المقالات
السياسة
ارشيف مقالات سياسية
هسي كان في داعي؟
هسي كان في داعي؟
02-02-2013 10:29 PM

قبل كم سنة كدة قررت الحكومة الرشيدة اجراء الاستفتاء لانفضال جنوب السودان "نظام البلد ديموقراطي وكدة". وبعد فترة تم الاستفتاء و شجع الخواجات الجنوبيين على الانفصال فانفصلوا. ثم علت على وجوه ناس الحكومة علامات الدهشة "عمك!" والحيرة "كيف الكلام دا" والاستغراب "ديل جادين؟" ممزوجة مع القليل من النكران "تزوير في التصويت" والبعض من الكبرياء "أنحنا بلدنا أحسن". لكن ما باليد حيلة فانتهت القصة على كدة. بلا بترول بلا بتاع، أصلا قيل أن الجعلي كان يحلب غنمته فرفسته.. فكشح اللبن على وجهها وقال "قالولك أنحنا محتاجنلو؟"
لكن وللأسف الشديد "أيوه محتاجنلو"! تدهور الاقتصاد واشتدت المعركة على أبيي وبعد فترة هجليج, وقال الجنوبيين "علي وعلى العدو" وأوقفوا ضخ النفط و أصبح الخلاف دولي. وفي 2012 وبرعاية الاتحاد الأفريقي و رئيس جنوب أفريقيا الأسبق ثابو مبيكي، وتحت ضغط عائدات النفط المفقودة وتهديدات قرار مجلس الأمن، أبرمت الخرطوم وجوبا اتفاق تعاون بأديس أبابا، تعهَّدتا فيه بحل المشاكل العالقة، و سحب قواتهما من الحدود، وإقامة منطقة منزوعة السلاح ، تمهيداً لاستئناف تصدير نفط الجنوب عبر الشمال. قام الناس كلهم ضغطوا "like" وقالوا سبحان الله! ولكن قبل أن ينفض القوم اختلفوا على تسعيرة نقل النفط عبر الأنابيب عن طريق الشمال وفشلت المفاوضات. وبعد برهه سمعنا بنفس المفواضات، جولة ثانية "ملاحق" والان في بداية 2013 جولة تالتة أو رابعة "احتمال أكون فوتت حلقة وانا ما عارف"! عموما الفكرة أصبحت واحدة ومملة وبايخة وأحسن الزول يحضر برشلونة أو ريال مدريد (أقل شي في أهداف).

هذا الوضع المتبلد من الجانبين أصابني أنا أيضا بحالة من التبلد السياسي أوصلني لمرحلة أصبحت لا أفكر فيها بمضمون المفاوضات بل بالتفاصيل. يركب البشير ووفده الطائرة ويركب سلفاكير ووفده الطائرة ويتلاقون في أديس أبابا. الحركة دي عملوها كم مرة وما نفعت؟ الحالة المشكلة الرئيسية بترول. هسي في داعي للبذار دا؟ الطيارة دي ما بتصرف بنزين؟ مرة أو مرتين ما مشكلة، لكن أكتر من كدا الناس حقو تدفع حق البنزين. وهسي في داعي رجال كبار كدة مخمخمين الشنط وماشين رحلة أثيوبيا الناس راكبين الطيارات ماكلين شاربين في فنادق أثيوبيا من غير أي سبب وجيه ولا أي نتيجة منطقية؟ الماشي أثيوبيا بيصرفو ليهو كم دولار؟ أو امكن الوفد عندو بطاقات طلبة، قالو الطالب في الجامعات البرة ممكن يصرفو ليهو لحد ألف دولار على شرط ما يستلمها إلا في المطار. هسي كان في داعي للمشوار دا كلو؟ ماسكين زمن بالشعب الما لاقي ياكل وماسكين زمن بمحطات الأخبار و في النهاية "لم يتوصل الطرفين لحل وفشلت المفاوضات"! هسي في داعي للإحراج دا؟ ما عيب؟ الناس تقول عليكم شنو؟

أنا أرى أنه ومنعا للإحراج، من الأفضل لكلا الوفدين الاشتراك في باقة "قرايب" لشركة ام تي ان والاستمتاع بتخفيض يصل إلى 50% في الاتصالات بين الطرفين. أما البشير وسلفاكير فعليهما إما اختيار خدمة التجوال الدولي "40 قرش للدقيقة فقط" أو الاشتراك في باقة زين لللأنترنت "سرعة تصل إلى 12 ميقابايت في الثانية" و يتموا ونستهم دي في برنامج ال “skype” لأن والصراحة راحة.. مفاوضات من غير نتيجة دي ونسة ساي!

ياسر عبدالرحمن حاج الخضر
[email protected]


تعليقات 8 | إهداء 0 | زيارات 1897

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#576458 [جيمى قانون]
0.00/5 (0 صوت)

02-04-2013 04:39 PM
يا مان كلامك اصلى... والذ حاجة فيهو انو ما فيهو طريقة المثقفاتية المطلعين عينا بكلامهم الفارغ... اسلوبك فى كتابة المقال بشبه المواطن العادى وبدون لف او دوران... داالمطلوب من الشباب انو يحاولوا يخاطبوا عقل عامة الشعب العينو طلعت وبقى ما شغال بالكلام الفارغ ... اسلوبك فى الكتابة بذكرنى طريقة الفقيد جون قرنق الناس كانت بتحبو شديد لأنو قدر يوصل كلامو للمواطن البسيط...


#576289 [قفة]
0.00/5 (0 صوت)

02-04-2013 01:26 PM
like


#576028 [الحميدي]
0.00/5 (0 صوت)

02-04-2013 09:02 AM
والله يا ياسر جيت من الآخر وكفيت ووفيت ,,,,, وحلوه نكتة الجعلي ......


#575606 [أبو الكجص]
0.00/5 (0 صوت)

02-03-2013 05:08 PM
والله يا ياسر أخوي كلامك صاح ومافي داعي لحوار الطرشان دا. حكومتنا(الكيزان) منبوذين ومافي حد طايقهم والجنوبيين لن يقبلوا بأي حل يأتي من حكومتنا لأنهم شاركوهم وعرفوهم وعرفوا مكايدهم ومهما انصلح حال بني كوز سوف تظل الثقة مفقودة بين الجانبين.


#575546 [ود الراوي]
0.00/5 (0 صوت)

02-03-2013 03:38 PM
أيوا صاح المفاوضات ونسة ساكت!


#575101 [امدرماني الركابية]
5.00/5 (1 صوت)

02-03-2013 08:13 AM
مقال ساخر ممتع ...باسلوب الفاتح جبرة .......زيد من كتاباتك يا ظريف......مع الشكر والتحايا


#575078 [فرقتنا]
5.00/5 (1 صوت)

02-03-2013 06:43 AM
اي والله مافي داعي


#575025 [karaka]
5.00/5 (1 صوت)

02-03-2013 02:20 AM
سؤالك وجيه...


ياسر عبدالرحمن حاج الخضر
ياسر عبدالرحمن حاج الخضر

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة