قراية الجرايد شماعة
11-05-2010 01:44 PM

قراية الجرايد شماعة

استيلا قايتانو

السودان بلاد المفارقات اليومية لدرجة أن حواجبنا فترت من الارتفاع دهشة، وشلت كفوفنا من ضرب بعضها حتى جملة : والله لكن.. مبالغة!! تأبى أن تخرج.
من الحاجات العجيبة أنو تجي ماشي وتلقى الناس ملمومة مندقرة تحت ومربطة يدينا ورا ضهرا وهم ساكين بعض محترمين بعض في القراية الصامتة أم شماعة دي.

أول مرة أشوف المنظر دا قلت احتمال في زول واقع عيان أو مشحوذ بقلب الأسراتشات دولار أبو صلعة أو خطبة شعواء من أحد الدعا.. لكن اكتشفت أنو الناس دي بتقرأ في الجرايد واقفة وبتاع الجرايد فارش الجرايد في الواطة وقاعد ليه في طوبة وأظن مهنضب الجماعة بانو ممنوع الاقتراب أكثر من مستوى طولك يعني كل ما كنت قصير دا طوالي بهدد موقفه لأنو حتقراء أي حاجة في النهاية ما حتشتري الجريدة، في الغالب الواقفين ديل مافي زول فيهم بشتري الجريدة بالذات بعد ما بقت بجنيه.

الشيء الدايرة أنبه ليه إنو خطورة قراية المنشيتات والإكتفاء به لأنو وظيفة المنشيت الأساسية إصطياد القاريء ولفت انتباه لقراءة الموضوع ، بالبلدي كدا المانشيت وظيفتو الأساسية أنو يرفع مستوى شمارك إلى مية في المية ويخليك تشتري الجريدة بكامل قواك العقلية بعد داك يا بقى الخبر قدر المانشيت يا المانشيت كان أحسن من الخبر بألف مرة وبعد داك تبقى ليك ميتة وخراب ديار، لأنو قراية المانشيت فقط قد يعطيك جزء من الخبر وليس كلو أو قد يضخم الحدث ويعمل من الحبة قبة فقط للعب دور موية السكر البنعلموا للحمام عشان يرحلوا من برج الجيران لبرجنا.

نحذر من قراية الجرايد عموماً لانو يؤدي إلى الاكتئاب وفي جرايد تجننك عديل وفي جرايد تعمل انفصام وفي جرايد اسكت ساكت خلي ، ونقف بصلابة أمام الإكتفاء بقراية المانشيتات ونشجب وندين الأخبار المبتورة والمضخمة التي قد تؤدي إلى قطع رقاب.

اقتراح:

حقو بتاع الجرايد دا بس يشتري ليه كم نسخة من كل جريدة ويعمل ليه بنابر كدا ذي حقت ستات الشاي ويعمل ليه لافتة صغيرة.. أبدأ يومك بالصحيفة التي تحب.. وفش شمارك العالي من القلب (الجريدة بعشرة قروش فقط)..

أها شفت الأخيرة دي ذي المانشيت كل الناس تجي بعد داك يكتشفوا إنو القراية محلي وليس سفري وبمواعيد محددة، تقرأ الجريدة بعشرة قروش وفي عشرة دقائق انتهيت ما انتهيت دي ما شغلتو.. طوالي يصفر ليك ويقول ليك .. الزمن إنتهى.. ولو اتلايقت يتلائق كمان.. ويقول شنو هو.. دايرين يمتحنوك فيهو..!!؟

التحية لكل المهتمين باخبار البلد.. ونعلم تماماً بأنكم تصارعون أنفسكم ألف مرة في اليوم ما بين شراء جريدة بجنيه او كيس عيش أو رطل اللبن، طبعاً طوالي حأقول ليك أقرأ شماعة وشد الجرايد من الجنبك في الحافلة وفش غليلك حتى لو كان زهجان منك.. واصلاً حيكون سوداني زيك متمردق في الصبر مرديق وما حيقول بغم.. ولا يهمكم. كما أن الأشجار تموت واقفة.. يستطيع الإنسان أن يقرأ واقفاً..

ربنا يوقف حال الوقفوا حالنا.. ويشمع بيهم دنيا وآخرة..


تعليقات 19 | إهداء 0 | زيارات 6355

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#44467 [ابو كوج]
4.13/5 (8 صوت)

11-08-2010 12:38 PM
اقتراح:

حقو بتاع الجرايد دا بس يشتري ليه كم نسخة من كل جريدة ويعمل ليه بنابر كدا ذي حقت ستات الشاي ويعمل ليه لافتة صغيرة.. أبدأ يومك بالصحيفة التي تحب.. وفش شمارك العالي من القلب (الجريدة بعشرة قروش فقط)..

ربنا يوقف حال الوقفوا حالنا.. ويشمع بيهم دنيا وآخرة///رغم كل المقالات والتحليلات التي تملا الصحف السيارة جميعها لم اجد مقترحا لحل معضلة سواءاقتراح استيلا ///اديبة العصر ولو لا ان دعائها قد يفهم خطأ لؤلئك الحاقدين لما اضفت شيئا
وللتوضيح في دعائها المقصود ربنا يوقف حال الوقفوا حالنا ///يعني الله يرفع قدرهم فوق زي ما رفعوا قد ر حالنا فوق // آمين


#44122 [أبو ميعاد]
4.11/5 (7 صوت)

11-07-2010 02:12 PM
صرت مزاجا يوميا نراوحه كما القهوة الذكية ، لا تحرمينا من هذا النقش الرائع ونحن حنبقى شماعة طول الدهر لأن السودان كتب عليه أن يصلب على منصة الشقاء والتعاسة وذلك بفضل جهود ساستنا الجبارة الذين لم نختارهم ولم نؤلف لهم أغنية أو مقاطع ليسلبونا الفخر بسوداني أنا ...
نحن مشكلتنا كبيرة وعايزة تشريح وليس تشريع ، ولا فوض فوك
وأنا بتذكرك في مقاطع شماراتك دي بزاوية مشاترة في رمضان
كل الجريدة بقت شكل
فش للغبينة وللزعل
وإن ما عندك شمار
اسمك في السوق انفصل
وعشان كدا لازم نشمع كتير ولسه فاتنا كتير والراجينا أكتر
كتر خيرك استيلا


#44106 [fady]
4.12/5 (8 صوت)

11-07-2010 01:39 PM
الأخت الرائعة اسيتلا سلامات يازولة ياروعة


#44015 [ود العوض]
4.10/5 (10 صوت)

11-07-2010 10:15 AM
ربنا يوقف حال البشير وعلي عثمان ونافع والمتعافي ..
اللهم آميييييييييييييييييييييييييييييييييييييييين


#43964 [waheed]
4.13/5 (6 صوت)

11-07-2010 06:39 AM
بفصل الجنوب سوف نفقد ثروة اقتصادية ضخمة تزيد من معاناة المواطنين 0 بفصل الجنوب سوف نفقد ثروة اجتماعية فصل الجنوب سوف نفقد ثروة اعلامية وصحفية بفصل الجنوب سوف نفقد استيلا واخواتها واخوانها من الاعلاميين الذين نكن لهم كل الحب والتقدير فقد اتحفونا بارائهم واعمدتهم الرائعة دائما وسوف نفقد الكثير والكثير وربنا يجازى الكانوا السبب 0


#43792 [موجوع من الكيزان شديد,,]
4.16/5 (6 صوت)

11-06-2010 02:48 PM
رائعة يا استيلا يا بنت الجنوب الحبيب ,,,
كلام معبر للغاية ,,,
نتمني المزيد من التواصل يا استيلا ...
بريد الكتروني ,,,,,موقع ويب,,,,فيس بوك ,,,تويتر ,,,,وغيرها من وسائل التواصل ,,,
ربنا يوقف حال الوقنا حالنا ويشمع بيهم دنيا واخرة ,,,,
ااااااااااااااااااااااااامين ياربببببببببببببببببببب
اميييييييييييييييييييين يا رببببببببببببببببببب
اميييييييييييييييييييييين يا رببببببببببببببببب,,,
ربنا يوقف حال البشير وعصابته ويشمع بيهم في لاهاي ,,,


#43638 [الاغبش بن الهمش]
4.15/5 (7 صوت)

11-06-2010 02:42 AM
وبداءت راكوبتنا تدخلها اشعه الشمس المحرقه وزمهريرها فكوني لنا بتلك الاسطر الوريفه الظل والظلال لراكوبتنا ايتها الرررررررررررررراءعه اخوك الاغبش بن الهمش من سكان الراكوبه واصلاً حيكون سوداني زيك متمردق في الصبر مرديق وما حيقول بغم.. ولا يهمكم. كما أن الأشجار تموت واقفة.. يستطيع الإنسان أن يقرأ واقفاً..

ربنا يوقف حال الوقفوا حالنا.. ويشمع بيهم دنيا وآخرة..
;) ;) ;) ;) ;) ;) ;) ;) ;) ;)


#43634 [سوداني وحدوي ]
4.11/5 (9 صوت)

11-06-2010 01:57 AM

الأخت الرائعة اسيتلا ( نجمة جالصحف السودانية بلا منازع من جنوبنا الحبيب )

لم أجد الكلمات التي تصف قامتك العالية وفكرك الوثاب ووطنيتك الحقة وعقلك

المستنير, فعلاً أنت حمامة السلام التي تطوف بين ظهرانينا وكل يوم بنتعلم منك

درساً في الوطنيـــــــة, أطلب من الكتابة ثم الكتابة ثم الكتبة حتى نزيل كل الغبش

الذي يغطي خارطة بلادنا الغالية ولكن معــــــاً ســـــــــو ( كلمة نطق بها أبو الوطنية

د. جون قرنق ) سوا سوا سوا نوحد بلادنا ونسترضي ونتصالح مع كل أخواننا

في الجنوب وننسى كل خلافاتنا وبلادنا غنية بمواردها وكل العالم ينظر الينا بعين

طامعة في مواردنا الهائلة. ومعاً سو ننسى القبلية والجهوية وتكون هويتنا هي

سوادنيتنا فهي ماعون كبير يجمعنا ونعم للمواطنة وكلنا سواسية في الحقوق

والواجبات. والتعددية نعمة يجب أن نستثمرها في بناء بلاد قوية ومعطاءه.

لك ولكل الأخوه والأخوات الجنوبيات كل الود... ومليون سلام ...


#43628 [شمالي]
4.18/5 (7 صوت)

11-06-2010 12:59 AM
دائماً رائعة يا استيلا
يانا كدا نقرأ الجرايد على الواقف
خلال فترة قرايتنا للجرايد الواحد فينا يخش في مفاوضات مع نفسه حول مدى جدوي شرائنا للجريدة في مقابل الضرورات الأخرى
تصدقي يا استيلا إنها أصعب من مفاوضات ميشاكوس نفسها
نعمل شنو !(؟) (؟) (؟)
المعايش جبارة
في إنتظار جديدك يا استيلا يا أبنوسية يا رائعة


#43627 [tharwat gasim]
4.17/5 (9 صوت)

11-06-2010 12:49 AM
الشافع سميتو شنو


#43609 [خالد المبارك]
4.18/5 (7 صوت)

11-05-2010 11:11 PM
اخيرا ظهر عمودك الي كنت منتظرو زمن
انا كتبت تعليق عن هذا الموضوع 1999 ردا علي عبد اللطيف البوني و زكرت نفس الكلام عن قراءه الشماعه و كنت احد مدمنيها حتي لو كان عندي حق الجريد
هو في علم النفس بالرندوك بيسموه الشمار الجماعي
عندنا هنا في المانيا نفس ادمان الشمار الجماعي في متابعه شمار الجرايد بس لانه في المانيا شم الشمار شويه بطريقه راقيه و في غايه البساطه
كل جريده ) مش جريده مدرسه ذي جرايد السودان ) بتخت عدد اليوم علي ذجاج امام مبني الجريده و كل الصفحات حتي الوفيات و داءما المكان مليان عشان كده حسب ادماني بمشي الفجر و برضو بلاقي مدمن او اثنين
استيلا
ذيدينا من روعتك
اخوك خالد


#43600 [الساحر]
4.11/5 (9 صوت)

11-05-2010 10:19 PM
ربنا يوقف حال الوقفوا حالنا.. ويشمع بيهم دنيا وآخرة -- امين


#43575 [سيك سيك]
4.10/5 (9 صوت)

11-05-2010 08:56 PM
يا إستيلا ما عستي ليك طرقات كسرة تدينا منها أصلنا مكوفرين...... ولا مروقة تاكلي في الرغيف؟ ......................................................................................... التحية لك يارائعة بس شوفي لينا قصة الكسرة والعواسة دي.


#43560 [ابو فيصل]
4.07/5 (6 صوت)

11-05-2010 08:14 PM

اختنا استيلا قايتانو ( حمامة السلام)

يا ريت مقالاتك القادمه تكون عن السلام والاخاء والمحبه بين السودانيين . اقصد السلام الاجتماعى وليس السياسى. وانت خير من يكتب عن هذا الموضوع......


#43546 [adam]
4.15/5 (9 صوت)

11-05-2010 07:31 PM
حكامنا زاتو قرارتهم وقافى رئيسنا برقص وقافى ووزرائه تصريحاتهم سدارى والشعب السودانى ساكين الكيس وقفتهم مع صاحب الجرايد دى فقط دايريين شمار الكيس


#43545 [أبو علوة]
4.14/5 (10 صوت)

11-05-2010 07:31 PM
أستيلا تمشي وسط الناس ومواضيعها من وسط الناس فكم عدد الكتاب والصحفيون الذين رءوا منظر الناس تقرأ الجرايد بهذه الطريقة ولم يعيروة إهتمامهم او الكتابه فيه ، هذا الذي يميزك إستيلا ، وما يميزك اكثر نقل الصورة بالكلمات أكثر من حملة الكاميرات ، ففعلا نحتاج لبنابر كتيرة بعد بنابر ستات الشاي المنتشرة بنابر لقراية الجرايد بنابر للكتاب المدرسي بنابر لعدة الجمعية بنابر لكتابة الطلبات بنابر قدام الوزارات للمراجعات بنابر لتدخين السجاير بالنفس بنابر ، فالملكية أصبحت لذوي الحظوة فما لنا الا البنابر بعد فشل المنابر ،،،، شكرا أستلا


#43537 [قرقش]
4.11/5 (12 صوت)

11-05-2010 06:13 PM
كتاباتك رائعة يا استيلا بقدر روعة الوطن الجميل .. لأنك تضعي ايدك حيث الوجع .. الوجع يا ناس...! (ونعلم تماماً بأنكم تصارعون أنفسكم ألف مرة في اليوم ما بين شراء جريدة بجنيه او كيس عيش أو رطل اللبن). وغدا يوم اخر...!.


#43534 [kisha]
4.12/5 (10 صوت)

11-05-2010 06:01 PM
الاخت كاتبتنا المميزة استيلا وكما قال احد شعراءنا مرة ولا دستة رجال ..........................
اذا الجماعة ديل فصلو البلد ودسو الحقن الاصلها مافي دي مننا فنحن ابناء الشمال(اسف جدا) نرحب بكل اخ واخت من ابناء جنوب الوطن الجريح بين ظهرانيينا واولههم انت والرائعين مثلك لهم دائما مكان اسمى


#43503 [سيف ]
4.11/5 (10 صوت)

11-05-2010 03:57 PM
الاخت استيلا
لك التحية بحجم المليون مربع
اختي هكزا حالنا في السودان نقراء واقفين ونحلم ونحنا صاحيين
ونضحك ودموعنا جارية ولكن سوف ياتي الصبح يوما ما


استيلا قايتانو
استيلا قايتانو

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة