وأدوها سوط
02-02-2013 12:56 AM


في ظل إنعدام وندرة أدوية القلب والضغط والسكري (التي يتعاطها) العبد لله فإنه يحرص كثيرا على عدم سماع الأخبار حتى لا يستمع إلى أحد التصريحات (من اياها) التي يطلقها بعض المسئولين والتي من الممكن أن تنقله إلى الرفيق الأعلى (ذي الترتيب) !
إلا أن الحذر لا يمنع القدر (كما يقولون) إذ أن العبدلله وأثناء تجواله في (النت) وجد تصريحاً للدكنور كرار التهامي الأمين العام لجهاز تنظيم شئون السودانيين العاملين بالخارج يقول فيه إن أن العام الماضي شهد حصول أكثر من 66 ألف علي عقود عمل وأضاف (الدكتور قائلاً) يجب أن نشجع الهجرة ونحول الكم إلي نوع نافع و(كما أضاف سيادته قائلاً) أمامنا تحدي كبير في تحويل هجرة الكفاءات العلمية والخبرات الوطنية إلي هجرة نافعة ومنظمة وأشار إلي عدم ترابط المؤسسات ذات الصلة بالهجرة لتكون هجرة منظمة !
بالله عليكم شوفو جنس الكلام ده ؟ يعني الدولة مش بتشجع الهجرةو وبس كمان عاوزاها تكون خبرة نوعية .. خبراء وعلماء وأساتذة جامعات .. طيب الخرتمية (جامعة) الفتحتوها دي والمعاهد والمؤسسات التعليمية والتأهيلية دي ح تجيبوا ليها كوادر من وين؟ و التمنية (الفالقننا بيها دي) ح تحصل كيف؟ بعد مراكز البحوث تعدم نفاخ النار ؟

ثم بعدين .. هي الدولة دي ما بتشبع؟ ملايين المغتربين ليهم عشرات السنين قاعدين (يوردوا) مليارات الدولارات .. القروش دي كوووولها ما كفاية؟ عشان كمان عاوزين (العلماء يهاجرو) عشان يزيدوها !!

هل يعي السيد الأمين العام لجهاز تنظيم شئون السودانيين العاملين بالخارج خطورة ما يقول وما يفعل ؟ هل يدري ما سوف يصيب هذه البلاد (المسكينة وصابره) من عجز بسبب هجرة هؤلاء العلماء والخبراء ..؟ كيف ترتفع وتيرة التطور الإقتصادي والإجتماعي في بلاد يهاجر علماؤها وما هو المردود الذي سوف يعود على البلاد لقاء ما أنفقته على تعليم وتدريب وتأهيل هؤلاء العلماء !
من سوف يقوم بتدريب وتأهيل الكوادر االازمة التي يفترض ان تسهم في بناء هذا البلد المنكوب ومن سوف يقوم بإعدادهم ..
ثم ألا ترون ما آل إليه حال التعليم الجامعي والدفعات التي تم تخريجها في هذا العهد المأمون وما هي عليه من تأهيل متدني ؟
ألا يعني تشجيعكم لهجرة هذه العقول مزيداً من الإنخفاض والتدني في المستويات التعليمية عندما تتناقص أعداد المؤهلين وذوي الخبرات من أعضاء الهيئة التدريسية نتيجة تناقص عدد المؤهلين منهم بالنسبة لعدد الطلاب في الجامعات والمعاهد والمؤسسات التعليمية ؟

إلا يعني تشجيع هؤلاء العلماء على الهجرة تشجيعاً على قفل مراكز الأبحاث العلمية (بالضبة والمفتاح) في بلد يحتاج إلى الكثير من الجهد حتي يتقدم فكرياً ويتطور علمياً ؟ (إنتو قايلننا اليابان؟)

هم ديل شويتين الناس الإتخرجو من الجامعات (لمن كانت جامعات) خلوهم ياااااخ هو غيرهم في ناس مؤهلين؟
(الحتة الجاية دي من تصريح السيد الأمين العام عاوزة ليها زول شديد وما عيان) .. يقول السيد الأمين العام لا فض فوه : (أمامنا تحدي كبير في تحويل هجرة الكفاءات العلمية والخبرات الوطنية إلي هجرة نافعة ومنظمة) :
ده عزيزي القارئ التحدي الذي يواجه (الدكتور) وحكومته .. أن يحول هجرة الكفاءآت العلمية والخبرات الوطنية إلى هجرة نافعة .. (يا ولد ناولني الحبوب) ..

يا أخي الدكتور هل سألت نفسك وأنت تدلي بهذه التصريحات (التي تفقع المرارة) ما هي الآثار السلبية على واقع التنمية في البلاد وأنتم تشجعون هجرة هذه العقول؟ وعن ضياع الجهود والطاقات الإنتاجية والعلمية لهذه الكفاءات التي تصب في شرايين هذا البلد الذي تكلست شرايينه؟ وإحتياجه لهذه العقول في مجالات الاقتصاد والتعليم والصحة والتخطيط والبحث العلمي و التقانة...الخ.
لقد كنا نعتقد ايها (الدكتور) و(حكومتك) أن التحدي الكبير الذي يواجهكما هو كيف انكما سوف تستطيعان توفير البيئة الملائمة لهولاء العلماء كي ما يقومون بالنهوض بهذا البلد (الصابر المحتسب) ولكن يا عزيزي لا عليك .. خموا خمكم .. أصلو القصة (عايره وأدوها سوط)

كسرة :
بالله آخر زول يطلع من البلد دي يقفل الباب كويس ويسلم المفتاخ لسيد الدكان


كسرة ثابتة :
أخبار ملف خط هيثرو العند النائب العام شنو(وووو وووو وووو)+(ووو) !

كسرة بايخة :
لا تنسوا أن تحتفلوا بالواو الجديدة أيها الشعب الفضل !! بختكم (ح تحتفلوا كتير) في ظل هذا الفساد (المرير) والجلد (التخين) !!


[email protected]


تعليقات 28 | إهداء 0 | زيارات 7071

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#575644 [الطير المهاجر]
0.00/5 (0 صوت)

02-03-2013 05:46 PM
ما يهاجرو هم )ناس الحكومه يعني( وزي ما قال عادل امام يجيبو عقد عمل يروحو السعوديه بقى ،العاوز مروحه يجيب و العاوز خلاليط يجيب


#575029 [ابومصعب]
0.00/5 (0 صوت)

02-03-2013 02:41 AM
السلام عليكم ورحمة الله
د التهامى دا مالو عفوا ذى الحربوية زمان كان يدعو لاستيعاب الكوادر والكفاءات وهسع قلب مالو ؟
ماشفت لى بلد او حكومة تدعو لهجرة اساتذة الجامعات والخبرات ولا دايرة تزيد من الضرائب بعد الماسورة دى المالقوا ليه حل وانت يا استاذا الفاتح الزول ده علاقة بالكورة شنو لمن يمشى لنادى الهلال زمنه كله فى الرياض ؟ وذى ماقلت عايرة وادوها سوط فعلا وامكن يامنوا بالمثل البقول كان دار ابوك خربت شيل ليك منها شلية يعلم الله الغربة ما عاجبه الناس لكن يسوا شنو كات رطل الشاى اصبح 21 جنية وشعيرية نوفا 5-6 جنية
نسال الله ان يولى من يصلح


#574876 [ساس بن ساس]
0.00/5 (0 صوت)

02-02-2013 10:13 PM
ياجبرا ماتطبزا أسمع جيب أضانك ( خليهم يشجعوا هجرة العلما عشان ناس الخبير الوطني ومستشاري الرئيس ومساعدي الحلة بتاعنو وناس د.التهامي وهيئة علماء السودان والهيئة الشرعية للعلماء وناس الذكر والذاكرين وهيئة الحج والعمرة وناس الأوقاف والزكاة ديل كلهم يهاجروا ويخلو الرئيس براهو ولا يجيبوا ليهو عقد رئيس في أي بلد وكده نكون إتخلصنا منهم وما تنسى يمكن يلقوا ليهم في دول المهجر برلمان ماعندو رئيس يجيبو ليهم عقد رئيس برلمان للتحفة دي )هس هس هسسسسسسسسسسسسس مايسمعنا الزول دا يقوم يغير رايو. الله يسهل ليهم يهاجرو للدار الآخرة في القبور الضيقة ويريحنا منهم.


#574762 [ست البنات]
0.00/5 (0 صوت)

02-02-2013 07:54 PM
تعليق الجداد الأليكتروني وديتوهو وين يا ناس الراكوبة .. يا (على) يا خوي بنصحك شوف ليك شغلانه بتاعت أولاد ناس والله نحنا الحريم ديل ذي شغلانيتك دي ما بنشتغلا .. عليكم الله يا ناس الراكوبة وخصمتكم بالنبي محمد أكان تنشرو ليا تعليقي ده .. قال ايه الاستاذ جبرا بيستدر عطف الناس بالله يا ناس الراكوبة سمعتو بي جنس الكلام ده؟؟؟


ردود على ست البنات
United States [أهل العوض] 02-02-2013 09:41 PM
قرأنا ما كتبه هذا الكوز في حق أستاذنا جبرا وهو لا يستحق الرد عليه .. نرجو من الإخوة المسئولين في الراكوبة عدم إتاحة الفرصة لمثل هذا الشخص السخيف بالتجني على من يحملون هموم هذا الشعب وينطقون بإسمة كالأستاذ جبرا .. و حسناً فعلت الراكوبة بحذف ذلك التعليق الممعن في الركاكة والسطحية وقلة الأدب .


#574757 [مازن]
5.00/5 (1 صوت)

02-02-2013 07:51 PM
يا سيد جبرا هو أخونا كرار التهامي ده ذاتو فاقد تربوي فهو أولا صيدلي وليس دكتور وهذا خطأ في السودان إذ يقال للصيدلي والبيطري والطبيب العام دكاترة ففي دول العالم المتقدم يقال للصيدلي Pharmacist وللبيطري .Vet والطبيب العام Physician وتقتصر عبارة دكتور على حملة شهادة Phd. . نعود لصاحبنا كرار فقد تخرج من كلية الصيدلة بجامعة الخرطوم بعد إثني عشر عاما من الدراسة فيها يعني لما طلع لقى زملائه تزوجوا وأنجبوا ومشواالحج وكمان جاتهم بروستاتا. كان من الكوادر المايوية ولولا ولائه لمايو لفصلته إدارة الكلية. وعندما جاء للعمل في السعودية في الثمانينات رسب في جميع الإمتحانات ولكنه عاد للسودان وأحضر رسالة توصية من أبو القاسم محمد ابراهيم لأحد كبار المسئولين السعوديين النافذين وبموجبها تم تعيينه هناك دون امتحان.


ردود على مازن
United States [عبده الحاج حسن] 02-04-2013 05:44 PM
إنت عارف نحن مُصيبتنا ومشاكلنا جايانا من المُطنطعين ديل زي دا المٍُسمى التهامي دا، والمُصصيبة الكُبرى جايانا من ما يقال عليهم مُثقفي هذا الشعب،كل من هب ودب قالوا ليهو يادكتور ياباشمهندس يا ما عرف شنو،كدي إنت لاحظ المسألة دي عند المذيعين بتاعين التلفزيون الماعرفين حتي كلمة بروف ولا دكتور لمنو تتقال،نصف الحوار بتاع الحلقة تاخدوا كلمة يا دكتور ويا بروف ، وهم بتنفخو وهاك ياكذب،وبعدين حتي المٌمرض إقولو ليه يادكتور في حين إنو دكتورو ذاتو ما خايلة عليو دكتوراهو دي لا خلقة لاأخلاق،
الله إكون في عون أولادنا الماعندهم ذنب،


#574736 [عاااااااااااايره]
0.00/5 (0 صوت)

02-02-2013 07:31 PM
لااااازم العقووووول و الخبراات تهااااجر عشاااااان يبوا الااااااس الزي دكتور كرار ديل مسئولييييييين .زو بعدين هو لاااااااازم يشجع الهجره عشان سفرياااتو تكتر ..و تكتر معاااها الدولاااارااات...و البدلااااااااات و الحواااااافز الدولاااااااااااارية.


#574641 [سوداني وبس]
0.00/5 (0 صوت)

02-02-2013 06:08 PM
والله ياود جبره البلد بقت زي بيت العزابه


ردود على سوداني وبس
United States [قفة] 02-03-2013 12:42 PM
like


#574451 [ود الجد]
5.00/5 (3 صوت)

02-02-2013 03:52 PM
لانو البلد دي محتاجة لشوية دقون وسبح وشال كشميري مع عمة وجلابية ناصعتي البياض ومركوب قطع الفاشر او الجنينة هذه هي المؤهلات المطلوبة وفوق او دون ذلك ليذهب ليغترب او يهاجر اويجلس يندب حظه..الا تبا لكم ايها الكيزان الفاشلون


#574439 [السر مساعد الخليفة]
5.00/5 (1 صوت)

02-02-2013 03:40 PM
كان من المفترض أن يقول: إن على المغتربين الذين طالت غربتهم ثلاثين سنة وما فوق يرجعوا ونحن حنديهم البيأخذوه في بلاد الغربة .. لكن طالما في (جبايةومص جيوب) فلا مانع أن لا يكون هناك رجل قاعد في السودان إلا عمنا وأخينا دكتور الفاتح _ أطال الله في عمره ـ عشان يرسل لينا الفضل شنو بعد جميع الآباء رحلوا.


#574379 [zohair]
0.00/5 (0 صوت)

02-02-2013 02:29 PM
والله قمة النفاق والدجل ، ليهم زمن شابكننا العودة الطوعية والعودة الجاذبة على وزن (الوحدة الجاذبة ) بعد داك تجي وتقولوا عايزين الناس تهاجر الله ياخدكم ويخسف بيكم الارض.


#574366 [mansour]
0.00/5 (0 صوت)

02-02-2013 02:12 PM
هم ماعاوزين عقول ياجبره تعال شوف ليك اى مهرجان حكومي وشوف الجماعه اللامنهم عشان يهتفوا هي لله هي لله تفتشهم كلهم ماتلقي فيهم واحد عاقل.


#574342 [الافريقي]
0.00/5 (0 صوت)

02-02-2013 01:34 PM
اكبر كضااااااااااابين الناس ديل قالوا ناكل مما نزرع ونلبس ممانصنع لمن ما قدروا قالوا علمنا اولادنا عشان السوق الخليجي ده مسؤؤل في الحكومة كبير قال الكلام ده


#574249 [محموم جدا]
0.00/5 (0 صوت)

02-02-2013 11:43 AM
أولا يبدو أن واواااتت حاتحصل واو ثم تتنبتر هناك و ما حد شاف واوسي و لا سمع واويروالوداو حقو تجرب الواو الضكر ممكن الجماعة ديل فاكرين واوك دا إنتاية و على كدا بطبقوا فيه مثنى و ثلالث الى ما لا نهاية ودا منطق الواوات الجبرية الراحت شمار في مرقة انجليزية و من هيثرو متوجهين الى الخطوط البحرية لتبيت بمرتفعات مصانع السكر لنشرب العسلية ونرمي الجمرات في الجزيرة يلعن شيطانها البلحس القظن لحس البوقنية و يا قضروف سعد فيك الجغمسة رمتنا
و ثانيا لا الدكتور فاهم يعني شنو هجرة الخبراء و علاقتها بالتنمية لأنه التنمية نفسها ستغترب الى المستثمرين الخليجيين و يرجع الخبراء المهاجرين مع ما يوقعه المستثمر من أوراق شراء الدولة السودانية لتشيل ساقية جحا من البحر و تكب في جيوب المستثمر و يمسح الدكتور الأهبل شنباته بدولارات تمكنه من شراء ستائر جديدة لمكتبه ليعلن لنا التطوير في أداء جهاز السجم و الرماد دا!!!


#574221 [kanzman]
5.00/5 (2 صوت)

02-02-2013 11:15 AM
مركز دراسات الهجرة , عاملين ليها قاعة اخر موديل سراميك والومنيوم واسبيلتات, واحد ميتينو طالع باع الوراهو والقدامو واشترى فيزا راعى واتخارج منكم دى دايره ليها دراسه
والله حيرتو الشيطان ذاتو


#574217 [عبدالواحد المستغرب أيما إستغراب!!]
4.75/5 (3 صوت)

02-02-2013 11:12 AM
وهل ياجبرا فى إعتقادك او فى ظنك عمك بتاع المغتربين ادلى بتصريحاته تلك و كان فى عقل باله (المصلحه العليا للبلاد او شىء من هذا القبيل؟!! لاحول ولا قوة إلا بالله..تف من خشمك ..يا أأأخى..حرام عقلك يروح بيك بعيد!!ديل ناس همهم فى جيوبهم وبس!!).
والناس ديل مما صرح ليهم شيخهم وفَهمَهم بأن المال مال الله وهم وحدهم دون غيرهم واقصد جماعته المستخلفون فيه!!فسابو كل حاجه دعى ليها الشيخ و(كلتوا)فى الحته دى!! و90%من المنتمين للجماعه (وارد طبقات فقيره)ولم يروا (القرش رؤيا العين ولا يعلمون شىء إسمو اورنيك 15!!وكانوا يسمعون به وتعاملاتهم كانت (ملوة ذره مقابل صابونه ورطل زيت او ملية كف تمر بركاوى مقابل وقية سكر ووقية شاى..يعنى بالعربى الفصيح (تجاره بكماء) ولم تدخل العمله بنوعيها ورقية كانت ام معدنيه الى ديارهم إلا بعد أن عرف أبناء بعضهم طريقه الهجره الى الخارج ونشئة ثقافة (دولار.. ريال.. شيك سياحى!!)..والشيخ عندما صرح لهم أن يعبوا ما شاء لهم من (بيت المال)فلم يكن يشغله او هدفه قطع شك (حاجه متعلقه بالدين او التدين) إنما الهدف كان تثبيت حكمه وترك باب (السف واللقف) مشرع على الاخر لاعوانه كى يقرفوا ما شاء لهم هى كانت بمثابة رشوه مقننه!!وجميعنا يعلم اين ذهبة موارد النفط عندما كانت بين يد النظام وازلامه، و رأينا العمائر المنتصبه فى المنشيه وشاطىء النيل الازرق ومناطق اخرى كثيره وهى تمد لسانها (لشريعة الله والشعب السودانى )للاولى لانها لا علاقة لها ولا رابط معها من قريب او بعيد والثانى لانه غافل او لانه عبيط وهو الارجح !!.
وبما ان النفط ( شح ثم بح)وبعض اعوان النظام والازلام لم يكملوا الطوابق المنصوصه فى خريطة العماره فكان لابد من موارد اخرى لتكملة العماره او تشطيبها!!والدخل الوحيد الذى كان ينافس مدخول النفط كان تحويلات المغتربين فسألوا أنفسهم لماذا لا يحولوا الشعب السودانى الى مواد بتروليه؟!! ففيهم من هو فى غلاء البنزين والجازولين والكاروسين و منهم من هو فى رخص النافته (الزفت)..وكلو بترول والجميع ينبغى ان يصدر الى الخارج كى (يتساقط عليهم لحاليح جنِيا) وعن طريقهم وبهم يكتمل العمران!!.


#574208 [حسكنيت]
0.00/5 (0 صوت)

02-02-2013 11:02 AM
ديل لا بعرفوا Human Rights ولا بعرفوا Human resources ، لكن حق الناس بعرفوا ليه جنس عرفة


#574169 [awad]
5.00/5 (4 صوت)

02-02-2013 10:16 AM
أنت الصادق ياجبرة أنا بكون اخر زول بطلع لكن المفتاح بسلمه لبشبش عديل كده وأقول ليه ودعتك الله وخلى بالك من ودوده وأتضرع البلد فى أمان.


ردود على awad
United States [مسكين] 02-03-2013 01:55 AM
عليك الله امرق معاك حجة فاطمة ... المرة دي مسكينة وكدة...وبعدين هي من ضمن المنكوبين(راجلة عرس فيها وكدة....و...و يالله)


#574115 [صالة المغادرة]
5.00/5 (4 صوت)

02-02-2013 08:27 AM
احكى ليك قصة يا جبرة مرة عمك الصافى جعفر الباسم دائما سجل زيارة لجهاز المغتربين ودق ليهو صيوان حدادى مدادى وقالوا للمغتربين افى الجهاز تعالوا فى موضوع هام وامسك الصافى جعفر بالمايك وهاك يا وعود وتباشير بنتجات مشروع سندس وعمك فى نهاية كلامو قال للمغتربين فى زول عندو استفسار فانبرى له حلفاوى قح وبلسان حلفاوى مبين قال ليهو يا شيه ده مش سندس ده سنبك ادونا فلوسنا فانفجر الجميع بالضحك بما فيهم الباسم ديمة صافى جعفر ومن يومو داك تانى عمك ما عتب الجهازاو كما قال اقول قولى هذا واستغفر الله لى ولكم وتبت يدا لصوص الانقاذ


#574108 [wdalamin]
0.00/5 (0 صوت)

02-02-2013 08:07 AM
هههههه وشر البلية ما يضحك يا استاذ الفاتح


#574104 [ابو ابراهيم]
0.00/5 (0 صوت)

02-02-2013 07:46 AM
انت بتصدق يا استاذ الحديث عن التنميه ديل باعو كل شئ ممكن وشايفهم اليومين ديل مقبلين علي مصانع السكر وانت قبل كم احتفلت بي كسرة خط هيثرو ديل حتي الطيران باعوهو باقي بيع البشر ودا الذي يتكلم عنه كرار


#574094 [مرسال الشوق]
0.00/5 (0 صوت)

02-02-2013 06:56 AM
والله يا جبره انا غايتو ما عارف لكن زكرتني نكته الزول القال لي واحد بالطريقه دي يوم بتقتل ليك زول الناس ديل حيرو ابليس زاتو خلي نحن ياخي احي انا اخير اسكت خليني يا جبره ما تحنسني


#574085 [اللمبي بمسي]
1.50/5 (2 صوت)

02-02-2013 05:11 AM
ات ماسمعت بالمثل البيقول لو غلبك سدها وسع قدها!! اها الحكومة غلبته البلد والبتسويهو وبقت خايفه الناس تاكله قالت احسن حاجه تدينا سكه كلنا!! وبعدين هم زاتم جاهزين!!! التهامي ماقاليك!! انو جماعتك زاتم طلعوا او ارسلوا العيال للخارج!!بس باقي ابوالعيال يكمل شوية الشغل العندو ويتم المليار التاني ويلحق بيهم طوالي في بلاد ناس دنا عذابها عشان يستمتعوا ويرتاحوا من التعب الكان تعبانينوا في البلد دي!! اوع تكون ات ماجهزت البيت بره اقصد الفلة بتاعت دبي او شقة كولالمبور!!!اوعك تكون منتظر الدلوكه تدق!! وناسك يغنو صقيره حام!!!ده صقيرها قام زمان!!


#574073 [ود بربر]
5.00/5 (8 صوت)

02-02-2013 03:51 AM
يا بختنا ويآآآآآآآآ بختنا

بي كسرتك جننتنا وبي واو جديد حيرتنا

في جبرة ما سكنتنا ولي هيثرو ما وصلتنا

ولمن خلاآآآص آخرنا جا وقلنا يارب تفكنا

جايينا يا جبرة الهنا داير تأخروا سفرنا

عارفنك أصلك ما براك حآآآسد وداير لنا

كل العذاب زايدالهوان وفقع مرارة و بشتنا

خلينا بس يومين نغوور يمكن نبدلو حظنا

خلينا نكسر حظنا وفي العشرة نخلف جرنا

يمكن تجيب جوكر نضييف نلعبو خفة وحرفنة

وده كلو يافاتحنا كوم ما شفتا أصلك سعدنا

و والله أجمل سعدنا وكل هناءنا وبختنا

وأجمل منانا بي كسرة ثابتةو كسرتين من عندنا

نصل البلد بعد اغتراب نلقى البلابل حولنا

نتلقى كل الابتسام والاحترام و الهوشنة

نسأل سؤال واحد فقط يارب اتحقق حلمنا

يارب بقينا خلاص نضاف خالين عوائق كدرنا

خاليين نفاق خاليين بهاق خاليين بقايا الكوزنة

يا توحة كلامنا واضح وللا داير اعادة ودوزنة

سيبنا النكسرو حظنا يمكن نغير حلمنا ويمكن نصل لي حلمنا


#574058 [مغترب]
3.50/5 (3 صوت)

02-02-2013 03:16 AM
زمان درسونا في الرياضيات علامة الي مالا نهاية ...هزه العلامة لم اجد لهامكان انسب من جيوب وكرووووش الكيزان في مصابة بمرض ما لانهاية ..حيرتونا والله انتو فاكرين نفسكم خالدين فيها الي الابد عالم ما بتختشي..الله يفك البلد منكم ايها النازيين الجدد


#574038 [قاسم الامين عبود]
3.00/5 (2 صوت)

02-02-2013 02:11 AM
مدير جهاز امنك كان حائم في الرياض من استراحة الي استراحة وجلسات الهوى والعصريات بميادين الكورة حكومة تائهة وما جايبة خبر ساكت تلم في الفطائيس وتلمع فيهم عشان يجو يزيدوا الكرور كرور كان الله في عونك يا بلد


#574035 [امدرماني]
4.60/5 (8 صوت)

02-02-2013 02:07 AM
بعد تصدير النفط والذهب والبقر فضل البشر


ردود على امدرماني
United States [فرقتنا] 02-02-2013 04:25 AM
احييك علي التعليق


#574032 [Adam]
1.00/5 (1 صوت)

02-02-2013 02:01 AM
استاذي الفاتح شكرا علي المقال
المؤسف حقاهو حامل درجةدكتوراه من اي جامعة
كرار التهمامي ماسمع بنصيحة لقمان لابنةقال:يابني تعلم حسن الاستماع كماتتعلم حسن الحديث


#574007 [التجانى]
5.00/5 (9 صوت)

02-02-2013 01:25 AM
والله أنا أضيف أن نشجع هجرة الخبراء السياسيون الذين إكتسبوا خبرات متواصله خلال عقدين من الزمان


ردود على التجانى
United States [ود توتي] 02-02-2013 02:42 AM
المشكلة زي ديل ما بهاجروا. ديل ما الكاتلين الجداده وخامين بيضا


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة