وكلها دعوات نتنة مرتبطة بهذا النظام المتهالك ستزول بغروب شمسه والتى بدأت متسارعة


#573521 [محي الدين عمر]
5.00/5 (2 صوت)

02-01-2013 10:01 AM
تميز وجمال ناس امدرمان نتاج لانصهار كل قبائل السودان فيها 8


#573504 [فرنا س]
5.00/5 (4 صوت)

02-01-2013 09:36 AM
ونزيكم علما بان الاسلامى المغرور المتعالى صاحب العيون المغرودة من الشرفة بركات والشرفة
بركات لمن لا يعرفها تقع شرق النيل اى على بعد كيلو مترات من مدنى ..
واهل امدرمان لا يعرفون التعالى ولا الغرور ولكن صاحب الوان هو المتعالى والسبب انتمائه للكيزان


#573503 [ابولكمة]
5.00/5 (1 صوت)

02-01-2013 09:35 AM
ما فى لوبي بس انت متهيأ لك كدا ولو فرد قال لا يعنى ذلك وام درمان مش لحم راس وبس دا لحم راس ونص


#573486 [زول مسكين]
1.25/5 (6 صوت)

02-01-2013 09:09 AM
ناس امدرمان عندهم عقدة نقص وبيحاولو يصنعو لي انفسهم حضارة زائفة ساعدهم تمركز مخرجات الاعلام القومي بين ظهرانيهم ...


ردود على زول مسكين
United States [محجوب عبد المنعم حسن معني] 02-02-2013 03:24 AM
اشك انك سوداني لكن صحي الجهل مصيبة

United States [سند] 02-02-2013 12:02 AM
ا ل ك . . ينبح و الجمل مااااشي!!!!!!!!

United States [زول مسكين] 02-01-2013 11:19 PM
والله هبل انتو صاقعننا امدرمان ..
لمن ضيعتو لسودن زاتو
قومو لفو

United States [بت ملوك النيل] 02-01-2013 04:10 PM
صحي انت زول مسكين!!!!

United States [Mohd] 02-01-2013 01:20 PM
فعلا مسكين، وكمان دلاهه


#573481 [زول مسكين]
1.00/5 (1 صوت)

02-01-2013 09:05 AM
ينصر ديييييييييييييييييييييينك ياااااااااخ ..


#573475 [د.عبداللطيف محمد سعيد]
5.00/5 (2 صوت)

02-01-2013 08:36 AM
ولان التاريخ لايكذب فيستحيل أنت تكون أمدرمان الحضارة وهي التي شيدها المهدي ودراويشه، من الذي قال لك ذلك؟ امدرمان موجوده قبل المهدي وعليك قراءة التاريخ انها بنت ملك من ملوك العنج وهم اجدادي وانا من ابناء امدرمان


ردود على د.عبداللطيف محمد سعيد
United States [زول مسكين] 02-01-2013 09:56 AM
ربنا بيسألك ي دكتور ورينا جدودك ديل كانو ساكنين وين قبل حضور المهدي الى امدرمان ؟؟؟؟


#573449 [امدرماني الركابية]
4.57/5 (5 صوت)

02-01-2013 07:31 AM
يكفي امدرمان فخرا ان اولادها عندهم علاقات اجتماعية متينة لاتوجد في اي مدينة في السودان...يا اخي كم من شاعر او شاعرة كتبوا عن امدرمان وكم من مغني تغني لامدرمان انا بفتكر انت عاوز تكتب وبس وليست لديك اي مواضيع تكتب عنها امدرمان هي بيت المال ابروف العباسية حي العرب الموردة امدرمان الاذاعة ومجلس الشعب وقصر الشباب والاطفال امدرمان هلال مريخ موردة وتطول القائمة انت من وين وفين .............يا من لم نسمع عنك من قبل.....وبالرغم من ذلك تحياتي اليك؟؟؟؟؟؟


ردود على امدرماني الركابية
United States [gasim ali] 02-01-2013 01:47 PM
يا رجل ٠٠٠ الفريق القومي اذا ما كان بيضم اقل حاجة سبعة من اولاد امدرمان حرم ما يجيب التكتح

United States [زول مسكين] 02-01-2013 10:05 AM
ولله كلامكم يضحك جد !!!!!!!!

يااخ العلاقات دي في اي مكان موجودة ..

انتو لقيتو سوقكم بي الازاعة الموجودة في امدرمان وغسلتو مخ المساكين في الاصقاع بي نحنا ...ونحنا ونحنا وما ادراك ما امدرمان !!!


#573437 [Sakwaha]
0.00/5 (0 صوت)

02-01-2013 07:01 AM
كمان ينوبك ثواب لو شفت لينا كيف المطار الجديد إتحول من بحري لأمدرمان


#573427 [صقر البرزن]
0.00/5 (0 صوت)

02-01-2013 06:37 AM
اتفق معك تماما لكن السلوى الوحيدة فيى القصيدة التي كتبهاالدكتور محمد الواثق. اتمني من الله
ان تدرس في المنهج السوداني.


#573411 [سودانى طافش]
4.97/5 (7 صوت)

02-01-2013 05:01 AM
طيب المشكلة وين ... وإنت زعلان مالك .. هل أكلت شيئ بالغلط وبطنك بتوجعك ولا الموضوع شنو ..!


ردود على سودانى طافش
United States [Mohd] 02-01-2013 10:55 PM
المشكلة انه الإعلامي بتاع الدوحة قطع شك ما "سليم"


#573399 [نص صديري]
5.00/5 (1 صوت)

02-01-2013 04:07 AM
ريحنا بس ما تقطع الكبري ..المزعلك شنوا؟
بعد زمن رأي مغتربين اليمن في ام درمان جاء زمن رآي إعلامي مقيم بالدوحة فيها !! اكيد ما بسمع حقيبة ولا بياكل طرشي ؟!


#573385 [وكتين يضيع عرق الجباه الشم شمار فى مرقه]
3.75/5 (4 صوت)

02-01-2013 03:05 AM
يااستاذنا لاضير من النقاش الهادف ولكن دع عنك الاحساس بالدونيه تجاه الاخر - امدرمان مدينة الكل وبها كل اجناس واعراق السودان - من حلفا لى نوملى واعنى ذلك صدقا وحتى بعد الانفصال السياسى الذى تم وتبقى الوجدان والمشاعر - ولماذا لاتقول ثقافة المركز ويمكنك بذلك الرجوع الى الخلل الاصل هل هو بسبب مشكلة حكم وادارة السودان مركزيا ام ماذا - اما لو تحدثت على الفن او الرياضه فامدرمان هى اكثر من ذلك فهى اشعاع للاستناره والفكر وشعر الحقيبه وغناءها يعنى فن ام درمان واما الكاشف فدكان النجاره الخاص به فى حى المورده يشهد على انه امدرمانى الهوى ولا اود ان استطرد اكثر فى ذلك - وبخصوص السياسه فالامام المهدى مؤسس ام درمان وعلى عبداللطيف وعبدالفضيل الماظ من امدرمان والازهرى من ام درمان والقائمه تطول - ولو عاوز ناس الفكر والرياضه فى امدرمان الساهمو كثيرا فى رفد الوطن بالكثير فالقائمه طويله عد للصباح -
ملحوظه للقراء الأعزاء ام درمان تعنى كل اعراق السودان عشان مايجى زول يقول ناس ام درمان بتعنصرو - نحن نعتز ونفتخر بامدرمانيتنا - وامدرمان بلد لكل من يتفق وينهل من ينبوع ارثها الثقافى والفكرى والرياضى - بخصوص السيطره على مؤسسات الاعلام كما تدعى فالشغلانه انتماء وتمكين بسبب السياسه البغيضة للمجموعه الحاكمه فلا تظلم ام درمان - واما حسين خوجلى فالقناة هو مالكها ولهو مايشاء وان اتفقت او اختلفت معهو فهو رجل صاحب فكر وكل يدلو بدلوهو فى محراب الفكر - ونحنا اولاد امدرمان العاجبو عاجبو والماعاجبو يمشى يتشطر هناك على ناس كافووورى بدل مايجى يتنفس احساس الدونيه والضعف وقلة الحيله على اناس ساهمو كثيرا فى هذا البلد العظيم - فهل هذا جزاءهم ... انا ام درمان انا السودان .


ردود على وكتين يضيع عرق الجباه الشم شمار فى مرقه
United States [وكتين يضيع عرق الجباه الشم شمار فى مرقه] 02-02-2013 06:27 PM
اخوى Majdi
قبيل انا قتا ليك شكلك ام درمانى متضايق وفعلا طلعتا كذلك وكمان ولدنا عديل من المورده
انا امدرمانى اتولدتا فيها وكذلك والداى - وجدى اتى من الشمال وجدى لامى من الشرق وابن خالتى من الغرب - نحن خليط امدرمانى وبالنسبه للعنصره الموجود فى امدرمان مافيها عنصريه عرقيه لانو امدر لاما كلوو - عدا بعض الممارسات الشعبيه الفرديه - وبالنسبه لتعنصر اهل المركز على الاطراف دى ظاهره موجود فى كل بلاد الدنيا لظروف ومعطيات معينه يطول شرحها - لكن ناس امدرمان بقولو احنا اهل الفن والادب والفكر والرياضه - الاصلو من الشمال والاصلو من الغرب والجنوب والشرق كلهم ساهمو فى امدرمان واطبعو بها وبقو يقولو احنا اولاد امدر - فالثقافه الامدرمانيه هى ثقافة امزجه وليس جهويه وقبيله - والمشكله فى كل الحاصل ده ادارة خاطئه للدوله من كل الانظمه الحاكمه وحتى الان - بسبب الحكم المركزى - والحكم وادارة الدوله فى الخرطوم العاصمه - وامدرمان جزء من العاصمه المثلثه - فهى مدينه متكامله تتمتع بطعم ورونق خاص عند كل محبيها وعاشقيها لاسباب متعدده .. دمت يامجدى

United States [Majdi] 02-02-2013 03:39 PM
شكراً اخوي
النقطة المهمة وممكن تقراها في كلام كل اولاد امدرمان هنا زي الكأنو امدرمان عندها ثقافة محددة وزي القال انو امدرمان اخلاق عديل
لو مرقو بره الافق الضيق ده ومشوا على اهلهم في اصقاع السودان وشافو بصمة المدن وثقافتها ما كان قالوا الكلام ده
شوف مدينه زي عطبرة مثلاً او الابيض تختمك عدييييييل من كلامك الناس تقول ليك انت من الابيض ....عطبرة شوف بورتسودان برضو بدون اثنية تجبرك انك تتعامل زي ما ناسا بتتعامل يا استاذ انت في المدن غريب لمدة تلاتة ايام بعد داك انت جزء من المجتمع
انا اسرتي نزحت لي امدرمان وبنت الموردة وكم مركب لكن ارتباطي بي الجزور اصيل عشان كده ما مالي فراغ الانتماء بي ام در
المهم البلد

United States [وكتين يضيع عرق الجباه الشم شمار فى مرقه] 02-02-2013 01:44 PM
الاخ الكريم Majdi
ردك واسلوبك ممتاز وده المطلوب الناس تتناقش بوعى وفى الاخر الناس كلها سودانيين - اما بخصوص الكلام انتا جاوبتا على نفسك ولو المهدى اصلا مامن امدرمان فى الاصل وحسين خوجلى من الجزيره او الشماليه والازهرى والنميرى وغيرهم كلامك ده باكد وبدلل على كلامى انو امدرمان لامه كل الاعرق - امدرمان مناره للثقافه والتنوير والناس اندمجت فيها وتاثرت بجمالياتها واثرت وساهمت فيها - فهيا كيان جامع - اما بخصوص الفن ارجع لكل شعراء الحقيبه وفنانيها حاتلقاهم من امدرمان ولو قتا لى ديل اصلهم من الشمال او الغرب او الشرق او الجنوب بقول ليك دى امدرمان كده ميزتها - جو عشان المعايش وله غيروو وانتهلو من ذاك الفيض - وجدودنا زمان وصونا على الوطن على التراب الغالى المايهو ثمن - ميرغنى المامون واحمد حسنين جمعه - وماف زياده يامجدى - تخريمه شكلك امدرمانى متضايق من الاوضاع

United States [Majdi] 02-02-2013 11:20 AM
الاخ الكريم
الكلام بتاع انو امدرمان لامة كل اعراق السودان ده كلام ساكت لمة سوق بس احياء امدرمان مقسمة اثنيا كلنا عارفين الناس الجاية من الغرب ساكنة وين الجاية ن الشمال سكانا وين ما تقدونا بانو امدرمان ضامة السودان بل على العكس مجتمع المهدية ما اتطور بصورة سليمة لانو العنصرية متجزرة في المجتمع السوداني بي صورة كبيرة
المهدي انشأ امدرمان (يعني هو ما من امدرمان) الساسة الزكرتهم ديل جابتهم المعايش ساكت لي امدرمان

الاعلام معروف في كل الدنيا انو بتحركو لوبيهات وعندنا في السودان الواسطات عشان كده قادينننا ناس حسين خوجلى ود الجزيرة بي امدرمان
شباب امدرمان عموما خواء فكري بي غطاء ادعاء الثقافة والفنون باله عليك شوف اي مبدع (مبــــدع) في السودان ووريني علاقتو بي امدرمان

United States [وكتين يضيع عرق الجباه الشم شمار فى مرقه] 02-01-2013 11:37 PM
(زول مسكين )انا رديت رد موضوعى وانا بتصفح لقيتك شغال ردود بغبن ومن طرف على كل اولاد ام درمان - انتا كده رديت على نفسك مافى داعى ازيدك .. حاول خلى عندك اعتزاز بمنطقتك وكيانك الصغير بدل ماتحاول بالهضربه والبلبطه انك تستدر العطف والشفقه عليك بسبب إحساس وشعور بالدونيه تجاه ام درمان - ياخى احنا زنبنا شنو ربنا خلقنا امدرمانيين - وبنحب كيانا وبنعتز بيه - حاول حب كيانك الصغير وإنغمس فى جمالياتو حاتلقى نفسك طيبتا من هذه الانا والذات المتضخمه فى التفكير اللا شعورى بعقلك الباطن .وكفاءك مابنزيك .. وامدر ياربوع سودانا نحييك .

United States [وكتين يضيع عرق الجباه الشم شمار فى مرقه] 02-01-2013 11:27 PM
اخوى زول مسكين اختشى واقرى الموضوع كويس وبطل التثقيف السطحى والتنميط اللا مجدى.
واحنا اولاد امدرمان الماعاجبو يمشى لكافورى .. الحمدلله لا سرقنا لا كتلنا وماف زول عندو عندنا شى .. وسلام ياالبقعة .

United States [زول مسكين] 02-01-2013 10:02 AM
(( ونحنا اولاد امدرمان العاجبو عاجبو والماعاجبو يمشى يتشطر هناك على ناس كافووورى بدل مايجى يتنفس احساس الدونيه والضعف وقلة الحيله على اناس ساهمو كثيرا فى هذا البلد العظيم))

يا زول ما تتنفخ فينا ساااي وتاكلنا حنك !!!

هو اصصصصصصلا اكان كلامك بخصوص تأثيركم الكامل علي السودان في كل منحيه يبقى ياكم انتو السقطتو حجرو , ..


شاذلي الزين
مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة