المقالات
السياسة
ارشيف مقالات سياسية
قربنا لحد المرونه يا كيزان .. فاستمروا !!
قربنا لحد المرونه يا كيزان .. فاستمروا !!
02-06-2013 05:58 AM

حريق داخليات جامعة الخرطوم عادي جداً بالنسبه للكيزان باعتبار انو دي أصغر جريمه ليهم من ٨٩ !!! فهم يا ما ارتكبو جرائم يشيب لعظمتها وقبحها الولدان وتقشعر لبشاعتها الابدان .. فهل حريق الداخليات اعظم جرما من تشريد الاف الاسر وقطع ارزاق الخلق بدعوي الصالح العام ؟؟ ام هي اعظم وابشع من قتل وتشريد الالاف في دارفور والنيل الازرق وجنوب كردفان ؟؟ وهل حرق الداخليات اخطر واسوء من تدمير وتجفيف وسائل الانتاج المحلي من زراعه بتدمير مشروع الجزيره وكل المشاريع الزراعيه .. وصناعه باغلاق المصانع وبيعها وتصفية كل الصناعات الوطنيه وتشريد كادرها .. وتعدين بجعل ثروات البلد مستباحه لكل من هب ودب وكل ذي مال وجاه .. ؟؟؟
وهل هنالك جريمة اعظم و اكبر من التفريط في سيادة ووحدة البلاد المتمثله في فصل الجنوب ؟؟
لكن السؤال الاهم هنا هو .. ماذا تعني لنا هذه الجريمه الان ؟؟
اجابة السؤال ده مهمه جداً خاصه للكيزان لأنو الجريمه دي ما الاولي ولا الاكبر لكنها أضافت لينا طن لتراكم الأحقاد والسخط الاصلا موجود تجاه الانقاذ بسبب الجرائم انفة الذكر وما اكثر جرائم الانقاذ التي لم تذكر لضيق الذاكره بها فهي لا تحصي ولا تعد ..
و التراكم ده طبعا هو البزيد بين اليوم والتاني دافع الثوره والتغير عند الشعب السوداني وبضيف بشكل كبير ناس جداد لخندق الثوره والثوار هؤلاء الناس في السابق قد يجوز أنهم كانو ضمن المدافعين (وبضراوه ) عن النظام أو في اسوء حال كانوا من المحايدين تجاهو ولكن استمرار جرائم النظام المتوالية والمتتاليه وعلي نسق (الجاهل عدو نفسو ) اصبحت تزيد من عزلته من الجماهير وسيستمر الامر هكذا الي ان يقضي الله امرا كان مفعولا والي ان يصل الشعب للحد الاقصي للمرونه ..
وصدقوني ان النظام سيستمر ويتمادي في تهوره وفي تصرفاته الصبيانيه الغير محسوبة العواقب هذه ولن يهدء له بال حتي يري نفسه مستقر تمام الاستقرار والطمئنينه في قاع مزبلة التاريخ مع المتسلقين والفسقاء وحسن اولئك رفيقا ..
..
عندها فقط سيحلو لنا ان نقف امام سارية العلم الجميل لنهتف جمادا احياء ارضا سماء ان نحن جند الله جند الوطن ......



بوشي
الاربعاء 6/2/2013
[email protected]


تعليقات 23 | إهداء 0 | زيارات 2797

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#579342 [سوداني مبارك]
0.00/5 (0 صوت)

02-07-2013 05:33 PM
التحية للا خ بوشي بس احب اوريك انو الشعب ده ماحيتحرك الا في حالة واحدة وهي الحالة التي وصل لها المصريين وهي انهم طوال فترة حكم مبارك الله يجازيه (شوه اسم الوالد بعمايلو) كانو بياكلو في بعض زينا هسي وسيستمر الوضع الا ان ينتهي العندنا بعديها ما حنلقي حل الا نقلع الجماعة ديل


#579152 [محمد حسن بوشي]
5.00/5 (1 صوت)

02-07-2013 01:33 PM
لكم التحيه جميعا وأشكركم اجزله علي مشاركتكم
وأود توضيح الآتي لعلي أجيب علي تسائل بعضكم ..
انا خريج هندسه ما صحافه ولا اداب ولا علوم سياسيه .. والكتابه الصفيه ليست من اهتماماتي لكي اسعي لتطوير قدراتي فيها وكذلك اعترف اني لا امتلك الموهبة فيها ولا استحي من ذلك ولا اعتبر ذلك من العيوب لأني قد امتلك الموهبه في شئ آخر قد لا يمتلكها الصحفيون ..
كده اتفقنا اني ما بكتب عشان انا عامل فيها صحفي ؟؟
انا بكتب عشان انا مستهدف كل الشباب وأين ما وجدو بكلامي البسيط الممكن أخاطب بيهو كل الشباب وبكل مستوياتهم الفكريه والثقافية فيس تو فيس ولاني طبعا ما ممكن طبعا اللتقي بيهم كلهم في مكان واحد فبقدم نفس الخطاب وبنفس البساطه في أي مكان وبأي أسلوب كان خطابي أو كان كتابه بلغه مبسطه تعبر ويتفاعل معها كل مشارب المجتمع بعيدا عن اللغه الصفويه المنمقه التي لا يتماها معها إلا فئه معينه . وده في تقديري ما بفيد الثوره لأنو ما بهبش وقود الثوره ..
..
وبعدين انا أصلا ما بتكلم إلا في موضوع واحد وهو إنجاز الثوره السودانيه وإسقاط النظام والإتيان ببديل وطني ديمقراطي تقدمي . والموضوع ده اصلا ما محتاج كلام منمق ومقالات رنانه ولغة عاليه مش كده ؟؟؟
أكرر شكري واحترامي للجميع ..


#578575 [hmamizo]
0.00/5 (0 صوت)

02-06-2013 08:31 PM
لانها الحقيقة ودائمآ الحقيقة حااااارة ؟؟ انظر معي جيدآ ماذا كتب مناضلكم هذا بوشي ؟؟ ولقد علقت في مقالات بوشي وقلت إن الانقاذ والكيزان يحكموننا وسيظلون يحكموننا مليووون سنة لان لايوجد كادر مؤهل محنك لايوجد مناضل سياسي مدرب لاتوجد معارضة حقيقية قوية متحدة متقاربة فكريآ لاتوجد خطط للاطاحة بالنظام لايوجد عمل مشترك للقيام بمظاهرة ؟؟ اسالك سوال ماذا فعل طلاب جامعة الخرطوم السياسيين طلاب حزب البعث والامة والاتحادي والشيوعي وغيرهم .. بعد حريق الداخلية ماذا فعلوا ؟؟؟؟؟ اتريد اسقاط النظام بالتمني يابوشي ؟؟؟؟


ردود على hmamizo
United States [أبو محمد] 02-07-2013 11:30 AM
الحقيقة يا أستاذ تكمن في هذا النظام الدموي وليس في ضعف أو جبن المعارضة ..
نظام كنمظام الإنقاذ ومليشياته يجعل كل من يفكر في الخروج عليه إحتمال 90% أن لا يعود لإهله ..
تراكم الظلم وزيادة الفقر والجوع ستجبر الشعب السوداني للهبة كعاصفة يمكن أن تهوي بكل الحصون الواهية التي شيدها الكيزان ..
اليوم لا مناصر للإنقاذ سوى منظم أو نفعي وهم مستفيدين من الأموال التي يحصلوا عليها من جبايات وإكراميات النظام وهناك بعض المخدوعين بفرية تطبيق بتطبيق الشريعة ..
نحي الأخ بوشي على نضاله ولو كان في السودان 100 من أمثاله لما بقي هذا النظام يوماً واحداً ...


#578557 [alfrayhi]
5.00/5 (1 صوت)

02-06-2013 07:57 PM
البوشي والله انتا من ارجل الرجال في السودان لانو كنت اول زول يهاجم نافع ويبهدلو على العامة وبعد داك الزول دا انكسر وبقى اية زول ما مديهو قيمة ...


#578513 [الدمارى ود عطبرة]
0.00/5 (0 صوت)

02-06-2013 06:41 PM
يا بوشى اشتغلت ولا لسة عاطل؟؟؟

محمد نافع قال حا يشغلك فى واحدة من شركات ابوهو رايك شنو؟؟


#578413 [abuahmed]
0.00/5 (0 صوت)

02-06-2013 04:46 PM
سينتهي هذا النظام انشاء الله قريبا ولكن لن يستطيع احدا ان يتكهن بنهايته كيف ستكون ولكن كل الدلائل تشير لاكتمال الوعي الشعبي بالداخل والخارج وبدأ الترهل والخوف يصيبه أضافة الى انه وصل الى طريق مسدود وليس في مقدوره سلك اي طريق آخر سوى الاستسلام او الانتحار

جعلي حقاني...........


ردود على abuahmed
United States [منصوررالجعلي] 02-07-2013 09:01 AM
ههههههههه. والله يا Abuahmed بتحلم وكمان بتحلمو ساي. والله فارقتو التغيير ف أق الطريفي لي جملو
دة نظام أسس نفسوا بي جيل كامل يعني أي زول عمرو ما بين ال 30 و ال 50 ربوهو علي ايديهم وعلموهو ووظفوهو وأي بعثة أو منحة وتسهيلات ادوهو. وبيت وسكنوهو. عربية وركبوهو. وقروش
شبعوهو
وريني ناسك البكوركو وبتراجلو ديل وقاعدين يتجلعوا. ويرفروا. مين وقع ومين مفوض وما بمثل لمن وقعوا عنهم في وثيقة الفجر الجديد الاتخرخروا منها وزاغو وكمان في من ادعي أنها حقتو زي ماقال الصادق المهدي،،،
بالله لو مستني ديل يغيروا ليكم النظام دة وطاطكن اصبحت ،،ليهم اكتر من عشرين سنة بنبحوا غير النضمي الدلدل شلاليفهم من كترتو شنو؟
بعدين المسمنهم أتوا كيزان ديل قاعدين فوق نفسكن عشان لا أتوا ولا المعارضة قادر يحدد موقفوا ويطلع في الشارع،،،
إها عرفنا الصادق والميرغني خائفين علي أولادهم ،، أتوا الخايفين عليهو شنو؟.
واصلا عندكن شنو عشان تخافوا عليهم؟. وتلاتة ارباعكم قاعدين عطالة
شوف أقولها ليك نصيحة مش عشان تمسكني وتقولي جعلي ،،، دة اسم أبوي مش قبيلة ،، اعمل شنو مافي طريقة اغيرو الأ لي اسم مطابق وبرضو حيطلع اسم قبيلة. اظنو جدي كان صاحبو جعلي وسمي عليهو،،،. المهم مادام التلاتة جلاكين ديل قاعدين(الثلاثي التعس الصادق المرغني الترابي) لا بخلو ثورة تقوم ولا بغيروا النظام ،، لأنو مافي مصلحتهم وإذا طلعتوا ثورة يسووا ليكم
يا فيها يا نفسيها،،، عشان كدة ما تتعبوا نفسكن ساي ،، إلا يموتوا. ومستحيل يموتوا سوا. إلا غايتو يركبوا ليهم عربية واحدة يكونوا ماشين بيت عزاء والسواق يبقي أخو اختو جد ويقوم بيهم و يفك العربية في اقرب ملف وينط ،، ان مات شهيد وان عاش بطل،،وغير كدة مافي حل،،،
لكين المشكلة الجلاكين شفوت أصلو ما بتلموا مع بعض في حتة واحدة بي سهولة والغريبة إذا اتلموا ما بقعدوا التلاتة جنب بعض. لازم ساندويتش في النص ،، لزوم الحماية. وبعدين ما يثقوا في بعض،، عاملين حسابهم شديد وعارفين اللامة فيها ليهم الطامة ،،
شفت يا Abuahmed الجماعة تفتيحة كيف؟.
عشان كدة مستنينكم تمرفقوا ويجوا ناطين يمنطقوكن وباقي لي انتوا حتستنوا كتير وهن حيموتوا بي حسرتهم إذا ماتوا قبال ما تطلعو،،،
عرفت ليه الجماعة ديل قاعدين وحيقعدوا


#578360 [sudanese]
5.00/5 (1 صوت)

02-06-2013 03:46 PM
البوشي يا تاج راس الشعب السوداني كفيت ووفيت ويكفي انك واجهتة هذا الاخرق نافع والله يوم الحساب قرب خلاص ياكيزان


#578355 [sudanese]
5.00/5 (2 صوت)

02-06-2013 03:44 PM
والله البوشي دا لو ماكتب اي شي راجل لو ورقة فاضية


#578295 [عدو الكيزان]
0.00/5 (0 صوت)

02-06-2013 02:28 PM
لك التحية أيها النشامي ،، وحتماً سنقتص لكل من ناله سؤ من هؤلاء الأنجاس الكلاب ،، كل يوم تسقط هذه الحكومة في نظر الشعب ،، وكل يوم ينتقص مؤيديه ومطبليه بسبب عنجهيتهم وصلفهم ،، فلابد من شمس الخلاص أن تشرق ولابد للقيد أن ينكسر .

سير ايها البطل فالتاريخ لن يرحم من تخازل في هذا المنعطف الخطير ..!!


#578251 [ابو محمد]
0.00/5 (0 صوت)

02-06-2013 01:51 PM
هل يمكن أن نقول (وحسن أولئك رفيقا)
ياخي حرام عليك
اللهم الا اذا أردت ان ترافقهم أنت
أرجو أن تفهم معنى ما تكتب ولا تقتبس من القرآن ما ليتماشى مع صياغة الموضوع
ولا أريد أن أقلل من شأن كتاباتك ودفاعك عن الحرية
ربنا يديك قدر نيتك


#578203 [Wad Alti]
5.00/5 (1 صوت)

02-06-2013 12:59 PM
بعد كل المصائب دي ويادووووووب قربنا لي حد المرونة ...؟؟؟


#578196 [باسطة]
0.00/5 (0 صوت)

02-06-2013 12:51 PM
التحية لك يا أخي بوشي و الإجلال لك يا أخي بوشي أينما كنت و حيثما حللت ،
التحية لك يا أخ الأبطال عبد اللطيف و عبد الفضيل و ود حبوبة التحية لك يا أخو مندي و هندوسة و حواء جنقو و حياة دينق و لبنى ،

قيام لعلم السودان ، قيام للمهندس محمد الحسن البوشي،

إن ذاكرتنا خربة و لكن الأبطال لا يُنسون أبدا

عازه قومي كفاك عازه غطي قفاك


#578056 [على القراشى]
5.00/5 (2 صوت)

02-06-2013 10:41 AM
اشهد الله انك ارجل سودانى اقابله فى حياتى ومواجهتك الشهيره لـ النجس نافع اكبر دليل على ذلك
اضافه الى الاعتقال لاكثر من 5 اشهر ومن لا يعرف هذا الرجل اى محمد حسن بوشى عليه فتح هذا المقطع
http://youtu.be/KjvKQYvJOEc
اخى محمد كل ماقلته اعلاه معروف وتحصيل حاصل ولن يكون اكثر ايلاماً من احداث الجزيره او مزابح دارفور او اعدامات رمضان وتصفية المناضليين فى السجون والمعتقلات وغيره
كم اتمنى ان تلغى صفتك الحزبيه وتكون قائد لجماهير الداخل من اجل تحول ديمقراطى وثوره سلميه كن انت القائد وسوف تجدنا بالمئات بل عشرات الالف من خلفك , تشجع اخى فانت امام فرصه كبيره لتدخل التاريخ من اوسع ابوابه , النضال ما يوم وليله , لقد كفرنا بالاحزاب التقليديه والاسلاميه واليساريه حتى نريد رجل مناضل حقيقى مثلك يوحد الاحرار السودانيين


#578053 [someone]
0.00/5 (0 صوت)

02-06-2013 10:36 AM
دولة الظلم الى زوال..وان طال عهدها.


#578026 [الغاضبة]
4.00/5 (2 صوت)

02-06-2013 10:19 AM
رسالتك وصلت يا بوشي، شكرا
واسمح لي أن أوجه كلمة إلى النقاد أو من ينصبون أنفسهم نقاد وناصحين للبطل بوشي، إن بوشي لم يعلن نفسه كاتبا ولا صحفيا ولم يكتب تحت اسمه كاتب صحفي ، فقط يريد إرسال رسالة وقد وصلت ...


#578004 [faten ahmed]
5.00/5 (3 صوت)

02-06-2013 10:05 AM
تسلم من المرونة ياسيد الرجال كل شهامة وشجاعة ورجالة
ولو وجد الف من الشباب المظلومين وعاطلين تشجعوا ووقفوا
واتسموا بشجاعتك لازالوا هذه الحكومة الفاشلة


ردود على faten ahmed
United States [faten ahmed] 02-06-2013 06:19 PM
ارتاح ياود ادم يا حثالة البوشي وقف امام نافع وتحداك كان تقدر تقيف امام نافع بدون بمبرز

United States [عدو الكيزان] 02-06-2013 02:30 PM
يا ود آدم العازب

أنت أتفه من خط حرفاً على هذا الجدار منذ متابعتنا لهذه المساحة ،، أنت مريض ويلزمك مراجعة طبيبي نفسي في اسرع وقت ،، هذه نصيحة لك .

United States [ود ادم العازب] 02-06-2013 11:21 AM
طيب يا فاتن ما نعرفسك ليهو أمكن يبطل المرونة دي


#577996 [حواء تودي]
5.00/5 (1 صوت)

02-06-2013 10:01 AM
قلبي ليك يا سوداني الحبيب كل يوم جريمة جديدة قتل وتشريد ياحليل زمن اجدادنا وحكاويهم
يا رب دمرهم وشتت شملهم كما دمرو السودان وحطموه.............


#577991 [أبو عمر]
0.00/5 (0 صوت)

02-06-2013 09:59 AM
أخي المناضل الاستاذ البوشي نصيحتي لك عدم كتابة المقالات ؛ أو الكتابة باسم مستعار الى أن تتمكن من امتلاك أدوات الكتابة ؛ من لغة وتعبير وما الى ذلك .أما التعليق أسفل المقالات فهذا لاباس به ؛ لانها تتم بلغة العوام .
ولا يظنن ظان اني اقول ذلك تقليلا من شأن هذا المناضل العظيم ؛ لا يمكن أن أفعل ذلك لرجل أخرس ذاك المتعجرف بذيء اللسان ؛ وهو رجل يحمل في دواخله كل السودان ؛ ويحس بآلام وآهات المرضى والجوعى والارامل .
لكن أقول ذلك لتظل صورته ناصعة في عقولنا وقلوبنا
هذا من فرط حبي لك


ردود على أبو عمر
United States [طفشانه حمد حمد امو] 02-06-2013 01:16 PM
رأيك سليم 100% أخي ابوعمر لانني ايضا احب هذا المناضل الشجاع بوشي كثر الله من أمثاله/ولكم تحياتي/

United States [شوك الكتر] 02-06-2013 12:58 PM
المقصود هو يااباعمر توصيل الفكره بصوره مبسطه وهاقد وصلت نان المقال الطويل والفصاحه لزومها شنو بوشى دا بطل امو مكحلاهو بالشطه يوم واجه ذلك المتعجرف نافع-البوشى كتابتو حلوه ولو كانت شخبطات واحتفظ بنصيحتك ياابو عمر عندك.

United States [المشتهي الكمونية] 02-06-2013 11:54 AM
لا يا أبا عمر
أعتقد أنك بتعليقك هذا تحرج البوشي برغم توضيحك الوارد في الفقرة الثانية
إذا حسنت النية كان يمكن استخدام البريد الالكتروني للبوشي المبين في ذيل مقاله


#577943 [ابومسلم]
0.00/5 (0 صوت)

02-06-2013 09:35 AM
حتما الى مزبلة التاريخ


#577932 [عثمان خلف الله]
0.00/5 (0 صوت)

02-06-2013 09:30 AM
شوف يا استاذ البوشى
نحنا شبعنا هتاف وشعارات من الاستقلال للان
الديمقراطيه والحريه والكرامه شبعانين منها وما فاقدنها ولو مغالطنى اسال مليون شخص فى الشارع قول ليهو حاسى انك مستعبد حايقول ليك لا
نحنا فقراء بس وجعانين بس
عايزين البديل يدينا برنامج كيف حايرفع السودان بدون شعارات لانو كلما تكتر الشعارات بتفقد المصداقيه ولو السودانى بتهزو الشعارات كان جوقة الربيع العربى اخدتو معاها
الشعب السودانى واعى جدا وما جبان بس بينظر للعواقب وبينتظر البديل الحقيقى الما واضح للان والانقاذ رغم سواتها مدياهم امل كل يوم مشروع جديد وكبرى جديد وشارع جديد وكهرباء تمتد كل يوم.
الناس خايفه باكر تفتش لى ده ما تلقاهو .


ردود على عثمان خلف الله
United States [مواطن مجروح] 02-06-2013 03:06 PM
اولا الشعب السوداني معظمه ما واعي او مغيب وثانيا معظمه جبان والدليل علي عدم الوعي كلامك ده وين المشاريع البتقول فيها ده ديل حتي المشاريع الكانت موجودة دمروها وما مشروع الجزيرة ومصانع النسيج والسكة حديد ومصانع الباقير وغيرها بعدين البديل الحقيقي البتكلم عنه ده منتظروه يجيك من وين ، البديل الحقيقي الدمقراطية وروح القانون والموسسية لا تنظر الي الافراد .


#577880 [احد ضحايا الالغاذ]
0.00/5 (0 صوت)

02-06-2013 08:43 AM
انشاء الله يا بوشي يا بطل يا اشجع سوداني وقف في وجه حاكم ظالم وقلت قولة الحق وربنا يكتر من امثالك ليكونو طلائع الثورة


#577830 [ابو العباس]
0.00/5 (0 صوت)

02-06-2013 07:13 AM
اخوى.. اقول ليك حاجة نوم.. وما نحاول نقلد المصريين فى اى حاجة


ردود على ابو العباس
United States [المتفائلة جدا] 02-07-2013 10:22 AM
المصريين العاجبنك ديل متين صحو من سباتهم العميق ؟؟نحنا ياعالم عندنا تاريخ مشرف فى الديمقراطية يفخر به أى سودانى ..عشان كده سنسمى ثورتنا القادمة وقريبا جدا بإذن الله بالديمقراطية الثالثة بل الرابعة منذ ثورة تحرير السودان ولن نقول عنها ربيع عربى .. خلوا الربيع العربى لناس الطلع جديد..ومامصدقين نفسهم وكمان مخلوعين بيه وأولهم المصريين والله لحسى متخيلين إنهم أول شعب يعمل ثورة .. نحن الثورات سبقنافيها دول كثيرة ناهيك عن العرب الذين صحوا متأخرا ومتأخر جدا مقارنة بنا..حتى دول آسيوية وأفريقية نحن سبقناهم نحو الديمقراطية الآتية قريبا بإذن الله ببركة ناس البوشى والشرفاء من أمثاله..
أيها الشعب السودانى الحر الأبى لا تكونوا إنهزاميين مثل أبو العباس ..نحن شعب مميز عن كل الشعوب الأخرى والله فى كل مكان حتى فى الدول الغربية ناهيك عن العربية.. ولا أقول كلامى هذا من فراغ ..لى سنين طويلة خارج السودان وعرفت الكثير عن شعوب أخرى كثيرة ..وبكل وعى وجدت دائماإن الشعب السودانى مهما شابه الآن من غبار الزمن لكنه شعب مميز .. ومميز جدا... مميز بوعيه ..بثقافته ..بقناعاته ..بصدقه..بكرمه .. بمروءته..بنبله..بكرامته وحتى بإحساسه بأنه حر مميز ومافى إنسان يقدر يذله ودى نتيجة إننا عشنا الحرية طول عمرنا.. ولابنقول يابيه ولا سعادة البيه ..وممكن أكتب إلى ما لا نهاية عن مزايا الشعب السودانى ..لن أقل لك نوم كما قلت لأرجل الرجال البوشى ..لكن بقول ليك أصح يا أبو العباس يانايم وخليك كلك ثقة إننا شعب مافى زيه وقريبا جدا حتشوف الشعب السودانى الذى له باع طويل فى كنس اليكتاتوريات حيعمل شنو وأنا مازلت متفائلة ..


#577823 [سايكو]
0.00/5 (0 صوت)

02-06-2013 06:41 AM
( الجاهل عدو نفسه ) و ديل اجهل خلق الله يا بوشي و زي ما قلت يا صاحبي قريب انشاء الله الحريه .


محمد حسن بوشي
محمد حسن بوشي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة