لهجة أمدرمان
02-02-2013 08:38 AM

عندما نتحدث عن لهجة أمدرمان يمتعض البعض ، ويقولون أننا نتصور أشياء لا وجود لها . ولكن المفردات و اللغة التي يتحدثها أغلب أهل السودان اليوم بدأت في أمدرمان . وساعد في إنتشارها الراديو أو الإذاعة ، التي كانت تسمع حتى في دول الجوار . في كل العالم هنالك لهجات ترتبط بالمنطقة فاللهجة الإنجليزية المعروفة ب( الكوكني ) مرتبطة ب (لندن ) أنا أسكن في جنوب السويد ، فلهجة جنوب السويد تشابه اللغة الدنماركية . لأن جنوب السويد كان تابعا للدنمارك حتى القرن السابع عشر.
لغة الأردو التي يفهمها كل الهنود و نسمعها في الأفلام تعني لغة الجيش. لأن جنود أكبر وجدوا لغة مشتركة بينهم و تحوي بعض الكلمات العربية و الفارسية . وهذا ما حدث في لهجة أمدرمات تحوي على كثير من الكلمات و النوبية و لهجات أخرى . مثل عنقريب ، وشلوفة و قنقر و بعشوم هذه كلمات بجاوية . و كديسة و قرنتية و ككو و طورية هذه كلمات نوبية .
في ملكال كنت أذهب بإنتظام لفترة للفطور في فرن العم الأمين آدم و هو جد صديقي و زوج إبنة خالتي وهو الزراعي( بدرالدين عبد الرحمن) كنا في مدرسة ملكال الوسطى .أحد الآكلين وجارهم في الدكان كان شخصا" مميزا" ، إستمع إلي قليلا" وقال( الولد ده من أمدرمان ) و بالسؤال قال ( عرفتو من كلام ناس أمدرمان ديل ناس حنمشي ، وحنقول انحنا بقول بدور أمشي و بدور أقول ، وما بنقول حقي و حقتي ، بنقول الليلي و اللتي ) ذلك التاجر كان ذكيا" وصاحب ذاكرة خرافية وكان جزارا" كذلك . كان يستعين ببدر الدين آخر اليوم ليحل الرموز ( الهيروغلوفية ) التي كانت في دفتر الجرورة ، فكان لكل سلعة رمز( دوائر ، ومثلثات ، وسفروق ، وحربة ، و عكاز ، و أشياء ما أنزل الله بها من سلطان ) لأنه لم يكن يقرأ و يكتب . لهجته كانت لهجة بحر أبيض ، و بدرالدين يمثل طيبة و نقاء أهل بحر أبيض فهم أصلا" من ( الكوة ) . بدر الدين الآن صاحب شركة متخصصة في الحدائق الخاصة ، و بصماته موجودة حتى في القصر الجمهوري ، سمعت أنه طلب من أحد الطباخين أن يأتيه بغباشة له و للعاملين ، وعندما سمع (البشير) أراد أن يعرف من الذي يطلب غباشة لأن أهل الخرطوم و أمدرمان لا يعرفون الغباشة الآن. وعندما عرف (البشير) أن الطالب هو بدر الدين طاب بإدخاله لأنه يعرفه و غرابة الطلب هي التي لفتت نظر البشير. الغباشة هي نوع من الروب المخفف بالماء و يضاف إليه بعض الملح ، وهذا يعوض الجسم الأملاح و السوائل التي يفقدها عند العمل في الشمس . البشير يعرف الغباشة لأنه من (حوش بانقا) وأهل أمدرمان و العاصمة الآن لايعرفونها . عند الأتراك مشروب بإسم ( آيران ) يقدم في أفخم المطاعم و هو الغباشة نفسها .
عندما كنت أشجع ( أبو رزقة ) لاعب الهلال الذي كان يلعب لفريق النسر في ملكال ، كنت أصرخ ( شغل هلالك ، شغل هلالك يا أبورزقة ) و ( أوع يضربوك و أهلك بعاد ) سألني سحابة وهو لاعب كرة طويل القامة و صار حكما فيما بعد ( إنت يا ود من وين ؟ ) فقلت له ( أنا من أمدرمان ) فسألني ( وين في أمدرمان ؟ ده كلام ناس الموردة و العباسية ) . للكدارة كدايس و مساطب و هلال في المقدمة و هلال في المؤخرة. وسحابة كان من الموردة ، ويعمل موظفا" مثل أبو رزقة الذي كان موظفا" في الأشغال ، وأبو رزقة هو إبن أخت (خديري ) لاعب الهلال في الثلاثينات .
علميا" هناك لهجة إسمها لهجة أمدرمان لها قواعدها و مضابطها ، و الدليل كتاب معروف و مبني على رسالة دكتوراة من جامعة إنجليزية بإسم ( لهجة أمدرمان ) و الكاتب هو د. كمال إبراهيم بدري المحاضر في معهد المعلمين العالي و في نيجيريا و كينيا ، والسعودية و أندونيسيا .
أنا لم أولد في أمدرمان ، ولدت في الأبيض ، حبي الأول كان رمبيك التي وعيت فيها بالدنيا، ملكال هي بلد الطفولة و الصبا ، عشنا في أمادي ، ومريدي ، وجبيت ، وسنجة عبد الله. نحن نحب كل السودان.
اهلنا الرباطاب كانوا يتحدثون بلهجة الرباطاب عاشوا في رفاعة و تأثروا بلهجتها . أهل والدتي دناقلة رطانة ، دناقلة إسكندنافيا لم يتقبلوني و أشقائي كدناقلة إلا بعد حضور خالي (حسن محمد صالح أبتر) الذي لا زال يغرد بلغة الدناقلة ، وقام بإرسال شرائط بأحدث الأغاني النوبية لهم .
أمدرمان ما عندها سيد ، أمدرمان أنا و أنت و كل من يأتيها يصير إبنها أو بنتها ، و الدرمانة و المرخة و السلمة و الطلحة و السنطة هذه أشجار .



ونواصل
شوقي بدري
[email protected]
__________________


تعليقات 15 | إهداء 0 | زيارات 3635

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#574944 [صقر البرزن]
0.00/5 (0 صوت)

02-02-2013 11:37 PM
الاستاذ/شوقي لك تحياتي امدرمان في القلب بس ياخي ناساحقارين قلعوا مننا المطار
بالرغم من ان الدراسات اثبتت ان افضل موقع في شرق النيل


#574908 [عطوى]
5.00/5 (2 صوت)

02-02-2013 10:49 PM
لا حولاااااااااااااااا يا عالم انتو مالكم لبسكم شنووو ؟؟
الذول بونس فيكم ونسة دقاق لله كدا عارفكم نكدانين وكرهانيين كل حاجة من بهنا ابوساطور وبهنا نافع وبهنا الانتباهة .. المقال عبارة عن كاتب بيحاول بنفس عن زكريات وايام خلت خاصة وانة مطحون مع الغربة حتى ولو (ماخد مركزو) الغربة حاااااااارة الراجل بفضفض وبتونس تقلبو الموضوع سياسى وعنصرى لا حولة ؟
بس يا شوقى عليك الله المرة الجاية اشرح لينا باسلوبك مفردات ذى ( اللتى ؟) كتير سمعتها من اخوانا ناس الباوقة لكن لم افهم معناها يعنى (الخاص) بالشيىء لكن عايز تفسير اكتر ..
خلو الراجل يونسنا والعايز كلام العنصرية وتفاهات الكيزان الاعمدة على قفا من يقرا ..


#574906 [احمد ادريس]
5.00/5 (2 صوت)

02-02-2013 10:47 PM
يا ود بدرى لك التحايا العطره وجزاك الله عنا كل خير ارجوك الاتتوقف ولا تتأثر لأنك تكتب لمن يعرفون امدر كما يحلو لنا ان نناديها اى كلام جميل عن امدرمان يشجينا نطرب ونحن نتجول بين السطور بل بين الحروف هذه اخى شوقى ونسة ناس امدرمان العاديه جدا لايعرفها الا اهلهاالذين تطربهم ريحة الابرى الابيض ورائحة الحلومر فى شهر قصييييرتعطر اذقتها وشوارعها لم يفهم البعض ان شوقى اراد لنا ونسه لذيذه بعيده عن السياسه الكريهه يل جماعه ادوا انفسكم راحه شويه من السياسه نحن نرى امدر اجمل بقاع الارض وبلا مبالغه ...رأى الحجاج بن يوسف الثقفى بثينه التى قال فيها جميل شعرا مخلدافقال لها الحجاج والله يا بثينه لاارى فيك شيئا مما قاله جميل فردت عليه قائله ولكن ايها الامير جميل لم يرانى بعينك وهكذا نحن مع محبوبتنا امدرفهل نعيركم اعيننا كى تنظروا بها اليها وارجوا ان تقرأو ماذا قال فيها الخليل القادم من اقصى الشمال...وياشوقى استمر واطربنا بسيرة المحبوب الدرس صعب على الجماعه يحضرنى قول المحجوب رحمه الله فى الجمعيه التأسيسه عندما سئله احد الاعضاء عن شيئ فى بيان الحكومه وقال ان كلام رئيس الحكومه ما واضح رد العملاق الشاعر المحجوب (عليى نحت القوافى من حوافرها وما على ان لم تفهم البقر)..........


#574871 [محجوب عبد المنعم حسن معني]
5.00/5 (2 صوت)

02-02-2013 10:11 PM
الاخوة المعلقين والمعلقات
التحية لكم جميعا
فقط اردت ان اوضح نقطة هنا الا وهي ان العم شوقي قصد من هذا المقال الرد على احد الاخوة المعلقين في مقال سابق للعم شوقي يتسأل فيه عن ما هي لهجة امدرمان .
مع مؤدتي للجميع


ردود على محجوب عبد المنعم حسن معني
United States [محجوب عبد المنعم حسن معني] 02-03-2013 11:51 PM
نادر لم يلعب كورة، حاتم اخو نادر هو الذي لعب في الهلال وكان لعيب جداً اما معني فهو الذي لعب في المريخ لفترة ولكنه ترك، طبعا العب منهم كلهم عمي عصمت وكان اسطورة ولعب في المريخ زمان قبل ما نأتي للدنيا

United States [محجوب عبد المنعم حسن معني] 02-03-2013 07:51 PM
وتسلم انتى كمان يا ود ادريس، كل ما ذكر هنا حقيقة لا ينكرها الا مكابر وعمنا شوقي موسوعة في كل شئ متعه الله بالعافية ولك بالمثل ولجميع السودانيين وتحياتي

United States [سودانى طافش] 02-03-2013 05:03 PM
أخى ( محجوب ) .. تحياتى.. عذرا فالآن فقط إطلعت على ردك لى ويبدو قد تم سحب الموضوع قبل أنا أراه.. لقد سعدت أن أعرف أخبارهما فهم فعلا ( نادر عزت معنى ) و( معنى عصمت معنى ) فالزمن مضى سريعا والذاكرة أصابها ماأصابها فلقد ( طفشت ) من السودان 1980م وحتى الآن ..!
أستغربت بأن نادر كان بيلعب فى المريخ فلقد كان معنى ( أحرف ) ومهتم بالكرة أكثر منه ويشهد ميدان ( الأهلية) بذلك وكنا كلنا نلعب الكرة ماعدا طالب واحد وذلك لأسباب دينية وهو ( محمد الفاتح قريب الله ) واظنه شيخ الآن لأحدى الطرق الصوفية .!
تحياتى لك ولنادر ومعنى ..!

United States [IRIS] 02-03-2013 01:58 PM
تسلم محجوب وكلام عمنا شوقي صاح وخلال تجوالى وترحالي في وسط وغرب افريقيا وجدت كثيرة من الدول لهجتها مشابهة للهجة الدارجية السودانية وابسط مثال افريقيا الاوسطى اغلبية السكان غير مسلمين ولا حتى ليهم علاقة بالعرب بس اللغة اللعامية العربية هي اللغة الثانية بعد الفرنسية والتاريخ يصبح مفيد عندما يعكس ويحفظ معلومات غير مغلوطة

وعمنا شوفي البدري رجل بحر ونكن له الاحترام

United States [محجوب عبد المنعم حسن معني] 02-03-2013 10:48 AM
تحياتي يا سوداني طافش
راجع موضوع شوقي بدري رقم 3 في مكتبته في الراكوبة، رديت عليك انا وكمان رد عليك عمنا شوقي عن موضوع الزعيم الازهري.
ايضا راجع صورة عبود مع الفنانين هناك رد عليك في موضوع ثاني
مع مؤدتي

United States [سودانى طافش] 02-03-2013 07:23 AM
أخ ( محجوب ) ..تحياتى . ونحن طلبة فى ( الأهلية ) العامة كان معى فى الفصل أثنان أحدهما( معنى )فاتح البشرة وحريف فى كرة القدم وله إبن عم أيضا أظن إسمه ( نادر ) أو ( عزت ) أيضا معنا فى نفس الفصل .. أين هما الآن ..!


#574793 [جركان فاضى]
0.00/5 (0 صوت)

02-02-2013 08:31 PM
الاستاذ شوقى بدرى اختصر ام درمان فى صفة واحدة وهى ان ام درمان عبارة عن لهجة لا اكثر ولا اقل-فماذا بقى فيها بعد ذلك؟لا كفاح ولا نضال ولا ادب ولا فن-يقول التيجانى عامر ان ام درمان هى عصارة الفكر والادب والفن فى السودان حيث اتت بهم الثورة المهدية من جميع اصقاع السودان عدا ام درمان نفسها والتى لم تكن موجودة- ثم مات اهل الفكر والفن فيها ولم تلد بعدهم بعد- فام درمان لم تخلف وماتت وهى عقيمة الا من طفل مشوه اسمه النميرى دمر البلاد والعباد


#574680 [كل اجزاءه لنا وطن.. ولكل لغاته لنا لغة]
0.00/5 (0 صوت)

02-02-2013 06:32 PM
شنو يعني الجد على ام درمان. ما ياها ام درمان الزمان وبعدين شنو عندها لغة براها ما ياهو العربي بتاع السودانيين لغتهم بفهمها في الوسط وبفهما في الغرب وبفهما اللي في شرق. وبتاع الشمال. وبعدين ناس ام درمان ديل زاتهم مكونات ونتاج من الاقاليم. يعني اللغة اللي جابوها براهم ديل كيف ما عارفنها. والناس دي كلها كان بتتفاخر بيها لان تمثل عاصمة السودانية التاريخية. مش عشان غناها ولا سياسينها ولا قادتها.
انا بالمناسبة شمالي وكل جزء من السودان لنا وطن. لكن بعد ظهور جهويات العرقيات والاثنيات والديانات ظهرت جهويات تمثل مدن. ودا ببقى عدم موضوع. ام درمان بتمثل لي سوداني امدرمان التاريخ وام درمان العاصمة يعني الناس ما حبوها عشان بعرفوا اهلها فرد فرد مع احترامي لكل من يسكن فيها.
حقو نلتفت لامور تفيد السودان كدولة مش نقطع السودان دا لمدن دا عندو لغة ودا عندو ثقافة ودا دخيل ودا سيد بلد لانه دا منتهى التخلف وما بتقدم البلد ولا بتقدمها ابدا طالما كانت هذه العقلية


#574676 [بدر ok]
3.00/5 (2 صوت)

02-02-2013 06:30 PM
ينصر دينك يا (الحهج عبد الله).. بالله يا شوقي طالبينك مقال عن زيارة نافع للسويد يا عمك..

وفي ناس حسودين شوقي مفتخر بأهلو وشوقي شنو ما بعرفو داك.. شوقي بيقول في حاجات حصلت ويمكن التأكد منها.. وفي ناس يقولوا العباس جدهم.. لكن الحمد لله جهاز كشف ال DNA طلع واي واحد يعرف أصلو وفصلو...

(امدرمان الآن) هي ناتج كل الماضي جغرافيا وتاريخ والان امدرمان هي النوبة الماضي السحيق والجموعية اهلى الذاذ جدا الماضي القريب ... والحاضرين الآن من مختلف بقاع السودان دارفور وكردفان وكسلا وكوستي الخ الخ .. والبلد بخير وما عندنا عوجة الا كان درناها لي نفسنا وكلنا أخوااااااااااااان .. وكل الناس أهل والماهم أهل قربهم العمل وقربهم المكااااااااااااااان تعرف يا صبي .. هي الدنيا دي .. آبتستاهل ال.. تفكير غبي .. هي الدنيادي .. بسيطة شديد شديد .. بس يا إخوتي.. ننسى الما بيلم .. بينات الأهل .. وننسى الما بيسر .. ينقال للشقيق.. او لي زول رفيق .. او عابر طريق ... نحن من التراب وراجعين للتراب .. ونبقى أخير صحاب .. شان أولادنا ديل ما يعرفوا الخراااااااااااااااااااااااب تعرف يا صبي .. ما شاعر أنا.. لكن الكلااااااااام يخلى الزول يحسسسسسسسسسسس... و يدندن دندنااااااااااااااا........... شكرا


#574448 [رد على الغاضبة]
0.00/5 (0 صوت)

02-02-2013 03:46 PM
عن اي عنصرية تتكلم...العنصلرية الحقيقية هي عنصرية الانقاذ والكيزان..اهل امدرمان يمثلون جميع اعرافق واطياف الشعب السوداني.. وما يقوله اهل امدرمان عن انهم افضل من غيرهم هذه ليست عنصرية ولكن مجرد تفاخر طبيعي يحس به اهل اي مدينة في العالم ، حتى لو ذهبت الى اي مدينة في الريف تجد اهلها يدعون انهم اسيادها وعادة ما يصفون السكان الجدد بالغرباء...العنصرية والذل والمهانة اذقتها الانقاذ للشعب السودانب وحرام ان تتهمي اهل امدرمان الطيبين بمثل هذه الاوصاف..
الصراع بين المدينة والحضر امر طبيعي و جزء من عملية النمو و التحول الاجتماعي وهو امر يحدث في كل دول العالم خاصة تلك التي لم تحقق قدر كبير من المدنية ....


#574417 [ود السمكري]
0.00/5 (0 صوت)

02-02-2013 03:22 PM
هاشم بدر الدين كان بتاع كارتيه والحمد لله فشانا وتفة المنافق الترابي تفة تمام ويا شوقي معروف عنك القوة الجسمانية الكبيرة وكمان كنت ملاكم ابو العفين زاغ منك كيف ؟


#574300 [juvenile]
2.00/5 (3 صوت)

02-02-2013 12:41 PM
اسي الغرض من المقال دا شنو؟؟؟ الاستاذ دا بيكتب عنوان عشان يوصل الحاجات دي... اسكن السويد... اعرف البلدان الاسكندافية.... صديقي يسكن المجر... ابن عمي الباشمهندس فلان الفلاني الذي عمل بالنرويج و بلغاريا و الكنغو... صديق عم ابن خالتي الذي عمل في النرويج وكان حسن المعشر و تربطه علاقة صداقة مع حاكم البلدة.... شوقي بدري عفواً بس انت مريض


ردود على juvenile
United States [خالد] 02-02-2013 03:49 PM
والله انت المريض العقل والروح ..الحقد سمم كيانك وعقلك...وامثالك هم سبب خنوع الشعب السوداني ..بعض الاحيان اتمني ان تذلك الانقاذ اكثر واكثر


#574275 [عمار]
0.00/5 (0 صوت)

02-02-2013 12:13 PM
بلاش امدرمان بلاش كلام فارغ كل هذه الارض السودانية نوبية الاصل وحتى ملكال ....لية النكران؟؟؟؟الجموعية وغيرهم من المستعربين دخلوا مع جدهم الملعون ابن ابى السرح عند دخول العرب السودان بعد اتفاقية البقط....تاريخ وجود العرب فى السودان لايزيد عن المئتى عام....عندما يتحدث النوبة يجب ان يصمت الجميع إلا البدرى


ردود على عمار
United States [عمار] 02-03-2013 05:10 PM
ردا على صقر الجو أقول له أن النووبة كانوا موجودون ومازالوا حتى قبل ان يولد سيدنا نوح وكل الأنبياء سابقيه ولاحقيه....وانت متخيل انو ال200 سنة دى كتيرة...نحن النوبة نتحدث عن حضارة عمرها اكثر من7000عام....ياحليلك....اين كانت الجاهلية الأولى لأهلك المستعربين قبل الإسلام عندما عرف النوبة الأديان وإعتنقوا المسيحية؟

United States [صقر الجو] 02-02-2013 10:54 PM
وانت أهلك نزلوا مع سيدنا نوح أم جاءوا مع سفينة نوح ؟؟ تقول أن العرب جاءوا قبل 200 سنة، هذا معناه انهم وجدوا البلد فاضية أو ناسها نايمين، والا ما كانوا سيطروا عليها وحكموها

United States [صخر] 02-02-2013 05:37 PM
الكلام ليك ياعمار- صحيح كلنا سودانية الا الكيزان ديل جو من وين؟

United States [مواطن] 02-02-2013 03:59 PM
للأسف هذه لغة عنصرية ... عليك أن تتعايش مع الواقع فالسودان للجميع
عربا ونوبة و بجا وغيرهم عنصريتك لا تقل عن عنصرية الكيزان ..


#574165 [الدماكي]
5.00/5 (1 صوت)

02-02-2013 10:14 AM
انتو بتقولو انو ام درمان ما عندها سيد حتى تسقطوا حقنا فيها نحن الجموعية . ام درمان قبل ما يؤسسها المهدي كانت يقطنها الجموعية والمسألة دي معروفة. الآن ام درمان اصبحت كرش فيل يسكن فيها كل اهل السودان بلا إستنثاء . مع خالص شكري.


#574159 [سايكو]
5.00/5 (1 صوت)

02-02-2013 10:04 AM
مقال جميل لكن من ما جبت سيره البشير بطنا طمت ، البشير اب كرش البطيني طلع مقضيها في القصر اكل ساي و الناس جاعانه (غبش) الله وجهه .


#574137 [الغاضبة]
3.00/5 (2 صوت)

02-02-2013 09:40 AM
أمدرمان ما عندها سيد ، أمدرمان أنا و أنت و كل من يأتيها يصير إبنها أو بنتها ، و الدرمانة و المرخة و السلمة و الطلحة و السنطة هذه أشجار . انتهى الاقتباس

العنصرية والاستعلاء على الآخر بدأت من أم درمان، أذكر عندماتخرجت واشتغلت في الخرطوم كم كنا نعاني من استعلاء أهل أم درمان بأننا أغراب وعلينا ان نظل في أهلنا في الأقاليم ... وبالتأكيد هذا كان له تأثيره في أنفسنا، رغم اننا أتينامن مدن تمتد حضاراتها لآلاف السنين.. مما اضطرنا للهروب من بلد ظالم أهلها وحكومتها...


ردود على الغاضبة
United States [محجوب عبد المنعم حسن معني] 02-03-2013 12:27 PM
الاخت الغاضبة
تحية لك مرة اخرى
رغم انو عاتب عليك في كلمة نوعك ده، لكن برضه انا مسامح no hard feeling الاختلاف في الراي لا يفسد للود قضية لكن من غير تجريح ، لكن ارجع واقول واشدد على قضية مهمة الا وهي تنمية المناطق التي اتيتي منها وهذا هو قصدي، السودان ليس ملك لاحد، نعم يحق لك ولي وغيرنا ان يعمل في اي مكان في السودان، كلنا اخوة من نمولي لحلفا، متساوون في الحقوق والواجبات، شاء من شاء وابى من ابى ، الكلام هنا عن المصلحة العامة كثير من اخواننا واخواتنا تنكرو لمناطفهم واهلهم. فقط فضلو الجلوس في العاصمة في وقت كانت مناطقهم في اشد الحوجة لهم. وعزراً ان فهمتي ردي خطأ.
مع مؤدتي

United States [الغاضبة] 02-03-2013 10:56 AM
الأخ محجوب، لو كانت في تنمية متكافئة ما كنت اضطريت اشتغل في العاصمة، خلاص يعني لقيت وظيفة في قريتي ورفضت اشتغل فيها، بعدين السودان للجميع اشتغل في أي منطقة فيهو وأساهم في تنميته ولمعلوميتك اشتغلت في الخرطوم واشتغلت لجميع أهل السودان شمالهم وجنوبهم وغربهم بكل أمانة وصدق وما كنت أفكر لحظة واحدة في الهجرة لولا بعض العقليات المن نوعك هي التي دفعتني أن أترك وطني واتشرد في الأرض، وفضلت غربتي خارج وطني بدلا عن غربتي داخل وطني...

United States [سودانى طافش] 02-03-2013 07:33 AM
دى من أكبر مشاكلكم تلقوا الموية الباردة وعصير ( الخلاتة ) وإشارات المرور البتولع ليلا ونهارا والسمك المشوى الآيسكريم .. تانى مابترجعوا ..!

United States [محجوب عبد المنعم حسن معني] 02-02-2013 09:27 PM
الاخت الغاضبة
تحية لك
هذه واحدة من مشاكل السودان وهي انك اتخرجتي واشتغلتي في العاصمة
الم يكن لك ان تعودي وتعمري منطقتك او مدينتك بدل الخرطوم ايهما افضل ان تفيدي اهلك العلموك ، بعلمك وتساهمي في تطويرهم، ام تاتي وتجلسي في الخرطوم وتشتكي من عنصريتها.
يشهد الله زمان اهلنا اول ما يتمو تعليمهم بيطلبو نقلهم طواعية لمدن السودان المختلفة ويساهمو في تعميرها ووجدو كل الحب، لكن الان الوضع اختلف الكل عايز يجلس في العاصمة ، حتى وهو عاطل في نفس الوقت بيكون اهل منطقته محتاجين ليهو. ان شاء الله يكون كلامي وقع ليك
مع مؤدتي


#574123 [الحهج عبدالله]
5.00/5 (2 صوت)

02-02-2013 09:06 AM
اها يا شوقي لسع ما عرفنا رايك في زيارة نافع للسويد؟؟؟
نافع الشين وغندور البالطو ماخيال فيهم ههههههههههههههه


شوقي بدري
شوقي بدري

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة