المقالات
الشعر
أسماء الجنيد
مولانا الصادق المهدي.. السترة والفضيحة متباريات!!!
مولانا الصادق المهدي.. السترة والفضيحة متباريات!!!
02-08-2013 09:53 AM


الإمام الصادق المهدي بعد السلام ..
نسمع كلامك نصدقك.. نشوف تصريحاتك نتحير ونطفش كلو كلو !!
والله لو فضل فد نافوخ للشعب ده بطير وبمرق في بلدا طيرها عجمي بي جنس تصريحاتكم البتشبه تماما الكي بالمخلوف في السمع والشوف !!
احسن تسكت وما تصرح بي نوعية كلامك البهرد الكبدة والمصران ويطفش باقي العقل!!
قرأت مساء اليوم هذا التصريح بإسم مولانا الصادق المهدي في الراكوبة :
((الخرطوم : الراكوبة
عزا الامام الصادق المهدى رئيس حزب الامة القومى تفكك الاسر السودانية الى تدهور التعليم بسبب سياسات الحكومة ووصف المجتمع السودانى كمن فى العناية المكثفة وان حاله اشبه بالانهيار بدليل تزايد حالات العنف الاسري ما بين الابناء والاباء وتوهان الشباب وضياعهم واتخاذهم لايقونات غربية كرموز لهم وتغنيهم باغنيات مثل ( اللبن ابو لى بيهو ) كنوع من التمرد على التقاليد والتراث تماشى من الوعى والاستلاب الثقافى الجديد ونوه عن العنف الاسرى والشبابي واستعلاء الثقافة الذكورية وقهر المراة)).
يعني شنو الشعب مخدر وفي الإنعاش ؟ وكيف تصف تفكك الأسر السودانية لعدم التعليم بسبب سياسة الحكومة! وفلذات كبدك محكرين في نصها وغرقانين في وحل حرامها لي إضنيهم!! واحد ضابط أمن!! الأمن السحق حرية المرأة السودانية وإغتصب حقوقها وقتل الأبرياء وعذب الأشراف!! هذا الجهاز إبنك ضابط فيه!! والثاني مستشار لرأس الحية كبير الأبالسة! وعينك يا شعب يا جاهل !!!
اسمع كلامك أقول اتانا الغيث مرة واحدة! اشوف سكاتك عن العوج وكمان تزيد الطين طملة بتصريحات تفور الدم للشعب الممكون وصابر ده أتحير ويتحير كل من يقرأ لك أكثر وأكثر!!
طيب ما دام عارفين سياسة الحكومة الأفسدت التعليم وافسدت الأجيال الحالية والجاية وافسدت الدنيا كلها !
ليه واقفين مكتوفي الأيدي وإنتو طالعين نازلين في البلد وبتتمتعوا بكل المزايا وما طاقيكم حجر دغش ؟
لا بتشكو من فقر تحمدو سيدكم، ولا تكاليف علاج ! كلو متوفر ومن الحكومة ذاتها ! وتسهيلات وسفر وفسحة مرة مصر ومرة لندن للعلاج !! والشعب جيعان ومرضان وعينو طالعة!!!
لماذا يا مولانا الصادق تلوّث تاريخك بفتات الكيزان؟ لماذا تسكتوا عن قولة الحق، وانتم تعلمون تماما
الساكت عن الحق شيطان أخرص؟ أنت اول العارفين بإنقلاب الإنقاذ في 89 !!
ثانيا هل يصدق العقل وقوف اولادك الإثنين ضدك !! ومشوا للكيزان بإرادتهم وكامل قواهم العقلية؟ ولم تثني اي واحد عن قراره الغير صائب جملة وتفصيلا!!! بل لطخوا تاريخ الأنصار الناصع وتاريخ جدودهم الأشراف.
تتكلم عن الإستعلاء الذكوري وإضطهاد المرأة من ناحية وتفسر كل العنف المنزلي الحاصل بسبب الحكومة ! وشايفين وسامعين جرائم الإغتصاب للأطفال الأبرياء والعزل وعارفين وشايفين اصل القضية,, وساكتين ومطنشين! حيرت الناس بصمتك وتصريحاتك الماشة عكس تصرفاتك,, تصريحات اخير منها السكات والصمت والفرجة من بعيد!!
أين دورك إنت كمناضل , وإنت تدري جيدا جماهير الأنصار في السودان أكثر من سبيب الرأس! بكلمة واحدة منكم هذه الجماهير الوفية تهز عرش الكيزان وتزلزلوا! ولا عشان الحكاية بقت مصالح وزيتكم في بيتكم والخراب بعم وبصل الأبناء اللسة ما إتهنوا بالمناصب المرموقة؟؟
الكيزان نجحوا تماما وإشتروا سكاتكم إنت والمراغنة بتعيين اولادكم! لكن للأسف بفتات الكرتة التي لا تسمن ولا تغني من جوع! البلد نشفت وقطت من مجاميعو، إتسميتوا بالشينة ساي، صدقوا أهلنا لما قالوا ((السترة والفضيحة متباريات))
الشينة الذي درعها أبناء الميرغني و الصادق في عباية المراغنة والأنصار سوف تتبعهم إلى ما شاء الله ومشاركتكم حكم الكيزان أخوان الشيطان لن ينساه ولن يغفره لكم هذا الشعب الصامت على مر الدهور والأزمان، وسيسجل التاريخ كل الكبوات وكل المساخر وكل الهفوات ولن يرحم ابدا..
الشعب ساندك في ثورة إبريل التي اتت بك ، مات من مات وتعذب الكثيرين وسط البمبان وإكتظت السجون بالشرفاء من أجلك!! ماذا قدمت له؟ هل هذا جزاه الآن تكيد له الكيد بمباركة تعيين إبنك مع أعداء الدين والإسلام؟ أعداء الحرية والديموقراطية؟ أعداء المرأة وأعداء الوطن قاطبة !!!
بل تغور الجراح أكثر وتصب علية الملح بتصريحاتك التي تدمي القلوب والمآقي!!!
رفقا يا مولانا بشعب مخلص ساندك يوما , إن لم تقدر ان تكون وفيا وتساعده بالتخلص من قبضة الديكتاتور, فلتقف بعيدا وتصمت!!!

متاوقة
التحية لجماهير الأنصار على إمتداد الأرض, أجزم عدم رضاها بل إستنكارها لما يحصل بإسمها!! لا ننكر نضال جدودكم جدود الوطن الذين رووا الأرض بدمائهم الطاهرة وكانت لهم صولات وجولات سجلها التاريخ بأحرف من ذهب,, لكن...البطن بطرانة!!!!
أسماء الجنيد
[email protected]



تعليقات 41 | إهداء 3 | زيارات 4567

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#581356 [المراقب]
0.00/5 (0 صوت)

02-10-2013 03:18 PM
يا كوشن تود بتقول الصادق المهدي شنو ؟؟؟ ده أهم أسباب ضياع السودان والسودانيين ،، كيف ؟ انو بقول ليك .... الزول كم مره إستلم الحكم في السودان وقت السودان كان بخيرو ،، عمل شنو ؟؟ غير جاب جاب الجوع للناس وتتذكر صفوف العيش قدام الأفران ولا ما سمعت بيها الزمن داك ؟ بعدين الحكاية كلها داخله في بعضها شيلني وأشيلك الصادق نسيب الترابي والترابي عم البشير ، أو كان ، وكلو سايح علي بعضو زي ما بيقوولو والدليل علي كده آهو ولدو ضابط بالأمن ( يعني لما يعتقلوا الشيخ الترابي ح يتوصي بيهو ، مش قريبو ، وتوكن فترة إعتقال الشيخ فترة نقاهه وراحة وإستجمام وعواميد من بيت الصادق وعواميد من بيت الشيخ ) وولدو التاني زي ما قال واحد من الأخوان مستشار لرئيس الجمهورية ،،، تاني دير شنو ؟؟؟؟


#581261 [أبوبكر سرالختم]
0.00/5 (0 صوت)

02-10-2013 01:55 PM
لماذا يا مولانا الصادق تلوّث تاريخك بفتات الكيزان؟ أي تاريخ هذا الذي تعنينه يا أستاذة ؟ تاريخ قتل الانتفاضات ووأد الديمقراطية بحجة النوم تحت وسادة ( مليشيات حزب الأمه )ام تاريخ آخر ما زال الشعب السوداني يدفع ضريبته( ممتلكات حزب الأمه) وسيدي المرغني .دعينايا أستاذة من هذا السُبات العميق فقد ضاع السودان بفضل هذين السيدين الجليلين فماذا ترتجي من احفادهم غير هلم جرا .ولك الشكر ولا تنفخي في ( قِرب )


#581221 [كوشن تود]
0.00/5 (0 صوت)

02-10-2013 01:15 PM
كاتبة المقال وأغلب المعلقين لو أنتم كيزان فأكتبوا ما شئتم وأتمني من الله أن يكون ظني صحيحا ولكن لو أنتم تغارضون الكيزان وتعشقون الحرية والديمقراطية والعدالة ودولة القانون فعلي السودان السلام .

للمرة الألف لست أنصاري ولا عضو في حزب الأمة ولست أنا من يمدح الشخص بغرض المدح ولكني أحب وطني وأبناء وطني الشرفاء المخلصين والصادق المهدي واحد منهم فهو شريف بن شريف يحترم الكل حتي خصومه .

لا تحكموا علي الرجل أي رجل بما يفعله أبنه أو فعله والده وعليكم أن تقرأوا التاريخ .

أما كونه رئيس لحزب الأمة لفترة طويلة فهذا لا يخصني ولا يخصك بل الأمر متروك للأنصار وأعضاء حزب الأمة .

أما من يقول أن الصادق المهدي رئيس وزراء السودان المنتخب هو المسؤل عن ضياع الديمقراطية الأولي والثانية فهو أيضا لا يجيد قراءة الأحداث فالديمقراطية الثانية شاركت في قتلها الجيش برفعه مذكرته الشهيرة والشعب الذي لم يستطع أن يتحمل هنات الديمقراطية لدورتين أو ثلاث وأعطي أنطباعا للكيزان بأنه ( أي الشعب ) يمكن أن يقبل أي أنقلاب وكان كذلك . فعندما أعلن الكوز الكذاب عمر بشير بيانه الشؤم لم ينزل الشعب كل الشعب الي الشوارع للدفاع عن الديمقراطية والقذف بالأنقلابيين الكيزان الي البحر .

قصرنا جميعا فضاع الوليد الجميل وضاع السودان وكذلك السنين ضاعت وا حسرتي وندعوا الله أن لا يرحم من كان سببا رئيسيا في ضياع الوليد والسودان والسنين وهم البشير والكيزان .


#580876 [أحمد]
0.00/5 (0 صوت)

02-09-2013 11:44 PM
الله أكبر ولله الحمد


#580829 [ابوالجعران]
0.00/5 (0 صوت)

02-09-2013 10:09 PM
بحب التنظير لاغير ينفع استاذ جامعي في علم الاجتماع وليس سياسي مرتزق اكراما لتاريخ اجداده والنار تلد الرمادبس احتمال نفسياته تعبانه لانو هو والميرغني سبق وهددو بالتصفيه ورضو بالمصادره للاملاك والان رد اعتبار بطريقه ناعمه ويا دار ما دخلك شر والشعب ياكل نيمو والصبر


#580695 [mohmd]
0.00/5 (0 صوت)

02-09-2013 06:02 PM
أختي الكريمة لا تخلطي بين سياسة السيد الامام وعمل أبنائه مع الحكومة فإنه ليس له عليهم سلطان لأنه رجل يؤمن بالديمقراطية وكانت تربية الأبناء علي هذا النحو كما ذكر هو سابقا واذا كان النبي نوح عليه السلام لم يستطع أن يهدي إبنه لما فيه خير له فكيف بالسيد الإمام؟ هدانا الله وإياك.


#580518 [gasimgasim]
0.00/5 (0 صوت)

02-09-2013 01:03 PM
والله كلامك زين وقوى ورصين.......لكن المتاوقه لازمتها شنو ما كلامك واضح والانصار جمال شيل من زمن الخواجات بس الحاصل ليهم شنو والله ما قادر اعرف!


#580439 [أبو وقار]
5.00/5 (1 صوت)

02-09-2013 11:27 AM
التحية لك ايها الكنانية وانت تقولين كلمة حق في امام اخر الزمان ، وكلمة الحق سيف مسلول لا يقدر علي حمله الا الشرفاء والشريفات من ابناء بلادي ، اصبح الناس وخاصة القيادات التاريخية يحيدون عن الحق بطرق بيٌنه وواضحه دون حياء أو خجل ، والشعب السوداني قطع الرجاء الا من الله سبحانه وتعالي ،قيادات تلطخت اياديها في اخر عمرها بالمشاركة السحية ( السكوت عما يفعل المؤتمر ا لوطني في الوطن وانسانه) وتخرصات هنا وهناك لذر الرماد في العيون حتي لا تتوجه اليها اصابع الاتهام والنقد،، فياعزيزتي ليس هناك معارضة في السودان وانما قيادات تتكسب من اسم المعارضة لتعيش علي فتات المؤتمر الوطني ،،


#580303 [مشاهد]
0.00/5 (0 صوت)

02-09-2013 08:37 AM
الإنسان العظيم ذكر الأسر السودانية ولم يستثن نفسه، عملا بالمثل "والبيته من قزاز.."،....


#580251 [زول النصيحة]
0.00/5 (0 صوت)

02-09-2013 02:39 AM
طيب يا هماميزو المادي بوزو جيت بالنجيضة ولا شنو؟
نعم بت الجنيد شاعرة ومرهفة ورقيقة. فاقد تروبي كيف يعني وهي شاعرة ومتمكنة من ناصية الحرف مالو لو كتبت عن التراث وعن الجروف والطين والمطر والغبش والغلابة؟ولا ديل إنت يا الما فاقد تربوي بتستعير منهم؟ الواحد فيكم لوما بعرف ينتقد يسكت ويقرأ بس.
هسه عليك الله شوف المتفقين مع المقال ده كم واحد؟ والمفندرين زيك كم؟ عشرين صفر بجدارة.


#580245 [تمر الفكى]
0.00/5 (0 صوت)

02-09-2013 02:12 AM
كلام فى الصميم


#580221 [الشايله هم البلد]
0.00/5 (0 صوت)

02-09-2013 12:54 AM
تسلمي يا استاذه ايوه دا الكلام الصاح اديلو من التقيل بس انشاءالله يحس ويحل عننا الوصايه الاجباريه دي اااااااااااخ الوجع كتييييييير يا بت الجنيد


#580220 [ابواحمد]
0.00/5 (0 صوت)

02-09-2013 12:52 AM
يااخت لو عارضتك هتقولي انا مع الكيزان،، بس السيد الصادق عارف حجمو في الشارع السوداني يبقا ماننفخ الراجل ساكت ونقول ليهو،، وإنت تدري جيدا جماهير الأنصار في السودان أكثر من سبيب الرأس! بكلمة واحدة منكم هذه الجماهير الوفية تهز عرش الكيزان ،، شكلك نايمه في العسل انتهي زمن سيدي الصادق وسيدي الميرغني وهم ادري مني ومنك بانهم لاقاعدة جماهيريه لهم عشان كدا قالو احسن نتصالح مع الناس ديل ونعيش باقي ايامنا منعمين ،،نضال شنو ومشاكل شنو


#580204 [انصارية حرة]
0.00/5 (0 صوت)

02-09-2013 12:27 AM
يا جماعة والله انا انصارية اما عن اب لي جد الجد.
ما نقعد نغالط نفسنا ونغطي لي لإمام كبوة مشاركة انجاله حكم الكيزان.
خلونا نكون موضوعيين ونعترف بالخطأ مرة لكي نواصل المشوار
التفككات الحالية في حزبنا سببها تصرفات الإمام وأنجاله
لازم نوحد كلمتنا لكي تتوحد صفوفنا
وما نتضايق من نقد الناس للإمام, إشمعنى النقد ما كان في مريم ولا رباح؟
لأنه رغم تصرفات والدهم لكن هن مشاركات في المظاهرات مع الشعب والدليل كسر يد الحبيبة مريم
أرحمونا من عواطفكم الما منها فايدة, الإمام لازم يتنحى ويمسك زمام المواضيع للشباب
ويا ليت لو يسلم الراية بعده للدكتورة مريم


ردود على انصارية حرة
United States [أنس] 02-09-2013 09:45 PM
يا انصارية حرة ليه يسلم الراية لمريم ؟

هل هذه الديمقراطية التي ظل حزبكم ينادي بها ؟

وليه ما يكون عندك طموح وتستلمي الراية انتي ؟

وهل لا توجد كوادر وقيادات مؤهله خارج هذه العائلة تستلم الراية من بعده ؟


#580182 [ود مطر]
0.00/5 (0 صوت)

02-08-2013 11:50 PM
الصادق المهدى رئيس حزب الامة القومى تفكك الاسر السودانية و تدهور الاوضاع المعيشيه للشعب والمعاناة التى يعيشها السودانيون لا تهمه كثيراً بل الأهم عنده مصالحه الخاصه ومنصباً حكوميا يليق يجد فيه ضالته ويحقق به رغباته بغض النظر عما وصل اليه حال المواطن السودانى المغلوب على أمره !!


#580135 [الأنصاري]
0.00/5 (0 صوت)

02-08-2013 10:42 PM
الاخت الكاتبة اسماء
نبرة كتابك للأمام فيها نوع من التعالي وانا المتابع والقارئ الجيد لمعظم مقالاتك
فيه سؤال هل يملك الامام عصا موسي حتي ينهر الكيزان ويطيروا ،،
باشارة من الحبيب الامام سينتفض كل الانصار من كل فج عميق صوب الخرطوم ليزلزلو اقدام الكيزان
ولكن كما ذكر الحبيب سابقا مين اللي حيدفع التمن ( الانصار ) وانتو اقعدو فراجة
والامام ينبذ العنف ويخاف الله في موت اي انصاري كان فيه السبب .
اولاد الامام كما ذكر وكرر هو يمارس الديمقراطيه في بيته ومن اراد منهم ان يكون شيوعيا فاليكن
خلاصة مقالك فيه تجني علي الامام ( وانت اول من عارف الانقلاب ) معقوووووولة


ردود على الأنصاري
United States [أبو وقار] 02-09-2013 01:54 PM
ياالانصاري ،الامام يرفض العنف !!! كلام جميل زي الدهب ،،، طيب تقول في حادثة ضرب ابنائه للوليد مادبو قول واحد ،وتاني ما تسمي التخطيط لضرب محمد عادل لا بل تصفيته وقول اتنين ، وماهو قولك في ضرب الكادر الحبيب محمد الماحي الانصاري قبل يومين من قبل رباطة عبد الرحمن الصادق ،، هل يا تري الامام ما سمع بهذه الاحداث ام اصبح الحزب حزب عصابة وشله همها مصادره حق الرأي ،، ام هل اصبح حزب الامة ينبذ العنف وحلال علي اولاده وابناء اخواته ومريديه الخاصين ،،، هذه مصيبة ،، كن شجاع وقول الحق ،،،،،،،، واسماء الحسين لم تطلب ا لمستحيل من الامام وانما استنكرت مهادنته للانقاذ ومواقفة الضبابية تدعو للريبة والتساؤل ،اليس كذلك ،،،،، وشكرالك

United States [تمر الفكى] 02-09-2013 02:17 AM
يالانصارى اصحى انت متيم وكلامك عاطفى. الامام بنحبو الا النصيجة شمس ما يغطيها طبق. ديمقراطية شنو البتتكلم عنا وين الديمقراطية فى حزب الامة؟ الله انصر الانصار واصبرهم فى مصيبتم الجاتم فى كبيرم


#580101 [محمدالنقر]
0.00/5 (0 صوت)

02-08-2013 09:35 PM
شكرا على المقال الجميل النابع من صحفيه لها وزنها ومتمكنه ربنا يوفقك والى الامام بازن الله يا بت الجنيد وبالنسبه للموضوع المقال للاسف ان من دمر السودان هم المهديه والمراغنى مز الاستقلال وهم يزرعون الفتن وينهبون خيراتو لاكن هيروحو فين من ربنا الله يدمرهم انشاء الله وشكرا مره تانى يابت الجنيد


#580007 [fadeil]
5.00/5 (1 صوت)

02-08-2013 05:14 PM
الأخت أسماء الجنيد لك التحيه والتقدير لهذا المقال وكما يعلم الجميع من أهلنا الغبش أن مولانا بن الصديق المهدى قد وصل به العمر عتيا ( مخرف بالمعني المفهوم ) زد علي ذلك أن ناس الانقاذ قد ةصل بهم الحد لتلجيم لسانه ومعروف لدينا جمبعا معني تلجيم اللسان ولهذا فعندما يضيق به الحال تجده يقف بجانب المكلومين ولما الانقاذ تفرجها له يمدحهم من غير ما يدرى ما يقول وهن هنا فأنا في رأيي أن تعذروه وتتركوه يقول كما يحلو له حتي يأتي الفرج لأهلنا الطيبين .


#580005 [ود دنقلا]
5.00/5 (1 صوت)

02-08-2013 05:11 PM
عافى منك يا بت بلدى كلام فى الصميم ..أرجو ألا تتوقفى عن فضح الوجوه المحروقة والمخبوءة
خلف أقنعة زائفة تغطى جبنهم وضيق أُفقهم


#579996 [عمار قدورة]
5.00/5 (1 صوت)

02-08-2013 04:58 PM
في الصمصيم , ياريت ناس مريوم يقتدوا بيك , هو مش قال عاوز يعتزل !!!


#579988 [fax]
5.00/5 (2 صوت)

02-08-2013 04:48 PM
(ربما) حتي بنات الصادق المهدي مكسوفات من أبوهن لم يعدن يكتبن مقالاتهن في الصحف أو تم منعهن بأمر من والدهن - هذا ما لم أشاهده علي الأقل بالراكوبة صحيفتي المفضلة ولا أقرأ غيرها أو ربما الراكوبة لا تقم بنشر مقالات لهن - علي كل أنا أخالف بعض المعلقين من أن الصادق المهدي لم يقدر علي إقناع إبنيه من المشاركة في النظام ,و أختلافي هو أن الصادق المهدي نفسه هو من أقنعهما بالمشاركة وليس منعهما, فهو من طالب النظام الفاسد بإرجاع إبنه لوظيفته العسكرية وأوفي له النظام ذلك بل وتمت ترقيته وإلحاقه بدفعته حدث هذا من دون إرجاع الضباط والمفصولين الآخرين وهم كثر ضحايا الرفد والتمكين والأسلمة.

دعوني أشبه كل من الصادق المهدي والميرغني بحالتي الجوال أحدهما صامت والثاني مفتوح ويتحدث... فالحالة الثانيةهي الصادق المهدي أم الحالة الأولي هي الميرغني الذي لا يتحدث كثيرا و أكاد أجزم أن ما يتعاطاه من أموال لهي أكبر من التي تعطي للصادق المهدي , لذلك لا يتحدث كثيرا, وستكشف لنا الأيام- بعدما ينقضي عهد هذا النظام الظالم أين كان موقعهم منه وكم عدد المبالغ التي يتسلمونها منه.


#579975 [عنبر عمر الطيب]
5.00/5 (1 صوت)

02-08-2013 04:06 PM
سلمت يداك واحمد الله ان الدنيا لسع بخير ما دام امثالك حيين ... ايوه اديهم فى التنك لكن ما حيحسوا لانهم عجايز وجلدهم بقى قولادى عديم الاحساس ... والله انا بستغرب على العجايز ديل ( الصادق والترابى والمرغنى ) يعنى بس هم الفاهمين البيقدروا يحكموا البلد والشباب لا ؟ يا سبحان الله .


#579943 [ام محمد]
0.00/5 (0 صوت)

02-08-2013 03:03 PM
عاملين الامام شماعة دا اعتراف انكم عاجزين من دونه طيب يجب ان يكون الخطاب باحترام


ردود على ام محمد
United States [hmamizo] 02-08-2013 11:24 PM
كلامك صااااح ؟؟ هي زاته فاقد تربوي عاملة مناضلة ومعارضة وشاعرة وشابكانا الجرف والدعاش ورزاز والدغش والغبش والغلابة وووو ........
وفي كل كوز بلا بت الجنيد بلا بطيخ ؟؟؟

United States [ود الفاضل] 02-08-2013 08:45 PM
كيف يا أم محمد عاملين الإمام شماعة؟ طبعا معروفين الأنصار مامكم ما بتقبلوا فيه النقد، مع يقينكم التام إنه غلطان ومحرجكم امام العامة، منو القال ليك راجين منه رجاء شيخكم الوقور؟ بت الجنيد خطابها فيه رأفة كبيرة على هذا الشيخ المتورط مع البشير وزمرته في كل شيء، إن رضيتو إن ابيتو الصادق المهدي هو الحنس ناس النظام عشان يرجعوا ليه ولده لوظيفةظابط تاني ويعينوا التاني مستشار، وهو يكون وراء الباب يناولهو المطلوب من قروش الشعب الإنتو منه، لكن عامياكم بصيرتكم من شوف غلط الإمام.قالت عاجزين! والله ضحكتيني.


#579909 [ali mustafa]
5.00/5 (1 صوت)

02-08-2013 02:00 PM
عفيت منك، اديلو، هرانا تصريحات متناقضة


#579890 [فرقتنا]
5.00/5 (2 صوت)

02-08-2013 01:31 PM
والله شدة ما معجب بالمقال تاني رجعت ونفسي اعرف ردة فعل الامام شنو ولما
رد علي مقالك اما انه لا يقرأ او اثناه الخجل
وكمان ياثروت قاسم عارفك ح تنط بي مقال
ارجوك وانا عارف مقدراتك الخطابية السلسة
بس ارجو النقد بي موضوعية وتثبت لينا انك
سوداني اصيل وبالرغم انك بتكسر تلج بس برضو انا بطالع عمودك لانو انا بحب بلدي السودان اتمني انك تنتقد المقال وعينك علي السودان وليس السيد الامام كما تحب ان تدعوه وخلفك قارئون حذقون افهم مني ومنك


#579867 [الملحمه]
5.00/5 (1 صوت)

02-08-2013 01:00 PM
حقيقه البطن بطرانه يا بت الجنيد ريحتيني بهذا المقال وهذه الحقيقه التي صمت الناس عنها الصادق والميرغني سبب دمار السودان لا هم اهل ايديولوجيه واضحه ولا اهل ديقراطيه واضحه لذا الزمن تجاوزهم


#579841 [أنس]
5.00/5 (2 صوت)

02-08-2013 12:23 PM
والله حرقتي دمه كان بسمع الكلام ‘ لكن لا حياة لمن تنادي ‘


#579829 [ود توتي]
4.00/5 (4 صوت)

02-08-2013 12:07 PM
حريقة في الانصار وفي امامهم طالما أبناءه مع هذا النظام


ردود على ود توتي
United States [الأنصاري] 02-08-2013 10:47 PM
ودتوتي
انت تسب فئة هامة في البلد وكيان ديني ملتزم ... يجب عليك انت تحترم وجهات النظر
ويضيق صدرك وانت تسب وتلعن في كيان اكيد لاتعرف عنه شئ البتة .
لايحرق بالنار الا رب النار


#579802 [kabi]
5.00/5 (2 صوت)

02-08-2013 11:33 AM
علي الصادق الهدي اعتزال السياسه لانه رجل متزبب الاراء مع احترامي لتاريخه السياسي وترك القياده الي ماهو اجدر منه في هذا التوقيت


#579789 [مهدي إسماعيل]
5.00/5 (2 صوت)

02-08-2013 11:19 AM
إذا كان الصادق المهدي -كداعية سياسي- غير قادر على إقناع إبنيه، فكيف يقنع بقية الشعب السوداني؟!
والله أنحنا الفي راسنا قنابير.


#579787 [فرقتنا]
5.00/5 (3 صوت)

02-08-2013 11:12 AM
بت الجنيد حاولت ارسل ليك بعد قراءة احر موضوع لك وكنت احمل الفكرة ولكني كنت احتاج اسلوبك وبريق رماح كلماتك المصيبه لان تتناولي هذا الموضوع . لا اخفي عنك ان كل كلمة كأنما تخرج من فمي ومن قلمي بك وكأني انا من كتبت لقد عبرتي عن ما يقلي بالجوف فسكبت سؤاة هذا المدعو بالامام الحفيد ونحن نقدر محمد احمد ابن السودان البار ونحفظ له نضالة وتعاليمة الفاضلة ولكن هذا لا يعني جهلنا بما يفعله الحفيد من تواطؤ باين وتآمر ضد الشعب ولك كل الود والتقدير كفيتي ووفيتي


#579782 [البحر الجديد]
5.00/5 (1 صوت)

02-08-2013 10:59 AM
والله أو فيتي وكفيتى يا أخت أسماء ما ضيعتا وضيع بلدنا غير مسك العاصية من النص من ناس فرضوا نفسهم فوق رأسنا ، وقفنا معاهم زي ما وضحت ي وكت كانو رمز لنظام ديمقراطي وج آتنا وكت الحارة يمسكو العصابة من النص ويهادنو من يقتلون أطفالنا ويغتصبون بناتنا، لكن لخير يمكن نهاية نظام الحرامية تكون نهاية الانتهازية الميرغنية الصادقية ومن لف لفها


#579778 [اللمبي بمسي]
5.00/5 (1 صوت)

02-08-2013 10:57 AM
ادوهم فتات كيف!! مليارت بالشواويل فتات!!!ده اكتر من السوهو طول عمرم!!وطول سنين تمسح الاحباب المجاني!!وبركاتم المابتجيب ليها رطل لبن!!!والا انتي قايله الشعلانه بالنشيه ليهم مبادئ!!دي مصالح ذاتيه وكروش قبل البروش!!! مامهم منو البجيب القروش!!!!اكان الانقاذ ادتم ياها زولم الحوار الفهيم!!والبدي سيدو انا بريدو!!!وهم بهمهم الحيران الغلابه البياكلو اللقمه في التقابه!!وهم بمصوا الايسكريم وبغلموا الاولاد في دريم!!! والشعب كلو لهم حيران ما لازم يتمتعوا !!منو البيولع النيران!! ويخدم التيران!!وبالمناسبة نحنه ليه مصرين عليهو!!وهو قال العايز يطلع يمشي ومبروك عليهو!! يعني بالمفنوش شوف ليكم شغله!وخلوه يسوا البريحو!لو قادرين اعملوا والسواي ماحداث!!مش يامولانا عايزنك تفدانا!وبعدين مابتبقه برانا!!واكان ماعندكم حل غير تتعلقوا فيهو!! انتظروا لامن مزاجو يجي ويكمل الحاريهو!!! اكان مالمه اسه بعدين عيونكم مابتخليهو!!!وحوار دفيع اخير من حوار داير دواس مابشار فيهو ولابيقدر عليهو!!


ردود على اللمبي بمسي
United States [بابو] 02-08-2013 10:08 PM
التحية لك استاذة / اسماء وعافية عليك يا لمبي ....


#579769 [اقبال حامد]
5.00/5 (1 صوت)

02-08-2013 10:39 AM
سلمتي يا اسماء .لافض فوك .اطمئن عندما اجد ان في هذا الشعب امثالك .بنات مقدامات واقلام جريئة .ان ماتقولين لهو بدبهي البديهي .لكنه يصعب على الكثيرين .ليس استيعابه ولكن الاعتراف به .اسف كثيرا عندما اجد شابات في مقتبل العمر مثلك يكتبن عن هذه الشخصية بتمجيد .ونحنا في واداي وهم في وادي .يضفون قدسية وينسبون انجازات وهمية له .ويتناسون فشل مايقارب الخمسون عاما لهذا الرجل وال المهدي وتكالبهم على السلطة.بل وتناقض باين بينونة كبرى في المواقف واجبار الشعب على قبول وضع غريب وشاذ.وهو ان يدعون مناهضة النظام وهم جزء منه . اكتبي يابنتي انتي ورفيقاتك .اكتبي واكشفي عن تناقضاته هو ومن مثلهم .اكشفوا زيف الساسة الذين اودوا بهذا الشعب ومقدراته الى الهاوية وهم يرفلون في العز والرفاهية .ويوهمون العامة او يتوهمون بانهمون يعمولون لمصلحة الشعب انهم اكبر داعم لهذا الظلم .ببساطة دا اسمه " يدي الحلة وصا والنقارة عصا " وهم المستيفيدون اولا واخرا في كل الاحوال .


#579753 [الصلاحابي]
5.00/5 (2 صوت)

02-08-2013 10:12 AM
التحية لكي اسماء وحقيقتاً اسماء
لقد اتيتي بالحقيقة
انا متأكد الصادق ما عندو مانع يكون الرئيس وبنفس قوانين الانقاذ
وكل التجارب من تاريخ السودان تثبت ذلك
ومن اهمها تفريطة في ثورة مارس /ابريل والمناورات الكان يعملها وعدم تنفيذ برنامج الانتفاضة
لانو يضيق بالديمقراطية


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة